੬. ਪਰਾਭਵਸੁਤ੍ਤਂ

ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਅਞ੍ਞਤਰਾ ਦੇਵਤਾ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

੯੧. ‘‘ਪਰਾਭਵਨ੍ਤਂ ਪੁਰਿਸਂ, ਮਯਂ ਪੁਚ੍ਛਾਮ ਗੋਤਮ [ਗੋਤਮਂ (ਸੀ. ਸ੍ਯਾ.)];

ਭਗਵਨ੍ਤਂ [ਭਵਨ੍ਤਂ (ਸ੍ਯਾ. ਕ.)] ਪੁਟ੍ਠੁਮਾਗਮ੍ਮ, ਕਿਂ ਪਰਾਭਵਤੋ ਮੁਖਂ’’.

੯੨. ‘‘ਸੁਵਿਜਾਨੋ ਭਵਂ ਹੋਤਿ, ਸੁਵਿਜਾਨੋ [ਦੁਵਿਜਾਨੋ (ਸ੍ਯਾ. ਕ.)] ਪਰਾਭਵੋ;

ਧਮ੍ਮਕਾਮੋ ਭਵਂ ਹੋਤਿ, ਧਮ੍ਮਦੇਸ੍ਸੀ ਪਰਾਭਵੋ’’.

੯੩. ‘‘ਇਤਿ ਹੇਤਂ ਵਿਜਾਨਾਮ, ਪਠਮੋ ਸੋ ਪਰਾਭਵੋ;

ਦੁਤਿਯਂ ਭਗਵਾ ਬ੍ਰੂਹਿ, ਕਿਂ ਪਰਾਭਵਤੋ ਮੁਖਂ’’.

੯੪. ‘‘ਅਸਨ੍ਤਸ੍ਸ ਪਿਯਾ ਹੋਨ੍ਤਿ, ਸਨ੍ਤੇ ਨ ਕੁਰੁਤੇ ਪਿਯਂ;

ਅਸਤਂ ਧਮ੍ਮਂ ਰੋਚੇਤਿ, ਤਂ ਪਰਾਭਵਤੋ ਮੁਖਂ’’.

੯੫. ‘‘ਇਤਿ ਹੇਤਂ ਵਿਜਾਨਾਮ, ਦੁਤਿਯੋ ਸੋ ਪਰਾਭਵੋ;

ਤਤਿਯਂ ਭਗਵਾ ਬ੍ਰੂਹਿ, ਕਿਂ ਪਰਾਭਵਤੋ ਮੁਖਂ’’.

੯੬. ‘‘ਨਿਦ੍ਦਾਸੀਲੀ ਸਭਾਸੀਲੀ, ਅਨੁਟ੍ਠਾਤਾ ਚ ਯੋ ਨਰੋ;

ਅਲਸੋ ਕੋਧਪਞ੍ਞਾਣੋ, ਤਂ ਪਰਾਭਵਤੋ ਮੁਖਂ’’.

੯੭. ‘‘ਇਤਿ ਹੇਤਂ ਵਿਜਾਨਾਮ, ਤਤਿਯੋ ਸੋ ਪਰਾਭਵੋ;

ਚਤੁਤ੍ਥਂ ਭਗਵਾ ਬ੍ਰੂਹਿ, ਕਿਂ ਪਰਾਭਵਤੋ ਮੁਖਂ’’.

੯੮. ‘‘ਯੋ ਮਾਤਰਂ [ਯੋ ਮਾਤਰਂ ਵਾ (ਸੀ. ਸ੍ਯਾ. ਕਂ. ਪੀ.)] ਪਿਤਰਂ ਵਾ, ਜਿਣ੍ਣਕਂ ਗਤਯੋਬ੍ਬਨਂ;

ਪਹੁ ਸਨ੍ਤੋ ਨ ਭਰਤਿ, ਤਂ ਪਰਾਭਵਤੋ ਮੁਖਂ’’.

੯੯. ‘‘ਇਤਿ ਹੇਤਂ ਵਿਜਾਨਾਮ, ਚਤੁਤ੍ਥੋ ਸੋ ਪਰਾਭਵੋ;

ਪਞ੍ਚਮਂ ਭਗਵਾ ਬ੍ਰੂਹਿ, ਕਿਂ ਪਰਾਭਵਤੋ ਮੁਖਂ’’.

੧੦੦. ‘‘ਯੋ ਬ੍ਰਾਹ੍ਮਣਂ [ਯੋ ਬ੍ਰਾਹ੍ਮਣਂ ਵਾ (ਸੀ. ਸ੍ਯਾ. ਕਂ. ਪੀ.)] ਸਮਣਂ ਵਾ, ਅਞ੍ਞਂ ਵਾਪਿ ਵਨਿਬ੍ਬਕਂ;

ਮੁਸਾਵਾਦੇਨ ਵਞ੍ਚੇਤਿ, ਤਂ ਪਰਾਭਵਤੋ ਮੁਖਂ’’.

੧੦੧. ‘‘ਇਤਿ ਹੇਤਂ ਵਿਜਾਨਾਮ, ਪਞ੍ਚਮੋ ਸੋ ਪਰਾਭਵੋ;

ਛਟ੍ਠਮਂ ਭਗਵਾ ਬ੍ਰੂਹਿ, ਕਿਂ ਪਰਾਭਵਤੋ ਮੁਖਂ’’.

੧੦੨. ‘‘ਪਹੂਤਵਿਤ੍ਤੋ ਪੁਰਿਸੋ, ਸਹਿਰਞ੍ਞੋ ਸਭੋਜਨੋ;

ਏਕੋ ਭੁਞ੍ਜਤਿ ਸਾਦੂਨਿ, ਤਂ ਪਰਾਭਵਤੋ ਮੁਖਂ’’.

੧੦੩. ‘‘ਇਤਿ ਹੇਤਂ ਵਿਜਾਨਾਮ, ਛਟ੍ਠਮੋ ਸੋ ਪਰਾਭਵੋ;

ਸਤ੍ਤਮਂ ਭਗਵਾ ਬ੍ਰੂਹਿ, ਕਿਂ ਪਰਾਭਵਤੋ ਮੁਖਂ’’.

੧੦੪. ‘‘ਜਾਤਿਤ੍ਥਦ੍ਧੋ ਧਨਤ੍ਥਦ੍ਧੋ, ਗੋਤ੍ਤਤ੍ਥਦ੍ਧੋ ਚ ਯੋ ਨਰੋ;

ਸਞ੍ਞਾਤਿਂ ਅਤਿਮਞ੍ਞੇਤਿ, ਤਂ ਪਰਾਭਵਤੋ ਮੁਖਂ’’.

੧੦੫. ‘‘ਇਤਿ ਹੇਤਂ ਵਿਜਾਨਾਮ, ਸਤ੍ਤਮੋ ਸੋ ਪਰਾਭਵੋ;

ਅਟ੍ਠਮਂ ਭਗਵਾ ਬ੍ਰੂਹਿ, ਕਿਂ ਪਰਾਭਵਤੋ ਮੁਖਂ’’.

੧੦੬. ‘‘ਇਤ੍ਥਿਧੁਤ੍ਤੋ ਸੁਰਾਧੁਤ੍ਤੋ, ਅਕ੍ਖਧੁਤ੍ਤੋ ਚ ਯੋ ਨਰੋ;

ਲਦ੍ਧਂ ਲਦ੍ਧਂ ਵਿਨਾਸੇਤਿ, ਤਂ ਪਰਾਭਵਤੋ ਮੁਖਂ’’.

੧੦੭. ‘‘ਇਤਿ ਹੇਤਂ ਵਿਜਾਨਾਮ, ਅਟ੍ਠਮੋ ਸੋ ਪਰਾਭਵੋ;

ਨਵਮਂ ਭਗਵਾ ਬ੍ਰੂਹਿ, ਕਿਂ ਪਰਾਭਵਤੋ ਮੁਖਂ’’.

੧੦੮. ‘‘ਸੇਹਿ ਦਾਰੇਹਿ ਅਸਨ੍ਤੁਟ੍ਠੋ [ਦਾਰੇਹ੍ਯਸਨ੍ਤੁਟ੍ਠੋ (ਕ.)], ਵੇਸਿਯਾਸੁ ਪਦੁਸ੍ਸਤਿ [ਪਦਿਸ੍ਸਤਿ (ਸੀ.)];

ਦੁਸ੍ਸਤਿ [ਦਿਸ੍ਸਤਿ (ਸੀ. ਪੀ.)] ਪਰਦਾਰੇਸੁ, ਤਂ ਪਰਾਭਵਤੋ ਮੁਖਂ’’.

੧੦੯. ‘‘ਇਤਿ ਹੇਤਂ ਵਿਜਾਨਾਮ, ਨਵਮੋ ਸੋ ਪਰਾਭਵੋ;

ਦਸਮਂ ਭਗਵਾ ਬ੍ਰੂਹਿ, ਕਿਂ ਪਰਾਭਵਤੋ ਮੁਖਂ’’.

੧੧੦. ‘‘ਅਤੀਤਯੋਬ੍ਬਨੋ ਪੋਸੋ, ਆਨੇਤਿ ਤਿਮ੍ਬਰੁਤ੍ਥਨਿਂ;

ਤਸ੍ਸਾ ਇਸ੍ਸਾ ਨ ਸੁਪਤਿ, ਤਂ ਪਰਾਭਵਤੋ ਮੁਖਂ’’.

੧੧੧. ‘‘ਇਤਿ ਹੇਤਂ ਵਿਜਾਨਾਮ, ਦਸਮੋ ਸੋ ਪਰਾਭਵੋ;

ਏਕਾਦਸਮਂ ਭਗਵਾ ਬ੍ਰੂਹਿ, ਕਿਂ ਪਰਾਭਵਤੋ ਮੁਖਂ’’.

੧੧੨. ‘‘ਇਤ੍ਥਿਂ ਸੋਣ੍ਡਿਂ ਵਿਕਿਰਣਿਂ, ਪੁਰਿਸਂ ਵਾਪਿ ਤਾਦਿਸਂ;

ਇਸ੍ਸਰਿਯਸ੍ਮਿਂ ਠਪੇਤਿ [ਠਾਪੇਤਿ (ਸੀ. ਪੀ.), ਥਪੇਤਿ (ਕ.)], ਤਂ ਪਰਾਭਵਤੋ ਮੁਖਂ’’.

੧੧੩. ‘‘ਇਤਿ ਹੇਤਂ ਵਿਜਾਨਾਮ, ਏਕਾਦਸਮੋ ਸੋ ਪਰਾਭਵੋ;

ਦ੍ਵਾਦਸਮਂ ਭਗਵਾ ਬ੍ਰੂਹਿ, ਕਿਂ ਪਰਾਭਵਤੋ ਮੁਖਂ’’.

੧੧੪. ‘‘ਅਪ੍ਪਭੋਗੋ ਮਹਾਤਣ੍ਹੋ, ਖਤ੍ਤਿਯੇ ਜਾਯਤੇ ਕੁਲੇ;

ਸੋ ਚ ਰਜ੍ਜਂ ਪਤ੍ਥਯਤਿ, ਤਂ ਪਰਾਭਵਤੋ ਮੁਖਂ’’.

੧੧੫. ‘‘ਏਤੇ ਪਰਾਭਵੇ ਲੋਕੇ, ਪਣ੍ਡਿਤੋ ਸਮਵੇਕ੍ਖਿਯ;

ਅਰਿਯੋ ਦਸ੍ਸਨਸਮ੍ਪਨ੍ਨੋ, ਸ ਲੋਕਂ ਭਜਤੇ ਸਿਵ’’ਨ੍ਤਿ.

ਪਰਾਭਵਸੁਤ੍ਤਂ ਛਟ੍ਠਂ ਨਿਟ੍ਠਿਤਂ.