੮. ਸਤ੍ਤੁਪ੍ਪਲਮਾਲਿਕਾਥੇਰੀਅਪਦਾਨਂ

੭੧. ‘‘ਨਗਰੇ ਅਰੁਣਵਤਿਯਾ, ਅਰੁਣੋ ਨਾਮ [ਅਰੁਣਵਾ ਨਾਮ (ਸੀ. ਪੀ.)] ਤ੍ਤਿਯੋ;

ਤਸ੍ਸ ਰਞ੍ਞੋ ਅਹੁਂ ਭਰਿਯਾ, ਵਾਰਿਤਂ ਵਾਰਯਾਮਹਂ [ਚਾਰਿਕਂ ਚਾਰਯਾਮਹਂ (ਸੀ.), ਨ ਗੁਲਂ ਪਾਦਯਾਮਹਂ (ਸ੍ਯਾ.), ਨ ਮਾਲਂ ਪਾਦਯਾਮਹਂ (ਪੀ.)].

੭੨. ‘‘ਸਤ੍ਤਮਾਲਂ ਗਹੇਤ੍ਵਾਨ, ਉਪ੍ਪਲਾ ਦੇਵਗਨ੍ਧਿਕਾ;

ਨਿਸਜ੍ਜ ਪਾਸਾਦਵਰੇ, ਏਵਂ ਚਿਨ੍ਤੇਸਿ ਤਾਵਦੇ.

੭੩. ‘‘‘ਕਿਂ ਮੇ ਇਮਾਹਿ ਮਾਲਾਹਿ, ਸਿਰਸਾਰੋਪਿਤਾਹਿ ਮੇ;

ਵਰਂ ਮੇ ਬੁਦ੍ਧਸੇਟ੍ਠਸ੍ਸ, ਞਾਣਮ੍ਹਿ ਅਭਿਰੋਪਿਤਂ’.

੭੪. ‘‘ਸਮ੍ਬੁਦ੍ਧਂ ਪਟਿਮਾਨੇਨ੍ਤੀ, ਦ੍ਵਾਰਾਸਨ੍ਨੇ ਨਿਸੀਦਹਂ;

‘ਯਦਾ ਏਹਿਤਿ ਸਮ੍ਬੁਦ੍ਧੋ, ਪੂਜਯਿਸ੍ਸਂ ਮਹਾਮੁਨਿਂ’.

੭੫. ‘‘ਕਕੁਧੋ ਵਿਲਸਨ੍ਤੋਵ, ਮਿਗਰਾਜਾਵ ਕੇਸਰੀ;

ਭਿਕ੍ਖੁਸਙ੍ਘੇਨ ਸਹਿਤੋ, ਆਗਚ੍ਛਿ ਵੀਥਿਯਾ ਜਿਨੋ.

੭੬. ‘‘ਬੁਦ੍ਧਸ੍ਸ ਰਂਸਿਂ ਦਿਸ੍ਵਾਨ, ਹਟ੍ਠਾ ਸਂਵਿਗ੍ਗਮਾਨਸਾ;

ਦ੍ਵਾਰਂ ਅਵਾਪੁਰਿਤ੍ਵਾਨ [ਅਪਾਪੁਣਿਤ੍ਵਾ (ਸ੍ਯਾ.)], ਬੁਦ੍ਧਸੇਟ੍ਠਮਪੂਜਯਿਂ.

੭੭. ‘‘ਸਤ੍ਤ ਉਪ੍ਪਲਪੁਪ੍ਫਾਨਿ, ਪਰਿਕਿਣ੍ਣਾਨਿ [ਸੁਵਿਤ੍ਥਿਣ੍ਣਾਨਿ (ਸ੍ਯਾ.)] ਅਮ੍ਬਰੇ;

ਛਦਿਂ ਕਰੋਨ੍ਤੋ ਬੁਦ੍ਧਸ੍ਸ, ਮਤ੍ਥਕੇ ਧਾਰਯਨ੍ਤਿ ਤੇ.

੭੮. ‘‘ਉਦਗ੍ਗਚਿਤ੍ਤਾ ਸੁਮਨਾ, ਵੇਦਜਾਤਾ ਕਤਞ੍ਜਲੀ;

ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਤਾਵਤਿਂਸਮਗਚ੍ਛਹਂ.

੭੯. ‘‘ਮਹਾਨੇਲਸ੍ਸ ਛਾਦਨਂ, ਧਾਰੇਨ੍ਤਿ ਮਮ ਮੁਦ੍ਧਨਿ;

ਦਿਬ੍ਬਗਨ੍ਧਂ ਪਵਾਯਾਮਿ, ਸਤ੍ਤੁਪ੍ਪਲਸ੍ਸਿਦਂ ਫਲਂ.

੮੦. ‘‘ਕਦਾਚਿ ਨੀਯਮਾਨਾਯ, ਞਾਤਿਸਙ੍ਘੇਨ ਮੇ ਤਦਾ;

ਯਾਵਤਾ ਪਰਿਸਾ ਮਯ੍ਹਂ, ਮਹਾਨੇਲਂ ਧਰੀਯਤਿ.

੮੧. ‘‘ਸਤ੍ਤਤਿ ਦੇਵਰਾਜੂਨਂ, ਮਹੇਸਿਤ੍ਤਮਕਾਰਯਿਂ;

ਸਬ੍ਬਤ੍ਥ ਇਸ੍ਸਰਾ ਹੁਤ੍ਵਾ, ਸਂਸਰਾਮਿ ਭਵਾਭਵੇ.

੮੨. ‘‘ਤੇਸਟ੍ਠਿ ਚਕ੍ਕਵਤ੍ਤੀਨਂ, ਮਹੇਸਿਤ੍ਤਮਕਾਰਯਿਂ;

ਸਬ੍ਬੇ ਮਮਨੁਵਤ੍ਤਨ੍ਤਿ, ਆਦੇਯ੍ਯਵਚਨਾ ਅਹੁਂ.

੮੩. ‘‘ਉਪ੍ਪਲਸ੍ਸੇਵ ਮੇ ਵਣ੍ਣੋ, ਗਨ੍ਧੋ ਚੇਵ ਪਵਾਯਤਿ;

ਦੁਬ੍ਬਣ੍ਣਿਯਂ ਨ ਜਾਨਾਮਿ [ਦੁਗ੍ਗਤਿਂ ਨਾਭਿਜਾਨਾਮਿ (ਸ੍ਯਾ. ਪੀ.)], ਬੁਦ੍ਧਪੂਜਾਯਿਦਂ ਫਲਂ.

੮੪. ‘‘ਇਦ੍ਧਿਪਾਦੇਸੁ ਕੁਸਲਾ, ਬੋਜ੍ਝਙ੍ਗਭਾਵਨਾ ਰਤਾ;

ਅਭਿਞ੍ਞਾਪਾਰਮਿਪ੍ਪਤ੍ਤਾ, ਬੁਦ੍ਧਪੂਜਾਯਿਦਂ ਫਲਂ.

੮੫. ‘‘ਸਤਿਪਟ੍ਠਾਨਕੁਸਲਾ, ਸਮਾਧਿਝਾਨਗੋਚਰਾ;

ਸਮ੍ਮਪ੍ਪਧਾਨਮਨੁਯੁਤ੍ਤਾ, ਬੁਦ੍ਧਪੂਜਾਯਿਦਂ ਫਲਂ.

੮੬. ‘‘ਵੀਰਿਯਂ ਮੇ ਧੁਰਧੋਰਯ੍ਹਂ, ਯੋਗਕ੍ਖੇਮਾਧਿਵਾਹਨਂ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

੮੭. ‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੮੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਵਿਹਰਾਮਿ ਅਨਾਸਵਾ.

੮੯. ‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ.

੯੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਸਤ੍ਤੁਪ੍ਪਲਮਾਲਿਕਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਤ੍ਤੁਪ੍ਪਲਮਾਲਿਕਾਥੇਰਿਯਾਪਦਾਨਂ ਅਟ੍ਠਮਂ.