੩. ਧਮ੍ਮਦਿਨ੍ਨਾਥੇਰੀਅਪਦਾਨਂ

੯੫. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

੯੬. ‘‘ਤਦਾਹਂ ਹਂਸਵਤਿਯਂ, ਕੁਲੇ ਅਞ੍ਞਤਰੇ ਅਹੁਂ;

ਪਰਕਮ੍ਮਕਾਰੀ ਆਸਿਂ, ਨਿਪਕਾ ਸੀਲਸਂਵੁਤਾ.

੯੭. ‘‘ਪਦੁਮੁਤ੍ਤਰਬੁਦ੍ਧਸ੍ਸ, ਸੁਜਾਤੋ ਅਗ੍ਗਸਾਵਕੋ;

ਵਿਹਾਰਾ ਅਭਿਨਿਕ੍ਖਮ੍ਮ, ਪਿਣ੍ਡਪਾਤਾਯ [ਪਤ੍ਤਮਾਦਾਯ (ਕ.)] ਗਚ੍ਛਤਿ.

੯੮. ‘‘ਘਟਂ ਗਹੇਤ੍ਵਾ ਗਚ੍ਛਨ੍ਤੀ, ਤਦਾ ਉਦਕਹਾਰਿਕਾ;

ਤਂ ਦਿਸ੍ਵਾ ਅਦਦਂ ਪੂਪਂ, ਪਸਨ੍ਨਾ ਸੇਹਿ ਪਾਣਿਭਿ.

੯੯. ‘‘ਪਟਿਗ੍ਗਹੇਤ੍ਵਾ ਤਤ੍ਥੇਵ, ਨਿਸਿਨ੍ਨੋ ਪਰਿਭੁਞ੍ਜਿ ਸੋ;

ਤਤੋ ਨੇਤ੍ਵਾਨ ਤਂ ਗੇਹਂ, ਅਦਾਸਿਂ ਤਸ੍ਸ ਭੋਜਨਂ.

੧੦੦. ‘‘ਤਤੋ ਮੇ ਅਯ੍ਯਕੋ ਤੁਟ੍ਠੋ, ਅਕਰੀ ਸੁਣਿਸਂ ਸਕਂ;

ਸਸ੍ਸੁਯਾ ਸਹ ਗਨ੍ਤ੍ਵਾਨ, ਸਮ੍ਬੁਦ੍ਧਂ ਅਭਿਵਾਦਯਿਂ.

੧੦੧. ‘‘ਤਦਾ ਸੋ ਧਮ੍ਮਕਥਿਕਂ, ਭਿਕ੍ਖੁਨਿਂ ਪਰਿਕਿਤ੍ਤਯਂ;

ਠਪੇਸਿ ਏਤਦਗ੍ਗਮ੍ਹਿ, ਤਂ ਸੁਤ੍ਵਾ ਮੁਦਿਤਾ ਅਹਂ.

੧੦੨. ‘‘ਨਿਮਨ੍ਤਯਿਤ੍ਵਾ ਸੁਗਤਂ, ਸਸਙ੍ਘਂ ਲੋਕਨਾਯਕਂ;

ਮਹਾਦਾਨਂ ਦਦਿਤ੍ਵਾਨ, ਤਂ ਠਾਨਮਭਿਪਤ੍ਥਯਿਂ.

੧੦੩. ‘‘ਤਤੋ ਮਂ ਸੁਗਤੋ ਆਹ, ਘਨਨਿਨ੍ਨਾਦਸੁਸ੍ਸਰੋ [ਘਨਨਿਨ੍ਨਾਦਸੁਸ੍ਸਰੇ (ਕ.)];

‘ਮਮੁਪਟ੍ਠਾਨਨਿਰਤੇ, ਸਸਙ੍ਘਪਰਿਵੇਸਿਕੇ.

੧੦੪. ‘‘‘ਸਦ੍ਧਮ੍ਮਸ੍ਸਵਨੇ ਯੁਤ੍ਤੇ, ਗੁਣਵਦ੍ਧਿਤਮਾਨਸੇ;

ਭਦ੍ਦੇ ਭਵਸ੍ਸੁ ਮੁਦਿਤਾ, ਲਚ੍ਛਸੇ ਪਣਿਧੀਫਲਂ.

੧੦੫. ‘‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੧੦੬. ‘‘‘ਤਸ੍ਸ ਧਮ੍ਮੇਸੁ ਦਾਯਾਦਾ, ਓਰਸਾ ਧਮ੍ਮਨਿਮ੍ਮਿਤਾ;

ਧਮ੍ਮਦਿਨ੍ਨਾਤਿ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਿਕਾ’.

੧੦੭. ‘‘ਤਂ ਸੁਤ੍ਵਾ ਮੁਦਿਤਾ ਹੁਤ੍ਵਾ, ਯਾਵਜੀਵਂ ਮਹਾਮੁਨਿਂ;

ਮੇਤ੍ਤਚਿਤ੍ਤਾ ਪਰਿਚਰਿਂ, ਪਚ੍ਚਯੇਹਿ ਵਿਨਾਯਕਂ.

੧੦੮. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੧੦੯. ‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

੧੧੦. ‘‘ਉਪਟ੍ਠਾਕੋ ਮਹੇਸਿਸ੍ਸ, ਤਦਾ ਆਸਿ ਨਰਿਸ੍ਸਰੋ;

ਕਾਸਿਰਾਜਾ ਕਿਕੀ ਨਾਮ, ਬਾਰਾਣਸਿਪੁਰੁਤ੍ਤਮੇ.

੧੧੧. ‘‘ਛਟ੍ਠਾ ਤਸ੍ਸਾਸਹਂ ਧੀਤਾ, ਸੁਧਮ੍ਮਾ ਇਤਿ ਵਿਸ੍ਸੁਤਾ;

ਧਮ੍ਮਂ ਸੁਤ੍ਵਾ ਜਿਨਗ੍ਗਸ੍ਸ, ਪਬ੍ਬਜ੍ਜਂ ਸਮਰੋਚਯਿਂ.

੧੧੨. ‘‘ਅਨੁਜਾਨਿ ਨ ਨੋ ਤਾਤੋ, ਅਗਾਰੇਵ ਤਦਾ ਮਯਂ;

ਵੀਸਵਸ੍ਸਸਹਸ੍ਸਾਨਿ, ਵਿਚਰਿਮ੍ਹ ਅਤਨ੍ਦਿਤਾ.

ਤਤਿਯਂ ਭਾਣਵਾਰਂ.

੧੧੩. ‘‘ਕੋਮਾਰਿਬ੍ਰਹ੍ਮਚਰਿਯਂ, ਰਾਜਕਞ੍ਞਾ ਸੁਖੇਧਿਤਾ;

ਬੁਦ੍ਧੋਪਟ੍ਠਾਨਨਿਰਤਾ, ਮੁਦਿਤਾ ਸਤ੍ਤ ਧੀਤਰੋ.

੧੧੪. ‘‘ਸਮਣੀ ਸਮਣਗੁਤ੍ਤਾ ਚ, ਭਿਕ੍ਖੁਨੀ ਭਿਕ੍ਖੁਦਾਯਿਕਾ;

ਧਮ੍ਮਾ ਚੇਵ ਸੁਧਮ੍ਮਾ ਚ, ਸਤ੍ਤਮੀ ਸਙ੍ਘਦਾਯਿਕਾ.

੧੧੫. ‘‘ਖੇਮਾ ਉਪ੍ਪਲਵਣ੍ਣਾ ਚ, ਪਟਾਚਾਰਾ ਚ ਕੁਣ੍ਡਲਾ;

ਗੋਤਮੀ ਚ ਅਹਞ੍ਚੇਵ, ਵਿਸਾਖਾ ਹੋਤਿ ਸਤ੍ਤਮੀ.

੧੧੬. ‘‘ਤੇਹਿ ਕਮ੍ਮੇਹਿ ਸੁਕਤੇਹਿ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੧੧੭. ‘‘ਪਚ੍ਛਿਮੇ ਚ ਭਵੇ ਦਾਨਿ, ਗਿਰਿਬ੍ਬਜਪੁਰੁਤ੍ਤਮੇ;

ਜਾਤਾ ਸੇਟ੍ਠਿਕੁਲੇ ਫੀਤੇ, ਸਬ੍ਬਕਾਮਸਮਿਦ੍ਧਿਨੇ.

੧੧੮. ‘‘ਯਦਾ ਰੂਪਗੁਣੂਪੇਤਾ, ਪਠਮੇ ਯੋਬ੍ਬਨੇ ਠਿਤਾ;

ਤਦਾ ਪਰਕੁਲਂ ਗਨ੍ਤ੍ਵਾ, ਵਸਿਂ ਸੁਖਸਮਪ੍ਪਿਤਾ.

੧੧੯. ‘‘ਉਪੇਤ੍ਵਾ ਲੋਕਸਰਣਂ, ਸੁਣਿਤ੍ਵਾ ਧਮ੍ਮਦੇਸਨਂ;

ਅਨਾਗਾਮਿਫਲਂ ਪਤ੍ਤੋ, ਸਾਮਿਕੋ ਮੇ ਸੁਬੁਦ੍ਧਿਮਾ.

੧੨੦. ‘‘ਤਦਾਹਂ ਅਨੁਜਾਨੇਤ੍ਵਾ, ਪਬ੍ਬਜਿਂ ਅਨਗਾਰਿਯਂ;

ਨ ਚਿਰੇਨੇਵ ਕਾਲੇਨ, ਅਰਹਤ੍ਤਮਪਾਪੁਣਿਂ.

੧੨੧. ‘‘ਤਦਾ ਉਪਾਸਕੋ ਸੋ ਮਂ, ਉਪਗਨ੍ਤ੍ਵਾ ਅਪੁਚ੍ਛਥ;

ਗਮ੍ਭੀਰੇ ਨਿਪੁਣੇ ਪਞ੍ਹੇ, ਤੇ ਸਬ੍ਬੇ ਬ੍ਯਾਕਰਿਂ ਅਹਂ.

੧੨੨. ‘‘ਜਿਨੋ ਤਸ੍ਮਿਂ ਗੁਣੇ ਤੁਟ੍ਠੋ, ਏਤਦਗ੍ਗੇ ਠਪੇਸਿ ਮਂ;

‘ਭਿਕ੍ਖੁਨਿਂ ਧਮ੍ਮਕਥਿਕਂ, ਨਾਞ੍ਞਂ ਪਸ੍ਸਾਮਿ ਏਦਿਸਿਂ.

੧੨੩. ‘ਧਮ੍ਮਦਿਨ੍ਨਾ ਯਥਾ ਧੀਰਾ, ਏਵਂ ਧਾਰੇਥ ਭਿਕ੍ਖਵੋ’;

‘‘ਏਵਾਹਂ ਪਣ੍ਡਿਤਾ ਹੋਮਿ [ਜਾਤਾ (ਸੀ.), ਨਾਮ (ਸ੍ਯਾ.)], ਨਾਯਕੇਨਾਨੁਕਮ੍ਪਿਤਾ.

੧੨੪. ‘‘ਪਰਿਚਿਣ੍ਣੋ ਮਯਾ ਸਤ੍ਥਾ, ਕਤਂ ਬੁਦ੍ਧਸ੍ਸ ਸਾਸਨਂ;

ਓਹਿਤੋ ਗਰੁਕੋ ਭਾਰੋ, ਭਵਨੇਤ੍ਤਿ ਸਮੂਹਤਾ.

੧੨੫. ‘‘ਯਸ੍ਸਤ੍ਥਾਯ ਪਬ੍ਬਜਿਤਾ, ਅਗਾਰਸ੍ਮਾਨਗਾਰਿਯਂ;

ਸੋ ਮੇ ਅਤ੍ਥੋ ਅਨੁਪ੍ਪਤ੍ਤੋ, ਸਬ੍ਬਸਂਯੋਜਨਕ੍ਖਯੋ.

੧੨੬. ‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਪਰਚਿਤ੍ਤਾਨਿ ਜਾਨਾਮਿ, ਸਤ੍ਥੁਸਾਸਨਕਾਰਿਕਾ.

੧੨੭. ‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਖੇਪੇਤ੍ਵਾ ਆਸਵੇ ਸਬ੍ਬੇ, ਵਿਸੁਦ੍ਧਾਸਿਂ ਸੁਨਿਮ੍ਮਲਾ.

੧੨੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੧੨੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੩੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਧਮ੍ਮਦਿਨ੍ਨਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਧਮ੍ਮਦਿਨ੍ਨਾਥੇਰਿਯਾਪਦਾਨਂ ਤਤਿਯਂ.