੭. ਬ੍ਰਾਹ੍ਮਣਧਮ੍ਮਿਕਸੁਤ੍ਤਂ

ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਸਮ੍ਬਹੁਲਾ ਕੋਸਲਕਾ ਬ੍ਰਾਹ੍ਮਣਮਹਾਸਾਲਾ ਜਿਣ੍ਣਾ ਵੁਡ੍ਢਾ ਮਹਲ੍ਲਕਾ ਅਦ੍ਧਗਤਾ ਵਯੋਅਨੁਪ੍ਪਤ੍ਤਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿਂਸੁ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨਾ ਖੋ ਤੇ ਬ੍ਰਾਹ੍ਮਣਮਹਾਸਾਲਾ ਭਗਵਨ੍ਤਂ ਏਤਦਵੋਚੁਂ – ‘‘ਸਨ੍ਦਿਸ੍ਸਨ੍ਤਿ ਨੁ ਖੋ, ਭੋ ਗੋਤਮ, ਏਤਰਹਿ ਬ੍ਰਾਹ੍ਮਣਾ ਪੋਰਾਣਾਨਂ ਬ੍ਰਾਹ੍ਮਣਾਨਂ ਬ੍ਰਾਹ੍ਮਣਧਮ੍ਮੇ’’ਤਿ? ‘‘ਨ ਖੋ, ਬ੍ਰਾਹ੍ਮਣਾ, ਸਨ੍ਦਿਸ੍ਸਨ੍ਤਿ ਏਤਰਹਿ ਬ੍ਰਾਹ੍ਮਣਾ ਪੋਰਾਣਾਨਂ ਬ੍ਰਾਹ੍ਮਣਾਨਂ ਬ੍ਰਾਹ੍ਮਣਧਮ੍ਮੇ’’ਤਿ. ‘‘ਸਾਧੁ ਨੋ ਭਵਂ ਗੋਤਮੋ ਪੋਰਾਣਾਨਂ ਬ੍ਰਾਹ੍ਮਣਾਨਂ ਬ੍ਰਾਹ੍ਮਣਧਮ੍ਮਂ ਭਾਸਤੁ, ਸਚੇ ਭੋਤੋ ਗੋਤਮਸ੍ਸ ਅਗਰੂ’’ਤਿ. ‘‘ਤੇਨ ਹਿ, ਬ੍ਰਾਹ੍ਮਣਾ, ਸੁਣਾਥ, ਸਾਧੁਕਂ ਮਨਸਿ ਕਰੋਥ, ਭਾਸਿਸ੍ਸਾਮੀ’’ਤਿ. ‘‘ਏਵਂ, ਭੋ’’ਤਿ ਖੋ ਤੇ ਬ੍ਰਾਹ੍ਮਣਮਹਾਸਾਲਾ ਭਗਵਤੋ ਪਚ੍ਚਸ੍ਸੋਸੁਂ. ਭਗਵਾ ਏਤਦਵੋਚ –

੨੮੬. ‘‘ਇਸਯੋ ਪੁਬ੍ਬਕਾ ਆਸੁਂ, ਸਞ੍ਞਤਤ੍ਤਾ ਤਪਸ੍ਸਿਨੋ;

ਪਞ੍ਚ ਕਾਮਗੁਣੇ ਹਿਤ੍ਵਾ, ਅਤ੍ਤਦਤ੍ਥਮਚਾਰਿਸੁਂ.

੨੮੭. ‘‘ਨ ਪਸੂ ਬ੍ਰਾਹ੍ਮਣਾਨਾਸੁਂ, ਨ ਹਿਰਞ੍ਞਂ ਨ ਧਾਨਿਯਂ;

ਸਜ੍ਝਾਯਧਨਧਞ੍ਞਾਸੁਂ, ਬ੍ਰਹ੍ਮਂ ਨਿਧਿਮਪਾਲਯੁਂ.

੨੮੮. ‘‘ਯਂ ਨੇਸਂ ਪਕਤਂ ਆਸਿ, ਦ੍ਵਾਰਭਤ੍ਤਂ ਉਪਟ੍ਠਿਤਂ;

ਸਦ੍ਧਾਪਕਤਮੇਸਾਨਂ, ਦਾਤਵੇ ਤਦਮਞ੍ਞਿਸੁਂ.

੨੮੯. ‘‘ਨਾਨਾਰਤ੍ਤੇਹਿ ਵਤ੍ਥੇਹਿ, ਸਯਨੇਹਾਵਸਥੇਹਿ ਚ;

ਫੀਤਾ ਜਨਪਦਾ ਰਟ੍ਠਾ, ਤੇ ਨਮਸ੍ਸਿਂਸੁ ਬ੍ਰਾਹ੍ਮਣੇ.

੨੯੦. ‘‘ਅਵਜ੍ਝਾ ਬ੍ਰਾਹ੍ਮਣਾ ਆਸੁਂ, ਅਜੇਯ੍ਯਾ ਧਮ੍ਮਰਕ੍ਖਿਤਾ;

ਨ ਨੇ ਕੋਚਿ ਨਿਵਾਰੇਸਿ, ਕੁਲਦ੍ਵਾਰੇਸੁ ਸਬ੍ਬਸੋ.

੨੯੧. ‘‘ਅਟ੍ਠਚਤ੍ਤਾਲੀਸਂ ਵਸ੍ਸਾਨਿ, (ਕੋਮਾਰ) ਬ੍ਰਹ੍ਮਚਰਿਯਂ ਚਰਿਂਸੁ ਤੇ;

ਵਿਜ੍ਜਾਚਰਣਪਰਿਯੇਟ੍ਠਿਂ, ਅਚਰੁਂ ਬ੍ਰਾਹ੍ਮਣਾ ਪੁਰੇ.

੨੯੨. ‘‘ਨ ਬ੍ਰਾਹ੍ਮਣਾ ਅਞ੍ਞਮਗਮੁਂ, ਨਪਿ ਭਰਿਯਂ ਕਿਣਿਂਸੁ ਤੇ;

ਸਮ੍ਪਿਯੇਨੇਵ ਸਂਵਾਸਂ, ਸਙ੍ਗਨ੍ਤ੍ਵਾ ਸਮਰੋਚਯੁਂ.

੨੯੩. ‘‘ਅਞ੍ਞਤ੍ਰ ਤਮ੍ਹਾ ਸਮਯਾ, ਉਤੁਵੇਰਮਣਿਂ ਪਤਿ;

ਅਨ੍ਤਰਾ ਮੇਥੁਨਂ ਧਮ੍ਮਂ, ਨਾਸ੍ਸੁ ਗਚ੍ਛਨ੍ਤਿ ਬ੍ਰਾਹ੍ਮਣਾ.

੨੯੪. ‘‘ਬ੍ਰਹ੍ਮਚਰਿਯਞ੍ਚ ਸੀਲਞ੍ਚ, ਅਜ੍ਜਵਂ ਮਦ੍ਦਵਂ ਤਪਂ;

ਸੋਰਚ੍ਚਂ ਅਵਿਹਿਂਸਞ੍ਚ, ਖਨ੍ਤਿਞ੍ਚਾਪਿ ਅਵਣ੍ਣਯੁਂ.

੨੯੫. ‘‘ਯੋ ਨੇਸਂ ਪਰਮੋ ਆਸਿ, ਬ੍ਰਹ੍ਮਾ ਦਲ਼੍ਹਪਰਕ੍ਕਮੋ;

ਸ ਵਾਪਿ ਮੇਥੁਨਂ ਧਮ੍ਮਂ, ਸੁਪਿਨਨ੍ਤੇਪਿ ਨਾਗਮਾ.

੨੯੬. ‘‘ਤਸ੍ਸ ਵਤ੍ਤਮਨੁਸਿਕ੍ਖਨ੍ਤਾ, ਇਧੇਕੇ ਵਿਞ੍ਞੁਜਾਤਿਕਾ;

ਬ੍ਰਹ੍ਮਚਰਿਯਞ੍ਚ ਸੀਲਞ੍ਚ, ਖਨ੍ਤਿਞ੍ਚਾਪਿ ਅਵਣ੍ਣਯੁਂ.

੨੯੭. ‘‘ਤਣ੍ਡੁਲਂ ਸਯਨਂ ਵਤ੍ਥਂ, ਸਪ੍ਪਿਤੇਲਞ੍ਚ ਯਾਚਿਯ;

ਧਮ੍ਮੇਨ ਸਮੋਧਾਨੇਤ੍ਵਾ, ਤਤੋ ਯਞ੍ਞਮਕਪ੍ਪਯੁਂ.

੨੯੮. ‘‘ਉਪਟ੍ਠਿਤਸ੍ਮਿਂ ਯਞ੍ਞਸ੍ਮਿਂ, ਨਾਸ੍ਸੁ ਗਾਵੋ ਹਨਿਂਸੁ ਤੇ;

ਯਥਾ ਮਾਤਾ ਪਿਤਾ ਭਾਤਾ, ਅਞ੍ਞੇ ਵਾਪਿ ਚ ਞਾਤਕਾ;

ਗਾਵੋ ਨੋ ਪਰਮਾ ਮਿਤ੍ਤਾ, ਯਾਸੁ ਜਾਯਨ੍ਤਿ ਓਸਧਾ.

੨੯੯. ‘‘ਅਨ੍ਨਦਾ ਬਲਦਾ ਚੇਤਾ, ਵਣ੍ਣਦਾ ਸੁਖਦਾ ਤਥਾ [ਸੁਖਦਾ ਚ ਤਾ (ਕ.)];

ਏਤਮਤ੍ਥਵਸਂ ਞਤ੍ਵਾ, ਨਾਸ੍ਸੁ ਗਾਵੋ ਹਨਿਂਸੁ ਤੇ.

੩੦੦. ‘‘ਸੁਖੁਮਾਲਾ ਮਹਾਕਾਯਾ, ਵਣ੍ਣਵਨ੍ਤੋ ਯਸਸ੍ਸਿਨੋ;

ਬ੍ਰਾਹ੍ਮਣਾ ਸੇਹਿ ਧਮ੍ਮੇਹਿ, ਕਿਚ੍ਚਾਕਿਚ੍ਚੇਸੁ ਉਸ੍ਸੁਕਾ;

ਯਾਵ ਲੋਕੇ ਅਵਤ੍ਤਿਂਸੁ, ਸੁਖਮੇਧਿਤ੍ਥਯਂ ਪਜਾ.

੩੦੧. ‘‘ਤੇਸਂ ਆਸਿ ਵਿਪਲ੍ਲਾਸੋ, ਦਿਸ੍ਵਾਨ ਅਣੁਤੋ ਅਣੁਂ;

ਰਾਜਿਨੋ ਚ ਵਿਯਾਕਾਰਂ, ਨਾਰਿਯੋ ਸਮਲਙ੍ਕਤਾ.

੩੦੨. ‘‘ਰਥੇ ਚਾਜਞ੍ਞਸਂਯੁਤ੍ਤੇ, ਸੁਕਤੇ ਚਿਤ੍ਤਸਿਬ੍ਬਨੇ;

ਨਿਵੇਸਨੇ ਨਿਵੇਸੇ ਚ, ਵਿਭਤ੍ਤੇ ਭਾਗਸੋ ਮਿਤੇ.

੩੦੩. ‘‘ਗੋਮਣ੍ਡਲਪਰਿਬ੍ਯੂਲ਼੍ਹਂ, ਨਾਰੀਵਰਗਣਾਯੁਤਂ;

ਉਲ਼ਾਰਂ ਮਾਨੁਸਂ ਭੋਗਂ, ਅਭਿਜ੍ਝਾਯਿਂਸੁ ਬ੍ਰਾਹ੍ਮਣਾ.

੩੦੪. ‘‘ਤੇ ਤਤ੍ਥ ਮਨ੍ਤੇ ਗਨ੍ਥੇਤ੍ਵਾ, ਓਕ੍ਕਾਕਂ ਤਦੁਪਾਗਮੁਂ;

ਪਹੂਤਧਨਧਞ੍ਞੋਸਿ, ਯਜਸ੍ਸੁ ਬਹੁ ਤੇ ਵਿਤ੍ਤਂ;

ਯਜਸ੍ਸੁ ਬਹੁ ਤੇ ਧਨਂ.

੩੦੫. ‘‘ਤਤੋ ਚ ਰਾਜਾ ਸਞ੍ਞਤ੍ਤੋ, ਬ੍ਰਾਹ੍ਮਣੇਹਿ ਰਥੇਸਭੋ;

ਅਸ੍ਸਮੇਧਂ ਪੁਰਿਸਮੇਧਂ, ਸਮ੍ਮਾਪਾਸਂ ਵਾਜਪੇਯ੍ਯਂ ਨਿਰਗ੍ਗਲ਼ਂ;

ਏਤੇ ਯਾਗੇ ਯਜਿਤ੍ਵਾਨ, ਬ੍ਰਾਹ੍ਮਣਾਨਮਦਾ ਧਨਂ.

੩੦੬. ‘‘ਗਾਵੋ ਸਯਨਞ੍ਚ ਵਤ੍ਥਞ੍ਚ, ਨਾਰਿਯੋ ਸਮਲਙ੍ਕਤਾ;

ਰਥੇ ਚਾਜਞ੍ਞਸਂਯੁਤ੍ਤੇ, ਸੁਕਤੇ ਚਿਤ੍ਤਸਿਬ੍ਬਨੇ.

੩੦੭. ‘‘ਨਿਵੇਸਨਾਨਿ ਰਮ੍ਮਾਨਿ, ਸੁਵਿਭਤ੍ਤਾਨਿ ਭਾਗਸੋ;

ਨਾਨਾਧਞ੍ਞਸ੍ਸ ਪੂਰੇਤ੍ਵਾ, ਬ੍ਰਾਹ੍ਮਣਾਨਮਦਾ ਧਨਂ.

੩੦੮. ‘‘ਤੇ ਚ ਤਤ੍ਥ ਧਨਂ ਲਦ੍ਧਾ, ਸਨ੍ਨਿਧਿਂ ਸਮਰੋਚਯੁਂ;

ਤੇਸਂ ਇਚ੍ਛਾਵਤਿਣ੍ਣਾਨਂ, ਭਿਯ੍ਯੋ ਤਣ੍ਹਾ ਪਵਡ੍ਢਥ;

ਤੇ ਤਤ੍ਥ ਮਨ੍ਤੇ ਗਨ੍ਥੇਤ੍ਵਾ, ਓਕ੍ਕਾਕਂ ਪੁਨਮੁਪਾਗਮੁਂ.

੩੦੯. ‘‘ਯਥਾ ਆਪੋ ਚ ਪਥਵੀ ਚ, ਹਿਰਞ੍ਞਂ ਧਨਧਾਨਿਯਂ;

ਏਵਂ ਗਾਵੋ ਮਨੁਸ੍ਸਾਨਂ, ਪਰਿਕ੍ਖਾਰੋ ਸੋ ਹਿ ਪਾਣਿਨਂ;

ਯਜਸ੍ਸੁ ਬਹੁ ਤੇ ਵਿਤ੍ਤਂ, ਯਜਸ੍ਸੁ ਬਹੁ ਤੇ ਧਨਂ.

੩੧੦. ‘‘ਤਤੋ ਚ ਰਾਜਾ ਸਞ੍ਞਤ੍ਤੋ, ਬ੍ਰਾਹ੍ਮਣੇਹਿ ਰਥੇਸਭੋ;

ਨੇਕਾ ਸਤਸਹਸ੍ਸਿਯੋ, ਗਾਵੋ ਯਞ੍ਞੇ ਅਘਾਤਯਿ.

੩੧੧. ‘‘ਨ ਪਾਦਾ ਨ ਵਿਸਾਣੇਨ, ਨਾਸ੍ਸੁ ਹਿਂਸਨ੍ਤਿ ਕੇਨਚਿ;

ਗਾਵੋ ਏਲ਼ਕਸਮਾਨਾ, ਸੋਰਤਾ ਕੁਮ੍ਭਦੂਹਨਾ;

ਤਾ ਵਿਸਾਣੇ ਗਹੇਤ੍ਵਾਨ, ਰਾਜਾ ਸਤ੍ਥੇਨ ਘਾਤਯਿ.

੩੧੨. ‘‘ਤਤੋ ਦੇਵਾ ਪਿਤਰੋ ਚ [ਤਤੋ ਚ ਦੇਵਾ ਪਿਤਰੋ (ਸੀ. ਸ੍ਯਾ.)], ਇਨ੍ਦੋ ਅਸੁਰਰਕ੍ਖਸਾ;

ਅਧਮ੍ਮੋ ਇਤਿ ਪਕ੍ਕਨ੍ਦੁਂ, ਯਂ ਸਤ੍ਥਂ ਨਿਪਤੀ ਗਵੇ.

੩੧੩. ‘‘ਤਯੋ ਰੋਗਾ ਪੁਰੇ ਆਸੁਂ, ਇਚ੍ਛਾ ਅਨਸਨਂ ਜਰਾ;

ਪਸੂਨਞ੍ਚ ਸਮਾਰਮ੍ਭਾ, ਅਟ੍ਠਾਨਵੁਤਿਮਾਗਮੁਂ.

੩੧੪. ‘‘ਏਸੋ ਅਧਮ੍ਮੋ ਦਣ੍ਡਾਨਂ, ਓਕ੍ਕਨ੍ਤੋ ਪੁਰਾਣੋ ਅਹੁ;

ਅਦੂਸਿਕਾਯੋ ਹਞ੍ਞਨ੍ਤਿ, ਧਮ੍ਮਾ ਧਂਸਨ੍ਤਿ [ਧਂਸੇਨ੍ਤਿ (ਸੀ. ਪੀ.)] ਯਾਜਕਾ.

੩੧੫. ‘‘ਏਵਮੇਸੋ ਅਣੁਧਮ੍ਮੋ, ਪੋਰਾਣੋ ਵਿਞ੍ਞੁਗਰਹਿਤੋ;

ਯਤ੍ਥ ਏਦਿਸਕਂ ਪਸ੍ਸਤਿ, ਯਾਜਕਂ ਗਰਹਤੀ [ਗਰਹੀ (ਕ.)] ਜਨੋ.

੩੧੬. ‘‘ਏਵਂ ਧਮ੍ਮੇ ਵਿਯਾਪਨ੍ਨੇ, ਵਿਭਿਨ੍ਨਾ ਸੁਦ੍ਦਵੇਸ੍ਸਿਕਾ;

ਪੁਥੂ ਵਿਭਿਨ੍ਨਾ ਖਤ੍ਤਿਯਾ, ਪਤਿਂ ਭਰਿਯਾਵਮਞ੍ਞਥ.

੩੧੭. ‘‘ਖਤ੍ਤਿਯਾ ਬ੍ਰਹ੍ਮਬਨ੍ਧੂ ਚ, ਯੇ ਚਞ੍ਞੇ ਗੋਤ੍ਤਰਕ੍ਖਿਤਾ;

ਜਾਤਿਵਾਦਂ ਨਿਰਂਕਤ੍ਵਾ [ਨਿਰਾਕਤ੍ਵਾ (?) ਯਥਾ ਅਨਿਰਾਕਤਜ੍ਝਾਨੋਤਿ], ਕਾਮਾਨਂ ਵਸਮਨ੍ਵਗੁ’’ਨ੍ਤਿ.

ਏਵਂ ਵੁਤ੍ਤੇ, ਤੇ ਬ੍ਰਾਹ੍ਮਣਮਹਾਸਾਲਾ ਭਗਵਨ੍ਤਂ ਏਤਦਵੋਚੁਂ – ‘‘ਅਭਿਕ੍ਕਨ੍ਤਂ, ਭੋ ਗੋਤਮ…ਪੇ. … ਉਪਾਸਕੇ ਨੋ ਭਵਂ ਗੋਤਮੋ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤੇ ਸਰਣਂ ਗਤੇ’’ਤਿ.

ਬ੍ਰਾਹ੍ਮਣਧਮ੍ਮਿਕਸੁਤ੍ਤਂ ਸਤ੍ਤਮਂ ਨਿਟ੍ਠਿਤਂ.