੧੨. ਚਨ੍ਦਾਥੇਰੀਗਾਥਾ

੧੨੨. ‘‘ਦੁਗ੍ਗਤਾਹਂ ਪੁਰੇ ਆਸਿਂ, ਵਿਧਵਾ ਚ ਅਪੁਤ੍ਤਿਕਾ;

ਵਿਨਾ ਮਿਤ੍ਤੇਹਿ ਞਾਤੀਹਿ, ਭਤ੍ਤਚੋਲ਼ਸ੍ਸ ਨਾਧਿਗਂ.

੧੨੩. ‘‘ਪਤ੍ਤਂ ਦਣ੍ਡਞ੍ਚ ਗਣ੍ਹਿਤ੍ਵਾ, ਭਿਕ੍ਖਮਾਨਾ ਕੁਲਾ ਕੁਲਂ;

ਸੀਤੁਣ੍ਹੇਨ ਚ ਡਯ੍ਹਨ੍ਤੀ, ਸਤ੍ਤ ਵਸ੍ਸਾਨਿ ਚਾਰਿਹਂ.

੧੨੪. ‘‘ਭਿਕ੍ਖੁਨਿਂ ਪੁਨ ਦਿਸ੍ਵਾਨ, ਅਨ੍ਨਪਾਨਸ੍ਸ ਲਾਭਿਨਿਂ;

ਉਪਸਙ੍ਕਮ੍ਮ ਅਵੋਚਂ [ਅਵੋਚਿਂ (ਕ.)], ‘ਪਬ੍ਬਜ੍ਜਂ ਅਨਗਾਰਿਯਂ’.

੧੨੫. ‘‘ਸਾ ਚ ਮਂ ਅਨੁਕਮ੍ਪਾਯ, ਪਬ੍ਬਾਜੇਸਿ ਪਟਾਚਾਰਾ;

ਤਤੋ ਮਂ ਓਵਦਿਤ੍ਵਾਨ, ਪਰਮਤ੍ਥੇ ਨਿਯੋਜਯਿ.

੧੨੬. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਅਕਾਸਿਂ ਅਨੁਸਾਸਨਿਂ;

ਅਮੋਘੋ ਅਯ੍ਯਾਯੋਵਾਦੋ, ਤੇਵਿਜ੍ਜਾਮ੍ਹਿ ਅਨਾਸਵਾ’’ਤਿ.

… ਚਨ੍ਦਾ ਥੇਰੀ….

ਪਞ੍ਚਕਨਿਪਾਤੋ ਨਿਟ੍ਠਿਤੋ.