੧੨. ਮੁਨਿਸੁਤ੍ਤਂ

੨੦੯. ਸਨ੍ਥਵਾਤੋ [ਸਨ੍ਧਵਤੋ (ਕ.)] ਭਯਂ ਜਾਤਂ, ਨਿਕੇਤਾ ਜਾਯਤੇ ਰਜੋ;

ਅਨਿਕੇਤਮਸਨ੍ਥਵਂ, ਏਤਂ ਵੇ ਮੁਨਿਦਸ੍ਸਨਂ.

੨੧੦. ਯੋ ਜਾਤਮੁਚ੍ਛਿਜ੍ਜ ਨ ਰੋਪਯੇਯ੍ਯ, ਜਾਯਨ੍ਤਮਸ੍ਸ ਨਾਨੁਪ੍ਪਵੇਚ੍ਛੇ;

ਤਮਾਹੁ ਏਕਂ ਮੁਨਿਨਂ ਚਰਨ੍ਤਂ, ਅਦ੍ਦਕ੍ਖਿ ਸੋ ਸਨ੍ਤਿਪਦਂ ਮਹੇਸਿ.

੨੧੧. ਸਙ੍ਖਾਯ ਵਤ੍ਥੂਨਿ ਪਮਾਯ [ਪਹਾਯ (ਕ. ਸੀ. ਕ.), ਸਮਾਯ (ਕ.) ਪ + ਮੀ + ਤ੍ਵਾ = ਪਮਾਯ, ਯਥਾ ਨਿਸ੍ਸਾਯਾਤਿਪਦਂ] ਬੀਜਂ, ਸਿਨੇਹਮਸ੍ਸ ਨਾਨੁਪ੍ਪਵੇਚ੍ਛੇ;

ਸ ਵੇ ਮੁਨੀ ਜਾਤਿਖਯਨ੍ਤਦਸ੍ਸੀ, ਤਕ੍ਕਂ ਪਹਾਯ ਨ ਉਪੇਤਿ ਸਙ੍ਖਂ.

੨੧੨. ਅਞ੍ਞਾਯ ਸਬ੍ਬਾਨਿ ਨਿਵੇਸਨਾਨਿ, ਅਨਿਕਾਮਯਂ ਅਞ੍ਞਤਰਮ੍ਪਿ ਤੇਸਂ;

ਸ ਵੇ ਮੁਨੀ ਵੀਤਗੇਧੋ ਅਗਿਦ੍ਧੋ, ਨਾਯੂਹਤੀ ਪਾਰਗਤੋ ਹਿ ਹੋਤਿ.

੨੧੩. ਸਬ੍ਬਾਭਿਭੁਂ ਸਬ੍ਬਵਿਦੁਂ ਸੁਮੇਧਂ, ਸਬ੍ਬੇਸੁ ਧਮ੍ਮੇਸੁ ਅਨੂਪਲਿਤ੍ਤਂ;

ਸਬ੍ਬਞ੍ਜਹਂ ਤਣ੍ਹਕ੍ਖਯੇ ਵਿਮੁਤ੍ਤਂ, ਤਂ ਵਾਪਿ ਧੀਰਾ ਮੁਨਿ [ਮੁਨਿਂ (ਸੀ. ਪੀ.)] ਵੇਦਯਨ੍ਤਿ.

੨੧੪. ਪਞ੍ਞਾਬਲਂ ਸੀਲਵਤੂਪਪਨ੍ਨਂ, ਸਮਾਹਿਤਂ ਝਾਨਰਤਂ ਸਤੀਮਂ;

ਸਙ੍ਗਾ ਪਮੁਤ੍ਤਂ ਅਖਿਲਂ ਅਨਾਸਵਂ, ਤਂ ਵਾਪਿ ਧੀਰਾ ਮੁਨਿ ਵੇਦਯਨ੍ਤਿ.

੨੧੫. ਏਕਂ ਚਰਨ੍ਤਂ ਮੁਨਿਮਪ੍ਪਮਤ੍ਤਂ, ਨਿਨ੍ਦਾਪਸਂਸਾਸੁ ਅਵੇਧਮਾਨਂ;

ਸੀਹਂਵ ਸਦ੍ਦੇਸੁ ਅਸਨ੍ਤਸਨ੍ਤਂ, ਵਾਤਂਵ ਜਾਲਮ੍ਹਿ ਅਸਜ੍ਜਮਾਨਂ;

ਪਦ੍ਮਂਵ [ਪਦੁਮਂਵ (ਸੀ. ਸ੍ਯਾ. ਪੀ.)] ਤੋਯੇਨ ਅਲਿਪ੍ਪਮਾਨਂ [ਅਲਿਮ੍ਪਮਾਨਂ (ਸ੍ਯਾ. ਕ.)], ਨੇਤਾਰਮਞ੍ਞੇਸਮਨਞ੍ਞਨੇਯ੍ਯਂ;

ਤਂ ਵਾਪਿ ਧੀਰਾ ਮੁਨਿ ਵੇਦਯਨ੍ਤਿ.

੨੧੬. ਯੋ ਓਗਹਣੇ ਥਮ੍ਭੋਰਿਵਾਭਿਜਾਯਤਿ, ਯਸ੍ਮਿਂ ਪਰੇ ਵਾਚਾਪਰਿਯਨ੍ਤਂ [ਵਾਚਂ ਪਰਿਯਨ੍ਤਂ (ਕ.)] ਵਦਨ੍ਤਿ;

ਤਂ ਵੀਤਰਾਗਂ ਸੁਸਮਾਹਿਤਿਨ੍ਦ੍ਰਿਯਂ, ਤਂ ਵਾਪਿ ਧੀਰਾ ਮੁਨਿ ਵੇਦਯਨ੍ਤਿ.

੨੧੭. ਯੋ ਵੇ ਠਿਤਤ੍ਤੋ ਤਸਰਂਵ ਉਜ੍ਜੁ, ਜਿਗੁਚ੍ਛਤਿ ਕਮ੍ਮੇਹਿ ਪਾਪਕੇਹਿ;

ਵੀਮਂਸਮਾਨੋ ਵਿਸਮਂ ਸਮਞ੍ਚ, ਤਂ ਵਾਪਿ ਧੀਰਾ ਮੁਨਿ ਵੇਦਯਨ੍ਤਿ.

੨੧੮. ਯੋ ਸਞ੍ਞਤਤ੍ਤੋ ਨ ਕਰੋਤਿ ਪਾਪਂ, ਦਹਰੋ ਮਜ੍ਝਿਮੋ ਚ ਮੁਨਿ [ਦਹਰੋ ਚ ਮਜ੍ਝੋ ਚ ਮੁਨੀ (ਸੀ. ਸ੍ਯਾ. ਕਂ. ਪੀ.)] ਯਤਤ੍ਤੋ;

ਅਰੋਸਨੇਯ੍ਯੋ ਨ ਸੋ ਰੋਸੇਤਿ ਕਞ੍ਚਿ [ਨ ਰੋਸੇਤਿ (ਸ੍ਯਾ.)], ਤਂ ਵਾਪਿ ਧੀਰਾ ਮੁਨਿ ਵੇਦਯਨ੍ਤਿ.

੨੧੯. ਯਦਗ੍ਗਤੋ ਮਜ੍ਝਤੋ ਸੇਸਤੋ ਵਾ, ਪਿਣ੍ਡਂ ਲਭੇਥ ਪਰਦਤ੍ਤੂਪਜੀਵੀ;

ਨਾਲਂ ਥੁਤੁਂ ਨੋਪਿ ਨਿਪਚ੍ਚਵਾਦੀ, ਤਂ ਵਾਪਿ ਧੀਰਾ ਮੁਨਿ ਵੇਦਯਨ੍ਤਿ.

੨੨੦. ਮੁਨਿਂ ਚਰਨ੍ਤਂ ਵਿਰਤਂ ਮੇਥੁਨਸ੍ਮਾ, ਯੋ ਯੋਬ੍ਬਨੇ ਨੋਪਨਿਬਜ੍ਝਤੇ ਕ੍ਵਚਿ;

ਮਦਪ੍ਪਮਾਦਾ ਵਿਰਤਂ ਵਿਪ੍ਪਮੁਤ੍ਤਂ, ਤਂ ਵਾਪਿ ਧੀਰਾ ਮੁਨਿ ਵੇਦਯਨ੍ਤਿ.

੨੨੧. ਅਞ੍ਞਾਯ ਲੋਕਂ ਪਰਮਤ੍ਥਦਸ੍ਸਿਂ, ਓਘਂ ਸਮੁਦ੍ਦਂ ਅਤਿਤਰਿਯ ਤਾਦਿਂ;

ਤਂ ਛਿਨ੍ਨਗਨ੍ਥਂ ਅਸਿਤਂ ਅਨਾਸਵਂ, ਤਂ ਵਾਪਿ ਧੀਰਾ ਮੁਨਿ ਵੇਦਯਨ੍ਤਿ.

੨੨੨. ਅਸਮਾ ਉਭੋ ਦੂਰਵਿਹਾਰਵੁਤ੍ਤਿਨੋ, ਗਿਹੀ [ਗਿਹਿ (ਕ.)] ਦਾਰਪੋਸੀ ਅਮਮੋ ਚ ਸੁਬ੍ਬਤੋ;

ਪਰਪਾਣਰੋਧਾਯ ਗਿਹੀ ਅਸਞ੍ਞਤੋ, ਨਿਚ੍ਚਂ ਮੁਨੀ ਰਕ੍ਖਤਿ ਪਾਣਿਨੇ [ਪਾਣਿਨੋ (ਸੀ.)] ਯਤੋ.

੨੨੩. ਸਿਖੀ ਯਥਾ ਨੀਲਗੀਵੋ [ਨੀਲਗਿਵੋ (ਸ੍ਯਾ.)] ਵਿਹਙ੍ਗਮੋ, ਹਂਸਸ੍ਸ ਨੋਪੇਤਿ ਜਵਂ ਕੁਦਾਚਨਂ;

ਏਵਂ ਗਿਹੀ ਨਾਨੁਕਰੋਤਿ ਭਿਕ੍ਖੁਨੋ, ਮੁਨਿਨੋ ਵਿਵਿਤ੍ਤਸ੍ਸ ਵਨਮ੍ਹਿ ਝਾਯਤੋਤਿ.

ਮੁਨਿਸੁਤ੍ਤਂ ਦ੍ਵਾਦਸਮਂ ਨਿਟ੍ਠਿਤਂ.

ਉਰਗਵਗ੍ਗੋ ਪਠਮੋ ਨਿਟ੍ਠਿਤੋ.