੧੩. ਸਮ੍ਮਾਪਰਿਬ੍ਬਾਜਨੀਯਸੁਤ੍ਤਂ

੩੬੧. ‘‘ਪੁਚ੍ਛਾਮਿ ਮੁਨਿਂ ਪਹੂਤਪਞ੍ਞਂ,

ਤਿਣ੍ਣਂ ਪਾਰਙ੍ਗਤਂ ਪਰਿਨਿਬ੍ਬੁਤਂ ਠਿਤਤ੍ਤਂ;

ਨਿਕ੍ਖਮ੍ਮ ਘਰਾ ਪਨੁਜ੍ਜ ਕਾਮੇ, ਕਥਂ ਭਿਕ੍ਖੁ

ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ’’.

੩੬੨. ‘‘ਯਸ੍ਸ ਮਙ੍ਗਲਾ ਸਮੂਹਤਾ, (ਇਤਿ ਭਗਵਾ)

ਉਪ੍ਪਾਤਾ ਸੁਪਿਨਾ ਚ ਲਕ੍ਖਣਾ ਚ;

ਸੋ ਮਙ੍ਗਲਦੋਸਵਿਪ੍ਪਹੀਨੋ,

ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ.

੩੬੩. ‘‘ਰਾਗਂ ਵਿਨਯੇਥ ਮਾਨੁਸੇਸੁ, ਦਿਬ੍ਬੇਸੁ ਕਾਮੇਸੁ ਚਾਪਿ ਭਿਕ੍ਖੁ;

ਅਤਿਕ੍ਕਮ੍ਮ ਭਵਂ ਸਮੇਚ੍ਚ ਧਮ੍ਮਂ, ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ.

੩੬੪. ‘‘ਵਿਪਿਟ੍ਠਿਕਤ੍ਵਾਨ ਪੇਸੁਣਾਨਿ, ਕੋਧਂ ਕਦਰਿਯਂ ਜਹੇਯ੍ਯ ਭਿਕ੍ਖੁ;

ਅਨੁਰੋਧਵਿਰੋਧਵਿਪ੍ਪਹੀਨੋ, ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ.

੩੬੫. ‘‘ਹਿਤ੍ਵਾਨ ਪਿਯਞ੍ਚ ਅਪ੍ਪਿਯਞ੍ਚ, ਅਨੁਪਾਦਾਯ ਅਨਿਸ੍ਸਿਤੋ ਕੁਹਿਞ੍ਚਿ;

ਸਂਯੋਜਨਿਯੇਹਿ ਵਿਪ੍ਪਮੁਤ੍ਤੋ, ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ.

੩੬੬. ‘‘ਨ ਸੋ ਉਪਧੀਸੁ ਸਾਰਮੇਤਿ, ਆਦਾਨੇਸੁ ਵਿਨੇਯ੍ਯ ਛਨ੍ਦਰਾਗਂ;

ਸੋ ਅਨਿਸ੍ਸਿਤੋ ਅਨਞ੍ਞਨੇਯ੍ਯੋ, ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ.

੩੬੭. ‘‘ਵਚਸਾ ਮਨਸਾ ਚ ਕਮ੍ਮੁਨਾ ਚ, ਅਵਿਰੁਦ੍ਧੋ ਸਮ੍ਮਾ ਵਿਦਿਤ੍ਵਾ ਧਮ੍ਮਂ;

ਨਿਬ੍ਬਾਨਪਦਾਭਿਪਤ੍ਥਯਾਨੋ, ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ.

੩੬੮. ‘‘ਯੋ ਵਨ੍ਦਤਿ ਮਨ੍ਤਿ ਨੁਣ੍ਣਮੇਯ੍ਯ [ਨੁਨ੍ਨਮੇਯ੍ਯ (?)], ਅਕ੍ਕੁਟ੍ਠੋਪਿ ਨ ਸਨ੍ਧਿਯੇਥ ਭਿਕ੍ਖੁ;

ਲਦ੍ਧਾ ਪਰਭੋਜਨਂ ਨ ਮਜ੍ਜੇ, ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ.

੩੬੯. ‘‘ਲੋਭਞ੍ਚ ਭਵਞ੍ਚ ਵਿਪ੍ਪਹਾਯ, ਵਿਰਤੋ ਛੇਦਨਬਨ੍ਧਨਾ ਚ [ਛੇਦਨਬਨ੍ਧਨਤੋ (ਸੀ. ਸ੍ਯਾ.)] ਭਿਕ੍ਖੁ;

ਸੋ ਤਿਣ੍ਣਕਥਂਕਥੋ ਵਿਸਲ੍ਲੋ, ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ.

੩੭੦. ‘‘ਸਾਰੁਪ੍ਪਂ ਅਤ੍ਤਨੋ ਵਿਦਿਤ੍ਵਾ, ਨੋ ਚ ਭਿਕ੍ਖੁ ਹਿਂਸੇਯ੍ਯ ਕਞ੍ਚਿ ਲੋਕੇ;

ਯਥਾ ਤਥਿਯਂ ਵਿਦਿਤ੍ਵਾ ਧਮ੍ਮਂ, ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ.

੩੭੧. ‘‘ਯਸ੍ਸਾਨੁਸਯਾ ਨ ਸਨ੍ਤਿ ਕੇਚਿ, ਮੂਲਾ ਚ [ਮੂਲਾ (ਸੀ. ਸ੍ਯਾ.)] ਅਕੁਸਲਾ ਸਮੂਹਤਾਸੇ;

ਸੋ ਨਿਰਾਸੋ [ਨਿਰਾਸਯੋ (ਸੀ.), ਨਿਰਾਸਸੋ (ਸ੍ਯਾ.)] ਅਨਾਸਿਸਾਨੋ [ਅਨਾਸਯਾਨੋ (ਸੀ. ਪੀ.), ਅਨਾਸਸਾਨੋ (ਸ੍ਯਾ.)], ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ.

੩੭੨. ‘‘ਆਸਵਖੀਣੋ ਪਹੀਨਮਾਨੋ, ਸਬ੍ਬਂ ਰਾਗਪਥਂ ਉਪਾਤਿਵਤ੍ਤੋ;

ਦਨ੍ਤੋ ਪਰਿਨਿਬ੍ਬੁਤੋ ਠਿਤਤ੍ਤੋ, ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ.

੩੭੩. ‘‘ਸਦ੍ਧੋ ਸੁਤਵਾ ਨਿਯਾਮਦਸ੍ਸੀ, ਵਗ੍ਗਗਤੇਸੁ ਨ ਵਗ੍ਗਸਾਰਿ ਧੀਰੋ;

ਲੋਭਂ ਦੋਸਂ ਵਿਨੇਯ੍ਯ ਪਟਿਘਂ, ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ.

੩੭੪. ‘‘ਸਂਸੁਦ੍ਧਜਿਨੋ ਵਿਵਟ੍ਟਚ੍ਛਦੋ, ਧਮ੍ਮੇਸੁ ਵਸੀ ਪਾਰਗੂ ਅਨੇਜੋ;

ਸਙ੍ਖਾਰਨਿਰੋਧਞਾਣਕੁਸਲੋ, ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ.

੩੭੫. ‘‘ਅਤੀਤੇਸੁ ਅਨਾਗਤੇਸੁ ਚਾਪਿ, ਕਪ੍ਪਾਤੀਤੋ ਅਤਿਚ੍ਚਸੁਦ੍ਧਿਪਞ੍ਞੋ;

ਸਬ੍ਬਾਯਤਨੇਹਿ ਵਿਪ੍ਪਮੁਤ੍ਤੋ, ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ.

੩੭੬. ‘‘ਅਞ੍ਞਾਯ ਪਦਂ ਸਮੇਚ੍ਚ ਧਮ੍ਮਂ, ਵਿਵਟਂ ਦਿਸ੍ਵਾਨ ਪਹਾਨਮਾਸਵਾਨਂ;

ਸਬ੍ਬੁਪਧੀਨਂ ਪਰਿਕ੍ਖਯਾਨੋ [ਪਰਿਕ੍ਖਯਾ (ਪੀ.)], ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯ’’.

੩੭੭. ‘‘ਅਦ੍ਧਾ ਹਿ ਭਗਵਾ ਤਥੇਵ ਏਤਂ, ਯੋ ਸੋ ਏਵਂਵਿਹਾਰੀ ਦਨ੍ਤੋ ਭਿਕ੍ਖੁ;

ਸਬ੍ਬਸਂਯੋਜਨਯੋਗਵੀਤਿਵਤ੍ਤੋ [ਸਬ੍ਬਸਂਯੋਜਨਿਯੇ ਚ ਵੀਤਿਵਤ੍ਤੋ (ਸੀ. ਸ੍ਯਾ. ਪੀ.)], ਸਮ੍ਮਾ ਸੋ ਲੋਕੇ ਪਰਿਬ੍ਬਜੇਯ੍ਯਾ’’ਤਿ.

ਸਮ੍ਮਾਪਰਿਬ੍ਬਾਜਨੀਯਸੁਤ੍ਤਂ ਤੇਰਸਮਂ ਨਿਟ੍ਠਿਤਂ.