੧. ਉਰਗਵਗ੍ਗੋ
੧. ਉਰਗਸੁਤ੍ਤਂ
੧. ਯੋ [ਯੋ ਵੇ (ਸ੍ਯਾ.)] ਉਪ੍ਪਤਿਤਂ ਵਿਨੇਤਿ ਕੋਧਂ, ਵਿਸਟਂ ਸਪ੍ਪਵਿਸਂਵ ਓਸਧੇਹਿ [ਓਸਧੇਭਿ (ਕ.)];
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ [ਜਿਣ੍ਣਮਿਵ ਤਚਂ (ਸੀ. ਸ੍ਯਾ. ਕਂ. ਪੀ.), ਜਿਣ੍ਣਮਿਵਾ ਤਚਂ (?)] ਪੁਰਾਣਂ.
੨. ਯੋ ਰਾਗਮੁਦਚ੍ਛਿਦਾ ਅਸੇਸਂ, ਭਿਸਪੁਪ੍ਫਂਵ ਸਰੋਰੁਹਂ [ਸਰੇਰੁਹਂ (ਕ.)] ਵਿਗਯ੍ਹ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ, ਪੁਰਾਣਂ.
੩. ਯੋ ਤਣ੍ਹਮੁਦਚ੍ਛਿਦਾ ਅਸੇਸਂ, ਸਰਿਤਂ ਸੀਘਸਰਂ ਵਿਸੋਸਯਿਤ੍ਵਾ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣਂ.
੪. ਯੋ ਮਾਨਮੁਦਬ੍ਬਧੀ ਅਸੇਸਂ, ਨਲ਼ਸੇਤੁਂਵ ਸੁਦੁਬ੍ਬਲਂ ਮਹੋਘੋ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣਂ.
੫. ਯੋ ਨਾਜ੍ਝਗਮਾ ਭਵੇਸੁ ਸਾਰਂ, ਵਿਚਿਨਂ ਪੁਪ੍ਫਮਿਵ [ਪੁਪ੍ਫਮਿਵ (ਬਹੂਸੁ)] ਉਦੁਮ੍ਬਰੇਸੁ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣਂ.
੬. ਯਸ੍ਸਨ੍ਤਰਤੋ ਨ ਸਨ੍ਤਿ ਕੋਪਾ, ਇਤਿਭਵਾਭਵਤਞ੍ਚ [ਇਤਿਬ੍ਭਵਾਭਵਤਞ੍ਚ (ਕ.)] ਵੀਤਿਵਤ੍ਤੋ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣਂ.
੭. ਯਸ੍ਸ ਵਿਤਕ੍ਕਾ ਵਿਧੂਪਿਤਾ, ਅਜ੍ਝਤ੍ਤਂ ਸੁਵਿਕਪ੍ਪਿਤਾ ਅਸੇਸਾ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣਂ.
੮. ਯੋ ਨਾਚ੍ਚਸਾਰੀ ਨ ਪਚ੍ਚਸਾਰੀ, ਸਬ੍ਬਂ ਅਚ੍ਚਗਮਾ ਇਮਂ ਪਪਞ੍ਚਂ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣਂ.
੯. ਯੋ ਨਾਚ੍ਚਸਾਰੀ ਨ ਪਚ੍ਚਸਾਰੀ, ਸਬ੍ਬਂ ਵਿਤਥਮਿਦਨ੍ਤਿ ਞਤ੍ਵਾ [ਉਤ੍ਵਾ (ਸ੍ਯਾ. ਪੀ. ਕ.)] ਲੋਕੇ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣਂ.
੧੦. ਯੋ ਨਾਚ੍ਚਸਾਰੀ ਨ ਪਚ੍ਚਸਾਰੀ, ਸਬ੍ਬਂ ਵਿਤਥਮਿਦਨ੍ਤਿ ਵੀਤਲੋਭੋ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣਂ.
੧੧. ਯੋ ਨਾਚ੍ਚਸਾਰੀ ਨ ਪਚ੍ਚਸਾਰੀ, ਸਬ੍ਬਂ ਵਿਤਥਮਿਦਨ੍ਤਿ ਵੀਤਰਾਗੋ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣਂ.
੧੨. ਯੋ ਨਾਚ੍ਚਸਾਰੀ ਨ ਪਚ੍ਚਸਾਰੀ, ਸਬ੍ਬਂ ਵਿਤਥਮਿਦਨ੍ਤਿ ਵੀਤਦੋਸੋ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣਂ.
੧੩. ਯੋ ਨਾਚ੍ਚਸਾਰੀ ਨ ਪਚ੍ਚਸਾਰੀ, ਸਬ੍ਬਂ ਵਿਤਥਮਿਦਨ੍ਤਿ ਵੀਤਮੋਹੋ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣਂ.
੧੪. ਯਸ੍ਸਾਨੁਸਯਾ ਨ ਸਨ੍ਤਿ ਕੇਚਿ, ਮੂਲਾ ਚ ਅਕੁਸਲਾ ਸਮੂਹਤਾਸੇ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣਂ.
੧੫. ਯਸ੍ਸ ਦਰਥਜਾ ਨ ਸਨ੍ਤਿ ਕੇਚਿ, ਓਰਂ ਆਗਮਨਾਯ ਪਚ੍ਚਯਾਸੇ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣਂ.
੧੬. ਯਸ੍ਸ ਵਨਥਜਾ ਨ ਸਨ੍ਤਿ ਕੇਚਿ, ਵਿਨਿਬਨ੍ਧਾਯ ਭਵਾਯ ਹੇਤੁਕਪ੍ਪਾ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣਂ.
੧੭. ਯੋ ਨੀਵਰਣੇ ਪਹਾਯ ਪਞ੍ਚ, ਅਨਿਘੋ ਤਿਣ੍ਣਕਥਂਕਥੋ ਵਿਸਲ੍ਲੋ;
ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣਂ.
ਉਰਗਸੁਤ੍ਤਂ ਪਠਮਂ ਨਿਟ੍ਠਿਤਂ.
੨. ਧਨਿਯਸੁਤ੍ਤਂ
੧੮. ‘‘ਪਕ੍ਕੋਦਨੋ ਦੁਦ੍ਧਖੀਰੋਹਮਸ੍ਮਿ, (ਇਤਿ ਧਨਿਯੋ ਗੋਪੋ)
ਅਨੁਤੀਰੇ ਮਹਿਯਾ ਸਮਾਨਵਾਸੋ;
ਛਨ੍ਨਾ ਕੁਟਿ ਆਹਿਤੋ ਗਿਨਿ, ਅਥ ਚੇ ਪਤ੍ਥਯਸੀ ਪਵਸ੍ਸ ਦੇਵ’’.
੧੯. ‘‘ਅਕ੍ਕੋਧਨੋ ਵਿਗਤਖਿਲੋਹਮਸ੍ਮਿ [ਵਿਗਤਖੀਲੋਹਮਸ੍ਮਿ (ਸੀ. ਪੀ.)], (ਇਤਿ ਭਗਵਾ)
ਅਨੁਤੀਰੇ ਮਹਿਯੇਕਰਤ੍ਤਿਵਾਸੋ;
ਵਿਵਟਾ ਕੁਟਿ ਨਿਬ੍ਬੁਤੋ ਗਿਨਿ, ਅਥ ਚੇ ਪਤ੍ਥਯਸੀ ਪਵਸ੍ਸ ਦੇਵ’’.
੨੦. ‘‘ਅਨ੍ਧਕਮਕਸਾ ਨ ਵਿਜ੍ਜਰੇ, (ਇਤਿ ਧਨਿਯੋ ਗੋਪੋ)
ਕਚ੍ਛੇ ਰੂਲ਼੍ਹਤਿਣੇ ਚਰਨ੍ਤਿ ਗਾਵੋ;
ਵੁਟ੍ਠਿਮ੍ਪਿ ਸਹੇਯ੍ਯੁਮਾਗਤਂ, ਅਥ ਚੇ ਪਤ੍ਥਯਸੀ ਪਵਸ੍ਸ ਦੇਵ’’.
੨੧. ‘‘ਬਦ੍ਧਾਸਿ ਭਿਸੀ ਸੁਸਙ੍ਖਤਾ, (ਇਤਿ ਭਗਵਾ)
ਤਿਣ੍ਣੋ ਪਾਰਗਤੋ ਵਿਨੇਯ੍ਯ ਓਘਂ;
ਅਤ੍ਥੋ ਭਿਸਿਯਾ ਨ ਵਿਜ੍ਜਤਿ, ਅਥ ਚੇ ਪਤ੍ਥਯਸੀ ਪਵਸ੍ਸ ਦੇਵ’’.
੨੨. ‘‘ਗੋਪੀ ਮਮ ਅਸ੍ਸਵਾ ਅਲੋਲਾ, (ਇਤਿ ਧਨਿਯੋ ਗੋਪੋ)
ਦੀਘਰਤ੍ਤਂ [ਦੀਘਰਤ੍ਤ (ਕ.)] ਸਂਵਾਸਿਯਾ ਮਨਾਪਾ;
ਤਸ੍ਸਾ ਨ ਸੁਣਾਮਿ ਕਿਞ੍ਚਿ ਪਾਪਂ, ਅਥ ਚੇ ਪਤ੍ਥਯਸੀ ਪਵਸ੍ਸ ਦੇਵ’’.
੨੩. ‘‘ਚਿਤ੍ਤਂ ਮਮ ਅਸ੍ਸਵਂ ਵਿਮੁਤ੍ਤਂ, (ਇਤਿ ਭਗਵਾ)
ਦੀਘਰਤ੍ਤਂ ਪਰਿਭਾਵਿਤਂ ਸੁਦਨ੍ਤਂ;
ਪਾਪਂ ਪਨ ਮੇ ਨ ਵਿਜ੍ਜਤਿ, ਅਥ ਚੇ ਪਤ੍ਥਯਸੀ ਪਵਸ੍ਸ ਦੇਵ’’.
੨੪. ‘‘ਅਤ੍ਤਵੇਤਨਭਤੋਹਮਸ੍ਮਿ, (ਇਤਿ ਧਨਿਯੋ ਗੋਪੋ)
ਪੁਤ੍ਤਾ ਚ ਮੇ ਸਮਾਨਿਯਾ ਅਰੋਗਾ;
ਤੇਸਂ ਨ ਸੁਣਾਮਿ ਕਿਞ੍ਚਿ ਪਾਪਂ, ਅਥ ਚੇ ਪਤ੍ਥਯਸੀ ਪਵਸ੍ਸ ਦੇਵ’’.
੨੫. ‘‘ਨਾਹਂ ਭਤਕੋਸ੍ਮਿ ਕਸ੍ਸਚਿ, (ਇਤਿ ਭਗਵਾ)
ਨਿਬ੍ਬਿਟ੍ਠੇਨ ਚਰਾਮਿ ਸਬ੍ਬਲੋਕੇ;
ਅਤ੍ਥੋ ਭਤਿਯਾ ਨ ਵਿਜ੍ਜਤਿ, ਅਥ ਚੇ ਪਤ੍ਥਯਸੀ ਪਵਸ੍ਸ ਦੇਵ’’.
੨੬. ‘‘ਅਤ੍ਥਿ ਵਸਾ ਅਤ੍ਥਿ ਧੇਨੁਪਾ, (ਇਤਿ ਧਨਿਯੋ ਗੋਪੋ)
ਗੋਧਰਣਿਯੋ ਪਵੇਣਿਯੋਪਿ ਅਤ੍ਥਿ;
ਉਸਭੋਪਿ ਗਵਮ੍ਪਤੀਧ ਅਤ੍ਥਿ, ਅਥ ਚੇ ਪਤ੍ਥਯਸੀ ਪਵਸ੍ਸ ਦੇਵ’’.
੨੭. ‘‘ਨਤ੍ਥਿ ਵਸਾ ਨਤ੍ਥਿ ਧੇਨੁਪਾ, (ਇਤਿ ਭਗਵਾ)
ਗੋਧਰਣਿਯੋ ਪਵੇਣਿਯੋਪਿ ਨਤ੍ਥਿ;
ਉਸਭੋਪਿ ਗਵਮ੍ਪਤੀਧ ਨਤ੍ਥਿ, ਅਥ ਚੇ ਪਤ੍ਥਯਸੀ ਪਵਸ੍ਸ ਦੇਵ’’.
੨੮. ‘‘ਖਿਲਾ ਨਿਖਾਤਾ ਅਸਮ੍ਪਵੇਧੀ, (ਇਤਿ ਧਨਿਯੋ ਗੋਪੋ)
ਦਾਮਾ ਮੁਞ੍ਜਮਯਾ ਨਵਾ ਸੁਸਣ੍ਠਾਨਾ;
ਨ ਹਿ ਸਕ੍ਖਿਨ੍ਤਿ ਧੇਨੁਪਾਪਿ ਛੇਤ੍ਤੁਂ [ਛੇਤੁਂ (ਕ.)], ਅਥ ਚੇ ਪਤ੍ਥਯਸੀ ਪਵਸ੍ਸ ਦੇਵ’’.
੨੯. ‘‘ਉਸਭੋਰਿਵ ਛੇਤ੍ਵ [ਛੇਤ੍ਵਾ (ਸ੍ਯਾ. ਕ.)] ਬਨ੍ਧਨਾਨਿ, (ਇਤਿ ਭਗਵਾ)
ਨਾਗੋ ਪੂਤਿਲਤਂਵ ਦਾਲਯਿਤ੍ਵਾ [ਪੂਤਿਲਤਂ ਪਦਾਲਯਿਤ੍ਵਾ (ਸ੍ਯਾ. ਕ.)];
ਨਾਹਂ ਪੁਨੁਪੇਸ੍ਸਂ [ਪੁਨ ਉਪੇਸ੍ਸਂ (ਸੀ. ਸ੍ਯਾ. ਕਂ. ਪੀ.), ਪੁਨੁਪੇਯ੍ਯ (ਕ.)] ਗਬ੍ਭਸੇਯ੍ਯਂ, ਅਥ ਚੇ ਪਤ੍ਥਯਸੀ ਪਵਸ੍ਸ ਦੇਵ’’.
੩੦. ‘‘ਨਿਨ੍ਨਞ੍ਚ ਥਲਞ੍ਚ ਪੂਰਯਨ੍ਤੋ, ਮਹਾਮੇਘੋ ਪਵਸ੍ਸਿ ਤਾਵਦੇਵ;
ਸੁਤ੍ਵਾ ਦੇਵਸ੍ਸ ਵਸ੍ਸਤੋ, ਇਮਮਤ੍ਥਂ ਧਨਿਯੋ ਅਭਾਸਥ.
੩੧. ‘‘ਲਾਭਾ ਵਤ ਨੋ ਅਨਪ੍ਪਕਾ, ਯੇ ਮਯਂ ਭਗਵਨ੍ਤਂ ਅਦ੍ਦਸਾਮ;
ਸਰਣਂ ਤਂ ਉਪੇਮ ਚਕ੍ਖੁਮ, ਸਤ੍ਥਾ ਨੋ ਹੋਹਿ ਤੁਵਂ ਮਹਾਮੁਨਿ.
੩੨. ‘‘ਗੋਪੀ ਚ ਅਹਞ੍ਚ ਅਸ੍ਸਵਾ, ਬ੍ਰਹ੍ਮਚਰਿਯਂ [ਬ੍ਰਹ੍ਮਚਰਿਯ (ਕ.)] ਸੁਗਤੇ ਚਰਾਮਸੇ;
ਜਾਤਿਮਰਣਸ੍ਸ ਪਾਰਗੂ [ਪਾਰਗਾ (ਸੀ. ਸ੍ਯਾ. ਕਂ. ਪੀ.)], ਦੁਕ੍ਖਸ੍ਸਨ੍ਤਕਰਾ ਭਵਾਮਸੇ’’.
੩੩. ‘‘ਨਨ੍ਦਤਿ ਪੁਤ੍ਤੇਹਿ ਪੁਤ੍ਤਿਮਾ, (ਇਤਿ ਮਾਰੋ ਪਾਪਿਮਾ)
ਗੋਮਾ [ਗੋਮਿਕੋ (ਸੀ. ਪੀ.), ਗੋਪਿਕੋ (ਸ੍ਯਾ. ਕਂ.), ਗੋਪਿਯੋ (ਕ.)] ਗੋਹਿ ਤਥੇਵ ਨਨ੍ਦਤਿ;
ਉਪਧੀ ਹਿ ਨਰਸ੍ਸ ਨਨ੍ਦਨਾ, ਨ ਹਿ ਸੋ ਨਨ੍ਦਤਿ ਯੋ ਨਿਰੂਪਧਿ’’.
੩੪. ‘‘ਸੋਚਤਿ ਪੁਤ੍ਤੇਹਿ ਪੁਤ੍ਤਿਮਾ, (ਇਤਿ ਭਗਵਾ)
ਗੋਪਿਯੋ ਗੋਹਿ ਤਥੇਵ ਸੋਚਤਿ;
ਉਪਧੀ ਹਿ ਨਰਸ੍ਸ ਸੋਚਨਾ, ਨ ਹਿ ਸੋ ਸੋਚਤਿ ਯੋ ਨਿਰੂਪਧੀ’’ਤਿ.
ਧਨਿਯਸੁਤ੍ਤਂ ਦੁਤਿਯਂ ਨਿਟ੍ਠਿਤਂ.
੩. ਖਗ੍ਗਵਿਸਾਣਸੁਤ੍ਤਂ
੩੫. ਸਬ੍ਬੇਸੁ ਭੂਤੇਸੁ ਨਿਧਾਯ ਦਣ੍ਡਂ, ਅਵਿਹੇਠਯਂ ਅਞ੍ਞਤਰਮ੍ਪਿ ਤੇਸਂ;
ਨ ਪੁਤ੍ਤਮਿਚ੍ਛੇਯ੍ਯ ਕੁਤੋ ਸਹਾਯਂ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੩੬. ਸਂਸਗ੍ਗਜਾਤਸ੍ਸ ਭਵਨ੍ਤਿ ਸ੍ਨੇਹਾ, ਸ੍ਨੇਹਨ੍ਵਯਂ ਦੁਕ੍ਖਮਿਦਂ ਪਹੋਤਿ;
ਆਦੀਨਵਂ ਸ੍ਨੇਹਜਂ ਪੇਕ੍ਖਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੩੭. ਮਿਤ੍ਤੇ ਸੁਹਜ੍ਜੇ ਅਨੁਕਮ੍ਪਮਾਨੋ, ਹਾਪੇਤਿ ਅਤ੍ਥਂ ਪਟਿਬਦ੍ਧਚਿਤ੍ਤੋ;
ਏਤਂ ਭਯਂ ਸਨ੍ਥਵੇ [ਸਨ੍ਧਵੇ (ਕ.)] ਪੇਕ੍ਖਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੩੮. ਵਂਸੋ ਵਿਸਾਲੋਵ ਯਥਾ ਵਿਸਤ੍ਤੋ, ਪੁਤ੍ਤੇਸੁ ਦਾਰੇਸੁ ਚ ਯਾ ਅਪੇਕ੍ਖਾ;
ਵਂਸਕ੍ਕਲ਼ੀਰੋਵ [ਵਂਸਕਲ਼ੀਰੋਵ (ਸੀ.), ਵਂਸਾਕਲ਼ੀਰੋਵ (ਸ੍ਯਾ. ਕਂ. ਪੀ.), ਵਂਸੇਕਲ਼ੀਰੋਵ (ਨਿਦ੍ਦੇਸ)] ਅਸਜ੍ਜਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੩੯. ਮਿਗੋ ਅਰਞ੍ਞਮ੍ਹਿ ਯਥਾ ਅਬਦ੍ਧੋ [ਅਬਨ੍ਧੋ (ਸ੍ਯਾ. ਕਂ.)], ਯੇਨਿਚ੍ਛਕਂ ਗਚ੍ਛਤਿ ਗੋਚਰਾਯ;
ਵਿਞ੍ਞੂ ਨਰੋ ਸੇਰਿਤਂ ਪੇਕ੍ਖਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੪੦. ਆਮਨ੍ਤਨਾ ਹੋਤਿ ਸਹਾਯਮਜ੍ਝੇ, ਵਾਸੇ ਠਾਨੇ ਗਮਨੇ ਚਾਰਿਕਾਯ;
ਅਨਭਿਜ੍ਝਿਤਂ ਸੇਰਿਤਂ ਪੇਕ੍ਖਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੪੧. ਖਿਡ੍ਡਾ ਰਤੀ ਹੋਤਿ ਸਹਾਯਮਜ੍ਝੇ, ਪੁਤ੍ਤੇਸੁ ਚ ਵਿਪੁਲਂ ਹੋਤਿ ਪੇਮਂ;
ਪਿਯਵਿਪ੍ਪਯੋਗਂ ਵਿਜਿਗੁਚ੍ਛਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੪੨. ਚਾਤੁਦ੍ਦਿਸੋ ਅਪ੍ਪਟਿਘੋ ਚ ਹੋਤਿ, ਸਨ੍ਤੁਸ੍ਸਮਾਨੋ ਇਤਰੀਤਰੇਨ;
ਪਰਿਸ੍ਸਯਾਨਂ ਸਹਿਤਾ ਅਛਮ੍ਭੀ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੪੩. ਦੁਸ੍ਸਙ੍ਗਹਾ ਪਬ੍ਬਜਿਤਾਪਿ ਏਕੇ, ਅਥੋ ਗਹਟ੍ਠਾ ਘਰਮਾਵਸਨ੍ਤਾ;
ਅਪ੍ਪੋਸ੍ਸੁਕ੍ਕੋ ਪਰਪੁਤ੍ਤੇਸੁ ਹੁਤ੍ਵਾ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੪੪. ਓਰੋਪਯਿਤ੍ਵਾ ਗਿਹਿਬ੍ਯਞ੍ਜਨਾਨਿ [ਗਿਹਿਵ੍ਯਞ੍ਜਨਾਨਿ (ਸ੍ਯਾ. ਕਂ. ਪੀ.)], ਸਞ੍ਛਿਨ੍ਨਪਤ੍ਤੋ [ਸਂਸੀਨਪਤ੍ਤੋ (ਸੀ.)] ਯਥਾ ਕੋਵਿਲ਼ਾਰੋ;
ਛੇਤ੍ਵਾਨ ਵੀਰੋ ਗਿਹਿਬਨ੍ਧਨਾਨਿ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੪੫. ਸਚੇ ਲਭੇਥ ਨਿਪਕਂ ਸਹਾਯਂ, ਸਦ੍ਧਿਂ ਚਰਂ ਸਾਧੁਵਿਹਾਰਿਧੀਰਂ;
ਅਭਿਭੁਯ੍ਯ ਸਬ੍ਬਾਨਿ ਪਰਿਸ੍ਸਯਾਨਿ, ਚਰੇਯ੍ਯ ਤੇਨਤ੍ਤਮਨੋ ਸਤੀਮਾ.
੪੬. ਨੋ ਚੇ ਲਭੇਥ ਨਿਪਕਂ ਸਹਾਯਂ, ਸਦ੍ਧਿਂ ਚਰਂ ਸਾਧੁਵਿਹਾਰਿਧੀਰਂ;
ਰਾਜਾਵ ਰਟ੍ਠਂ ਵਿਜਿਤਂ ਪਹਾਯ, ਏਕੋ ਚਰੇ ਮਾਤਙ੍ਗਰਞ੍ਞੇਵ ਨਾਗੋ.
੪੭. ਅਦ੍ਧਾ ਪਸਂਸਾਮ ਸਹਾਯਸਮ੍ਪਦਂ, ਸੇਟ੍ਠਾ ਸਮਾ ਸੇਵਿਤਬ੍ਬਾ ਸਹਾਯਾ;
ਏਤੇ ਅਲਦ੍ਧਾ ਅਨਵਜ੍ਜਭੋਜੀ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੪੮. ਦਿਸ੍ਵਾ ਸੁਵਣ੍ਣਸ੍ਸ ਪਭਸ੍ਸਰਾਨਿ, ਕਮ੍ਮਾਰਪੁਤ੍ਤੇਨ ਸੁਨਿਟ੍ਠਿਤਾਨਿ;
ਸਙ੍ਘਟ੍ਟਮਾਨਾਨਿ ਦੁਵੇ ਭੁਜਸ੍ਮਿਂ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੪੯. ਏਵਂ ਦੁਤਿਯੇਨ [ਦੁਤਿਯੇਨ (ਸਬ੍ਬਤ੍ਥ)] ਸਹਾ ਮਮਸ੍ਸ, ਵਾਚਾਭਿਲਾਪੋ ਅਭਿਸਜ੍ਜਨਾ ਵਾ;
ਏਤਂ ਭਯਂ ਆਯਤਿਂ ਪੇਕ੍ਖਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੫੦. ਕਾਮਾ ਹਿ ਚਿਤ੍ਰਾ ਮਧੁਰਾ ਮਨੋਰਮਾ, ਵਿਰੂਪਰੂਪੇਨ ਮਥੇਨ੍ਤਿ ਚਿਤ੍ਤਂ;
ਆਦੀਨਵਂ ਕਾਮਗੁਣੇਸੁ ਦਿਸ੍ਵਾ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੫੧. ਈਤੀ ਚ ਗਣ੍ਡੋ ਚ ਉਪਦ੍ਦਵੋ ਚ, ਰੋਗੋ ਚ ਸਲ੍ਲਞ੍ਚ ਭਯਞ੍ਚ ਮੇਤਂ;
ਏਤਂ ਭਯਂ ਕਾਮਗੁਣੇਸੁ ਦਿਸ੍ਵਾ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੫੨. ਸੀਤਞ੍ਚ ਉਣ੍ਹਞ੍ਚ ਖੁਦਂ ਪਿਪਾਸਂ, ਵਾਤਾਤਪੇ ਡਂਸਸਰੀਸਪੇ [ਡਂਸਸਿਰਿਂਸਪੇ (ਸੀ. ਸ੍ਯਾ. ਕਂ. ਪੀ.)] ਚ;
ਸਬ੍ਬਾਨਿਪੇਤਾਨਿ ਅਭਿਸਮ੍ਭਵਿਤ੍ਵਾ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੫੩. ਨਾਗੋਵ ਯੂਥਾਨਿ ਵਿਵਜ੍ਜਯਿਤ੍ਵਾ, ਸਞ੍ਜਾਤਖਨ੍ਧੋ ਪਦੁਮੀ ਉਲ਼ਾਰੋ;
ਯਥਾਭਿਰਨ੍ਤਂ ਵਿਹਰਂ [ਵਿਹਰੇ (ਸੀ. ਪੀ. ਨਿਦ੍ਦੇਸ)] ਅਰਞ੍ਞੇ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੫੪. ਅਟ੍ਠਾਨਤਂ ਸਙ੍ਗਣਿਕਾਰਤਸ੍ਸ, ਯਂ ਫਸ੍ਸਯੇ [ਫੁਸ੍ਸਯੇ (ਸ੍ਯਾ.)] ਸਾਮਯਿਕਂ ਵਿਮੁਤ੍ਤਿਂ;
ਆਦਿਚ੍ਚਬਨ੍ਧੁਸ੍ਸ ਵਚੋ ਨਿਸਮ੍ਮ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੫੫. ਦਿਟ੍ਠੀਵਿਸੂਕਾਨਿ ਉਪਾਤਿਵਤ੍ਤੋ, ਪਤ੍ਤੋ ਨਿਯਾਮਂ ਪਟਿਲਦ੍ਧਮਗ੍ਗੋ;
ਉਪ੍ਪਨ੍ਨਞਾਣੋਮ੍ਹਿ ਅਨਞ੍ਞਨੇਯ੍ਯੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੫੬. ਨਿਲ੍ਲੋਲੁਪੋ ਨਿਕ੍ਕੁਹੋ ਨਿਪ੍ਪਿਪਾਸੋ, ਨਿਮ੍ਮਕ੍ਖੋ ਨਿਦ੍ਧਨ੍ਤਕਸਾਵਮੋਹੋ;
ਨਿਰਾਸਯੋ [ਨਿਰਾਸਾਸੋ (ਕ.)] ਸਬ੍ਬਲੋਕੇ ਭਵਿਤ੍ਵਾ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੫੭. ਪਾਪਂ ਸਹਾਯਂ ਪਰਿਵਜ੍ਜਯੇਥ, ਅਨਤ੍ਥਦਸ੍ਸਿਂ ਵਿਸਮੇ ਨਿਵਿਟ੍ਠਂ;
ਸਯਂ ਨ ਸੇਵੇ ਪਸੁਤਂ ਪਮਤ੍ਤਂ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੫੮. ਬਹੁਸ੍ਸੁਤਂ ਧਮ੍ਮਧਰਂ ਭਜੇਥ, ਮਿਤ੍ਤਂ ਉਲ਼ਾਰਂ ਪਟਿਭਾਨਵਨ੍ਤਂ;
ਅਞ੍ਞਾਯ ਅਤ੍ਥਾਨਿ ਵਿਨੇਯ੍ਯ ਕਙ੍ਖਂ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੫੯. ਖਿਡ੍ਡਂ ਰਤਿਂ ਕਾਮਸੁਖਞ੍ਚ ਲੋਕੇ, ਅਨਲਙ੍ਕਰਿਤ੍ਵਾ ਅਨਪੇਕ੍ਖਮਾਨੋ;
ਵਿਭੂਸਨਟ੍ਠਾਨਾ ਵਿਰਤੋ ਸਚ੍ਚਵਾਦੀ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੬੦. ਪੁਤ੍ਤਞ੍ਚ ਦਾਰਂ ਪਿਤਰਞ੍ਚ ਮਾਤਰਂ, ਧਨਾਨਿ ਧਞ੍ਞਾਨਿ ਚ ਬਨ੍ਧਵਾਨਿ [ਬਨ੍ਧਵਾਨਿ ਚ (ਪੀ.)];
ਹਿਤ੍ਵਾਨ ਕਾਮਾਨਿ ਯਥੋਧਿਕਾਨਿ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੬੧. ਸਙ੍ਗੋ ਏਸੋ ਪਰਿਤ੍ਤਮੇਤ੍ਥ ਸੋਖ੍ਯਂ, ਅਪ੍ਪਸ੍ਸਾਦੋ ਦੁਕ੍ਖਮੇਤ੍ਥ ਭਿਯ੍ਯੋ;
ਗਲ਼ੋ ਏਸੋ ਇਤਿ ਞਤ੍ਵਾ ਮੁਤੀਮਾ [ਮਤੀਮਾ (ਸ੍ਯਾ. ਕ.)], ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੬੨. ਸਨ੍ਦਾਲਯਿਤ੍ਵਾਨ [ਪਦਾਲਯਿਤ੍ਵਾਨ (ਕ.)] ਸਂਯੋਜਨਾਨਿ, ਜਾਲਂਵ ਭੇਤ੍ਵਾ ਸਲਿਲਮ੍ਬੁਚਾਰੀ;
ਅਗ੍ਗੀਵ ਦਡ੍ਢਂ ਅਨਿਵਤ੍ਤਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੬੩. ਓਕ੍ਖਿਤ੍ਤਚਕ੍ਖੂ ਨ ਚ ਪਾਦਲੋਲੋ, ਗੁਤ੍ਤਿਨ੍ਦ੍ਰਿਯੋ ਰਕ੍ਖਿਤਮਾਨਸਾਨੋ;
ਅਨਵਸ੍ਸੁਤੋ ਅਪਰਿਡਯ੍ਹਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੬੪. ਓਹਾਰਯਿਤ੍ਵਾ ਗਿਹਿਬ੍ਯਞ੍ਜਨਾਨਿ, ਸਞ੍ਛਨ੍ਨਪਤ੍ਤੋ [ਸਞ੍ਛਿਨ੍ਨਪਤ੍ਤੋ (ਸ੍ਯਾ. ਪੀ.), ਪਚ੍ਛਿਨ੍ਨਪਤ੍ਤੋ (ਕ.)] ਯਥਾ ਪਾਰਿਛਤ੍ਤੋ;
ਕਾਸਾਯਵਤ੍ਥੋ ਅਭਿਨਿਕ੍ਖਮਿਤ੍ਵਾ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.
੬੫. ਰਸੇਸੁ ਗੇਧਂ ਅਕਰਂ ਅਲੋਲੋ, ਅਨਞ੍ਞਪੋਸੀ ਸਪਦਾਨਚਾਰੀ;
ਕੁਲੇ ਕੁਲੇ ਅਪ੍ਪਟਿਬਦ੍ਧਚਿਤ੍ਤੋ [ਅਪ੍ਪਟਿਬਨ੍ਧਚਿਤ੍ਤੋ (ਕ.)], ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.