੧੦. ਉਦਕਦਾਯਿਕਾਥੇਰੀਅਪਦਾਨਂ

੧੧੬. ‘‘ਨਗਰੇ ਬਨ੍ਧੁਮਤਿਯਾ, ਅਹੋਸਿਂ ਉਦਹਾਰਿਕਾ;

ਉਦਹਾਰੇਨ ਜੀਵਾਮਿ, ਤੇਨ ਪੋਸੇਮਿ ਦਾਰਕੇ.

੧੧੭. ‘‘ਦੇਯ੍ਯਧਮ੍ਮੋ ਚ ਮੇ ਨਤ੍ਥਿ, ਪੁਞ੍ਞਕ੍ਖੇਤ੍ਤੇ ਅਨੁਤ੍ਤਰੇ;

ਕੋਟ੍ਠਕਂ ਉਪਸਙ੍ਕਮ੍ਮ, ਉਦਕਂ ਪਟ੍ਠਪੇਸਹਂ.

੧੧੮. ‘‘ਤੇਨ ਕਮ੍ਮੇਨ ਸੁਕਤੇਨ, ਤਾਵਤਿਂਸਮਗਚ੍ਛਹਂ;

ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਉਦਹਾਰੇਨ ਨਿਮ੍ਮਿਤਂ.

੧੧੯. ‘‘ਅਚ੍ਛਰਾਨਂ ਸਹਸ੍ਸਸ੍ਸ, ਅਹਞ੍ਹਿ ਪਵਰਾ ਤਦਾ;

ਦਸਟ੍ਠਾਨੇਹਿ ਤਾ ਸਬ੍ਬਾ, ਅਭਿਭੋਮਿ ਸਦਾ ਅਹਂ.

੧੨੦. ‘‘ਪਞ੍ਞਾਸਂ ਦੇਵਰਾਜੂਨਂ, ਮਹੇਸਿਤ੍ਤਮਕਾਰਯਿਂ;

ਵੀਸਤਿਚਕ੍ਕਵਤ੍ਤੀਨਂ, ਮਹੇਸਿਤ੍ਤਮਕਾਰਯਿਂ.

੧੨੧. ‘‘ਦੁਵੇ ਭਵੇ ਸਂਸਰਾਮਿ, ਦੇਵਤ੍ਤੇ ਅਥ ਮਾਨੁਸੇ;

ਦੁਗ੍ਗਤਿਂ ਨਾਭਿਜਾਨਾਮਿ, ਦਕਦਾਨਸ੍ਸਿਦਂ ਫਲਂ.

੧੨੨. ‘‘ਪਬ੍ਬਤਗ੍ਗੇ ਦੁਮਗ੍ਗੇ ਵਾ, ਅਨ੍ਤਲਿਕ੍ਖੇ ਚ ਭੂਮਿਯਂ;

ਯਦਾ ਉਦਕਮਿਚ੍ਛਾਮਿ, ਖਿਪ੍ਪਂ ਪਟਿਲਭਾਮਹਂ.

੧੨੩. ‘‘ਅਵੁਟ੍ਠਿਕਾ ਦਿਸਾ ਨਤ੍ਥਿ, ਸਨ੍ਤਤ੍ਤਾ ਕੁਥਿਤਾਪਿ [ਸਨ੍ਤਤ੍ਤਾ ਕੁਥਿਤਾ ਨ ਚ (ਸੀ. ਪੀ.), ਸਨ੍ਤਤ੍ਤਾ ਖੁਪ੍ਪਿਤਾ ਹਿ ਮੇ (ਸ੍ਯਾ.)] ਚ;

ਮਮ ਸਙ੍ਕਪ੍ਪਮਞ੍ਞਾਯ, ਮਹਾਮੇਘੋ ਪਵਸ੍ਸਤਿ.

੧੨੪. ‘‘ਕਦਾਚਿ ਨੀਯਮਾਨਾਯ, ਞਾਤਿਸਙ੍ਘੇਨ ਮੇ ਤਦਾ;

ਯਦਾ ਇਚ੍ਛਾਮਹਂ ਵਸ੍ਸਂ, ਮਹਾਮੇਘੋ ਅਜਾਯਥ.

੧੨੫. ‘‘ਉਣ੍ਹਂ ਵਾ ਪਰਿਲ਼ਾਹੋ ਵਾ, ਸਰੀਰੇ ਮੇ ਨ ਵਿਜ੍ਜਤਿ;

ਕਾਯੇ ਚ ਮੇ ਰਜੋ ਨਤ੍ਥਿ, ਦਕਦਾਨਸ੍ਸਿਦਂ ਫਲਂ.

੧੨੬. ‘‘ਵਿਸੁਦ੍ਧਮਨਸਾ ਅਜ੍ਜ, ਅਪੇਤਮਨਪਾਪਿਕਾ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੧੨੭. ‘‘ਏਕਨਵੁਤਿਤੋ ਕਪ੍ਪੇ, ਯਂ ਦਕਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਦਕਦਾਨਸ੍ਸਿਦਂ ਫਲਂ.

੧੨੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੧੨੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੧੩੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਉਦਕਦਾਯਿਕਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਉਦਕਦਾਯਿਕਾਥੇਰਿਯਾਪਦਾਨਂ ਦਸਮਂ.

ਸੁਮੇਧਾਵਗ੍ਗੋ ਪਠਮੋ.