੧੦. ਯਸੋਧਰਾਪਮੁਖਅਟ੍ਠਾਰਸਭਿਕ੍ਖੁਨੀਸਹਸ੍ਸਅਪਦਾਨਂ
੪੨੬. ‘‘ਅਟ੍ਠਾਰਸਸਹਸ੍ਸਾਨਿ, ਭਿਕ੍ਖੁਨੀ ਸਕ੍ਯਸਮ੍ਭਵਾ;
ਯਸੋਧਰਾਪਮੁਖਾਨਿ, ਸਮ੍ਬੁਦ੍ਧਂ ਉਪਸਙ੍ਕਮੁਂ.
੪੨੭. ‘‘ਅਟ੍ਠਾਰਸਸਹਸ੍ਸਾਨਿ, ਸਬ੍ਬਾ ਹੋਨ੍ਤਿ ਮਹਿਦ੍ਧਿਕਾ;
ਵਨ੍ਦਨ੍ਤੀ ਮੁਨਿਨੋ ਪਾਦੇ, ਆਰੋਚੇਨ੍ਤਿ ਯਥਾਬਲਂ.
੪੨੮. ‘‘‘ਜਾਤਿ ਖੀਣਾ ਜਰਾ ਬ੍ਯਾਧਿ, ਮਰਣਞ੍ਚ ਮਹਾਮੁਨਿ;
ਅਨਾਸਵਂ ਪਦਂ ਸਨ੍ਤਂ, ਅਮਤਂ ਯਾਮ ਨਾਯਕ.
੪੨੯. ‘‘‘ਖਲਿਤਞ੍ਚੇ ਪੁਰੇ ਅਤ੍ਥਿ, ਸਬ੍ਬਾਸਮ੍ਪਿ ਮਹਾਮੁਨਿ;
ਅਪਰਾਧਮਜਾਨਨ੍ਤੀ, ਖਮ ਅਮ੍ਹਂ ਵਿਨਾਯਕ.
੪੩੦. ‘‘‘ਇਦ੍ਧਿਞ੍ਚਾਪਿ ਨਿਦਸ੍ਸੇਥ, ਮਮ ਸਾਸਨਕਾਰਿਕਾ;
ਪਰਿਸਾਨਞ੍ਚ ਸਬ੍ਬਾਸਂ, ਕਙ੍ਖਂ ਛਿਨ੍ਦਥ ਯਾਵਤਾ.
੪੩੧. ‘‘‘ਯਸੋਧਰਾ ਮਹਾਵੀਰ, ਮਨਾਪਾ ਪਿਯਦਸ੍ਸਨਾ;
ਸਬ੍ਬਾ ਤੁਯ੍ਹਂ ਮਹਾਵੀਰ, ਅਗਾਰਸ੍ਮਿਂ ਪਜਾਪਤਿ.
੪੩੨. ‘‘‘ਥੀਨਂ ਸਤਸਹਸ੍ਸਾਨਂ, ਨਵੁਤੀਨਂ ਛਦੁਤ੍ਤਰਿ;
ਅਗਾਰੇ ਤੇ ਮਯਂ ਵੀਰ, ਪਾਮੋਕ੍ਖਾ ਸਬ੍ਬਾ ਇਸ੍ਸਰਾ.
੪੩੩. ‘‘‘ਰੂਪਾਚਾਰਗੁਣੂਪੇਤਾ, ਯੋਬ੍ਬਨਟ੍ਠਾ ਪਿਯਂਵਦਾ;
ਸਬ੍ਬਾ ਨੋ ਅਪਚਾਯਨ੍ਤਿ, ਦੇਵਤਾ ਵਿਯ ਮਾਨੁਸਾ.
੪੩੪. ‘‘‘ਅਟ੍ਠਾਰਸਸਹਸ੍ਸਾਨਿ, ਸਬ੍ਬਾ ਸਾਕਿਯਸਮ੍ਭਵਾ;
ਯਸੋਧਰਾਸਹਸ੍ਸਾਨਿ, ਪਾਮੋਕ੍ਖਾ ਇਸ੍ਸਰਾ ਤਦਾ.
੪੩੫. ‘‘‘ਕਾਮਧਾਤੁਮਤਿਕ੍ਕਮ੍ਮ, ਸਣ੍ਠਿਤਾ ਰੂਪਧਾਤੁਯਾ;
ਰੂਪੇਨ ਸਦਿਸਾ ਨਤ੍ਥਿ, ਸਹਸ੍ਸਾਨਂ ਮਹਾਮੁਨਿ.
੪੩੬. ‘‘‘ਸਮ੍ਬੁਦ੍ਧਂ ਅਭਿਵਾਦੇਤ੍ਵਾ, ਇਦ੍ਧਿਂ ਦਸ੍ਸਂਸੁ ਸਤ੍ਥੁਨੋ;
ਨੇਕਾ ਨਾਨਾਵਿਧਾਕਾਰਾ, ਮਹਾਇਦ੍ਧੀਪਿ ਦਸ੍ਸਯੁਂ.
੪੩੭. ‘‘‘ਚਕ੍ਕਵਾਲ਼ਸਮਂ ਕਾਯਂ, ਸੀਸਂ ਉਤ੍ਤਰਤੋ ਕੁਰੁ;
ਉਭੋ ਪਕ੍ਖਾ ਦੁਵੇ ਦੀਪਾ, ਜਮ੍ਬੁਦੀਪਂ ਸਰੀਰਤੋ.
੪੩੮. ‘‘‘ਦਕ੍ਖਿਣਞ੍ਚ ਸਰਂ ਪਿਞ੍ਛਂ, ਨਾਨਾਸਾਖਾ ਤੁ ਪਤ੍ਤਕਾ;
ਚਨ੍ਦਞ੍ਚ ਸੂਰਿਯਞ੍ਚਕ੍ਖਿ, ਮੇਰੁਪਬ੍ਬਤਤੋ ਸਿਖਂ.
੪੩੯. ‘‘‘ਚਕ੍ਕਵਾਲ਼ਗਿਰਿਂ ਤੁਣ੍ਡਂ, ਜਮ੍ਬੁਰੁਕ੍ਖਂ ਸਮੂਲਕਂ;
ਬੀਜਮਾਨਾ ਉਪਾਗਨ੍ਤ੍ਵਾ, ਵਨ੍ਦਨ੍ਤੀ ਲੋਕਨਾਯਕਂ.
੪੪੦. ‘‘‘ਹਤ੍ਥਿਵਣ੍ਣਂ ਤਥੇਵਸ੍ਸਂ, ਪਬ੍ਬਤਂ ਜਲਧਿਂ ਤਥਾ;
ਚਨ੍ਦਞ੍ਚ ਸੂਰਿਯਂ ਮੇਰੁਂ, ਸਕ੍ਕਵਣ੍ਣਞ੍ਚ ਦਸ੍ਸਯੁਂ.
੪੪੧. ‘‘‘ਯਸੋਧਰਾ ਮਯਂ ਵੀਰ, ਪਾਦੇ ਵਨ੍ਦਾਮ ਚਕ੍ਖੁਮ;
ਤਵ ਚਿਰਪਭਾਵੇਨ, ਨਿਪ੍ਫਨ੍ਨਾ ਨਰਨਾਯਕ.
੪੪੨. ‘‘‘ਇਦ੍ਧੀਸੁ ਚ ਵਸੀ ਹੋਮ, ਦਿਬ੍ਬਾਯ ਸੋਤਧਾਤੁਯਾ;
ਚੇਤੋਪਰਿਯਞਾਣਸ੍ਸ, ਵਸੀ ਹੋਮ ਮਹਾਮੁਨੇ.
੪੪੩. ‘‘‘ਪੁਬ੍ਬੇਨਿਵਾਸਂ ਜਾਨਾਮ, ਦਿਬ੍ਬਚਕ੍ਖੁ ਵਿਸੋਧਿਤਂ;
ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.
੪੪੪. ‘‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਤਥੇਵ ਚ;
ਞਾਣਂ ਅਮ੍ਹਂ ਮਹਾਵੀਰ, ਉਪ੍ਪਨ੍ਨਂ ਤਵ ਸਨ੍ਤਿਕੇ.
੪੪੫. ‘‘‘ਪੁਬ੍ਬਾਨਂ ਲੋਕਨਾਥਾਨਂ, ਸਙ੍ਗਮਂ ਨੋ ਨਿਦਸ੍ਸਿਤਂ;
ਅਧਿਕਾਰਾ ਬਹੂ ਅਮ੍ਹਂ, ਤੁਯ੍ਹਤ੍ਥਾਯ ਮਹਾਮੁਨੇ.
੪੪੬. ‘‘‘ਯਂ ਅਮ੍ਹਂ ਪੂਰਿਤਂ ਕਮ੍ਮਂ, ਕੁਸਲਂ ਸਰਸੇ ਮੁਨੇ;
ਤੁਯ੍ਹਤ੍ਥਾਯ ਮਹਾਵੀਰ, ਪੁਞ੍ਞਾਨੁਪਚਿਤਾਨਿ ਨੋ.
੪੪੭. ‘‘‘ਅਭਬ੍ਬਟ੍ਠਾਨੇ ਵਜ੍ਜੇਤ੍ਵਾ, ਵਾਰਯਿਮ੍ਹ ਅਨਾਚਰਂ;
ਤੁਯ੍ਹਤ੍ਥਾਯ ਮਹਾਵੀਰ, ਚਤ੍ਤਾਨਿ ਜੀਵਿਤਾਨਿ ਨੋ [ਸਞ੍ਚਤ੍ਤਂ ਜੀਵਿਤਮ੍ਪਿ ਨੋ (ਸ੍ਯਾ.)].
੪੪੮. ‘‘‘ਨੇਕਕੋਟਿਸਹਸ੍ਸਾਨਿ, ਭਰਿਯਤ੍ਥਾਯਦਾਸਿ ਨੋ;
ਨ ਤਤ੍ਥ ਵਿਮਨਾ ਹੋਮ, ਤੁਯ੍ਹਤ੍ਥਾਯ ਮਹਾਮੁਨੇ.
੪੪੯. ‘‘‘ਨੇਕਕੋਟਿਸਹਸ੍ਸਾਨਿ, ਉਪਕਾਰਾਯਦਾਸਿ ਨੋ;
ਨ ਤਤ੍ਥ ਵਿਮਨਾ ਹੋਮ, ਤੁਯ੍ਹਤ੍ਥਾਯ ਮਹਾਮੁਨੇ.
੪੫੦. ‘‘‘ਨੇਕਕੋਟਿਸਹਸ੍ਸਾਨਿ, ਭੋਜਨਤ੍ਥਾਯਦਾਸਿ ਨੋ;
ਨ ਤਤ੍ਥ ਵਿਮਨਾ ਹੋਮ, ਤੁਯ੍ਹਤ੍ਥਾਯ ਮਹਾਮੁਨੇ.
੪੫੧. ‘‘‘ਨੇਕਕੋਟਿਸਹਸ੍ਸਾਨਿ, ਜੀਵਿਤਾਨਿ ਚਜਿਮ੍ਹਸੇ [ਚਜਿਮ੍ਹ ਨੋ (ਪੀ. ਕ.)];
ਭਯਮੋਕ੍ਖਂ ਕਰਿਸ੍ਸਾਮ, ਜੀਵਿਤਾਨਿ ਚਜਿਮ੍ਹਸੇ.
੪੫੨. ‘‘‘ਅਙ੍ਗਗਤੇ ਅਲਙ੍ਕਾਰੇ, ਵਤ੍ਥੇ ਨਾਨਾਵਿਧੇ ਬਹੂ;
ਇਤ੍ਥਿਭਣ੍ਡੇ ਨ ਗੂਹਾਮ, ਤੁਯ੍ਹਤ੍ਥਾਯ ਮਹਾਮੁਨੇ.
੪੫੩. ‘‘‘ਧਨਧਞ੍ਞਪਰਿਚ੍ਚਾਗਂ, ਗਾਮਾਨਿ ਨਿਗਮਾਨਿ ਚ;
ਖੇਤ੍ਤਂ ਪੁਤ੍ਤਾ ਚ ਧੀਤਾ ਚ, ਪਰਿਚ੍ਚਤ੍ਤਾ ਮਹਾਮੁਨੇ.
੪੫੪. ‘‘‘ਹਤ੍ਥੀ ਅਸ੍ਸਾ ਗਵਾ ਚਾਪਿ, ਦਾਸਿਯੋ ਪਰਿਚਾਰਿਕਾ;
ਤੁਯ੍ਹਤ੍ਥਾਯ ਮਹਾਵੀਰ, ਪਰਿਚ੍ਚਤ੍ਤਂ ਅਸਙ੍ਖਿਯਂ.
੪੫੫. ‘‘‘ਯਂ ਅਮ੍ਹੇ ਪਟਿਮਨ੍ਤੇਸਿ, ਦਾਨਂ ਦਸ੍ਸਾਮ ਯਾਚਕੇ;
ਵਿਮਨਂ ਨੋ ਨ ਪਸ੍ਸਾਮ, ਦਦਤੋ ਦਾਨਮੁਤ੍ਤਮਂ.
੪੫੬. ‘‘‘ਨਾਨਾਵਿਧਂ ਬਹੁਂ ਦੁਕ੍ਖਂ, ਸਂਸਾਰੇ ਚ ਬਹੁਬ੍ਬਿਧੇ;
ਤੁਯ੍ਹਤ੍ਥਾਯ ਮਹਾਵੀਰ, ਅਨੁਭੁਤ੍ਤਂ ਅਸਙ੍ਖਿਯਂ.
੪੫੭. ‘‘‘ਸੁਖਪ੍ਪਤ੍ਤਾਨੁਮੋਦਾਮ, ਨ ਚ ਦੁਕ੍ਖੇਸੁ ਦੁਮ੍ਮਨਾ;
ਸਬ੍ਬਤ੍ਥ ਤੁਲਿਤਾ ਹੋਮ, ਤੁਯ੍ਹਤ੍ਥਾਯ ਮਹਾਮੁਨੇ.
੪੫੮. ‘‘‘ਅਨੁਮਗ੍ਗੇਨ ਸਮ੍ਬੁਦ੍ਧੋ, ਯਂ ਧਮ੍ਮਂ ਅਭਿਨੀਹਰਿ;
ਅਨੁਭੋਤ੍ਵਾ ਸੁਖਂ ਦੁਕ੍ਖਂ, ਪਤ੍ਤੋ ਬੋਧਿਂ ਮਹਾਮੁਨੇ.
੪੫੯. ‘‘‘ਬ੍ਰਹ੍ਮਦੇਵਞ੍ਚ ਸਮ੍ਬੁਦ੍ਧਂ, ਗੋਤਮਂ ਲੋਕਨਾਯਕਂ;
ਅਞ੍ਞੇਸਂ ਲੋਕਨਾਥਾਨਂ, ਸਙ੍ਗਮਂ ਤੇਹਿ ਨੋ ਬਹੂ.
੪੬੦. ‘‘‘ਅਧਿਕਾਰਂ ਬਹੁਂ ਅਮ੍ਹੇ, ਤੁਯ੍ਹਤ੍ਥਾਯ ਮਹਾਮੁਨੇ;
ਗਵੇਸਤੋ ਬੁਦ੍ਧਧਮ੍ਮੇ, ਮਯਂ ਤੇ ਪਰਿਚਾਰਿਕਾ.
੪੬੧. ‘‘‘ਕਪ੍ਪੇ ਚ ਸਤਸਹਸ੍ਸੇ, ਚਤੁਰੋ ਚ ਅਸਙ੍ਖਿਯੇ;
ਦੀਪਙ੍ਕਰੋ ਮਹਾਵੀਰੋ, ਉਪ੍ਪਜ੍ਜਿ ਲੋਕਨਾਯਕੋ.
੪੬੨. ‘‘‘ਪਚ੍ਚਨ੍ਤਦੇਸਵਿਸਯੇ, ਨਿਮਨ੍ਤੇਤ੍ਵਾ ਤਥਾਗਤਂ;
ਤਸ੍ਸ ਆਗਮਨਂ ਮਗ੍ਗਂ, ਸੋਧੇਨ੍ਤਿ ਤੁਟ੍ਠਮਾਨਸਾ.
੪੬੩. ‘‘‘ਤੇਨ ਕਾਲੇਨ ਸੋ ਆਸਿ, ਸੁਮੇਧੋ ਨਾਮ ਬ੍ਰਾਹ੍ਮਣੋ;
ਮਗ੍ਗਞ੍ਚ ਪਟਿਯਾਦੇਸਿ, ਆਯਤੋ ਸਬ੍ਬਦਸ੍ਸਿਨੋ.
੪੬੪. ‘‘‘ਤੇਨ ਕਾਲੇਨ ਅਹੁਮ੍ਹ, ਸਬ੍ਬਾ ਬ੍ਰਾਹ੍ਮਣਸਮ੍ਭਵਾ;
ਥਲੂਦਜਾਨਿ ਪੁਪ੍ਫਾਨਿ, ਆਹਰਿਮ੍ਹ ਸਮਾਗਮਂ.
੪੬੫. ‘‘‘ਤਸ੍ਮਿਂ ਸੋ ਸਮਯੇ ਬੁਦ੍ਧੋ, ਦੀਪਙ੍ਕਰੋ ਮਹਾਯਸੋ;
ਵਿਯਾਕਾਸਿ ਮਹਾਵੀਰੋ, ਇਸਿਮੁਗ੍ਗਤਮਾਨਸਂ.
੪੬੬. ‘‘‘ਚਲਤੀ ਰਵਤੀ ਪੁਥਵੀ, ਸਙ੍ਕਮ੍ਪਤਿ ਸਦੇਵਕੇ;
ਤਸ੍ਸ ਕਮ੍ਮਂ ਪਕਿਤ੍ਤੇਨ੍ਤੇ, ਇਸਿਮੁਗ੍ਗਤਮਾਨਸਂ.
੪੬੭. ‘‘‘ਦੇਵਕਞ੍ਞਾ ਮਨੁਸ੍ਸਾ ਚ, ਮਯਞ੍ਚਾਪਿ ਸਦੇਵਕਾ;
ਨਾਨਾਪੂਜਨੀਯਂ ਭਣ੍ਡਂ, ਪੂਜਯਿਤ੍ਵਾਨ ਪਤ੍ਥਯੁਂ.
੪੬੮. ‘‘‘ਤੇਸਂ ਬੁਦ੍ਧੋ ਵਿਯਾਕਾਸਿ, ਜੋਤਿਦੀਪ ਸਨਾਮਕੋ;
ਅਜ੍ਜ ਯੇ ਪਤ੍ਥਿਤਾ ਅਤ੍ਥਿ, ਤੇ ਭਵਿਸ੍ਸਨ੍ਤਿ ਸਮ੍ਮੁਖਾ.
੪੬੯. ‘‘‘ਅਪਰਿਮੇਯ੍ਯੇ ਇਤੋ ਕਪ੍ਪੇ, ਯਂ ਨੋ ਬੁਦ੍ਧੋ ਵਿਯਾਕਰਿ;
ਤਂ ਵਾਚਮਨੁਮੋਦੇਨ੍ਤਾ, ਏਵਂਕਾਰੀ ਅਹੁਮ੍ਹ ਨੋ.
੪੭੦. ‘‘‘ਤਸ੍ਸ ਕਮ੍ਮਸ੍ਸ ਸੁਕਤਸ੍ਸ, ਤਸ੍ਸ ਚਿਤ੍ਤਂ ਪਸਾਦਯੁਂ;
ਦੇਵਮਾਨੁਸਿਕਂ ਯੋਨਿਂ, ਅਨੁਭੋਤ੍ਵਾ ਅਸਙ੍ਖਿਯਂ.
੪੭੧. ‘‘‘ਸੁਖਦੁਕ੍ਖੇਨੁਭੋਤ੍ਵਾਨ, ਦੇਵੇਸੁ ਮਾਨੁਸੇਸੁ ਚ;
ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਜਾਤਾਮ੍ਹ ਸਾਕਿਯੇ ਕੁਲੇ.
੪੭੨. ‘‘‘ਰੂਪਵਤੀ ਭੋਗਵਤੀ, ਯਸਸੀਲਵਤੀ ਤਤੋ;
ਸਬ੍ਬਙ੍ਗਸਮ੍ਪਦਾ ਹੋਮ, ਕੁਲੇਸੁ ਅਭਿਸਕ੍ਕਤਾ.
੪੭੩. ‘‘‘ਲਾਭਂ ਸਿਲੋਕਂ ਸਕ੍ਕਾਰਂ, ਲੋਕਧਮ੍ਮਸਮਾਗਮਂ;
ਚਿਤ੍ਤਞ੍ਚ ਦੁਕ੍ਖਿਤਂ ਨਤ੍ਥਿ, ਵਸਾਮ ਅਕੁਤੋਭਯਾ.
੪੭੪. ‘‘‘ਵੁਤ੍ਤਞ੍ਹੇਤਂ ਭਗਵਤਾ, ਰਞ੍ਞੋ ਅਨ੍ਤੇਪੁਰੇ ਤਦਾ;
ਖਤ੍ਤਿਯਾਨਂ ਪੁਰੇ ਵੀਰ [ਤਾਸਂ (ਸ੍ਯਾ.)], ਉਪਕਾਰਞ੍ਚ ਨਿਦ੍ਦਿਸਿ.
੪੭੫. ‘‘‘ਉਪਕਾਰਾ ਚ ਯਾ ਨਾਰੀ, ਯਾ ਚ ਨਾਰੀ ਸੁਖੇ ਦੁਖੇ;
ਅਤ੍ਥਕ੍ਖਾਯੀ ਚ ਯਾ ਨਾਰੀ, ਯਾ ਚ ਨਾਰੀਨੁਕਮ੍ਪਿਕਾ.
੪੭੬. ‘‘‘ਧਮ੍ਮਂ ਚਰੇ ਸੁਚਰਿਤਂ, ਨ ਨਂ ਦੁਚ੍ਚਰਿਤਂ ਚਰੇ;
ਧਮ੍ਮਚਾਰੀ ਸੁਖਂ ਸੇਤਿ, ਅਸ੍ਮਿਂ ਲੋਕੇ ਪਰਮ੍ਹਿ ਚ.
੪੭੭. ‘‘‘ਅਗਾਰਂ ਵਿਜਹਿਤ੍ਵਾਨ, ਪਬ੍ਬਜਿਮ੍ਹਨਗਾਰਿਯਂ;
ਅਡ੍ਢਮਾਸੇ ਅਸਮ੍ਪਤ੍ਤੇ, ਚਤੁਸਚ੍ਚਂ ਫੁਸਿਮ੍ਹ ਨੋ.
੪੭੮. ‘‘‘ਚੀਵਰਂ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ;
ਉਪਨੇਨ੍ਤਿ ਬਹੂ ਅਮ੍ਹੇ, ਸਾਗਰਸ੍ਸੇਵ ਊਮਿਯੋ.
੪੭੯. ‘‘‘ਕਿਲੇਸਾ ਝਾਪਿਤਾ ਅਮ੍ਹਂ [ਮਯ੍ਹਂ (ਸ੍ਯਾ.), ਅਮ੍ਹਾਕਂ (ਕ.)], ਭਵਾ ਸਬ੍ਬੇ ਸਮੂਹਤਾ;
ਨਾਗੀਵ ਬਨ੍ਧਨਂ ਛੇਤ੍ਵਾ, ਵਿਹਰਾਮ ਅਨਾਸਵਾ.
੪੮੦. ‘‘‘ਸ੍ਵਾਗਤਂ ਵਤ ਨੋ ਆਸਿ, ਮਮ ਬੁਦ੍ਧਸ੍ਸ ਸਨ੍ਤਿਕੇ;
ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.
੪੮੧. ‘‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’.
੪੮੨. ‘‘ਏਵਂ ਬਹੁਵਿਧਂ ਦੁਕ੍ਖਂ, ਸਮ੍ਪਤ੍ਤੀ ਚ ਬਹੁਬ੍ਬਿਧਾ;
ਵਿਸੁਦ੍ਧਭਾਵਂ ਸਮ੍ਪਤ੍ਤਾ, ਲਭਾਮ ਸਬ੍ਬਸਮ੍ਪਦਾ.
੪੮੩. ‘‘ਯਾ ਦਦਨ੍ਤਿ ਸਕਤ੍ਤਾਨਂ, ਪੁਞ੍ਞਤ੍ਥਾਯ ਮਹੇਸਿਨੋ;
ਸਹਾਯਸਮ੍ਪਦਾ ਹੋਨ੍ਤਿ, ਨਿਬ੍ਬਾਨਪਦਮਸਙ੍ਖਤਂ.
੪੮੪. ‘‘ਪਰਿਕ੍ਖੀਣਂ ਅਤੀਤਞ੍ਚ, ਪਚ੍ਚੁਪ੍ਪਨ੍ਨਂ ਅਨਾਗਤਂ;
ਸਬ੍ਬਕਮ੍ਮਮ੍ਪਿ ਨੋ ਖੀਣਂ, ਪਾਦੇ ਵਨ੍ਦਾਮ ਚਕ੍ਖੁਮ.
੪੮੫. ‘‘ਨਿਬ੍ਬਾਨਾਯ ਵਦਨ੍ਤੀਨਂ, ਕਿਂ ਵੋ ਵਕ੍ਖਾਮ ਉਤ੍ਤਰਿ;
ਸਨ੍ਤਸਙ੍ਖਤਦੋਸਞ੍ਹਿ, ਪਪ੍ਪੋਥ [ਸਨ੍ਤਸਙ੍ਖਤਦੋਸੋ ਯੋ, ਪਜ੍ਜੋਤਂ (ਸ੍ਯਾ. ਪੀ. ਕ.)] ਅਮਤਂ ਪਦਂ’’.
ਇਤ੍ਥਂ ਸੁਦਂ ਯਸੋਧਰਾਪਮੁਖਾਨਿ ਅਟ੍ਠਾਰਸਭਿਕ੍ਖੁਨੀਸਹਸ੍ਸਾਨਿ ਭਗਵਤੋ ਸਮ੍ਮੁਖਾ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਯਸੋਧਰਾਪਮੁਖਅਟ੍ਠਾਰਸਭਿਕ੍ਖੁਨੀਸਹਸ੍ਸਾਪਦਾਨਂ ਦਸਮਂ.
ਕੁਣ੍ਡਲਕੇਸੀਵਗ੍ਗੋ ਤਤਿਯੋ.