੬. ਧਮ੍ਮਚਰਿਯਸੁਤ੍ਤਂ

੨੭੬. ਧਮ੍ਮਚਰਿਯਂ ਬ੍ਰਹ੍ਮਚਰਿਯਂ, ਏਤਦਾਹੁ ਵਸੁਤ੍ਤਮਂ;

ਪਬ੍ਬਜਿਤੋਪਿ ਚੇ ਹੋਤਿ, ਅਗਾਰਾ ਅਨਗਾਰਿਯਂ.

੨੭੭. ਸੋ ਚੇ ਮੁਖਰਜਾਤਿਕੋ, ਵਿਹੇਸਾਭਿਰਤੋ ਮਗੋ;

ਜੀਵਿਤਂ ਤਸ੍ਸ ਪਾਪਿਯੋ, ਰਜਂ ਵਡ੍ਢੇਤਿ ਅਤ੍ਤਨੋ.

੨੭੮. ਕਲਹਾਭਿਰਤੋ ਭਿਕ੍ਖੁ, ਮੋਹਧਮ੍ਮੇਨ ਆਵੁਤੋ;

ਅਕ੍ਖਾਤਮ੍ਪਿ ਨ ਜਾਨਾਤਿ, ਧਮ੍ਮਂ ਬੁਦ੍ਧੇਨ ਦੇਸਿਤਂ.

੨੭੯. ਵਿਹੇਸਂ ਭਾਵਿਤਤ੍ਤਾਨਂ, ਅਵਿਜ੍ਜਾਯ ਪੁਰਕ੍ਖਤੋ;

ਸਂਕਿਲੇਸਂ ਨ ਜਾਨਾਤਿ, ਮਗ੍ਗਂ ਨਿਰਯਗਾਮਿਨਂ.

੨੮੦. ਵਿਨਿਪਾਤਂ ਸਮਾਪਨ੍ਨੋ, ਗਬ੍ਭਾ ਗਬ੍ਭਂ ਤਮਾ ਤਮਂ;

ਸ ਵੇ ਤਾਦਿਸਕੋ ਭਿਕ੍ਖੁ, ਪੇਚ੍ਚ ਦੁਕ੍ਖਂ ਨਿਗਚ੍ਛਤਿ.

੨੮੧. ਗੂਥਕੂਪੋ ਯਥਾ ਅਸ੍ਸ, ਸਮ੍ਪੁਣ੍ਣੋ ਗਣਵਸ੍ਸਿਕੋ;

ਯੋ ਚ ਏਵਰੂਪੋ ਅਸ੍ਸ, ਦੁਬ੍ਬਿਸੋਧੋ ਹਿ ਸਾਙ੍ਗਣੋ.

੨੮੨. ਯਂ ਏਵਰੂਪਂ ਜਾਨਾਥ, ਭਿਕ੍ਖਵੋ ਗੇਹਨਿਸ੍ਸਿਤਂ;

ਪਾਪਿਚ੍ਛਂ ਪਾਪਸਙ੍ਕਪ੍ਪਂ, ਪਾਪਆਚਾਰਗੋਚਰਂ.

੨੮੩. ਸਬ੍ਬੇ ਸਮਗ੍ਗਾ ਹੁਤ੍ਵਾਨ, ਅਭਿਨਿਬ੍ਬਜ੍ਜਿਯਾਥ [ਅਭਿਨਿਬ੍ਬਜ੍ਜਯਾਥ (ਸੀ. ਪੀ. ਅ. ਨਿ. ੮.੧੦)] ਨਂ;

ਕਾਰਣ੍ਡਵਂ [ਕਾਰਣ੍ਡਂ ਵ (ਸ੍ਯਾ. ਕ.) ਅ. ਨਿ. ੮.੧੦] ਨਿਦ੍ਧਮਥ, ਕਸਮ੍ਬੁਂ ਅਪਕਸ੍ਸਥ [ਅਵਕਸ੍ਸਥ (ਸੀ. ਸ੍ਯਾ. ਕ.)].

੨੮੪. ਤਤੋ ਪਲਾਪੇ [ਪਲਾਸੇ (ਕ.)] ਵਾਹੇਥ, ਅਸ੍ਸਮਣੇ ਸਮਣਮਾਨਿਨੇ;

ਨਿਦ੍ਧਮਿਤ੍ਵਾਨ ਪਾਪਿਚ੍ਛੇ, ਪਾਪਆਚਾਰਗੋਚਰੇ.

੨੮੫. ਸੁਦ੍ਧਾ ਸੁਦ੍ਧੇਹਿ ਸਂਵਾਸਂ, ਕਪ੍ਪਯਵ੍ਹੋ ਪਤਿਸ੍ਸਤਾ;

ਤਤੋ ਸਮਗ੍ਗਾ ਨਿਪਕਾ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਥਾਤਿ.

ਧਮ੍ਮਚਰਿਯਸੁਤ੍ਤਂ [ਕਪਿਲਸੁਤ੍ਤਂ (ਅਟ੍ਠ.)] ਛਟ੍ਠਂ ਨਿਟ੍ਠਿਤਂ.