੧੪. ਧਮ੍ਮਿਕਸੁਤ੍ਤਂ

ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਧਮ੍ਮਿਕੋ ਉਪਾਸਕੋ ਪਞ੍ਚਹਿ ਉਪਾਸਕਸਤੇਹਿ ਸਦ੍ਧਿਂ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਧਮ੍ਮਿਕੋ ਉਪਾਸਕੋ ਭਗਵਨ੍ਤਂ ਗਾਥਾਹਿ ਅਜ੍ਝਭਾਸਿ –

੩੭੮. ‘‘ਪੁਚ੍ਛਾਮਿ ਤਂ ਗੋਤਮ ਭੂਰਿਪਞ੍ਞ, ਕਥਂਕਰੋ ਸਾਵਕੋ ਸਾਧੁ ਹੋਤਿ;

ਯੋ ਵਾ ਅਗਾਰਾ ਅਨਗਾਰਮੇਤਿ, ਅਗਾਰਿਨੋ ਵਾ ਪਨੁਪਾਸਕਾਸੇ.

੩੭੯. ‘‘ਤੁਵਞ੍ਹਿ ਲੋਕਸ੍ਸ ਸਦੇਵਕਸ੍ਸ, ਗਤਿਂ ਪਜਾਨਾਸਿ ਪਰਾਯਣਞ੍ਚ;

ਨ ਚਤ੍ਥਿ ਤੁਲ੍ਯੋ ਨਿਪੁਣਤ੍ਥਦਸ੍ਸੀ, ਤੁਵਞ੍ਹਿ ਬੁਦ੍ਧਂ ਪਵਰਂ ਵਦਨ੍ਤਿ.

੩੮੦. ‘‘ਸਬ੍ਬਂ ਤੁਵਂ ਞਾਣਮਵੇਚ੍ਚ ਧਮ੍ਮਂ, ਪਕਾਸੇਸਿ ਸਤ੍ਤੇ ਅਨੁਕਮ੍ਪਮਾਨੋ;

ਵਿਵਟ੍ਟਚ੍ਛਦੋਸਿ ਸਮਨ੍ਤਚਕ੍ਖੁ, ਵਿਰੋਚਸਿ ਵਿਮਲੋ ਸਬ੍ਬਲੋਕੇ.

੩੮੧. ‘‘ਆਗਞ੍ਛਿ ਤੇ ਸਨ੍ਤਿਕੇ ਨਾਗਰਾਜਾ, ਏਰਾਵਣੋ ਨਾਮ ਜਿਨੋਤਿ ਸੁਤ੍ਵਾ;

ਸੋਪਿ ਤਯਾ ਮਨ੍ਤਯਿਤ੍ਵਾਜ੍ਝਗਮਾ, ਸਾਧੂਤਿ ਸੁਤ੍ਵਾਨ ਪਤੀਤਰੂਪੋ.

੩੮੨. ‘‘ਰਾਜਾਪਿ ਤਂ ਵੇਸ੍ਸਵਣੋ ਕੁਵੇਰੋ, ਉਪੇਤਿ ਧਮ੍ਮਂ ਪਰਿਪੁਚ੍ਛਮਾਨੋ;

ਤਸ੍ਸਾਪਿ ਤ੍ਵਂ ਪੁਚ੍ਛਿਤੋ ਬ੍ਰੂਸਿ ਧੀਰ, ਸੋ ਚਾਪਿ ਸੁਤ੍ਵਾਨ ਪਤੀਤਰੂਪੋ.

੩੮੩. ‘‘ਯੇ ਕੇਚਿਮੇ ਤਿਤ੍ਥਿਯਾ ਵਾਦਸੀਲਾ, ਆਜੀਵਕਾ ਵਾ ਯਦਿ ਵਾ ਨਿਗਣ੍ਠਾ;

ਪਞ੍ਞਾਯ ਤਂ ਨਾਤਿਤਰਨ੍ਤਿ ਸਬ੍ਬੇ, ਠਿਤੋ ਵਜਨ੍ਤਂ ਵਿਯ ਸੀਘਗਾਮਿਂ.

੩੮੪. ‘‘ਯੇ ਕੇਚਿਮੇ ਬ੍ਰਾਹ੍ਮਣਾ ਵਾਦਸੀਲਾ, ਵੁਦ੍ਧਾ ਚਾਪਿ ਬ੍ਰਾਹ੍ਮਣਾ ਸਨ੍ਤਿ ਕੇਚਿ;

ਸਬ੍ਬੇ ਤਯਿ ਅਤ੍ਥਬਦ੍ਧਾ ਭਵਨ੍ਤਿ, ਯੇ ਚਾਪਿ ਅਞ੍ਞੇ ਵਾਦਿਨੋ ਮਞ੍ਞਮਾਨਾ.

੩੮੫. ‘‘ਅਯਞ੍ਹਿ ਧਮ੍ਮੋ ਨਿਪੁਣੋ ਸੁਖੋ ਚ, ਯੋਯਂ ਤਯਾ ਭਗਵਾ ਸੁਪ੍ਪਵੁਤ੍ਤੋ;

ਤਮੇਵ ਸਬ੍ਬੇਪਿ [ਸਬ੍ਬੇ ਮਯਂ (ਸ੍ਯਾ.)] ਸੁਸ੍ਸੂਸਮਾਨਾ, ਤਂ ਨੋ ਵਦ ਪੁਚ੍ਛਿਤੋ ਬੁਦ੍ਧਸੇਟ੍ਠ.

੩੮੬. ‘‘ਸਬ੍ਬੇਪਿ ਮੇ ਭਿਕ੍ਖਵੋ ਸਨ੍ਨਿਸਿਨ੍ਨਾ, ਉਪਾਸਕਾ ਚਾਪਿ ਤਥੇਵ ਸੋਤੁਂ;

ਸੁਣਨ੍ਤੁ ਧਮ੍ਮਂ ਵਿਮਲੇਨਾਨੁਬੁਦ੍ਧਂ, ਸੁਭਾਸਿਤਂ ਵਾਸਵਸ੍ਸੇਵ ਦੇਵਾ’’.

੩੮੭. ‘‘ਸੁਣਾਥ ਮੇ ਭਿਕ੍ਖਵੋ ਸਾਵਯਾਮਿ ਵੋ, ਧਮ੍ਮਂ ਧੁਤਂ ਤਞ੍ਚ ਚਰਾਥ ਸਬ੍ਬੇ;

ਇਰਿਯਾਪਥਂ ਪਬ੍ਬਜਿਤਾਨੁਲੋਮਿਕਂ, ਸੇਵੇਥ ਨਂ ਅਤ੍ਥਦਸੋ ਮੁਤੀਮਾ.

੩੮੮. ‘‘ਨੋ ਵੇ ਵਿਕਾਲੇ ਵਿਚਰੇਯ੍ਯ ਭਿਕ੍ਖੁ, ਗਾਮੇ ਚ ਪਿਣ੍ਡਾਯ ਚਰੇਯ੍ਯ ਕਾਲੇ;

ਅਕਾਲਚਾਰਿਞ੍ਹਿ ਸਜਨ੍ਤਿ ਸਙ੍ਗਾ, ਤਸ੍ਮਾ ਵਿਕਾਲੇ ਨ ਚਰਨ੍ਤਿ ਬੁਦ੍ਧਾ.

੩੮੯. ‘‘ਰੂਪਾ ਚ ਸਦ੍ਦਾ ਚ ਰਸਾ ਚ ਗਨ੍ਧਾ, ਫਸ੍ਸਾ ਚ ਯੇ ਸਮ੍ਮਦਯਨ੍ਤਿ ਸਤ੍ਤੇ;

ਏਤੇਸੁ ਧਮ੍ਮੇਸੁ ਵਿਨੇਯ੍ਯ ਛਨ੍ਦਂ, ਕਾਲੇਨ ਸੋ ਪਵਿਸੇ ਪਾਤਰਾਸਂ.

੩੯੦. ‘‘ਪਿਣ੍ਡਞ੍ਚ ਭਿਕ੍ਖੁ ਸਮਯੇਨ ਲਦ੍ਧਾ, ਏਕੋ ਪਟਿਕ੍ਕਮ੍ਮ ਰਹੋ ਨਿਸੀਦੇ;

ਅਜ੍ਝਤ੍ਤਚਿਨ੍ਤੀ ਨ ਮਨੋ ਬਹਿਦ੍ਧਾ, ਨਿਚ੍ਛਾਰਯੇ ਸਙ੍ਗਹਿਤਤ੍ਤਭਾਵੋ.

੩੯੧. ‘‘ਸਚੇਪਿ ਸੋ ਸਲ੍ਲਪੇ ਸਾਵਕੇਨ, ਅਞ੍ਞੇਨ ਵਾ ਕੇਨਚਿ ਭਿਕ੍ਖੁਨਾ ਵਾ;

ਧਮ੍ਮਂ ਪਣੀਤਂ ਤਮੁਦਾਹਰੇਯ੍ਯ, ਨ ਪੇਸੁਣਂ ਨੋਪਿ ਪਰੂਪਵਾਦਂ.

੩੯੨. ‘‘ਵਾਦਞ੍ਹਿ ਏਕੇ ਪਟਿਸੇਨਿਯਨ੍ਤਿ, ਨ ਤੇ ਪਸਂਸਾਮ ਪਰਿਤ੍ਤਪਞ੍ਞੇ;

ਤਤੋ ਤਤੋ ਨੇ ਪਸਜਨ੍ਤਿ ਸਙ੍ਗਾ, ਚਿਤ੍ਤਞ੍ਹਿ ਤੇ ਤਤ੍ਥ ਗਮੇਨ੍ਤਿ ਦੂਰੇ.

੩੯੩. ‘‘ਪਿਣ੍ਡਂ ਵਿਹਾਰਂ ਸਯਨਾਸਨਞ੍ਚ, ਆਪਞ੍ਚ ਸਙ੍ਘਾਟਿਰਜੂਪਵਾਹਨਂ;

ਸੁਤ੍ਵਾਨ ਧਮ੍ਮਂ ਸੁਗਤੇਨ ਦੇਸਿਤਂ, ਸਙ੍ਖਾਯ ਸੇਵੇ ਵਰਪਞ੍ਞਸਾਵਕੋ.

੩੯੪. ‘‘ਤਸ੍ਮਾ ਹਿ ਪਿਣ੍ਡੇ ਸਯਨਾਸਨੇ ਚ, ਆਪੇ ਚ ਸਙ੍ਘਾਟਿਰਜੂਪਵਾਹਨੇ;

ਏਤੇਸੁ ਧਮ੍ਮੇਸੁ ਅਨੂਪਲਿਤ੍ਤੋ, ਭਿਕ੍ਖੁ ਯਥਾ ਪੋਕ੍ਖਰੇ ਵਾਰਿਬਿਨ੍ਦੁ.

੩੯੫. ‘‘ਗਹਟ੍ਠਵਤ੍ਤਂ ਪਨ ਵੋ ਵਦਾਮਿ, ਯਥਾਕਰੋ ਸਾਵਕੋ ਸਾਧੁ ਹੋਤਿ;

ਨ ਹੇਸ [ਨ ਹੇਸੋ (ਸੀ.)] ਲਬ੍ਭਾ ਸਪਰਿਗ੍ਗਹੇਨ, ਫਸ੍ਸੇਤੁਂ ਯੋ ਕੇਵਲੋ ਭਿਕ੍ਖੁਧਮ੍ਮੋ.

੩੯੬. ‘‘ਪਾਣਂ ਨ ਹਨੇ [ਨ ਹਾਨੇ (ਸੀ.)] ਨ ਚ ਘਾਤਯੇਯ੍ਯ, ਨ ਚਾਨੁਜਞ੍ਞਾ ਹਨਤਂ ਪਰੇਸਂ;

ਸਬ੍ਬੇਸੁ ਭੂਤੇਸੁ ਨਿਧਾਯ ਦਣ੍ਡਂ, ਯੇ ਥਾਵਰਾ ਯੇ ਚ ਤਸਾ ਸਨ੍ਤਿ [ਤਸਨ੍ਤਿ (ਸੀ. ਪੀ.)] ਲੋਕੇ.

੩੯੭. ‘‘ਤਤੋ ਅਦਿਨ੍ਨਂ ਪਰਿਵਜ੍ਜਯੇਯ੍ਯ, ਕਿਞ੍ਚਿ ਕ੍ਵਚਿ ਸਾਵਕੋ ਬੁਜ੍ਝਮਾਨੋ;

ਨ ਹਾਰਯੇ ਹਰਤਂ ਨਾਨੁਜਞ੍ਞਾ, ਸਬ੍ਬਂ ਅਦਿਨ੍ਨਂ ਪਰਿਵਜ੍ਜਯੇਯ੍ਯ.

੩੯੮. ‘‘ਅਬ੍ਰਹ੍ਮਚਰਿਯਂ ਪਰਿਵਜ੍ਜਯੇਯ੍ਯ, ਅਙ੍ਗਾਰਕਾਸੁਂ ਜਲਿਤਂਵ ਵਿਞ੍ਞੂ;

ਅਸਮ੍ਭੁਣਨ੍ਤੋ ਪਨ ਬ੍ਰਹ੍ਮਚਰਿਯਂ, ਪਰਸ੍ਸ ਦਾਰਂ ਨ ਅਤਿਕ੍ਕਮੇਯ੍ਯ.

੩੯੯. ‘‘ਸਭਗ੍ਗਤੋ ਵਾ ਪਰਿਸਗ੍ਗਤੋ ਵਾ, ਏਕਸ੍ਸ ਵੇਕੋ [ਚੇਤੋ (ਸੀ. ਸ੍ਯਾ.)] ਨ ਮੁਸਾ ਭਣੇਯ੍ਯ;

ਨ ਭਾਣਯੇ ਭਣਤਂ ਨਾਨੁਜਞ੍ਞਾ, ਸਬ੍ਬਂ ਅਭੂਤਂ ਪਰਿਵਜ੍ਜਯੇਯ੍ਯ.

੪੦੦. ‘‘ਮਜ੍ਜਞ੍ਚ ਪਾਨਂ ਨ ਸਮਾਚਰੇਯ੍ਯ, ਧਮ੍ਮਂ ਇਮਂ ਰੋਚਯੇ ਯੋ ਗਹਟ੍ਠੋ;

ਨ ਪਾਯਯੇ ਪਿਵਤਂ ਨਾਨੁਜਞ੍ਞਾ, ਉਮ੍ਮਾਦਨਨ੍ਤਂ ਇਤਿ ਨਂ ਵਿਦਿਤ੍ਵਾ.

੪੦੧. ‘‘ਮਦਾ ਹਿ ਪਾਪਾਨਿ ਕਰੋਨ੍ਤਿ ਬਾਲਾ, ਕਾਰੇਨ੍ਤਿ ਚਞ੍ਞੇਪਿ ਜਨੇ ਪਮਤ੍ਤੇ;

ਏਤਂ ਅਪੁਞ੍ਞਾਯਤਨਂ ਵਿਵਜ੍ਜਯੇ, ਉਮ੍ਮਾਦਨਂ ਮੋਹਨਂ ਬਾਲਕਨ੍ਤਂ.

੪੦੨. ‘‘ਪਾਣਂ ਨ ਹਨੇ ਨ ਚਾਦਿਨ੍ਨਮਾਦਿਯੇ, ਮੁਸਾ ਨ ਭਾਸੇ ਨ ਚ ਮਜ੍ਜਪੋ ਸਿਯਾ;

ਅਬ੍ਰਹ੍ਮਚਰਿਯਾ ਵਿਰਮੇਯ੍ਯ ਮੇਥੁਨਾ, ਰਤ੍ਤਿਂ ਨ ਭੁਞ੍ਜੇਯ੍ਯ ਵਿਕਾਲਭੋਜਨਂ.

੪੦੩. ‘‘ਮਾਲਂ ਨ ਧਾਰੇ ਨ ਚ ਗਨ੍ਧਮਾਚਰੇ, ਮਞ੍ਚੇ ਛਮਾਯਂ ਵ ਸਯੇਥ ਸਨ੍ਥਤੇ;

ਏਤਞ੍ਹਿ ਅਟ੍ਠਙ੍ਗਿਕਮਾਹੁਪੋਸਥਂ, ਬੁਦ੍ਧੇਨ ਦੁਕ੍ਖਨ੍ਤਗੁਨਾ ਪਕਾਸਿਤਂ.

੪੦੪. ‘‘ਤਤੋ ਚ ਪਕ੍ਖਸ੍ਸੁਪਵਸ੍ਸੁਪੋਸਥਂ, ਚਾਤੁਦ੍ਦਸਿਂ ਪਞ੍ਚਦਸਿਞ੍ਚ ਅਟ੍ਠਮਿਂ;

ਪਾਟਿਹਾਰਿਯਪਕ੍ਖਞ੍ਚ ਪਸਨ੍ਨਮਾਨਸੋ, ਅਟ੍ਠਙ੍ਗੁਪੇਤਂ ਸੁਸਮਤ੍ਤਰੂਪਂ.

੪੦੫. ‘‘ਤਤੋ ਚ ਪਾਤੋ ਉਪਵੁਤ੍ਥੁਪੋਸਥੋ, ਅਨ੍ਨੇਨ ਪਾਨੇਨ ਚ ਭਿਕ੍ਖੁਸਙ੍ਘਂ;

ਪਸਨ੍ਨਚਿਤ੍ਤੋ ਅਨੁਮੋਦਮਾਨੋ, ਯਥਾਰਹਂ ਸਂਵਿਭਜੇਥ ਵਿਞ੍ਞੂ.

੪੦੬. ‘‘ਧਮ੍ਮੇਨ ਮਾਤਾਪਿਤਰੋ ਭਰੇਯ੍ਯ, ਪਯੋਜਯੇ ਧਮ੍ਮਿਕਂ ਸੋ ਵਣਿਜ੍ਜਂ;

ਏਤਂ ਗਿਹੀ ਵਤ੍ਤਯਮਪ੍ਪਮਤ੍ਤੋ, ਸਯਮ੍ਪਭੇ ਨਾਮ ਉਪੇਤਿ ਦੇਵੇ’’ਤਿ.

ਧਮ੍ਮਿਕਸੁਤ੍ਤਂ ਚੁਦ੍ਦਸਮਂ ਨਿਟ੍ਠਿਤਂ.

ਚੂਲ਼ਵਗ੍ਗੋ ਦੁਤਿਯੋ ਨਿਟ੍ਠਿਤੋ.