੬. ਕਣ੍ਹਪੇਤਵਤ੍ਥੁ

੨੦੭. ‘‘ਉਟ੍ਠੇਹਿ ਕਣ੍ਹ ਕਿਂ ਸੇਸਿ, ਕੋ ਅਤ੍ਥੋ ਸੁਪਨੇਨ ਤੇ;

ਯੋ ਚ ਤੁਯ੍ਹਂ ਸਕੋ ਭਾਤਾ, ਹਦਯਂ ਚਕ੍ਖੁ ਚ [ਚਕ੍ਖੁਂਵ (ਅਟ੍ਠ.)] ਦਕ੍ਖਿਣਂ;

ਤਸ੍ਸ ਵਾਤਾ ਬਲੀਯਨ੍ਤਿ, ਸਸਂ ਜਪ੍ਪਤਿ [ਘਟੋ ਜਪ੍ਪਤਿ (ਕ.)] ਕੇਸਵਾ’’ਤਿ.

੨੦੮. ‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਰੋਹਿਣੇਯ੍ਯਸ੍ਸ ਕੇਸਵੋ;

ਤਰਮਾਨਰੂਪੋ ਵੁਟ੍ਠਾਸਿ, ਭਾਤੁਸੋਕੇਨ ਅਟ੍ਟਿਤੋ.

੨੦੯. ‘‘ਕਿਂ ਨੁ ਉਮ੍ਮਤ੍ਤਰੂਪੋਵ, ਕੇਵਲਂ ਦ੍ਵਾਰਕਂ ਇਮਂ;

ਸਸੋ ਸਸੋਤਿ ਲਪਸਿ, ਕੀਦਿਸਂ ਸਸਮਿਚ੍ਛਸਿ.

੨੧੦. ‘‘ਸੋਵਣ੍ਣਮਯਂ ਮਣਿਮਯਂ, ਲੋਹਮਯਂ ਅਥ ਰੂਪਿਯਮਯਂ;

ਸਙ੍ਖਸਿਲਾਪਵਾਲ਼ਮਯਂ, ਕਾਰਯਿਸ੍ਸਾਮਿ ਤੇ ਸਸਂ.

੨੧੧. ‘‘ਸਨ੍ਤਿ ਅਞ੍ਞੇਪਿ ਸਸਕਾ, ਅਰਞ੍ਞਵਨਗੋਚਰਾ;

ਤੇਪਿ ਤੇ ਆਨਯਿਸ੍ਸਾਮਿ, ਕੀਦਿਸਂ ਸਸਮਿਚ੍ਛਸੀ’’ਤਿ.

੨੧੨. ‘‘ਨਾਹਮੇਤੇ ਸਸੇ ਇਚ੍ਛੇ, ਯੇ ਸਸਾ ਪਥਵਿਸ੍ਸਿਤਾ;

ਚਨ੍ਦਤੋ ਸਸਮਿਚ੍ਛਾਮਿ, ਤਂ ਮੇ ਓਹਰ ਕੇਸਵਾ’’ਤਿ.

੨੧੩. ‘‘ਸੋ ਨੂਨ ਮਧੁਰਂ ਞਾਤਿ, ਜੀਵਿਤਂ ਵਿਜਹਿਸ੍ਸਸਿ;

ਅਪਤ੍ਥਿਯਂ ਪਤ੍ਥਯਸਿ, ਚਨ੍ਦਤੋ ਸਸਮਿਚ੍ਛਸੀ’’ਤਿ.

੨੧੪. ‘‘ਏਵਂ ਚੇ ਕਣ੍ਹ ਜਾਨਾਸਿ, ਯਥਞ੍ਞਮਨੁਸਾਸਸਿ;

ਕਸ੍ਮਾ ਪੁਰੇ ਮਤਂ ਪੁਤ੍ਤਂ, ਅਜ੍ਜਾਪਿ ਮਨੁਸੋਚਸਿ.

੨੧੫. ‘‘ਨ ਯਂ ਲਬ੍ਭਾ ਮਨੁਸ੍ਸੇਨ, ਅਮਨੁਸ੍ਸੇਨ ਵਾ ਪਨ;

ਜਾਤੋ ਮੇ ਮਾ ਮਰਿ ਪੁਤ੍ਤੋ, ਕੁਤੋ ਲਬ੍ਭਾ ਅਲਬ੍ਭਿਯਂ.

੨੧੬. ‘‘ਨ ਮਨ੍ਤਾ ਮੂਲਭੇਸਜ੍ਜਾ, ਓਸਧੇਹਿ ਧਨੇਨ ਵਾ;

ਸਕ੍ਕਾ ਆਨਯਿਤੁਂ ਕਣ੍ਹ, ਯਂ ਪੇਤਮਨੁਸੋਚਸਿ.

੨੧੭. ‘‘ਮਹਦ੍ਧਨਾ ਮਹਾਭੋਗਾ, ਰਟ੍ਠਵਨ੍ਤੋਪਿ ਖਤ੍ਤਿਯਾ;

ਪਹੂਤਧਨਧਞ੍ਞਾਸੇ, ਤੇਪਿ ਨੋ [ਨਤ੍ਥੇਤ੍ਥਪਾਠਭੇਦੋ] ਅਜਰਾਮਰਾ.

੨੧੮. ‘‘ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ, ਸੁਦ੍ਦਾ ਚਣ੍ਡਾਲਪੁਕ੍ਕੁਸਾ;

ਏਤੇ ਚਞ੍ਞੇ ਚ ਜਾਤਿਯਾ, ਤੇਪਿ ਨੋ ਅਜਰਾਮਰਾ.

੨੧੯. ‘‘ਯੇ ਮਨ੍ਤਂ ਪਰਿਵਤ੍ਤੇਨ੍ਤਿ, ਛਲ਼ਙ੍ਗਂ ਬ੍ਰਹ੍ਮਚਿਨ੍ਤਿਤਂ;

ਏਤੇ ਚਞ੍ਞੇ ਚ ਵਿਜ੍ਜਾਯ, ਤੇਪਿ ਨੋ ਅਜਰਾਮਰਾ.

੨੨੦. ‘‘ਇਸਯੋ ਵਾਪਿ [ਇਸਯੋ ਚਾਪਿ (ਵਿਮਾਨਵਤ੍ਥੁ ੯੯)] ਯੇ ਸਨ੍ਤਾ, ਸਞ੍ਞਤਤ੍ਤਾ ਤਪਸ੍ਸਿਨੋ;

ਸਰੀਰਂ ਤੇਪਿ ਕਾਲੇਨ, ਵਿਜਹਨ੍ਤਿ ਤਪਸ੍ਸਿਨੋ.

੨੨੧. ‘‘ਭਾਵਿਤਤ੍ਤਾ ਅਰਹਨ੍ਤੋ, ਕਤਕਿਚ੍ਚਾ ਅਨਾਸਵਾ;

ਨਿਕ੍ਖਿਪਨ੍ਤਿ ਇਮਂ ਦੇਹਂ, ਪੁਞ੍ਞਪਾਪਪਰਿਕ੍ਖਯਾ’’ਤਿ.

੨੨੨. ‘‘ਆਦਿਤ੍ਤਂ ਵਤ ਮਂ ਸਨ੍ਤਂ, ਘਤਸਿਤ੍ਤਂਵ ਪਾਵਕਂ;

ਵਾਰਿਨਾ ਵਿਯ ਓਸਿਞ੍ਚਂ, ਸਬ੍ਬਂ ਨਿਬ੍ਬਾਪਯੇ ਦਰਂ.

੨੨੩. ‘‘ਅਬ੍ਬਹੀ ਵਤ ਮੇ ਸਲ੍ਲਂ, ਸੋਕਂ ਹਦਯਨਿਸ੍ਸਿਤਂ;

ਯੋ ਮੇ ਸੋਕਪਰੇਤਸ੍ਸ, ਪੁਤ੍ਤਸੋਕਂ ਅਪਾਨੁਦਿ.

੨੨੪. ‘‘ਸ੍ਵਾਹਂ ਅਬ੍ਬੂਲ਼੍ਹਸਲ੍ਲੋਸ੍ਮਿ, ਸੀਤਿਭੂਤੋਸ੍ਮਿ ਨਿਬ੍ਬੁਤੋ;

ਨ ਸੋਚਾਮਿ ਨ ਰੋਦਾਮਿ, ਤਵ ਸੁਤ੍ਵਾਨ ਭਾਤਿਕ’’ [ਭਾਸਿਤਂ (ਸ੍ਯਾ.)].

੨੨੫. ਏਵਂ ਕਰੋਨ੍ਤਿ ਸਪ੍ਪਞ੍ਞਾ, ਯੇ ਹੋਨ੍ਤਿ ਅਨੁਕਮ੍ਪਕਾ;

ਨਿਵਤ੍ਤਯਨ੍ਤਿ ਸੋਕਮ੍ਹਾ, ਘਟੋ ਜੇਟ੍ਠਂਵ ਭਾਤਰਂ.

੨੨੬. ਯਸ੍ਸ ਏਤਾਦਿਸਾ ਹੋਨ੍ਤਿ, ਅਮਚ੍ਚਾ ਪਰਿਚਾਰਕਾ;

ਸੁਭਾਸਿਤੇਨ ਅਨ੍ਵੇਨ੍ਤਿ, ਘਟੋ ਜੇਟ੍ਠਂਵ ਭਾਤਰਨ੍ਤਿ.

ਕਣ੍ਹਪੇਤਵਤ੍ਥੁ ਛਟ੍ਠਂ.