੫. ਪਞ੍ਚਦੀਪਦਾਯਿਕਾਥੇਰੀਅਪਦਾਨਂ

੬੧. ‘‘ਨਗਰੇ ਹਂਸਵਤਿਯਾ, ਚਾਰਿਕੀ [ਚਾਰਿਕਾ (ਸੀ. ਸ੍ਯਾ.)] ਆਸਹਂ ਤਦਾ;

ਆਰਾਮੇਨ ਚ ਆਰਾਮਂ [ਆਰਾਮੇਨ ਵਿਹਾਰੇਨ (ਸ੍ਯਾ. ਪੀ.)], ਚਰਾਮਿ ਕੁਸਲਤ੍ਥਿਕਾ.

੬੨. ‘‘ਕਾਲ਼ਪਕ੍ਖਮ੍ਹਿ ਦਿਵਸੇ, ਅਦ੍ਦਸਂ ਬੋਧਿਮੁਤ੍ਤਮਂ;

ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਬੋਧਿਮੂਲੇ ਨਿਸੀਦਹਂ.

੬੩. ‘‘ਗਰੁਚਿਤ੍ਤਂ ਉਪਟ੍ਠੇਤ੍ਵਾ, ਸਿਰੇ ਕਤ੍ਵਾਨ ਅਞ੍ਜਲਿਂ;

ਸੋਮਨਸ੍ਸਂ ਪਵੇਦੇਤ੍ਵਾ, ਏਵਂ ਚਿਨ੍ਤੇਸਿ ਤਾਵਦੇ.

੬੪. ‘‘‘ਯਦਿ ਬੁਦ੍ਧੋ ਅਮਿਤਗੁਣੋ, ਅਸਮਪ੍ਪਟਿਪੁਗ੍ਗਲੋ;

ਦਸ੍ਸੇਤੁ ਪਾਟਿਹੀਰਂ ਮੇ, ਬੋਧਿ ਓਭਾਸਤੁ ਅਯਂ’.

੬੫. ‘‘ਸਹ ਆਵਜ੍ਜਿਤੇ ਮਯ੍ਹਂ, ਬੋਧਿ ਪਜ੍ਜਲਿ ਤਾਵਦੇ;

ਸਬ੍ਬਸੋਣ੍ਣਮਯਾ ਆਸਿ, ਦਿਸਾ ਸਬ੍ਬਾ ਵਿਰੋਚਤਿ.

੬੬. ‘‘ਸਤ੍ਤਰਤ੍ਤਿਨ੍ਦਿਵਂ ਤਤ੍ਥ, ਬੋਧਿਮੂਲੇ ਨਿਸੀਦਹਂ;

ਸਤ੍ਤਮੇ ਦਿਵਸੇ ਪਤ੍ਤੇ, ਦੀਪਪੂਜਂ ਅਕਾਸਹਂ.

੬੭. ‘‘ਆਸਨਂ ਪਰਿਵਾਰੇਤ੍ਵਾ, ਪਞ੍ਚ ਦੀਪਾਨਿ ਪਜ੍ਜਲੁਂ;

ਯਾਵ ਉਦੇਤਿ ਸੂਰਿਯੋ, ਦੀਪਾ ਮੇ ਪਜ੍ਜਲੁਂ ਤਦਾ.

੬੮. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੬੯. ‘‘ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਪਞ੍ਚਦੀਪਾਤਿ ਵੁਚ੍ਚਤਿ;

ਸਟ੍ਠਿਯੋਜਨਮੁਬ੍ਬੇਧਂ, ਤਿਂਸਯੋਜਨਵਿਤ੍ਥਤਂ.

੭੦. ‘‘ਅਸਙ੍ਖਿਯਾਨਿ ਦੀਪਾਨਿ, ਪਰਿਵਾਰੇ ਜਲਿਂਸੁ ਮੇ;

ਯਾਵਤਾ ਦੇਵਭਵਨਂ, ਦੀਪਾਲੋਕੇਨ ਜੋਤਤਿ.

੭੧. ‘‘ਪਰਮ੍ਮੁਖਾ [ਪੁਬ੍ਬਮੁਖਾ (ਸ੍ਯਾ.)] ਨਿਸੀਦਿਤ੍ਵਾ, ਯਦਿ ਇਚ੍ਛਾਮਿ ਪਸ੍ਸਿਤੁਂ;

ਉਦ੍ਧਂ ਅਧੋ ਚ ਤਿਰਿਯਂ, ਸਬ੍ਬਂ ਪਸ੍ਸਾਮਿ ਚਕ੍ਖੁਨਾ.

੭੨. ‘‘ਯਾਵਤਾ ਅਭਿਕਙ੍ਖਾਮਿ, ਦਟ੍ਠੁਂ ਸੁਗਤਦੁਗ੍ਗਤੇ [ਸੁਕਤਦੁਕ੍ਕਟੇ (ਪੀ.)];

ਤਤ੍ਥ ਆਵਰਣਂ ਨਤ੍ਥਿ, ਰੁਕ੍ਖੇਸੁ ਪਬ੍ਬਤੇਸੁ ਵਾ.

੭੩. ‘‘ਅਸੀਤਿ ਦੇਵਰਾਜੂਨਂ, ਮਹੇਸਿਤ੍ਤਮਕਾਰਯਿਂ;

ਸਤਾਨਂ ਚਕ੍ਕਵਤ੍ਤੀਨਂ, ਮਹੇਸਿਤ੍ਤਮਕਾਰਯਿਂ.

੭੪. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਦੀਪਸਤਸਹਸ੍ਸਾਨਿ, ਪਰਿਵਾਰੇ ਜਲਨ੍ਤਿ ਮੇ.

੭੫. ‘‘ਦੇਵਲੋਕਾ ਚਵਿਤ੍ਵਾਨ, ਉਪ੍ਪਜ੍ਜਿਂ ਮਾਤੁਕੁਚ੍ਛਿਯਂ;

ਮਾਤੁਕੁਚ੍ਛਿਗਤਾ ਸਨ੍ਤੀ, ਅਕ੍ਖਿ ਮੇ ਨ ਨਿਮੀਲਤਿ.

੭੬. ‘‘ਦੀਪਸਤਸਹਸ੍ਸਾਨਿ, ਪੁਞ੍ਞਕਮ੍ਮਸਮਙ੍ਗਿਤਾ;

ਜਲਨ੍ਤਿ ਸੂਤਿਕਾਗੇਹੇ, ਪਞ੍ਚਦੀਪਾਨਿਦਂ ਫਲਂ.

੭੭. ‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਮਾਨਸਂ ਵਿਨਿਵਤ੍ਤਯਿਂ;

ਅਜਰਾਮਤਂ ਸੀਤਿਭਾਵਂ, ਨਿਬ੍ਬਾਨਂ ਫਸ੍ਸਯਿਂ ਅਹਂ.

੭੮. ‘‘ਜਾਤਿਯਾ ਸਤ੍ਤਵਸ੍ਸਾਹਂ, ਅਰਹਤ੍ਤਮਪਾਪੁਣਿਂ;

ਉਪਸਮ੍ਪਾਦਯੀ ਬੁਦ੍ਧੋ, ਗੁਣਮਞ੍ਞਾਯ ਗੋਤਮੋ.

੭੯. ‘‘ਮਣ੍ਡਪੇ ਰੁਕ੍ਖਮੂਲੇ ਵਾ, ਸੁਞ੍ਞਾਗਾਰੇ ਵਸਨ੍ਤਿਯਾ;

ਸਦਾ ਪਜ੍ਜਲਤੇ ਦੀਪਂ, ਪਞ੍ਚਦੀਪਾਨਿਦਂ ਫਲਂ.

੮੦. ‘‘ਦਿਬ੍ਬਚਕ੍ਖੁ ਵਿਸੁਦ੍ਧਂ ਮੇ, ਸਮਾਧਿਕੁਸਲਾ ਅਹਂ;

ਅਭਿਞ੍ਞਾਪਾਰਮਿਪ੍ਪਤ੍ਤਾ, ਪਞ੍ਚਦੀਪਾਨਿਦਂ ਫਲਂ.

੮੧. ‘‘ਸਬ੍ਬਵੋਸਿਤਵੋਸਾਨਾ, ਕਤਕਿਚ੍ਚਾ ਅਨਾਸਵਾ;

ਪਞ੍ਚਦੀਪਾ ਮਹਾਵੀਰ, ਪਾਦੇ ਵਨ੍ਦਾਮਿ ਚਕ੍ਖੁਮ.

੮੨. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਦੀਪਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਞ੍ਚਦੀਪਾਨਿਦਂ ਫਲਂ.

੮੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੮੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੮੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਪਞ੍ਚਦੀਪਦਾਯਿਕਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਞ੍ਚਦੀਪਦਾਯਿਕਾਥੇਰਿਯਾਪਦਾਨਂ ਪਞ੍ਚਮਂ.