੭. ਭਦ੍ਦਕਾਪਿਲਾਨੀਥੇਰੀਅਪਦਾਨਂ

੨੪੪. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ [ਸਬ੍ਬਧਮ੍ਮੇਸੁ ਚਕ੍ਖੁਮਾ (ਸੀ. ਪੀ.)];

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

੨੪੫. ‘‘ਤਦਾਹੁ ਹਂਸਵਤਿਯਂ, ਵਿਦੇਹੋ ਨਾਮ ਨਾਮਤੋ [ਨਾਮਕੋ (ਸ੍ਯਾ. ਪੀ.)];

ਸੇਟ੍ਠੀ ਪਹੂਤਰਤਨੋ, ਤਸ੍ਸ ਜਾਯਾ ਅਹੋਸਹਂ.

੨੪੬. ‘‘ਕਦਾਚਿ ਸੋ ਨਰਾਦਿਚ੍ਚਂ, ਉਪੇਚ੍ਚ ਸਪਰਿਜ੍ਜਨੋ;

ਧਮ੍ਮਮਸ੍ਸੋਸਿ ਬੁਦ੍ਧਸ੍ਸ, ਸਬ੍ਬਦੁਕ੍ਖਭਯਪ੍ਪਹਂ [ਦੁਕ੍ਖਕ੍ਖਯਾਵਹਂ (ਸ੍ਯਾ.)].

੨੪੭. ‘‘ਸਾਵਕਂ ਧੁਤਵਾਦਾਨਂ, ਅਗ੍ਗਂ ਕਿਤ੍ਤੇਸਿ ਨਾਯਕੋ;

ਸੁਤ੍ਵਾ ਸਤ੍ਤਾਹਿਕਂ ਦਾਨਂ, ਦਤ੍ਵਾ ਬੁਦ੍ਧਸ੍ਸ ਤਾਦਿਨੋ.

੨੪੮. ‘‘ਨਿਪਚ੍ਚ ਸਿਰਸਾ ਪਾਦੇ, ਤਂ ਠਾਨਮਭਿਪਤ੍ਥਯਿਂ;

ਸ ਹਾਸਯਨ੍ਤੋ ਪਰਿਸਂ, ਤਦਾ ਹਿ ਨਰਪੁਙ੍ਗਵੋ.

੨੪੯. ‘‘ਸੇਟ੍ਠਿਨੋ ਅਨੁਕਮ੍ਪਾਯ, ਇਮਾ ਗਾਥਾ ਅਭਾਸਥ;

‘ਲਚ੍ਛਸੇ ਪਤ੍ਥਿਤਂ ਠਾਨਂ, ਨਿਬ੍ਬੁਤੋ ਹੋਹਿ ਪੁਤ੍ਤਕ.

੨੫੦. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੨੫੧. ‘‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ’.

੨੫੨. ‘‘ਤਂ ਸੁਤ੍ਵਾ ਮੁਦਿਤੋ ਹੁਤ੍ਵਾ, ਯਾਵਜੀਵਂ ਤਦਾ ਜਿਨਂ;

ਮੇਤ੍ਤਚਿਤ੍ਤੋ ਪਰਿਚਰਿ, ਪਚ੍ਚਯੇਹਿ ਵਿਨਾਯਕਂ.

੨੫੩. ‘‘ਸਾਸਨਂ ਜੋਤਯਿਤ੍ਵਾਨ, ਸੋ ਮਦ੍ਦਿਤ੍ਵਾ ਕੁਤਿਤ੍ਥਿਯੇ;

ਵੇਨੇਯ੍ਯਂ ਵਿਨਯਿਤ੍ਵਾ ਚ, ਨਿਬ੍ਬੁਤੋ ਸੋ ਸਸਾਵਕੋ.

੨੫੪. ‘‘ਨਿਬ੍ਬੁਤੇ ਤਮ੍ਹਿ ਲੋਕਗ੍ਗੇ, ਪੂਜਨਤ੍ਥਾਯ ਸਤ੍ਥੁਨੋ;

ਞਾਤਿਮਿਤ੍ਤੇ ਸਮਾਨੇਤ੍ਵਾ, ਸਹ ਤੇਹਿ ਅਕਾਰਯਿ.

੨੫੫. ‘‘ਸਤ੍ਤਯੋਜਨਿਕਂ ਥੂਪਂ, ਉਬ੍ਬਿਦ੍ਧਂ ਰਤਨਾਮਯਂ;

ਜਲਨ੍ਤਂ ਸਤਰਂਸਿਂਵ, ਸਾਲਰਾਜਂਵ ਫੁਲ੍ਲਿਤਂ.

੨੫੬. ‘‘ਸਤ੍ਤਸਤਸਹਸ੍ਸਾਨਿ, ਪਾਤਿਯੋ [ਚਾਤਿਯੋ (ਸ੍ਯਾ.)] ਤਤ੍ਥ ਕਾਰਯਿ;

ਨਲ਼ਗ੍ਗੀ ਵਿਯ ਜੋਤਨ੍ਤੀ [ਜੋਤਨ੍ਤੇ (ਸ੍ਯਾ. ਪੀ.)], ਰਤਨੇਹੇਵ ਸਤ੍ਤਹਿ.

੨੫੭. ‘‘ਗਨ੍ਧਤੇਲੇਨ ਪੂਰੇਤ੍ਵਾ, ਦੀਪਾਨੁਜ੍ਜਲਯੀ ਤਹਿਂ;

ਪੂਜਨਤ੍ਥਾਯ [ਪੂਜਤ੍ਥਾਯ (ਸੀ. ਕ.)] ਮਹੇਸਿਸ੍ਸ, ਸਬ੍ਬਭੂਤਾਨੁਕਮ੍ਪਿਨੋ.

੨੫੮. ‘‘ਸਤ੍ਤਸਤਸਹਸ੍ਸਾਨਿ, ਪੁਣ੍ਣਕੁਮ੍ਭਾਨਿ ਕਾਰਯਿ;

ਰਤਨੇਹੇਵ ਪੁਣ੍ਣਾਨਿ, ਪੂਜਨਤ੍ਥਾਯ ਮਹੇਸਿਨੋ.

੨੫੯. ‘‘ਮਜ੍ਝੇ ਅਟ੍ਠਟ੍ਠਕੁਮ੍ਭੀਨਂ, ਉਸ੍ਸਿਤਾ ਕਞ੍ਚਨਗ੍ਘਿਯੋ;

ਅਤਿਰੋਚਨ੍ਤਿ ਵਣ੍ਣੇਨ, ਸਰਦੇਵ ਦਿਵਾਕਰੋ.

੨੬੦. ‘‘ਚਤੁਦ੍ਵਾਰੇਸੁ ਸੋਭਨ੍ਤਿ, ਤੋਰਣਾ ਰਤਨਾਮਯਾ;

ਉਸ੍ਸਿਤਾ ਫਲਕਾ ਰਮ੍ਮਾ, ਸੋਭਨ੍ਤਿ ਰਤਨਾਮਯਾ.

੨੬੧. ‘‘ਵਿਰੋਚਨ੍ਤਿ ਪਰਿਕ੍ਖਿਤ੍ਤਾ [ਪਰਿਕ੍ਖਾਯੋ (ਸ੍ਯਾ.)], ਅਵਟਂਸਾ ਸੁਨਿਮ੍ਮਿਤਾ;

ਉਸ੍ਸਿਤਾਨਿ ਪਟਾਕਾਨਿ, ਰਤਨਾਨਿ ਵਿਰੋਚਰੇ.

੨੬੨. ‘‘ਸੁਰਤ੍ਤਂ ਸੁਕਤਂ ਚਿਤ੍ਤਂ, ਚੇਤਿਯਂ ਰਤਨਾਮਯਂ;

ਅਤਿਰੋਚਤਿ ਵਣ੍ਣੇਨ, ਸਸਞ੍ਝੋਵ [ਸਸਜ੍ਝਾਵ (ਸ੍ਯਾ. ਕ.), ਸਸਞ੍ਜਾਵ (ਪੀ.)] ਦਿਵਾਕਰੋ.

੨੬੩. ‘‘ਥੂਪਸ੍ਸ ਵੇਦਿਯੋ ਤਿਸ੍ਸੋ, ਹਰਿਤਾਲੇਨ ਪੂਰਯਿ;

ਏਕਂ ਮਨੋਸਿਲਾਯੇਕਂ, ਅਞ੍ਜਨੇਨ ਚ ਏਕਿਕਂ.

੨੬੪. ‘‘ਪੂਜਂ ਏਤਾਦਿਸਂ ਰਮ੍ਮਂ, ਕਾਰੇਤ੍ਵਾ ਵਰਵਾਦਿਨੋ;

ਅਦਾਸਿ ਦਾਨਂ ਸਙ੍ਘਸ੍ਸ, ਯਾਵਜੀਵਂ ਯਥਾਬਲਂ.

੨੬੫. ‘‘ਸਹਾਵ ਸੇਟ੍ਠਿਨਾ ਤੇਨ, ਤਾਨਿ ਪੁਞ੍ਞਾਨਿ ਸਬ੍ਬਸੋ;

ਯਾਵਜੀਵਂ ਕਰਿਤ੍ਵਾਨ, ਸਹਾਵ ਸੁਗਤਿਂ ਗਤਾ.

੨੬੬. ‘‘ਸਮ੍ਪਤ੍ਤਿਯੋਨੁਭੋਤ੍ਵਾਨ, ਦੇਵਤ੍ਤੇ ਅਥ ਮਾਨੁਸੇ;

ਛਾਯਾ ਵਿਯ ਸਰੀਰੇਨ, ਸਹ ਤੇਨੇਵ ਸਂਸਰਿਂ.

੨੬੭. ‘‘ਏਕਨਵੁਤਿਤੋ ਕਪ੍ਪੇ, ਵਿਪਸ੍ਸੀ ਨਾਮ ਨਾਯਕੋ;

ਉਪ੍ਪਜ੍ਜਿ ਚਾਰੁਦਸ੍ਸਨੋ, ਸਬ੍ਬਧਮ੍ਮਵਿਪਸ੍ਸਕੋ.

੨੬੮. ‘‘ਤਦਾਯਂ ਬਨ੍ਧੁਮਤਿਯਂ, ਬ੍ਰਾਹ੍ਮਣੋ ਸਾਧੁਸਮ੍ਮਤੋ;

ਅਡ੍ਢੋ ਸਨ੍ਤੋ ਗੁਣੇਨਾਪਿ [ਸਤ੍ਥਾਗਮੇਨਾਸਿ (ਸੀ.)], ਧਨੇਨ ਚ ਸੁਦੁਗ੍ਗਤੋ.

੨੬੯. ‘‘ਤਦਾਪਿ ਤਸ੍ਸਾਹਂ ਆਸਿਂ, ਬ੍ਰਾਹ੍ਮਣੀ ਸਮਚੇਤਸਾ;

ਕਦਾਚਿ ਸੋ ਦਿਜਵਰੋ, ਸਙ੍ਗਮੇਸਿ ਮਹਾਮੁਨਿਂ.

੨੭੦. ‘‘ਨਿਸਿਨ੍ਨਂ ਜਨਕਾਯਮ੍ਹਿ, ਦੇਸੇਨ੍ਤਂ ਅਮਤਂ ਪਦਂ;

ਸੁਤ੍ਵਾ ਧਮ੍ਮਂ ਪਮੁਦਿਤੋ, ਅਦਾਸਿ ਏਕਸਾਟਕਂ.

੨੭੧. ‘‘ਘਰਮੇਕੇਨ ਵਤ੍ਥੇਨ, ਗਨ੍ਤ੍ਵਾਨੇਤਂ ਸ ਮਬ੍ਰਵਿ [ਮਮਬ੍ਰਵਿ (ਸੀ. ਸ੍ਯਾ. ਪੀ.)];

‘ਅਨੁਮੋਦ ਮਹਾਪੁਞ੍ਞਂ [ਮਹਾਪਞ੍ਞੇ (ਸੀ.), ਮਹਾਪੁਞ੍ਞੇ (ਸ੍ਯਾ. ਕ.)], ਦਿਨ੍ਨਂ ਬੁਦ੍ਧਸ੍ਸ ਸਾਟਕਂ’.

੨੭੨. ‘‘ਤਦਾਹਂ ਅਞ੍ਜਲਿਂ ਕਤ੍ਵਾ, ਅਨੁਮੋਦਿਂ ਸੁਪੀਣਿਤਾ [ਸੁਵਿਦਿਤਾ (ਸ੍ਯਾ.), ਸੁਪੀਤਿਯਾ (ਕ.)];

‘ਸੁਦਿਨ੍ਨੋ ਸਾਟਕੋ ਸਾਮਿ, ਬੁਦ੍ਧਸੇਟ੍ਠਸ੍ਸ ਤਾਦਿਨੋ’.

੨੭੩. ‘‘ਸੁਖਿਤੋ ਸਜ੍ਜਿਤੋ ਹੁਤ੍ਵਾ, ਸਂਸਰਨ੍ਤੋ ਭਵਾਭਵੇ;

ਬਾਰਾਣਸਿਪੁਰੇ ਰਮ੍ਮੇ, ਰਾਜਾ ਆਸਿ ਮਹੀਪਤਿ.

੨੭੪. ‘‘ਤਦਾ ਤਸ੍ਸ ਮਹੇਸੀਹਂ, ਇਤ੍ਥਿਗੁਮ੍ਬਸ੍ਸ ਉਤ੍ਤਮਾ;

ਤਸ੍ਸਾਤਿ ਦਯਿਤਾ [ਤਸ੍ਸਾਵਿ ਦੁਤਿਯਿਕਾ (ਸ੍ਯਾ.)] ਆਸਿਂ, ਪੁਬ੍ਬਸ੍ਨੇਹੇਨ ਭਤ੍ਤੁਨੋ [ਚੁਤ੍ਤਰਿ (ਸ੍ਯਾ. ਪੀ. ਕ.)].

੨੭੫. ‘‘ਪਿਣ੍ਡਾਯ ਵਿਚਰਨ੍ਤੇ ਤੇ [ਸੋ (ਸੀ. ਸ੍ਯਾ. ਪੀ.)], ਅਟ੍ਠ ਪਚ੍ਚੇਕਨਾਯਕੇ;

ਦਿਸ੍ਵਾ ਪਮੁਦਿਤੋ ਹੁਤ੍ਵਾ, ਦਤ੍ਵਾ ਪਿਣ੍ਡਂ ਮਹਾਰਹਂ.

੨੭੬. ‘‘ਪੁਨੋ ਨਿਮਨ੍ਤਯਿਤ੍ਵਾਨ, ਕਤ੍ਵਾ ਰਤਨਮਣ੍ਡਪਂ;

ਕਮ੍ਮਾਰੇਹਿ ਕਤਂ ਪਤ੍ਤਂ [ਕਤਂ ਛਤ੍ਤਂ (ਸੀ.), ਕਤਮਟ੍ਠਂ (ਸ੍ਯਾ.)], ਸੋਵਣ੍ਣਂ ਵਤ ਤਤ੍ਤਕਂ.

੨੭੭. ‘‘ਸਮਾਨੇਤ੍ਵਾਨ ਤੇ ਸਬ੍ਬੇ, ਤੇਸਂ ਦਾਨਮਦਾਸਿ ਸੋ;

ਸੋਣ੍ਣਾਸਨੇ ਪਵਿਟ੍ਠਾਨਂ, ਪਸਨ੍ਨੋ ਸੇਹਿ ਪਾਣਿਭਿ.

੨੭੮. ‘‘ਤਮ੍ਪਿ ਦਾਨਂ ਸਹਾਦਾਸਿਂ, ਕਾਸਿਰਾਜੇਨਹਂ ਤਦਾ;

ਪੁਨਾਹਂ ਬਾਰਾਣਸਿਯਂ, ਜਾਤਾ ਕਾਸਿਕਗਾਮਕੇ.

੨੭੯. ‘‘ਕੁਟੁਮ੍ਬਿਕਕੁਲੇ ਫੀਤੇ, ਸੁਖਿਤੋ ਸੋ ਸਭਾਤੁਕੋ;

ਜੇਟ੍ਠਸ੍ਸ ਭਾਤੁਨੋ ਜਾਯਾ, ਅਹੋਸਿਂ ਸੁਪਤਿਬ੍ਬਤਾ.

੨੮੦. ‘‘ਪਚ੍ਚੇਕਬੁਦ੍ਧਂ ਦਿਸ੍ਵਾਨ, ਕਨਿਯਸ੍ਸ ਮਮ ਭਤ੍ਤੁਨੋ [ਭਤ੍ਤੁਕਨਿਯਸੋ (ਸ੍ਯਾ.)];

ਭਾਗਨ੍ਨਂ ਤਸ੍ਸ ਦਤ੍ਵਾਨ, ਆਗਤੇ ਤਮ੍ਹਿ ਪਾਵਦਿਂ.

੨੮੧. ‘‘ਨਾਭਿਨਨ੍ਦਿਤ੍ਥ ਸੋ ਦਾਨਂ, ਤਤੋ ਤਸ੍ਸ ਅਦਾਸਹਂ;

ਉਖਾ [ਬੁਦ੍ਧਾ (ਸ੍ਯਾ.)] ਆਨਿਯ ਤਂ ਅਨ੍ਨਂ, ਪੁਨੋ ਤਸ੍ਸੇਵ ਸੋ ਅਦਾ.

੨੮੨. ‘‘ਤਦਨ੍ਨਂ ਛਡ੍ਡਯਿਤ੍ਵਾਨ, ਦੁਟ੍ਠਾ ਬੁਦ੍ਧਸ੍ਸਹਂ ਤਦਾ;

ਪਤ੍ਤਂ ਕਲਲਪੁਣ੍ਣਂ ਤਂ, ਅਦਾਸਿਂ ਤਸ੍ਸ ਤਾਦਿਨੋ.

੨੮੩. ‘‘ਦਾਨੇ ਚ ਗਹਣੇ ਚੇਵ, ਅਪਚੇ ਪਦੁਸੇਪਿ ਚ;

ਸਮਚਿਤ੍ਤਮੁਖਂ ਦਿਸ੍ਵਾ, ਤਦਾਹਂ ਸਂਵਿਜਿਂ ਭੁਸਂ.

੨੮੪. ‘‘ਪੁਨੋ ਪਤ੍ਤਂ ਗਹੇਤ੍ਵਾਨ, ਸੋਧਯਿਤ੍ਵਾ ਸੁਗਨ੍ਧਿਨਾ;

ਪਸਨ੍ਨਚਿਤ੍ਤਾ ਪੂਰੇਤ੍ਵਾ, ਸਘਤਂ ਸਕ੍ਕਰਂ ਅਦਂ.

੨੮੫. ‘‘ਯਤ੍ਥ ਯਤ੍ਥੂਪਪਜ੍ਜਾਮਿ, ਸੁਰੂਪਾ ਹੋਮਿ ਦਾਨਤੋ;

ਬੁਦ੍ਧਸ੍ਸ ਅਪਕਾਰੇਨ, ਦੁਗ੍ਗਨ੍ਧਾ ਵਦਨੇਨ ਚ.

੨੮੬. ‘‘ਪੁਨ ਕਸ੍ਸਪਵੀਰਸ੍ਸ, ਨਿਧਾਯਨ੍ਤਮ੍ਹਿ ਚੇਤਿਯੇ;

ਸੋਵਣ੍ਣਂ ਇਟ੍ਠਕਂ ਵਰਂ, ਅਦਾਸਿਂ ਮੁਦਿਤਾ ਅਹਂ.

੨੮੭. ‘‘ਚਤੁਜ੍ਜਾਤੇਨ ਗਨ੍ਧੇਨ, ਨਿਚਯਿਤ੍ਵਾ ਤਮਿਟ੍ਠਕਂ;

ਮੁਤ੍ਤਾ ਦੁਗ੍ਗਨ੍ਧਦੋਸਮ੍ਹਾ, ਸਬ੍ਬਙ੍ਗਸੁਸਮਾਗਤਾ.

੨੮੮. ‘‘ਸਤ੍ਤਪਾਤਿਸਹਸ੍ਸਾਨਿ, ਰਤਨੇਹੇਵ ਸਤ੍ਤਹਿ;

ਕਾਰੇਤ੍ਵਾ ਘਤਪੂਰਾਨਿ, ਵਟ੍ਟੀਨਿ [ਵਟ੍ਟੀਯੋ (ਸੀ.)] ਚ ਸਹਸ੍ਸਸੋ.

੨੮੯. ‘‘ਪਕ੍ਖਿਪਿਤ੍ਵਾ ਪਦੀਪੇਤ੍ਵਾ, ਠਪਯਿਂ ਸਤ੍ਤਪਨ੍ਤਿਯੋ;

ਪੂਜਨਤ੍ਥਂ ਲੋਕਨਾਥਸ੍ਸ, ਵਿਪ੍ਪਸਨ੍ਨੇਨ ਚੇਤਸਾ.

੨੯੦. ‘‘ਤਦਾਪਿ ਤਮ੍ਹਿ ਪੁਞ੍ਞਮ੍ਹਿ, ਭਾਗਿਨੀਯਿ ਵਿਸੇਸਤੋ;

ਪੁਨ ਕਾਸੀਸੁ ਸਞ੍ਜਾਤੋ, ਸੁਮਿਤ੍ਤਾ ਇਤਿ ਵਿਸ੍ਸੁਤੋ.

੨੯੧. ‘‘ਤਸ੍ਸਾਹਂ ਭਰਿਯਾ ਆਸਿਂ, ਸੁਖਿਤਾ ਸਜ੍ਜਿਤਾ ਪਿਯਾ;

ਤਦਾ ਪਚ੍ਚੇਕਮੁਨਿਨੋ, ਅਦਾਸਿਂ ਘਨਵੇਠਨਂ.

੨੯੨. ‘‘ਤਸ੍ਸਾਪਿ ਭਾਗਿਨੀ ਆਸਿਂ, ਮੋਦਿਤ੍ਵਾ ਦਾਨਮੁਤ੍ਤਮਂ;

ਪੁਨਾਪਿ ਕਾਸਿਰਟ੍ਠਮ੍ਹਿ, ਜਾਤੋ ਕੋਲਿਯਜਾਤਿਯਾ.

੨੯੩. ‘‘ਤਦਾ ਕੋਲਿਯਪੁਤ੍ਤਾਨਂ, ਸਤੇਹਿ ਸਹ ਪਞ੍ਚਹਿ;

ਪਞ੍ਚਪਚ੍ਚੇਕਬੁਦ੍ਧਾਨਂ, ਸਤਾਨਿ ਸਮੁਪਟ੍ਠਹਿ.

੨੯੪. ‘‘ਤੇਮਾਸਂ ਤਪ੍ਪਯਿਤ੍ਵਾਨ [ਵਾਸਯਿਤ੍ਵਾਨ (ਸ੍ਯਾ. ਪੀ.)], ਅਦਾਸਿ ਚ ਤਿਚੀਵਰੇ [ਤਿਚੀਵਰਂ (ਸ੍ਯਾ.)];

ਜਾਯਾ ਤਸ੍ਸ ਤਦਾ ਆਸਿਂ, ਪੁਞ੍ਞਕਮ੍ਮਪਥਾਨੁਗਾ.

੨੯੫. ‘‘ਤਤੋ ਚੁਤੋ ਅਹੁ ਰਾਜਾ, ਨਨ੍ਦੋ ਨਾਮ ਮਹਾਯਸੋ;

ਤਸ੍ਸਾਪਿ ਮਹੇਸੀ ਆਸਿਂ, ਸਬ੍ਬਕਾਮਸਮਿਦ੍ਧਿਨੀ.

੨੯੬. ‘‘ਤਦਾ ਰਾਜਾ ਭਵਿਤ੍ਵਾਨ, ਬ੍ਰਹ੍ਮਦਤ੍ਤੋ ਮਹੀਪਤਿ;

ਪਦੁਮਵਤੀਪੁਤ੍ਤਾਨਂ, ਪਚ੍ਚੇਕਮੁਨਿਨਂ ਤਦਾ.

੨੯੭. ‘‘ਸਤਾਨਿ ਪਞ੍ਚਨੂਨਾਨਿ, ਯਾਵਜੀਵਂ ਉਪਟ੍ਠਹਿਂ;

ਰਾਜੁਯ੍ਯਾਨੇ ਨਿਵਾਸੇਤ੍ਵਾ, ਨਿਬ੍ਬੁਤਾਨਿ ਚ ਪੂਜਯਿਂ.

੨੯੮. ‘‘ਚੇਤਿਯਾਨਿ ਚ ਕਾਰੇਤ੍ਵਾ, ਪਬ੍ਬਜਿਤ੍ਵਾ ਉਭੋ ਮਯਂ;

ਭਾਵੇਤ੍ਵਾ ਅਪ੍ਪਮਞ੍ਞਾਯੋ, ਬ੍ਰਹ੍ਮਲੋਕਂ ਅਗਮ੍ਹਸੇ.

੨੯੯. ‘‘ਤਤੋ ਚੁਤੋ ਮਹਾਤਿਤ੍ਥੇ, ਸੁਜਾਤੋ ਪਿਪ੍ਫਲਾਯਨੋ;

ਮਾਤਾ ਸੁਮਨਦੇਵੀਤਿ, ਕੋਸਿਗੋਤ੍ਤੋ ਦਿਜੋ ਪਿਤਾ.

੩੦੦. ‘‘ਅਹਂ ਮਦ੍ਦੇ ਜਨਪਦੇ, ਸਾਕਲਾਯ ਪੁਰੁਤ੍ਤਮੇ;

ਕਪ੍ਪਿਲਸ੍ਸ ਦਿਜਸ੍ਸਾਸਿਂ, ਧੀਤਾ ਮਾਤਾ ਸੁਚੀਮਤਿ.

੩੦੧. ‘‘ਘਨਕਞ੍ਚਨਬਿਮ੍ਬੇਨ, ਨਿਮ੍ਮਿਨਿਤ੍ਵਾਨ ਮਂ ਪਿਤਾ;

ਅਦਾ ਕਸ੍ਸਪਧੀਰਸ੍ਸ, ਕਾਮੇਹਿ ਵਜ੍ਜਿਤਸ੍ਸਮਂ.

੩੦੨. ‘‘ਕਦਾਚਿ ਸੋ ਕਾਰੁਣਿਕੋ, ਗਨ੍ਤ੍ਵਾ ਕਮ੍ਮਨ੍ਤਪੇਕ੍ਖਕੋ;

ਕਾਕਾਦਿਕੇਹਿ ਖਜ੍ਜਨ੍ਤੇ, ਪਾਣੇ ਦਿਸ੍ਵਾਨ ਸਂਵਿਜਿ.

੩੦੩. ‘‘ਘਰੇਵਾਹਂ ਤਿਲੇ ਜਾਤੇ, ਦਿਸ੍ਵਾਨਾਤਪਤਾਪਨੇ;

ਕਿਮਿ ਕਾਕੇਹਿ ਖਜ੍ਜਨ੍ਤੇ, ਸਂਵੇਗਮਲਭਿਂ ਤਦਾ.

੩੦੪. ‘‘ਤਦਾ ਸੋ ਪਬ੍ਬਜੀ ਧੀਰੋ, ਅਹਂ ਤਮਨੁਪਬ੍ਬਜਿਂ;

ਪਞ੍ਚਵਸ੍ਸਾਨਿ ਨਿਵਸਿਂ, ਪਰਿਬ੍ਬਾਜਵਤੇ [ਪਰਿਬ੍ਬਾਜਪਥੇ (ਸ੍ਯਾ. ਪੀ.)] ਅਹਂ.

੩੦੫. ‘‘ਯਦਾ ਪਬ੍ਬਜਿਤਾ ਆਸਿ, ਗੋਤਮੀ ਜਿਨਪੋਸਿਕਾ;

ਤਦਾਹਂ ਤਮੁਪਗਨ੍ਤ੍ਵਾ, ਬੁਦ੍ਧੇਨ ਅਨੁਸਾਸਿਤਾ.

੩੦੬. ‘‘ਨ ਚਿਰੇਨੇਵ ਕਾਲੇਨ, ਅਰਹਤ੍ਤਮਪਾਪੁਣਿਂ;

ਅਹੋ ਕਲ੍ਯਾਣਮਿਤ੍ਤਤ੍ਤਂ, ਕਸ੍ਸਪਸ੍ਸ ਸਿਰੀਮਤੋ.

੩੦੭. ‘‘ਸੁਤੋ ਬੁਦ੍ਧਸ੍ਸ ਦਾਯਾਦੋ, ਕਸ੍ਸਪੋ ਸੁਸਮਾਹਿਤੋ;

ਪੁਬ੍ਬੇਨਿਵਾਸਂ ਯੋ ਵੇਦਿ, ਸਗ੍ਗਾਪਾਯਞ੍ਚ ਪਸ੍ਸਤਿ.

੩੦੮. ‘‘ਅਥੋ ਜਾਤਿਕ੍ਖਯਂ ਪਤ੍ਤੋ, ਅਭਿਞ੍ਞਾਵੋਸਿਤੋ ਮੁਨਿ;

ਏਤਾਹਿ ਤੀਹਿ ਵਿਜ੍ਜਾਹਿ, ਤੇਵਿਜ੍ਜੋ ਹੋਤਿ ਬ੍ਰਾਹ੍ਮਣੋ.

੩੦੯. ‘‘ਤਥੇਵ ਭਦ੍ਦਕਾਪਿਲਾਨੀ [ਭਦ੍ਦਾਕਾਪਿਲਾਨੀ (ਸੀ. ਪੀ.)], ਤੇਵਿਜ੍ਜਾ ਮਚ੍ਚੁਹਾਯਿਨੀ;

ਧਾਰੇਤਿ ਅਨ੍ਤਿਮਂ ਦੇਹਂ, ਜਿਤ੍ਵਾ ਮਾਰਂ ਸਵਾਹਨਂ.

੩੧੦. ‘‘ਦਿਸ੍ਵਾ ਆਦੀਨਵਂ ਲੋਕੇ, ਉਭੋ ਪਬ੍ਬਜਿਤਾ ਮਯਂ;

ਤ੍ਯਮ੍ਹ ਖੀਣਾਸਵਾ ਦਨ੍ਤਾ, ਸੀਤਿਭੂਤਾਮ੍ਹ ਨਿਬ੍ਬੁਤਾ.

੩੧੧. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੩੧੨. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੩੧੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਭਦ੍ਦਕਾਪਿਲਾਨੀ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਭਦ੍ਦਕਾਪਿਲਾਨੀਥੇਰਿਯਾਪਦਾਨਂ ਸਤ੍ਤਮਂ.