੫. ਪਞ੍ਚਕਨਿਪਾਤੋ

੧. ਅਞ੍ਞਤਰਾਥੇਰੀਗਾਥਾ

੬੭. ‘‘ਪਣ੍ਣਵੀਸਤਿਵਸ੍ਸਾਨਿ, ਯਤੋ ਪਬ੍ਬਜਿਤਾ ਅਹਂ;

ਨਾਚ੍ਛਰਾਸਙ੍ਘਾਤਮਤ੍ਤਮ੍ਪਿ, ਚਿਤ੍ਤਸ੍ਸੂਪਸਮਜ੍ਝਗਂ.

੬੮. ‘‘ਅਲਦ੍ਧਾ ਚੇਤਸੋ ਸਨ੍ਤਿਂ, ਕਾਮਰਾਗੇਨਵਸ੍ਸੁਤਾ;

ਬਾਹਾ ਪਗ੍ਗਯ੍ਹ ਕਨ੍ਦਨ੍ਤੀ, ਵਿਹਾਰਂ ਪਾਵਿਸਿਂ ਅਹਂ.

੬੯. ‘‘ਸਾ ਭਿਕ੍ਖੁਨਿਂ ਉਪਾਗਚ੍ਛਿਂ, ਯਾ ਮੇ ਸਦ੍ਧਾਯਿਕਾ ਅਹੁ;

ਸਾ ਮੇ ਧਮ੍ਮਮਦੇਸੇਸਿ, ਖਨ੍ਧਾਯਤਨਧਾਤੁਯੋ.

੭੦. ‘‘ਤਸ੍ਸਾ ਧਮ੍ਮਂ ਸੁਣਿਤ੍ਵਾਨ, ਏਕਮਨ੍ਤੇ ਉਪਾਵਿਸਿਂ;

ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ.

੭੧. ‘‘ਚੇਤੋਪਰਿਚ੍ਚਞਾਣਞ੍ਚ [ਚੇਤੋਪਰਿਯਞਾਣਞ੍ਚ (ਕ.)], ਸੋਤਧਾਤੁ ਵਿਸੋਧਿਤਾ;

ਇਦ੍ਧੀਪਿ ਮੇ ਸਚ੍ਛਿਕਤਾ, ਪਤ੍ਤੋ ਮੇ ਆਸਵਕ੍ਖਯੋ;

ਛਲ਼ਭਿਞ੍ਞਾ [ਛ ਮੇਭਿਞ੍ਞਾ (ਸ੍ਯਾ. ਕ.)] ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

… ਅਞ੍ਞਤਰਾ ਥੇਰੀ ….

੨. ਵਿਮਲਾਥੇਰੀਗਾਥਾ

੭੨. ‘‘ਮਤ੍ਤਾ ਵਣ੍ਣੇਨ ਰੂਪੇਨ, ਸੋਭਗ੍ਗੇਨ ਯਸੇਨ ਚ;

ਯੋਬ੍ਬਨੇਨ ਚੁਪਤ੍ਥਦ੍ਧਾ, ਅਞ੍ਞਾਸਮਤਿਮਞ੍ਞਿਹਂ.

੭੩. ‘‘ਵਿਭੂਸੇਤ੍ਵਾ ਇਮਂ ਕਾਯਂ, ਸੁਚਿਤ੍ਤਂ ਬਾਲਲਾਪਨਂ;

ਅਟ੍ਠਾਸਿਂ ਵੇਸਿਦ੍ਵਾਰਮ੍ਹਿ, ਲੁਦ੍ਦੋ ਪਾਸਮਿਵੋਡ੍ਡਿਯ.

੭੪. ‘‘ਪਿਲਨ੍ਧਨਂ ਵਿਦਂਸੇਨ੍ਤੀ, ਗੁਯ੍ਹਂ ਪਕਾਸਿਕਂ ਬਹੁਂ;

ਅਕਾਸਿਂ ਵਿਵਿਧਂ ਮਾਯਂ, ਉਜ੍ਜਗ੍ਘਨ੍ਤੀ ਬਹੁਂ ਜਨਂ.

੭੫. ‘‘ਸਾਜ੍ਜ ਪਿਣ੍ਡਂ ਚਰਿਤ੍ਵਾਨ, ਮੁਣ੍ਡਾ ਸਙ੍ਘਾਟਿਪਾਰੁਤਾ;

ਨਿਸਿਨ੍ਨਾ ਰੁਕ੍ਖਮੂਲਮ੍ਹਿ, ਅਵਿਤਕ੍ਕਸ੍ਸ ਲਾਭਿਨੀ.

੭੬. ‘‘ਸਬ੍ਬੇ ਯੋਗਾ ਸਮੁਚ੍ਛਿਨ੍ਨਾ, ਯੇ ਦਿਬ੍ਬਾ ਯੇ ਚ ਮਾਨੁਸਾ;

ਖੇਪੇਤ੍ਵਾ ਆਸਵੇ ਸਬ੍ਬੇ, ਸੀਤਿਭੂਤਾਮ੍ਹਿ ਨਿਬ੍ਬੁਤਾ’’ਤਿ.

… ਵਿਮਲਾ ਪੁਰਾਣਗਣਿਕਾ ਥੇਰੀ….

੩. ਸੀਹਾਥੇਰੀਗਾਥਾ

੭੭. ‘‘ਅਯੋਨਿਸੋ ਮਨਸਿਕਾਰਾ, ਕਾਮਰਾਗੇਨ ਅਟ੍ਟਿਤਾ;

ਅਹੋਸਿਂ ਉਦ੍ਧਤਾ ਪੁਬ੍ਬੇ, ਚਿਤ੍ਤੇ ਅਵਸਵਤ੍ਤਿਨੀ.

੭੮. ‘‘ਪਰਿਯੁਟ੍ਠਿਤਾ ਕ੍ਲੇਸੇਹਿ, ਸੁਭਸਞ੍ਞਾਨੁਵਤ੍ਤਿਨੀ;

ਸਮਂ ਚਿਤ੍ਤਸ੍ਸ ਨ ਲਭਿਂ, ਰਾਗਚਿਤ੍ਤਵਸਾਨੁਗਾ.

੭੯. ‘‘ਕਿਸਾ ਪਣ੍ਡੁ ਵਿਵਣ੍ਣਾ ਚ, ਸਤ੍ਤ ਵਸ੍ਸਾਨਿ ਚਾਰਿਹਂ;

ਨਾਹਂ ਦਿਵਾ ਵਾ ਰਤ੍ਤਿਂ ਵਾ, ਸੁਖਂ ਵਿਨ੍ਦਿਂ ਸੁਦੁਕ੍ਖਿਤਾ.

੮੦. ‘‘ਤਤੋ ਰਜ੍ਜੁਂ ਗਹੇਤ੍ਵਾਨ, ਪਾਵਿਸਿਂ ਵਨਮਨ੍ਤਰਂ;

ਵਰਂ ਮੇ ਇਧ ਉਬ੍ਬਨ੍ਧਂ, ਯਞ੍ਚ ਹੀਨਂ ਪੁਨਾਚਰੇ.

੮੧. ‘‘ਦਲ਼੍ਹਪਾਸਂ [ਦਲ਼੍ਹਂ ਪਾਸਂ (ਸੀ.)] ਕਰਿਤ੍ਵਾਨ, ਰੁਕ੍ਖਸਾਖਾਯ ਬਨ੍ਧਿਯ;

ਪਕ੍ਖਿਪਿਂ ਪਾਸਂ ਗੀਵਾਯਂ, ਅਥ ਚਿਤ੍ਤਂ ਵਿਮੁਚ੍ਚਿ ਮੇ’’ਤਿ.

… ਸੀਹਾ ਥੇਰੀ….

੪. ਸੁਨ੍ਦਰੀਨਨ੍ਦਾਥੇਰੀਗਾਥਾ

੮੨. ‘‘ਆਤੁਰਂ ਅਸੁਚਿਂ ਪੂਤਿਂ, ਪਸ੍ਸ ਨਨ੍ਦੇ ਸਮੁਸ੍ਸਯਂ;

ਅਸੁਭਾਯ ਚਿਤ੍ਤਂ ਭਾਵੇਹਿ, ਏਕਗ੍ਗਂ ਸੁਸਮਾਹਿਤਂ.

੮੩. ‘‘ਯਥਾ ਇਦਂ ਤਥਾ ਏਤਂ, ਯਥਾ ਏਤਂ ਤਥਾ ਇਦਂ;

ਦੁਗ੍ਗਨ੍ਧਂ ਪੂਤਿਕਂ ਵਾਤਿ, ਬਾਲਾਨਂ ਅਭਿਨਨ੍ਦਿਤਂ.

੮੪. ‘‘ਏਵਮੇਤਂ ਅਵੇਕ੍ਖਨ੍ਤੀ, ਰਤ੍ਤਿਨ੍ਦਿਵਮਤਨ੍ਦਿਤਾ;

ਤਤੋ ਸਕਾਯ ਪਞ੍ਞਾਯ, ਅਭਿਨਿਬ੍ਬਿਜ੍ਝ [ਅਭਿਨਿਬ੍ਬਿਜ੍ਜ (ਸੀ. ਸ੍ਯਾ.)] ਦਕ੍ਖਿਸਂ.

੮੫. ‘‘ਤਸ੍ਸਾ ਮੇ ਅਪ੍ਪਮਤ੍ਤਾਯ, ਵਿਚਿਨਨ੍ਤਿਯਾ ਯੋਨਿਸੋ;

ਯਥਾਭੂਤਂ ਅਯਂ ਕਾਯੋ, ਦਿਟ੍ਠੋ ਸਨ੍ਤਰਬਾਹਿਰੋ.

੮੬. ‘‘ਅਥ ਨਿਬ੍ਬਿਨ੍ਦਹਂ ਕਾਯੇ, ਅਜ੍ਝਤ੍ਤਞ੍ਚ ਵਿਰਜ੍ਜਹਂ;

ਅਪ੍ਪਮਤ੍ਤਾ ਵਿਸਂਯੁਤ੍ਤਾ, ਉਪਸਨ੍ਤਾਮ੍ਹਿ ਨਿਬ੍ਬੁਤਾ’’ਤਿ.

… ਸੁਨ੍ਦਰੀਨਨ੍ਦਾ ਥੇਰੀ….

੫. ਨਨ੍ਦੁਤ੍ਤਰਾਥੇਰੀਗਾਥਾ

੮੭. ‘‘ਅਗ੍ਗਿਂ ਚਨ੍ਦਞ੍ਚ ਸੂਰਿਯਞ੍ਚ, ਦੇਵਤਾ ਚ ਨਮਸ੍ਸਿਹਂ;

ਨਦੀਤਿਤ੍ਥਾਨਿ ਗਨ੍ਤ੍ਵਾਨ, ਉਦਕਂ ਓਰੁਹਾਮਿਹਂ.

੮੮. ‘‘ਬਹੂਵਤਸਮਾਦਾਨਾ, ਅਡ੍ਢਂ ਸੀਸਸ੍ਸ ਓਲਿਖਿਂ;

ਛਮਾਯ ਸੇਯ੍ਯਂ ਕਪ੍ਪੇਮਿ, ਰਤ੍ਤਿਂ ਭਤ੍ਤਂ ਨ ਭੁਞ੍ਜਹਂ.

੮੯. ‘‘ਵਿਭੂਸਾਮਣ੍ਡਨਰਤਾ, ਨ੍ਹਾਪਨੁਚ੍ਛਾਦਨੇਹਿ ਚ;

ਉਪਕਾਸਿਂ ਇਮਂ ਕਾਯਂ, ਕਾਮਰਾਗੇਨ ਅਟ੍ਟਿਤਾ.

੯੦. ‘‘ਤਤੋ ਸਦ੍ਧਂ ਲਭਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ;

ਦਿਸ੍ਵਾ ਕਾਯਂ ਯਥਾਭੂਤਂ, ਕਾਮਰਾਗੋ ਸਮੂਹਤੋ.

੯੧. ‘‘ਸਬ੍ਬੇ ਭਵਾ ਸਮੁਚ੍ਛਿਨ੍ਨਾ, ਇਚ੍ਛਾ ਚ ਪਤ੍ਥਨਾਪਿ ਚ;

ਸਬ੍ਬਯੋਗਵਿਸਂਯੁਤ੍ਤਾ, ਸਨ੍ਤਿਂ ਪਾਪੁਣਿ ਚੇਤਸੋ’’ਤਿ.

… ਨਨ੍ਦੁਤ੍ਤਰਾ ਥੇਰੀ….

੬. ਮਿਤ੍ਤਾਕਾਲ਼ੀਥੇਰੀਗਾਥਾ

੯੨. ‘‘ਸਦ੍ਧਾਯ ਪਬ੍ਬਜਿਤ੍ਵਾਨ, ਅਗਾਰਸ੍ਮਾਨਗਾਰਿਯਂ;

ਵਿਚਰਿਂਹਂ ਤੇਨ ਤੇਨ, ਲਾਭਸਕ੍ਕਾਰਉਸ੍ਸੁਕਾ.

੯੩. ‘‘ਰਿਞ੍ਚਿਤ੍ਵਾ ਪਰਮਂ ਅਤ੍ਥਂ, ਹੀਨਮਤ੍ਥਂ ਅਸੇਵਿਹਂ;

ਕਿਲੇਸਾਨਂ ਵਸਂ ਗਨ੍ਤ੍ਵਾ, ਸਾਮਞ੍ਞਤ੍ਥਂ ਨ ਬੁਜ੍ਝਿਹਂ.

੯੪. ‘‘ਤਸ੍ਸਾ ਮੇ ਅਹੁ ਸਂਵੇਗੋ, ਨਿਸਿਨ੍ਨਾਯ ਵਿਹਾਰਕੇ;

ਉਮ੍ਮਗ੍ਗਪਟਿਪਨ੍ਨਾਮ੍ਹਿ, ਤਣ੍ਹਾਯ ਵਸਮਾਗਤਾ.

੯੫. ‘‘ਅਪ੍ਪਕਂ ਜੀਵਿਤਂ ਮਯ੍ਹਂ, ਜਰਾ ਬ੍ਯਾਧਿ ਚ ਮਦ੍ਦਤਿ;

ਪੁਰਾਯਂ ਭਿਜ੍ਜਤਿ [ਜਰਾਯ ਭਿਜ੍ਜਤੇ (ਸੀ.)] ਕਾਯੋ, ਨ ਮੇ ਕਾਲੋ ਪਮਜ੍ਜਿਤੁਂ.

੯੬. ‘‘ਯਥਾਭੂਤਮਵੇਕ੍ਖਨ੍ਤੀ, ਖਨ੍ਧਾਨਂ ਉਦਯਬ੍ਬਯਂ;

ਵਿਮੁਤ੍ਤਚਿਤ੍ਤਾ ਉਟ੍ਠਾਸਿਂ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

… ਮਿਤ੍ਤਾ ਕਾਲ਼ੀ ਥੇਰੀ….

੭. ਸਕੁਲਾਥੇਰੀਗਾਥਾ

੯੭. ‘‘ਅਗਾਰਸ੍ਮਿਂ ਵਸਨ੍ਤੀਹਂ, ਧਮ੍ਮਂ ਸੁਤ੍ਵਾਨ ਭਿਕ੍ਖੁਨੋ;

ਅਦ੍ਦਸਂ ਵਿਰਜਂ ਧਮ੍ਮਂ, ਨਿਬ੍ਬਾਨਂ ਪਦਮਚ੍ਚੁਤਂ.

੯੮. ‘‘ਸਾਹਂ ਪੁਤ੍ਤਂ ਧੀਤਰਞ੍ਚ, ਧਨਧਞ੍ਞਞ੍ਚ ਛਡ੍ਡਿਯ;

ਕੇਸੇ ਛੇਦਾਪਯਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ.

੯੯. ‘‘ਸਿਕ੍ਖਮਾਨਾ ਅਹਂ ਸਨ੍ਤੀ, ਭਾਵੇਨ੍ਤੀ ਮਗ੍ਗਮਞ੍ਜਸਂ;

ਪਹਾਸਿਂ ਰਾਗਦੋਸਞ੍ਚ, ਤਦੇਕਟ੍ਠੇ ਚ ਆਸਵੇ.

੧੦੦. ‘‘ਭਿਕ੍ਖੁਨੀ ਉਪਸਮ੍ਪਜ੍ਜ, ਪੁਬ੍ਬਜਾਤਿਮਨੁਸ੍ਸਰਿਂ;

ਦਿਬ੍ਬਚਕ੍ਖੁ ਵਿਸੋਧਿਤਂ [ਵਿਸੋਧਿਤਂ ਦਿਬ੍ਬਚਕ੍ਖੁ (ਸੀ.)], ਵਿਮਲਂ ਸਾਧੁਭਾਵਿਤਂ.

੧੦੧. ‘‘ਸਙ੍ਖਾਰੇ ਪਰਤੋ ਦਿਸ੍ਵਾ, ਹੇਤੁਜਾਤੇ ਪਲੋਕਿਤੇ [ਪਲੋਕਿਨੇ (ਕ.)];

ਪਹਾਸਿਂ ਆਸਵੇ ਸਬ੍ਬੇ, ਸੀਤਿਭੂਤਾਮ੍ਹਿ ਨਿਬ੍ਬੁਤਾ’’ਤਿ.

… ਸਕੁਲਾ ਥੇਰੀ….

੮. ਸੋਣਾਥੇਰੀਗਾਥਾ

੧੦੨. ‘‘ਦਸ ਪੁਤ੍ਤੇ ਵਿਜਾਯਿਤ੍ਵਾ, ਅਸ੍ਮਿਂ ਰੂਪਸਮੁਸ੍ਸਯੇ;

ਤਤੋਹਂ ਦੁਬ੍ਬਲਾ ਜਿਣ੍ਣਾ, ਭਿਕ੍ਖੁਨਿਂ ਉਪਸਙ੍ਕਮਿਂ.

੧੦੩. ‘‘ਸਾ ਮੇ ਧਮ੍ਮਮਦੇਸੇਸਿ, ਖਨ੍ਧਾਯਤਨਧਾਤੁਯੋ;

ਤਸ੍ਸਾ ਧਮ੍ਮਂ ਸੁਣਿਤ੍ਵਾਨ, ਕੇਸੇ ਛੇਤ੍ਵਾਨ ਪਬ੍ਬਜਿਂ.

੧੦੪. ‘‘ਤਸ੍ਸਾ ਮੇ ਸਿਕ੍ਖਮਾਨਾਯ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਪੁਬ੍ਬੇਨਿਵਾਸਂ ਜਾਨਾਮਿ, ਯਤ੍ਥ ਮੇ ਵੁਸਿਤਂ ਪੁਰੇ.

੧੦੫. ‘‘ਅਨਿਮਿਤ੍ਤਞ੍ਚ ਭਾਵੇਮਿ, ਏਕਗ੍ਗਾ ਸੁਸਮਾਹਿਤਾ;

ਅਨਨ੍ਤਰਾਵਿਮੋਕ੍ਖਾਸਿਂ, ਅਨੁਪਾਦਾਯ ਨਿਬ੍ਬੁਤਾ.

੧੦੬. ‘‘ਪਞ੍ਚਕ੍ਖਨ੍ਧਾ ਪਰਿਞ੍ਞਾਤਾ, ਤਿਟ੍ਠਨ੍ਤਿ ਛਿਨ੍ਨਮੂਲਕਾ;

ਧਿ ਤਵਤ੍ਥੁ ਜਰੇ ਜਮ੍ਮੇ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ.

… ਸੋਣਾ ਥੇਰੀ….

੯. ਭਦ੍ਦਾਕੁਣ੍ਡਲਕੇਸਾਥੇਰੀਗਾਥਾ

੧੦੭. ‘‘ਲੂਨਕੇਸੀ ਪਙ੍ਕਧਰੀ, ਏਕਸਾਟੀ ਪੁਰੇ ਚਰਿਂ;

ਅਵਜ੍ਜੇ ਵਜ੍ਜਮਤਿਨੀ, ਵਜ੍ਜੇ ਚਾਵਜ੍ਜਦਸ੍ਸਿਨੀ.

੧੦੮. ‘‘ਦਿਵਾਵਿਹਾਰਾ ਨਿਕ੍ਖਮ੍ਮ, ਗਿਜ੍ਝਕੂਟਮ੍ਹਿ ਪਬ੍ਬਤੇ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਭਿਕ੍ਖੁਸਙ੍ਘਪੁਰਕ੍ਖਤਂ.

੧੦੯. ‘‘ਨਿਹਚ੍ਚ ਜਾਣੁਂ ਵਨ੍ਦਿਤ੍ਵਾ, ਸਮ੍ਮੁਖਾ ਅਞ੍ਜਲਿਂ ਅਕਂ;

‘ਏਹਿ ਭਦ੍ਦੇ’ਤਿ ਮਂ ਅਵਚ, ਸਾ ਮੇ ਆਸੂਪਸਮ੍ਪਦਾ.

੧੧੦. ‘‘ਚਿਣ੍ਣਾ ਅਙ੍ਗਾ ਚ ਮਗਧਾ, ਵਜ੍ਜੀ ਕਾਸੀ ਚ ਕੋਸਲਾ;

ਅਨਣਾ ਪਣ੍ਣਾਸਵਸ੍ਸਾਨਿ, ਰਟ੍ਠਪਿਣ੍ਡਂ ਅਭੁਞ੍ਜਹਂ.

੧੧੧. ‘‘ਪੁਞ੍ਞਂ ਵਤ ਪਸਵਿ ਬਹੁਂ, ਸਪ੍ਪਞ੍ਞੋ ਵਤਾਯਂ ਉਪਾਸਕੋ;

ਯੋ ਭਦ੍ਦਾਯ ਚੀਵਰਂ ਅਦਾਸਿ, ਵਿਪ੍ਪਮੁਤ੍ਤਾਯ ਸਬ੍ਬਗਨ੍ਥੇਹੀ’’ਤਿ.

… ਭਦ੍ਦਾ ਕੁਣ੍ਡਲਕੇਸਾ ਥੇਰੀ….

੧੦. ਪਟਾਚਾਰਾਥੇਰੀਗਾਥਾ

੧੧੨. ‘‘ਨਙ੍ਗਲੇਹਿ ਕਸਂ ਖੇਤ੍ਤਂ, ਬੀਜਾਨਿ ਪਵਪਂ ਛਮਾ;

ਪੁਤ੍ਤਦਾਰਾਨਿ ਪੋਸੇਨ੍ਤਾ, ਧਨਂ ਵਿਨ੍ਦਨ੍ਤਿ ਮਾਣਵਾ.

੧੧੩. ‘‘ਕਿਮਹਂ ਸੀਲਸਮ੍ਪਨ੍ਨਾ, ਸਤ੍ਥੁਸਾਸਨਕਾਰਿਕਾ;

ਨਿਬ੍ਬਾਨਂ ਨਾਧਿਗਚ੍ਛਾਮਿ, ਅਕੁਸੀਤਾ ਅਨੁਦ੍ਧਤਾ.

੧੧੪. ‘‘ਪਾਦੇ ਪਕ੍ਖਾਲਯਿਤ੍ਵਾਨ, ਉਦਕੇਸੁ ਕਰੋਮਹਂ;

ਪਾਦੋਦਕਞ੍ਚ ਦਿਸ੍ਵਾਨ, ਥਲਤੋ ਨਿਨ੍ਨਮਾਗਤਂ.

੧੧੫. ‘‘ਤਤੋ ਚਿਤ੍ਤਂ ਸਮਾਧੇਸਿਂ, ਅਸ੍ਸਂ ਭਦ੍ਰਂਵਜਾਨਿਯਂ;

ਤਤੋ ਦੀਪਂ ਗਹੇਤ੍ਵਾਨ, ਵਿਹਾਰਂ ਪਾਵਿਸਿਂ ਅਹਂ;

ਸੇਯ੍ਯਂ ਓਲੋਕਯਿਤ੍ਵਾਨ, ਮਞ੍ਚਕਮ੍ਹਿ ਉਪਾਵਿਸਿਂ.

੧੧੬. ‘‘ਤਤੋ ਸੂਚਿਂ ਗਹੇਤ੍ਵਾਨ, ਵਟ੍ਟਿਂ ਓਕਸ੍ਸਯਾਮਹਂ;

ਪਦੀਪਸ੍ਸੇਵ ਨਿਬ੍ਬਾਨਂ, ਵਿਮੋਕ੍ਖੋ ਅਹੁ ਚੇਤਸੋ’’ਤਿ.

… ਪਟਾਚਾਰਾ ਥੇਰੀ….

੧੧. ਤਿਂਸਮਤ੍ਤਾਥੇਰੀਗਾਥਾ

੧੧੭. ‘‘‘ਮੁਸਲਾਨਿ ਗਹੇਤ੍ਵਾਨ, ਧਞ੍ਞਂ ਕੋਟ੍ਟੇਨ੍ਤਿ ਮਾਣਵਾ [ਮਾਨਵਾ (ਸੀ.)];

ਪੁਤ੍ਤਦਾਰਾਨਿ ਪੋਸੇਨ੍ਤਾ, ਧਨਂ ਵਿਨ੍ਦਨ੍ਤਿ ਮਾਣਵਾ.

੧੧੮. ‘‘‘ਕਰੋਥ ਬੁਦ੍ਧਸਾਸਨਂ, ਯਂ ਕਤ੍ਵਾ ਨਾਨੁਤਪ੍ਪਤਿ;

ਖਿਪ੍ਪਂ ਪਾਦਾਨਿ ਧੋਵਿਤ੍ਵਾ, ਏਕਮਨ੍ਤੇ ਨਿਸੀਦਥ;

ਚੇਤੋਸਮਥਮਨੁਯੁਤ੍ਤਾ, ਕਰੋਥ ਬੁਦ੍ਧਸਾਸਨਂ’.

੧੧੯. ‘‘ਤਸ੍ਸਾ ਤਾ [ਤਂ (ਸੀ.)] ਵਚਨਂ ਸੁਤ੍ਵਾ, ਪਟਾਚਾਰਾਯ ਸਾਸਨਂ;

ਪਾਦੇ ਪਕ੍ਖਾਲਯਿਤ੍ਵਾਨ, ਏਕਮਨ੍ਤਂ ਉਪਾਵਿਸੁਂ;

ਚੇਤੋਸਮਥਮਨੁਯੁਤ੍ਤਾ, ਅਕਂਸੁ ਬੁਦ੍ਧਸਾਸਨਂ.

੧੨੦. ‘‘ਰਤ੍ਤਿਯਾ ਪੁਰਿਮੇ ਯਾਮੇ, ਪੁਬ੍ਬਜਾਤਿਮਨੁਸ੍ਸਰੁਂ;

ਰਤ੍ਤਿਯਾ ਮਜ੍ਝਿਮੇ ਯਾਮੇ, ਦਿਬ੍ਬਚਕ੍ਖੁਂ ਵਿਸੋਧਯੁਂ;

ਰਤ੍ਤਿਯਾ ਪਚ੍ਛਿਮੇ ਯਾਮੇ, ਤਮੋਖਨ੍ਧਂ ਪਦਾਲਯੁਂ.

੧੨੧. ‘‘ਉਟ੍ਠਾਯ ਪਾਦੇ ਵਨ੍ਦਿਂਸੁ, ‘ਕਤਾ ਤੇ ਅਨੁਸਾਸਨੀ;

ਇਨ੍ਦਂਵ ਦੇਵਾ ਤਿਦਸਾ, ਸਙ੍ਗਾਮੇ ਅਪਰਾਜਿਤਂ;

ਪੁਰਕ੍ਖਤ੍ਵਾ ਵਿਹਸ੍ਸਾਮ [ਵਿਹਰਾਮ (ਸੀ.), ਵਿਹਰਿਸ੍ਸਾਮ (ਸ੍ਯਾ.)], ਤੇਵਿਜ੍ਜਾਮ੍ਹ ਅਨਾਸਵਾ’’’ਤਿ.

ਇਤ੍ਥਂ ਸੁਦਂ ਤਿਂਸਮਤ੍ਤਾ ਥੇਰੀ ਭਿਕ੍ਖੁਨਿਯੋ ਪਟਾਚਾਰਾਯ ਸਨ੍ਤਿਕੇ ਅਞ੍ਞਂ ਬ੍ਯਾਕਰਿਂਸੂਤਿ.

੧੨. ਚਨ੍ਦਾਥੇਰੀਗਾਥਾ

੧੨੨. ‘‘ਦੁਗ੍ਗਤਾਹਂ ਪੁਰੇ ਆਸਿਂ, ਵਿਧਵਾ ਚ ਅਪੁਤ੍ਤਿਕਾ;

ਵਿਨਾ ਮਿਤ੍ਤੇਹਿ ਞਾਤੀਹਿ, ਭਤ੍ਤਚੋਲ਼ਸ੍ਸ ਨਾਧਿਗਂ.

੧੨੩. ‘‘ਪਤ੍ਤਂ ਦਣ੍ਡਞ੍ਚ ਗਣ੍ਹਿਤ੍ਵਾ, ਭਿਕ੍ਖਮਾਨਾ ਕੁਲਾ ਕੁਲਂ;

ਸੀਤੁਣ੍ਹੇਨ ਚ ਡਯ੍ਹਨ੍ਤੀ, ਸਤ੍ਤ ਵਸ੍ਸਾਨਿ ਚਾਰਿਹਂ.

੧੨੪. ‘‘ਭਿਕ੍ਖੁਨਿਂ ਪੁਨ ਦਿਸ੍ਵਾਨ, ਅਨ੍ਨਪਾਨਸ੍ਸ ਲਾਭਿਨਿਂ;

ਉਪਸਙ੍ਕਮ੍ਮ ਅਵੋਚਂ [ਅਵੋਚਿਂ (ਕ.)], ‘ਪਬ੍ਬਜ੍ਜਂ ਅਨਗਾਰਿਯਂ’.

੧੨੫. ‘‘ਸਾ ਚ ਮਂ ਅਨੁਕਮ੍ਪਾਯ, ਪਬ੍ਬਾਜੇਸਿ ਪਟਾਚਾਰਾ;

ਤਤੋ ਮਂ ਓਵਦਿਤ੍ਵਾਨ, ਪਰਮਤ੍ਥੇ ਨਿਯੋਜਯਿ.

੧੨੬. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਅਕਾਸਿਂ ਅਨੁਸਾਸਨਿਂ;

ਅਮੋਘੋ ਅਯ੍ਯਾਯੋਵਾਦੋ, ਤੇਵਿਜ੍ਜਾਮ੍ਹਿ ਅਨਾਸਵਾ’’ਤਿ.