੪. ਸੁਨ੍ਦਰਿਕਭਾਰਦ੍ਵਾਜਸੁਤ੍ਤਂ

ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਕੋਸਲੇਸੁ ਵਿਹਰਤਿ ਸੁਨ੍ਦਰਿਕਾਯ ਨਦਿਯਾ ਤੀਰੇ. ਤੇਨ ਖੋ ਪਨ ਸਮਯੇਨ ਸੁਨ੍ਦਰਿਕਭਾਰਦ੍ਵਾਜੋ ਬ੍ਰਾਹ੍ਮਣੋ ਸੁਨ੍ਦਰਿਕਾਯ ਨਦਿਯਾ ਤੀਰੇ ਅਗ੍ਗਿਂ ਜੁਹਤਿ, ਅਗ੍ਗਿਹੁਤ੍ਤਂ ਪਰਿਚਰਤਿ. ਅਥ ਖੋ ਸੁਨ੍ਦਰਿਕਭਾਰਦ੍ਵਾਜੋ ਬ੍ਰਾਹ੍ਮਣੋ ਅਗ੍ਗਿਂ ਜੁਹਿਤ੍ਵਾ ਅਗ੍ਗਿਹੁਤ੍ਤਂ ਪਰਿਚਰਿਤ੍ਵਾ ਉਟ੍ਠਾਯਾਸਨਾ ਸਮਨ੍ਤਾ ਚਤੁਦ੍ਦਿਸਾ ਅਨੁਵਿਲੋਕੇਸਿ – ‘‘ਕੋ ਨੁ ਖੋ ਇਮਂ ਹਬ੍ਯਸੇਸਂ ਭੁਞ੍ਜੇਯ੍ਯਾ’’ਤਿ? ਅਦ੍ਦਸਾ ਖੋ ਸੁਨ੍ਦਰਿਕਭਾਰਦ੍ਵਾਜੋ ਬ੍ਰਾਹ੍ਮਣੋ ਭਗਵਨ੍ਤਂ ਅਵਿਦੂਰੇ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਸਸੀਸਂ ਪਾਰੁਤਂ ਨਿਸਿਨ੍ਨਂ; ਦਿਸ੍ਵਾਨ ਵਾਮੇਨ ਹਤ੍ਥੇਨ ਹਬ੍ਯਸੇਸਂ ਗਹੇਤ੍ਵਾ ਦਕ੍ਖਿਣੇਨ ਹਤ੍ਥੇਨ ਕਮਣ੍ਡਲੁਂ ਗਹੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ.

ਅਥ ਖੋ ਭਗਵਾ ਸੁਨ੍ਦਰਿਕਭਾਰਦ੍ਵਾਜਸ੍ਸ ਬ੍ਰਾਹ੍ਮਣਸ੍ਸ ਪਦਸਦ੍ਦੇਨ ਸੀਸਂ ਵਿਵਰਿ. ਅਥ ਖੋ ਸੁਨ੍ਦਰਿਕਭਾਰਦ੍ਵਾਜੋ ਬ੍ਰਾਹ੍ਮਣੋ – ‘‘ਮੁਣ੍ਡੋ ਅਯਂ ਭਵਂ, ਮੁਣ੍ਡਕੋ ਅਯਂ ਭਵ’’ਨ੍ਤਿ ਤਤੋਵ ਪੁਨ ਨਿਵਤ੍ਤਿਤੁਕਾਮੋ ਅਹੋਸਿ. ਅਥ ਖੋ ਸੁਨ੍ਦਰਿਕਭਾਰਦ੍ਵਾਜਸ੍ਸ ਬ੍ਰਾਹ੍ਮਣਸ੍ਸ ਏਤਦਹੋਸਿ – ‘‘ਮੁਣ੍ਡਾਪਿ ਹਿ ਇਧੇਕਚ੍ਚੇ ਬ੍ਰਾਹ੍ਮਣਾ ਭਵਨ੍ਤਿ, ਯਂਨੂਨਾਹਂ ਉਪਸਙ੍ਕਮਿਤ੍ਵਾ ਜਾਤਿਂ ਪੁਚ੍ਛੇਯ੍ਯ’’ਨ੍ਤਿ. ਅਥ ਖੋ ਸੁਨ੍ਦਰਿਕਭਾਰਦ੍ਵਾਜੋ ਬ੍ਰਾਹ੍ਮਣੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਕਿਂਜਚ੍ਚੋ ਭਵ’’ਨ੍ਤਿ?

ਅਥ ਖੋ ਭਗਵਾ ਸੁਨ੍ਦਰਿਕਭਾਰਦ੍ਵਾਜਂ ਬ੍ਰਾਹ੍ਮਣਂ ਗਾਥਾਹਿ ਅਜ੍ਝਭਾਸਿ –

੪੫੭. ‘‘ਨ ਬ੍ਰਾਹ੍ਮਣੋ ਨੋਮ੍ਹਿ ਨ ਰਾਜਪੁਤ੍ਤੋ, ਨ ਵੇਸ੍ਸਾਯਨੋ ਉਦ ਕੋਚਿ ਨੋਮ੍ਹਿ;

ਗੋਤ੍ਤਂ ਪਰਿਞ੍ਞਾਯ ਪੁਥੁਜ੍ਜਨਾਨਂ, ਅਕਿਞ੍ਚਨੋ ਮਨ੍ਤ ਚਰਾਮਿ ਲੋਕੇ.

੪੫੮. ‘‘ਸਙ੍ਘਾਟਿਵਾਸੀ ਅਗਹੋ ਚਰਾਮਿ [ਅਗਿਹੋ (ਕ. ਸੀ. ਪੀ.) ਅਗੇਹੋ (ਕਤ੍ਥਚਿ)], ਨਿਵੁਤ੍ਤਕੇਸੋ ਅਭਿਨਿਬ੍ਬੁਤਤ੍ਤੋ;

ਅਲਿਪ੍ਪਮਾਨੋ ਇਧ ਮਾਣਵੇਹਿ, ਅਕਲ੍ਲਂ ਮਂ ਬ੍ਰਾਹ੍ਮਣ ਪੁਚ੍ਛਸਿ ਗੋਤ੍ਤਪਞ੍ਹਂ’’.

੪੫੯. ‘‘ਪੁਚ੍ਛਨ੍ਤਿ ਵੇ ਭੋ ਬ੍ਰਾਹ੍ਮਣਾ, ਬ੍ਰਾਹ੍ਮਣੇਭਿ ਸਹ ਬ੍ਰਾਹ੍ਮਣੋ ਨੋ ਭਵ’’ਨ੍ਤਿ.

੪੬੦. ‘‘ਬ੍ਰਾਹ੍ਮਣੋ ਹਿ ਚੇ ਤ੍ਵਂ ਬ੍ਰੂਸਿ, ਮਞ੍ਚ ਬ੍ਰੂਸਿ ਅਬ੍ਰਾਹ੍ਮਣਂ;

ਤਂ ਤਂ ਸਾਵਿਤ੍ਤਿਂ ਪੁਚ੍ਛਾਮਿ, ਤਿਪਦਂ ਚਤੁਵੀਸਤਕ੍ਖਰਂ.

੪੬੧. ‘‘ਕਿਂ ਨਿਸ੍ਸਿਤਾ ਇਸਯੋ ਮਨੁਜਾ, ਖਤ੍ਤਿਯਾ ਬ੍ਰਾਹ੍ਮਣਾ [ਪਠਮਪਾਦਨ੍ਤੋ] ਦੇਵਤਾਨਂ;

ਯਞ੍ਞਮਕਪ੍ਪਯਿਂਸੁ ਪੁਥੂ ਇਧ ਲੋਕੇ [ਦੁਤਿਯਪਾਦਨ੍ਤੋ (ਸੀ.)].

੪੬੨. ‘‘ਯਦਨ੍ਤਗੂ ਵੇਦਗੂ ਯਞ੍ਞਕਾਲੇ, ਯਸ੍ਸਾਹੁਤਿਂ ਲਭੇ ਤਸ੍ਸਿਜ੍ਝੇਤਿ ਬ੍ਰੂਮਿ’’.

੪੬੩. ‘‘ਅਦ੍ਧਾ ਹਿ ਤਸ੍ਸ ਹੁਤਮਿਜ੍ਝੇ, (ਇਤਿ ਬ੍ਰਾਹ੍ਮਣੋ)

ਯਂ ਤਾਦਿਸਂ ਵੇਦਗੁਮਦ੍ਦਸਾਮ;

ਤੁਮ੍ਹਾਦਿਸਾਨਞ੍ਹਿ ਅਦਸ੍ਸਨੇਨ, ਅਞ੍ਞੋ ਜਨੋ ਭੁਞ੍ਜਤਿ ਪੂਰਲ਼ਾਸਂ’’.

੪੬੪. ‘‘ਤਸ੍ਮਾਤਿਹ ਤ੍ਵਂ ਬ੍ਰਾਹ੍ਮਣ ਅਤ੍ਥੇਨ, ਅਤ੍ਥਿਕੋ ਉਪਸਙ੍ਕਮ੍ਮ ਪੁਚ੍ਛ;

ਸਨ੍ਤਂ ਵਿਧੂਮਂ ਅਨੀਘਂ ਨਿਰਾਸਂ, ਅਪ੍ਪੇਵਿਧ ਅਭਿਵਿਨ੍ਦੇ ਸੁਮੇਧਂ’’.

੪੬੫. ‘‘ਯਞ੍ਞੇ ਰਤੋਹਂ ਭੋ ਗੋਤਮ, ਯਞ੍ਞਂ ਯਿਟ੍ਠੁਕਾਮੋ ਨਾਹਂ ਪਜਾਨਾਮਿ;

ਅਨੁਸਾਸਤੁ ਮਂ ਭਵਂ, ਯਤ੍ਥ ਹੁਤਂ ਇਜ੍ਝਤੇ ਬ੍ਰੂਹਿ ਮੇ ਤਂ’’.

‘‘ਤੇਨ ਹਿ ਤ੍ਵਂ, ਬ੍ਰਾਹ੍ਮਣ, ਓਦਹਸ੍ਸੁ ਸੋਤਂ; ਧਮ੍ਮਂ ਤੇ ਦੇਸੇਸ੍ਸਾਮਿ –

੪੬੬. ‘‘ਮਾ ਜਾਤਿਂ ਪੁਚ੍ਛੀ ਚਰਣਞ੍ਚ ਪੁਚ੍ਛ, ਕਟ੍ਠਾ ਹਵੇ ਜਾਯਤਿ ਜਾਤਵੇਦੋ;

ਨੀਚਾਕੁਲੀਨੋਪਿ ਮੁਨੀ ਧਿਤੀਮਾ, ਆਜਾਨਿਯੋ ਹੋਤਿ ਹਿਰੀਨਿਸੇਧੋ.

੪੬੭. ‘‘ਸਚ੍ਚੇਨ ਦਨ੍ਤੋ ਦਮਸਾ ਉਪੇਤੋ, ਵੇਦਨ੍ਤਗੂ ਵੂਸਿਤਬ੍ਰਹ੍ਮਚਰਿਯੋ;

ਕਾਲੇਨ ਤਮ੍ਹਿ ਹਬ੍ਯਂ ਪਵੇਚ੍ਛੇ, ਯੋ ਬ੍ਰਾਹ੍ਮਣੋ ਪੁਞ੍ਞਪੇਕ੍ਖੋ [ਪੁਞ੍ਞਪੇਖੋ (ਸੀ. ਪੀ.)] ਯਜੇਥ.

੪੬੮. ‘‘ਯੇ ਕਾਮੇ ਹਿਤ੍ਵਾ ਅਗਹਾ ਚਰਨ੍ਤਿ, ਸੁਸਞ੍ਞਤਤ੍ਤਾ ਤਸਰਂਵ ਉਜ੍ਜੁਂ;

ਕਾਲੇਨ ਤੇਸੁ ਹਬ੍ਯਂ ਪਵੇਚ੍ਛੇ, ਯੋ ਬ੍ਰਾਹ੍ਮਣੋ ਪੁਞ੍ਞਪੇਕ੍ਖੋ ਯਜੇਥ.

੪੬੯. ‘‘ਯੇ ਵੀਤਰਾਗਾ ਸੁਸਮਾਹਿਤਿਨ੍ਦ੍ਰਿਯਾ, ਚਨ੍ਦੋਵ ਰਾਹੁਗ੍ਗਹਣਾ ਪਮੁਤ੍ਤਾ;

ਕਾਲੇਨ ਤੇਸੁ ਹਬ੍ਯਂ ਪਵੇਚ੍ਛੇ, ਯੋ ਬ੍ਰਾਹ੍ਮਣੋ ਪੁਞ੍ਞਪੇਕ੍ਖੋ ਯਜੇਥ.

੪੭੦. ‘‘ਅਸਜ੍ਜਮਾਨਾ ਵਿਚਰਨ੍ਤਿ ਲੋਕੇ, ਸਦਾ ਸਤਾ ਹਿਤ੍ਵਾ ਮਮਾਯਿਤਾਨਿ;

ਕਾਲੇਨ ਤੇਸੁ ਹਬ੍ਯਂ ਪਵੇਚ੍ਛੇ, ਯੋ ਬ੍ਰਾਹ੍ਮਣੋ ਪੁਞ੍ਞਪੇਕ੍ਖੋ ਯਜੇਥ.

੪੭੧. ‘‘ਯੋ ਕਾਮੇ ਹਿਤ੍ਵਾ ਅਭਿਭੁਯ੍ਯਚਾਰੀ, ਯੋ ਵੇਦਿ ਜਾਤੀਮਰਣਸ੍ਸ ਅਨ੍ਤਂ;

ਪਰਿਨਿਬ੍ਬੁਤੋ ਉਦਕਰਹਦੋਵ ਸੀਤੋ, ਤਥਾਗਤੋ ਅਰਹਤਿ ਪੂਰਲ਼ਾਸਂ.

੪੭੨. ‘‘ਸਮੋ ਸਮੇਹਿ ਵਿਸਮੇਹਿ ਦੂਰੇ, ਤਥਾਗਤੋ ਹੋਤਿ ਅਨਨ੍ਤਪਞ੍ਞੋ;

ਅਨੂਪਲਿਤ੍ਤੋ ਇਧ ਵਾ ਹੁਰਂ ਵਾ, ਤਥਾਗਤੋ ਅਰਹਤਿ ਪੂਰਲ਼ਾਸਂ.

੪੭੩. ‘‘ਯਮ੍ਹਿ ਨ ਮਾਯਾ ਵਸਤਿ ਨ ਮਾਨੋ, ਯੋ ਵੀਤਲੋਭੋ ਅਮਮੋ ਨਿਰਾਸੋ;

ਪਨੁਣ੍ਣਕੋਧੋ ਅਭਿਨਿਬ੍ਬੁਤਤ੍ਤੋ, ਯੋ ਬ੍ਰਾਹ੍ਮਣੋ ਸੋਕਮਲਂ ਅਹਾਸਿ;

ਤਥਾਗਤੋ ਅਰਹਤਿ ਪੂਰਲ਼ਾਸਂ.

੪੭੪.

‘‘ਨਿਵੇਸਨਂ ਯੋ ਮਨਸੋ ਅਹਾਸਿ, ਪਰਿਗ੍ਗਹਾ ਯਸ੍ਸ ਨ ਸਨ੍ਤਿ ਕੇਚਿ;

ਅਨੁਪਾਦਿਯਾਨੋ ਇਧ ਵਾ ਹੁਰਂ ਵਾ, ਤਥਾਗਤੋ ਅਰਹਤਿ ਪੂਰਲ਼ਾਸਂ.

੪੭੫. ‘‘ਸਮਾਹਿਤੋ ਯੋ ਉਦਤਾਰਿ ਓਘਂ, ਧਮ੍ਮਂ ਚਞ੍ਞਾਸਿ ਪਰਮਾਯ ਦਿਟ੍ਠਿਯਾ;

ਖੀਣਾਸਵੋ ਅਨ੍ਤਿਮਦੇਹਧਾਰੀ, ਤਥਾਗਤੋ ਅਰਹਤਿ ਪੂਰਲ਼ਾਸਂ.

੪੭੬. ‘‘ਭਵਾਸਵਾ ਯਸ੍ਸ ਵਚੀ ਖਰਾ ਚ, ਵਿਧੂਪਿਤਾ ਅਤ੍ਥਗਤਾ ਨ ਸਨ੍ਤਿ;

ਸ ਵੇਦਗੂ ਸਬ੍ਬਧਿ ਵਿਪ੍ਪਮੁਤ੍ਤੋ, ਤਥਾਗਤੋ ਅਰਹਤਿ ਪੂਰਲ਼ਾਸਂ.

੪੭੭. ‘‘ਸਙ੍ਗਾਤਿਗੋ ਯਸ੍ਸ ਨ ਸਨ੍ਤਿ ਸਙ੍ਗਾ, ਯੋ ਮਾਨਸਤ੍ਤੇਸੁ ਅਮਾਨਸਤ੍ਤੋ;

ਦੁਕ੍ਖਂ ਪਰਿਞ੍ਞਾਯ ਸਖੇਤ੍ਤਵਤ੍ਥੁਂ, ਤਥਾਗਤੋ ਅਰਹਤਿ ਪੂਰਲ਼ਾਸਂ.

੪੭੮. ‘‘ਆਸਂ ਅਨਿਸ੍ਸਾਯ ਵਿਵੇਕਦਸ੍ਸੀ, ਪਰਵੇਦਿਯਂ ਦਿਟ੍ਠਿਮੁਪਾਤਿਵਤ੍ਤੋ;

ਆਰਮ੍ਮਣਾ ਯਸ੍ਸ ਨ ਸਨ੍ਤਿ ਕੇਚਿ, ਤਥਾਗਤੋ ਅਰਹਤਿ ਪੂਰਲ਼ਾਸਂ.

੪੭੯. ‘‘ਪਰੋਪਰਾ [ਪਰੋਵਰਾ (ਸੀ. ਪੀ.)] ਯਸ੍ਸ ਸਮੇਚ੍ਚ ਧਮ੍ਮਾ, ਵਿਧੂਪਿਤਾ ਅਤ੍ਥਗਤਾ ਨ ਸਨ੍ਤਿ;

ਸਨ੍ਤੋ ਉਪਾਦਾਨਖਯੇ ਵਿਮੁਤ੍ਤੋ, ਤਥਾਗਤੋ ਅਰਹਤਿ ਪੂਰਲ਼ਾਸਂ.

੪੮੦. ‘‘ਸਂਯੋਜਨਂ ਜਾਤਿਖਯਨ੍ਤਦਸ੍ਸੀ, ਯੋਪਾਨੁਦਿ ਰਾਗਪਥਂ ਅਸੇਸਂ;

ਸੁਦ੍ਧੋ ਨਿਦੋਸੋ ਵਿਮਲੋ ਅਕਾਚੋ [ਅਕਾਮੋ (ਸੀ. ਸ੍ਯਾ.)], ਤਥਾਗਤੋ ਅਰਹਤਿ ਪੂਰਲ਼ਾਸਂ.

੪੮੧. ‘‘ਯੋ ਅਤ੍ਤਨੋ ਅਤ੍ਤਾਨਂ [ਅਤ੍ਤਨਾਤ੍ਤਾਨਂ (ਸੀ. ਸ੍ਯਾ.)] ਨਾਨੁਪਸ੍ਸਤਿ, ਸਮਾਹਿਤੋ ਉਜ੍ਜੁਗਤੋ ਠਿਤਤ੍ਤੋ;

ਸ ਵੇ ਅਨੇਜੋ ਅਖਿਲੋ ਅਕਙ੍ਖੋ, ਤਥਾਗਤੋ ਅਰਹਤਿ ਪੂਰਲ਼ਾਸਂ.

੪੮੨. ‘‘ਮੋਹਨ੍ਤਰਾ ਯਸ੍ਸ ਨ ਸਨ੍ਤਿ ਕੇਚਿ, ਸਬ੍ਬੇਸੁ ਧਮ੍ਮੇਸੁ ਚ ਞਾਣਦਸ੍ਸੀ;

ਸਰੀਰਞ੍ਚ ਅਨ੍ਤਿਮਂ ਧਾਰੇਤਿ, ਪਤ੍ਤੋ ਚ ਸਮ੍ਬੋਧਿਮਨੁਤ੍ਤਰਂ ਸਿਵਂ;

ਏਤ੍ਤਾਵਤਾ ਯਕ੍ਖਸ੍ਸ ਸੁਦ੍ਧਿ, ਤਥਾਗਤੋ ਅਰਹਤਿ ਪੂਰਲ਼ਾਸਂ’’.

੪੮੩. ‘‘ਹੁਤਞ੍ਚ [ਹੁਤ੍ਤਞ੍ਚ (ਸੀ. ਕ.)] ਮਯ੍ਹਂ ਹੁਤਮਤ੍ਥੁ ਸਚ੍ਚਂ, ਯਂ ਤਾਦਿਸਂ ਵੇਦਗੁਨਂ ਅਲਤ੍ਥਂ;

ਬ੍ਰਹ੍ਮਾ ਹਿ ਸਕ੍ਖਿ ਪਟਿਗਣ੍ਹਾਤੁ ਮੇ ਭਗਵਾ, ਭੁਞ੍ਜਤੁ ਮੇ ਭਗਵਾ ਪੂਰਲ਼ਾਸਂ’’.

੪੮੪. ‘‘ਗਾਥਾਭਿਗੀਤਂ ਮੇ ਅਭੋਜਨੇਯ੍ਯਂ, ਸਮ੍ਪਸ੍ਸਤਂ ਬ੍ਰਾਹ੍ਮਣ ਨੇਸ ਧਮ੍ਮੋ;

ਗਾਥਾਭਿਗੀਤਂ ਪਨੁਦਨ੍ਤਿ ਬੁਦ੍ਧਾ, ਧਮ੍ਮੇ ਸਤੀ ਬ੍ਰਾਹ੍ਮਣ ਵੁਤ੍ਤਿਰੇਸਾ.

੪੮੫. ‘‘ਅਞ੍ਞੇਨ ਚ ਕੇਵਲਿਨਂ ਮਹੇਸਿਂ, ਖੀਣਾਸਵਂ ਕੁਕ੍ਕੁਚ੍ਚਵੂਪਸਨ੍ਤਂ;

ਅਨ੍ਨੇਨ ਪਾਨੇਨ ਉਪਟ੍ਠਹਸ੍ਸੁ, ਖੇਤ੍ਤਞ੍ਹਿ ਤਂ ਪੁਞ੍ਞਪੇਕ੍ਖਸ੍ਸ ਹੋਤਿ’’.

੪੮੬. ‘‘ਸਾਧਾਹਂ ਭਗਵਾ ਤਥਾ ਵਿਜਞ੍ਞਂ, ਯੋ ਦਕ੍ਖਿਣਂ ਭੁਞ੍ਜੇਯ੍ਯ ਮਾਦਿਸਸ੍ਸ;

ਯਂ ਯਞ੍ਞਕਾਲੇ ਪਰਿਯੇਸਮਾਨੋ, ਪਪ੍ਪੁਯ੍ਯ ਤਵ ਸਾਸਨਂ’’.

੪੮੭. ‘‘ਸਾਰਮ੍ਭਾ ਯਸ੍ਸ ਵਿਗਤਾ, ਚਿਤ੍ਤਂ ਯਸ੍ਸ ਅਨਾਵਿਲਂ;

ਵਿਪ੍ਪਮੁਤ੍ਤੋ ਚ ਕਾਮੇਹਿ, ਥਿਨਂ ਯਸ੍ਸ ਪਨੂਦਿਤਂ.

੪੮੮. ‘‘ਸੀਮਨ੍ਤਾਨਂ ਵਿਨੇਤਾਰਂ, ਜਾਤਿਮਰਣਕੋਵਿਦਂ;

ਮੁਨਿਂ ਮੋਨੇਯ੍ਯਸਮ੍ਪਨ੍ਨਂ, ਤਾਦਿਸਂ ਯਞ੍ਞਮਾਗਤਂ.

੪੮੯. ‘‘ਭਕੁਟਿਂ [ਭੂਕੁਟਿਂ (ਕ. ਸੀ.), ਭਾਕੁਟਿਂ (ਕ. ਸੀ., ਮ. ਨਿ. ੧.੨੨੬)] ਵਿਨਯਿਤ੍ਵਾਨ, ਪਞ੍ਜਲਿਕਾ ਨਮਸ੍ਸਥ;

ਪੂਜੇਥ ਅਨ੍ਨਪਾਨੇਨ, ਏਵਂ ਇਜ੍ਝਨ੍ਤਿ ਦਕ੍ਖਿਣਾ.

੪੯੦. ‘‘ਬੁਦ੍ਧੋ ਭਵਂ ਅਰਹਤਿ ਪੂਰਲ਼ਾਸਂ, ਪੁਞ੍ਞਖੇਤ੍ਤਮਨੁਤ੍ਤਰਂ;

ਆਯਾਗੋ ਸਬ੍ਬਲੋਕਸ੍ਸ, ਭੋਤੋ ਦਿਨ੍ਨਂ ਮਹਪ੍ਫਲ’’ਨ੍ਤਿ.

ਅਥ ਖੋ ਸੁਨ੍ਦਰਿਕਭਾਰਦ੍ਵਾਜੋ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭੋ ਗੋਤਮ, ਅਭਿਕ੍ਕਨ੍ਤਂ, ਭੋ ਗੋਤਮ! ਸੇਯ੍ਯਥਾਪਿ, ਭੋ ਗੋਤਮ, ਨਿਕ੍ਕੁਜ੍ਜਿਤਂ ਵਾ ਉਕ੍ਕੁਜ੍ਜੇਯ੍ਯ, ਪਟਿਚ੍ਛਨ੍ਨਂ ਵਾ ਵਿਵਰੇਯ੍ਯ, ਮੂਲ਼੍ਹਸ੍ਸ ਵਾ ਮਗ੍ਗਂ ਆਚਿਕ੍ਖੇਯ੍ਯ, ਅਨ੍ਧਕਾਰੇ ਵਾ ਤੇਲਪਜ੍ਜੋਤਂ ਧਾਰੇਯ੍ਯ – ਚਕ੍ਖੁਮਨ੍ਤੋ ਰੂਪਾਨਿ ਦਕ੍ਖਨ੍ਤੀਤਿ; ਏਵਮੇਵਂ ਭੋਤਾ ਗੋਤਮੇਨ ਅਨੇਕਪਰਿਯਾਯੇਨ ਧਮ੍ਮੋ ਪਕਾਸਿਤੋ. ਏਸਾਹਂ ਭਵਨ੍ਤਂ ਗੋਤਮਂ ਸਰਣਂ ਗਚ੍ਛਾਮਿ ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚ. ਲਭੇਯ੍ਯਾਹਂ ਭੋਤੋ ਗੋਤਮਸ੍ਸ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਂ ਉਪਸਮ੍ਪਦ’’ਨ੍ਤਿ. ਅਲਤ੍ਥ ਖੋ ਸੁਨ੍ਦਰਿਕਭਾਰਦ੍ਵਾਜੋ ਬ੍ਰਾਹ੍ਮਣੋ…ਪੇ… ਅਰਹਤਂ ਅਹੋਸੀਤਿ.

ਸੁਨ੍ਦਰਿਕਭਾਰਦ੍ਵਾਜਸੁਤ੍ਤਂ ਚਤੁਤ੍ਥਂ ਨਿਟ੍ਠਿਤਂ.