੭. ਧਮ੍ਮਚਕ੍ਕਕਥਾ

੧. ਸਚ੍ਚਵਾਰੋ

੩੯. ਏਕਂ ਸਮਯਂ ਭਗਵਾ ਬਾਰਾਣਸਿਯਂ ਵਿਹਰਤਿ…ਪੇ… ਇਤਿ ਹਿਦਂ ਆਯਸ੍ਮਤੋ ਕੋਣ੍ਡਞ੍ਞਸ੍ਸ ‘‘ਅਞ੍ਞਾਸਿਕੋਣ੍ਡਞ੍ਞੋ’’ ਤ੍ਵੇਵ ਨਾਮਂ ਅਹੋਸਿ.

[ਕ] ‘‘ਇਦਂ ਦੁਕ੍ਖਂ ਅਰਿਯਸਚ੍ਚ’’ਨ੍ਤਿ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ, ਞਾਣਂ ਉਦਪਾਦਿ, ਪਞ੍ਞਾ ਉਦਪਾਦਿ, ਵਿਜ੍ਜਾ ਉਦਪਾਦਿ, ਆਲੋਕੋ ਉਦਪਾਦਿ.

ਚਕ੍ਖੁਂ ਉਦਪਾਦੀਤਿ – ਕੇਨਟ੍ਠੇਨ? ਞਾਣਂ ਉਦਪਾਦੀਤਿ – ਕੇਨਟ੍ਠੇਨ? ਪਞ੍ਞਾ ਉਦਪਾਦੀਤਿ – ਕੇਨਟ੍ਠੇਨ? ਵਿਜ੍ਜਾ ਉਦਪਾਦੀਤਿ – ਕੇਨਟ੍ਠੇਨ? ਆਲੋਕੋ ਉਦਪਾਦੀਤਿ – ਕੇਨਟ੍ਠੇਨ? ਚਕ੍ਖੁਂ ਉਦਪਾਦੀਤਿ – ਦਸ੍ਸਨਟ੍ਠੇਨ. ਞਾਣਂ ਉਦਪਾਦੀਤਿ – ਞਾਤਟ੍ਠੇਨ. ਪਞ੍ਞਾ ਉਦਪਾਦੀਤਿ – ਪਜਾਨਨਟ੍ਠੇਨ. ਵਿਜ੍ਜਾ ਉਦਪਾਦੀਤਿ – ਪਟਿਵੇਧਟ੍ਠੇਨ. ਆਲੋਕੋ ਉਦਪਾਦੀਤਿ – ਓਭਾਸਟ੍ਠੇਨ.

ਚਕ੍ਖੁਂ ਧਮ੍ਮੋ, ਦਸ੍ਸਨਟ੍ਠੋ ਅਤ੍ਥੋ. ਞਾਣਂ ਧਮ੍ਮੋ, ਞਾਤਟ੍ਠੋ ਅਤ੍ਥੋ. ਪਞ੍ਞਾ ਧਮ੍ਮੋ, ਪਜਾਨਨਟ੍ਠੋ ਅਤ੍ਥੋ. ਵਿਜ੍ਜਾ ਧਮ੍ਮੋ, ਪਟਿਵੇਧਟ੍ਠੋ ਅਤ੍ਥੋ. ਆਲੋਕੋ ਧਮ੍ਮੋ, ਓਭਾਸਟ੍ਠੋ ਅਤ੍ਥੋ. ਇਮੇ ਪਞ੍ਚ ਧਮ੍ਮਾ ਪਞ੍ਚ ਅਤ੍ਥਾ ਦੁਕ੍ਖਵਤ੍ਥੁਕਾ ਸਚ੍ਚਵਤ੍ਥੁਕਾ ਸਚ੍ਚਾਰਮ੍ਮਣਾ ਸਚ੍ਚਗੋਚਰਾ ਸਚ੍ਚਸਙ੍ਗਹਿਤਾ ਸਚ੍ਚਪਰਿਯਾਪਨ੍ਨਾ ਸਚ੍ਚੇ ਸਮੁਦਾਗਤਾ ਸਚ੍ਚੇ ਠਿਤਾ ਸਚ੍ਚੇ ਪਤਿਟ੍ਠਿਤਾ.

੪੦. ਧਮ੍ਮਚਕ੍ਕਨ੍ਤਿ ਕੇਨਟ੍ਠੇਨ ਧਮ੍ਮਚਕ੍ਕਂ? ਧਮ੍ਮਞ੍ਚ ਪਵਤ੍ਤੇਤਿ ਚਕ੍ਕਞ੍ਚਾਤਿ – ਧਮ੍ਮਚਕ੍ਕਂ. ਚਕ੍ਕਞ੍ਚ ਪਵਤ੍ਤੇਤਿ ਧਮ੍ਮਞ੍ਚਾਤਿ – ਧਮ੍ਮਚਕ੍ਕਂ. ਧਮ੍ਮੇਨ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਚਰਿਯਾਯ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਠਿਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਪਤਿਟ੍ਠਿਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਪਤਿਟ੍ਠਾਪੇਨ੍ਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਵਸਿਪ੍ਪਤ੍ਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਵਸਿਂ ਪਾਪੇਨ੍ਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਪਾਰਮਿਪ੍ਪਤ੍ਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਪਾਰਮਿਂ ਪਾਪੇਨ੍ਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਵੇਸਾਰਜ੍ਜਪ੍ਪਤ੍ਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਵੇਸਾਰਜ੍ਜਂ ਪਾਪੇਨ੍ਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਂ ਸਕ੍ਕਰੋਨ੍ਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਂ ਗਰੁਂ ਕਰੋਨ੍ਤੋ [ਗਰੁਕਰੋਨ੍ਤੋ (ਸ੍ਯਾ.)] ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਂ ਮਾਨੇਨ੍ਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਂ ਪੂਜੇਨ੍ਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਂ ਅਪਚਾਯਮਾਨੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਦ੍ਧਜੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਕੇਤੁ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਾਧਿਪਤੇਯ੍ਯੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਤਂ ਖੋ ਪਨ ਧਮ੍ਮਚਕ੍ਕਂ ਅਪ੍ਪਟਿਵਤ੍ਤਿਯਂ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਕੇਨਚਿ ਵਾ ਲੋਕਸ੍ਮਿਨ੍ਤਿ – ਧਮ੍ਮਚਕ੍ਕਂ.

ਸਦ੍ਧਿਨ੍ਦ੍ਰਿਯਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਵੀਰਿਯਿਨ੍ਦ੍ਰਿਯਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਤਿਨ੍ਦ੍ਰਿਯਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਮਾਧਿਨ੍ਦ੍ਰਿਯਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਪਞ੍ਞਿਨ੍ਦ੍ਰਿਯਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਦ੍ਧਾਬਲਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਵੀਰਿਯਬਲਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਤਿਬਲਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਮਾਧਿਬਲਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਪਞ੍ਞਾਬਲਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਤਿਸਮ੍ਬੋਜ੍ਝਙ੍ਗੋ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਵੀਰਿਯਸਮ੍ਬੋਜ੍ਝਙ੍ਗੋ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਪੀਤਿਸਮ੍ਬੋਜ੍ਝਙ੍ਗੋ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਪਸ੍ਸਦ੍ਧਿਸਮ੍ਬੋਜ੍ਝਙ੍ਗੋ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਮਾਧਿਸਮ੍ਬੋਜ੍ਝਙ੍ਗੋ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਉਪੇਕ੍ਖਾਸਮ੍ਬੋਜ੍ਝਙ੍ਗੋ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਮ੍ਮਾਦਿਟ੍ਠਿ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਮ੍ਮਾਸਙ੍ਕਪ੍ਪੋ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਮ੍ਮਾਵਾਚਾ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਮ੍ਮਾਕਮ੍ਮਨ੍ਤੋ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਮ੍ਮਾਆਜੀਵੋ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਮ੍ਮਾਵਾਯਾਮੋ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਮ੍ਮਾਸਤਿ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਮ੍ਮਾਸਮਾਧਿ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ.

ਆਧਿਪਤੇਯ੍ਯਟ੍ਠੇਨ ਇਨ੍ਦ੍ਰਿਯਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਅਕਮ੍ਪਿਯਟ੍ਠੇਨ ਬਲਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਨਿਯ੍ਯਾਨਿਕਟ੍ਠੇਨ ਬੋਜ੍ਝਙ੍ਗੋ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਹੇਤੁਟ੍ਠੇਨ ਮਗ੍ਗੋ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਉਪਟ੍ਠਾਨਟ੍ਠੇਨ ਸਤਿਪਟ੍ਠਾਨਾ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਪਦਹਨਟ੍ਠੇਨ ਸਮ੍ਮਪ੍ਪਧਾਨਾ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਇਜ੍ਝਨਟ੍ਠੇਨ ਇਦ੍ਧਿਪਾਦਾ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਤਥਟ੍ਠੇਨ ਸਚ੍ਚਾ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਅਵਿਕ੍ਖੇਪਟ੍ਠੇਨ ਸਮਥੋ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਏਕਰਸਟ੍ਠੇਨ ਸਮਥਵਿਪਸ੍ਸਨਾ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਅਨਤਿਵਤ੍ਤਨਟ੍ਠੇਨ ਯੁਗਨਦ੍ਧਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਂਵਰਟ੍ਠੇਨ ਸੀਲਵਿਸੁਦ੍ਧਿ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਅਵਿਕ੍ਖੇਪਟ੍ਠੇਨ ਚਿਤ੍ਤਵਿਸੁਦ੍ਧਿ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਦਸ੍ਸਨਟ੍ਠੇਨ ਦਿਟ੍ਠਿਵਿਸੁਦ੍ਧਿ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਮੁਤ੍ਤਟ੍ਠੇਨ ਵਿਮੋਕ੍ਖੋ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਪਟਿਵੇਧਟ੍ਠੇਨ ਵਿਜ੍ਜਾ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਪਰਿਚ੍ਚਾਗਟ੍ਠੇਨ ਵਿਮੁਤ੍ਤਿ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਮੁਚ੍ਛੇਦਟ੍ਠੇਨ ਖਯੇ ਞਾਣਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਪਟਿਪ੍ਪਸ੍ਸਦ੍ਧਟ੍ਠੇਨ ਅਨੁਪ੍ਪਾਦੇ ਞਾਣਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਛਨ੍ਦੋ ਮੂਲਟ੍ਠੇਨ ਧਮ੍ਮੋ. ਤਂ ਧਮ੍ਮੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਮਨਸਿਕਾਰੋ ਸਮੁਟ੍ਠਾਨਟ੍ਠੇਨ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਫਸ੍ਸੋ ਸਮੋਧਾਨਟ੍ਠੇਨ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਵੇਦਨਾ ਸਮੋਸਰਣਟ੍ਠੇਨ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਮਾਧਿ ਪਮੁਖਟ੍ਠੇਨ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਸਤਿ ਆਧਿਪਤੇਯ੍ਯਟ੍ਠੇਨ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਪਞ੍ਞਾ ਤਤੁਤ੍ਤਰਟ੍ਠੇਨ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਵਿਮੁਤ੍ਤਿ ਸਾਰਟ੍ਠੇਨ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਅਮਤੋਗਧਂ ਨਿਬ੍ਬਾਨਂ ਪਰਿਯੋਸਾਨਟ੍ਠੇਨ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ.

‘‘ਤਂ ਖੋ ਪਨਿਦਂ ਦੁਕ੍ਖਂ ਅਰਿਯਸਚ੍ਚਂ ਪਰਿਞ੍ਞੇਯ੍ਯ’’ਨ੍ਤਿ…ਪੇ… ਪਰਿਞ੍ਞਾਤਨ੍ਤਿ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ.

ਚਕ੍ਖੁਂ ਉਦਪਾਦੀਤਿ – ਕੇਨਟ੍ਠੇਨ…ਪੇ… ਆਲੋਕੋ ਉਦਪਾਦੀਤਿ – ਕੇਨਟ੍ਠੇਨ? ਚਕ੍ਖੁਂ ਉਦਪਾਦੀਤਿ – ਦਸ੍ਸਨਟ੍ਠੇਨ…ਪੇ… ਆਲੋਕੋ ਉਦਪਾਦੀਤਿ – ਓਭਾਸਟ੍ਠੇਨ. ਚਕ੍ਖੁਂ ਧਮ੍ਮੋ, ਦਸ੍ਸਨਟ੍ਠੋ ਅਤ੍ਥੋ…ਪੇ… ਆਲੋਕੋ ਧਮ੍ਮੋ, ਓਭਾਸਟ੍ਠੋ ਅਤ੍ਥੋ. ਇਮੇ ਪਞ੍ਚ ਧਮ੍ਮਾ ਪਞ੍ਚ ਅਤ੍ਥਾ ਦੁਕ੍ਖਵਤ੍ਥੁਕਾ ਸਚ੍ਚਵਤ੍ਥੁਕਾ ਸਚ੍ਚਾਰਮ੍ਮਣਾ ਸਚ੍ਚਗੋਚਰਾ ਸਚ੍ਚਸਙ੍ਗਹਿਤਾ ਸਚ੍ਚਪਰਿਯਾਪਨ੍ਨਾ ਸਚ੍ਚੇ ਸਮੁਦਾਗਤਾ ਸਚ੍ਚੇ ਠਿਤਾ ਸਚ੍ਚੇ ਪਤਿਟ੍ਠਿਤਾ.

ਧਮ੍ਮਚਕ੍ਕਨ੍ਤਿ ਕੇਨਟ੍ਠੇਨ ਧਮ੍ਮਚਕ੍ਕਂ? ਧਮ੍ਮਞ੍ਚ ਪਵਤ੍ਤੇਤਿ ਚਕ੍ਕਞ੍ਚਾਤਿ – ਧਮ੍ਮਚਕ੍ਕਂ. ਚਕ੍ਕਞ੍ਚ ਪਵਤ੍ਤੇਤਿ ਧਮ੍ਮਞ੍ਚਾਤਿ – ਧਮ੍ਮਚਕ੍ਕਂ. ਧਮ੍ਮੇਨ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਪਰਿਯਾਯ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਠਿਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਪਤਿਟ੍ਠਿਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ…ਪੇ… ਅਮਤੋਗਧਂ ਨਿਬ੍ਬਾਨਂ ਪਰਿਯੋਸਾਨਟ੍ਠੇਨ ਧਮ੍ਮੋ ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ.

[ਖ-ਘ] ‘‘ਇਦਂ ਦੁਕ੍ਖਸਮੁਦਯਂ ਅਰਿਯਸਚ੍ਚ’’ਨ੍ਤਿ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ…ਪੇ… ‘‘ਤਂ ਖੋ ਪਨਿਦਂ ਦੁਕ੍ਖਸਮੁਦਯਂ ਅਰਿਯਸਚ੍ਚਂ ਪਹਾਤਬ੍ਬ’’ਨ੍ਤਿ…ਪੇ… ‘‘ਪਹੀਨ’’ਨ੍ਤਿ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ.

ਚਕ੍ਖੁਂ ਉਦਪਾਦੀਤਿ – ਕੇਨਟ੍ਠੇਨ…ਪੇ… ਆਲੋਕੋ ਉਦਪਾਦੀਤਿ – ਕੇਨਟ੍ਠੇਨ? ਚਕ੍ਖੁਂ ਉਦਪਾਦੀਤਿ – ਦਸ੍ਸਨਟ੍ਠੇਨ…ਪੇ… ਆਲੋਕੋ ਉਦਪਾਦੀਤਿ – ਓਭਾਸਟ੍ਠੇਨ.

ਚਕ੍ਖੁਂ ਧਮ੍ਮੋ, ਦਸ੍ਸਨਟ੍ਠੋ ਅਤ੍ਥੋ…ਪੇ… ਆਲੋਕੋ ਧਮ੍ਮੋ, ਓਭਾਸਟ੍ਠੋ ਅਤ੍ਥੋ. ਇਮੇ ਪਞ੍ਚ ਧਮ੍ਮਾ ਪਞ੍ਚ ਅਤ੍ਥਾ ਸਮੁਦਯਵਤ੍ਥੁਕਾ ਸਚ੍ਚਵਤ੍ਥੁਕਾ…ਪੇ… ਨਿਰੋਧਵਤ੍ਥੁਕਾ ਸਚ੍ਚਵਤ੍ਥੁਕਾ…ਪੇ… ਮਗ੍ਗਵਤ੍ਥੁਕਾ ਸਚ੍ਚਵਤ੍ਥੁਕਾ ਸਚ੍ਚਾਰਮ੍ਮਣਾ ਸਚ੍ਚਗੋਚਰਾ ਸਚ੍ਚਸਙ੍ਗਹਿਤਾ ਸਚ੍ਚਪਰਿਯਾਪਨ੍ਨਾ ਸਚ੍ਚੇ ਸਮੁਦਾਗਤਾ ਸਚ੍ਚੇ ਠਿਤਾ ਸਚ੍ਚੇ ਪਤਿਟ੍ਠਿਤਾ.

੨. ਸਤਿਪਟ੍ਠਾਨਵਾਰੋ

੪੧. ‘‘‘ਅਯਂ ਕਾਯੇ ਕਾਯਾਨੁਪਸ੍ਸਨਾ’ਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ. ਸਾ ਖੋ ਪਨਾਯਂ ਕਾਯੇ ਕਾਯਾਨੁਪਸ੍ਸਨਾ ਭਾਵੇਤਬ੍ਬਾਤਿ ਮੇ, ਭਿਕ੍ਖਵੇ,…ਪੇ… ਭਾਵਿਤਾਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ’’.

‘‘ਅਯਂ ਵੇਦਨਾਸੁ…ਪੇ… ਅਯਂ ਚਿਤ੍ਤੇ… ਅਯਂ ਧਮ੍ਮੇਸੁ ਧਮ੍ਮਾਨੁਪਸ੍ਸਨਾਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ. ਸਾ ਖੋ ਪਨਾਯਂ ਧਮ੍ਮੇਸੁ ਧਮ੍ਮਾਨੁਪਸ੍ਸਨਾ ਭਾਵੇਤਬ੍ਬਾਤਿ ਮੇ, ਭਿਕ੍ਖਵੇ…ਪੇ… ਭਾਵਿਤਾਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ’’.

ਅਯਂ ਕਾਯੇ ਕਾਯਾਨੁਪਸ੍ਸਨਾਤਿ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ…ਪੇ… ਸਾ ਖੋ ਪਨਾਯਂ ਕਾਯੇ ਕਾਯਾਨੁਪਸ੍ਸਨਾ ਭਾਵੇਤਬ੍ਬਾਤਿ…ਪੇ… ਭਾਵਿਤਾਤਿ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ.

ਚਕ੍ਖੁਂ ਧਮ੍ਮੋ, ਦਸ੍ਸਨਟ੍ਠੋ ਅਤ੍ਥੋ…ਪੇ… ਆਲੋਕੋ ਧਮ੍ਮੋ, ਓਭਾਸਟ੍ਠੋ ਅਤ੍ਥੋ. ਇਮੇ ਪਞ੍ਚ ਧਮ੍ਮਾ ਪਞ੍ਚ ਅਤ੍ਥਾ ਕਾਯਵਤ੍ਥੁਕਾ ਸਤਿਪਟ੍ਠਾਨਵਤ੍ਥੁਕਾ…ਪੇ… ਵੇਦਨਾਵਤ੍ਥੁਕਾ ਸਤਿਪਟ੍ਠਾਨਵਤ੍ਥੁਕਾ… ਚਿਤ੍ਤਵਤ੍ਥੁਕਾ ਸਤਿਪਟ੍ਠਾਨਵਤ੍ਥੁਕਾ… ਧਮ੍ਮਵਤ੍ਥੁਕਾ ਸਤਿਪਟ੍ਠਾਨਵਤ੍ਥੁਕਾ ਸਤਿਪਟ੍ਠਾਨਾਰਮ੍ਮਣਾ ਸਤਿਪਟ੍ਠਾਨਗੋਚਰਾ ਸਤਿਪਟ੍ਠਾਨਸਙ੍ਗਹਿਤਾ ਸਤਿਪਟ੍ਠਾਨਪਰਿਯਾਪਨ੍ਨਾ ਸਤਿਪਟ੍ਠਾਨੇ ਸਮੁਦਾਗਤਾ ਸਤਿਪਟ੍ਠਾਨੇ ਠਿਤਾ ਸਤਿਪਟ੍ਠਾਨੇ ਪਤਿਟ੍ਠਿਤਾ.

੩. ਇਦ੍ਧਿਪਾਦਵਾਰੋ

੪੨. ‘‘‘ਅਯਂ ਛਨ੍ਦਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤੋ ਇਦ੍ਧਿਪਾਦੋ’ਤਿ ਮੇ, ਭਿਕ੍ਖਵੇ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ. ‘ਸੋ ਖੋ ਪਨਾਯਂ ਛਨ੍ਦਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤੋ ਇਦ੍ਧਿਪਾਦੋ ਭਾਵੇਤਬ੍ਬੋ’ਤਿ ਮੇ, ਭਿਕ੍ਖਵੇ…ਪੇ… ਭਾਵਿਤੋਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ.

‘‘ਅਯਂ ਵੀਰਿਯਸਮਾਧਿ…ਪੇ… ਅਯਂ ਚਿਤ੍ਤਸਮਾਧਿ…ਪੇ… ਅਯਂ ਵੀਮਂਸਾਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤੋ ਇਦ੍ਧਿਪਾਦੋਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ. ਸੋ ਖੋ ਪਨਾਯਂ ਵੀਮਂਸਾਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤੋ ਇਦ੍ਧਿਪਾਦੋ ਭਾਵੇਤਬ੍ਬੋਤਿ ਮੇ, ਭਿਕ੍ਖਵੇ…ਪੇ… ਭਾਵਿਤੋਤਿ ਮੇ, ਭਿਕ੍ਖਵੇ, ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ’’.

ਅਯਂ ਛਨ੍ਦਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤੋ ਇਦ੍ਧਿਪਾਦੋਤਿ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ…ਪੇ… ਸੋ ਖੋ ਪਨਾਯਂ ਛਨ੍ਦਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤੋ ਇਦ੍ਧਿਪਾਦੋ ਭਾਵੇਤਬ੍ਬੋਤਿ…ਪੇ… ਭਾਵਿਤੋਤਿ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ, ਞਾਣਂ ਉਦਪਾਦਿ, ਪਞ੍ਞਾ ਉਦਪਾਦਿ, ਵਿਜ੍ਜਾ ਉਦਪਾਦਿ, ਆਲੋਕੋ ਉਦਪਾਦਿ.

ਚਕ੍ਖੁਂ ਉਦਪਾਦੀਤਿ – ਕੇਨਟ੍ਠੇਨ? ਞਾਣਂ ਉਦਪਾਦੀਤਿ – ਕੇਨਟ੍ਠੇਨ? ਪਞ੍ਞਾ ਉਦਪਾਦੀਤਿ – ਕੇਨਟ੍ਠੇਨ? ਵਿਜ੍ਜਾ ਉਦਪਾਦੀਤਿ – ਕੇਨਟ੍ਠੇਨ? ਆਲੋਕੋ ਉਦਪਾਦੀਤਿ – ਕੇਨਟ੍ਠੇਨ? ਚਕ੍ਖੁਂ ਉਦਪਾਦੀਤਿ – ਦਸ੍ਸਨਟ੍ਠੇਨ. ਞਾਣਂ ਉਦਪਾਦੀਤਿ – ਞਾਤਟ੍ਠੇਨ. ਪਞ੍ਞਾ ਉਦਪਾਦੀਤਿ – ਪਜਾਨਨਟ੍ਠੇਨ. ਵਿਜ੍ਜਾ ਉਦਪਾਦੀਤਿ – ਪਟਿਵੇਧਟ੍ਠੇਨ. ਆਲੋਕੋ ਉਦਪਾਦੀਤਿ – ਓਭਾਸਟ੍ਠੇਨ.

ਚਕ੍ਖੁਂ ਧਮ੍ਮੋ, ਦਸ੍ਸਨਟ੍ਠੋ ਅਤ੍ਥੋ. ਞਾਣਂ ਧਮ੍ਮੋ, ਞਾਤਟ੍ਠੋ ਅਤ੍ਥੋ. ਪਞ੍ਞਾ ਧਮ੍ਮੋ, ਪਜਾਨਨਟ੍ਠੋ ਅਤ੍ਥੋ. ਵਿਜ੍ਜਾ ਧਮ੍ਮੋ, ਪਟਿਵੇਧਟ੍ਠੋ ਅਤ੍ਥੋ. ਆਲੋਕੋ ਧਮ੍ਮੋ, ਓਭਾਸਟ੍ਠੋ ਅਤ੍ਥੋ. ਇਮੇ ਪਞ੍ਚ ਧਮ੍ਮਾ ਪਞ੍ਚ ਅਤ੍ਥਾ ਛਨ੍ਦਵਤ੍ਥੁਕਾ ਇਦ੍ਧਿਪਾਦਵਤ੍ਥੁਕਾ ਇਦ੍ਧਿਪਾਦਾਰਮ੍ਮਣਾ ਇਦ੍ਧਿਪਾਦਗੋਚਰਾ ਇਦ੍ਧਿਪਾਦਸਙ੍ਗਹਿਤਾ ਇਦ੍ਧਿਪਾਦਪਰਿਯਾਪਨ੍ਨਾ ਇਦ੍ਧਿਪਾਦੇ ਸਮੁਦਾਗਤਾ ਇਦ੍ਧਿਪਾਦੇ ਠਿਤਾ ਇਦ੍ਧਿਪਾਦੇ ਪਤਿਟ੍ਠਿਤਾ.

ਧਮ੍ਮਚਕ੍ਕਨ੍ਤਿ ਕੇਨਟ੍ਠੇਨ ਧਮ੍ਮਚਕ੍ਕਂ? ਧਮ੍ਮਞ੍ਚ ਪਵਤ੍ਤੇਤਿ ਚਕ੍ਕਞ੍ਚਾਤਿ – ਧਮ੍ਮਚਕ੍ਕਂ. ਚਕ੍ਕਞ੍ਚ ਪਵਤ੍ਤੇਤਿ ਧਮ੍ਮਞ੍ਚਾਤਿ – ਧਮ੍ਮਚਕ੍ਕਂ. ਧਮ੍ਮੇਨ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਚਰਿਯਾਯ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਠਿਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਪਤਿਟ੍ਠਿਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਪਤਿਟ੍ਠਾਪੇਨ੍ਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਵਸਿਪ੍ਪਤ੍ਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਵਸਿਂ ਪਾਪੇਨ੍ਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਪਾਰਮਿਪ੍ਪਤ੍ਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮੇ ਪਾਰਮਿਂ ਪਾਪੇਨ੍ਤੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ…ਪੇ… ਧਮ੍ਮਂ ਅਪਚਾਯਮਾਨੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਦ੍ਧਜੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਕੇਤੁ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਧਮ੍ਮਾਧਿਪਤੇਯ੍ਯੋ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ. ਤਂ ਖੋ ਪਨ ਧਮ੍ਮਚਕ੍ਕਂ ਅਪ੍ਪਟਿਵਤ੍ਤਿਯਂ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਕੇਨਚਿ ਵਾ ਲੋਕਸ੍ਮਿਨ੍ਤਿ – ਧਮ੍ਮਚਕ੍ਕਂ.

ਸਦ੍ਧਿਨ੍ਦ੍ਰਿਯਂ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ…ਪੇ… ਅਮਤੋਗਧਂ ਨਿਬ੍ਬਾਨਂ ਪਰਿਯੋਸਾਨਟ੍ਠੇਨ ਧਮ੍ਮੋ. ਤਂ ਧਮ੍ਮਂ ਪਵਤ੍ਤੇਤੀਤਿ – ਧਮ੍ਮਚਕ੍ਕਂ.

ਅਯਂ ਵੀਰਿਯਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤੋ ਇਦ੍ਧਿਪਾਦੋਤਿ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ…ਪੇ… ਸੋ ਖੋ ਪਨਾਯਂ ਵੀਰਿਯਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤੋ ਇਦ੍ਧਿਪਾਦੋ ਭਾਵੇਤਬ੍ਬੋਤਿ…ਪੇ… ਭਾਵਿਤੋਤਿ ਪੁਬ੍ਬੇ ਅਨਨੁਸ੍ਸੁਤੇਸੁ ਧਮ੍ਮੇਸੁ ਚਕ੍ਖੁਂ ਉਦਪਾਦਿ…ਪੇ… ਆਲੋਕੋ ਉਦਪਾਦਿ.

ਚਕ੍ਖੁਂ ਧਮ੍ਮੋ, ਦਸ੍ਸਨਟ੍ਠੋ ਅਤ੍ਥੋ…ਪੇ… ਆਲੋਕੋ ਧਮ੍ਮੋ, ਓਭਾਸਟ੍ਠੋ ਅਤ੍ਥੋ. ਇਮੇ ਪਞ੍ਚ ਧਮ੍ਮਾ ਪਞ੍ਚ ਅਤ੍ਥਾ ਵੀਰਿਯਵਤ੍ਥੁਕਾ ਇਦ੍ਧਿਪਾਦਵਤ੍ਥੁਕਾ…ਪੇ… ਚਿਤ੍ਤਵਤ੍ਥੁਕਾ ਇਦ੍ਧਿਪਾਦਵਤ੍ਥੁਕਾ… ਵੀਮਂਸਾਵਤ੍ਥੁਕਾ ਇਦ੍ਧਿਪਾਦਵਤ੍ਥੁਕਾ ਇਦ੍ਧਿਪਾਦਾਰਮ੍ਮਣਾ ਇਦ੍ਧਿਪਾਦਗੋਚਰਾ ਇਦ੍ਧਿਪਾਦਸਙ੍ਗਹਿਤਾ ਇਦ੍ਧਿਪਾਦਪਰਿਯਾਪਨ੍ਨਾ ਇਦ੍ਧਿਪਾਦੇ ਸਮੁਦਾਗਤਾ ਇਦ੍ਧਿਪਾਦੇ ਠਿਤਾ ਇਦ੍ਧਿਪਾਦੇ ਪਤਿਟ੍ਠਿਤਾ.

ਧਮ੍ਮਚਕ੍ਕਕਥਾ ਨਿਟ੍ਠਿਤਾ.