੯. ਪਞ੍ਚਦੀਪਿਕਾਥੇਰੀਅਪਦਾਨਂ

੯੧. ‘‘ਨਗਰੇ ਹਂਸਵਤਿਯਾ, ਚਾਰਿਕੀ [ਚਾਰਿਨਿਂ (ਸ੍ਯਾ.)] ਆਸਹਂ ਤਦਾ;

ਆਰਾਮੇਨ ਚ ਆਰਾਮਂ, ਚਰਾਮਿ ਕੁਸਲਤ੍ਥਿਕਾ.

੯੨. ‘‘ਕਾਲ਼ਪਕ੍ਖਮ੍ਹਿ ਦਿਵਸੇ, ਅਦ੍ਦਸਂ ਬੋਧਿਮੁਤ੍ਤਮਂ;

ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਬੋਧਿਮੂਲੇ ਨਿਸੀਦਹਂ.

੯੩. ‘‘ਗਰੁਚਿਤ੍ਤਂ ਉਪਟ੍ਠੇਤ੍ਵਾ, ਸਿਰੇ ਕਤ੍ਵਾਨ ਅਞ੍ਜਲਿਂ;

ਸੋਮਨਸ੍ਸਂ ਪਵੇਦੇਤ੍ਵਾ, ਏਵਂ ਚਿਨ੍ਤੇਸਿ ਤਾਵਦੇ.

੯੪. ‘‘‘ਯਦਿ ਬੁਦ੍ਧੋ ਅਮਿਤਗੁਣੋ, ਅਸਮਪ੍ਪਟਿਪੁਗ੍ਗਲੋ;

ਦਸ੍ਸੇਤੁ ਪਾਟਿਹੀਰਂ ਮੇ, ਬੋਧਿ ਓਭਾਸਤੁ ਅਯਂ’.

੯੫. ‘‘ਸਹ ਆਵਜ੍ਜਿਤੇ ਮਯ੍ਹਂ, ਬੋਧਿ ਪਜ੍ਜਲਿ ਤਾਵਦੇ;

ਸਬ੍ਬਸੋਣ੍ਣਮਯਾ ਆਸਿ, ਦਿਸਾ ਸਬ੍ਬਾ ਵਿਰੋਚਤਿ.

੯੬. ‘‘ਸਤ੍ਤਰਤ੍ਤਿਨ੍ਦਿਵਂ [ਸਤ੍ਤਰਤ੍ਤਿਦਿਵਂ (ਪੀ. ਕ.)] ਤਤ੍ਥ, ਬੋਧਿਮੂਲੇ ਨਿਸੀਦਹਂ;

ਸਤ੍ਤਮੇ ਦਿਵਸੇ ਪਤ੍ਤੇ, ਦੀਪਪੂਜਂ ਅਕਾਸਹਂ.

੯੭. ‘‘ਆਸਨਂ ਪਰਿਵਾਰੇਤ੍ਵਾ, ਪਞ੍ਚਦੀਪਾਨਿ ਪਜ੍ਜਲੁਂ;

ਯਾਵ ਉਦੇਤਿ ਸੂਰਿਯੋ, ਦੀਪਾ ਮੇ ਪਜ੍ਜਲੁਂ ਤਦਾ.

੯੮. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

੯੯. ‘‘ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਪਞ੍ਚਦੀਪਾਤਿ ਵੁਚ੍ਚਤਿ;

ਸਟ੍ਠਿਯੋਜਨਮੁਬ੍ਬੇਧਂ [ਸਤਯੋਜਨਮੁਬ੍ਬੇਧਂ (ਸੀ. ਸ੍ਯਾ. ਪੀ.)], ਤਿਂਸਯੋਜਨਵਿਤ੍ਥਤਂ [ਸਟ੍ਠਿ… (ਸ੍ਯਾ. ਪੀ.)].

੧੦੦. ‘‘ਅਸਙ੍ਖਿਯਾਨਿ ਦੀਪਾਨਿ, ਪਰਿਵਾਰੇ ਜਲਨ੍ਤਿ ਮੇ;

ਯਾਵਤਾ ਦੇਵਭਵਨਂ, ਦੀਪਾਲੋਕੇਨ ਜੋਤਤਿ.

੧੦੧. ‘‘ਪਰਮ੍ਮੁਖਾ ਨਿਸੀਦਿਤ੍ਵਾ [ਪੁਰਤ੍ਥਾਭਿਮੁਖਾ ਸਨ੍ਤਿ (ਸ੍ਯਾ.), ਪੁਰਤ੍ਥਾਭਿਮੁਖਾ ਥਿਤਾ (ਪੀ.)], ਯਦਿ ਇਚ੍ਛਾਮਿ ਪਸ੍ਸਿਤੁਂ;

ਉਦ੍ਧਂ ਅਧੋ ਚ ਤਿਰਿਯਂ, ਸਬ੍ਬਂ ਪਸ੍ਸਾਮਿ ਚਕ੍ਖੁਨਾ.

੧੦੨. ‘‘ਯਾਵਤਾ ਅਭਿਕਙ੍ਖਾਮਿ, ਦਟ੍ਠੁਂ ਸੁਗਤਦੁਗ੍ਗਤੇ [ਸੁਕਤਦੁਕ੍ਕਤੇ (ਪੀ.];

ਤਤ੍ਥ ਆਵਰਣਂ ਨਤ੍ਥਿ, ਰੁਕ੍ਖੇਸੁ ਪਬ੍ਬਤੇਸੁ ਵਾ.

੧੦੩. ‘‘ਅਸੀਤਿ ਦੇਵਰਾਜੂਨਂ, ਮਹੇਸਿਤ੍ਤਮਕਾਰਯਿਂ;

ਸਤਾਨਂ ਚਕ੍ਕਵਤ੍ਤੀਨਂ, ਮਹੇਸਿਤ੍ਤਮਕਾਰਯਿਂ.

੧੦੪. ‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਦੀਪਸਤਸਹਸ੍ਸਾਨਿ, ਪਰਿਵਾਰੇ ਜਲਨ੍ਤਿ ਮੇ.

੧੦੫. ‘‘ਦੇਵਲੋਕਾ ਚਵਿਤ੍ਵਾਨ, ਉਪ੍ਪਜ੍ਜਿਂ ਮਾਤੁਕੁਚ੍ਛਿਯਂ;

ਮਾਤੁਕੁਚ੍ਛਿਗਤਾ ਸਨ੍ਤੀ [ਮਾਤੁਕੁਚ੍ਛਿਗਤਂ ਸਨ੍ਤਿਂ (ਸੀ.)], ਅਕ੍ਖਿ ਮੇ ਨ ਨਿਮੀਲਤਿ.

੧੦੬. ‘‘ਦੀਪਸਤਸਹਸ੍ਸਾਨਿ, ਪੁਞ੍ਞਕਮ੍ਮਸਮਙ੍ਗਿਤਾ;

ਜਲਨ੍ਤਿ ਸੂਤਿਕਾਗੇਹੇ [ਸੂਤਿਘਰੇ ਪਜ੍ਜਲਨ੍ਤਿ (ਸਬ੍ਬਤ੍ਥ)], ਪਞ੍ਚਦੀਪਾਨਿਦਂ ਫਲਂ.

੧੦੭. ‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਮਾਨਸਂ ਵਿਨਿਵਤ੍ਤਯਿਂ;

ਅਜਰਾਮਤਂ ਸੀਤਿਭਾਵਂ, ਨਿਬ੍ਬਾਨਂ ਫਸ੍ਸਯਿਂ ਅਹਂ.

੧੦੮. ‘‘ਜਾਤਿਯਾ ਸਤ੍ਤਵਸ੍ਸਾਹਂ, ਅਰਹਤ੍ਤਮਪਾਪੁਣਿਂ;

ਉਪਸਮ੍ਪਾਦਯੀ ਬੁਦ੍ਧੋ, ਗੁਣਮਞ੍ਞਾਯ ਗੋਤਮੋ.

੧੦੯. ‘‘ਮਣ੍ਡਪੇ ਰੁਕ੍ਖਮੂਲੇ ਵਾ, ਪਾਸਾਦੇਸੁ ਗੁਹਾਸੁ ਵਾ;

ਸੁਞ੍ਞਾਗਾਰੇ ਵਸਨ੍ਤਿਯਾ [ਚ ਝਾਯਨ੍ਤੇ (ਸੀ.), ਚ ਝਾਯਨ੍ਤਾ (ਪੀ.), ਪਜ੍ਝਾਯਨ੍ਤਾ (ਸ੍ਯਾ.)], ਪਞ੍ਚਦੀਪਾ ਜਲਨ੍ਤਿ ਮੇ.

੧੧੦. ‘‘ਦਿਬ੍ਬਚਕ੍ਖੁ ਵਿਸੁਦ੍ਧਂ ਮੇ, ਸਮਾਧਿਕੁਸਲਾ ਅਹਂ;

ਅਭਿਞ੍ਞਾਪਾਰਮਿਪ੍ਪਤ੍ਤਾ, ਪਞ੍ਚਦੀਪਾਨਿਦਂ ਫਲਂ.

੧੧੧. ‘‘ਸਬ੍ਬਵੋਸਿਤਵੋਸਾਨਾ, ਕਤਕਿਚ੍ਚਾ ਅਨਾਸਵਾ;

ਪਞ੍ਚਦੀਪਾ ਮਹਾਵੀਰ, ਪਾਦੇ ਵਨ੍ਦਾਮਿ [ਵਨ੍ਦਤਿ (ਸੀ. ਕ.)] ਚਕ੍ਖੁਮ.

੧੧੨. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਦੀਪਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਞ੍ਚਦੀਪਾਨਿਦਂ ਫਲਂ.

੧੧੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੧੧੪. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੧੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਪਞ੍ਚਦੀਪਿਕਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਞ੍ਚਦੀਪਿਕਾਥੇਰਿਯਾਪਦਾਨਂ ਨਵਮਂ.