੧. ਯਸਵਤੀਪਮੁਖਅਟ੍ਠਾਰਸਭਿਕ੍ਖੁਨੀਸਹਸ੍ਸਅਪਦਾਨਂ

੧. ‘‘ਭਵਾ ਸਬ੍ਬੇ ਪਰਿਕ੍ਖੀਣਾ, ਭਵਾ ਸਨ੍ਤਿ ਵਿਮੋਚਿਤਾ;

ਸਬ੍ਬਾਸਵਾ ਚ ਨੋ ਨਤ੍ਥਿ, ਆਰੋਚੇਮ ਮਹਾਮੁਨੇ.

੨. ‘‘ਪੁਰਿਮਂ ਕੁਸਲਂ ਕਮ੍ਮਂ [ਪਰਿਕਮ੍ਮਞ੍ਚ ਕੁਸਲਂ (ਸ੍ਯਾ.)], ਯਂ ਕਿਞ੍ਚਿ ਸਾਧੁਪਤ੍ਥਿਤਂ;

ਪਰਿਭੋਗਮਯਂ ਦਿਨ੍ਨਂ, ਤੁਯ੍ਹਤ੍ਥਾਯ ਮਹਾਮੁਨੇ.

੩. ‘‘ਬੁਦ੍ਧਪਚ੍ਚੇਕਬੁਦ੍ਧਾਨਂ, ਸਾਵਕਾਨਞ੍ਚ ਪਤ੍ਥਿਤਂ [ਬੁਦ੍ਧਾਨਂ ਸਾਵਕਾਨਞ੍ਚ (ਸੀ. ਕ.)];

ਪਰਿਭੋਗਮਯਂ ਦਿਨ੍ਨਂ, ਤੁਯ੍ਹਤ੍ਥਾਯ ਮਹਾਮੁਨੇ.

੪. ‘‘ਉਚ੍ਚਨੀਚਮਯਂ ਕਮ੍ਮਂ, ਭਿਕ੍ਖੂਨਂ ਸਾਧੁਪਤ੍ਥਿਤਂ;

ਉਚ੍ਚਾਕੁਲਪਰਿਕਮ੍ਮਂ, ਕਤਮੇਤਂ ਮਹਾਮੁਨੇ [ਕਤਮ੍ਹੇਹਿ ਮਹਾਮੁਨੇ (ਸ੍ਯਾ. ਪੀ.)].

੫. ‘‘ਤੇਨੇਵ ਸੁਕ੍ਕਮੂਲੇਨ, ਚੋਦਿਤਾ ਕਮ੍ਮਸਮ੍ਪਦਾ;

ਮਾਨੁਸਿਕਮਤਿਕ੍ਕਨ੍ਤਾ, ਜਾਯਿਂਸੁ ਖਤ੍ਤਿਯੇ ਕੁਲੇ.

੬. ‘‘ਉਪ੍ਪਤ੍ਤੇ ਚ ਕਤੇ ਕਮ੍ਮੇ, ਜਾਤਿਯਾ ਵਾਪਿ ਏਕਤੋ;

ਪਚ੍ਛਿਮੇ ਏਕਤੋ ਜਾਤਾ, ਖਤ੍ਤਿਯਾ ਕੁਲਸਮ੍ਭਵਾ.

੭. ‘‘ਰੂਪਵਤੀ ਭੋਗਵਤੀ, ਲਾਭਸਕ੍ਕਾਰਪੂਜਿਤਾ;

ਅਨ੍ਤੇਪੁਰੇ ਮਹਾਵੀਰ, ਦੇਵਾਨਂ ਵਿਯ ਨਨ੍ਦਨੇ.

੮. ‘‘ਨਿਬ੍ਬਿਨ੍ਦਿਤ੍ਵਾ ਅਗਾਰਮ੍ਹਾ, ਪਬ੍ਬਜਿਮ੍ਹਨਗਾਰਿਯਂ;

ਕਤਿਪਾਹਂ ਉਪਾਦਾਯ, ਸਬ੍ਬਾ ਪਤ੍ਤਾਮ੍ਹ ਨਿਬ੍ਬੁਤਿਂ.

੯. ‘‘ਚੀਵਰਂ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ;

ਉਪਨੇਨ੍ਤਿ ਬਹੂ ਅਮ੍ਹੇ, ਸਦਾ ਸਕ੍ਕਤਪੂਜਿਤਾ.

੧੦. ‘‘ਕਿਲੇਸਾ ਝਾਪਿਤਾ ਅਮ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੀਵ ਬਨ੍ਧਨਂ ਛੇਤ੍ਵਾ, ਵਿਹਰਾਮ ਅਨਾਸਵਾ.

੧੧. ‘‘ਸ੍ਵਾਗਤਂ ਵਤ ਨੋ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੧੨. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਯਸਵਤੀਪਮੁਖਾਨਿ ਖਤ੍ਤਿਯਕਞ੍ਞਾਭਿਕ੍ਖੁਨਿਯੋ ਅਟ੍ਠਾਰਸਸਹਸ੍ਸਾਨਿ ਭਗਵਤੋ ਸਮ੍ਮੁਖਾ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਯਸਵਤੀਪਮੁਖਅਟ੍ਠਾਰਸਭਿਕ੍ਖੁਨੀਸਹਸ੍ਸਾਪਦਾਨਂ ਪਠਮਂ.