੨. ਸਤਿਪਟ੍ਠਾਨਵਾਰੋ

੪੧. ‘‘‘ਅਯਂ ਕਾਯੇ ਕਾਯਾਨੁਪਸ੍ਸਨਾ’ਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ. ਸਾ ਖੋ ਪਨਾਯਂ ਕਾਯੇ ਕਾਯਾਨੁਪਸ੍ਸਨਾ ਭਾਵੇਤਬ੍ਬਾਤਿ ਮੇ, ਭਿਕ੍ਖਵੇ,…ਪੇ… ਭਾਵਿਤਾਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ’’.

‘‘ਅਯਂ ਵੇਦਨਾਸੁ…ਪੇ… ਅਯਂ ਚਿਤ੍ਤੇ… ਅਯਂ ਧਮ੍ਮੇਸੁ ਧਮ੍ਮਾਨੁਪਸ੍ਸਨਾਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ. ਸਾ ਖੋ ਪਨਾਯਂ ਧਮ੍ਮੇਸੁ ਧਮ੍ਮਾਨੁਪਸ੍ਸਨਾ ਭਾਵੇਤਬ੍ਬਾਤਿ ਮੇ, ਭਿਕ੍ਖਵੇ…ਪੇ… ਭਾਵਿਤਾਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ’’.

ਅਯਂ ਕਾਯੇ ਕਾਯਾਨੁਪਸ੍ਸਨਾਤਿ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ…ਪੇ… ਸਾ ਖੋ ਪਨਾਯਂ ਕਾਯੇ ਕਾਯਾਨੁਪਸ੍ਸਨਾ ਭਾਵੇਤਬ੍ਬਾਤਿ…ਪੇ… ਭਾਵਿਤਾਤਿ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ.

ਚਕ੍ਖੁਂ ਉਦਪਾਦੀਤਿ – ਕੇਨਟ੍ਠੇਨ…ਪੇ… ਆਲੋਕੋ ਉਦਪਾਦੀਤਿ – ਕੇਨਟ੍ਠੇਨ? ਚਕ੍ਖੁਂ ਉਦਪਾਦੀਤਿ – ਦਸ੍ਸਨਟ੍ਠੇਨ…ਪੇ… ਆਲੋਕੋ ਉਦਪਾਦੀਤਿ – ਓਭਾਸਟ੍ਠੇਨ.

ਚਕ੍ਖੁਂ ਧਮ੍ਮੋ, ਦਸ੍ਸਨਟ੍ਠੋ ਅਤ੍ਥੋ…ਪੇ… ਆਲੋਕੋ ਧਮ੍ਮੋ, ਓਭਾਸਟ੍ਠੋ ਅਤ੍ਥੋ. ਇਮੇ ਪਞ੍ਚ ਧਮ੍ਮਾ ਪਞ੍ਚ ਅਤ੍ਥਾ ਕਾਯਵਤ੍ਥੁਕਾ ਸਤਿਪਟ੍ਠਾਨਵਤ੍ਥੁਕਾ…ਪੇ… ਵੇਦਨਾਵਤ੍ਥੁਕਾ ਸਤਿਪਟ੍ਠਾਨਵਤ੍ਥੁਕਾ… ਚਿਤ੍ਤਵਤ੍ਥੁਕਾ ਸਤਿਪਟ੍ਠਾਨਵਤ੍ਥੁਕਾ… ਧਮ੍ਮਵਤ੍ਥੁਕਾ ਸਤਿਪਟ੍ਠਾਨਵਤ੍ਥੁਕਾ ਸਤਿਪਟ੍ਠਾਨਾਰਮ੍ਮਣਾ ਸਤਿਪਟ੍ਠਾਨਗੋਚਰਾ ਸਤਿਪਟ੍ਠਾਨਸਙ੍ਗਹਿਤਾ ਸਤਿਪਟ੍ਠਾਨਪਰਿਯਾਪਨ੍ਨਾ ਸਤਿਪਟ੍ਠਾਨੇ ਸਮੁਦਾਗਤਾ ਸਤਿਪਟ੍ਠਾਨੇ ਠਿਤਾ ਸਤਿਪਟ੍ਠਾਨੇ ਪਤਿਟ੍ਠਿਤਾ.

ਧਮ੍ਮਚਕ੍ਕਨ੍ਤਿ ਕੇਨਟ੍ਠੇਨ ਧਮ੍ਮਚਕ੍ਕਂ? ਧਮ੍ਮਞ੍ਚ ਪਵਤ੍ਤੇਤਿ ਚਕ੍ਕਞ੍ਚਾਤਿ – ਧਮ੍ਮਚਕ੍ਕਂ. ਚਕ੍ਕਞ੍ਚ ਪਵਤ੍ਤੇਤਿ ਧਮ੍ਮਞ੍ਚਾਤਿ – ਧਮ੍ਮਚਕ੍ਕਂ. ਧਮ੍ਮੇਨ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਚਰਿਯਾਯ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਠਿਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਪਤਿਟ੍ਠਿਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ …ਪੇ… ਅਮਤੋਗਧਂ ਨਿਬ੍ਬਾਨਂ ਪਰਿਯੋਸਾਨਟ੍ਠੇਨ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ.