੪. ਸਕੁਲਾਥੇਰੀਅਪਦਾਨਂ

੧੩੧. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

੧੩੨. ‘‘ਹਿਤਾਯ ਸਬ੍ਬਸਤ੍ਤਾਨਂ, ਸੁਖਾਯ ਵਦਤਂ ਵਰੋ;

ਅਤ੍ਥਾਯ ਪੁਰਿਸਾਜਞ੍ਞੋ, ਪਟਿਪਨ੍ਨੋ ਸਦੇਵਕੇ.

੧੩੩. ‘‘ਯਸਗ੍ਗਪਤ੍ਤੋ ਸਿਰਿਮਾ, ਕਿਤ੍ਤਿਵਣ੍ਣਗਤੋ ਜਿਨੋ;

ਪੂਜਿਤੋ ਸਬ੍ਬਲੋਕਸ੍ਸ, ਦਿਸਾਸਬ੍ਬਾਸੁ ਵਿਸ੍ਸੁਤੋ.

੧੩੪. ‘‘ਉਤ੍ਤਿਣ੍ਣਵਿਚਿਕਿਚ੍ਛੋ ਸੋ, ਵੀਤਿਵਤ੍ਤਕਥਂਕਥੋ;

ਸਮ੍ਪੁਣ੍ਣਮਨਸਙ੍ਕਪ੍ਪੋ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.

੧੩੫. ‘‘ਅਨੁਪ੍ਪਨ੍ਨਸ੍ਸ ਮਗ੍ਗਸ੍ਸ, ਉਪ੍ਪਾਦੇਤਾ ਨਰੁਤ੍ਤਮੋ;

ਅਨਕ੍ਖਾਤਞ੍ਚ ਅਕ੍ਖਾਸਿ, ਅਸਞ੍ਜਾਤਞ੍ਚ ਸਞ੍ਜਨੀ.

੧੩੬. ‘‘ਮਗ੍ਗਞ੍ਞੂ ਚ ਮਗ੍ਗਵਿਦੂ, ਮਗ੍ਗਕ੍ਖਾਯੀ ਨਰਾਸਭੋ;

ਮਗ੍ਗਸ੍ਸ ਕੁਸਲੋ ਸਤ੍ਥਾ, ਸਾਰਥੀਨਂ ਵਰੁਤ੍ਤਮੋ.

੧੩੭. ‘‘ਮਹਾਕਾਰੁਣਿਕੋ ਸਤ੍ਥਾ, ਧਮ੍ਮਂ ਦੇਸੇਸਿ ਨਾਯਕੋ;

ਨਿਮੁਗ੍ਗੇ ਕਾਮਪਙ੍ਕਮ੍ਹਿ, ਸਮੁਦ੍ਧਰਤਿ ਪਾਣਿਨੇ.

੧੩੮. ‘‘ਤਦਾਹਂ ਹਂਸਵਤਿਯਂ, ਜਾਤਾ ਖਤ੍ਤਿਯਨਨ੍ਦਨਾ;

ਸੁਰੂਪਾ ਸਧਨਾ ਚਾਪਿ, ਦਯਿਤਾ ਚ ਸਿਰੀਮਤੀ.

੧੩੯. ‘‘ਆਨਨ੍ਦਸ੍ਸ ਮਹਾਰਞ੍ਞੋ, ਧੀਤਾ ਪਰਮਸੋਭਣਾ;

ਵੇਮਾਤਾ [ਵੇਮਾਤੁ (ਸੀ.)] ਭਗਿਨੀ ਚਾਪਿ, ਪਦੁਮੁਤ੍ਤਰਨਾਮਿਨੋ.

੧੪੦. ‘‘ਰਾਜਕਞ੍ਞਾਹਿ ਸਹਿਤਾ, ਸਬ੍ਬਾਭਰਣਭੂਸਿਤਾ;

ਉਪਾਗਮ੍ਮ ਮਹਾਵੀਰਂ, ਅਸ੍ਸੋਸਿਂ ਧਮ੍ਮਦੇਸਨਂ.

੧੪੧. ‘‘ਤਦਾ ਹਿ ਸੋ ਲੋਕਗਰੁ, ਭਿਕ੍ਖੁਨਿਂ ਦਿਬ੍ਬਚਕ੍ਖੁਕਂ;

ਕਿਤ੍ਤਯਂ ਪਰਿਸਾਮਜ੍ਝੇ [ਚਤੁਪਰਿਸਾਯ ਮਜ੍ਝੇ (ਸ੍ਯਾ.)], ਅਗ੍ਗਟ੍ਠਾਨੇ ਠਪੇਸਿ ਤਂ.

੧੪੨. ‘‘ਸੁਣਿਤ੍ਵਾ ਤਮਹਂ ਹਟ੍ਠਾ, ਦਾਨਂ ਦਤ੍ਵਾਨ ਸਤ੍ਥੁਨੋ;

ਪੂਜਿਤ੍ਵਾਨ ਚ ਸਮ੍ਬੁਦ੍ਧਂ, ਦਿਬ੍ਬਚਕ੍ਖੁਂ ਅਪਤ੍ਥਯਿਂ.

੧੪੩. ‘‘ਤਤੋ ਅਵੋਚ ਮਂ ਸਤ੍ਥਾ, ‘ਨਨ੍ਦੇ ਲਚ੍ਛਸਿ ਪਤ੍ਥਿਤਂ;

ਪਦੀਪਧਮ੍ਮਦਾਨਾਨਂ, ਫਲਮੇਤਂ ਸੁਨਿਚ੍ਛਿਤਂ.

੧੪੪. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੧੪੫. ‘‘‘ਤਸ੍ਸ ਧਮ੍ਮੇਸੁ ਦਾਯਾਦਾ, ਓਰਸਾ ਧਮ੍ਮਨਿਮ੍ਮਿਤਾ;

ਸਕੁਲਾ ਨਾਮ ਨਾਮੇਨ [ਸਕੁਲਾਤਿ ਚ ਨਾਮੇਨ (ਸ੍ਯਾ.)], ਹੇਸ੍ਸਤਿ ਸਤ੍ਥੁ ਸਾਵਿਕਾ’.

੧੪੬. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੧੪੭. ‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

੧੪੮. ‘‘ਪਰਿਬ੍ਬਾਜਕਿਨੀ ਆਸਿਂ, ਤਦਾਹਂ ਏਕਚਾਰਿਨੀ;

ਭਿਕ੍ਖਾਯ ਵਿਚਰਿਤ੍ਵਾਨ, ਅਲਭਿਂ ਤੇਲਮਤ੍ਤਕਂ.

੧੪੯. ‘‘ਤੇਨ ਦੀਪਂ ਪਦੀਪੇਤ੍ਵਾ, ਉਪਟ੍ਠਿਂ ਸਬ੍ਬਸਂਵਰਿਂ;

ਚੇਤਿਯਂ ਦ੍ਵਿਪਦਗ੍ਗਸ੍ਸ [ਦਿਪਦਗ੍ਗਸ੍ਸ (ਸੀ. ਸ੍ਯਾ. ਪੀ.)], ਵਿਪ੍ਪਸਨ੍ਨੇਨ ਚੇਤਸਾ.

੧੫੦. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੧੫੧. ‘‘ਯਤ੍ਥ ਯਤ੍ਥੂਪਪਜ੍ਜਾਮਿ, ਤਸ੍ਸ ਕਮ੍ਮਸ੍ਸ ਵਾਹਸਾ;

ਪਜ੍ਜਲਨ੍ਤਿ [ਸਞ੍ਜਲਨ੍ਤਿ (ਸ੍ਯਾ. ਕ.), ਸਂਚਰਨ੍ਤਿ (ਪੀ.)] ਮਹਾਦੀਪਾ, ਤਤ੍ਥ ਤਤ੍ਥ ਗਤਾਯ ਮੇ.

੧੫੨. ‘‘ਤਿਰੋਕੁਟ੍ਟਂ ਤਿਰੋਸੇਲਂ, ਸਮਤਿਗ੍ਗਯ੍ਹ ਪਬ੍ਬਤਂ;

ਪਸ੍ਸਾਮਹਂ ਯਦਿਚ੍ਛਾਮਿ, ਦੀਪਦਾਨਸ੍ਸਿਦਂ ਫਲਂ.

੧੫੩. ‘‘ਵਿਸੁਦ੍ਧਨਯਨਾ ਹੋਮਿ, ਯਸਸਾ ਚ ਜਲਾਮਹਂ;

ਸਦ੍ਧਾਪਞ੍ਞਾਵਤੀ ਚੇਵ, ਦੀਪਦਾਨਸ੍ਸਿਦਂ ਫਲਂ.

੧੫੪. ‘‘ਪਚ੍ਛਿਮੇ ਚ ਭਵੇ ਦਾਨਿ, ਜਾਤਾ ਵਿਪ੍ਪਕੁਲੇ ਅਹਂ;

ਪਹੂਤਧਨਧਞ੍ਞਮ੍ਹਿ, ਮੁਦਿਤੇ ਰਾਜਪੂਜਿਤੇ.

੧੫੫. ‘‘ਅਹਂ ਸਬ੍ਬਙ੍ਗਸਮ੍ਪਨ੍ਨਾ, ਸਬ੍ਬਾਭਰਣਭੂਸਿਤਾ;

ਪੁਰਪ੍ਪਵੇਸੇ ਸੁਗਤਂ, ਵਾਤਪਾਨੇ ਠਿਤਾ ਅਹਂ.

੧੫੬. ‘‘ਦਿਸ੍ਵਾ ਜਲਨ੍ਤਂ ਯਸਸਾ, ਦੇਵਮਨੁਸ੍ਸਸਕ੍ਕਤਂ;

ਅਨੁਬ੍ਯਞ੍ਜਨਸਮ੍ਪਨ੍ਨਂ, ਲਕ੍ਖਣੇਹਿ ਵਿਭੂਸਿਤਂ.

੧੫੭. ‘‘ਉਦਗ੍ਗਚਿਤ੍ਤਾ ਸੁਮਨਾ, ਪਬ੍ਬਜ੍ਜਂ ਸਮਰੋਚਯਿਂ;

ਨ ਚਿਰੇਨੇਵ ਕਾਲੇਨ, ਅਰਹਤ੍ਤਮਪਾਪੁਣਿਂ.

੧੫੮. ‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਪਰਚਿਤ੍ਤਾਨਿ ਜਾਨਾਮਿ, ਸਤ੍ਥੁਸਾਸਨਕਾਰਿਕਾ.

੧੫੯. ‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਖੇਪੇਤ੍ਵਾ ਆਸਵੇ ਸਬ੍ਬੇ, ਵਿਸੁਦ੍ਧਾਸਿਂ ਸੁਨਿਮ੍ਮਲਾ.

੧੬੦. ‘‘ਪਰਿਚਿਣ੍ਣੋ ਮਯਾ ਸਤ੍ਥਾ, ਕਤਂ ਬੁਦ੍ਧਸ੍ਸ ਸਾਸਨਂ;

ਓਹਿਤੋ ਗਰੁਕੋ ਭਾਰੋ, ਭਵਨੇਤ੍ਤਿ ਸਮੂਹਤਾ.

੧੬੧. ‘‘ਯਸ੍ਸਤ੍ਥਾਯ ਪਬ੍ਬਜਿਤਾ, ਅਗਾਰਸ੍ਮਾਨਗਾਰਿਯਂ;

ਸੋ ਮੇ ਅਤ੍ਥੋ ਅਨੁਪ੍ਪਤ੍ਤੋ, ਸਬ੍ਬਸਂਯੋਜਨਕ੍ਖਯੋ.

੧੬੨. ‘‘ਤਤੋ ਮਹਾਕਾਰੁਣਿਕੋ, ਏਤਦਗ੍ਗੇ ਠਪੇਸਿ ਮਂ;

ਦਿਬ੍ਬਚਕ੍ਖੁਕਾਨਂ ਅਗ੍ਗਾ, ਸਕੁਲਾਤਿ ਨਰੁਤ੍ਤਮੋ.

੧੬੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੧੬੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੬੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਸਕੁਲਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਕੁਲਾਥੇਰਿਯਾਪਦਾਨਂ ਚਤੁਤ੍ਥਂ.