੨. ਉਬ੍ਬਰਿਵਗ੍ਗੋ

੧. ਸਂਸਾਰਮੋਚਕਪੇਤਿਵਤ੍ਥੁ

੯੫. ‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਕਿਸਾ ਧਮਨਿਸਨ੍ਥਤਾ;

ਉਪ੍ਫਾਸੁਲਿਕੇ [ਉਪ੍ਪਾਸੁਲ਼ਿਕੇ (ਕ.)] ਕਿਸਿਕੇ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ.

੯੬. ‘‘ਅਹਂ ਭਦਨ੍ਤੇ ਪੇਤੀਮ੍ਹਿ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ.

੯੭. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸ ਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤਾ’’ਤਿ.

੯੮. ‘‘ਅਨੁਕਮ੍ਪਕਾ ਮਯ੍ਹਂ ਨਾਹੇਸੁਂ ਭਨ੍ਤੇ, ਪਿਤਾ ਚ ਮਾਤਾ ਅਥਵਾਪਿ ਞਾਤਕਾ;

ਯੇ ਮਂ ਨਿਯੋਜੇਯ੍ਯੁਂ ਦਦਾਹਿ ਦਾਨਂ, ਪਸਨ੍ਨਚਿਤ੍ਤਾ ਸਮਣਬ੍ਰਾਹ੍ਮਣਾਨਂ.

੯੯. ‘‘ਇਤੋ ਅਹਂ ਵਸ੍ਸਸਤਾਨਿ ਪਞ੍ਚ, ਯਂ ਏਵਰੂਪਾ ਵਿਚਰਾਮਿ ਨਗ੍ਗਾ;

ਖੁਦਾਯ ਤਣ੍ਹਾਯ ਚ ਖਜ੍ਜਮਾਨਾ, ਪਾਪਸ੍ਸ ਕਮ੍ਮਸ੍ਸ ਫਲਂ ਮਮੇਦਂ.

੧੦੦. ‘‘ਵਨ੍ਦਾਮਿ ਤਂ ਅਯ੍ਯ ਪਸਨ੍ਨਚਿਤ੍ਤਾ, ਅਨੁਕਮ੍ਪ ਮਂ ਵੀਰ ਮਹਾਨੁਭਾਵ;

ਦਤ੍ਵਾ ਚ ਮੇ ਆਦਿਸ ਯਂ ਹਿ ਕਿਞ੍ਚਿ, ਮੋਚੇਹਿ ਮਂ ਦੁਗ੍ਗਤਿਯਾ ਭਦਨ੍ਤੇ’’ਤਿ.

੧੦੧. ਸਾਧੂਤਿ ਸੋ ਪਟਿਸ੍ਸੁਤ੍ਵਾ, ਸਾਰਿਪੁਤ੍ਤੋਨੁਕਮ੍ਪਕੋ;

ਭਿਕ੍ਖੂਨਂ ਆਲੋਪਂ ਦਤ੍ਵਾ, ਪਾਣਿਮਤ੍ਤਞ੍ਚ ਚੋਲ਼ਕਂ;

ਥਾਲਕਸ੍ਸ ਚ ਪਾਨੀਯਂ, ਤਸ੍ਸਾ ਦਕ੍ਖਿਣਮਾਦਿਸਿ.

੧੦੨. ਸਮਨਨ੍ਤਰਾਨੁਦ੍ਦਿਟ੍ਠੇ, ਵਿਪਾਕੋ ਉਦਪਜ੍ਜਥ;

ਭੋਜਨਚ੍ਛਾਦਨਪਾਨੀਯਂ, ਦਕ੍ਖਿਣਾਯ ਇਦਂ ਫਲਂ.

੧੦੩. ਤਤੋ ਸੁਦ੍ਧਾ ਸੁਚਿਵਸਨਾ, ਕਾਸਿਕੁਤ੍ਤਮਧਾਰਿਨੀ;

ਵਿਚਿਤ੍ਤਵਤ੍ਥਾਭਰਣਾ, ਸਾਰਿਪੁਤ੍ਤਂ ਉਪਸਙ੍ਕਮਿ.

੧੦੪. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੧੦੫. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੦੬. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੦੭. ‘‘ਉਪ੍ਪਣ੍ਡੁਕਿਂ ਕਿਸਂ ਛਾਤਂ, ਨਗ੍ਗਂ ਸਮ੍ਪਤਿਤਚ੍ਛਵਿਂ [ਆਪਤਿਤਚ੍ਛਵਿਂ (ਸੀ.)];

ਮੁਨਿ ਕਾਰੁਣਿਕੋ ਲੋਕੇ, ਤਂ ਮਂ ਅਦ੍ਦਕ੍ਖਿ ਦੁਗ੍ਗਤਂ.

੧੦੮. ‘‘ਭਿਕ੍ਖੂਨਂ ਆਲੋਪਂ ਦਤ੍ਵਾ, ਪਾਣਿਮਤ੍ਤਞ੍ਚ ਚੋਲ਼ਕਂ;

ਥਾਲਕਸ੍ਸ ਚ ਪਾਨੀਯਂ, ਮਮ ਦਕ੍ਖਿਣਮਾਦਿਸਿ.

੧੦੯. ‘‘ਆਲੋਪਸ੍ਸ ਫਲਂ ਪਸ੍ਸ, ਭਤ੍ਤਂ ਵਸ੍ਸਸਤਂ ਦਸ;

ਭੁਞ੍ਜਾਮਿ ਕਾਮਕਾਮਿਨੀ, ਅਨੇਕਰਸਬ੍ਯਞ੍ਜਨਂ.

੧੧੦. ‘‘ਪਾਣਿਮਤ੍ਤਸ੍ਸ ਚੋਲ਼ਸ੍ਸ, ਵਿਪਾਕਂ ਪਸ੍ਸ ਯਾਦਿਸਂ;

ਯਾਵਤਾ ਨਨ੍ਦਰਾਜਸ੍ਸ, ਵਿਜਿਤਸ੍ਮਿਂ ਪਟਿਚ੍ਛਦਾ.

੧੧੧. ‘‘ਤਤੋ ਬਹੁਤਰਾ ਭਨ੍ਤੇ, ਵਤ੍ਥਾਨਚ੍ਛਾਦਨਾਨਿ ਮੇ;

ਕੋਸੇਯ੍ਯਕਮ੍ਬਲੀਯਾਨਿ, ਖੋਮਕਪ੍ਪਾਸਿਕਾਨਿ ਚ.

੧੧੨. ‘‘ਵਿਪੁਲਾ ਚ ਮਹਗ੍ਘਾ ਚ, ਤੇਪਾਕਾਸੇਵਲਮ੍ਬਰੇ;

ਸਾਹਂ ਤਂ ਪਰਿਦਹਾਮਿ, ਯਂ ਯਂ ਹਿ ਮਨਸੋ ਪਿਯਂ.

੧੧੩. ‘‘ਥਾਲਕਸ੍ਸ ਚ ਪਾਨੀਯਂ, ਵਿਪਾਕਂ ਪਸ੍ਸ ਯਾਦਿਸਂ;

ਗਮ੍ਭੀਰਾ ਚਤੁਰਸ੍ਸਾ ਚ, ਪੋਕ੍ਖਰਞ੍ਞੋ ਸੁਨਿਮ੍ਮਿਤਾ.

੧੧੪. ‘‘ਸੇਤੋਦਕਾ ਸੁਪ੍ਪਤਿਤ੍ਥਾ, ਸੀਤਾ ਅਪ੍ਪਟਿਗਨ੍ਧਿਯਾ;

ਪਦੁਮੁਪ੍ਪਲਸਞ੍ਛਨ੍ਨਾ, ਵਾਰਿਕਿਞ੍ਜਕ੍ਖਪੂਰਿਤਾ.

੧੧੫. ‘‘ਸਾਹਂ ਰਮਾਮਿ ਕੀਲ਼ਾਮਿ, ਮੋਦਾਮਿ ਅਕੁਤੋਭਯਾ;

ਮੁਨਿਂ ਕਾਰੁਣਿਕਂ ਲੋਕੇ, ਭਨ੍ਤੇ ਵਨ੍ਦਿਤੁਮਾਗਤਾ’’ਤਿ.

ਸਂਸਾਰਮੋਚਕਪੇਤਿਵਤ੍ਥੁ ਪਠਮਂ.

੨. ਸਾਰਿਪੁਤ੍ਤਤ੍ਥੇਰਮਾਤੁਪੇਤਿਵਤ੍ਥੁ

੧੧੬. ‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਕਿਸਾ ਧਮਨਿਸਨ੍ਥਤਾ;

ਉਪ੍ਫਾਸੁਲਿਕੇ ਕਿਸਿਕੇ, ਕਾ ਨੁ ਤ੍ਵਂ ਇਧ ਤਿਟ੍ਠਸਿ’’.

੧੧੭. ‘‘ਅਹਂ ਤੇ ਸਕਿਯਾ ਮਾਤਾ, ਪੁਬ੍ਬੇ ਅਞ੍ਞਾਸੁ ਜਾਤੀਸੁ;

ਉਪਪਨ੍ਨਾ ਪੇਤ੍ਤਿਵਿਸਯਂ, ਖੁਪ੍ਪਿਪਾਸਸਮਪ੍ਪਿਤਾ.

੧੧੮. ‘‘ਛਡ੍ਡਿਤਂ ਖਿਪਿਤਂ ਖੇਲ਼ਂ, ਸਿਙ੍ਘਾਣਿਕਂ ਸਿਲੇਸੁਮਂ;

ਵਸਞ੍ਚ ਡਯ੍ਹਮਾਨਾਨਂ, ਵਿਜਾਤਾਨਞ੍ਚ ਲੋਹਿਤਂ.

੧੧੯. ‘‘ਵਣਿਕਾਨਞ੍ਚ ਯਂ ਘਾਨ-ਸੀਸਚ੍ਛਿਨ੍ਨਾਨ ਲੋਹਿਤਂ;

ਖੁਦਾਪਰੇਤਾ ਭੁਞ੍ਜਾਮਿ, ਇਤ੍ਥਿਪੁਰਿਸਨਿਸ੍ਸਿਤਂ.

੧੨੦. ‘‘ਪੁਬ੍ਬਲੋਹਿਤਂ ਭਕ੍ਖਾਮਿ [ਪੁਬ੍ਬਲੋਹਿਤਭਕ੍ਖਾਸ੍ਮਿ (ਸੀ.)], ਪਸੂਨਂ ਮਾਨੁਸਾਨ ਚ;

ਅਲੇਣਾ ਅਨਗਾਰਾ ਚ, ਨੀਲਮਞ੍ਚਪਰਾਯਣਾ.

੧੨੧. ‘‘ਦੇਹਿ ਪੁਤ੍ਤਕ ਮੇ ਦਾਨਂ, ਦਤ੍ਵਾ ਅਨ੍ਵਾਦਿਸਾਹਿ ਮੇ;

ਅਪ੍ਪੇਵ ਨਾਮ ਮੁਚ੍ਚੇਯ੍ਯਂ, ਪੁਬ੍ਬਲੋਹਿਤਭੋਜਨਾ’’ਤਿ.

੧੨੨. ਮਾਤੁਯਾ ਵਚਨਂ ਸੁਤ੍ਵਾ, ਉਪਤਿਸ੍ਸੋਨੁਕਮ੍ਪਕੋ;

ਆਮਨ੍ਤਯਿ ਮੋਗ੍ਗਲ੍ਲਾਨਂ, ਅਨੁਰੁਦ੍ਧਞ੍ਚ ਕਪ੍ਪਿਨਂ.

੧੨੩. ਚਤਸ੍ਸੋ ਕੁਟਿਯੋ ਕਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ;

ਕੁਟਿਯੋ ਅਨ੍ਨਪਾਨਞ੍ਚ, ਮਾਤੁ ਦਕ੍ਖਿਣਮਾਦਿਸੀ.

੧੨੪. ਸਮਨਨ੍ਤਰਾਨੁਦ੍ਦਿਟ੍ਠੇ, ਵਿਪਾਕੋ ਉਦਪਜ੍ਜਥ;

ਭੋਜਨਂ ਪਾਨੀਯਂ ਵਤ੍ਥਂ, ਦਕ੍ਖਿਣਾਯ ਇਦਂ ਫਲਂ.

੧੨੫. ਤਤੋ ਸੁਦ੍ਧਾ ਸੁਚਿਵਸਨਾ, ਕਾਸਿਕੁਤ੍ਤਮਧਾਰਿਨੀ;

ਵਿਚਿਤ੍ਤਵਤ੍ਥਾਭਰਣਾ, ਕੋਲਿਤਂ ਉਪਸਙ੍ਕਮਿ.

੧੨੬. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੧੨੭. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੨੮. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੨੯. ‘‘ਸਾਰਿਪੁਤ੍ਤਸ੍ਸਾਹਂ ਮਾਤਾ, ਪੁਬ੍ਬੇ ਅਞ੍ਞਾਸੁ ਜਾਤੀਸੁ;

ਉਪਪਨ੍ਨਾ ਪੇਤ੍ਤਿਵਿਸਯਂ, ਖੁਪ੍ਪਿਪਾਸਸਮਪ੍ਪਿਤਾ.

੧੩੦. ‘‘ਛਡ੍ਡਿਤਂ ਖਿਪਿਤਂ ਖੇਲ਼ਂ, ਸਿਙ੍ਘਾਣਿਕਂ ਸਿਲੇਸੁਮਂ;

ਵਸਞ੍ਚ ਡਯ੍ਹਮਾਨਾਨਂ, ਵਿਜਾਤਾਨਞ੍ਚ ਲੋਹਿਤਂ.

੧੩੧. ‘‘ਵਣਿਕਾਨਞ੍ਚ ਯਂ ਘਾਨ-ਸੀਸਚ੍ਛਿਨ੍ਨਾਨ ਲੋਹਿਤਂ;

ਖੁਦਾਪਰੇਤਾ ਭੁਞ੍ਜਾਮਿ, ਇਤ੍ਥਿਪੁਰਿਸਨਿਸ੍ਸਿਤਂ.

੧੩੨. ‘‘ਪੁਬ੍ਬਲੋਹਿਤਂ ਭਕ੍ਖਿਸ੍ਸਂ, ਪਸੂਨਂ ਮਾਨੁਸਾਨ ਚ;

ਅਲੇਣਾ ਅਨਗਾਰਾ ਚ, ਨੀਲਮਞ੍ਚਪਰਾਯਣਾ.

੧੩੩. ‘‘ਸਾਰਿਪੁਤ੍ਤਸ੍ਸ ਦਾਨੇਨ, ਮੋਦਾਮਿ ਅਕੁਤੋਭਯਾ;

ਮੁਨਿਂ ਕਾਰੁਣਿਕਂ ਲੋਕੇ, ਭਨ੍ਤੇ ਵਨ੍ਦਿਤੁਮਾਗਤਾ’’ਤਿ.

ਸਾਰਿਪੁਤ੍ਤਤ੍ਥੇਰਸ੍ਸ ਮਾਤੁਪੇਤਿਵਤ੍ਥੁ ਦੁਤਿਯਂ.

੩. ਮਤ੍ਤਾਪੇਤਿਵਤ੍ਥੁ

੧੩੪. ‘‘ਨਗ੍ਗਾ ਦੁਬ੍ਬਣ੍ਣਰੂਪਾਸਿ, ਕਿਸਾ ਧਮਨਿਸਨ੍ਥਤਾ;

ਉਪ੍ਫਾਸੁਲਿਕੇ ਕਿਸਿਕੇ, ਕਾ ਨੁ ਤ੍ਵਂ ਇਧ ਤਿਟ੍ਠਸੀ’’ਤਿ.

੧੩੫. ‘‘ਅਹਂ ਮਤ੍ਤਾ ਤੁਵਂ ਤਿਸ੍ਸਾ, ਸਪਤ੍ਤੀ ਤੇ ਪੁਰੇ ਅਹੁਂ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ.

੧੩੬. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕਿਸ੍ਸ ਕਮ੍ਮਵਿਪਾਕੇਨ, ਪੇਤਲੋਕਂ ਇਤੋ ਗਤਾ’’ਤਿ.

੧੩੭. ‘‘ਚਣ੍ਡੀ ਚ ਫਰੁਸਾ ਚਾਸਿਂ, ਇਸ੍ਸੁਕੀ ਮਚ੍ਛਰੀ ਸਠਾ [ਸਠੀ (ਸੀ.)];

ਤਾਹਂ ਦੁਰੁਤ੍ਤਂ ਵਤ੍ਵਾਨ, ਪੇਤਲੋਕਂ ਇਤੋ ਗਤਾ’’ਤਿ.

੧੩੮. ਸਬ੍ਬਂ [ਸਚ੍ਚਂ (ਕ.)] ਅਹਮ੍ਪਿ ਜਾਨਾਮਿ, ਯਥਾ ਤ੍ਵਂ ਚਣ੍ਡਿਕਾ ਅਹੁ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨਾਸਿ ਪਂਸੁਕੁਨ੍ਥਿਤਾ’’ਤਿ.

੧੩੯. ‘‘ਸੀਸਂਨ੍ਹਾਤਾ ਤੁਵਂ ਆਸਿ, ਸੁਚਿਵਤ੍ਥਾ ਅਲਙ੍ਕਤਾ;

ਅਹਞ੍ਚ ਖੋ [ਖੋ ਤਂ (ਸੀ. ਕ.)] ਅਧਿਮਤ੍ਤਂ, ਸਮਲਙ੍ਕਤਤਰਾ ਤਯਾ.

੧੪੦. ‘‘ਤਸ੍ਸਾ ਮੇ ਪੇਕ੍ਖਮਾਨਾਯ, ਸਾਮਿਕੇਨ ਸਮਨ੍ਤਯਿ;

ਤਤੋ ਮੇ ਇਸ੍ਸਾ ਵਿਪੁਲਾ, ਕੋਧੋ ਮੇ ਸਮਜਾਯਥ.

੧੪੧. ‘‘ਤਤੋ ਪਂਸੁਂ ਗਹੇਤ੍ਵਾਨ, ਪਂਸੁਨਾ ਤਂ ਹਿ ਓਕਿਰਿਂ [ਤਂ ਵਿਕੀਰਿਹਂ (ਸ੍ਯਾ. ਕ.)];

ਤਸ੍ਸ ਕਮ੍ਮਵਿਪਾਕੇਨ, ਤੇਨਮ੍ਹਿ ਪਂਸੁਕੁਨ੍ਥਿਤਾ’’ਤਿ.

੧੪੨. ‘‘ਸਚ੍ਚਂ ਅਹਮ੍ਪਿ ਜਾਨਾਮਿ, ਪਂਸੁਨਾ ਮਂ ਤ੍ਵਮੋਕਿਰਿ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨ ਖਜ੍ਜਸਿ ਕਚ੍ਛੁਯਾ’’ਤਿ.

੧੪੩. ‘‘ਭੇਸਜ੍ਜਹਾਰੀ ਉਭਯੋ, ਵਨਨ੍ਤਂ ਅਗਮਿਮ੍ਹਸੇ;

ਤ੍ਵਞ੍ਚ ਭੇਸਜ੍ਜਮਾਹਰਿ, ਅਹਞ੍ਚ ਕਪਿਕਚ੍ਛੁਨੋ.

੧੪੪. ‘‘ਤਸ੍ਸਾ ਤ੍ਯਾਜਾਨਮਾਨਾਯ, ਸੇਯ੍ਯਂ ਤ੍ਯਾਹਂ ਸਮੋਕਿਰਿਂ;

ਤਸ੍ਸ ਕਮ੍ਮਵਿਪਾਕੇਨ, ਤੇਨ ਖਜ੍ਜਾਮਿ ਕਚ੍ਛੁਯਾ’’ਤਿ.

੧੪੫. ‘‘ਸਚ੍ਚਂ ਅਹਮ੍ਪਿ ਜਾਨਾਮਿ, ਸੇਯ੍ਯਂ ਮੇ ਤ੍ਵਂ ਸਮੋਕਿਰਿ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨਾਸਿ ਨਗ੍ਗਿਯਾ ਤੁਵ’’ਨ੍ਤਿ.

੧੪੬. ‘‘ਸਹਾਯਾਨਂ ਸਮਯੋ ਆਸਿ, ਞਾਤੀਨਂ ਸਮਿਤੀ ਅਹੁ;

ਤ੍ਵਞ੍ਚ ਆਮਨ੍ਤਿਤਾ ਆਸਿ, ਸਸਾਮਿਨੀ ਨੋ ਚ ਖੋ ਅਹਂ.

੧੪੭. ‘‘ਤਸ੍ਸਾ ਤ੍ਯਾਜਾਨਮਾਨਾਯ, ਦੁਸ੍ਸਂ ਤ੍ਯਾਹਂ ਅਪਾਨੁਦਿਂ;

ਤਸ੍ਸ ਕਮ੍ਮਵਿਪਾਕੇਨ, ਤੇਨਮ੍ਹਿ ਨਗ੍ਗਿਯਾ ਅਹ’’ਨ੍ਤਿ.

੧੪੮. ‘‘ਸਚ੍ਚਂ ਅਹਮ੍ਪਿ ਜਾਨਾਮਿ, ਦੁਸ੍ਸਂ ਮੇ ਤ੍ਵਂ ਅਪਾਨੁਦਿ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨਾਸਿ ਗੂਥਗਨ੍ਧਿਨੀ’’ਤਿ.

੧੪੯. ‘‘ਤਵ ਗਨ੍ਧਞ੍ਚ ਮਾਲਞ੍ਚ, ਪਚ੍ਚਗ੍ਘਞ੍ਚ ਵਿਲੇਪਨਂ;

ਗੂਥਕੂਪੇ ਅਧਾਰੇਸਿਂ [ਅਧਾਰੇਸਿਂ (ਕ.)], ਤਂ ਪਾਪਂ ਪਕਤਂ ਮਯਾ;

ਤਸ੍ਸ ਕਮ੍ਮਵਿਪਾਕੇਨ, ਤੇਨਮ੍ਹਿ ਗੂਥਗਨ੍ਧਿਨੀ’’ਤਿ.

੧੫੦. ‘‘ਸਚ੍ਚਂ ਅਹਮ੍ਪਿ ਜਾਨਾਮਿ, ਤਂ ਪਾਪਂ ਪਕਤਂ ਤਯਾ;

ਅਞ੍ਞਞ੍ਚ ਖੋ ਤਂ ਪੁਚ੍ਛਾਮਿ, ਕੇਨਾਸਿ ਦੁਗ੍ਗਤਾ ਤੁਵ’’ਨ੍ਤਿ.

੧੫੧. ‘‘ਉਭਿਨ੍ਨਂ ਸਮਕਂ ਆਸਿ, ਯਂ ਗੇਹੇ ਵਿਜ੍ਜਤੇ ਧਨਂ;

ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਾਸਿਮਤ੍ਤਨੋ;

ਤਸ੍ਸ ਕਮ੍ਮਵਿਪਾਕੇਨ, ਤੇਨਮ੍ਹਿ ਦੁਗ੍ਗਤਾ ਅਹਂ.

੧੫੨. ‘‘ਤਦੇਵ ਮਂ ਤ੍ਵਂ ਅਵਚ, ‘ਪਾਪਕਮ੍ਮਂ ਨਿਸੇਵਸਿ;

ਨ ਹਿ ਪਾਪੇਹਿ ਕਮ੍ਮੇਹਿ, ਸੁਲਭਾ ਹੋਤਿ ਸੁਗ੍ਗਤੀ’’’ਤਿ.

੧੫੩. ‘‘ਵਾਮਤੋ ਮਂ ਤ੍ਵਂ ਪਚ੍ਚੇਸਿ, ਅਥੋਪਿ ਮਂ ਉਸੂਯਸਿ;

ਪਸ੍ਸ ਪਾਪਾਨਂ ਕਮ੍ਮਾਨਂ, ਵਿਪਾਕੋ ਹੋਤਿ ਯਾਦਿਸੋ.

੧੫੪. ‘‘ਤੇ ਘਰਾ ਤਾ ਚ ਦਾਸਿਯੋ [ਤੇ ਘਰਦਾਸਿਯੋ ਆਸੁਂ (ਸੀ. ਸ੍ਯਾ.), ਤੇ ਘਰੇ ਦਾਸਿਯੋ ਚੇਵ (ਕ.)], ਤਾਨੇਵਾਭਰਣਾਨਿਮੇ;

ਤੇ ਅਞ੍ਞੇ ਪਰਿਚਾਰੇਨ੍ਤਿ, ਨ ਭੋਗਾ ਹੋਨ੍ਤਿ ਸਸ੍ਸਤਾ.

੧੫੫. ‘‘ਇਦਾਨਿ ਭੂਤਸ੍ਸ ਪਿਤਾ, ਆਪਣਾ ਗੇਹਮੇਹਿਤਿ;

ਅਪ੍ਪੇਵ ਤੇ ਦਦੇ ਕਿਞ੍ਚਿ, ਮਾ ਸੁ ਤਾਵ ਇਤੋ ਅਗਾ’’ਤਿ.

੧੫੬. ‘‘ਨਗ੍ਗਾ ਦੁਬ੍ਬਣ੍ਣਰੂਪਾਮ੍ਹਿ, ਕਿਸਾ ਧਮਨਿਸਨ੍ਥਤਾ;

ਕੋਪੀਨਮੇਤਂ ਇਤ੍ਥੀਨਂ, ਮਾ ਮਂ ਭੂਤਪਿਤਾਦ੍ਦਸਾ’’ਤਿ.

੧੫੭. ‘‘ਹਨ੍ਦ ਕਿਂ ਵਾ ਤ੍ਯਾਹਂ [ਕਿਂ ਤ੍ਯਾਹਂ (ਸੀ. ਸ੍ਯਾ.), ਕਿਂ ਵਤਾਹਂ (ਕ.)] ਦਮ੍ਮਿ, ਕਿਂ ਵਾ ਤੇਧ [ਕਿਂ ਵਾ ਚ ਤੇ (ਸੀ. ਸ੍ਯਾ.), ਕਿਂ ਵਿਧ ਤੇ (ਕ.)] ਕਰੋਮਹਂ;

ਯੇਨ ਤ੍ਵਂ ਸੁਖਿਤਾ ਅਸ੍ਸ, ਸਬ੍ਬਕਾਮਸਮਿਦ੍ਧਿਨੀ’’ਤਿ.

੧੫੮. ‘‘ਚਤ੍ਤਾਰੋ ਭਿਕ੍ਖੂ ਸਙ੍ਘਤੋ, ਚਤ੍ਤਾਰੋ ਪਨ ਪੁਗ੍ਗਲਾ;

ਅਟ੍ਠ ਭਿਕ੍ਖੂ ਭੋਜਯਿਤ੍ਵਾ, ਮਮ ਦਕ੍ਖਿਣਮਾਦਿਸ;

ਤਦਾਹਂ ਸੁਖਿਤਾ ਹੇਸ੍ਸਂ, ਸਬ੍ਬਕਾਮਸਮਿਦ੍ਧਿਨੀ’’ਤਿ.

੧੫੯. ਸਾਧੂਤਿ ਸਾ ਪਟਿਸ੍ਸੁਤ੍ਵਾ, ਭੋਜਯਿਤ੍ਵਾਟ੍ਠ ਭਿਕ੍ਖਵੋ;

ਵਤ੍ਥੇਹਚ੍ਛਾਦਯਿਤ੍ਵਾਨ, ਤਸ੍ਸਾ ਦਕ੍ਖਿਣਮਾਦਿਸੀ.

੧੬੦. ਸਮਨਨ੍ਤਰਾਨੁਦ੍ਦਿਟ੍ਠੇ, ਵਿਪਾਕੋ ਉਦਪਜ੍ਜਥ;

ਭੋਜਨਚ੍ਛਾਦਨਪਾਨੀਯਂ, ਦਕ੍ਖਿਣਾਯ ਇਦਂ ਫਲਂ.

੧੬੧. ਤਤੋ ਸੁਦ੍ਧਾ ਸੁਚਿਵਸਨਾ, ਕਾਸਿਕੁਤ੍ਤਮਧਾਰਿਨੀ;

ਵਿਚਿਤ੍ਤਵਤ੍ਥਾਭਰਣਾ, ਸਪਤ੍ਤਿਂ ਉਪਸਙ੍ਕਮਿ.

੧੬੨. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੧੬੩. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੬੪. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.