੮. ਯਸੋਧਰਾਥੇਰੀਅਪਦਾਨਂ

੩੧੪. ਏਕਸ੍ਮਿਂ ਸਮਯੇ ਰਮ੍ਮੇ, ਇਦ੍ਧੇ ਰਾਜਗਹੇ ਪੁਰੇ;

ਪਬ੍ਭਾਰਮ੍ਹਿ ਵਰੇਕਮ੍ਹਿ, ਵਸਨ੍ਤੇ ਨਰਨਾਯਕੇ.

੩੧੫. ਵਸਨ੍ਤਿਯਾ ਤਮ੍ਹਿ ਨਗਰੇ, ਰਮ੍ਮੇ ਭਿਕ੍ਖੁਨੁਪਸ੍ਸਯੇ;

ਯਸੋਧਰਾਭਿਕ੍ਖੁਨਿਯਾ, ਏਵਂ ਆਸਿ ਵਿਤਕ੍ਕਿਤਂ.

੩੧੬. ‘‘ਸੁਦ੍ਧੋਦਨੋ ਮਹਾਰਾਜਾ, ਗੋਤਮੀ ਚ ਪਜਾਪਤੀ;

ਅਭਿਞ੍ਞਾਤਾ ਮਹਾਥੇਰਾ, ਥੇਰਿਯੋ ਚ ਮਹਿਦ੍ਧਿਕਾ.

੩੧੭. ‘‘ਸਨ੍ਤਿਂ ਗਤਾਵ ਆਸੁਂ ਤੇ, ਦੀਪਚ੍ਚੀਵ ਨਿਰਾਸਵਾ;

ਲੋਕਨਾਥੇ ਧਰਨ੍ਤੇਵ, ਅਹਮ੍ਪਿ ਚ ਸਿਵਂ ਪਦਂ.

੩੧੮. ‘‘ਗਮਿਸ੍ਸਾਮੀਤਿ ਚਿਨ੍ਤੇਤ੍ਵਾ, ਪਸ੍ਸਨ੍ਤੀ ਆਯੁਮਤ੍ਤਨੋ;

ਪਸ੍ਸਿਤ੍ਵਾ ਆਯੁਸਙ੍ਖਾਰਂ, ਤਦਹੇਵ ਖਯਂ ਗਤਂ.

੩੧੯. ‘‘ਪਤ੍ਤਚੀਵਰਮਾਦਾਯ, ਨਿਕ੍ਖਮਿਤ੍ਵਾ ਸਕਸ੍ਸਮਾ;

ਪੁਰਕ੍ਖਤਾ ਭਿਕ੍ਖੁਨੀਭਿ, ਸਤੇਹਿ ਸਹਸ੍ਸੇਹਿ ਸਾ [ਸਹ ਪਞ੍ਚਹਿ (ਸੀ. ਪੀ.)].

੩੨੦. ‘‘ਮਹਿਦ੍ਧਿਕਾ ਮਹਾਪਞ੍ਞਾ, ਸਮ੍ਬੁਦ੍ਧਂ ਉਪਸਙ੍ਕਮਿ;

ਸਮ੍ਬੁਦ੍ਧਂ ਅਭਿਵਾਦੇਤ੍ਵਾ, ਸਤ੍ਥੁਨੋ ਚਕ੍ਕਲਕ੍ਖਣੇ;

ਨਿਸਿਨ੍ਨਾ ਏਕਮਨ੍ਤਮ੍ਹਿ, ਇਦਂ ਵਚਨਮਬ੍ਰਵਿ.

੩੨੧. ‘‘‘ਅਟ੍ਠਸਤ੍ਤਤਿਵਸ੍ਸਾਹਂ, ਪਚ੍ਛਿਮੋ ਵਤ੍ਤਤੇ ਵਯੋ [ਪਚ੍ਛਿਮਾ ਵਤ੍ਤਯਿ ਵਯਾ (ਸ੍ਯਾ.)];

ਪਬ੍ਭਾਰਮ੍ਹਿ ਅਨੁਪ੍ਪਤ੍ਤਾ, ਆਰੋਚੇਮਿ ਮਹਾਮੁਨਿ.

੩੨੨. ‘‘‘ਪਰਿਪਕ੍ਕੋ ਵਯੋ ਮਯ੍ਹਂ, ਪਰਿਤ੍ਤਂ ਮਮ ਜੀਵਿਤਂ;

ਪਹਾਯ ਵੋ ਗਮਿਸ੍ਸਾਮਿ, ਕਤਂ ਮੇ ਸਰਣਮਤ੍ਤਨੋ.

੩੨੩. ‘‘‘ਵਯਮ੍ਹਿ ਪਚ੍ਛਿਮੇ ਕਾਲੇ, ਮਰਣਂ ਉਪਰੁਦ੍ਧਤਿ;

ਅਜ੍ਜਰਤ੍ਤਿਂ ਮਹਾਵੀਰ, ਪਾਪੁਣਿਸ੍ਸਾਮਿ ਨਿਬ੍ਬੁਤਿਂ.

੩੨੪. ‘‘‘ਨਤ੍ਥਿ ਜਾਤਿ ਜਰਾ ਬ੍ਯਾਧਿ, ਮਰਣਞ੍ਚ ਮਹਾਮੁਨੇ;

ਅਜਰਾਮਰਣਂ ਪੁਰਂ, ਗਮਿਸ੍ਸਾਮਿ ਅਸਙ੍ਖਤਂ.

੩੨੫. ‘‘‘ਯਾਵਤਾ ਪਰਿਸਾ ਨਾਮ, ਸਮੁਪਾਸਨ੍ਤਿ ਸਤ੍ਥੁਨੋ;

ਅਪਰਾਧਮਜਾਨਨ੍ਤੀ [ਸਚੇ ਮੇਤ੍ਥਿ (ਸੀ.), ਪਜਾਨਨ੍ਤੀ (ਕ.)], ਖਮਨ੍ਤਂ ਸਮ੍ਮੁਖਾ ਮੁਨੇ.

੩੨੬. ‘‘‘ਸਂਸਰਿਤ੍ਵਾ ਚ ਸਂਸਾਰੇ, ਖਲਿਤਞ੍ਚੇ ਮਮਂ ਤਯਿ;

ਆਰੋਚੇਮਿ ਮਹਾਵੀਰ, ਅਪਰਾਧਂ ਖਮਸ੍ਸੁ ਮੇ’.

੩੨੭. ‘‘ਸੁਤ੍ਵਾਨ ਵਚਨਂ ਤਸ੍ਸਾ, ਮੁਨਿਨ੍ਦੋ ਇਦਮਬ੍ਰਵਿ;

‘ਕਿਮੁਤ੍ਤਰਂ ਤੇ ਵਕ੍ਖਾਮਿ, ਨਿਬ੍ਬਾਨਾਯ ਵਜਨ੍ਤਿਯਾ.

੩੨੮. ‘‘‘ਇਦ੍ਧਿਞ੍ਚਾਪਿ ਨਿਦਸ੍ਸੇਹਿ, ਮਮ ਸਾਸਨਕਾਰਿਕੇ;

ਪਰਿਸਾਨਞ੍ਚ ਸਬ੍ਬਾਸਂ, ਕਙ੍ਖਂ ਛਿਨ੍ਦਸ੍ਸੁ ਯਾਵਤਾ’.

੩੨੯. ‘‘ਸੁਤ੍ਵਾ ਤਂ ਮੁਨਿਨੋ ਵਾਚਂ, ਭਿਕ੍ਖੁਨੀ ਸਾ ਯਸੋਧਰਾ;

ਵਨ੍ਦਿਤ੍ਵਾ ਮੁਨਿਰਾਜਂ ਤਂ, ਇਦਂ ਵਚਨਮਬ੍ਰਵਿ.

੩੩੦. ‘‘‘ਯਸੋਧਰਾ ਅਹਂ ਵੀਰ, ਅਗਾਰੇ ਤੇ ਪਜਾਪਤਿ;

ਸਾਕਿਯਮ੍ਹਿ ਕੁਲੇ ਜਾਤਾ, ਇਤ੍ਥਿਅਙ੍ਗੇ ਪਤਿਟ੍ਠਿਤਾ.

੩੩੧. ‘‘‘ਥੀਨਂ ਸਤਸਹਸ੍ਸਾਨਂ, ਨਵੁਤੀਨਂ ਛਦੁਤ੍ਤਰਿ;

ਅਗਾਰੇ ਤੇ ਅਹਂ ਵੀਰ, ਪਾਮੋਕ੍ਖਾ ਸਬ੍ਬਾ ਇਸ੍ਸਰਾ.

੩੩੨. ‘‘‘ਰੂਪਾਚਾਰਗੁਣੂਪੇਤਾ, ਯੋਬ੍ਬਨਟ੍ਠਾ ਪਿਯਂਵਦਾ;

ਸਬ੍ਬਾ ਮਂ ਅਪਚਾਯਨ੍ਤਿ, ਦੇਵਤਾ ਵਿਯ ਮਾਨੁਸਾ.

੩੩੩. ‘‘‘ਕਞ੍ਞਾਸਤਸਹਸ੍ਸਪਮੁਖਾ, ਸਕ੍ਯਪੁਤ੍ਤਨਿਵੇਸਨੇ;

ਸਮਾਨਸੁਖਦੁਕ੍ਖਤਾ, ਦੇਵਤਾ ਵਿਯ ਨਨ੍ਦਨੇ.

੩੩੪. ‘‘‘ਕਾਮਧਾਤੁਮਤਿਕ੍ਕਮ੍ਮ [ਕਾਮਧਾਤੁਮਤਿਕ੍ਕਨ੍ਤਾ (ਸੀ. ਸ੍ਯਾ. ਪੀ. ਕ.)], ਸਣ੍ਠਿਤਾ ਰੂਪਧਾਤੁਯਾ;

ਰੂਪੇਨ ਸਦਿਸਾ ਨਤ੍ਥਿ, ਠਪੇਤ੍ਵਾ ਲੋਕਨਾਯਕਂ.

੩੩੫. ‘‘‘ਸਮ੍ਬੁਦ੍ਧਂ ਅਭਿਵਾਦੇਤ੍ਵਾ, ਇਦ੍ਧਿਂ ਦਸ੍ਸੇਸਿ ਸਤ੍ਥੁਨੋ;

ਨੇਕਾ ਨਾਨਾਵਿਧਾਕਾਰਾ, ਮਹਾਇਦ੍ਧੀਪਿ ਦਸ੍ਸਯੀ [ਏਵਮਾਦੀਨਿ ਵਤ੍ਵਾਨ, ਉਪਤਿਤ੍ਵਾਨ ਅਮ੍ਬਰਂ; ਇਦ੍ਧੀ ਅਨੇਕਾ ਦਸ੍ਸੇਸਿ, ਬੁਦ੍ਧਾਨੁਞ੍ਞਾ ਯਸੋਧਰਾ; (ਸੀ.)].

੩੩੬. ‘‘‘ਚਕ੍ਕਵਾਲ਼ਸਮਂ ਕਾਯਂ, ਸੀਸਂ ਉਤ੍ਤਰਤੋ ਕੁਰੁ;

ਉਭੋ ਪਕ੍ਖਾ ਦੁਵੇ ਦੀਪਾ, ਜਮ੍ਬੁਦੀਪਂ ਸਰੀਰਤੋ.

੩੩੭. ‘‘‘ਦਕ੍ਖਿਣਞ੍ਚ ਸਰਂ ਪਿਞ੍ਛਂ, ਨਾਨਾਸਾਖਾ ਤੁ ਪਤ੍ਤਕਾ;

ਚਨ੍ਦਞ੍ਚ ਸੂਰਿਯਞ੍ਚਕ੍ਖਿ, ਮੇਰੁਪਬ੍ਬਤਤੋ ਸਿਖਂ.

੩੩੮. ‘‘‘ਚਕ੍ਕਵਾਲਗਿਰਿਂ ਤੁਣ੍ਡਂ, ਜਮ੍ਬੁਰੁਕ੍ਖਂ ਸਮੂਲਕਂ;

ਬੀਜਮਾਨਾ ਉਪਾਗਨ੍ਤ੍ਵਾ, ਵਨ੍ਦਨ੍ਤੀ ਲੋਕਨਾਯਕਂ.

੩੩੯. ‘‘‘ਹਤ੍ਥਿਵਣ੍ਣਂ ਤਥੇਵਸ੍ਸਂ, ਪਬ੍ਬਤਂ ਜਲਧਿਂ ਤਥਾ;

ਚਨ੍ਦਿਮਂ ਸੂਰਿਯਂ ਮੇਰੁਂ, ਸਕ੍ਕਵਣ੍ਣਞ੍ਚ ਦਸ੍ਸਯਿ.

੩੪੦. ‘‘‘ਯਸੋਧਰਾ ਅਹਂ ਵੀਰ, ਪਾਦੇ ਵਨ੍ਦਾਮਿ ਚਕ੍ਖੁਮ;

ਸਹਸ੍ਸਲੋਕਧਾਤੂਨਂ, ਫੁਲ੍ਲਪਦ੍ਮੇਨ ਛਾਦਯਿ.

੩੪੧. ‘‘‘ਬ੍ਰਹ੍ਮਵਣ੍ਣਞ੍ਚ ਮਾਪੇਤ੍ਵਾ, ਧਮ੍ਮਂ ਦੇਸੇਸਿ ਸੁਞ੍ਞਤਂ;

ਯਸੋਧਰਾ ਅਹਂ ਵੀਰ, ਪਾਦੇ ਵਨ੍ਦਾਮਿ ਚਕ੍ਖੁਮ.

੩੪੨. ‘‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਚੇਤੋਪਰਿਯਞਾਣਸ੍ਸ, ਵਸੀ ਹੋਮਿ ਮਹਾਮੁਨਿ.

੩੪੩. ‘‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੩੪੪. ‘‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਤਥੇਵ ਚ;

ਞਾਣਂ ਮਯ੍ਹਂ ਮਹਾਵੀਰ, ਉਪ੍ਪਨ੍ਨਂ ਤਵ ਸਨ੍ਤਿਕੇ.

੩੪੫. ‘‘‘ਪੁਬ੍ਬਾਨਂ ਲੋਕਨਾਥਾਨਂ, ਸਙ੍ਗਮਂ ਤੇ ਨਿਦਸ੍ਸਿਤਂ [ਸੁਦਸ੍ਸਿਤਂ (ਸ੍ਯਾ. ਪੀ. ਕ.)];

ਅਧਿਕਾਰਂ ਬਹੁਂ ਮਯ੍ਹਂ, ਤੁਯ੍ਹਤ੍ਥਾਯ ਮਹਾਮੁਨੇ.

੩੪੬. ‘‘‘ਯਂ ਮਯ੍ਹਂ ਪੂਰਿਤਂ ਕਮ੍ਮਂ, ਕੁਸਲਂ ਸਰਸੇ ਮੁਨੇ;

ਤੁਯ੍ਹਤ੍ਥਾਯ ਮਹਾਵੀਰ, ਪੁਞ੍ਞਂ ਉਪਚਿਤਂ ਮਯਾ.

੩੪੭. ‘‘‘ਅਭਬ੍ਬਟ੍ਠਾਨੇ ਵਜ੍ਜੇਤ੍ਵਾ, ਵਾਰਯਿਤ੍ਵਾ ਅਨਾਚਰਂ;

ਤੁਯ੍ਹਤ੍ਥਾਯ ਮਹਾਵੀਰ, ਸਞ੍ਚਤ੍ਤਂ ਜੀਵਿਤਂ ਮਯਾ.

੩੪੮. ‘‘‘ਨੇਕਕੋਟਿਸਹਸ੍ਸਾਨਿ, ਭਰਿਯਤ੍ਥਾਯਦਾਸਿ ਮਂ;

ਨ ਤਤ੍ਥ ਵਿਮਨਾ ਹੋਮਿ, ਤੁਯ੍ਹਤ੍ਥਾਯ ਮਹਾਮੁਨਿ.

੩੪੯. ‘‘‘ਨੇਕਕੋਟਿਸਹਸ੍ਸਾਨਿ, ਉਪਕਾਰਾਯਦਾਸਿ ਮਂ;

ਨ ਤਤ੍ਥ ਵਿਮਨਾ ਹੋਮਿ, ਤੁਯ੍ਹਤ੍ਥਾਯ ਮਹਾਮੁਨਿ.

੩੫੦. ‘‘‘ਨੇਕਕੋਟਿਸਹਸ੍ਸਾਨਿ, ਭੋਜਨਤ੍ਥਾਯਦਾਸਿ ਮਂ;

ਨ ਤਤ੍ਥ ਵਿਮਨਾ ਹੋਮਿ, ਤੁਯ੍ਹਤ੍ਥਾਯ ਮਹਾਮੁਨਿ.

੩੫੧. ‘‘‘ਨੇਕਕੋਟਿਸਹਸ੍ਸਾਨਿ, ਜੀਵਿਤਾਨਿ ਪਰਿਚ੍ਚਜਿਂ;

ਭਯਮੋਕ੍ਖਂ ਕਰਿਸ੍ਸਨ੍ਤਿ, ਦਦਾਮਿ ਮਮ ਜੀਵਿਤਂ.

੩੫੨. ‘‘‘ਅਙ੍ਗਗਤੇ [ਅਙ੍ਗੇ ਏਵਂ (ਕ.)] ਅਲਙ੍ਕਾਰੇ, ਵਤ੍ਥੇ ਨਾਨਾਵਿਧੇ ਬਹੂ;

ਇਤ੍ਥਿਮਣ੍ਡੇ ਨ ਗੂਹਾਮਿ, ਤੁਯ੍ਹਤ੍ਥਾਯ ਮਹਾਮੁਨਿ.

੩੫੩. ‘‘‘ਧਨਧਞ੍ਞਪਰਿਚ੍ਚਾਗਂ, ਗਾਮਾਨਿ ਨਿਗਮਾਨਿ ਚ;

ਖੇਤ੍ਤਂ ਪੁਤ੍ਤਾ ਚ ਧੀਤਾ ਚ, ਪਰਿਚ੍ਚਤ੍ਤਾ ਮਹਾਮੁਨਿ.

੩੫੪. ‘‘‘ਹਤ੍ਥੀ ਅਸ੍ਸਾ ਗਵਾ ਚਾਪਿ, ਦਾਸਿਯੋ ਪਰਿਚਾਰਿਕਾ;

ਤੁਯ੍ਹਤ੍ਥਾਯ ਮਹਾਵੀਰ, ਪਰਿਚ੍ਚਤ੍ਤਾ ਅਸਙ੍ਖਿਯਾ.

੩੫੫. ‘‘‘ਯਂ ਮਯ੍ਹਂ ਪਟਿਮਨ੍ਤੇਸਿ [ਪਤਿਮਨ੍ਤੇਸਿ (ਸੀ.)], ਦਾਨਂ ਦਸ੍ਸਾਮਿ ਯਾਚਕੇ;

ਵਿਮਨਂ ਮੇ ਨ ਪਸ੍ਸਾਮਿ, ਦਦਤੋ ਦਾਨਮੁਤ੍ਤਮਂ.

੩੫੬. ‘‘‘ਨਾਨਾਵਿਧਂ ਬਹੁਂ ਦੁਕ੍ਖਂ, ਸਂਸਾਰੇ ਚ ਬਹੁਬ੍ਬਿਧੇ;

ਤੁਯ੍ਹਤ੍ਥਾਯ ਮਹਾਵੀਰ, ਅਨੁਭੁਤ੍ਤਂ ਅਸਙ੍ਖਿਯਂ.

੩੫੭. ‘‘‘ਸੁਖਪ੍ਪਤ੍ਤਾਨੁਮੋਦਾਮਿ, ਨ ਚ ਦੁਕ੍ਖੇਸੁ ਦੁਮ੍ਮਨਾ;

ਸਬ੍ਬਤ੍ਥ ਤੁਲਿਤਾ ਹੋਮਿ, ਤੁਯ੍ਹਤ੍ਥਾਯ ਮਹਾਮੁਨਿ.

੩੫੮. ‘‘‘ਅਨੁਮਗ੍ਗੇਨ ਸਮ੍ਬੁਦ੍ਧੋ, ਯਂ ਧਮ੍ਮਂ ਅਭਿਨੀਹਰਿ;

ਅਨੁਭੋਤ੍ਵਾ ਸੁਖਂ ਦੁਕ੍ਖਂ, ਪਤ੍ਤੋ ਬੋਧਿਂ ਮਹਾਮੁਨਿ.

੩੫੯. ‘‘‘ਬ੍ਰਹ੍ਮਦੇਵਞ੍ਚ ਸਮ੍ਬੁਦ੍ਧਂ, ਗੋਤਮਂ ਲੋਕਨਾਯਕਂ;

ਅਞ੍ਞੇਸਂ ਲੋਕਨਾਥਾਨਂ, ਸਙ੍ਗਮਂ ਤੇ ਬਹੁਂ ਮਯਾ.

੩੬੦. ‘‘‘ਅਧਿਕਾਰਂ ਬਹੁਂ ਮਯ੍ਹਂ, ਤੁਯ੍ਹਤ੍ਥਾਯ ਮਹਾਮੁਨਿ;

ਗਵੇਸਤੋ ਬੁਦ੍ਧਧਮ੍ਮੇ, ਅਹਂ ਤੇ ਪਰਿਚਾਰਿਕਾ.

੩੬੧. ‘‘‘ਕਪ੍ਪੇ ਚ ਸਤਸਹਸ੍ਸੇ, ਚਤੁਰੋ ਚ ਅਸਙ੍ਖਿਯੇ;

ਦੀਪਙ੍ਕਰੋ ਮਹਾਵੀਰੋ, ਉਪ੍ਪਜ੍ਜਿ ਲੋਕਨਾਯਕੋ.

੩੬੨. ‘‘‘ਪਚ੍ਚਨ੍ਤਦੇਸਵਿਸਯੇ, ਨਿਮਨ੍ਤੇਤ੍ਵਾ ਤਥਾਗਤਂ;

ਤਸ੍ਸ ਆਗਮਨਂ ਮਗ੍ਗਂ, ਸੋਧੇਨ੍ਤਿ ਤੁਟ੍ਠਮਾਨਸਾ.

੩੬੩. ‘‘‘ਤੇਨ ਕਾਲੇਨ ਸੋ ਆਸਿ, ਸੁਮੇਧੋ ਨਾਮ ਬ੍ਰਾਹ੍ਮਣੋ;

ਮਗ੍ਗਞ੍ਚ ਪਟਿਯਾਦੇਸਿ, ਆਯਤੋ [ਆਯਤਂ (ਸੀ.)] ਸਬ੍ਬਦਸ੍ਸਿਨੋ.

੩੬੪. ‘‘‘ਤੇਨ ਕਾਲੇਨਹਂ ਆਸਿਂ, ਕਞ੍ਞਾ ਬ੍ਰਾਹ੍ਮਣਸਮ੍ਭਵਾ;

ਸੁਮਿਤ੍ਤਾਨਾਮ ਨਾਮੇਨ, ਉਪਗਚ੍ਛਿਂ ਸਮਾਗਮਂ.

੩੬੫. ‘‘‘ਅਟ੍ਠ ਉਪ੍ਪਲਹਤ੍ਥਾਨਿ, ਪੂਜਨਤ੍ਥਾਯ ਸਤ੍ਥੁਨੋ;

ਆਦਾਯ ਜਨਸਂਮਜ੍ਝੇ, ਅਦ੍ਦਸਂ ਇਸਿ ਮੁਗ੍ਗਤਂ.

੩੬੬. ‘‘‘ਚਿਰਾਨੁਗਤਂ ਦਯਿਤਂ [ਚਿਰਾਨੁਪਰਿ ਆਸੀਨਂ (ਸੀ.)], ਅਤਿਕ੍ਕਨ੍ਤਂ ਮਨੋਹਰਂ;

ਦਿਸ੍ਵਾ ਤਦਾ ਅਮਞ੍ਞਿਸ੍ਸਂ, ਸਫਲਂ ਜੀਵਿਤਂ ਮਮ.

੩੬੭. ‘‘‘ਪਰਕ੍ਕਮਂ ਤਂ ਸਫਲਂ, ਅਦ੍ਦਸਂ ਇਸਿਨੋ ਤਦਾ;

ਪੁਬ੍ਬਕਮ੍ਮੇਨ ਸਮ੍ਬੁਦ੍ਧੇ, ਚਿਤ੍ਤਞ੍ਚਾਪਿ ਪਸੀਦਿ ਮੇ.

੩੬੮. ‘‘‘ਭਿਯ੍ਯੋ ਚਿਤ੍ਤਂ ਪਸਾਦੇਸਿਂ, ਇਸੇ ਉਗ੍ਗਤਮਾਨਸੇ;

ਦੇਯ੍ਯਂ ਅਞ੍ਞਂ ਨ ਪਸ੍ਸਾਮਿ, ਦੇਮਿ ਪੁਪ੍ਫਾਨਿ ਤੇ ਇਸਿ.

੩੬੯. ‘‘‘ਪਞ੍ਚਹਤ੍ਥਾ ਤਵ ਹੋਨ੍ਤੁ, ਤਯੋ ਹੋਨ੍ਤੁ ਮਮਂ ਇਸੇ;

ਤੇਨ ਸਦ੍ਧਿਂ ਸਮਾ ਹੋਨ੍ਤੁ, ਬੋਧਤ੍ਥਾਯ ਤਵਂ ਇਸੇ’.

ਚਤੁਤ੍ਥਂ ਭਾਣਵਾਰਂ.

੩੭੦. ‘‘ਇਸਿ ਗਹੇਤ੍ਵਾ ਪੁਪ੍ਫਾਨਿ, ਆਗਚ੍ਛਨ੍ਤਂ ਮਹਾਯਸਂ;

ਪੂਜੇਸਿ ਜਨਸਂਮਜ੍ਝੇ, ਬੋਧਤ੍ਥਾਯ ਮਹਾਇਸਿ.

੩੭੧. ‘‘ਪਸ੍ਸਿਤ੍ਵਾ ਜਨਸਂਮਜ੍ਝੇ, ਦੀਪਙ੍ਕਰੋ ਮਹਾਮੁਨਿ;

ਵਿਯਾਕਾਸਿ ਮਹਾਵੀਰੋ, ਇਸਿ ਮੁਗ੍ਗਤਮਾਨਸਂ.

੩੭੨. ‘‘ਅਪਰਿਮੇਯ੍ਯੇ ਇਤੋ ਕਪ੍ਪੇ, ਦੀਪਙ੍ਕਰੋ ਮਹਾਮੁਨਿ;

ਮਮ ਕਮ੍ਮਂ ਵਿਯਾਕਾਸਿ, ਉਜੁਭਾਵਂ ਮਹਾਮੁਨਿ.

੩੭੩. ‘‘‘ਸਮਚਿਤ੍ਤਾ ਸਮਕਮ੍ਮਾ, ਸਮਕਾਰੀ ਭਵਿਸ੍ਸਤਿ;

ਪਿਯਾ ਹੇਸ੍ਸਤਿ ਕਮ੍ਮੇਨ, ਤੁਯ੍ਹਤ੍ਥਾਯ ਮਹਾਇਸਿ [ਮਹਾਇਸੇ (ਸ੍ਯਾ.)].

੩੭੪. ‘‘‘ਸੁਦਸ੍ਸਨਾ ਸੁਪਿਯਾ ਚ, ਮਨਾਪਾ ਪਿਯਵਾਦਿਨੀ;

ਤਸ੍ਸ ਧਮ੍ਮੇਸੁ ਦਾਯਾਦਾ, ਵਿਹਰਿਸ੍ਸਤਿ ਇਦ੍ਧਿਕਾ.

੩੭੫. ‘‘‘ਯਥਾਪਿ ਭਣ੍ਡਸਾਮੁਗ੍ਗਂ, ਅਨੁਰਕ੍ਖਤਿ ਸਾਮਿਨੋ;

ਏਵਂ ਕੁਸਲਧਮ੍ਮਾਨਂ, ਅਨੁਰਕ੍ਖਿਸ੍ਸਤੇ ਅਯਂ.

੩੭੬. ‘‘‘ਤਸ੍ਸ ਤੇ [ਤਸ੍ਸ ਤਂ (ਸ੍ਯਾ.)] ਅਨੁਕਮ੍ਪਨ੍ਤੀ, ਪੂਰਯਿਸ੍ਸਤਿ ਪਾਰਮੀ;

ਸੀਹੋਵ ਪਞ੍ਜਰਂ ਭੇਤ੍ਵਾ [ਹਿਤ੍ਵਾ (ਸ੍ਯਾ.), ਹੇਤ੍ਵਾ (ਪੀ.)], ਪਾਪੁਣਿਸ੍ਸਤਿ ਬੋਧਿਯਂ’.

੩੭੭. ‘‘ਅਪਰਿਮੇਯ੍ਯੇ ਇਤੋ ਕਪ੍ਪੇ, ਯਂ ਮਂ ਬੁਦ੍ਧੋ ਵਿਯਾਕਰੀ;

ਤਂ ਵਾਚਂ ਅਨੁਮੋਦੇਨ੍ਤੀ, ਏਵਂਕਾਰੀ ਭਵਿਂ ਅਹਂ.

੩੭੮. ‘‘ਤਸ੍ਸ ਕਮ੍ਮਸ੍ਸ ਸੁਕਤਸ੍ਸ, ਤਤ੍ਥ ਚਿਤ੍ਤਂ ਪਸਾਦਯਿਂ;

ਦੇਵਮਨੁਸ੍ਸਕਂ ਯੋਨਿਂ, ਅਨੁਭੋਤ੍ਵਾ ਅਸਙ੍ਖਿਯਂ.

੩੭੯. ‘‘ਸੁਖਦੁਕ੍ਖੇਨੁਭੋਤ੍ਵਾਹਂ, ਦੇਵੇਸੁ ਮਾਨੁਸੇਸੁ ਚ;

ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਅਜਾਯਿਂ ਸਾਕਿਯੇ ਕੁਲੇ.

੩੮੦. ‘‘ਰੂਪਵਤੀ ਭੋਗਵਤੀ, ਯਸਸੀਲਵਤੀ ਤਤੋ;

ਸਬ੍ਬਙ੍ਗਸਮ੍ਪਦਾ ਹੋਮਿ, ਕੁਲੇਸੁ ਅਭਿਸਕ੍ਕਤਾ.

੩੮੧. ‘‘ਲਾਭਂ ਸਿਲੋਕਂ ਸਕ੍ਕਾਰਂ, ਲੋਕਧਮ੍ਮਸਮਾਗਮਂ;

ਚਿਤ੍ਤਞ੍ਚ ਦੁਕ੍ਖਿਤਂ ਨਤ੍ਥਿ, ਵਸਾਮਿ ਅਕੁਤੋਭਯਾ.

੩੮੨. ‘‘ਵੁਤ੍ਤਞ੍ਹੇਤਂ ਭਗਵਤਾ, ਰਞ੍ਞੋ ਅਨ੍ਤੇਪੁਰੇ ਤਦਾ;

ਖਤ੍ਤਿਯਾਨਂ ਪੁਰੇ ਵੀਰ, ਉਪਕਾਰਞ੍ਚ ਨਿਦ੍ਦਿਸਿ.

੩੮੩. ‘‘ਉਪਕਾਰਾ ਚ ਯਾ ਨਾਰੀ, ਯਾ ਚ ਨਾਰੀ ਸੁਖੇ ਦੁਖੇ;

ਅਤ੍ਥਕ੍ਖਾਯੀ ਚ ਯਾ ਨਾਰੀ, ਯਾ ਚ ਨਾਰੀਨੁਕਮ੍ਪਿਕਾ.

੩੮੪. ‘‘ਪਞ੍ਚਕੋਟਿਸਤਾ ਬੁਦ੍ਧਾ, ਨਵਕੋਟਿਸਤਾਨਿ ਚ;

ਏਤੇਸਂ ਦੇਵਦੇਵਾਨਂ, ਮਹਾਦਾਨਂ ਪਵਤ੍ਤਯਿਂ.

੩੮੫. ‘‘ਅਧਿਕਾਰਂ ਮਹਾ [ਸਦਾ (ਪੀ.) ਏਵਮੁਪਰਿਪਿ] ਮਯ੍ਹਂ, ਧਮ੍ਮਰਾਜ ਸੁਣੋਹਿ ਮੇ;

ਏਕਾਦਸਕੋਟਿਸਤਾ, ਬੁਦ੍ਧਾ ਦ੍ਵਾਦਸ ਕੋਟਿਯੋ [ਹੋਨ੍ਤਿ ਲੋਕਗ੍ਗਨਾਯਕਾ (ਸੀ. ਸ੍ਯਾ.), ਪਣ੍ਣਾਕੋਟਿਸਤਾਨਿ ਚ (ਪੀ.)].

੩੮੬. ‘‘ਏਤੇਸਂ ਦੇਵਦੇਵਾਨਂ, ਮਹਾਦਾਨਂ ਪਵਤ੍ਤਯਿਂ;

ਅਧਿਕਾਰਂ ਮਹਾ ਮਯ੍ਹਂ, ਧਮ੍ਮਰਾਜ ਸੁਣੋਹਿ ਮੇ.

੩੮੭. ‘‘‘ਵੀਸਕੋਟਿਸਤਾ ਬੁਦ੍ਧਾ, ਤਿਂਸਕੋਟਿਸਤਾਨਿ ਚ;