੬. ਦਦ੍ਦਲ੍ਲਵਿਮਾਨਵਤ੍ਥੁ

੬੧੯. ‘‘ਦਦ੍ਦਲ੍ਲਮਾਨਾ [ਦਦ੍ਦਲ਼੍ਹਮਾਨਾ (ਕ.)] ਵਣ੍ਣੇਨ, ਯਸਸਾ ਚ ਯਸਸ੍ਸਿਨੀ;

ਸਬ੍ਬੇ ਦੇਵੇ ਤਾਵਤਿਂਸੇ, ਵਣ੍ਣੇਨ ਅਤਿਰੋਚਸਿ.

੬੨੦. ‘‘ਦਸ੍ਸਨਂ ਨਾਭਿਜਾਨਾਮਿ, ਇਦਂ ਪਠਮਦਸ੍ਸਨਂ;

ਕਸ੍ਮਾ ਕਾਯਾ ਨੁ ਆਗਮ੍ਮ, ਨਾਮੇਨ ਭਾਸਸੇ ਮਮ’’ਨ੍ਤਿ.

੬੨੧. ‘‘ਅਹਂ ਭਦ੍ਦੇ ਸੁਭਦ੍ਦਾਸਿਂ, ਪੁਬ੍ਬੇ ਮਾਨੁਸਕੇ ਭਵੇ;

ਸਹਭਰਿਯਾ ਚ ਤੇ ਆਸਿਂ, ਭਗਿਨੀ ਚ ਕਨਿਟ੍ਠਿਕਾ.

੬੨੨. ‘‘ਸਾ ਅਹਂ ਕਾਯਸ੍ਸ ਭੇਦਾ, ਵਿਪ੍ਪਮੁਤ੍ਤਾ ਤਤੋ ਚੁਤਾ;

ਨਿਮ੍ਮਾਨਰਤੀਨਂ ਦੇਵਾਨਂ, ਉਪਪਨ੍ਨਾ ਸਹਬ੍ਯਤ’’ਨ੍ਤਿ.

੬੨੩. ‘‘ਪਹੂਤਕਤਕਲ੍ਯਾਣਾ, ਤੇ ਦੇਵੇ ਯਨ੍ਤਿ ਪਾਣਿਨੋ;

ਯੇਸਂ ਤ੍ਵਂ ਕਿਤ੍ਤਯਿਸ੍ਸਸਿ, ਸੁਭਦ੍ਦੇ ਜਾਤਿਮਤ੍ਤਨੋ.

੬੨੪. ‘‘ਅਥ [ਕਥਂ (ਸੀ. ਸ੍ਯਾ.)] ਤ੍ਵਂ ਕੇਨ ਵਣ੍ਣੇਨ, ਕੇਨ ਵਾ ਅਨੁਸਾਸਿਤਾ;

ਕੀਦਿਸੇਨੇਵ ਦਾਨੇਨ, ਸੁਬ੍ਬਤੇਨ ਯਸਸ੍ਸਿਨੀ.

੬੨੫. ‘‘ਯਸਂ ਏਤਾਦਿਸਂ ਪਤ੍ਤਾ, ਵਿਸੇਸਂ ਵਿਪੁਲਮਜ੍ਝਗਾ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੬੨੬. ‘‘ਅਟ੍ਠੇਵ ਪਿਣ੍ਡਪਾਤਾਨਿ, ਯਂ ਦਾਨਂ ਅਦਦਂ ਪੁਰੇ;

ਦਕ੍ਖਿਣੇਯ੍ਯਸ੍ਸ ਸਙ੍ਘਸ੍ਸ, ਪਸਨ੍ਨਾ ਸੇਹਿ ਪਾਣਿਭਿ.

੬੨੭. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੬੨੯. ‘‘ਅਹਂ ਤਯਾ ਬਹੁਤਰੇ ਭਿਕ੍ਖੂ, ਸਞ੍ਞਤੇ ਬ੍ਰਹ੍ਮਚਾਰਯੋ [ਬ੍ਰਹ੍ਮਚਰਿਨੋ (ਸ੍ਯਾ.), ਬ੍ਰਹ੍ਮਚਾਰਿਯੇ (ਪੀ. ਕ.)];

ਤਪ੍ਪੇਸਿਂ ਅਨ੍ਨਪਾਨੇਨ, ਪਸਨ੍ਨਾ ਸੇਹਿ ਪਾਣਿਭਿ.

੬੩੦. ‘‘ਤਯਾ ਬਹੁਤਰਂ ਦਤ੍ਵਾ, ਹੀਨਕਾਯੂਪਗਾ ਅਹਂ [ਅਹੁਂ (ਕ. ਸੀ.)];

ਕਥਂ ਤ੍ਵਂ ਅਪ੍ਪਤਰਂ ਦਤ੍ਵਾ, ਵਿਸੇਸਂ ਵਿਪੁਲਮਜ੍ਝਗਾ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੬੩੧. ‘‘ਮਨੋਭਾਵਨੀਯੋ ਭਿਕ੍ਖੁ, ਸਨ੍ਦਿਟ੍ਠੋ ਮੇ ਪੁਰੇ ਅਹੁ;

ਤਾਹਂ ਭਤ੍ਤੇਨ [ਭਦ੍ਦੇ (ਕ.)] ਨਿਮਨ੍ਤੇਸਿਂ, ਰੇਵਤਂ ਅਤ੍ਤਨਟ੍ਠਮਂ.

੬੩੨. ‘‘ਸੋ ਮੇ ਅਤ੍ਥਪੁਰੇਕ੍ਖਾਰੋ, ਅਨੁਕਮ੍ਪਾਯ ਰੇਵਤੋ;

ਸਙ੍ਘੇ ਦੇਹੀਤਿ ਮਂਵੋਚ, ਤਸ੍ਸਾਹਂ ਵਚਨਂ ਕਰਿਂ.

੬੩੩. ‘‘ਸਾ ਦਕ੍ਖਿਣਾ ਸਙ੍ਘਗਤਾ, ਅਪ੍ਪਮੇਯ੍ਯੇ ਪਤਿਟ੍ਠਿਤਾ;

ਪੁਗ੍ਗਲੇਸੁ ਤਯਾ ਦਿਨ੍ਨਂ, ਨ ਤਂ ਤਵ ਮਹਪ੍ਫਲ’’ਨ੍ਤਿ.

੬੩੪. ‘‘ਇਦਾਨੇਵਾਹਂ ਜਾਨਾਮਿ, ਸਙ੍ਘੇ ਦਿਨ੍ਨਂ ਮਹਪ੍ਫਲਂ;

ਸਾਹਂ ਗਨ੍ਤ੍ਵਾ ਮਨੁਸ੍ਸਤ੍ਤਂ, ਵਦਞ੍ਞੂ ਵੀਤਮਚ੍ਛਰਾ;

ਸਙ੍ਘੇ ਦਾਨਾਨਿ ਦਸ੍ਸਾਮਿ [ਸਙ੍ਘੇ ਦਾਨਂ ਦਸ੍ਸਾਮਿਹਂ (ਸ੍ਯਾ.)], ਅਪ੍ਪਮਤ੍ਤਾ ਪੁਨਪ੍ਪੁਨ’’ਨ੍ਤਿ.

੬੩੫. ‘‘ਕਾ ਏਸਾ ਦੇਵਤਾ ਭਦ੍ਦੇ, ਤਯਾ ਮਨ੍ਤਯਤੇ ਸਹ;

ਸਬ੍ਬੇ ਦੇਵੇ ਤਾਵਤਿਂਸੇ, ਵਣ੍ਣੇਨ ਅਤਿਰੋਚਤੀ’’ਤਿ.

੬੩੬. ‘‘ਮਨੁਸ੍ਸਭੂਤਾ ਦੇਵਿਨ੍ਦ, ਪੁਬ੍ਬੇ ਮਾਨੁਸਕੇ ਭਵੇ;

ਸਹਭਰਿਯਾ ਚ ਮੇ ਆਸਿ, ਭਗਿਨੀ ਚ ਕਨਿਟ੍ਠਿਕਾ;

ਸਙ੍ਘੇ ਦਾਨਾਨਿ ਦਤ੍ਵਾਨ, ਕਤਪੁਞ੍ਞਾ ਵਿਰੋਚਤੀ’’ਤਿ.

੬੩੭. ‘‘ਧਮ੍ਮੇਨ ਪੁਬ੍ਬੇ ਭਗਿਨੀ, ਤਯਾ ਭਦ੍ਦੇ ਵਿਰੋਚਤਿ;

ਯਂ ਸਙ੍ਘਮ੍ਹਿ ਅਪ੍ਪਮੇਯ੍ਯੇ, ਪਤਿਟ੍ਠਾਪੇਸਿ ਦਕ੍ਖਿਣਂ.

੬੩੮. ‘‘ਪੁਚ੍ਛਿਤੋ ਹਿ ਮਯਾ ਬੁਦ੍ਧੋ, ਗਿਜ੍ਝਕੂਟਮ੍ਹਿ ਪਬ੍ਬਤੇ;

ਵਿਪਾਕਂ ਸਂਵਿਭਾਗਸ੍ਸ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੬੩੯. ‘‘ਯਜਮਾਨਾਨਂ ਮਨੁਸ੍ਸਾਨਂ, ਪੁਞ੍ਞਪੇਕ੍ਖਾਨ ਪਾਣਿਨਂ;

ਕਰੋਤਂ ਓਪਧਿਕਂ ਪੁਞ੍ਞਂ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੬੪੦. ‘‘ਤਂ ਮੇ ਬੁਦ੍ਧੋ ਵਿਯਾਕਾਸਿ, ਜਾਨਂ ਕਮ੍ਮਫਲਂ ਸਕਂ;

ਵਿਪਾਕਂ ਸਂਵਿਭਾਗਸ੍ਸ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੬੪੧. [ਵਿ. ਵ. ੭੫੦; ਕਥਾ. ੭੯੮] ‘‘ਚਤ੍ਤਾਰੋ ਚ ਪਟਿਪਨ੍ਨਾ, ਚਤ੍ਤਾਰੋ ਚ ਫਲੇ ਠਿਤਾ;

ਏਸ ਸਙ੍ਘੋ ਉਜੁਭੂਤੋ, ਪਞ੍ਞਾਸੀਲਸਮਾਹਿਤੋ.

੬੪੨. [ਵਿ. ਵ. ੭੫੧; ਕਥਾ. ੭੯੮] ‘‘ਯਜਮਾਨਾਨਂ ਮਨੁਸ੍ਸਾਨਂ, ਪੁਞ੍ਞਪੇਕ੍ਖਾਨ ਪਾਣਿਨਂ;

ਕਰੋਤਂ ਓਪਧਿਕਂ ਪੁਞ੍ਞਂ, ਸਙ੍ਘੇ ਦਿਨ੍ਨਂ ਮਹਪ੍ਫਲਂ.

੬੪੩. [ਵਿ. ਵ. ੭੫੨; ਕਥਾ. ੭੯੮] ‘‘ਏਸੋ ਹਿ ਸਙ੍ਘੋ ਵਿਪੁਲੋ ਮਹਗ੍ਗਤੋ, ਏਸਪ੍ਪਮੇਯ੍ਯੋ ਉਦਧੀਵ ਸਾਗਰੋ;

ਏਤੇ ਹਿ ਸੇਟ੍ਠਾ ਨਰਵੀਰਸਾਵਕਾ, ਪਭਙ੍ਕਰਾ ਧਮ੍ਮਮੁਦੀਰਯਨ੍ਤਿ [ਧਮ੍ਮਕਥਂ ਉਦੀਰਯਨ੍ਤਿ (ਸ੍ਯਾ.)].

੬੪੪. [ਵਿ. ਵ. ੭੫੩; ਕਥਾ. ੭੯੮] ‘‘ਤੇਸਂ ਸੁਦਿਨ੍ਨਂ ਸੁਹੁਤਂ ਸੁਯਿਟ੍ਠਂ, ਯੇ ਸਙ੍ਘਮੁਦ੍ਦਿਸ੍ਸ ਦਦਨ੍ਤਿ ਦਾਨਂ;

ਸਾ ਦਕ੍ਖਿਣਾ ਸਙ੍ਘਗਤਾ ਪਤਿਟ੍ਠਿਤਾ, ਮਹਪ੍ਫਲਾ ਲੋਕਵਿਦੂਨ [ਲੋਕਵਿਦੂਹਿ (ਸ੍ਯਾ. ਕ.)] ਵਣ੍ਣਿਤਾ.

੬੪੫. [ਵਿ. ਵ. ੭੫੪; ਕਥਾ. ੭੯੮] ‘‘ਏਤਾਦਿਸਂ ਯਞ੍ਞਮਨੁਸ੍ਸਰਨ੍ਤਾ [ਪੁਞ੍ਞਮਨੁਸ੍ਸਰਨ੍ਤਾ (ਸ੍ਯਾ. ਕ.)], ਯੇ ਵੇਦਜਾਤਾ ਵਿਚਰਨ੍ਤਿ ਲੋਕੇ;

ਵਿਨੇਯ੍ਯ ਮਚ੍ਛੇਰਮਲਂ ਸਮੂਲਂ, ਅਨਿਨ੍ਦਿਤਾ ਸਗ੍ਗਮੁਪੇਨ੍ਤਿ ਠਾਨ’’ਨ੍ਤਿ.

ਦਦ੍ਦਲ੍ਲਵਿਮਾਨਂ [ਦਦ੍ਦਲ਼੍ਹਵਿਮਾਨਂ (ਕ.)] ਛਟ੍ਠਂ.