੬. ਛਕ੍ਕਨਿਪਾਤੋ

੧. ਪਞ੍ਚਸਤਮਤ੍ਤਾਥੇਰੀਗਾਥਾ

੧੨੭. ‘‘ਯਸ੍ਸ ਮਗ੍ਗਂ ਨ ਜਾਨਾਸਿ, ਆਗਤਸ੍ਸ ਗਤਸ੍ਸ ਵਾ;

ਤਂ ਕੁਤੋ ਚਾਗਤਂ ਸਤ੍ਤਂ [ਸਨ੍ਤਂ (ਸੀ.), ਪੁਤ੍ਤਂ (ਸ੍ਯਾ.)], ‘ਮਮ ਪੁਤ੍ਤੋ’ਤਿ ਰੋਦਸਿ.

੧੨੮. ‘‘ਮਗ੍ਗਞ੍ਚ ਖੋਸ੍ਸ [ਖੋ’ਥ (ਸ੍ਯਾ. ਕ.)] ਜਾਨਾਸਿ, ਆਗਤਸ੍ਸ ਗਤਸ੍ਸ ਵਾ;

ਨ ਨਂ ਸਮਨੁਸੋਚੇਸਿ, ਏਵਂਧਮ੍ਮਾ ਹਿ ਪਾਣਿਨੋ.

੧੨੯. ‘‘ਅਯਾਚਿਤੋ ਤਤਾਗਚ੍ਛਿ, ਨਾਨੁਞ੍ਞਾਤੋ [ਅਨਨੁਞ੍ਞਾਤੋ (ਸੀ. ਸ੍ਯਾ.)] ਇਤੋ ਗਤੋ;

ਕੁਤੋਚਿ ਨੂਨ ਆਗਨ੍ਤ੍ਵਾ, ਵਸਿਤ੍ਵਾ ਕਤਿਪਾਹਕਂ;

ਇਤੋਪਿ ਅਞ੍ਞੇਨ ਗਤੋ, ਤਤੋਪਞ੍ਞੇਨ ਗਚ੍ਛਤਿ.

੧੩੦. ‘‘ਪੇਤੋ ਮਨੁਸ੍ਸਰੂਪੇਨ, ਸਂਸਰਨ੍ਤੋ ਗਮਿਸ੍ਸਤਿ;

ਯਥਾਗਤੋ ਤਥਾ ਗਤੋ, ਕਾ ਤਤ੍ਥ ਪਰਿਦੇਵਨਾ’’.

੧੩੧. ‘‘ਅਬ੍ਬਹੀ [ਅਬ੍ਬੁਯ੍ਹਂ (ਸ੍ਯਾ.)] ਵਤ ਮੇ ਸਲ੍ਲਂ, ਦੁਦ੍ਦਸਂ ਹਦਯਸ੍ਸਿਤਂ;

ਯਾ ਮੇ ਸੋਕਪਰੇਤਾਯ, ਪੁਤ੍ਤਸੋਕਂ ਬ੍ਯਪਾਨੁਦਿ.

੧੩੨. ‘‘ਸਾਜ੍ਜ ਅਬ੍ਬੂਲ਼੍ਹਸਲ੍ਲਾਹਂ, ਨਿਚ੍ਛਾਤਾ ਪਰਿਨਿਬ੍ਬੁਤਾ;

ਬੁਦ੍ਧਂ ਧਮ੍ਮਞ੍ਚ ਸਙ੍ਘਞ੍ਚ, ਉਪੇਮਿ ਸਰਣਂ ਮੁਨਿਂ’’.

ਇਤ੍ਥਂ ਸੁਦਂ ਪਞ੍ਚਸਤਮਤ੍ਤਾ ਥੇਰੀ ਭਿਕ੍ਖੁਨਿਯੋ…ਪੇ….

੨. ਵਾਸੇਟ੍ਠੀਥੇਰੀਗਾਥਾ

੧੩੩. ‘‘ਪੁਤ੍ਤਸੋਕੇਨਹਂ ਅਟ੍ਟਾ, ਖਿਤ੍ਤਚਿਤ੍ਤਾ ਵਿਸਞ੍ਞਿਨੀ;

ਨਗ੍ਗਾ ਪਕਿਣ੍ਣਕੇਸੀ ਚ, ਤੇਨ ਤੇਨ ਵਿਚਾਰਿਹਂ.

੧੩੪. ‘‘ਵੀਥਿ [ਵਸਿਂ (ਸੀ.)] ਸਙ੍ਕਾਰਕੂਟੇਸੁ, ਸੁਸਾਨੇ ਰਥਿਯਾਸੁ ਚ;

ਅਚਰਿਂ ਤੀਣਿ ਵਸ੍ਸਾਨਿ, ਖੁਪ੍ਪਿਪਾਸਾਸਮਪ੍ਪਿਤਾ.

੧੩੫. ‘‘ਅਥਦ੍ਦਸਾਸਿਂ ਸੁਗਤਂ, ਨਗਰਂ ਮਿਥਿਲਂ ਪਤਿ [ਗਤਂ (ਕ.)];

ਅਦਨ੍ਤਾਨਂ ਦਮੇਤਾਰਂ, ਸਮ੍ਬੁਦ੍ਧਮਕੁਤੋਭਯਂ.

੧੩੬. ‘‘ਸਚਿਤ੍ਤਂ ਪਟਿਲਦ੍ਧਾਨ, ਵਨ੍ਦਿਤ੍ਵਾਨ ਉਪਾਵਿਸਿਂ;

ਸੋ ਮੇ ਧਮ੍ਮਮਦੇਸੇਸਿ, ਅਨੁਕਮ੍ਪਾਯ ਗੋਤਮੋ.

੧੩੭. ‘‘ਤਸ੍ਸ ਧਮ੍ਮਂ ਸੁਣਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ;

ਯੁਞ੍ਜਨ੍ਤੀ ਸਤ੍ਥੁਵਚਨੇ, ਸਚ੍ਛਾਕਾਸਿਂ ਪਦਂ ਸਿਵਂ.

੧੩੮. ‘‘ਸਬ੍ਬੇ ਸੋਕਾ ਸਮੁਚ੍ਛਿਨ੍ਨਾ, ਪਹੀਨਾ ਏਤਦਨ੍ਤਿਕਾ;

ਪਰਿਞ੍ਞਾਤਾ ਹਿ ਮੇ ਵਤ੍ਥੂ, ਯਤੋ ਸੋਕਾਨ ਸਮ੍ਭਵੋ’’ਤਿ.

… ਵਾਸੇਟ੍ਠੀ ਥੇਰੀ….

੩. ਖੇਮਾਥੇਰੀਗਾਥਾ

੧੩੯. ‘‘ਦਹਰਾ ਤ੍ਵਂ ਰੂਪਵਤੀ, ਅਹਮ੍ਪਿ ਦਹਰੋ ਯੁਵਾ;

ਪਞ੍ਚਙ੍ਗਿਕੇਨ ਤੁਰਿਯੇਨ [ਤੂਰੇਨ (ਕ.)], ਏਹਿ ਖੇਮੇ ਰਮਾਮਸੇ’’.

੧੪੦. ‘‘ਇਮਿਨਾ ਪੂਤਿਕਾਯੇਨ, ਆਤੁਰੇਨ ਪਭਙ੍ਗੁਨਾ;

ਅਟ੍ਟਿਯਾਮਿ ਹਰਾਯਾਮਿ, ਕਾਮਤਣ੍ਹਾ ਸਮੂਹਤਾ.

੧੪੧. ‘‘ਸਤ੍ਤਿਸੂਲੂਪਮਾ ਕਾਮਾ, ਖਨ੍ਧਾਸਂ ਅਧਿਕੁਟ੍ਟਨਾ;

ਯਂ ‘ਤ੍ਵਂ ਕਾਮਰਤਿਂ’ ਬ੍ਰੂਸਿ, ‘ਅਰਤੀ’ ਦਾਨਿ ਸਾ ਮਮ.

੧੪੨. ‘‘ਸਬ੍ਬਤ੍ਥ ਵਿਹਤਾ ਨਨ੍ਦੀ, ਤਮੋਖਨ੍ਧੋ ਪਦਾਲਿਤੋ;

ਏਵਂ ਜਾਨਾਹਿ ਪਾਪਿਮ, ਨਿਹਤੋ ਤ੍ਵਮਸਿ ਅਨ੍ਤਕ.

੧੪੩. ‘‘ਨਕ੍ਖਤ੍ਤਾਨਿ ਨਮਸ੍ਸਨ੍ਤਾ, ਅਗ੍ਗਿਂ ਪਰਿਚਰਂ ਵਨੇ;

ਯਥਾਭੁਚ੍ਚਮਜਾਨਨ੍ਤਾ, ਬਾਲਾ ਸੁਦ੍ਧਿਮਮਞ੍ਞਥ.

੧੪੪. ‘‘ਅਹਞ੍ਚ ਖੋ ਨਮਸ੍ਸਨ੍ਤੀ, ਸਮ੍ਬੁਦ੍ਧਂ ਪੁਰਿਸੁਤ੍ਤਮਂ;

ਪਮੁਤ੍ਤਾ [ਪਰਿਮੁਤ੍ਤਾ (ਸੀ. ਸ੍ਯਾ.)] ਸਬ੍ਬਦੁਕ੍ਖੇਹਿ, ਸਤ੍ਥੁਸਾਸਨਕਾਰਿਕਾ’’ਤਿ.

… ਖੇਮਾ ਥੇਰੀ….

੪. ਸੁਜਾਤਾਥੇਰੀਗਾਥਾ

੧੪੫. ‘‘ਅਲਙ੍ਕਤਾ ਸੁਵਸਨਾ, ਮਾਲਿਨੀ ਚਨ੍ਦਨੋਕ੍ਖਿਤਾ;

ਸਬ੍ਬਾਭਰਣਸਞ੍ਛਨ੍ਨਾ, ਦਾਸੀਗਣਪੁਰਕ੍ਖਤਾ.

੧੪੬. ‘‘ਅਨ੍ਨਂ ਪਾਨਞ੍ਚ ਆਦਾਯ, ਖਜ੍ਜਂ ਭੋਜ੍ਜਂ ਅਨਪ੍ਪਕਂ;

ਗੇਹਤੋ ਨਿਕ੍ਖਮਿਤ੍ਵਾਨ, ਉਯ੍ਯਾਨਮਭਿਹਾਰਯਿਂ.

੧੪੭. ‘‘ਤਤ੍ਥ ਰਮਿਤ੍ਵਾ ਕੀਲ਼ਿਤ੍ਵਾ, ਆਗਚ੍ਛਨ੍ਤੀ ਸਕਂ ਘਰਂ;

ਵਿਹਾਰਂ ਦਟ੍ਠੁਂ ਪਾਵਿਸਿਂ, ਸਾਕੇਤੇ ਅਞ੍ਜਨਂ ਵਨਂ.

੧੪੮. ‘‘ਦਿਸ੍ਵਾਨ ਲੋਕਪਜ੍ਜੋਤਂ, ਵਨ੍ਦਿਤ੍ਵਾਨ ਉਪਾਵਿਸਿਂ;

ਸੋ ਮੇ ਧਮ੍ਮਮਦੇਸੇਸਿ, ਅਨੁਕਮ੍ਪਾਯ ਚਕ੍ਖੁਮਾ.

੧੪੯. ‘‘ਸੁਤ੍ਵਾ ਚ ਖੋ ਮਹੇਸਿਸ੍ਸ, ਸਚ੍ਚਂ ਸਮ੍ਪਟਿਵਿਜ੍ਝਹਂ;

ਤਤ੍ਥੇਵ ਵਿਰਜਂ ਧਮ੍ਮਂ, ਫੁਸਯਿਂ ਅਮਤਂ ਪਦਂ.

੧੫੦. ‘‘ਤਤੋ ਵਿਞ੍ਞਾਤਸਦ੍ਧਮ੍ਮਾ, ਪਬ੍ਬਜਿਂ ਅਨਗਾਰਿਯਂ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਅਮੋਘਂ ਬੁਦ੍ਧਸਾਸਨ’’ਨ੍ਤਿ.

… ਸੁਜਾਤਾ ਥੇਰੀ….

੫. ਅਨੋਪਮਾਥੇਰੀਗਾਥਾ

੧੫੧. ‘‘ਉਚ੍ਚੇ ਕੁਲੇ ਅਹਂ ਜਾਤਾ, ਬਹੁਵਿਤ੍ਤੇ ਮਹਦ੍ਧਨੇ;

ਵਣ੍ਣਰੂਪੇਨ ਸਮ੍ਪਨ੍ਨਾ, ਧੀਤਾ ਮਜ੍ਝਸ੍ਸ [ਮੇਘਸ੍ਸ (ਸੀ.), ਮੇਘਿਸ੍ਸ (ਸ੍ਯਾ.)] ਅਤ੍ਰਜਾ.

੧੫੨. ‘‘ਪਤ੍ਥਿਤਾ ਰਾਜਪੁਤ੍ਤੇਹਿ, ਸੇਟ੍ਠਿਪੁਤ੍ਤੇਹਿ ਗਿਜ੍ਝਿਤਾ [ਸੇਟ੍ਠਿਪੁਤ੍ਤੇਹਿ ਭਿਜ੍ਝਿਤਾ (ਸੀ.)];

ਪਿਤੁ ਮੇ ਪੇਸਯੀ ਦੂਤਂ, ਦੇਥ ਮਯ੍ਹਂ ਅਨੋਪਮਂ.

੧੫੩. ‘‘ਯਤ੍ਤਕਂ ਤੁਲਿਤਾ ਏਸਾ, ਤੁਯ੍ਹਂ ਧੀਤਾ ਅਨੋਪਮਾ;

ਤਤੋ ਅਟ੍ਠਗੁਣਂ ਦਸ੍ਸਂ, ਹਿਰਞ੍ਞਂ ਰਤਨਾਨਿ ਚ.

੧੫੪. ‘‘ਸਾਹਂ ਦਿਸ੍ਵਾਨ ਸਮ੍ਬੁਦ੍ਧਂ, ਲੋਕਜੇਟ੍ਠਂ ਅਨੁਤ੍ਤਰਂ;

ਤਸ੍ਸ ਪਾਦਾਨਿ ਵਨ੍ਦਿਤ੍ਵਾ, ਏਕਮਨ੍ਤਂ ਉਪਾਵਿਸਿਂ.

੧੫੫. ‘‘ਸੋ ਮੇ ਧਮ੍ਮਮਦੇਸੇਸਿ, ਅਨੁਕਮ੍ਪਾਯ ਗੋਤਮੋ;

ਨਿਸਿਨ੍ਨਾ ਆਸਨੇ ਤਸ੍ਮਿਂ, ਫੁਸਯਿਂ ਤਤਿਯਂ ਫਲਂ.

੧੫੬. ‘‘ਤਤੋ ਕੇਸਾਨਿ ਛੇਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ;

ਅਜ੍ਜ ਮੇ ਸਤ੍ਤਮੀ ਰਤ੍ਤਿ, ਯਤੋ ਤਣ੍ਹਾ ਵਿਸੋਸਿਤਾ’’ਤਿ.

… ਅਨੋਪਮਾ ਥੇਰੀ….

੬. ਮਹਾਪਜਾਪਤਿਗੋਤਮੀਥੇਰੀਗਾਥਾ

੧੫੭. ‘‘ਬੁਦ੍ਧ ਵੀਰ ਨਮੋ ਤ੍ਯਤ੍ਥੁ, ਸਬ੍ਬਸਤ੍ਤਾਨਮੁਤ੍ਤਮ;

ਯੋ ਮਂ ਦੁਕ੍ਖਾ ਪਮੋਚੇਸਿ, ਅਞ੍ਞਞ੍ਚ ਬਹੁਕਂ ਜਨਂ.

੧੫੮. ‘‘ਸਬ੍ਬਦੁਕ੍ਖਂ ਪਰਿਞ੍ਞਾਤਂ, ਹੇਤੁਤਣ੍ਹਾ ਵਿਸੋਸਿਤਾ;

ਭਾਵਿਤੋ ਅਟ੍ਠਙ੍ਗਿਕੋ [ਅਰਿਯਟ੍ਠਙ੍ਗਿਕੋ (ਸੀ. ਕ.), ਭਾਵਿਤਟ੍ਠਙ੍ਗਿਕੋ (ਸ੍ਯਾ.)] ਮਗ੍ਗੋ, ਨਿਰੋਧੋ ਫੁਸਿਤੋ ਮਯਾ.

੧੫੯. ‘‘ਮਾਤਾ ਪੁਤ੍ਤੋ ਪਿਤਾ ਭਾਤਾ, ਅਯ੍ਯਕਾ ਚ ਪੁਰੇ ਅਹੁਂ;

ਯਥਾਭੁਚ੍ਚਮਜਾਨਨ੍ਤੀ, ਸਂਸਰਿਂਹਂ ਅਨਿਬ੍ਬਿਸਂ.

੧੬੦. ‘‘ਦਿਟ੍ਠੋ ਹਿ ਮੇ ਸੋ ਭਗਵਾ, ਅਨ੍ਤਿਮੋਯਂ ਸਮੁਸ੍ਸਯੋ;

ਵਿਕ੍ਖੀਣੋ ਜਾਤਿਸਂਸਾਰੋ, ਨਤ੍ਥਿ ਦਾਨਿ ਪੁਨਬ੍ਭਵੋ.

੧੬੧. ‘‘ਆਰਦ੍ਧਵੀਰਿਯੇ ਪਹਿਤਤ੍ਤੇ, ਨਿਚ੍ਚਂ ਦਲ਼੍ਹਪਰਕ੍ਕਮੇ;

ਸਮਗ੍ਗੇ ਸਾਵਕੇ ਪਸ੍ਸੇ, ਏਸਾ ਬੁਦ੍ਧਾਨ ਵਨ੍ਦਨਾ.

੧੬੨. ‘‘ਬਹੂਨਂ [ਬਹੁਨ੍ਨਂ (ਸੀ. ਸ੍ਯਾ.)] ਵਤ ਅਤ੍ਥਾਯ, ਮਾਯਾ ਜਨਯਿ ਗੋਤਮਂ;

ਬ੍ਯਾਧਿਮਰਣਤੁਨ੍ਨਾਨਂ, ਦੁਕ੍ਖਕ੍ਖਨ੍ਧਂ ਬ੍ਯਪਾਨੁਦੀ’’ਤਿ.

… ਮਹਾਪਜਾਪਤਿਗੋਤਮੀ ਥੇਰੀ….

੭. ਗੁਤ੍ਤਾਥੇਰੀਗਾਥਾ

੧੬੩. ‘‘ਗੁਤ੍ਤੇ ਯਦਤ੍ਥਂ ਪਬ੍ਬਜ੍ਜਾ, ਹਿਤ੍ਵਾ ਪੁਤ੍ਤਂ ਵਸੁਂ ਪਿਯਂ;

ਤਮੇਵ ਅਨੁਬ੍ਰੂਹੇਹਿ, ਮਾ ਚਿਤ੍ਤਸ੍ਸ ਵਸਂ ਗਮਿ.

੧੬੪. ‘‘ਚਿਤ੍ਤੇਨ ਵਞ੍ਚਿਤਾ ਸਤ੍ਤਾ, ਮਾਰਸ੍ਸ ਵਿਸਯੇ ਰਤਾ;

ਅਨੇਕਜਾਤਿਸਂਸਾਰਂ, ਸਨ੍ਧਾਵਨ੍ਤਿ ਅਵਿਦ੍ਦਸੂ.

੧੬੫. ‘‘ਕਾਮਚ੍ਛਨ੍ਦਞ੍ਚ ਬ੍ਯਾਪਾਦਂ, ਸਕ੍ਕਾਯਦਿਟ੍ਠਿਮੇਵ ਚ;

ਸੀਲਬ੍ਬਤਪਰਾਮਾਸਂ, ਵਿਚਿਕਿਚ੍ਛਞ੍ਚ ਪਞ੍ਚਮਂ.

੧੬੬. ‘‘ਸਂਯੋਜਨਾਨਿ ਏਤਾਨਿ, ਪਜਹਿਤ੍ਵਾਨ ਭਿਕ੍ਖੁਨੀ;

ਓਰਮ੍ਭਾਗਮਨੀਯਾਨਿ, ਨਯਿਦਂ ਪੁਨਰੇਹਿਸਿ.

੧੬੭. ‘‘ਰਾਗਂ ਮਾਨਂ ਅਵਿਜ੍ਜਞ੍ਚ, ਉਦ੍ਧਚ੍ਚਞ੍ਚ ਵਿਵਜ੍ਜਿਯ;

ਸਂਯੋਜਨਾਨਿ ਛੇਤ੍ਵਾਨ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਸਿ.

੧੬੮. ‘‘ਖੇਪੇਤ੍ਵਾ ਜਾਤਿਸਂਸਾਰਂ, ਪਰਿਞ੍ਞਾਯ ਪੁਨਬ੍ਭਵਂ;

ਦਿਟ੍ਠੇਵ ਧਮ੍ਮੇ ਨਿਚ੍ਛਾਤਾ, ਉਪਸਨ੍ਤਾ ਚਰਿਸ੍ਸਤੀ’’ਤਿ.

… ਗੁਤ੍ਤਾ ਥੇਰੀ….

੮. ਵਿਜਯਾਥੇਰੀਗਾਥਾ

੧੬੯. ‘‘ਚਤੁਕ੍ਖਤ੍ਤੁਂ ਪਞ੍ਚਕ੍ਖਤ੍ਤੁਂ, ਵਿਹਾਰਾ ਉਪਨਿਕ੍ਖਮਿਂ;

ਅਲਦ੍ਧਾ ਚੇਤਸੋ ਸਨ੍ਤਿਂ, ਚਿਤ੍ਤੇ ਅਵਸਵਤ੍ਤਿਨੀ.

੧੭੦. ‘‘ਭਿਕ੍ਖੁਨਿਂ ਉਪਸਙ੍ਕਮ੍ਮ, ਸਕ੍ਕਚ੍ਚਂ ਪਰਿਪੁਚ੍ਛਹਂ;

ਸਾ ਮੇ ਧਮ੍ਮਮਦੇਸੇਸਿ, ਧਾਤੁਆਯਤਨਾਨਿ ਚ.

੧੭੧. ‘‘ਚਤ੍ਤਾਰਿ ਅਰਿਯਸਚ੍ਚਾਨਿ, ਇਨ੍ਦ੍ਰਿਯਾਨਿ ਬਲਾਨਿ ਚ;

ਬੋਜ੍ਝਙ੍ਗਟ੍ਠਙ੍ਗਿਕਂ ਮਗ੍ਗਂ, ਉਤ੍ਤਮਤ੍ਥਸ੍ਸ ਪਤ੍ਤਿਯਾ.

੧੭੨. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਕਰੋਨ੍ਤੀ ਅਨੁਸਾਸਨਿਂ;

ਰਤ੍ਤਿਯਾ ਪੁਰਿਮੇ ਯਾਮੇ, ਪੁਬ੍ਬਜਾਤਿਮਨੁਸ੍ਸਰਿਂ.

੧੭੩. ‘‘ਰਤ੍ਤਿਯਾ ਮਜ੍ਝਿਮੇ ਯਾਮੇ, ਦਿਬ੍ਬਚਕ੍ਖੁਂ ਵਿਸੋਧਯਿਂ;

ਰਤ੍ਤਿਯਾ ਪਚ੍ਛਿਮੇ ਯਾਮੇ, ਤਮੋਖਨ੍ਧਂ ਪਦਾਲਯਿਂ.

੧੭੪. ‘‘ਪੀਤਿਸੁਖੇਨ ਚ ਕਾਯਂ, ਫਰਿਤ੍ਵਾ ਵਿਹਰਿਂ ਤਦਾ;

ਸਤ੍ਤਮਿਯਾ ਪਾਦੇ ਪਸਾਰੇਸਿਂ, ਤਮੋਖਨ੍ਧਂ ਪਦਾਲਿਯਾ’’ਤਿ.

… ਵਿਜਯਾ ਥੇਰੀ….

ਛਕ੍ਕਨਿਪਾਤੋ ਨਿਟ੍ਠਿਤੋ.