੧੧. ਨਾਲਕਸੁਤ੍ਤਂ

੬੮੪. ਆਨਨ੍ਦਜਾਤੇ ਤਿਦਸਗਣੇ ਪਤੀਤੇ, ਸਕ੍ਕਞ੍ਚ ਇਨ੍ਦਂ ਸੁਚਿਵਸਨੇ ਚ ਦੇਵੇ;

ਦੁਸ੍ਸਂ ਗਹੇਤ੍ਵਾ ਅਤਿਰਿਵ ਥੋਮਯਨ੍ਤੇ, ਅਸਿਤੋ ਇਸਿ ਅਦ੍ਦਸ ਦਿਵਾਵਿਹਾਰੇ.

੬੮੫. ਦਿਸ੍ਵਾਨ ਦੇਵੇ ਮੁਦਿਤਮਨੇ ਉਦਗ੍ਗੇ, ਚਿਤ੍ਤਿਂ ਕਰਿਤ੍ਵਾਨ ਇਦਮਵੋਚ [ਕਰਿਤ੍ਵਾ ਇਦਮਵੋਚਾਸਿ (ਸੀ.)] ਤਤ੍ਥ;

‘‘ਕਿਂ ਦੇਵਸਙ੍ਘੋ ਅਤਿਰਿਵ ਕਲ੍ਯਰੂਪੋ, ਦੁਸ੍ਸਂ ਗਹੇਤ੍ਵਾ ਰਮਯਥ [ਭਮਯਥ (ਸੀ.)] ਕਿਂ ਪਟਿਚ੍ਚ.

੬੮੬. ‘‘ਯਦਾਪਿ ਆਸੀ ਅਸੁਰੇਹਿ ਸਙ੍ਗਮੋ, ਜਯੋ ਸੁਰਾਨਂ ਅਸੁਰਾ ਪਰਾਜਿਤਾ.

ਤਦਾਪਿ ਨੇਤਾਦਿਸੋ ਲੋਮਹਂਸਨੋ, ਕਿਮਬ੍ਭੁਤਂ ਦਟ੍ਠੁ ਮਰੂ ਪਮੋਦਿਤਾ.

੬੮੭. ‘‘ਸੇਲ਼ੇਨ੍ਤਿ ਗਾਯਨ੍ਤਿ ਚ ਵਾਦਯਨ੍ਤਿ ਚ, ਭੁਜਾਨਿ ਫੋਟੇਨ੍ਤਿ [ਪੋਠੇਨ੍ਤਿ (ਸੀ. ਪੀ.), ਪੋਥੇਨ੍ਤਿ (ਕ.)] ਚ ਨਚ੍ਚਯਨ੍ਤਿ ਚ;

ਪੁਚ੍ਛਾਮਿ ਵੋਹਂ ਮੇਰੁਮੁਦ੍ਧਵਾਸਿਨੇ, ਧੁਨਾਥ ਮੇ ਸਂਸਯਂ ਖਿਪ੍ਪ ਮਾਰਿਸਾ’’.

੬੮੮. ‘‘ਸੋ ਬੋਧਿਸਤ੍ਤੋ ਰਤਨਵਰੋ ਅਤੁਲ੍ਯੋ, ਮਨੁਸ੍ਸਲੋਕੇ ਹਿਤਸੁਖਤ੍ਥਾਯ [ਹਿਤਸੁਖਤਾਯ (ਸੀ. ਸ੍ਯਾ. ਪੀ.)] ਜਾਤੋ;

ਸਕ੍ਯਾਨ ਗਾਮੇ ਜਨਪਦੇ ਲੁਮ੍ਬਿਨੇਯ੍ਯੇ, ਤੇਨਮ੍ਹ ਤੁਟ੍ਠਾ ਅਤਿਰਿਵ ਕਲ੍ਯਰੂਪਾ.

੬੮੯. ‘‘ਸੋ ਸਬ੍ਬਸਤ੍ਤੁਤ੍ਤਮੋ ਅਗ੍ਗਪੁਗ੍ਗਲੋ, ਨਰਾਸਭੋ ਸਬ੍ਬਪਜਾਨਮੁਤ੍ਤਮੋ;

ਵਤ੍ਤੇਸ੍ਸਤਿ ਚਕ੍ਕਮਿਸਿਵ੍ਹਯੇ ਵਨੇ, ਨਦਂਵ ਸੀਹੋ ਬਲਵਾ ਮਿਗਾਭਿਭੂ’’.

੬੯੦. ਤਂ ਸਦ੍ਦਂ ਸੁਤ੍ਵਾ ਤੁਰਿਤਮਵਸਰੀ ਸੋ, ਸੁਦ੍ਧੋਦਨਸ੍ਸ ਤਦ ਭਵਨਂ ਉਪਾਵਿਸਿ [ਉਪਾਗਮਿ (ਸੀ. ਪੀ.)];

ਨਿਸਜ੍ਜ ਤਤ੍ਥ ਇਦਮਵੋਚਾਸਿ ਸਕ੍ਯੇ, ‘‘ਕੁਹਿਂ ਕੁਮਾਰੋ ਅਹਮਪਿ ਦਟ੍ਠੁਕਾਮੋ’’.

੬੯੧. ਤਤੋ ਕੁਮਾਰਂ ਜਲਿਤਮਿਵ ਸੁਵਣ੍ਣਂ, ਉਕ੍ਕਾਮੁਖੇਵ ਸੁਕੁਸਲਸਮ੍ਪਹਟ੍ਠਂ [ਸੁਕੁਸਲੇਨ ਸਮ੍ਪਹਟ੍ਠਂ (ਕ.)];

ਦਦ੍ਦਲ੍ਲਮਾਨਂ [ਦਦ੍ਦਲ਼੍ਹਮਾਨਂ (ਕ.)] ਸਿਰਿਯਾ ਅਨੋਮਵਣ੍ਣਂ, ਦਸ੍ਸੇਸੁ ਪੁਤ੍ਤਂ ਅਸਿਤਵ੍ਹਯਸ੍ਸ ਸਕ੍ਯਾ.

੬੯੨. ਦਿਸ੍ਵਾ ਕੁਮਾਰਂ ਸਿਖਿਮਿਵ ਪਜ੍ਜਲਨ੍ਤਂ, ਤਾਰਾਸਭਂਵ ਨਭਸਿਗਮਂ ਵਿਸੁਦ੍ਧਂ;

ਸੂਰਿਯਂ ਤਪਨ੍ਤਂ ਸਰਦਰਿਵਬ੍ਭਮੁਤ੍ਤਂ, ਆਨਨ੍ਦਜਾਤੋ ਵਿਪੁਲਮਲਤ੍ਥ ਪੀਤਿਂ.

੬੯੩. ਅਨੇਕਸਾਖਞ੍ਚ ਸਹਸ੍ਸਮਣ੍ਡਲਂ, ਛਤ੍ਤਂ ਮਰੂ ਧਾਰਯੁਮਨ੍ਤਲਿਕ੍ਖੇ;

ਸੁਵਣ੍ਣਦਣ੍ਡਾ ਵੀਤਿਪਤਨ੍ਤਿ ਚਾਮਰਾ, ਨ ਦਿਸ੍ਸਰੇ ਚਾਮਰਛਤ੍ਤਗਾਹਕਾ.

੬੯੪. ਦਿਸ੍ਵਾ ਜਟੀ ਕਣ੍ਹਸਿਰਿਵ੍ਹਯੋ ਇਸਿ, ਸੁਵਣ੍ਣਨਿਕ੍ਖਂ ਵਿਯ ਪਣ੍ਡੁਕਮ੍ਬਲੇ;

ਸੇਤਞ੍ਚ ਛਤ੍ਤਂ ਧਰਿਯਨ੍ਤ [ਧਾਰਿਯਨ੍ਤ (ਸ੍ਯਾ.), ਧਾਰਯਨ੍ਤਂ (ਸੀ. ਕ.)] ਮੁਦ੍ਧਨਿ, ਉਦਗ੍ਗਚਿਤ੍ਤੋ ਸੁਮਨੋ ਪਟਿਗ੍ਗਹੇ.

੬੯੫. ਪਟਿਗ੍ਗਹੇਤ੍ਵਾ ਪਨ ਸਕ੍ਯਪੁਙ੍ਗਵਂ, ਜਿਗੀਸਤੋ [ਜਿਗਿਂਸਕੋ (ਸੀ. ਸ੍ਯਾ. ਪੀ.)] ਲਕ੍ਖਣਮਨ੍ਤਪਾਰਗੂ;

ਪਸਨ੍ਨਚਿਤ੍ਤੋ ਗਿਰਮਬ੍ਭੁਦੀਰਯਿ, ‘‘ਅਨੁਤ੍ਤਰਾਯਂ ਦ੍ਵਿਪਦਾਨਮੁਤ੍ਤਮੋ’’ [ਦਿਪਦਾਨਮੁਤ੍ਤਮੋ (ਸੀ. ਸ੍ਯਾ. ਪੀ.)].

੬੯੬. ਅਥਤ੍ਤਨੋ ਗਮਨਮਨੁਸ੍ਸਰਨ੍ਤੋ, ਅਕਲ੍ਯਰੂਪੋ ਗਲ਼ਯਤਿ ਅਸ੍ਸੁਕਾਨਿ;

ਦਿਸ੍ਵਾਨ ਸਕ੍ਯਾ ਇਸਿਮਵੋਚੁਂ ਰੁਦਨ੍ਤਂ,

‘‘ਨੋ ਚੇ ਕੁਮਾਰੇ ਭਵਿਸ੍ਸਤਿ ਅਨ੍ਤਰਾਯੋ’’.

੬੯੭. ਦਿਸ੍ਵਾਨ ਸਕ੍ਯੇ ਇਸਿਮਵੋਚ ਅਕਲ੍ਯੇ, ‘‘ਨਾਹਂ ਕੁਮਾਰੇ ਅਹਿਤਮਨੁਸ੍ਸਰਾਮਿ;

ਨ ਚਾਪਿਮਸ੍ਸ ਭਵਿਸ੍ਸਤਿ ਅਨ੍ਤਰਾਯੋ, ਨ ਓਰਕਾਯਂ ਅਧਿਮਾਨਸਾ [ਅਧਿਮਨਸਾ (ਸੀ. ਸ੍ਯਾ.)] ਭਵਾਥ.

੬੯੮. ‘‘ਸਮ੍ਬੋਧਿਯਗ੍ਗਂ ਫੁਸਿਸ੍ਸਤਾਯਂ ਕੁਮਾਰੋ, ਸੋ ਧਮ੍ਮਚਕ੍ਕਂ ਪਰਮਵਿਸੁਦ੍ਧਦਸ੍ਸੀ;

ਵਤ੍ਤੇਸ੍ਸਤਾਯਂ ਬਹੁਜਨਹਿਤਾਨੁਕਮ੍ਪੀ, ਵਿਤ੍ਥਾਰਿਕਸ੍ਸ ਭਵਿਸ੍ਸਤਿ ਬ੍ਰਹ੍ਮਚਰਿਯਂ.

੬੯੯. ‘‘ਮਮਞ੍ਚ ਆਯੁ ਨ ਚਿਰਮਿਧਾਵਸੇਸੋ, ਅਥਨ੍ਤਰਾ ਮੇ ਭਵਿਸ੍ਸਤਿ ਕਾਲਕਿਰਿਯਾ;

ਸੋਹਂ ਨ ਸੋਸ੍ਸਂ [ਸੁਸ੍ਸਂ (ਸੀ. ਸ੍ਯਾ.)] ਅਸਮਧੁਰਸ੍ਸ ਧਮ੍ਮਂ, ਤੇਨਮ੍ਹਿ ਅਟ੍ਟੋ ਬ੍ਯਸਨਂਗਤੋ ਅਘਾਵੀ’’.

੭੦੦. ਸੋ ਸਾਕਿਯਾਨਂ ਵਿਪੁਲਂ ਜਨੇਤ੍ਵਾ ਪੀਤਿਂ, ਅਨ੍ਤੇਪੁਰਮ੍ਹਾ ਨਿਗ੍ਗਮਾ [ਨਿਰਗਮਾ (ਸੀ. ਸ੍ਯਾ.), ਨਿਗਮਾ (ਕ. ਸੀ.), ਨਿਰਗਮ (ਪੀ.)] ਬ੍ਰਹ੍ਮਚਾਰੀ;

ਸੋ ਭਾਗਿਨੇਯ੍ਯਂ ਸਯਂ ਅਨੁਕਮ੍ਪਮਾਨੋ, ਸਮਾਦਪੇਸਿ ਅਸਮਧੁਰਸ੍ਸ ਧਮ੍ਮੇ.

੭੦੧. ‘‘ਬੁਦ੍ਧੋਤਿ ਘੋਸਂ ਯਦ [ਯਦਿ (ਸ੍ਯਾ. ਕ.)] ਪਰਤੋ ਸੁਣਾਸਿ, ਸਮ੍ਬੋਧਿਪਤ੍ਤੋ ਵਿਵਰਤਿ ਧਮ੍ਮਮਗ੍ਗਂ;

ਗਨ੍ਤ੍ਵਾਨ ਤਤ੍ਥ ਸਮਯਂ ਪਰਿਪੁਚ੍ਛਮਾਨੋ [ਸਯਂ ਪਰਿਪੁਚ੍ਛਿਯਾਨੋ (ਸੀ. ਸ੍ਯਾ.)], ਚਰਸ੍ਸੁ ਤਸ੍ਮਿਂ ਭਗਵਤਿ ਬ੍ਰਹ੍ਮਚਰਿਯਂ’’.

੭੦੨. ਤੇਨਾਨੁਸਿਟ੍ਠੋ ਹਿਤਮਨੇਨ ਤਾਦਿਨਾ, ਅਨਾਗਤੇ ਪਰਮਵਿਸੁਦ੍ਧਦਸ੍ਸਿਨਾ;

ਸੋ ਨਾਲਕੋ ਉਪਚਿਤਪੁਞ੍ਞਸਞ੍ਚਯੋ, ਜਿਨਂ ਪਤਿਕ੍ਖਂ [ਪਤਿ + ਇਕ੍ਖਂ = ਪਤਿਕ੍ਖਂ] ਪਰਿਵਸਿ ਰਕ੍ਖਿਤਿਨ੍ਦ੍ਰਿਯੋ.

੭੦੩. ਸੁਤ੍ਵਾਨ ਘੋਸਂ ਜਿਨਵਰਚਕ੍ਕਵਤ੍ਤਨੇ, ਗਨ੍ਤ੍ਵਾਨ ਦਿਸ੍ਵਾ ਇਸਿਨਿਸਭਂ ਪਸਨ੍ਨੋ;

ਮੋਨੇਯ੍ਯਸੇਟ੍ਠਂ ਮੁਨਿਪਵਰਂ ਅਪੁਚ੍ਛਿ, ਸਮਾਗਤੇ ਅਸਿਤਾਵ੍ਹਯਸ੍ਸ ਸਾਸਨੇਤਿ.

ਵਤ੍ਥੁਗਾਥਾ ਨਿਟ੍ਠਿਤਾ.

੭੦੪. ‘‘ਅਞ੍ਞਾਤਮੇਤਂ ਵਚਨਂ, ਅਸਿਤਸ੍ਸ ਯਥਾਤਥਂ;

ਤਂ ਤਂ ਗੋਤਮ ਪੁਚ੍ਛਾਮਿ, ਸਬ੍ਬਧਮ੍ਮਾਨ ਪਾਰਗੁਂ.

੭੦੫. ‘‘ਅਨਗਾਰਿਯੁਪੇਤਸ੍ਸ, ਭਿਕ੍ਖਾਚਰਿਯਂ ਜਿਗੀਸਤੋ;

ਮੁਨਿ ਪਬ੍ਰੂਹਿ ਮੇ ਪੁਟ੍ਠੋ, ਮੋਨੇਯ੍ਯਂ ਉਤ੍ਤਮਂ ਪਦਂ’’.

੭੦੬. ‘‘ਮੋਨੇਯ੍ਯਂ ਤੇ ਉਪਞ੍ਞਿਸ੍ਸਂ, (ਇਤਿ ਭਗਵਾ) ਦੁਕ੍ਕਰਂ ਦੁਰਭਿਸਮ੍ਭਵਂ;

ਹਨ੍ਦ ਤੇ ਨਂ ਪਵਕ੍ਖਾਮਿ, ਸਨ੍ਥਮ੍ਭਸ੍ਸੁ ਦਲ਼੍ਹੋ ਭਵ.

੭੦੭. ‘‘ਸਮਾਨਭਾਗਂ ਕੁਬ੍ਬੇਥ, ਗਾਮੇ ਅਕ੍ਕੁਟ੍ਠਵਨ੍ਦਿਤਂ;

ਮਨੋਪਦੋਸਂ ਰਕ੍ਖੇਯ੍ਯ, ਸਨ੍ਤੋ ਅਨੁਣ੍ਣਤੋ ਚਰੇ.

੭੦੮. ‘‘ਉਚ੍ਚਾਵਚਾ ਨਿਚ੍ਛਰਨ੍ਤਿ, ਦਾਯੇ ਅਗ੍ਗਿਸਿਖੂਪਮਾ;

ਨਾਰਿਯੋ ਮੁਨਿਂ ਪਲੋਭੇਨ੍ਤਿ, ਤਾਸੁ ਤਂ ਮਾ ਪਲੋਭਯੁਂ.

੭੦੯. ‘‘ਵਿਰਤੋ ਮੇਥੁਨਾ ਧਮ੍ਮਾ, ਹਿਤ੍ਵਾ ਕਾਮੇ ਪਰੋਪਰੇ [ਪਰੋਵਰੇ (ਸੀ. ਪੀ.), ਵਰਾਵਰੇ (ਸ੍ਯਾ.)];

ਅਵਿਰੁਦ੍ਧੋ ਅਸਾਰਤ੍ਤੋ, ਪਾਣੇਸੁ ਤਸਥਾਵਰੇ.

੭੧੦. ‘‘ਯਥਾ ਅਹਂ ਤਥਾ ਏਤੇ, ਯਥਾ ਏਤੇ ਤਥਾ ਅਹਂ;

ਅਤ੍ਤਾਨਂ ਉਪਮਂ ਕਤ੍ਵਾ, ਨ ਹਨੇਯ੍ਯ ਨ ਘਾਤਯੇ.

੭੧੧. ‘‘ਹਿਤ੍ਵਾ ਇਚ੍ਛਞ੍ਚ ਲੋਭਞ੍ਚ, ਯਤ੍ਥ ਸਤ੍ਤੋ ਪੁਥੁਜ੍ਜਨੋ;

ਚਕ੍ਖੁਮਾ ਪਟਿਪਜ੍ਜੇਯ੍ਯ, ਤਰੇਯ੍ਯ ਨਰਕਂ ਇਮਂ.

੭੧੨. ‘‘ਊਨੂਦਰੋ ਮਿਤਾਹਾਰੋ, ਅਪ੍ਪਿਚ੍ਛਸ੍ਸ ਅਲੋਲੁਪੋ;

ਸਦਾ [ਸ ਵੇ (ਪੀ.)] ਇਚ੍ਛਾਯ ਨਿਚ੍ਛਾਤੋ, ਅਨਿਚ੍ਛੋ ਹੋਤਿ ਨਿਬ੍ਬੁਤੋ.

੭੧੩. ‘‘ਸ ਪਿਣ੍ਡਚਾਰਂ ਚਰਿਤ੍ਵਾ, ਵਨਨ੍ਤਮਭਿਹਾਰਯੇ;

ਉਪਟ੍ਠਿਤੋ ਰੁਕ੍ਖਮੂਲਸ੍ਮਿਂ, ਆਸਨੂਪਗਤੋ ਮੁਨਿ.

੭੧੪. ‘‘ਸ ਝਾਨਪਸੁਤੋ ਧੀਰੋ, ਵਨਨ੍ਤੇ ਰਮਿਤੋ ਸਿਯਾ;

ਝਾਯੇਥ ਰੁਕ੍ਖਮੂਲਸ੍ਮਿਂ, ਅਤ੍ਤਾਨਮਭਿਤੋਸਯਂ.

੭੧੫. ‘‘ਤਤੋ ਰਤ੍ਯਾ ਵਿਵਸਾਨੇ [ਵਿਵਸਨੇ (ਸੀ. ਸ੍ਯਾ. ਪੀ.)], ਗਾਮਨ੍ਤਮਭਿਹਾਰਯੇ;

ਅਵ੍ਹਾਨਂ ਨਾਭਿਨਨ੍ਦੇਯ੍ਯ, ਅਭਿਹਾਰਞ੍ਚ ਗਾਮਤੋ.

੭੧੬. ‘‘ਨ ਮੁਨੀ ਗਾਮਮਾਗਮ੍ਮ, ਕੁਲੇਸੁ ਸਹਸਾ ਚਰੇ;

ਘਾਸੇਸਨਂ ਛਿਨ੍ਨਕਥੋ, ਨ ਵਾਚਂ ਪਯੁਤਂ ਭਣੇ.

੭੧੭. ‘‘ਅਲਤ੍ਥਂ ਯਦਿਦਂ ਸਾਧੁ, ਨਾਲਤ੍ਥਂ ਕੁਸਲਂ ਇਤਿ;

ਉਭਯੇਨੇਵ ਸੋ ਤਾਦੀ, ਰੁਕ੍ਖਂਵੁਪਨਿਵਤ੍ਤਤਿ [ਰੁਕ੍ਖਂਵੁ’ਪਤਿਵਤ੍ਤਤਿ (ਕ.), ਰੁਕ੍ਖਂਵ ਉਪਾਤਿਵਤ੍ਤਤਿ (ਸ੍ਯਾ.)].

੭੧੮. ‘‘ਸ ਪਤ੍ਤਪਾਣਿ ਵਿਚਰਨ੍ਤੋ, ਅਮੂਗੋ ਮੂਗਸਮ੍ਮਤੋ;

ਅਪ੍ਪਂ ਦਾਨਂ ਨ ਹੀਲ਼ੇਯ੍ਯ, ਦਾਤਾਰਂ ਨਾਵਜਾਨਿਯਾ.

੭੧੯. ‘‘ਉਚ੍ਚਾਵਚਾ ਹਿ ਪਟਿਪਦਾ, ਸਮਣੇਨ ਪਕਾਸਿਤਾ;

ਨ ਪਾਰਂ ਦਿਗੁਣਂ ਯਨ੍ਤਿ, ਨਯਿਦਂ ਏਕਗੁਣਂ ਮੁਤਂ.

੭੨੦. ‘‘ਯਸ੍ਸ ਚ ਵਿਸਤਾ ਨਤ੍ਥਿ, ਛਿਨ੍ਨਸੋਤਸ੍ਸ ਭਿਕ੍ਖੁਨੋ;

ਕਿਚ੍ਚਾਕਿਚ੍ਚਪ੍ਪਹੀਨਸ੍ਸ, ਪਰਿਲ਼ਾਹੋ ਨ ਵਿਜ੍ਜਤਿ.

੭੨੧. ‘‘ਮੋਨੇਯ੍ਯਂ ਤੇ ਉਪਞ੍ਞਿਸ੍ਸਂ, ਖੁਰਧਾਰੂਪਮੋ ਭਵੇ;

ਜਿਵ੍ਹਾਯ ਤਾਲੁਮਾਹਚ੍ਚ, ਉਦਰੇ ਸਞ੍ਞਤੋ ਸਿਯਾ.

੭੨੨. ‘‘ਅਲੀਨਚਿਤ੍ਤੋ ਚ ਸਿਯਾ, ਨ ਚਾਪਿ ਬਹੁ ਚਿਨ੍ਤਯੇ;

ਨਿਰਾਮਗਨ੍ਧੋ ਅਸਿਤੋ, ਬ੍ਰਹ੍ਮਚਰਿਯਪਰਾਯਣੋ.

੭੨੩. ‘‘ਏਕਾਸਨਸ੍ਸ ਸਿਕ੍ਖੇਥ, ਸਮਣੂਪਾਸਨਸ੍ਸ ਚ;

ਏਕਤ੍ਤਂ ਮੋਨਮਕ੍ਖਾਤਂ, ਏਕੋ ਚੇ ਅਭਿਰਮਿਸ੍ਸਸਿ;

ਅਥ ਭਾਹਿਸਿ [ਭਾਸਿਹਿ (ਸੀ. ਸ੍ਯਾ. ਪੀ.)] ਦਸਦਿਸਾ.

੭੨੪. ‘‘ਸੁਤ੍ਵਾ ਧੀਰਾਨਂ ਨਿਗ੍ਘੋਸਂ, ਝਾਯੀਨਂ ਕਾਮਚਾਗਿਨਂ;

ਤਤੋ ਹਿਰਿਞ੍ਚ ਸਦ੍ਧਞ੍ਚ, ਭਿਯ੍ਯੋ ਕੁਬ੍ਬੇਥ ਮਾਮਕੋ.

੭੨੫. ‘‘ਤਂ ਨਦੀਹਿ ਵਿਜਾਨਾਥ, ਸੋਬ੍ਭੇਸੁ ਪਦਰੇਸੁ ਚ;

ਸਣਨ੍ਤਾ ਯਨ੍ਤਿ ਕੁਸੋਬ੍ਭਾ [ਕੁਸ੍ਸੁਬ੍ਭਾ (ਸੀ.)], ਤੁਣ੍ਹੀਯਨ੍ਤਿ ਮਹੋਦਧੀ.

੭੨੬. ‘‘ਯਦੂਨਕਂ ਤਂ ਸਣਤਿ, ਯਂ ਪੂਰਂ ਸਨ੍ਤਮੇਵ ਤਂ;

ਅਡ੍ਢਕੁਮ੍ਭੂਪਮੋ ਬਾਲੋ, ਰਹਦੋ ਪੂਰੋਵ ਪਣ੍ਡਿਤੋ.

੭੨੭. ‘‘ਯਂ ਸਮਣੋ ਬਹੁਂ ਭਾਸਤਿ, ਉਪੇਤਂ ਅਤ੍ਥਸਞ੍ਹਿਤਂ;

ਜਾਨਂ ਸੋ ਧਮ੍ਮਂ ਦੇਸੇਤਿ, ਜਾਨਂ ਸੋ ਬਹੁ ਭਾਸਤਿ.

੭੨੮. ‘‘ਯੋ ਚ ਜਾਨਂ ਸਂਯਤਤ੍ਤੋ, ਜਾਨਂ ਨ ਬਹੁ ਭਾਸਤਿ;

ਸ ਮੁਨੀ ਮੋਨਮਰਹਤਿ, ਸ ਮੁਨੀ ਮੋਨਮਜ੍ਝਗਾ’’ਤਿ.

ਨਾਲਕਸੁਤ੍ਤਂ ਏਕਾਦਸਮਂ ਨਿਟ੍ਠਿਤਂ.