੮. ਚੂਲ਼ਸੇਟ੍ਠਿਪੇਤਵਤ੍ਥੁ

੨੪੬. ‘‘ਨਗ੍ਗੋ ਕਿਸੋ ਪਬ੍ਬਜਿਤੋਸਿ ਭਨ੍ਤੇ, ਰਤ੍ਤਿਂ ਕੁਹਿਂ ਗਚ੍ਛਸਿ ਕਿਸ੍ਸ ਹੇਤੁ;

ਆਚਿਕ੍ਖ ਮੇ ਤਂ ਅਪਿ ਸਕ੍ਕੁਣੇਮੁ, ਸਬ੍ਬੇਨ ਵਿਤ੍ਤਂ ਪਟਿਪਾਦਯੇ ਤੁਵ’’ਨ੍ਤਿ.

੨੪੭. ‘‘ਬਾਰਾਣਸੀ ਨਗਰਂ ਦੂਰਘੁਟ੍ਠਂ, ਤਤ੍ਥਾਹਂ ਗਹਪਤਿ ਅਡ੍ਢਕੋ ਅਹੁ ਦੀਨੋ;

ਅਦਾਤਾ ਗੇਧਿਤਮਨੋ ਆਮਿਸਸ੍ਮਿਂ, ਦੁਸ੍ਸੀਲ੍ਯੇਨ ਯਮਵਿਸਯਮ੍ਹਿ ਪਤ੍ਤੋ.

੨੪੮. ‘‘ਸੋ ਸੂਚਿਕਾਯ ਕਿਲਮਿਤੋ ਤੇਹਿ,

ਤੇਨੇਵ ਞਾਤੀਸੁ ਯਾਮਿ ਆਮਿਸਕਿਞ੍ਚਿਕ੍ਖਹੇਤੁ;

ਅਦਾਨਸੀਲਾ ਨ ਚ ਸਦ੍ਦਹਨ੍ਤਿ,

ਦਾਨਫਲਂ ਹੋਤਿ ਪਰਮ੍ਹਿ ਲੋਕੇ.

੨੪੯. ‘‘ਧੀਤਾ ਚ ਮਯ੍ਹਂ ਲਪਤੇ ਅਭਿਕ੍ਖਣਂ, ‘ਦਸ੍ਸਾਮਿ ਦਾਨਂ ਪਿਤੂਨਂ ਪਿਤਾਮਹਾਨਂ’;

ਤਮੁਪਕ੍ਖਟਂ ਪਰਿਵਿਸਯਨ੍ਤਿ ਬ੍ਰਾਹ੍ਮਣਾ [ਬ੍ਰਾਹ੍ਮਣੇ (ਸੀ.)], ‘ਯਾਮਿ ਅਹਂ ਅਨ੍ਧਕਵਿਨ੍ਦਂ ਭੋਤ੍ਤੁ’’’ਨ੍ਤਿ.

੨੫੦. ਤਮਵੋਚ ਰਾਜਾ ‘‘ਅਨੁਭਵਿਯਾਨ ਤਮ੍ਪਿ,

ਏਯ੍ਯਾਸਿ ਖਿਪ੍ਪਂ ਅਹਮਪਿ ਕਸ੍ਸਂ ਪੂਜਂ;

ਆਚਿਕ੍ਖ ਮੇ ਤਂ ਯਦਿ ਅਤ੍ਥਿ ਹੇਤੁ,

ਸਦ੍ਧਾਯਿਤਂ ਹੇਤੁਵਚੋ ਸੁਣੋਮਾ’’ਤਿ.

੨੫੧. ‘ਤਥਾ’ਤਿ ਵਤ੍ਵਾ ਅਗਮਾਸਿ ਤਤ੍ਥ, ਭੁਞ੍ਜਿਂਸੁ ਭਤ੍ਤਂ ਨ ਚ ਦਕ੍ਖਿਣਾਰਹਾ;

ਪਚ੍ਚਾਗਮਿ ਰਾਜਗਹਂ ਪੁਨਾਪਰਂ, ਪਾਤੁਰਹੋਸਿ ਪੁਰਤੋ ਜਨਾਧਿਪਸ੍ਸ.

੨੫੨. ਦਿਸ੍ਵਾਨ ਪੇਤਂ ਪੁਨਦੇਵ ਆਗਤਂ, ਰਾਜਾ ਅਵੋਚ ‘‘ਅਹਮਪਿ ਕਿਂ ਦਦਾਮਿ;

ਆਚਿਕ੍ਖ ਮੇ ਤਂ ਯਦਿ ਅਤ੍ਥਿ ਹੇਤੁ, ਯੇਨ ਤੁਵਂ ਚਿਰਤਰਂ ਪੀਣਿਤੋ ਸਿਯਾ’’ਤਿ.

੨੫੩. ‘‘ਬੁਦ੍ਧਞ੍ਚ ਸਙ੍ਘਂ ਪਰਿਵਿਸਿਯਾਨ ਰਾਜ, ਅਨ੍ਨੇਨ ਪਾਨੇਨ ਚ ਚੀਵਰੇਨ;

ਤਂ ਦਕ੍ਖਿਣਂ ਆਦਿਸ ਮੇ ਹਿਤਾਯ, ਏਵਂ ਅਹਂ ਚਿਰਤਰਂ ਪੀਣਿਤੋ ਸਿਯਾ’’ਤਿ.

੨੫੪. ਤਤੋ ਚ ਰਾਜਾ ਨਿਪਤਿਤ੍ਵਾ ਤਾਵਦੇ [ਤਾਵਦੇਵ (ਸ੍ਯਾ.), ਤਦੇਵ (ਕ.)], ਦਾਨਂ ਸਹਤ੍ਥਾ ਅਤੁਲਂ ਦਦਿਤ੍ਵਾ [ਅਤੁਲਞ੍ਚ ਦਤ੍ਵਾ (ਸ੍ਯਾ. ਕ.)] ਸਙ੍ਘੇ;

ਆਰੋਚੇਸਿ ਪਕਤਂ [ਆਰੋਚਯੀ ਪਕਤਿਂ (ਸੀ. ਸ੍ਯਾ.)] ਤਥਾਗਤਸ੍ਸ, ਤਸ੍ਸ ਚ ਪੇਤਸ੍ਸ ਦਕ੍ਖਿਣਂ ਆਦਿਸਿਤ੍ਥ.

੨੫੫. ਸੋ ਪੂਜਿਤੋ ਅਤਿਵਿਯ ਸੋਭਮਾਨੋ, ਪਾਤੁਰਹੋਸਿ ਪੁਰਤੋ ਜਨਾਧਿਪਸ੍ਸ;

‘‘ਯਕ੍ਖੋਹਮਸ੍ਮਿ ਪਰਮਿਦ੍ਧਿਪਤ੍ਤੋ, ਨ ਮਯ੍ਹਮਤ੍ਥਿ ਸਮਾ ਸਦਿਸਾ [ਮਯ੍ਹਮਿਦ੍ਧਿਸਮਸਦਿਸਾ (ਸੀ. ਸ੍ਯਾ.)] ਮਾਨੁਸਾ.

੨੫੬. ‘‘ਪਸ੍ਸਾਨੁਭਾਵਂ ਅਪਰਿਮਿਤਂ ਮਮਯਿਦਂ, ਤਯਾਨੁਦਿਟ੍ਠਂ ਅਤੁਲਂ ਦਤ੍ਵਾ ਸਙ੍ਘੇ;

ਸਨ੍ਤਪ੍ਪਿਤੋ ਸਤਤਂ ਸਦਾ ਬਹੂਹਿ, ਯਾਮਿ ਅਹਂ ਸੁਖਿਤੋ ਮਨੁਸ੍ਸਦੇਵਾ’’ਤਿ.

ਚੂਲ਼ਸੇਟ੍ਠਿਪੇਤਵਤ੍ਥੁ ਅਟ੍ਠਮਂ ਨਿਟ੍ਠਿਤਂ.

ਭਾਣਵਾਰਂ ਪਠਮਂ ਨਿਟ੍ਠਿਤਂ.