੭. ਧਨਪਾਲਸੇਟ੍ਠਿਪੇਤਵਤ੍ਥੁ

੨੨੭. ‘‘ਨਗ੍ਗੋ ਦੁਬ੍ਬਣ੍ਣਰੂਪੋਸਿ, ਕਿਸੋ ਧਮਨਿਸਨ੍ਥਤੋ;

ਉਪ੍ਫਾਸੁਲਿਕੋ ਕਿਸਿਕੋ, ਕੋ ਨੁ ਤ੍ਵਮਸਿ ਮਾਰਿਸ’’.

੨੨੮. ‘‘ਅਹਂ ਭਦਨ੍ਤੇ ਪੇਤੋਮ੍ਹਿ, ਦੁਗ੍ਗਤੋ ਯਮਲੋਕਿਕੋ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤੋ’’.

੨੨੯. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸ ਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤੋ’’.

੨੩੦. ‘‘ਨਗਰਂ ਅਤ੍ਥਿ ਪਣ੍ਣਾਨਂ [ਦਸਨ੍ਨਾਨਂ (ਸੀ. ਸ੍ਯਾ. ਪੀ.)], ਏਰਕਚ੍ਛਨ੍ਤਿ ਵਿਸ੍ਸੁਤਂ;

ਤਤ੍ਥ ਸੇਟ੍ਠਿ ਪੁਰੇ ਆਸਿਂ, ਧਨਪਾਲੋਤਿ ਮਂ ਵਿਦੂ.

੨੩੧. ‘‘ਅਸੀਤਿ ਸਕਟਵਾਹਾਨਂ, ਹਿਰਞ੍ਞਸ੍ਸ ਅਹੋਸਿ ਮੇ;

ਪਹੂਤਂ ਮੇ ਜਾਤਰੂਪਂ, ਮੁਤ੍ਤਾ ਵੇਲ਼ੁਰਿਯਾ ਬਹੂ.

੨੩੨. ‘‘ਤਾਵ ਮਹਦ੍ਧਨਸ੍ਸਾਪਿ, ਨ ਮੇ ਦਾਤੁਂ ਪਿਯਂ ਅਹੁ;

ਪਿਦਹਿਤ੍ਵਾ ਦ੍ਵਾਰਂ ਭੁਞ੍ਜਿਂ [ਭੁਞ੍ਜਾਮਿ (ਸੀ. ਸ੍ਯਾ.)], ਮਾ ਮਂ ਯਾਚਨਕਾਦ੍ਦਸੁਂ.

੨੩੩. ‘‘ਅਸ੍ਸਦ੍ਧੋ ਮਚ੍ਛਰੀ ਚਾਸਿਂ, ਕਦਰਿਯੋ ਪਰਿਭਾਸਕੋ;

ਦਦਨ੍ਤਾਨਂ ਕਰੋਨ੍ਤਾਨਂ, ਵਾਰਯਿਸ੍ਸਂ ਬਹੁ ਜਨੇ [ਬਹੁਜ੍ਜਨਂ (ਸੀ. ਸ੍ਯਾ.)].

੨੩੪. ‘‘ਵਿਪਾਕੋ ਨਤ੍ਥਿ ਦਾਨਸ੍ਸ, ਸਂਯਮਸ੍ਸ ਕੁਤੋ ਫਲਂ;

ਪੋਕ੍ਖਰਞ੍ਞੋਦਪਾਨਾਨਿ, ਆਰਾਮਾਨਿ ਚ ਰੋਪਿਤੇ;

ਪਪਾਯੋ ਚ ਵਿਨਾਸੇਸਿਂ, ਦੁਗ੍ਗੇ ਸਙ੍ਕਮਨਾਨਿ ਚ.

੨੩੫. ‘‘ਸ੍ਵਾਹਂ ਅਕਤਕਲ੍ਯਾਣੋ, ਕਤਪਾਪੋ ਤਤੋ ਚੁਤੋ;

ਉਪਪਨ੍ਨੋ ਪੇਤ੍ਤਿਵਿਸਯਂ, ਖੁਪ੍ਪਿਪਾਸਸਮਪ੍ਪਿਤੋ.

੨੩੬. ‘‘ਪਞ੍ਚਪਣ੍ਣਾਸਵਸ੍ਸਾਨਿ, ਯਤੋ ਕਾਲਙ੍ਕਤੋ ਅਹਂ;

ਨਾਭਿਜਾਨਾਮਿ ਭੁਤ੍ਤਂ ਵਾ, ਪੀਤਂ ਵਾ ਪਨ ਪਾਨਿਯਂ.

੨੩੭. ‘‘ਯੋ ਸਂਯਮੋ ਸੋ ਵਿਨਾਸੋ,ਯੋ ਵਿਨਾਸੋ ਸੋ ਸਂਯਮੋ;

ਪੇਤਾ ਹਿ ਕਿਰ ਜਾਨਨ੍ਤਿ, ਯੋ ਸਂਯਮੋ ਸੋ ਵਿਨਾਸੋ.

੨੩੮. ‘‘ਅਹਂ ਪੁਰੇ ਸਂਯਮਿਸ੍ਸਂ, ਨਾਦਾਸਿਂ ਬਹੁਕੇ ਧਨੇ;

ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਾਸਿਮਤ੍ਤਨੋ;

ਸ੍ਵਾਹਂ ਪਚ੍ਛਾਨੁਤਪ੍ਪਾਮਿ, ਅਤ੍ਤਕਮ੍ਮਫਲੂਪਗੋ.

੨੩੯. [ਪੇ. ਵ. ੬੯] ‘‘ਉਦ੍ਧਂ ਚਤੂਹਿ ਮਾਸੇਹਿ, ਕਾਲਂਕਿਰਿਯਾ ਭਵਿਸ੍ਸਤਿ;

ਏਕਨ੍ਤਕਟੁਕਂ ਘੋਰਂ, ਨਿਰਯਂ ਪਪਤਿਸ੍ਸਹਂ.

੨੪੦. [ਪੇ. ਵ. ੭੦] ‘‘ਚਤੁਕ੍ਕਣ੍ਣਂ ਚਤੁਦ੍ਵਾਰਂ, ਵਿਭਤ੍ਤਂ ਭਾਗਸੋ ਮਿਤਂ;

ਅਯੋਪਾਕਾਰਪਰਿਯਨ੍ਤਂ, ਅਯਸਾ ਪਟਿਕੁਜ੍ਜਿਤਂ.

੨੪੧. [ਪੇ. ਵ. ੭੧] ‘‘ਤਸ੍ਸ ਅਯੋਮਯਾ ਭੂਮਿ, ਜਲਿਤਾ ਤੇਜਸਾ ਯੁਤਾ;

ਸਮਨ੍ਤਾ ਯੋਜਨਸਤਂ, ਫਰਿਤ੍ਵਾ ਤਿਟ੍ਠਤਿ ਸਬ੍ਬਦਾ.

੨੪੨. [ਪੇ. ਵ. ੭੨] ‘‘ਤਤ੍ਥਾਹਂ ਦੀਘਮਦ੍ਧਾਨਂ, ਦੁਕ੍ਖਂ ਵੇਦਿਸ੍ਸ ਵੇਦਨਂ;

ਫਲਂ ਪਾਪਸ੍ਸ ਕਮ੍ਮਸ੍ਸ, ਤਸ੍ਮਾ ਸੋਚਾਮਹਂ ਭੁਸਂ.

੨੪੩. ‘‘ਤਂ ਵੋ ਵਦਾਮਿ ਭਦ੍ਦਂ ਵੋ, ਯਾਵਨ੍ਤੇਤ੍ਥ ਸਮਾਗਤਾ;

ਮਾਕਤ੍ਥ ਪਾਪਕਂ ਕਮ੍ਮਂ, ਆਵਿ ਵਾ ਯਦਿ ਵਾ ਰਹੋ.

੨੪੪. ‘‘ਸਚੇ ਤਂ ਪਾਪਕਂ ਕਮ੍ਮਂ, ਕਰਿਸ੍ਸਥ ਕਰੋਥ ਵਾ;

ਨ ਵੋ ਦੁਕ੍ਖਾ ਪਮੁਤ੍ਯਤ੍ਥਿ [ਪਮੁਤ੍ਤਤ੍ਥਿ (ਸਬ੍ਬਤ੍ਥ) ਉਦਾ. ੪੪ ਪਸ੍ਸਿਤਬ੍ਬਂ], ਉਪ੍ਪਚ੍ਚਾਪਿ [ਉਪੇਚ੍ਚਾਪਿ (ਸ੍ਯਾ. ਕ.)] ਪਲਾਯਤਂ.

੨੪੫. ‘‘ਮਤ੍ਤੇਯ੍ਯਾ ਹੋਥ ਪੇਤ੍ਤੇਯ੍ਯਾ, ਕੁਲੇ ਜੇਟ੍ਠਾਪਚਾਯਿਕਾ;

ਸਾਮਞ੍ਞਾ ਹੋਥ ਬ੍ਰਹ੍ਮਞ੍ਞਾ, ਏਵਂ ਸਗ੍ਗਂ ਗਮਿਸ੍ਸਥਾ’’ਤਿ.

ਧਨਪਾਲਸੇਟ੍ਠਿਪੇਤਵਤ੍ਥੁ ਸਤ੍ਤਮਂ.