੯. ਯਸੋਧਰਾਪਮੁਖਦਸਭਿਕ੍ਖੁਨੀਸਹਸ੍ਸਅਪਦਾਨਂ

੪੧੧. ‘‘ਕਪ੍ਪੇ ਚ ਸਤਸਹਸ੍ਸੇ, ਚਤੁਰੋ ਚ ਅਸਙ੍ਖਿਯੇ;

ਦੀਪਙ੍ਕਰੋ ਨਾਮ ਜਿਨੋ, ਉਪ੍ਪਜ੍ਜਿ ਲੋਕਨਾਯਕੋ.

੪੧੨. ‘‘ਦੀਪਙ੍ਕਰੋ ਮਹਾਵੀਰੋ, ਵਿਯਾਕਾਸਿ ਵਿਨਾਯਕੋ;

ਸੁਮੇਧਞ੍ਚ ਸੁਮਿਤ੍ਤਞ੍ਚ, ਸਮਾਨਸੁਖਦੁਕ੍ਖਤਂ.

੪੧੩. ‘‘ਸਦੇਵਕਞ੍ਚ ਪਸ੍ਸਨ੍ਤੋ, ਵਿਚਰਨ੍ਤੋ ਸਦੇਵਕਂ;

ਤੇਸਂ ਪਕਿਤ੍ਤਨੇ ਅਮ੍ਹੇ, ਉਪਗਮ੍ਮ ਸਮਾਗਮਂ.

੪੧੪. ‘‘ਅਮ੍ਹਂ ਸਬ੍ਬਪਤਿ ਹੋਹਿ [ਸਬ੍ਬਾ ਪਤੀ ਹੋਨ੍ਤਿ (ਪੀ.)], ਅਨਾਗਤਸਮਾਗਮੇ;

ਸਬ੍ਬਾਵ ਤੁਯ੍ਹਂ ਭਰਿਯਾ, ਮਨਾਪਾ ਪਿਯਵਾਦਿਕਾ.

੪੧੫. ‘‘ਦਾਨਂ ਸੀਲਮਯਂ ਸਬ੍ਬਂ, ਭਾਵਨਾ ਚ ਸੁਭਾਵਿਤਾ;

ਦੀਘਰਤ੍ਤਞ੍ਚ ਨੋ [ਦੀਘਰਤ੍ਤਮਿਦਂ (ਸ੍ਯਾ. ਕ.)] ਸਬ੍ਬਂ, ਪਰਿਚ੍ਚਤ੍ਤਂ ਮਹਾਮੁਨੇ.

੪੧੬. ‘‘ਗਨ੍ਧਂ ਵਿਲੇਪਨਂ ਮਾਲਂ, ਦੀਪਞ੍ਚ ਰਤਨਾਮਯਂ;

ਯਂਕਿਞ੍ਚਿ ਪਤ੍ਥਿਤਂ ਸਬ੍ਬਂ, ਪਰਿਚ੍ਚਤ੍ਤਂ ਮਹਾਮੁਨਿ.

੪੧੭. ‘‘ਅਞ੍ਞਂ ਵਾਪਿ ਕਤਂ ਕਮ੍ਮਂ, ਪਰਿਭੋਗਞ੍ਚ ਮਾਨੁਸਂ;

ਦੀਘਰਤ੍ਤਞ੍ਹਿ ਨੋ ਸਬ੍ਬਂ, ਪਰਿਚ੍ਚਤ੍ਤਂ ਮਹਾਮੁਨਿ.

੪੧੮. ‘‘ਅਨੇਕਜਾਤਿਸਂਸਾਰਂ, ਬਹੁਂ ਪੁਞ੍ਞਮ੍ਪਿ ਨੋ ਕਤਂ;

ਇਸ੍ਸਰਮਨੁਭੋਤ੍ਵਾਨ, ਸਂਸਰਿਤ੍ਵਾ ਭਵਾਭਵੇ.

੪੧੯. ‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਸਕ੍ਯਪੁਤ੍ਤਨਿਵੇਸਨੇ;

ਨਾਨਾਕੁਲੂਪਪਨ੍ਨਾਯੋ, ਅਚ੍ਛਰਾ ਕਾਮਵਣ੍ਣਿਨੀ.

੪੨੦. ‘‘ਲਾਭਗ੍ਗੇਨ ਯਸਂ ਪਤ੍ਤਾ, ਪੂਜਿਤਾ ਸਬ੍ਬਸਕ੍ਕਤਾ;

ਲਾਭਿਯੋ ਅਨ੍ਨਪਾਨਾਨਂ, ਸਦਾ ਸਮ੍ਮਾਨਿਤਾ ਮਯਂ.

੪੨੧. ‘‘ਅਗਾਰਂ ਪਜਹਿਤ੍ਵਾਨ, ਪਬ੍ਬਜਿਮ੍ਹਨਗਾਰਿਯਂ;

ਅਡ੍ਢਮਾਸੇ ਅਸਮ੍ਪਤ੍ਤੇ, ਸਬ੍ਬਾ ਪਤ੍ਤਾਮ੍ਹ ਨਿਬ੍ਬੁਤਿਂ.

੪੨੨. ‘‘ਲਾਭਿਯੋ ਅਨ੍ਨਪਾਨਾਨਂ, ਵਤ੍ਥਸੇਨਾਸਨਾਨਿ ਚ;

ਉਪੇਨ੍ਤਿ ਪਚ੍ਚਯਾ ਸਬ੍ਬੇ, ਸਦਾ ਸਕ੍ਕਤਪੂਜਿਤਾ.

੪੨੩. ‘‘ਕਿਲੇਸਾ ਝਾਪਿਤਾ ਅਮ੍ਹਂ…ਪੇ… ਵਿਹਰਾਮ ਅਨਾਸਵਾ.

੪੨੪. ‘‘ਸ੍ਵਾਗਤਂ ਵਤ ਨੋ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੪੨੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਯਸੋਧਰਾਪਮੁਖਾਨਿ ਦਸਭਿਕ੍ਖੁਨੀਸਹਸ੍ਸਾਨਿ ਭਗਵਤੋ ਸਮ੍ਮੁਖਾ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਯਸੋਧਰਾਪਮੁਖਦਸਭਿਕ੍ਖੁਨੀਸਹਸ੍ਸਾਪਦਾਨਂ ਨਵਮਂ.