੨. ਯੁਗਨਦ੍ਧਵਗ੍ਗੋ

੧. ਯੁਗਨਦ੍ਧਕਥਾ

੧. ਏਵਂ ਮੇ ਸੁਤਂ – ਏਕਂ ਸਮਯਂ ਆਯਸ੍ਮਾ ਆਨਨ੍ਦੋ ਕੋਸਮ੍ਬਿਯਂ ਵਿਹਰਤਿ ਘੋਸਿਤਾਰਾਮੇ. ਤਤ੍ਰ ਖੋ ਆਯਸ੍ਮਾ ਆਨਨ੍ਦੋ ਭਿਕ੍ਖੂ ਆਮਨ੍ਤੇਸਿ – ‘‘ਆਵੁਸੋ ਭਿਕ੍ਖਵੋ’’ਤਿ. ‘‘ਆਵੁਸੋ’’ਤਿ ਖੋ ਤੇ ਭਿਕ੍ਖੂ ਆਯਸ੍ਮਤੋ ਆਨਨ੍ਦਸ੍ਸ ਪਚ੍ਚਸ੍ਸੋਸੁਂ. ਆਯਸ੍ਮਾ ਆਨਨ੍ਦੋ ਏਤਦਵੋਚ –

‘‘ਯੋ ਹਿ ਕੋਚਿ, ਆਵੁਸੋ, ਭਿਕ੍ਖੁ ਵਾ ਭਿਕ੍ਖੁਨੀ ਵਾ ਮਮ ਸਨ੍ਤਿਕੇ ਅਰਹਤ੍ਤਪਤ੍ਤਂ [ਅਰਹਤ੍ਤਂ (ਸ੍ਯਾ.), ਅਰਹਤ੍ਤਪਤ੍ਤਿਂ ਅ. ਨਿ. ੪.੧੭੦] ਬ੍ਯਾਕਰੋਤਿ, ਸਬ੍ਬਸੋ ਚਤੂਹਿ ਮਗ੍ਗੇਹਿ ਏਤੇਸਂ ਵਾ ਅਞ੍ਞਤਰੇਨ. ਕਤਮੇਹਿ ਚਤੂਹਿ?

‘‘ਇਧਾਵੁਸੋ, ਭਿਕ੍ਖੁ ਸਮਥਪੁਬ੍ਬਙ੍ਗਮਂ ਵਿਪਸ੍ਸਨਂ ਭਾਵੇਤਿ. ਤਸ੍ਸ ਸਮਥਪੁਬ੍ਬਙ੍ਗਮਂ ਵਿਪਸ੍ਸਨਂ ਭਾਵਯਤੋ ਮਗ੍ਗੋ ਸਞ੍ਜਾਯਤਿ. ਸੋ ਤਂ ਮਗ੍ਗਂ ਆਸੇਵਤਿ ਭਾਵੇਤਿ ਬਹੁਲੀਕਰੋਤਿ [ਬਹੁਲਿਂ ਕਰੋਤਿ (ਕ.) ਅ. ਨਿ. ੪.੧੭੦ ਪਸ੍ਸਿਤਬ੍ਬਾ]. ਤਸ੍ਸ ਤਂ ਮਗ੍ਗਂ ਆਸੇਵਤੋ ਭਾਵਯਤੋ ਬਹੁਲੀਕਰੋਤੋ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ.

‘‘ਪੁਨ ਚਪਰਂ, ਆਵੁਸੋ, ਭਿਕ੍ਖੁ ਵਿਪਸ੍ਸਨਾਪੁਬ੍ਬਙ੍ਗਮਂ ਸਮਥਂ ਭਾਵੇਤਿ. ਤਸ੍ਸ ਵਿਪਸ੍ਸਨਾਪੁਬ੍ਬਙ੍ਗਮਂ ਸਮਥਂ ਭਾਵਯਤੋ ਮਗ੍ਗੋ ਸਞ੍ਜਾਯਤਿ. ਸੋ ਤਂ ਮਗ੍ਗਂ ਆਸੇਵਤਿ ਭਾਵੇਤਿ ਬਹੁਲੀਕਰੋਤਿ. ਤਸ੍ਸ ਤਂ ਮਗ੍ਗਂ ਆਸੇਵਤੋ ਭਾਵਯਤੋ ਬਹੁਲੀਕਰੋਤੋ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ.

‘‘ਪੁਨ ਚਪਰਂ, ਆਵੁਸੋ, ਭਿਕ੍ਖੁ ਸਮਥਵਿਪਸ੍ਸਨਂ ਯੁਗਨਦ੍ਧਂ [ਯੁਗਨਨ੍ਧਂ (ਕ. ਸੀ. ਅਟ੍ਠ.)] ਭਾਵੇਤਿ. ਤਸ੍ਸ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵਯਤੋ ਮਗ੍ਗੋ ਸਞ੍ਜਾਯਤਿ. ਸੋ ਤਂ ਮਗ੍ਗਂ ਆਸੇਵਤਿ ਭਾਵੇਤਿ ਬਹੁਲੀਕਰੋਤਿ. ਤਸ੍ਸ ਤਂ ਮਗ੍ਗਂ ਆਸੇਵਤੋ ਭਾਵਯਤੋ ਬਹੁਲੀਕਰੋਤੋ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ.

‘‘ਪੁਨ ਚਪਰਂ, ਆਵੁਸੋ, ਭਿਕ੍ਖੁਨੋ ਧਮ੍ਮੁਦ੍ਧਚ੍ਚਵਿਗ੍ਗਹਿਤਂ ਮਾਨਸਂ ਹੋਤਿ. ਸੋ, ਆਵੁਸੋ, ਸਮਯੋ ਯਂ ਤਂ ਚਿਤ੍ਤਂ ਅਜ੍ਝਤ੍ਤਮੇਵ [ਅਜ੍ਝਤ੍ਤਞ੍ਞੇਵ (ਸ੍ਯਾ. ਕ.)] ਸਨ੍ਤਿਟ੍ਠਤਿ ਸਨ੍ਨਿਸੀਦਤਿ ਏਕੋਦਿ ਹੋਤਿ ਸਮਾਧਿਯਤਿ. ਤਸ੍ਸ ਮਗ੍ਗੋ ਸਞ੍ਜਾਯਤਿ. ਸੋ ਤਂ ਮਗ੍ਗਂ ਆਸੇਵਤਿ ਭਾਵੇਤਿ ਬਹੁਲੀਕਰੋਤਿ. ਤਸ੍ਸ ਤਂ ਮਗ੍ਗਂ ਆਸੇਵਤੋ ਭਾਵਯਤੋ ਬਹੁਲੀਕਰੋਤੋ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ.

‘‘ਯੋ ਹਿ ਕੋਚਿ, ਆਵੁਸੋ, ਭਿਕ੍ਖੁ ਵਾ ਭਿਕ੍ਖੁਨੀ ਵਾ ਮਮ ਸਨ੍ਤਿਕੇ ਅਰਹਤ੍ਤਪਤ੍ਤਂ ਬ੍ਯਾਕਰੋਤਿ, ਸਬ੍ਬਸੋ ਇਮੇਹਿ ਚਤੂਹਿ ਮਗ੍ਗੇਹਿ, ਏਤੇਸਂ ਵਾ ਅਞ੍ਞਤਰੇਨਾ’’ਤਿ.

੧. ਸੁਤ੍ਤਨ੍ਤਨਿਦ੍ਦੇਸੋ

੨. ਕਥਂ ਸਮਥਪੁਬ੍ਬਙ੍ਗਮਂ ਵਿਪਸ੍ਸਨਂ ਭਾਵੇਤਿ? ਨੇਕ੍ਖਮ੍ਮਵਸੇਨ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ. ਤਤ੍ਥ ਜਾਤੇ ਧਮ੍ਮੇ ਅਨਿਚ੍ਚਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਦੁਕ੍ਖਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਅਨਤ੍ਤਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ. ਇਤਿ ਪਠਮਂ ਸਮਥੋ, ਪਚ੍ਛਾ ਵਿਪਸ੍ਸਨਾ. ਤੇਨ ਵੁਚ੍ਚਤਿ – ‘‘ਸਮਥਪੁਬ੍ਬਙ੍ਗਮਂ ਵਿਪਸ੍ਸਨਂ ਭਾਵੇਤੀ’’ਤਿ. ਭਾਵੇਤੀਤਿ ਚਤਸ੍ਸੋ ਭਾਵਨਾ – ਤਤ੍ਥ ਜਾਤਾਨਂ ਧਮ੍ਮਾਨਂ ਅਨਤਿਵਤ੍ਤਨਟ੍ਠੇਨ ਭਾਵਨਾ, ਇਨ੍ਦ੍ਰਿਯਾਨਂ ਏਕਰਸਟ੍ਠੇਨ ਭਾਵਨਾ, ਤਦੁਪਗਵੀਰਿਯਵਾਹਨਟ੍ਠੇਨ ਭਾਵਨਾ, ਆਸੇਵਨਟ੍ਠੇਨ ਭਾਵਨਾ.

ਮਗ੍ਗੋ ਸਞ੍ਜਾਯਤੀਤਿ ਕਥਂ ਮਗ੍ਗੋ ਸਞ੍ਜਾਯਤਿ? ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿ ਮਗ੍ਗੋ ਸਞ੍ਜਾਯਤਿ, ਅਭਿਨਿਰੋਪਨਟ੍ਠੇਨ ਸਮ੍ਮਾਸਙ੍ਕਪ੍ਪੋ ਮਗ੍ਗੋ ਸਞ੍ਜਾਯਤਿ, ਪਰਿਗ੍ਗਹਟ੍ਠੇਨ ਸਮ੍ਮਾਵਾਚਾ ਮਗ੍ਗੋ ਸਞ੍ਜਾਯਤਿ, ਸਮੁਟ੍ਠਾਨਟ੍ਠੇਨ ਸਮ੍ਮਾਕਮ੍ਮਨ੍ਤੋ ਮਗ੍ਗੋ ਸਞ੍ਜਾਯਤਿ, ਵੋਦਾਨਟ੍ਠੇਨ ਸਮ੍ਮਾਆਜੀਵੋ ਮਗ੍ਗੋ ਸਞ੍ਜਾਯਤਿ, ਪਗ੍ਗਹਟ੍ਠੇਨ ਸਮ੍ਮਾਵਾਯਾਮੋ ਮਗ੍ਗੋ ਸਞ੍ਜਾਯਤਿ, ਉਪਟ੍ਠਾਨਟ੍ਠੇਨ ਸਮ੍ਮਾਸਤਿ ਮਗ੍ਗੋ ਸਞ੍ਜਾਯਤਿ, ਅਵਿਕ੍ਖੇਪਟ੍ਠੇਨ ਸਮ੍ਮਾਸਮਾਧਿ ਮਗ੍ਗੋ ਸਞ੍ਜਾਯਤਿ – ਏਵਂ ਮਗ੍ਗੋ ਸਞ੍ਜਾਯਤਿ.

ਸੋ ਤਂ ਮਗ੍ਗਂ ਆਸੇਵਤਿ ਭਾਵੇਤਿ ਬਹੁਲੀਕਰੋਤਿ ਆਸੇਵਤੀਤਿ ਕਥਂ ਆਸੇਵਤਿ? ਆਵਜ੍ਜਨ੍ਤੋ ਆਸੇਵਤਿ, ਜਾਨਨ੍ਤੋ ਆਸੇਵਤਿ, ਪਸ੍ਸਨ੍ਤੋ ਆਸੇਵਤਿ, ਪਚ੍ਚਵੇਕ੍ਖਨ੍ਤੋ ਆਸੇਵਤਿ, ਚਿਤ੍ਤਂ ਅਧਿਟ੍ਠਹਨ੍ਤੋ ਆਸੇਵਤਿ, ਸਦ੍ਧਾਯ ਅਧਿਮੁਚ੍ਚਨ੍ਤੋ ਆਸੇਵਤਿ, ਵੀਰਿਯਂ ਪਗ੍ਗਣ੍ਹਨ੍ਤੋ ਆਸੇਵਤਿ, ਸਤਿਂ ਉਪਟ੍ਠਾਪੇਨ੍ਤੋ ਆਸੇਵਤਿ, ਚਿਤ੍ਤਂ ਸਮਾਦਹਨ੍ਤੋ ਆਸੇਵਤਿ, ਪਞ੍ਞਾਯ ਪਜਾਨਨ੍ਤੋ ਆਸੇਵਤਿ, ਅਭਿਞ੍ਞੇਯ੍ਯਂ ਅਭਿਜਾਨਨ੍ਤੋ ਆਸੇਵਤਿ, ਪਰਿਞ੍ਞੇਯ੍ਯਂ ਪਰਿਜਾਨਨ੍ਤੋ ਆਸੇਵਤਿ, ਪਹਾਤਬ੍ਬਂ ਪਜਹਨ੍ਤੋ ਆਸੇਵਤਿ, ਭਾਵੇਤਬ੍ਬਂ ਭਾਵੇਨ੍ਤੋ ਆਸੇਵਤਿ, ਸਚ੍ਛਿਕਾਤਬ੍ਬਂ ਸਚ੍ਛਿਕਰੋਨ੍ਤੋ ਆਸੇਵਤਿ – ਏਵਂ ਆਸੇਵਤਿ.

ਭਾਵੇਤੀਤਿ ਕਥਂ ਭਾਵੇਤਿ? ਆਵਜ੍ਜਨ੍ਤੋ ਭਾਵੇਤਿ, ਜਾਨਨ੍ਤੋ ਭਾਵੇਤਿ, ਪਸ੍ਸਨ੍ਤੋ ਭਾਵੇਤਿ, ਪਚ੍ਚਵੇਕ੍ਖਨ੍ਤੋ ਭਾਵੇਤਿ, ਚਿਤ੍ਤਂ ਅਧਿਟ੍ਠਹਨ੍ਤੋ ਭਾਵੇਤਿ, ਸਦ੍ਧਾਯ ਅਧਿਮੁਚ੍ਚਨ੍ਤੋ ਭਾਵੇਤਿ, ਵੀਰਿਯਂ ਪਗ੍ਗਣ੍ਹਨ੍ਤੋ ਭਾਵੇਤਿ, ਸਤਿਂ ਉਪਟ੍ਠਾਪੇਨ੍ਤੋ ਭਾਵੇਤਿ, ਚਿਤ੍ਤਂ ਸਮਾਦਹਨ੍ਤੋ ਭਾਵੇਤਿ, ਪਞ੍ਞਾਯ ਪਜਾਨਨ੍ਤੋ ਭਾਵੇਤਿ, ਅਭਿਞ੍ਞੇਯ੍ਯਂ ਅਭਿਜਾਨਨ੍ਤੋ ਭਾਵੇਤਿ, ਪਰਿਞ੍ਞੇਯ੍ਯਂ ਪਰਿਜਾਨਨ੍ਤੋ ਭਾਵੇਤਿ, ਪਹਾਤਬ੍ਬਂ ਪਜਹਨ੍ਤੋ ਭਾਵੇਤਿ, ਭਾਵੇਤਬ੍ਬਂ ਭਾਵੇਨ੍ਤੋ ਭਾਵੇਤਿ, ਸਚ੍ਛਿਕਾਤਬ੍ਬਂ ਸਚ੍ਛਿਕਰੋਨ੍ਤੋ ਭਾਵੇਤਿ – ਏਵਂ ਭਾਵੇਤਿ.

ਬਹੁਲੀਕਰੋਤੀਤਿ ਕਥਂ ਬਹੁਲੀਕਰੋਤਿ? ਆਵਜ੍ਜਨ੍ਤੋ ਬਹੁਲੀਕਰੋਤਿ, ਜਾਨਨ੍ਤੋ ਬਹੁਲੀਕਰੋਤਿ, ਪਸ੍ਸਨ੍ਤੋ ਬਹੁਲੀਕਰੋਤਿ, ਪਚ੍ਚਵੇਕ੍ਖਨ੍ਤੋ ਬਹੁਲੀਕਰੋਤਿ, ਚਿਤ੍ਤਂ ਅਧਿਟ੍ਠਹਨ੍ਤੋ ਬਹੁਲੀਕਰੋਤਿ, ਸਦ੍ਧਾਯ ਅਧਿਮੁਚ੍ਚਨ੍ਤੋ ਬਹੁਲੀਕਰੋਤਿ, ਵੀਰਿਯਂ ਪਗ੍ਗਣ੍ਹਨ੍ਤੋ ਬਹੁਲੀਕਰੋਤਿ, ਸਤਿਂ ਉਪਟ੍ਠਾਪੇਨ੍ਤੋ ਬਹੁਲੀਕਰੋਤਿ, ਚਿਤ੍ਤਂ ਸਮਾਦਹਨ੍ਤੋ ਬਹੁਲੀਕਰੋਤਿ, ਪਞ੍ਞਾਯ ਪਜਾਨਨ੍ਤੋ ਬਹੁਲੀਕਰੋਤਿ, ਅਭਿਞ੍ਞੇਯ੍ਯਂ ਅਭਿਜਾਨਨ੍ਤੋ ਬਹੁਲੀਕਰੋਤਿ, ਪਰਿਞ੍ਞੇਯ੍ਯਂ ਪਰਿਜਾਨਨ੍ਤੋ ਬਹੁਲੀਕਰੋਤਿ, ਪਹਾਤਬ੍ਬਂ ਪਜਹਨ੍ਤੋ ਬਹੁਲੀਕਰੋਤਿ, ਭਾਵੇਤਬ੍ਬਂ ਭਾਵੇਨ੍ਤੋ ਬਹੁਲੀਕਰੋਤਿ, ਸਚ੍ਛਿਕਾਤਬ੍ਬਂ ਸਚ੍ਛਿਕਰੋਨ੍ਤੋ ਬਹੁਲੀਕਰੋਤਿ – ਏਵਂ ਬਹੁਲੀਕਰੋਤਿ.

ਤਸ੍ਸ ਤਂ ਮਗ੍ਗਂ ਆਸੇਵਤੋ ਭਾਵਯਤੋ ਬਹੁਲੀਕਰੋਤੋ ਸਞ੍ਞੋਜਨਾਨਿ ਪਹੀਯਨ੍ਤਿ ਅਨੁਸਯਾ ਬ੍ਯਨ੍ਤੀਹੋਨ੍ਤੀਤਿ ਕਥਂ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ? ਸੋਤਾਪਤ੍ਤਿਮਗ੍ਗੇਨ, ਸਕ੍ਕਾਯਦਿਟ੍ਠਿ, ਵਿਚਿਕਿਚ੍ਛਾ, ਸੀਲਬ੍ਬਤਪਰਾਮਾਸੋ – ਇਮਾਨਿ ਤੀਣਿ ਸਞ੍ਞੋਜਨਾਨਿ ਪਹੀਯਨ੍ਤਿ; ਦਿਟ੍ਠਾਨੁਸਯੋ, ਵਿਚਿਕਿਚ੍ਛਾਨੁਸਯੋ – ਇਮੇ ਦ੍ਵੇ ਅਨੁਸਯਾ ਬ੍ਯਨ੍ਤੀਹੋਨ੍ਤਿ. ਸਕਦਾਗਾਮਿਮਗ੍ਗੇਨ ਓਲ਼ਾਰਿਕਂ ਕਾਮਰਾਗਸਞ੍ਞੋਜਨਂ, ਪਟਿਘਸਞ੍ਞੋਜਨਂ – ਇਮਾਨਿ ਦ੍ਵੇ ਸਞ੍ਞੋਜਨਾਨਿ ਪਹੀਯਨ੍ਤਿ; ਓਲ਼ਾਰਿਕੋ ਕਾਮਰਾਗਾਨੁਸਯੋ, ਪਟਿਘਾਨੁਸਯੋ – ਇਮੇ ਦ੍ਵੇ ਅਨੁਸਯਾ ਬ੍ਯਨ੍ਤੀਹੋਨ੍ਤਿ. ਅਨਾਗਾਮਿਮਗ੍ਗੇਨ ਅਨੁਸਹਗਤਂ ਕਾਮਰਾਗਸਞ੍ਞੋਜਨਂ, ਪਟਿਘਸਞ੍ਞੋਜਨਂ – ਇਮਾਨਿ ਦ੍ਵੇ ਸਞ੍ਞੋਜਨਾਨਿ ਪਹੀਯਨ੍ਤਿ; ਅਨੁਸਹਗਤੋ ਕਾਮਰਾਗਾਨੁਸਯੋ, ਪਟਿਘਾਨੁਸਯੋ – ਇਮੇ ਦ੍ਵੇ ਅਨੁਸਯਾ ਬ੍ਯਨ੍ਤੀਹੋਨ੍ਤਿ. ਅਰਹਤ੍ਤਮਗ੍ਗੇਨ ਰੂਪਰਾਗੋ, ਅਰੂਪਰਾਗੋ, ਮਾਨੋ, ਉਦ੍ਧਚ੍ਚਂ, ਅਵਿਜ੍ਜਾ – ਇਮਾਨਿ ਪਞ੍ਚ ਸਞ੍ਞੋਜਨਾਨਿ ਪਹੀਯਨ੍ਤਿ; ਮਾਨਾਨੁਸਯੋ, ਭਵਰਾਗਾਨੁਸਯੋ, ਅਵਿਜ੍ਜਾਨੁਸਯੋ – ਇਮੇ ਤਯੋ ਅਨੁਸਯਾ ਬ੍ਯਨ੍ਤੀਹੋਨ੍ਤਿ. ਏਵਂ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ.

੩. ਅਬ੍ਯਾਪਾਦਵਸੇਨ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ…ਪੇ… ਆਲੋਕਸਞ੍ਞਾਵਸੇਨ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ…ਪੇ… ਪਟਿਨਿਸ੍ਸਗ੍ਗਾਨੁਪਸ੍ਸੀ ਅਸ੍ਸਾਸਵਸੇਨ ਪਟਿਨਿਸ੍ਸਗ੍ਗਾਨੁਪਸ੍ਸੀ ਪਸ੍ਸਾਸਵਸੇਨ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ. ਤਤ੍ਥ ਜਾਤੇ ਧਮ੍ਮੇ ਅਨਿਚ੍ਚਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਦੁਕ੍ਖਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਅਨਤ੍ਤਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ. ਇਤਿ ਪਠਮਂ ਸਮਥੋ, ਪਚ੍ਛਾ ਵਿਪਸ੍ਸਨਾ. ਤੇਨ ਵੁਚ੍ਚਤਿ – ‘‘ਸਮਥਪੁਬ੍ਬਙ੍ਗਮਂ ਵਿਪਸ੍ਸਨਂ ਭਾਵੇਤੀ’’ਤਿ. ਭਾਵੇਤੀਤਿ ਚਤਸ੍ਸੋ ਭਾਵਨਾ – ਤਤ੍ਥ ਜਾਤਾਨਂ ਧਮ੍ਮਾਨਂ ਅਨਤਿਵਤ੍ਤਨਟ੍ਠੇਨ ਭਾਵਨਾ, ਇਨ੍ਦ੍ਰਿਯਾਨਂ ਏਕਰਸਟ੍ਠੇਨ ਭਾਵਨਾ, ਤਦੁਪਗਵੀਰਿਯਵਾਹਨਟ੍ਠੇਨ ਭਾਵਨਾ, ਆਸੇਵਨਟ੍ਠੇਨ ਭਾਵਨਾ.

ਮਗ੍ਗੋ ਸਞ੍ਜਾਯਤੀਤਿ ਕਥਂ ਮਗ੍ਗੋ ਸਞ੍ਜਾਯਤਿ? ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿ ਮਗ੍ਗੋ ਸਞ੍ਜਾਯਤਿ, ਅਭਿਨਿਰੋਪਨਟ੍ਠੇਨ ਸਮ੍ਮਾਸਙ੍ਕਪ੍ਪੋ ਮਗ੍ਗੋ ਸਞ੍ਜਾਯਤਿ…ਪੇ… ਅਵਿਕ੍ਖੇਪਟ੍ਠੇਨ ਸਮ੍ਮਾਸਮਾਧਿ ਮਗ੍ਗੋ ਸਞ੍ਜਾਯਤਿ. ਏਵਂ ਮਗ੍ਗੋ ਸਞ੍ਜਾਯਤਿ.

ਸੋ ਤਂ ਮਗ੍ਗਂ ਆਸੇਵਤਿ ਭਾਵੇਤਿ ਬਹੁਲੀਕਰੋਤਿ ਆਸੇਵਤੀਤਿ ਕਥਂ ਆਸੇਵਤਿ? ਆਵਜ੍ਜਨ੍ਤੋ ਆਸੇਵਤਿ…ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਰੋਨ੍ਤੋ ਆਸੇਵਤਿ, ਏਵਂ ਆਸੇਵਤਿ. ਭਾਵੇਤੀਤਿ ਕਥਂ ਭਾਵੇਤਿ? ਆਵਜ੍ਜਨ੍ਤੋ ਭਾਵੇਤਿ, ਜਾਨਨ੍ਤੋ ਭਾਵੇਤਿ…ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਰੋਨ੍ਤੋ ਭਾਵੇਤਿ, ਏਵਂ ਭਾਵੇਤਿ. ਬਹੁਲੀਕਰੋਤੀਤਿ ਕਥਂ ਬਹੁਲੀਕਰੋਤਿ? ਆਵਜ੍ਜਨ੍ਤੋ ਬਹੁਲੀਕਰੋਤਿ, ਜਾਨਨ੍ਤੋ ਬਹੁਲੀਕਰੋਤਿ…ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਰੋਨ੍ਤੋ ਬਹੁਲੀਕਰੋਤਿ, ਏਵਂ ਬਹੁਲੀਕਰੋਤਿ.

ਤਸ੍ਸ ਤਂ ਮਗ੍ਗਂ ਆਸੇਵਤੋ ਭਾਵਯਤੋ ਬਹੁਲੀਕਰੋਤੋ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤੀਤਿ ਕਥਂ ਸਞ੍ਞੋਜਨਾ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ? ਸੋਤਾਪਤ੍ਤਿਮਗ੍ਗੇਨ ਸਕ੍ਕਾਯਦਿਟ੍ਠਿ ਵਿਚਿਕਿਚ੍ਛਾ ਸੀਲਬ੍ਬਤਪਰਾਮਾਸੋ – ਇਮਾਨਿ ਤੀਣਿ ਸਞ੍ਞੋਜਨਾਨਿ ਪਹੀਯਨ੍ਤਿ; ਦਿਟ੍ਠਾਨੁਸਯੋ, ਵਿਚਿਕਿਚ੍ਛਾਨੁਸਯੋ – ਇਮੇ ਦ੍ਵੇ ਅਨੁਸਯਾ ਬ੍ਯਨ੍ਤੀਹੋਨ੍ਤਿ. ਸਕਦਾਗਾਮਿਮਗ੍ਗੇਨ ਓਲ਼ਾਰਿਕਂ ਕਾਮਰਾਗਸਞ੍ਞੋਜਨਂ, ਪਟਿਘਸਞ੍ਞੋਜਨਂ – ਇਮਾਨਿ ਦ੍ਵੇ ਸਞ੍ਞੋਜਨਾਨਿ ਪਹੀਯਨ੍ਤਿ; ਓਲ਼ਾਰਿਕੋ ਕਾਮਰਾਗਾਨੁਸਯੋ ਪਟਿਘਾਨੁਸਯੋ – ਇਮੇ ਦ੍ਵੇ ਅਨੁਸਯਾ ਬ੍ਯਨ੍ਤੀਹੋਨ੍ਤਿ. ਅਨਾਗਾਮਿਮਗ੍ਗੇਨ ਅਨੁਸਹਗਤਂ ਕਾਮਰਾਗਸਞ੍ਞੋਜਨਂ, ਪਟਿਘਸਞ੍ਞੋਜਨਂ – ਇਮਾਨਿ ਦ੍ਵੇ ਸਞ੍ਞੋਜਨਾਨਿ ਪਹੀਯਨ੍ਤਿ; ਅਨੁਸਹਗਤੋ ਕਾਮਰਾਗਾਨੁਸਯੋ, ਪਟਿਘਾਨੁਸਯੋ – ਇਮੇ ਦ੍ਵੇ ਅਨੁਸਯਾ ਬ੍ਯਨ੍ਤੀਹੋਨ੍ਤਿ. ਅਰਹਤ੍ਤਮਗ੍ਗੇਨ ਰੂਪਰਾਗੋ, ਅਰੂਪਰਾਗੋ, ਮਾਨੋ, ਉਦ੍ਧਚ੍ਚਂ, ਅਵਿਜ੍ਜਾ – ਇਮਾਨਿ ਪਞ੍ਚ ਸਞ੍ਞੋਜਨਾਨਿ ਪਹੀਯਨ੍ਤਿ; ਮਾਨਾਨੁਸਯੋ, ਭਵਰਾਗਾਨੁਸਯੋ, ਅਵਿਜ੍ਜਾਨੁਸਯੋ – ਇਮੇ ਤਯੋ ਅਨੁਸਯਾ ਬ੍ਯਨ੍ਤੀਹੋਨ੍ਤਿ. ਏਵਂ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ. ਏਵਂ ਸਮਥਪੁਬ੍ਬਙ੍ਗਮਂ ਵਿਪਸ੍ਸਨਂ ਭਾਵੇਤਿ.

੪. ਕਥਂ ਵਿਪਸ੍ਸਨਾਪੁਬ੍ਬਙ੍ਗਮਂ ਸਮਥਂ ਭਾਵੇਤਿ? ਅਨਿਚ੍ਚਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਦੁਕ੍ਖਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਅਨਤ੍ਤਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ. ਤਤ੍ਥ ਜਾਤਾਨਂ ਧਮ੍ਮਾਨਞ੍ਚ ਵੋਸਗ੍ਗਾਰਮ੍ਮਣਤਾ [ਵੋਸ੍ਸਗ੍ਗਾਰਮ੍ਮਣਤਾ (ਸ੍ਯਾ. ਕ.)] ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ. ਸਮਾਧਿ ਇਤਿ ਪਠਮਂ ਵਿਪਸ੍ਸਨਾ, ਪਚ੍ਛਾ ਸਮਥੋ. ਤੇਨ ਵੁਚ੍ਚਤਿ – ‘‘ਵਿਪਸ੍ਸਨਾਪੁਬ੍ਬਙ੍ਗਮਂ ਸਮਥਂ ਭਾਵੇਤੀ’’ਤਿ. ਭਾਵੇਤੀਤਿ ਚਤਸ੍ਸੋ ਭਾਵਨਾ – ਆਸੇਵਨਟ੍ਠੇਨ ਭਾਵਨਾ…ਪੇ… ਮਗ੍ਗੋ ਸਞ੍ਜਾਯਤੀਤਿ ਕਥਂ ਮਗ੍ਗੋ ਸਞ੍ਜਾਯਤਿ…ਪੇ… ਏਵਂ ਮਗ੍ਗੋ ਸਞ੍ਜਾਯਤਿ. ਏਵਂ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ.

ਰੂਪਂ ਅਨਿਚ੍ਚਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਰੂਪਂ ਦੁਕ੍ਖਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਰੂਪਂ ਅਨਤ੍ਤਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ. ਤਤ੍ਥ ਜਾਤਾਨਂ ਧਮ੍ਮਾਨਞ੍ਚ ਵੋਸਗ੍ਗਾਰਮ੍ਮਣਤਾ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ. ਇਤਿ ਪਠਮਂ ਵਿਪਸ੍ਸਨਾ, ਪਚ੍ਛਾ ਸਮਥੋ. ਤੇਨ ਵੁਚ੍ਚਤਿ – ‘‘ਵਿਪਸ੍ਸਨਾਪੁਬ੍ਬਙ੍ਗਮਂ ਸਮਥਂ ਭਾਵੇਤੀ’’ਤਿ. ਭਾਵੇਤੀਤਿ ਚਤਸ੍ਸੋ ਭਾਵਨਾ – ਆਸੇਵਨਟ੍ਠੇਨ ਭਾਵਨਾ…ਪੇ… ਮਗ੍ਗੋ ਸਞ੍ਜਾਯਤੀਤਿ ਕਥਂ ਮਗ੍ਗੋ ਸਞ੍ਜਾਯਤਿ…ਪੇ… ਏਵਂ ਮਗ੍ਗੋ ਸਞ੍ਜਾਯਤਿ. ਏਵਂ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ.

ਵੇਦਨਂ…ਪੇ… ਸਞ੍ਞਂ … ਸਙ੍ਖਾਰੇ… ਵਿਞ੍ਞਾਣਂ… ਚਕ੍ਖੁਂ…ਪੇ… ਜਰਾਮਰਣਂ ਅਨਿਚ੍ਚਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਜਰਾਮਰਣਂ ਦੁਕ੍ਖਤੋ…ਪੇ… ਅਨਤ੍ਤਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ. ਤਤ੍ਥ ਜਾਤਾਨਂ ਧਮ੍ਮਾਨਞ੍ਚ ਵੋਸਗ੍ਗਾਰਮ੍ਮਣਤਾ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ. ਇਤਿ ਪਠਮਂ ਵਿਪਸ੍ਸਨਾ, ਪਚ੍ਛਾ ਸਮਥੋ. ਤੇਨ ਵੁਚ੍ਚਤਿ – ‘‘ਵਿਪਸ੍ਸਨਾਪੁਬ੍ਬਙ੍ਗਮਂ ਸਮਥਂ ਭਾਵੇਤੀ’’ਤਿ. ਭਾਵੇਤੀਤਿ ਚਤਸ੍ਸੋ ਭਾਵਨਾ – ਆਸੇਵਨਟ੍ਠੇਨ ਭਾਵਨਾ…ਪੇ… ਮਗ੍ਗੋ ਸਞ੍ਜਾਯਤੀਤਿ ਕਥਂ ਮਗ੍ਗੋ ਸਞ੍ਜਾਯਤਿ…ਪੇ… ਏਵਂ ਮਗ੍ਗੋ ਸਞ੍ਜਾਯਤਿ. ਏਵਂ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ. ਏਵਂ ਵਿਪਸ੍ਸਨਾਪੁਬ੍ਬਙ੍ਗਮਂ ਸਮਥਂ ਭਾਵੇਤਿ.

੫. ਕਥਂ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ? ਸੋਲ਼ਸਹਿ ਆਕਾਰੇਹਿ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ. ਆਰਮ੍ਮਣਟ੍ਠੇਨ ਗੋਚਰਟ੍ਠੇਨ ਪਹਾਨਟ੍ਠੇਨ ਪਰਿਚ੍ਚਾਗਟ੍ਠੇਨ ਵੁਟ੍ਠਾਨਟ੍ਠੇਨ ਵਿਵਟ੍ਟਨਟ੍ਠੇਨ ਸਨ੍ਤਟ੍ਠੇਨ ਪਣੀਤਟ੍ਠੇਨ ਵਿਮੁਤ੍ਤਟ੍ਠੇਨ ਅਨਾਸਵਟ੍ਠੇਨ ਤਰਣਟ੍ਠੇਨ ਅਨਿਮਿਤ੍ਤਟ੍ਠੇਨ ਅਪ੍ਪਣਿਹਿਤਟ੍ਠੇਨ ਸੁਞ੍ਞਤਟ੍ਠੇਨ ਏਕਰਸਟ੍ਠੇਨ ਅਨਤਿਵਤ੍ਤਨਟ੍ਠੇਨ ਯੁਗਨਦ੍ਧਟ੍ਠੇਨ.

ਕਥਂ ਆਰਮ੍ਮਣਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ? ਉਦ੍ਧਚ੍ਚਂ ਪਜਹਤੋ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ ਨਿਰੋਧਾਰਮ੍ਮਣੋ, ਅਵਿਜ੍ਜਂ ਪਜਹਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਨਿਰੋਧਾਰਮ੍ਮਣਾ. ਇਤਿ ਆਰਮ੍ਮਣਟ੍ਠੇਨ ਸਮਥਵਿਪਸ੍ਸਨਾ ਏਕਰਸਾ ਹੋਨ੍ਤਿ, ਯੁਗਨਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਨਾਤਿਵਤ੍ਤਨ੍ਤੀਤਿ. ਤੇਨ ਵੁਚ੍ਚਤਿ – ‘‘ਆਰਮ੍ਮਣਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ. ਭਾਵੇਤੀਤਿ ਚਤਸ੍ਸੋ ਭਾਵਨਾ – ਆਸੇਵਨਟ੍ਠੇਨ ਭਾਵਨਾ…ਪੇ… ਮਗ੍ਗੋ ਸਞ੍ਜਾਯਤੀਤਿ ਕਥਂ ਮਗ੍ਗੋ ਸਞ੍ਜਾਯਤਿ…ਪੇ… ਏਵਂ ਮਗ੍ਗੋ ਸਞ੍ਜਾਯਤਿ. ਏਵਂ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ. ਏਵਂ ਆਰਮ੍ਮਣਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ.

ਕਥਂ ਗੋਚਰਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ? ਉਦ੍ਧਚ੍ਚਂ ਪਜਹਤੋ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ ਨਿਰੋਧਗੋਚਰੋ, ਅਵਿਜ੍ਜਂ ਪਜਹਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਨਿਰੋਧਗੋਚਰਾ. ਇਤਿ ਗੋਚਰਟ੍ਠੇਨ ਸਮਥਵਿਪਸ੍ਸਨਾ ਏਕਰਸਾ ਹੋਨ੍ਤਿ, ਯੁਗਨਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਨਾਤਿਵਤ੍ਤਨ੍ਤੀਤਿ. ਤੇਨ ਵੁਚ੍ਚਤਿ – ‘‘ਗੋਚਰਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ.

ਕਥਂ ਪਹਾਨਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ? ਉਦ੍ਧਚ੍ਚਸਹਗਤਕਿਲੇਸੇ ਚ ਖਨ੍ਧੇ ਚ ਪਜਹਤੋ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ ਨਿਰੋਧਗੋਚਰੋ, ਅਵਿਜ੍ਜਾਸਹਗਤਕਿਲੇਸੇ ਚ ਖਨ੍ਧੇ ਚ ਪਜਹਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਨਿਰੋਧਗੋਚਰਾ. ਇਤਿ ਪਹਾਨਟ੍ਠੇਨ ਸਮਥਵਿਪਸ੍ਸਨਾ ਏਕਰਸਾ ਹੋਨ੍ਤਿ, ਯੁਗਨਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਨਾਤਿਵਤ੍ਤਨ੍ਤੀਤਿ. ਤੇਨ ਵੁਚ੍ਚਤਿ – ‘‘ਪਹਾਨਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ.

ਕਥਂ ਪਰਿਚ੍ਚਾਗਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ? ਉਦ੍ਧਚ੍ਚਸਹਗਤਕਿਲੇਸੇ ਚ ਖਨ੍ਧੇ ਚ ਪਰਿਚ੍ਚਜਤੋ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ ਨਿਰੋਧਗੋਚਰੋ, ਅਵਿਜ੍ਜਾਸਹਗਤਕਿਲੇਸੇ ਚ ਖਨ੍ਧੇ ਚ ਪਰਿਚ੍ਚਜਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਨਿਰੋਧਗੋਚਰਾ. ਇਤਿ ਪਰਿਚ੍ਚਾਗਟ੍ਠੇਨ ਸਮਥਵਿਪਸ੍ਸਨਾ ਏਕਰਸਾ ਹੋਨ੍ਤਿ, ਯੁਗਨਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਨਾਤਿਵਤ੍ਤਨ੍ਤੀਤਿ. ਤੇਨ ਵੁਚ੍ਚਤਿ – ‘‘ਪਰਿਚ੍ਚਾਗਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ.

ਕਥਂ ਵੁਟ੍ਠਾਨਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ? ਉਦ੍ਧਚ੍ਚਸਹਗਤਕਿਲੇਸੇਹਿ ਚ ਖਨ੍ਧੇਹਿ ਚ ਵੁਟ੍ਠਹਤੋ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ ਨਿਰੋਧਗੋਚਰੋ, ਅਵਿਜ੍ਜਾਸਹਗਤਕਿਲੇਸੇਹਿ ਚ ਖਨ੍ਧੇਹਿ ਚ ਵੁਟ੍ਠਹਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਨਿਰੋਧਗੋਚਰਾ. ਇਤਿ ਵੁਟ੍ਠਾਨਟ੍ਠੇਨ ਸਮਥਵਿਪਸ੍ਸਨਾ ਏਕਰਸਾ ਹੋਨ੍ਤਿ, ਯੁਗਨਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਨਾਤਿਵਤ੍ਤਨ੍ਤੀਤਿ. ਤੇਨ ਵੁਚ੍ਚਤਿ – ‘‘ਵੁਟ੍ਠਾਨਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ.

ਕਥਂ ਵਿਵਟ੍ਟਨਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ? ਉਦ੍ਧਚ੍ਚਸਹਗਤਕਿਲੇਸੇਹਿ ਚ ਖਨ੍ਧੇਹਿ ਚ ਵਿਵਟ੍ਟਤੋ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ ਨਿਰੋਧਗੋਚਰੋ, ਅਵਿਜ੍ਜਾਸਹਗਤਕਿਲੇਸੇਹਿ ਚ ਖਨ੍ਧੇਹਿ ਚ ਵਿਵਟ੍ਟਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਨਿਰੋਧਗੋਚਰਾ. ਇਤਿ ਵਿਵਟ੍ਟਨਟ੍ਠੇਨ ਸਮਥਵਿਪਸ੍ਸਨਾ ਏਕਰਸਾ ਹੋਨ੍ਤਿ, ਯੁਗਨਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਨਾਤਿਵਤ੍ਤਨ੍ਤੀਤਿ. ਤੇਨ ਵੁਚ੍ਚਤਿ – ‘‘ਵਿਵਟ੍ਟਨਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ.

ਕਥਂ ਸਨ੍ਤਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ? ਉਦ੍ਧਚ੍ਚਂ ਪਜਹਤੋ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ ਸਨ੍ਤੋ ਹੋਨ੍ਤਿ ਨਿਰੋਧਗੋਚਰੋ, ਅਵਿਜ੍ਜਂ ਪਜਹਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਸਨ੍ਤਾ ਹੋਤਿ ਨਿਰੋਧਗੋਚਰਾ. ਇਤਿ ਸਨ੍ਤਟ੍ਠੇਨ ਸਮਥਵਿਪਸ੍ਸਨਾ ਏਕਰਸਾ ਹੋਨ੍ਤਿ, ਯੁਗਨਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਨਾਤਿਵਤ੍ਤਨ੍ਤੀਤਿ. ਤੇਨ ਵੁਚ੍ਚਤਿ – ‘‘ਸਨ੍ਤਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ.

ਕਥਂ ਪਣੀਤਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ? ਉਦ੍ਧਚ੍ਚਂ ਪਜਹਤੋ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ ਪਣੀਤੋ ਹੋਤਿ ਨਿਰੋਧਗੋਚਰੋ, ਅਵਿਜ੍ਜਂ ਪਜਹਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਪਣੀਤਾ ਹੋਤਿ ਨਿਰੋਧਗੋਚਰਾ. ਇਤਿ ਪਣੀਤਟ੍ਠੇਨ ਸਮਥਵਿਪਸ੍ਸਨਾ ਏਕਰਸਾ ਹੋਨ੍ਤਿ, ਯੁਗਨਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਨਾਤਿਵਤ੍ਤਨ੍ਤੀਤਿ. ਤੇਨ ਵੁਚ੍ਚਤਿ – ‘‘ਪਣੀਤਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ.

ਕਥਂ ਵਿਮੁਤ੍ਤਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ? ਉਦ੍ਧਚ੍ਚਂ ਪਜਹਤੋ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ ਕਾਮਾਸਵਾ ਵਿਮੁਤ੍ਤੋ ਹੋਤਿ ਨਿਰੋਧਗੋਚਰੋ, ਅਵਿਜ੍ਜਂ ਪਜਹਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਅਵਿਜ੍ਜਾਸਵਾ ਵਿਮੁਤ੍ਤਾ ਹੋਤਿ ਨਿਰੋਧਗੋਚਰਾ. ਇਤਿ ਰਾਗਵਿਰਾਗਾ ਚੇਤੋਵਿਮੁਤ੍ਤਿ ਅਵਿਜ੍ਜਾਵਿਰਾਗਾ ਪਞ੍ਞਾ ਵਿਮੁਤ੍ਤਟ੍ਠੇਨ ਸਮਥਵਿਪਸ੍ਸਨਾ ਏਕਰਸਾ ਹੋਨ੍ਤਿ, ਯੁਗਨਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਨਾਤਿਵਤ੍ਤਨ੍ਤੀਤਿ. ਤੇਨ ਵੁਚ੍ਚਤਿ – ‘‘ਵਿਮੁਤ੍ਤਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ.

ਕਥਂ ਅਨਾਸਵਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ? ਉਦ੍ਧਚ੍ਚਂ ਪਜਹਤੋ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ ਕਾਮਾਸਵੇਨ ਅਨਾਸਵੋ ਹੋਤਿ ਨਿਰੋਧਗੋਚਰੋ, ਅਵਿਜ੍ਜਂ ਪਜਹਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਅਵਿਜ੍ਜਾਸਵੇਨ ਅਨਾਸਵਾ ਹੋਤਿ ਨਿਰੋਧਗੋਚਰਾ. ਇਤਿ ਅਨਾਸਵਟ੍ਠੇਨ ਸਮਥਵਿਪਸ੍ਸਨਾ ਏਕਰਸਾ ਹੋਨ੍ਤਿ, ਯੁਗਨਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਨਾਤਿਵਤ੍ਤਨ੍ਤੀਤਿ. ਤੇਨ ਵੁਚ੍ਚਤਿ – ‘‘ਅਨਾਸਵਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ.

ਕਥਂ ਤਰਣਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ? ਉਦ੍ਧਚ੍ਚਸਹਗਤਕਿਲੇਸੇ ਚ ਖਨ੍ਧੇ ਚ ਤਰਤੋ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ ਨਿਰੋਧਗੋਚਰੋ, ਅਵਿਜ੍ਜਾਸਹਗਤਕਿਲੇਸੇ ਚ ਖਨ੍ਧੇ ਚ ਤਰਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਨਿਰੋਧਗੋਚਰਾ. ਇਤਿ ਤਰਣਟ੍ਠੇਨ ਸਮਥਵਿਪਸ੍ਸਨਾ ਏਕਰਸਾ ਹੋਨ੍ਤਿ, ਯੁਗਨਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਨਾਤਿਵਤ੍ਤਨ੍ਤੀਤਿ. ਤੇਨ ਵੁਚ੍ਚਤਿ – ‘‘ਤਰਣਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ.

ਕਥਂ ਅਨਿਮਿਤ੍ਤਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ? ਉਦ੍ਧਚ੍ਚਂ ਪਜਹਤੋ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ ਸਬ੍ਬਨਿਮਿਤ੍ਤੇਹਿ ਅਨਿਮਿਤ੍ਤੋ ਹੋਤਿ ਨਿਰੋਧਗੋਚਰੋ, ਅਵਿਜ੍ਜਂ ਪਜਹਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਸਬ੍ਬਨਿਮਿਤ੍ਤੇਹਿ ਅਨਿਮਿਤ੍ਤਾ ਹੋਤਿ ਨਿਰੋਧਗੋਚਰਾ. ਇਤਿ ਅਨਿਮਿਤ੍ਤਟ੍ਠੇਨ ਸਮਥਵਿਪਸ੍ਸਨਾ ਏਕਰਸਾ ਹੋਨ੍ਤਿ, ਯੁਗਨਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਨਾਤਿਵਤ੍ਤਨ੍ਤੀਤਿ. ਤੇਨ ਵੁਚ੍ਚਤਿ – ‘‘ਅਨਿਮਿਤ੍ਤਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ.

ਕਥਂ ਅਪ੍ਪਣਿਹਿਤਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ? ਉਦ੍ਧਚ੍ਚਂ ਪਜਹਤੋ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ ਸਬ੍ਬਪਣਿਧੀਹਿ ਅਪ੍ਪਣਿਹਿਤੋ ਹੋਤਿ ਨਿਰੋਧਗੋਚਰੋ, ਅਵਿਜ੍ਜਂ ਪਜਹਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਸਬ੍ਬਪਣਿਧੀਹਿ ਅਪ੍ਪਣਿਹਿਤਾ ਹੋਤਿ ਨਿਰੋਧਗੋਚਰਾ. ਇਤਿ ਅਪ੍ਪਣਿਹਿਤਟ੍ਠੇਨ ਸਮਥਵਿਪਸ੍ਸਨਾ ਏਕਰਸਾ ਹੋਨ੍ਤਿ, ਯੁਗਨਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਨਾਤਿਵਤ੍ਤਨ੍ਤੀਤਿ. ਤੇਨ ਵੁਚ੍ਚਤਿ – ‘‘ਅਪ੍ਪਣਿਹਿਤਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ.

ਕਥਂ ਸੁਞ੍ਞਤਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ? ਉਦ੍ਧਚ੍ਚਂ ਪਜਹਤੋ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ ਸਬ੍ਬਾਭਿਨਿਵੇਸੇਹਿ ਸੁਞ੍ਞੋ ਹੋਤਿ ਨਿਰੋਧਗੋਚਰੋ, ਅਵਿਜ੍ਜਂ ਪਜਹਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਸਬ੍ਬਾਭਿਨਿਵੇਸੇਹਿ ਸੁਞ੍ਞਾ ਹੋਤਿ ਨਿਰੋਧਗੋਚਰਾ. ਇਤਿ ਸੁਞ੍ਞਤਟ੍ਠੇਨ ਸਮਥਵਿਪਸ੍ਸਨਾ ਏਕਰਸਾ ਹੋਨ੍ਤਿ, ਯੁਗਨਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਨਾਤਿਵਤ੍ਤਨ੍ਤੀਤਿ. ਤੇਨ ਵੁਚ੍ਚਤਿ – ‘‘ਸੁਞ੍ਞਤਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ. ਭਾਵੇਤੀਤਿ ਚਤਸ੍ਸੋ ਭਾਵਨਾ – ਆਸੇਵਨਟ੍ਠੇਨ ਭਾਵਨਾ…ਪੇ… ਮਗ੍ਗੋ ਸਞ੍ਜਾਯਤੀਤਿ ਕਥਂ ਮਗ੍ਗੋ ਸਞ੍ਜਾਯਤਿ…ਪੇ… ਏਵਂ ਮਗ੍ਗੋ ਸਞ੍ਜਾਯਤਿ. ਏਵਂ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ. ਏਵਂ ਸੁਞ੍ਞਤਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ. ਇਮੇਹਿ ਸੋਲ਼ਸਹਿ ਆਕਾਰੇਹਿ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ, ਏਵਂ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤਿ.

ਸੁਤ੍ਤਨ੍ਤਨਿਦ੍ਦੇਸੋ.

੨. ਧਮ੍ਮੁਦ੍ਧਚ੍ਚਵਾਰਨਿਦ੍ਦੇਸੋ

੬. ਕਥਂ ਧਮ੍ਮੁਦ੍ਧਚ੍ਚਵਿਗ੍ਗਹਿਤਂ ਮਾਨਸਂ ਹੋਤਿ? ਅਨਿਚ੍ਚਤੋ ਮਨਸਿਕਰੋਤੋ ਓਭਾਸੋ ਉਪ੍ਪਜ੍ਜਤਿ, ਓਭਾਸੋ ਧਮ੍ਮੋਤਿ ਓਭਾਸਂ ਆਵਜ੍ਜਤਿ, ਤਤੋ ਵਿਕ੍ਖੇਪੋ ਉਦ੍ਧਚ੍ਚਂ. ਤੇਨ ਉਦ੍ਧਚ੍ਚੇਨ ਵਿਗ੍ਗਹਿਤਮਾਨਸੋ ਅਨਿਚ੍ਚਤੋ ਉਪਟ੍ਠਾਨਂ ਯਥਾਭੂਤਂ ਨਪ੍ਪਜਾਨਾਤਿ, ਦੁਕ੍ਖਤੋ ਉਪਟ੍ਠਾਨਂ ਯਥਾਭੂਤਂ ਨਪ੍ਪਜਾਨਾਤਿ, ਅਨਤ੍ਤਤੋ ਉਪਟ੍ਠਾਨਂ ਯਥਾਭੂਤਂ ਨਪ੍ਪਜਾਨਾਤਿ. ਤੇਨ ਵੁਚ੍ਚਤਿ – ‘‘ਧਮ੍ਮੁਦ੍ਧਚ੍ਚਵਿਗ੍ਗਹਿਤਮਾਨਸੋ ਹੋਤਿ ਸੋ ਸਮਯੋ, ਯਂ ਤਂ ਚਿਤ੍ਤਂ ਅਜ੍ਝਤ੍ਤਮੇਵ ਸਨ੍ਤਿਟ੍ਠਤਿ ਸਨ੍ਨਿਸੀਦਤਿ ਏਕੋਦਿ ਹੋਤਿ ਸਮਾਧਿਯਤਿ. ਤਸ੍ਸ ਮਗ੍ਗੋ ਸਞ੍ਜਾਯਤੀ’’ਤਿ ਕਥਂ ਮਗ੍ਗੋ ਸਞ੍ਜਾਯਤਿ…ਪੇ… ਏਵਂ ਮਗ੍ਗੋ ਸਞ੍ਜਾਯਤਿ, ਏਵਂ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ.

ਅਨਿਚ੍ਚਤੋ ਮਨਸਿਕਰੋਤੋ ਞਾਣਂ ਉਪ੍ਪਜ੍ਜਤਿ, ਪੀਤਿ ਉਪ੍ਪਜ੍ਜਤਿ, ਪਸ੍ਸਦ੍ਧਿ ਉਪ੍ਪਜ੍ਜਤਿ, ਸੁਖਂ ਉਪ੍ਪਜ੍ਜਤਿ, ਅਧਿਮੋਕ੍ਖੋ ਉਪ੍ਪਜ੍ਜਤਿ, ਪਗ੍ਗਹੋ ਉਪ੍ਪਜ੍ਜਤਿ, ਉਪਟ੍ਠਾਨਂ ਉਪ੍ਪਜ੍ਜਤਿ, ਉਪੇਕ੍ਖਾ ਉਪ੍ਪਜ੍ਜਤਿ, ਨਿਕਨ੍ਤਿ ਉਪ੍ਪਜ੍ਜਤਿ, ‘ਨਿਕਨ੍ਤਿ ਧਮ੍ਮੋ’ਤਿ ਨਿਕਨ੍ਤਿਂ ਆਵਜ੍ਜਤਿ. ਤਤੋ ਵਿਕ੍ਖੇਪੋ ਉਦ੍ਧਚ੍ਚਂ. ਤੇਨ ਉਦ੍ਧਚ੍ਚੇਨ ਵਿਗ੍ਗਹਿਤਮਾਨਸੋ ਅਨਿਚ੍ਚਤੋ ਉਪਟ੍ਠਾਨਂ ਯਥਾਭੂਤਂ ਨਪ੍ਪਜਾਨਾਤਿ, ਦੁਕ੍ਖਤੋ ਉਪਟ੍ਠਾਨਂ ਯਥਾਭੂਤਂ ਨਪ੍ਪਜਾਨਾਤਿ, ਅਨਤ੍ਤਤੋ ਉਪਟ੍ਠਾਨਂ ਯਥਾਭੂਤਂ ਨਪ੍ਪਜਾਨਾਤਿ. ਤੇਨ ਵੁਚ੍ਚਤਿ – ‘‘ਧਮ੍ਮੁਦ੍ਧਚ੍ਚਵਿਗ੍ਗਹਿਤਮਾਨਸੋ ਹੋਤਿ ਸੋ ਸਮਯੋ, ਯਂ ਤਂ ਚਿਤ੍ਤਂ ਅਜ੍ਝਤ੍ਤਮੇਵ ਸਨ੍ਤਿਟ੍ਠਤਿ ਸਨ੍ਨਿਸੀਦਤਿ ਏਕੋਦਿ ਹੋਤਿ ਸਮਾਧਿਯਤਿ. ਤਸ੍ਸ ਮਗ੍ਗੋ ਸਞ੍ਜਾਯਤੀ’’ਤਿ. ਕਥਂ ਮਗ੍ਗੋ ਸਞ੍ਜਾਯਤਿ…ਪੇ… ਏਵਂ ਮਗ੍ਗੋ ਸਞ੍ਜਾਯਤਿ, ਏਵਂ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ.

ਦੁਕ੍ਖਤੋ ਮਨਸਿਕਰੋਤੋ…ਪੇ… ਅਨਤ੍ਤਤੋ ਮਨਸਿਕਰੋਤੋ ਓਭਾਸੋ ਉਪ੍ਪਜ੍ਜਤਿ…ਪੇ… ਞਾਣਂ ਉਪ੍ਪਜ੍ਜਤਿ, ਪੀਤਿ ਉਪ੍ਪਜ੍ਜਤਿ, ਪਸ੍ਸਦ੍ਧਿ ਉਪ੍ਪਜ੍ਜਤਿ, ਸੁਖਂ ਉਪ੍ਪਜ੍ਜਤਿ, ਅਧਿਮੋਕ੍ਖੋ ਉਪ੍ਪਜ੍ਜਤਿ, ਪਗ੍ਗਹੋ ਉਪ੍ਪਜ੍ਜਤਿ, ਉਪਟ੍ਠਾਨਂ ਉਪ੍ਪਜ੍ਜਤਿ, ਉਪੇਕ੍ਖਾ ਉਪ੍ਪਜ੍ਜਤਿ, ਨਿਕਨ੍ਤਿ ਉਪ੍ਪਜ੍ਜਤਿ, ‘ਨਿਕਨ੍ਤਿ ਧਮ੍ਮੋ’ਤਿ ਨਿਕਨ੍ਤਿਂ ਆਵਜ੍ਜਤਿ. ਤਤੋ ਵਿਕ੍ਖੇਪੋ ਉਦ੍ਧਚ੍ਚਂ. ਤੇਨ ਉਦ੍ਧਚ੍ਚੇਨ ਵਿਗ੍ਗਹਿਤਮਾਨਸੋ ਅਨਤ੍ਤਤੋ ਉਪਟ੍ਠਾਨਂ, ਅਨਿਚ੍ਚਤੋ ਉਪਟ੍ਠਾਨਂ, ਦੁਕ੍ਖਤੋ ਉਪਟ੍ਠਾਨਂ ਯਥਾਭੂਤਂ ਨਪ੍ਪਜਾਨਾਤਿ. ਤੇਨ ਵੁਚ੍ਚਤਿ – ‘‘ਧਮ੍ਮੁਦ੍ਧਚ੍ਚਵਿਗ੍ਗਹਿਤਮਾਨਸੋ…ਪੇ… ਏਵਂ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ’’.

ਰੂਪਂ ਅਨਿਚ੍ਚਤੋ ਮਨਸਿਕਰੋਤੋ…ਪੇ… ਰੂਪਂ ਦੁਕ੍ਖਤੋ ਮਨਸਿਕਰੋਤੋ… ਰੂਪਂ ਅਨਤ੍ਤਤੋ ਮਨਸਿਕਰੋਤੋ… ਵੇਦਨਂ…ਪੇ… ਸਞ੍ਞਂ… ਸਙ੍ਖਾਰੇ… ਵਿਞ੍ਞਾਣਂ… ਚਕ੍ਖੁਂ…ਪੇ… ਜਰਾਮਰਣਂ ਅਨਿਚ੍ਚਤੋ ਮਨਸਿਕਰੋਤੋ…ਪੇ… ਜਰਾਮਰਣਂ ਦੁਕ੍ਖਤੋ ਮਨਸਿਕਰੋਤੋ, ਜਰਾਮਰਣਂ ਅਨਤ੍ਤਤੋ ਮਨਸਿਕਰੋਤੋ ਓਭਾਸੋ ਉਪ੍ਪਜ੍ਜਤਿ…ਪੇ… ਞਾਣਂ ਉਪ੍ਪਜ੍ਜਤਿ, ਪੀਤਿ ਉਪ੍ਪਜ੍ਜਤਿ, ਪਸ੍ਸਦ੍ਧਿ ਉਪ੍ਪਜ੍ਜਤਿ, ਸੁਖਂ ਉਪ੍ਪਜ੍ਜਤਿ, ਅਧਿਮੋਕ੍ਖੋ ਉਪ੍ਪਜ੍ਜਤਿ, ਪਗ੍ਗਹੋ ਉਪ੍ਪਜ੍ਜਤਿ, ਉਪਟ੍ਠਾਨਂ ਉਪ੍ਪਜ੍ਜਤਿ, ਉਪੇਕ੍ਖਾ ਉਪ੍ਪਜ੍ਜਤਿ, ਨਿਕਨ੍ਤਿ ਉਪ੍ਪਜ੍ਜਤਿ, ‘ਨਿਕਨ੍ਤਿ ਧਮ੍ਮੋ’ਤਿ ਨਿਕਨ੍ਤਿਂ ਆਵਜ੍ਜਤਿ. ਤਤੋ ਵਿਕ੍ਖੇਪੋ ਉਦ੍ਧਚ੍ਚਂ. ਤੇਨ ਉਦ੍ਧਚ੍ਚੇਨ ਵਿਗ੍ਗਹਿਤਮਾਨਸੋ. ਜਰਾਮਰਣਂ ਅਨਤ੍ਤਤੋ ਉਪਟ੍ਠਾਨਂ ਯਥਾਭੂਤਂ ਨਪ੍ਪਜਾਨਾਤਿ. ਜਰਾਮਰਣਂ ਅਨਿਚ੍ਚਤੋ ਉਪਟ੍ਠਾਨਂ ਯਥਾਭੂਤਂ ਨਪ੍ਪਜਾਨਾਤਿ, ਜਰਾਮਰਣਂ ਦੁਕ੍ਖਤੋ ਉਪਟ੍ਠਾਨਂ ਯਥਾਭੂਤਂ ਨਪ੍ਪਜਾਨਾਤਿ. ਤੇਨ ਵੁਚ੍ਚਤਿ – ‘‘ਧਮ੍ਮੁਦ੍ਧਚ੍ਚਵਿਗ੍ਗਹਿਤਮਾਨਸੋ ਹੋਤਿ. ਸੋ ਸਮਯੋ, ਯਂ ਤਂ ਚਿਤ੍ਤਂ ਅਜ੍ਝਤ੍ਤਮੇਵ ਸਨ੍ਤਿਟ੍ਠਤਿ ਸਨ੍ਨਿਸੀਦਤਿ ਏਕੋਦਿ ਹੋਤਿ ਸਮਾਧਿਯਤਿ. ਤਸ੍ਸ ਮਗ੍ਗੋ ਸਞ੍ਜਾਯਤੀ’’ਤਿ. ਕਥਂ ਮਗ੍ਗੋ ਸਞ੍ਜਾਯਤਿ…ਪੇ… ਏਵਂ ਮਗ੍ਗੋ ਸਞ੍ਜਾਯਤਿ. ਏਵਂ ਸਞ੍ਞੋਜਨਾਨਿ ਪਹੀਯਨ੍ਤਿ, ਅਨੁਸਯਾ ਬ੍ਯਨ੍ਤੀਹੋਨ੍ਤਿ. ਏਵਂ ਧਮ੍ਮੁਦ੍ਧਚ੍ਚਵਿਗ੍ਗਹਿਤਂ ਮਾਨਸਂ ਹੋਤਿ.

੭. ਓਭਾਸੇ ਚੇਵ ਞਾਣੇ ਚ, ਪੀਤਿਯਾ ਚ ਵਿਕਮ੍ਪਤਿ;

ਪਸ੍ਸਦ੍ਧਿਯਾ ਸੁਖੇ ਚੇਵ, ਯੇਹਿ ਚਿਤ੍ਤਂ ਪਵੇਧਤਿ.

ਅਧਿਮੋਕ੍ਖੇ ਚ ਪਗ੍ਗਾਹੇ, ਉਪਟ੍ਠਾਨੇ ਚ ਕਮ੍ਪਤਿ;

ਉਪੇਕ੍ਖਾਵਜ੍ਜਨਾਯ ਚੇਵ, ਉਪੇਕ੍ਖਾਯ ਚ ਨਿਕਨ੍ਤਿਯਾ.

ਇਮਾਨਿ ਦਸ ਠਾਨਾਨਿ, ਪਞ੍ਞਾ ਯਸ੍ਸ ਪਰਿਚ੍ਚਿਤਾ;

ਧਮ੍ਮੁਦ੍ਧਚ੍ਚਕੁਸਲੋ ਹੋਤਿ, ਨ ਚ ਸਮ੍ਮੋਹ ਗਚ੍ਛਤਿ.

ਵਿਕ੍ਖਿਪਤਿ ਚੇਵ ਕਿਲਿਸ੍ਸਤਿ ਚ, ਚਵਤਿ ਚਿਤ੍ਤਭਾਵਨਾ;

ਵਿਕ੍ਖਿਪਤਿ ਨ ਕਿਲਿਸ੍ਸਤਿ, ਭਾਵਨਾ ਪਰਿਹਾਯਤਿ.

ਵਿਕ੍ਖਿਪਤਿ ਨ ਕਿਲਿਸ੍ਸਤਿ, ਭਾਵਨਾ ਨ ਪਰਿਹਾਯਤਿ;

ਨ ਚ ਵਿਕ੍ਖਿਪਤੇ ਚਿਤ੍ਤਂ ਨ ਕਿਲਿਸ੍ਸਤਿ, ਨ ਚਵਤਿ ਚਿਤ੍ਤਭਾਵਨਾ.

ਇਮੇਹਿ ਚਤੂਹਿ ਠਾਨੇਹਿ ਚਿਤ੍ਤਸ੍ਸ ਸਙ੍ਖੇਪਵਿਕ੍ਖੇਪਵਿਗ੍ਗਹਿਤਂ [ਸਙ੍ਖੇਪਂ ਵਿਕ੍ਖੇਪਂ ਵਿਗ੍ਗਹਿਤਂ (ਸ੍ਯਾ.)] ਦਸ ਠਾਨੇ ਸਮ੍ਪਜਾਨਾਤੀਤਿ.

ਯੁਗਨਦ੍ਧਕਥਾ ਨਿਟ੍ਠਿਤਾ.

੨. ਸਚ੍ਚਕਥਾ

੮. ਪੁਰਿਮਨਿਦਾਨਂ. ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ [ਸਂ. ਨਿ. ੫.੧੦੯੦], ਤਥਾਨਿ ਅਵਿਤਥਾਨਿ ਅਨਞ੍ਞਥਾਨਿ. ਕਤਮਾਨਿ ਚਤ੍ਤਾਰਿ? ‘ਇਦਂ ਦੁਕ੍ਖ’ਨ੍ਤਿ, ਭਿਕ੍ਖਵੇ, ਤਥਮੇਤਂ ਅਵਿਤਥਮੇਤਂ ਅਨਞ੍ਞਥਮੇਤਂ; ‘ਅਯਂ ਦੁਕ੍ਖਸਮੁਦਯੋ’ਤਿ ਤਥਮੇਤਂ ਅਵਿਤਥਮੇਤਂ ਅਨਞ੍ਞਥਮੇਤਂ, ‘ਅਯਂ ਦੁਕ੍ਖਨਿਰੋਧੋ’ਤਿ ਤਥਮੇਤਂ ਅਵਿਤਥਮੇਤਂ ਅਨਞ੍ਞਥਮੇਤਂ, ‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’ਤਿ ਤਥਮੇਤਂ ਅਵਿਤਥਮੇਤਂ ਅਨਞ੍ਞਥਮੇਤਂ. ਇਮਾਨਿ ਖੋ, ਭਿਕ੍ਖਵੇ, ਚਤ੍ਤਾਰਿ ਤਥਾਨਿ ਅਵਿਤਥਾਨਿ ਅਨਞ੍ਞਥਾਨਿ’’.

੧. ਪਠਮਸੁਤ੍ਤਨ੍ਤਨਿਦ੍ਦੇਸੋ

ਕਥਂ ਦੁਕ੍ਖਂ ਤਥਟ੍ਠੇਨ ਸਚ੍ਚਂ? ਚਤ੍ਤਾਰੋ ਦੁਕ੍ਖਸ੍ਸ ਦੁਕ੍ਖਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਦੁਕ੍ਖਸ੍ਸ ਪੀਲ਼ਨਟ੍ਠੋ, ਸਙ੍ਖਤਟ੍ਠੋ, ਸਨ੍ਤਾਪਟ੍ਠੋ, ਵਿਪਰਿਣਾਮਟ੍ਠੋ – ਇਮੇ ਚਤ੍ਤਾਰੋ ਦੁਕ੍ਖਸ੍ਸ ਦੁਕ੍ਖਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਏਵਂ ਦੁਕ੍ਖਂ ਤਥਟ੍ਠੇਨ ਸਚ੍ਚਂ.

ਕਥਂ ਸਮੁਦਯੋ ਤਥਟ੍ਠੇਨ ਸਚ੍ਚਂ? ਚਤ੍ਤਾਰੋ ਸਮੁਦਯਸ੍ਸ ਸਮੁਦਯਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਸਮੁਦਯਸ੍ਸ ਆਯੂਹਨਟ੍ਠੋ, ਨਿਦਾਨਟ੍ਠੋ, ਸਂਯੋਗਟ੍ਠੋ ਪਲਿਬੋਧਟ੍ਠੋ – ਇਮੇ ਚਤ੍ਤਾਰੋ ਸਮੁਦਯਸ੍ਸ ਸਮੁਦਯਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਏਵਂ ਸਮੁਦਯੋ ਤਥਟ੍ਠੇਨ ਸਚ੍ਚਂ.

ਕਥਂ ਨਿਰੋਧੋ ਤਥਟ੍ਠੇਨ ਸਚ੍ਚਂ? ਚਤ੍ਤਾਰੋ ਨਿਰੋਧਸ੍ਸ ਨਿਰੋਧਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਨਿਰੋਧਸ੍ਸ ਨਿਸ੍ਸਰਣਟ੍ਠੋ, ਵਿਵੇਕਟ੍ਠੋ, ਅਸਙ੍ਖਤਟ੍ਠੋ, ਅਮਤਟ੍ਠੋ – ਇਮੇ ਚਤ੍ਤਾਰੋ ਨਿਰੋਧਸ੍ਸ ਨਿਰੋਧਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਏਵਂ ਨਿਰੋਧੋ ਤਥਟ੍ਠੇਨ ਸਚ੍ਚਂ.

ਕਥਂ ਮਗ੍ਗੋ ਤਥਟ੍ਠੇਨ ਸਚ੍ਚਂ? ਚਤ੍ਤਾਰੋ ਮਗ੍ਗਸ੍ਸ ਮਗ੍ਗਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਮਗ੍ਗਸ੍ਸ ਨਿਯ੍ਯਾਨਟ੍ਠੋ, ਹੇਤੁਟ੍ਠੋ, ਦਸ੍ਸਨਟ੍ਠੋ, ਆਧਿਪਤੇਯ੍ਯਟ੍ਠੋ – ਇਮੇ ਚਤ੍ਤਾਰੋ ਮਗ੍ਗਸ੍ਸ ਮਗ੍ਗਟ੍ਠਾ ਤਥਾ ਅਵਿਤਥਾ ਅਨਞ੍ਞਥਾ. ਏਵਂ ਮਗ੍ਗੋ ਤਥਟ੍ਠੇਨ ਸਚ੍ਚਂ.

੯. ਕਤਿਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਚਤੂਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਤਥਟ੍ਠੇਨ, ਅਨਤ੍ਤਟ੍ਠੇਨ, ਸਚ੍ਚਟ੍ਠੇਨ, ਪਟਿਵੇਧਟ੍ਠੇਨ – ਇਮੇਹਿ ਚਤੂਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਚਤੂਹਾਕਾਰੇਹਿ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਦੁਕ੍ਖਟ੍ਠੋ ਤਥਟ੍ਠੋ, ਸਮੁਦਯਸ੍ਸ ਸਮੁਦਯਟ੍ਠੋ ਤਥਟ੍ਠੋ, ਨਿਰੋਧਸ੍ਸ ਨਿਰੋਧਟ੍ਠੋ ਤਥਟ੍ਠੋ, ਮਗ੍ਗਸ੍ਸ ਮਗ੍ਗਟ੍ਠੋ ਤਥਟ੍ਠੋ – ਇਮੇਹਿ ਚਤੂਹਾਕਾਰੇਹਿ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਅਨਤ੍ਤਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਚਤੂਹਾਕਾਰੇਹਿ ਅਨਤ੍ਤਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਦੁਕ੍ਖਟ੍ਠੋ ਅਨਤ੍ਤਟ੍ਠੋ, ਸਮੁਦਯਸ੍ਸ ਸਮੁਦਯਟ੍ਠੋ ਅਨਤ੍ਤਟ੍ਠੋ, ਨਿਰੋਧਸ੍ਸ ਨਿਰੋਧਟ੍ਠੋ ਅਨਤ੍ਤਟ੍ਠੋ, ਮਗ੍ਗਸ੍ਸ ਮਗ੍ਗਟ੍ਠੋ ਅਨਤ੍ਤਟ੍ਠੋ – ਇਮੇਹਿ ਚਤੂਹਾਕਾਰੇਹਿ ਅਨਤ੍ਤਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਸਚ੍ਚਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਚਤੂਹਾਕਾਰੇਹਿ ਸਚ੍ਚਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਦੁਕ੍ਖਟ੍ਠੋ ਸਚ੍ਚਟ੍ਠੋ, ਸਮੁਦਯਸ੍ਸ ਸਮੁਦਯਟ੍ਠੋ ਸਚ੍ਚਟ੍ਠੋ, ਨਿਰੋਧਸ੍ਸ ਨਿਰੋਧਟ੍ਠੋ ਸਚ੍ਚਟ੍ਠੋ, ਮਗ੍ਗਸ੍ਸ ਮਗ੍ਗਟ੍ਠੋ ਸਚ੍ਚਟ੍ਠੋ – ਇਮੇਹਿ ਚਤੂਹਾਕਾਰੇਹਿ ਸਚ੍ਚਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਪਟਿਵੇਧਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਚਤੂਹਾਕਾਰੇਹਿ ਪਟਿਵੇਧਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਦੁਕ੍ਖਟ੍ਠੋ ਪਟਿਵੇਧਟ੍ਠੋ, ਸਮੁਦਯਸ੍ਸ ਸਮੁਦਯਟ੍ਠੋ ਪਟਿਵੇਧਟ੍ਠੋ ਨਿਰੋਧਸ੍ਸ ਨਿਰੋਧਟ੍ਠੋ ਪਟਿਵੇਧਟ੍ਠੋ, ਮਗ੍ਗਸ੍ਸ ਮਗ੍ਗਟ੍ਠੋ ਪਟਿਵੇਧਟ੍ਠੋ – ਇਮੇਹਿ ਚਤੂਹਾਕਾਰੇਹਿ ਪਟਿਵੇਧਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

੧੦. ਕਤਿਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਯਂ ਅਨਿਚ੍ਚਂ ਤਂ ਦੁਕ੍ਖਂ, ਯਂ ਦੁਕ੍ਖਂ ਤਂ ਅਨਿਚ੍ਚਂ, ਯਂ ਅਨਿਚ੍ਚਞ੍ਚ ਦੁਕ੍ਖਞ੍ਚ ਤਂ ਅਨਤ੍ਤਾ. ਯਂ ਅਨਿਚ੍ਚਞ੍ਚ ਦੁਕ੍ਖਞ੍ਚ ਅਨਤ੍ਤਾ ਚ ਤਂ ਤਥਂ. ਯਂ ਅਨਿਚ੍ਚਂ ਚ ਦੁਕ੍ਖਞ੍ਚ ਅਨਤ੍ਤਾ ਚ ਤਥਞ੍ਚ ਤਂ ਸਚ੍ਚਂ. ਯਂ ਅਨਿਚ੍ਚਞ੍ਚ ਦੁਕ੍ਖਞ੍ਚ ਅਨਤ੍ਤਾ ਚ ਤਥਞ੍ਚ ਸਚ੍ਚਞ੍ਚ ਤਂ ਏਕਸਙ੍ਗਹਿਤਂ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਤਿਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਨਵਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਤਥਟ੍ਠੇਨ, ਅਨਤ੍ਤਟ੍ਠੇਨ, ਸਚ੍ਚਟ੍ਠੇਨ, ਪਟਿਵੇਧਟ੍ਠੇਨ, ਅਭਿਞ੍ਞਟ੍ਠੇਨ, ਪਰਿਞ੍ਞਟ੍ਠੇਨ, ਪਹਾਨਟ੍ਠੇਨ, ਭਾਵਨਟ੍ਠੇਨ, ਸਚ੍ਛਿਕਿਰਿਯਟ੍ਠੇਨ – ਇਮੇਹਿ ਨਵਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਨਵਹਾਕਾਰੇਹਿ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਦੁਕ੍ਖਟ੍ਠੋ ਤਥਟ੍ਠੋ, ਸਮੁਦਯਸ੍ਸ ਸਮੁਦਯਟ੍ਠੋ ਤਥਟ੍ਠੋ, ਨਿਰੋਧਸ੍ਸ ਨਿਰੋਧਟ੍ਠੋ ਤਥਟ੍ਠੋ, ਮਗ੍ਗਸ੍ਸ ਮਗ੍ਗਟ੍ਠੋ ਤਥਟ੍ਠੋ, ਅਭਿਞ੍ਞਾਯ ਅਭਿਞ੍ਞਟ੍ਠੋ ਤਥਟ੍ਠੋ, ਪਰਿਞ੍ਞਾਯ ਪਰਿਞ੍ਞਟ੍ਠੋ ਤਥਟ੍ਠੋ, ਪਹਾਨਸ੍ਸ ਪਹਾਨਟ੍ਠੋ ਤਥਟ੍ਠੋ, ਭਾਵਨਾਯ ਭਾਵਨਟ੍ਠੋ ਤਥਟ੍ਠੋ, ਸਚ੍ਛਿਕਿਰਿਯਾਯ ਸਚ੍ਛਿਕਿਰਿਯਟ੍ਠੋ ਤਥਟ੍ਠੋ – ਇਮੇਹਿ ਨਵਹਾਕਾਰੇਹਿ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਅਨਤ੍ਤਟ੍ਠੇਨ… ਸਚ੍ਚਟ੍ਠੇਨ… ਪਟਿਵੇਧਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਨਵਹਾਕਾਰੇਹਿ ਪਟਿਵੇਧਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਦੁਕ੍ਖਟ੍ਠੋ ਪਟਿਵੇਧਟ੍ਠੋ, ਸਮੁਦਯਸ੍ਸ ਸਮੁਦਯਟ੍ਠੋ ਪਟਿਵੇਧਟ੍ਠੋ, ਨਿਰੋਧਸ੍ਸ ਨਿਰੋਧਟ੍ਠੋ ਪਟਿਵੇਧਟ੍ਠੋ, ਮਗ੍ਗਸ੍ਸ ਮਗ੍ਗਟ੍ਠੋ ਪਟਿਵੇਧਟ੍ਠੋ, ਅਭਿਞ੍ਞਾਯ ਅਭਿਞ੍ਞਟ੍ਠੋ ਪਟਿਵੇਧਟ੍ਠੋ, ਪਰਿਞ੍ਞਾਯ ਪਰਿਞ੍ਞਟ੍ਠੋ ਪਟਿਵੇਧਟ੍ਠੋ, ਪਹਾਨਸ੍ਸ ਪਹਾਨਟ੍ਠੋ ਪਟਿਵੇਧਟ੍ਠੋ, ਭਾਵਨਾਯ ਭਾਵਨਟ੍ਠੋ ਪਟਿਵੇਧਟ੍ਠੋ, ਸਚ੍ਛਿਕਿਰਿਯਾਯ ਸਚ੍ਛਿਕਿਰਿਯਟ੍ਠੋ ਪਟਿਵੇਧਟ੍ਠੋ – ਇਮੇਹਿ ਨਵਹਾਕਾਰੇਹਿ ਪਟਿਵੇਧਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

੧੧. ਕਤਿਹਾਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਦ੍ਵਾਦਸਹਿ ਆਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਤਥਟ੍ਠੇਨ, ਅਨਤ੍ਤਟ੍ਠੇਨ, ਸਚ੍ਚਟ੍ਠੇਨ, ਪਟਿਵੇਧਟ੍ਠੇਨ, ਅਭਿਜਾਨਨਟ੍ਠੇਨ, ਪਰਿਜਾਨਨਟ੍ਠੇਨ, ਧਮ੍ਮਟ੍ਠੇਨ, ਤਥਟ੍ਠੇਨ, ਞਾਤਟ੍ਠੇਨ, ਸਚ੍ਛਿਕਿਰਿਯਟ੍ਠੇਨ, ਫਸ੍ਸਨਟ੍ਠੇਨ, ਅਭਿਸਮਯਟ੍ਠੇਨ – ਇਮੇਹਿ ਦ੍ਵਾਦਸਹਿ ਆਕਾਰੇਹਿ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਸੋਲ਼ਸਹਿ ਆਕਾਰੇਹਿ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਪੀਲ਼ਨਟ੍ਠੋ, ਸਙ੍ਖਤਟ੍ਠੋ, ਸਨ੍ਤਾਪਟ੍ਠੋ, ਵਿਪਰਿਣਾਮਟ੍ਠੋ, ਤਥਟ੍ਠੋ; ਸਮੁਦਯਸ੍ਸ ਆਯੂਹਨਟ੍ਠੋ, ਨਿਦਾਨਟ੍ਠੋ, ਸਂਯੋਗਟ੍ਠੋ, ਪਲਿਬੋਧਟ੍ਠੋ ਤਥਟ੍ਠੋ; ਨਿਰੋਧਸ੍ਸ ਨਿਸ੍ਸਰਣਟ੍ਠੋ, ਵਿਵੇਕਟ੍ਠੋ, ਅਸਙ੍ਖਤਟ੍ਠੋ, ਅਮਤਟ੍ਠੋ ਤਥਟ੍ਠੋ; ਮਗ੍ਗਸ੍ਸ ਨਿਯ੍ਯਾਨਟ੍ਠੋ, ਹੇਤੁਟ੍ਠੋ, ਦਸ੍ਸਨਟ੍ਠੋ, ਆਧਿਪਤੇਯ੍ਯਟ੍ਠੋ ਤਥਟ੍ਠੋ – ਇਮੇਹਿ ਸੋਲ਼ਸਹਿ ਆਕਾਰੇਹਿ ਤਥਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

ਕਥਂ ਅਨਤ੍ਤਟ੍ਠੇਨ…ਪੇ… ਸਚ੍ਚਟ੍ਠੇਨ… ਪਟਿਵੇਧਟ੍ਠੇਨ… ਅਭਿਜਾਨਨਟ੍ਠੇਨ… ਪਰਿਜਾਨਨਟ੍ਠੇਨ… ਧਮ੍ਮਟ੍ਠੇਨ… ਤਥਟ੍ਠੇਨ… ਞਾਤਟ੍ਠੇਨ… ਸਚ੍ਛਿਕਿਰਿਯਟ੍ਠੇਨ… ਫਸ੍ਸਨਟ੍ਠੇਨ… ਅਭਿਸਮਯਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ? ਸੋਲ਼ਸਹਿ ਆਕਾਰੇਹਿ ਅਭਿਸਮਯਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ. ਦੁਕ੍ਖਸ੍ਸ ਪੀਲ਼ਨਟ੍ਠੋ, ਸਙ੍ਖਤਟ੍ਠੋ, ਸਨ੍ਤਾਪਟ੍ਠੋ, ਵਿਪਰਿਣਾਮਟ੍ਠੋ, ਅਭਿਸਮਯਟ੍ਠੋ; ਸਮੁਦਯਸ੍ਸ ਆਯੂਹਨਟ੍ਠੋ, ਨਿਦਾਨਟ੍ਠੋ, ਸਂਯੋਗਟ੍ਠੋ, ਪਲਿਬੋਧਟ੍ਠੋ, ਅਭਿਸਮਯਟ੍ਠੋ; ਨਿਰੋਧਸ੍ਸ ਨਿਸ੍ਸਰਣਟ੍ਠੋ, ਵਿਵੇਕਟ੍ਠੋ, ਅਸਙ੍ਖਤਟ੍ਠੋ, ਅਮਤਟ੍ਠੋ, ਅਭਿਸਮਯਟ੍ਠੋ; ਮਗ੍ਗਸ੍ਸ ਨਿਯ੍ਯਾਨਟ੍ਠੋ, ਹੇਤੁਟ੍ਠੋ, ਦਸ੍ਸਨਟ੍ਠੋ, ਆਧਿਪਤੇਯ੍ਯਟ੍ਠੋ, ਅਭਿਸਮਯਟ੍ਠੋ – ਇਮੇਹਿ ਸੋਲ਼ਸਹਿ ਆਕਾਰੇਹਿ ਅਭਿਸਮਯਟ੍ਠੇਨ ਚਤ੍ਤਾਰਿ ਸਚ੍ਚਾਨਿ ਏਕਸਙ੍ਗਹਿਤਾਨਿ. ਯਂ ਏਕਸਙ੍ਗਹਿਤਂ ਤਂ ਏਕਤ੍ਤਂ. ਏਕਤ੍ਤਂ ਏਕੇਨ ਞਾਣੇਨ ਪਟਿਵਿਜ੍ਝਤੀਤਿ – ਚਤ੍ਤਾਰਿ ਸਚ੍ਚਾਨਿ ਏਕਪ੍ਪਟਿਵੇਧਾਨਿ.

੧੨. ਸਚ੍ਚਾਨਂ ਕਤਿ ਲਕ੍ਖਣਾਨਿ? ਸਚ੍ਚਾਨਂ ਦ੍ਵੇ ਲਕ੍ਖਣਾਨਿ. ਸਙ੍ਖਤਲਕ੍ਖਣਞ੍ਚ, ਅਸਙ੍ਖਤਲਕ੍ਖਣਞ੍ਚ – ਸਚ੍ਚਾਨਂ ਇਮਾਨਿ ਦ੍ਵੇ ਲਕ੍ਖਣਾਨਿ.

ਸਚ੍ਚਾਨਂ ਕਤਿ ਲਕ੍ਖਣਾਨਿ? ਸਚ੍ਚਾਨਂ ਛ ਲਕ੍ਖਣਾਨਿ. ਸਙ੍ਖਤਾਨਂ ਸਚ੍ਚਾਨਂ ਉਪ੍ਪਾਦੋ ਪਞ੍ਞਾਯਤਿ, ਵਯੋ ਪਞ੍ਞਾਯਤਿ, ਠਿਤਾਨਂ ਅਞ੍ਞਥਤ੍ਤਂ ਪਞ੍ਞਾਯਤਿ ਅਸਙ੍ਖਤਸ੍ਸ ਸਚ੍ਚਸ੍ਸ ਨ ਉਪ੍ਪਾਦੋ ਪਞ੍ਞਾਯਤਿ, ਨ ਵਯੋ ਪਞ੍ਞਾਯਤਿ, ਨ ਠਿਤਸ੍ਸ ਅਞ੍ਞਥਤ੍ਤਂ ਪਞ੍ਞਾਯਤਿ – ਸਚ੍ਚਾਨਂ ਇਮਾਨਿ ਛ ਲਕ੍ਖਣਾਨਿ.

ਸਚ੍ਚਾਨਂ ਕਤਿ ਲਕ੍ਖਣਾਨਿ? ਸਚ੍ਚਾਨਂ ਦ੍ਵਾਦਸ ਲਕ੍ਖਣਾਨਿ. ਦੁਕ੍ਖਸਚ੍ਚਸ੍ਸ ਉਪ੍ਪਾਦੋ ਪਞ੍ਞਾਯਤਿ, ਵਯੋ ਪਞ੍ਞਾਯਤਿ, ਠਿਤਸ੍ਸ ਅਞ੍ਞਥਤ੍ਤਂ ਪਞ੍ਞਾਯਤਿ; ਸਮੁਦਯਸਚ੍ਚਸ੍ਸ ਉਪ੍ਪਾਦੋ ਪਞ੍ਞਾਯਤਿ, ਵਯੋ ਪਞ੍ਞਾਯਤਿ, ਠਿਤਸ੍ਸ ਅਞ੍ਞਥਤ੍ਤਂ ਪਞ੍ਞਾਯਤਿ; ਮਗ੍ਗਸਚ੍ਚਸ੍ਸ ਉਪ੍ਪਾਦੋ ਪਞ੍ਞਾਯਤਿ, ਵਯੋ ਪਞ੍ਞਾਯਤਿ, ਠਿਤਸ੍ਸ ਅਞ੍ਞਥਤ੍ਤਂ ਪਞ੍ਞਾਯਤਿ; ਨਿਰੋਧਸਚ੍ਚਸ੍ਸ ਨ ਉਪ੍ਪਾਦੋ ਪਞ੍ਞਾਯਤਿ, ਨ ਵਯੋ ਪਞ੍ਞਾਯਤਿ, ਨ ਠਿਤਸ੍ਸ ਅਞ੍ਞਥਤ੍ਤਂ ਪਞ੍ਞਾਯਤਿ – ਸਚ੍ਚਾਨਂ ਇਮਾਨਿ ਦ੍ਵਾਦਸ ਲਕ੍ਖਣਾਨਿ.

ਚਤੁਨ੍ਨਂ ਸਚ੍ਚਾਨਂ ਕਤਿ ਕੁਸਲਾ, ਕਤਿ ਅਕੁਸਲਾ, ਕਤਿ ਅਬ੍ਯਾਕਤਾ? ਸਮੁਦਯਸਚ੍ਚਂ ਅਕੁਸਲਂ, ਮਗ੍ਗਸਚ੍ਚਂ ਕੁਸਲਂ, ਨਿਰੋਧਸਚ੍ਚਂ ਅਬ੍ਯਾਕਤਂ. ਦੁਕ੍ਖਸਚ੍ਚਂ ਸਿਯਾ ਕੁਸਲਂ, ਸਿਯਾ ਅਕੁਸਲਂ, ਸਿਯਾ ਅਬ੍ਯਾਕਤਂ.

ਸਿਯਾ ਤੀਣਿ ਸਚ੍ਚਾਨਿ ਏਕਸਚ੍ਚੇਨ ਸਙ੍ਗਹਿਤਾਨਿ, ਏਕਸਚ੍ਚਂ ਤੀਹਿ ਸਚ੍ਚੇਹਿ ਸਙ੍ਗਹਿਤਂ? ਵਤ੍ਥੁਵਸੇਨ ਪਰਿਯਾਯੇਨ ਸਿਯਾਤਿ. ਕਥਞ੍ਚ ਸਿਯਾ? ਯਂ ਦੁਕ੍ਖਸਚ੍ਚਂ ਅਕੁਸਲਂ, ਸਮੁਦਯਸਚ੍ਚਂ ਅਕੁਸਲਂ – ਏਵਂ ਅਕੁਸਲਟ੍ਠੇਨ ਦ੍ਵੇ ਸਚ੍ਚਾਨਿ ਏਕਸਚ੍ਚੇਨ ਸਙ੍ਗਹਿਤਾਨਿ, ਏਕਸਚ੍ਚਂ ਦ੍ਵੀਹਿ ਸਚ੍ਚੇਹਿ ਸਙ੍ਗਹਿਤਂ. ਯਂ ਦੁਕ੍ਖਸਚ੍ਚਂ ਕੁਸਲਂ, ਮਗ੍ਗਸਚ੍ਚਂ ਕੁਸਲਂ – ਏਵਂ ਕੁਸਲਟ੍ਠੇਨ ਦ੍ਵੇ ਸਚ੍ਚਾਨਿ ਏਕਸਚ੍ਚੇਨ ਸਙ੍ਗਹਿਤਾਨਿ, ਏਕਸਚ੍ਚਂ ਦ੍ਵੀਹਿ ਸਚ੍ਚੇਹਿ ਸਙ੍ਗਹਿਤਂ. ਯਂ ਦੁਕ੍ਖਸਚ੍ਚਂ ਅਬ੍ਯਾਕਤਂ, ਨਿਰੋਧਸਚ੍ਚਂ ਅਬ੍ਯਾਕਤਂ – ਏਵਂ ਅਬ੍ਯਾਕਤਟ੍ਠੇਨ ਦ੍ਵੇ ਸਚ੍ਚਾਨਿ ਏਕਸਚ੍ਚੇਨ ਸਙ੍ਗਹਿਤਾਨਿ, ਏਕਸਚ੍ਚਂ ਦ੍ਵੀਹਿ ਸਚ੍ਚੇਹਿ ਸਙ੍ਗਹਿਤਂ. ਏਵਂ ਸਿਯਾ ਤੀਣਿ ਸਚ੍ਚਾਨਿ ਏਕਸਚ੍ਚੇਨ ਸਙ੍ਗਹਿਤਾਨਿ, ਏਕਸਚ੍ਚਂ ਤੀਹਿ ਸਚ੍ਚੇਹਿ ਸਙ੍ਗਹਿਤਂ ਵਤ੍ਥੁਵਸੇਨ ਪਰਿਯਾਯੇਨਾਤਿ.

੨. ਦੁਤਿਯਸੁਤ੍ਤਨ੍ਤਪਾਲ਼ਿ

੧੩. ‘‘ਪੁਬ੍ਬੇ ਮੇ, ਭਿਕ੍ਖਵੇ [ਸਂ. ਨਿ. ੩.੨੬], ਸਮ੍ਬੋਧਾ ਅਨਭਿਸਮ੍ਬੁਦ੍ਧਸ੍ਸ ਬੋਧਿਸਤ੍ਤਸ੍ਸੇਵ ਸਤੋ ਏਤਦਹੋਸਿ – ‘ਕੋ ਨੁ ਖੋ ਰੂਪਸ੍ਸ ਅਸ੍ਸਾਦੋ, ਕੋ ਆਦੀਨਵੋ, ਕਿਂ ਨਿਸ੍ਸਰਣਂ; ਕੋ ਵੇਦਨਾਯ ਅਸ੍ਸਾਦੋ, ਕੋ ਆਦੀਨਵੋ, ਕਿਂ ਨਿਸ੍ਸਰਣਂ; ਕੋ ਸਞ੍ਞਾਯ ਅਸ੍ਸਾਦੋ, ਕੋ ਆਦੀਨਵੋ, ਕਿਂ ਨਿਸ੍ਸਰਣਂ; ਕੋ ਸਙ੍ਖਾਰਾਨਂ ਅਸ੍ਸਾਦੋ, ਕੋ ਆਦੀਨਵੋ, ਕਿਂ ਨਿਸ੍ਸਰਣਂ; ਕੋ ਵਿਞ੍ਞਾਣਸ੍ਸ ਅਸ੍ਸਾਦੋ, ਕੋ ਆਦੀਨਵੋ, ਕਿਂ ਨਿਸ੍ਸਰਣ’ਨ੍ਤਿ? ਤਸ੍ਸ ਮਯ੍ਹਂ, ਭਿਕ੍ਖਵੇ, ਏਤਦਹੋਸਿ – ‘ਯਂ ਖੋ ਰੂਪਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਂ ਸੋਮਨਸ੍ਸਂ – ਅਯਂ ਰੂਪਸ੍ਸ ਅਸ੍ਸਾਦੋ. ਯਂ ਰੂਪਂ ਅਨਿਚ੍ਚਂ, ਤਂ ਦੁਕ੍ਖਂ ਵਿਪਰਿਣਾਮਧਮ੍ਮਂ – ਅਯਂ ਰੂਪਸ੍ਸ ਆਦੀਨਵੋ. ਯੋ ਰੂਪਸ੍ਮਿਂ ਛਨ੍ਦਰਾਗਵਿਨਯੋ ਛਨ੍ਦਰਾਗਪ੍ਪਹਾਨਂ – ਇਦਂ ਰੂਪਸ੍ਸ ਨਿਸ੍ਸਰਣਂ. ਯਂ ਵੇਦਨਂ ਪਟਿਚ੍ਚ…ਪੇ… ਯਂ ਸਞ੍ਞਂ ਪਟਿਚ੍ਚ… ਯਂ ਸਙ੍ਖਾਰੇ ਪਟਿਚ੍ਚ… ਯਂ ਵਿਞ੍ਞਾਣਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਂ ਸੋਮਨਸ੍ਸਂ – ਅਯਂ ਵਿਞ੍ਞਾਣਸ੍ਸ ਅਸ੍ਸਾਦੋ. ਯਂ ਵਿਞ੍ਞਾਣਂ ਅਨਿਚ੍ਚਂ ਤਂ ਦੁਕ੍ਖਂ ਵਿਪਰਿਣਾਮਧਮ੍ਮਂ – ਅਯਂ ਵਿਞ੍ਞਾਣਸ੍ਸ ਆਦੀਨਵੋ. ਯੋ ਵਿਞ੍ਞਾਣਸ੍ਮਿਂ ਛਨ੍ਦਰਾਗਵਿਨਯੋ ਛਨ੍ਦਰਾਗਪ੍ਪਹਾਨਂ – ਇਦਂ ਵਿਞ੍ਞਾਣਸ੍ਸ ਨਿਸ੍ਸਰਣਂ’’.

‘‘ਯਾਵਕੀਵਞ੍ਚਾਹਂ, ਭਿਕ੍ਖਵੇ, ਇਮੇਸਂ ਪਞ੍ਚਨ੍ਨਂ ਉਪਾਦਾਨਕ੍ਖਨ੍ਧਾਨਂ ਏਵਂ ਅਸ੍ਸਾਦਞ੍ਚ ਅਸ੍ਸਾਦਤੋ ਆਦੀਨਵਞ੍ਚ ਆਦੀਨਵਤੋ ਨਿਸ੍ਸਰਣਞ੍ਚ ਨਿਸ੍ਸਰਣਤੋ ਯਥਾਭੂਤਂ ਨਾਬ੍ਭਞ੍ਞਾਸਿਂ, ਨੇਵ ਤਾਵਾਹਂ, ਭਿਕ੍ਖਵੇ, ਸਦੇਵਕੇ ਲੋਕੇ ਸਮਾਰਕੇ ਸਬ੍ਰਹ੍ਮਕੇ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ‘ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ’ਤਿ ਪਚ੍ਚਞ੍ਞਾਸਿਂ [ਅਭਿਸਮ੍ਬੁਦ੍ਧੋ ਪਚ੍ਚਞ੍ਞਾਸਿਂ (ਸ੍ਯਾ.) ਸਂ. ਨਿ. ੩.੨੬ ਪਸ੍ਸਿਤਬ੍ਬਾ] ਯਤੋ ਚ ਖ੍ਵਾਹਂ, ਭਿਕ੍ਖਵੇ, ਇਮੇਸਂ ਪਞ੍ਚਨ੍ਨਂ ਉਪਾਦਾਨਕ੍ਖਨ੍ਧਾਨਂ ਏਵਂ ਅਸ੍ਸਾਦਞ੍ਚ ਅਸ੍ਸਾਦਤੋ ਆਦੀਨਵਞ੍ਚ ਆਦੀਨਵਤੋ ਨਿਸ੍ਸਰਣਞ੍ਚ ਨਿਸ੍ਸਰਣਤੋ ਯਥਾਭੂਤਂ ਅਬ੍ਭਞ੍ਞਾਸਿਂ, ਅਥਾਹਂ, ਭਿਕ੍ਖਵੇ, ‘ਸਦੇਵਕੇ ਲੋਕੇ ਸਮਾਰਕੇ ਸਬ੍ਰਹ੍ਮਕੇ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ’ਤਿ ਪਚ੍ਚਞ੍ਞਾਸਿਂ. ਞਾਣਞ੍ਚ ਪਨ ਮੇ ਦਸ੍ਸਨਂ ਉਦਪਾਦਿ – ‘ਅਕੁਪ੍ਪਾ ਮੇ ਵਿਮੁਤ੍ਤਿ [ਚੇਤੋਵਿਮੁਤ੍ਤਿ (ਸ੍ਯਾ. ਕ.) ਸਂ. ਨਿ. ੩.੨੭ ਪਸ੍ਸਿਤਬ੍ਬਾ]. ਅਯਮਨ੍ਤਿਮਾ ਜਾਤਿ, ਨਤ੍ਥਿ ਦਾਨਿ ਪੁਨਬ੍ਭਵੋ’’’ਤਿ.

੩. ਦੁਤਿਯਸੁਤ੍ਤਨ੍ਤਨਿਦ੍ਦੇਸੋ

੧੪. ਯਂ ਰੂਪਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਂ ਸੋਮਨਸ੍ਸਂ, ਅਯਂ ਰੂਪਸ੍ਸ ਅਸ੍ਸਾਦੋਤਿ – ਪਹਾਨਪ੍ਪਟਿਵੇਧੋ ਸਮੁਦਯਸਚ੍ਚਂ. ਯਂ ਰੂਪਂ ਅਨਿਚ੍ਚਂ ਤਂ ਦੁਕ੍ਖਂ ਵਿਪਰਿਣਾਮਧਮ੍ਮਂ, ਅਯਂ ਰੂਪਸ੍ਸ ਆਦੀਨਵੋਤਿ – ਪਰਿਞ੍ਞਾਪਟਿਵੇਧੋ ਦੁਕ੍ਖਸਚ੍ਚਂ. ਯੋ ਰੂਪਸ੍ਮਿਂ ਛਨ੍ਦਰਾਗਵਿਨਯੋ ਛਨ੍ਦਰਾਗਪ੍ਪਹਾਨਂ, ਇਦਂ ਰੂਪਸ੍ਸ ਨਿਸ੍ਸਰਣਨ੍ਤਿ – ਸਚ੍ਛਿਕਿਰਿਯਾਪਟਿਵੇਧੋ ਨਿਰੋਧਸਚ੍ਚਂ. ਯਾ ਇਮੇਸੁ ਤੀਸੁ ਠਾਨੇਸੁ ਦਿਟ੍ਠਿ ਸਙ੍ਕਪ੍ਪੋ ਵਾਚਾ ਕਮ੍ਮਨ੍ਤੋ ਆਜੀਵੋ ਵਾਯਾਮੋ ਸਤਿ ਸਮਾਧਿ – ਭਾਵਨਾਪਟਿਵੇਧੋ ਮਗ੍ਗਸਚ੍ਚਂ.

ਯਂ ਵੇਦਨਂ ਪਟਿਚ੍ਚ…ਪੇ… ਯਂ ਸਞ੍ਞਂ ਪਟਿਚ੍ਚ… ਯਂ ਸਙ੍ਖਾਰੇ ਪਟਿਚ੍ਚ… ਯਂ ਵਿਞ੍ਞਾਣਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਂ ਸੋਮਨਸ੍ਸਂ, ਅਯਂ ਵਿਞ੍ਞਾਣਸ੍ਸ ਅਸ੍ਸਾਦੋਤਿ – ਪਹਾਨਪ੍ਪਟਿਵੇਧੋ ਸਮੁਦਯਸਚ੍ਚਂ. ਯਂ ਵਿਞ੍ਞਾਣਂ ਅਨਿਚ੍ਚਂ ਤਂ ਦੁਕ੍ਖਂ ਵਿਪਰਿਣਾਮਧਮ੍ਮਂ, ਅਯਂ ਵਿਞ੍ਞਾਣਸ੍ਸ ਆਦੀਨਵੋਤਿ – ਪਰਿਞ੍ਞਾਪਟਿਵੇਧੋ ਦੁਕ੍ਖਸਚ੍ਚਂ. ਯੋ ਵਿਞ੍ਞਾਣਸ੍ਮਿਂ ਛਨ੍ਦਰਾਗਵਿਨਯੋ ਛਨ੍ਦਰਾਗਪ੍ਪਹਾਨਂ, ਇਦਂ ਵਿਞ੍ਞਾਣਸ੍ਸ ਨਿਸ੍ਸਰਣਨ੍ਤਿ – ਸਚ੍ਛਿਕਿਰਿਯਾਪਟਿਵੇਧੋ ਨਿਰੋਧਸਚ੍ਚਂ. ਯਾ ਇਮੇਸੁ ਤੀਸੁ ਠਾਨੇਸੁ ਦਿਟ੍ਠਿ ਸਙ੍ਕਪ੍ਪੋ ਵਾਚਾ ਕਮ੍ਮਨ੍ਤੋ ਆਜੀਵੋ ਵਾਯਾਮੋ ਸਤਿ ਸਮਾਧਿ – ਭਾਵਨਾਪਟਿਵੇਧੋ ਮਗ੍ਗਸਚ੍ਚਂ.

੧੫. ਸਚ੍ਚਨ੍ਤਿ ਕਤਿਹਾਕਾਰੇਹਿ ਸਚ੍ਚਂ? ਏਸਨਟ੍ਠੇਨ, ਪਰਿਗ੍ਗਹਟ੍ਠੇਨ, ਪਟਿਵੇਧਟ੍ਠੇਨ. ਕਥਂ ਏਸਨਟ੍ਠੇਨ ਸਚ੍ਚਂ? ਜਰਾਮਰਣਂ ਕਿਂਨਿਦਾਨਂ, ਕਿਂਸਮੁਦਯਂ, ਕਿਂਜਾਤਿਕਂ, ਕਿਂਪਭਵਨ੍ਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਜਰਾਮਰਣਂ ਜਾਤਿਨਿਦਾਨਂ, ਜਾਤਿਸਮੁਦਯਂ, ਜਾਤਿਜਾਤਿਕਂ, ਜਾਤਿਪ੍ਪਭਵਨ੍ਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਜਰਾਮਰਣਞ੍ਚ ਪਜਾਨਾਤਿ, ਜਰਾਮਰਣਸਮੁਦਯਞ੍ਚ ਪਜਾਨਾਤਿ, ਜਰਾਮਰਣਨਿਰੋਧਞ੍ਚ ਪਜਾਨਾਤਿ, ਜਰਾਮਰਣਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਜਾਤਿ ਕਿਂਨਿਦਾਨਾ, ਕਿਂਸਮੁਦਯਾ, ਕਿਂਜਾਤਿਕਾ, ਕਿਂਪਭਵਾਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਜਾਤਿ ਭਵਨਿਦਾਨਾ, ਭਵਸਮੁਦਯਾ, ਭਵਜਾਤਿਕਾ, ਭਵਪ੍ਪਭਵਾਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਜਾਤਿਞ੍ਚ ਪਜਾਨਾਤਿ, ਜਾਤਿਸਮੁਦਯਞ੍ਚ ਪਜਾਨਾਤਿ, ਜਾਤਿਨਿਰੋਧਞ੍ਚ ਪਜਾਨਾਤਿ, ਜਾਤਿਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਭਵੋ ਕਿਂਨਿਦਾਨੋ, ਕਿਂਸਮੁਦਯੋ, ਕਿਂਜਾਤਿਕੋ, ਕਿਂਪਭਵੋਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਭਵੋ ਉਪਾਦਾਨਨਿਦਾਨੋ, ਉਪਾਦਾਨਸਮੁਦਯੋ, ਉਪਾਦਾਨਜਾਤਿਕੋ, ਉਪਾਦਾਨਪ੍ਪਭਵੋਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਭਵਂ ਚ ਪਜਾਨਾਤਿ, ਭਵਸਮੁਦਯਞ੍ਚ ਪਜਾਨਾਤਿ, ਭਵਨਿਰੋਧਞ੍ਚ ਪਜਾਨਾਤਿ, ਭਵਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਉਪਾਦਾਨਂ ਕਿਂਨਿਦਾਨਂ, ਕਿਂਸਮੁਦਯਂ, ਕਿਂਜਾਤਿਕਂ, ਕਿਂਪਭਵਨ੍ਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਉਪਾਦਾਨਂ ਤਣ੍ਹਾਨਿਦਾਨਂ, ਤਣ੍ਹਾਸਮੁਦਯਂ, ਤਣ੍ਹਾਜਾਤਿਕਂ, ਤਣ੍ਹਾਪਭਵਨ੍ਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਉਪਾਦਾਨਞ੍ਚ ਪਜਾਨਾਤਿ, ਉਪਾਦਾਨਸਮੁਦਯਞ੍ਚ ਪਜਾਨਾਤਿ, ਉਪਾਦਾਨਨਿਰੋਧਞ੍ਚ ਪਜਾਨਾਤਿ ਉਪਾਦਾਨਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਤਣ੍ਹਾ ਕਿਂਨਿਦਾਨਾ, ਕਿਂਸਮੁਦਯਾ, ਕਿਂਜਾਤਿਕਾ, ਕਿਂਪਭਵਾਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਤਣ੍ਹਾ ਵੇਦਨਾਨਿਦਾਨਾ, ਵੇਦਨਾਸਮੁਦਯਾ, ਵੇਦਨਾਜਾਤਿਕਾ, ਵੇਦਨਾਪਭਵਾਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਤਣ੍ਹਞ੍ਚ ਪਜਾਨਾਤਿ, ਤਣ੍ਹਾਸਮੁਦਯਞ੍ਚ ਪਜਾਨਾਤਿ, ਤਣ੍ਹਾਨਿਰੋਧਞ੍ਚ ਪਜਾਨਾਤਿ, ਤਣ੍ਹਾਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਵੇਦਨਾ ਕਿਂਨਿਦਾਨਾ, ਕਿਂਸਮੁਦਯਾ, ਕਿਂਜਾਤਿਕਾ, ਕਿਂਪਭਵਾਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਵੇਦਨਾ ਫਸ੍ਸਨਿਦਾਨਾ, ਫਸ੍ਸਸਮੁਦਯਾ, ਫਸ੍ਸਜਾਤਿਕਾ, ਫਸ੍ਸਪ੍ਪਭਵਾਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਵੇਦਨਞ੍ਚ ਪਜਾਨਾਤਿ, ਵੇਦਨਾਸਮੁਦਯਞ੍ਚ ਪਜਾਨਾਤਿ, ਵੇਦਨਾਨਿਰੋਧਞ੍ਚ ਪਜਾਨਾਤਿ, ਵੇਦਨਾਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਫਸ੍ਸੋ ਕਿਂਨਿਦਾਨੋ, ਕਿਂਸਮੁਦਯੋ, ਕਿਂਜਾਤਿਕੋ, ਕਿਂਪਭਵੋਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਫਸ੍ਸੋ ਸਲ਼ਾਯਤਨਨਿਦਾਨੋ, ਸਲ਼ਾਯਤਨਸਮੁਦਯੋ, ਸਲ਼ਾਯਤਨਜਾਤਿਕੋ, ਸਲ਼ਾਯਤਨਪ੍ਪਭਵੋਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਫਸ੍ਸਞ੍ਚ ਪਜਾਨਾਤਿ, ਫਸ੍ਸਸਮੁਦਯਞ੍ਚ ਪਜਾਨਾਤਿ, ਫਸ੍ਸਨਿਰੋਧਞ੍ਚ ਪਜਾਨਾਤਿ, ਫਸ੍ਸਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਸਲ਼ਾਯਤਨਂ ਕਿਂਨਿਦਾਨਂ, ਕਿਂਸਮੁਦਯਂ, ਕਿਂਜਾਤਿਕਂ, ਕਿਂਪਭਵਨ੍ਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਸਲ਼ਾਯਤਨਂ ਨਾਮਰੂਪਨਿਦਾਨਂ, ਨਾਮਰੂਪਸਮੁਦਯਂ, ਨਾਮਰੂਪਜਾਤਿਕਂ, ਨਾਮਰੂਪਪ੍ਪਭਵਨ੍ਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਸਲ਼ਾਯਤਨਞ੍ਚ ਪਜਾਨਾਤਿ, ਸਲ਼ਾਯਤਨਸਮੁਦਯਞ੍ਚ ਪਜਾਨਾਤਿ, ਸਲ਼ਾਯਤਨਨਿਰੋਧਞ੍ਚ ਪਜਾਨਾਤਿ, ਸਲ਼ਾਯਤਨਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਨਾਮਰੂਪਂ ਕਿਂਨਿਦਾਨਂ, ਕਿਂਸਮੁਦਯਂ, ਕਿਂਜਾਤਿਕਂ, ਕਿਂਪਭਵਨ੍ਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਨਾਮਰੂਪਂ ਵਿਞ੍ਞਾਣਨਿਦਾਨਂ, ਵਿਞ੍ਞਾਣਸਮੁਦਯਂ, ਵਿਞ੍ਞਾਣਜਾਤਿਕਂ, ਵਿਞ੍ਞਾਣਪ੍ਪਭਵਨ੍ਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਨਾਮਰੂਪਞ੍ਚ ਪਜਾਨਾਤਿ, ਨਾਮਰੂਪਸਮੁਦਯਞ੍ਚ ਪਜਾਨਾਤਿ, ਨਾਮਰੂਪਨਿਰੋਧਞ੍ਚ ਪਜਾਨਾਤਿ, ਨਾਮਰੂਪਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਵਿਞ੍ਞਾਣਂ ਕਿਂਨਿਦਾਨਂ, ਕਿਂਸਮੁਦਯਂ, ਕਿਂਜਾਤਿਕਂ, ਕਿਂਪਭਵਨ੍ਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਵਿਞ੍ਞਾਣਂ ਸਙ੍ਖਾਰਨਿਦਾਨਂ, ਸਙ੍ਖਾਰਸਮੁਦਯਂ, ਸਙ੍ਖਾਰਜਾਤਿਕਂ, ਸਙ੍ਖਾਰਪ੍ਪਭਵਨ੍ਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਵਿਞ੍ਞਾਣਞ੍ਚ ਪਜਾਨਾਤਿ, ਵਿਞ੍ਞਾਣਸਮੁਦਯਞ੍ਚ ਪਜਾਨਾਤਿ, ਵਿਞ੍ਞਾਣਨਿਰੋਧਞ੍ਚ ਪਜਾਨਾਤਿ, ਵਿਞ੍ਞਾਣਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

ਸਙ੍ਖਾਰਾ ਕਿਂਨਿਦਾਨਾ, ਕਿਂਸਮੁਦਯਾ, ਕਿਂਜਾਤਿਕਾ, ਕਿਂਪਭਵਾਤਿ – ਏਵਂ ਏਸਨਟ੍ਠੇਨ ਸਚ੍ਚਂ. ਸਙ੍ਖਾਰਾ ਅਵਿਜ੍ਜਾਨਿਦਾਨਾ, ਅਵਿਜ੍ਜਾਸਮੁਦਯਾ, ਅਵਿਜ੍ਜਾਜਾਤਿਕਾ, ਅਵਿਜ੍ਜਾਪਭਵਾਤਿ – ਏਵਂ ਪਰਿਗ੍ਗਹਟ੍ਠੇਨ ਸਚ੍ਚਂ. ਸਙ੍ਖਾਰੇ ਚ ਪਜਾਨਾਤਿ, ਸਙ੍ਖਾਰਸਮੁਦਯਞ੍ਚ ਪਜਾਨਾਤਿ, ਸਙ੍ਖਾਰਨਿਰੋਧਞ੍ਚ ਪਜਾਨਾਤਿ, ਸਙ੍ਖਾਰਨਿਰੋਧਗਾਮਿਨਿਂ ਪਟਿਪਦਞ੍ਚ ਪਜਾਨਾਤਿ – ਏਵਂ ਪਟਿਵੇਧਟ੍ਠੇਨ ਸਚ੍ਚਂ.

੧੬. ਜਰਾਮਰਣਂ ਦੁਕ੍ਖਸਚ੍ਚਂ, ਜਾਤਿ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਜਾਤਿ ਦੁਕ੍ਖਸਚ੍ਚਂ, ਭਵੋ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਭਵੋ ਦੁਕ੍ਖਸਚ੍ਚਂ, ਉਪਾਦਾਨਂ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਉਪਾਦਾਨਂ ਦੁਕ੍ਖਸਚ੍ਚਂ, ਤਣ੍ਹਾ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਤਣ੍ਹਾ ਦੁਕ੍ਖਸਚ੍ਚਂ, ਵੇਦਨਾ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਵੇਦਨਾ ਦੁਕ੍ਖਸਚ੍ਚਂ, ਫਸ੍ਸੋ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਫਸ੍ਸੋ ਦੁਕ੍ਖਸਚ੍ਚਂ, ਸਲ਼ਾਯਤਨਂ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਸਲ਼ਾਯਤਨਂ ਦੁਕ੍ਖਸਚ੍ਚਂ, ਨਾਮਰੂਪਂ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਨਾਮਰੂਪਂ ਦੁਕ੍ਖਸਚ੍ਚਂ, ਵਿਞ੍ਞਾਣਂ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਵਿਞ੍ਞਾਣਂ ਦੁਕ੍ਖਸਚ੍ਚਂ, ਸਙ੍ਖਾਰਾ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਸਙ੍ਖਾਰਾ ਦੁਕ੍ਖਸਚ੍ਚਂ, ਅਵਿਜ੍ਜਾ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ.

ਜਰਾਮਰਣਂ ਸਿਯਾ ਦੁਕ੍ਖਸਚ੍ਚਂ, ਸਿਯਾ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਂ. ਜਾਤਿ ਸਿਯਾ ਦੁਕ੍ਖਸਚ੍ਚਂ, ਸਿਯਾ ਸਮੁਦਯਸਚ੍ਚਂ…ਪੇ… ਭਵੋ ਸਿਯਾ ਦੁਕ੍ਖਸਚ੍ਚਂ, ਸਿਯਾ ਸਮੁਦਯਸਚ੍ਚਂ, ਉਭਿਨ੍ਨਮ੍ਪਿ ਨਿਸ੍ਸਰਣਂ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਮਗ੍ਗਸਚ੍ਚਨ੍ਤਿ.

ਭਾਣਵਾਰੋ.

ਸਚ੍ਚਕਥਾ ਨਿਟ੍ਠਿਤਾ.

੩. ਬੋਜ੍ਝਙ੍ਗਕਥਾ

੧੭. ਸਾਵਤ੍ਥਿਨਿਦਾਨਂ. ‘‘ਸਤ੍ਤਿਮੇ, ਭਿਕ੍ਖਵੇ [ਸਂ. ਨਿ. ੫.੨੦੦], ਬੋਜ੍ਝਙ੍ਗਾ. ਕਤਮੇ ਸਤ੍ਤ? ਸਤਿਸਮ੍ਬੋਜ੍ਝਙ੍ਗੋ, ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ, ਵੀਰਿਯਸਮ੍ਬੋਜ੍ਝਙ੍ਗੋ, ਪੀਤਿਸਮ੍ਬੋਜ੍ਝਙ੍ਗੋ, ਪਸ੍ਸਦ੍ਧਿਸਮ੍ਬੋਜ੍ਝਙ੍ਗੋ, ਸਮਾਧਿਸਮ੍ਬੋਜ੍ਝਙ੍ਗੋ, ਉਪੇਕ੍ਖਾਸਮ੍ਬੋਜ੍ਝਙ੍ਗੋ – ਇਮੇ ਖੋ, ਭਿਕ੍ਖਵੇ, ਸਤ੍ਤ ਬੋਜ੍ਝਙ੍ਗਾ’’.

ਬੋਜ੍ਝਙ੍ਗਾਤਿ ਕੇਨਟ੍ਠੇਨ ਬੋਜ੍ਝਙ੍ਗਾ? ਬੋਧਾਯ ਸਂਵਤ੍ਤਨ੍ਤੀਤਿ – ਬੋਜ੍ਝਙ੍ਗਾ. ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਨੁਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਟਿਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਮ੍ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਬੁਜ੍ਝਨਟ੍ਠੇਨ ਬੋਜ੍ਝਙ੍ਗਾ, ਅਨੁਬੁਜ੍ਝਨਟ੍ਠੇਨ ਬੋਜ੍ਝਙ੍ਗਾ, ਪਟਿਬੁਜ੍ਝਨਟ੍ਠੇਨ ਬੋਜ੍ਝਙ੍ਗਾ, ਸਮ੍ਬੁਜ੍ਝਨਟ੍ਠੇਨ ਬੋਜ੍ਝਙ੍ਗਾ.

ਬੋਧੇਨ੍ਤੀਤਿ – ਬੋਜ੍ਝਙ੍ਗਾ. ਅਨੁਬੋਧੇਨ੍ਤੀਤਿ – ਬੋਜ੍ਝਙ੍ਗਾ. ਪਟਿਬੋਧੇਨ੍ਤੀਤਿ – ਬੋਜ੍ਝਙ੍ਗਾ. ਸਮ੍ਬੋਧੇਨ੍ਤੀਤਿ – ਬੋਜ੍ਝਙ੍ਗਾ.

ਬੋਧਨਟ੍ਠੇਨ ਬੋਜ੍ਝਙ੍ਗਾ, ਅਨੁਬੋਧਨਟ੍ਠੇਨ ਬੋਜ੍ਝਙ੍ਗਾ, ਪਟਿਬੋਧਨਟ੍ਠੇਨ ਬੋਜ੍ਝਙ੍ਗਾ, ਸਮ੍ਬੋਧਨਟ੍ਠੇਨ ਬੋਜ੍ਝਙ੍ਗਾ.

ਬੋਧਿਪਕ੍ਖਿਯਟ੍ਠੇਨ ਬੋਜ੍ਝਙ੍ਗਾ, ਅਨੁਬੋਧਿਪਕ੍ਖਿਯਟ੍ਠੇਨ ਬੋਜ੍ਝਙ੍ਗਾ, ਪਟਿਬੋਧਿਪਕ੍ਖਿਯਟ੍ਠੇਨ ਬੋਜ੍ਝਙ੍ਗਾ, ਸਮ੍ਬੋਧਿਪਕ੍ਖਿਯਟ੍ਠੇਨ ਬੋਜ੍ਝਙ੍ਗਾ.

ਬੁਦ੍ਧਿਲਭਨਟ੍ਠੇਨ ਬੋਜ੍ਝਙ੍ਗਾ, ਬੁਦ੍ਧਿਪਟਿਲਭਨਟ੍ਠੇਨ ਬੋਜ੍ਝਙ੍ਗਾ, ਬੁਦ੍ਧਿਰੋਪਨਟ੍ਠੇਨ ਬੋਜ੍ਝਙ੍ਗਾ, ਬੁਦ੍ਧਿਅਭਿਰੋਪਨਟ੍ਠੇਨ ਬੋਜ੍ਝਙ੍ਗਾ, ਬੁਦ੍ਧਿਪਾਪਨਟ੍ਠੇਨ ਬੋਜ੍ਝਙ੍ਗਾ, ਬੁਦ੍ਧਿਸਮ੍ਪਾਪਨਟ੍ਠੇਨ ਬੋਜ੍ਝਙ੍ਗਾ.

ਮੂਲਮੂਲਕਾਦਿਦਸਕਂ

੧੮. ਮੂਲਟ੍ਠੇਨ ਬੋਜ੍ਝਙ੍ਗਾ, ਮੂਲਚਰਿਯਟ੍ਠੇਨ ਬੋਜ੍ਝਙ੍ਗਾ, ਮੂਲਪਰਿਗ੍ਗਹਟ੍ਠੇਨ ਬੋਜ੍ਝਙ੍ਗਾ, ਮੂਲਪਰਿਵਾਰਟ੍ਠੇਨ ਬੋਜ੍ਝਙ੍ਗਾ, ਮੂਲਪਰਿਪੂਰਣਟ੍ਠੇਨ [ਮੂਲਪਰਿਪੂਰਟ੍ਠੇਨ (ਸ੍ਯਾ. ਕ.) ਏਵਮੁਪਰਿਪਿ] ਬੋਜ੍ਝਙ੍ਗਾ, ਮੂਲਪਰਿਪਾਕਟ੍ਠੇਨ ਬੋਜ੍ਝਙ੍ਗਾ, ਮੂਲਪਟਿਸਮ੍ਭਿਦਟ੍ਠੇਨ ਬੋਜ੍ਝਙ੍ਗਾ, ਮੂਲਪਟਿਸਮ੍ਭਿਦਾਪਾਪਨਟ੍ਠੇਨ ਬੋਜ੍ਝਙ੍ਗਾ, ਮੂਲਪਟਿਸਮ੍ਭਿਦਾਯ ਵਸੀਭਾਵਟ੍ਠੇਨ ਬੋਜ੍ਝਙ੍ਗਾ, ਮੂਲਪਟਿਸਮ੍ਭਿਦਾਯ ਵਸੀਭਾਵਪ੍ਪਤ੍ਤਾਨਮ੍ਪਿ ਬੋਜ੍ਝਙ੍ਗਾ.

ਹੇਤੁਟ੍ਠੇਨ ਬੋਜ੍ਝਙ੍ਗਾ, ਹੇਤੁਚਰਿਯਟ੍ਠੇਨ ਬੋਜ੍ਝਙ੍ਗਾ, ਹੇਤੁਪਰਿਗ੍ਗਹਟ੍ਠੇਨ ਬੋਜ੍ਝਙ੍ਗਾ, ਹੇਤੁਪਰਿਵਾਰਟ੍ਠੇਨ ਬੋਜ੍ਝਙ੍ਗਾ, ਹੇਤੁਪਰਿਪੂਰਣਟ੍ਠੇਨ ਬੋਜ੍ਝਙ੍ਗਾ, ਹੇਤੁਪਰਿਪਾਕਟ੍ਠੇਨ ਬੋਜ੍ਝਙ੍ਗਾ, ਹੇਤੁਪਟਿਸਮ੍ਭਿਦਟ੍ਠੇਨ ਬੋਜ੍ਝਙ੍ਗਾ, ਹੇਤੁਪਟਿਸਮ੍ਭਿਦਾਪਾਪਨਟ੍ਠੇਨ ਬੋਜ੍ਝਙ੍ਗਾ, ਹੇਤੁਪਟਿਸਮ੍ਭਿਦਾਯ ਵਸੀਭਾਵਟ੍ਠੇਨ ਬੋਜ੍ਝਙ੍ਗਾ, ਹੇਤੁਪਟਿਸਮ੍ਭਿਦਾਯ ਵਸੀਭਾਵਪ੍ਪਤ੍ਤਾਨਮ੍ਪਿ ਬੋਜ੍ਝਙ੍ਗਾ.

ਪਚ੍ਚਯਟ੍ਠੇਨ ਬੋਜ੍ਝਙ੍ਗਾ, ਪਚ੍ਚਯਚਰਿਯਟ੍ਠੇਨ ਬੋਜ੍ਝਙ੍ਗਾ, ਪਚ੍ਚਯਪਰਿਗ੍ਗਹਟ੍ਠੇਨ ਬੋਜ੍ਝਙ੍ਗਾ, ਪਚ੍ਚਯਪਰਿਵਾਰਟ੍ਠੇਨ ਬੋਜ੍ਝਙ੍ਗਾ, ਪਚ੍ਚਯਪਰਿਪੂਰਣਟ੍ਠੇਨ ਬੋਜ੍ਝਙ੍ਗਾ, ਪਚ੍ਚਯਪਰਿਪਾਕਟ੍ਠੇਨ ਬੋਜ੍ਝਙ੍ਗਾ, ਪਚ੍ਚਯਪਟਿਸਮ੍ਭਿਦਟ੍ਠੇਨ ਬੋਜ੍ਝਙ੍ਗਾ, ਪਚ੍ਚਯਪਟਿਸਮ੍ਭਿਦਾਪਾਪਨਟ੍ਠੇਨ ਬੋਜ੍ਝਙ੍ਗਾ, ਪਚ੍ਚਯਪਟਿਸਮ੍ਭਿਦਾਯ ਵਸੀਭਾਵਟ੍ਠੇਨ ਬੋਜ੍ਝਙ੍ਗਾ, ਪਚ੍ਚਯਪਟਿਸਮ੍ਭਿਦਾਯ ਵਸੀਭਾਵਪ੍ਪਤ੍ਤਾਨਮ੍ਪਿ ਬੋਜ੍ਝਙ੍ਗਾ.

ਵਿਸੁਦ੍ਧਟ੍ਠੇਨ ਬੋਜ੍ਝਙ੍ਗਾ, ਵਿਸੁਦ੍ਧਿਚਰਿਯਟ੍ਠੇਨ ਬੋਜ੍ਝਙ੍ਗਾ, ਵਿਸੁਦ੍ਧਿਪਰਿਗ੍ਗਹਟ੍ਠੇਨ ਬੋਜ੍ਝਙ੍ਗਾ, ਵਿਸੁਦ੍ਧਿਪਰਿਵਾਰਟ੍ਠੇਨ ਬੋਜ੍ਝਙ੍ਗਾ, ਵਿਸੁਦ੍ਧਿਪਰਿਪੂਰਣਟ੍ਠੇਨ ਬੋਜ੍ਝਙ੍ਗਾ, ਵਿਸੁਦ੍ਧਿਪਰਿਪਾਕਟ੍ਠੇਨ ਬੋਜ੍ਝਙ੍ਗਾ, ਵਿਸੁਦ੍ਧਿਪਟਿਸਮ੍ਭਿਦਟ੍ਠੇਨ ਬੋਜ੍ਝਙ੍ਗਾ, ਵਿਸੁਦ੍ਧਿਪਟਿਸਮ੍ਭਿਦਾਪਾਪਨਟ੍ਠੇਨ ਬੋਜ੍ਝਙ੍ਗਾ, ਵਿਸੁਦ੍ਧਿਪਟਿਸਮ੍ਭਿਦਾਯ ਵਸੀਭਾਵਟ੍ਠੇਨ ਬੋਜ੍ਝਙ੍ਗਾ, ਵਿਸੁਦ੍ਧਿਪਟਿਸਮ੍ਭਿਦਾਯ ਵਸੀਭਾਵਪ੍ਪਤ੍ਤਾਨਮ੍ਪਿ ਬੋਜ੍ਝਙ੍ਗਾ.

ਅਨਵਜ੍ਜਟ੍ਠੇਨ ਬੋਜ੍ਝਙ੍ਗਾ, ਅਨਵਜ੍ਜਚਰਿਯਟ੍ਠੇਨ ਬੋਜ੍ਝਙ੍ਗਾ, ਅਨਵਜ੍ਜਪਰਿਗ੍ਗਹਟ੍ਠੇਨ ਬੋਜ੍ਝਙ੍ਗਾ, ਅਨਵਜ੍ਜਪਰਿਵਾਰਟ੍ਠੇਨ ਬੋਜ੍ਝਙ੍ਗਾ, ਅਨਵਜ੍ਜਪਰਿਪੂਰਣਟ੍ਠੇਨ ਬੋਜ੍ਝਙ੍ਗਾ, ਅਨਵਜ੍ਜਪਰਿਪਾਕਟ੍ਠੇਨ ਬੋਜ੍ਝਙ੍ਗਾ, ਅਨਵਜ੍ਜਪਟਿਸਮ੍ਭਿਦਟ੍ਠੇਨ ਬੋਜ੍ਝਙ੍ਗਾ, ਅਨਵਜ੍ਜਪਟਿਸਮ੍ਭਿਦਾਪਾਪਨਟ੍ਠੇਨ ਬੋਜ੍ਝਙ੍ਗਾ, ਅਨਵਜ੍ਜਪਟਿਸਮ੍ਭਿਦਾਯ ਵਸੀਭਾਵਟ੍ਠੇਨ ਬੋਜ੍ਝਙ੍ਗਾ, ਅਨਵਜ੍ਜਪਟਿਸਮ੍ਭਿਦਾਯ ਵਸੀਭਾਵਪ੍ਪਤ੍ਤਾਨਮ੍ਪਿ ਬੋਜ੍ਝਙ੍ਗਾ.

ਨੇਕ੍ਖਮ੍ਮਟ੍ਠੇਨ ਬੋਜ੍ਝਙ੍ਗਾ, ਨੇਕ੍ਖਮ੍ਮਚਰਿਯਟ੍ਠੇਨ ਬੋਜ੍ਝਙ੍ਗਾ, ਨੇਕ੍ਖਮ੍ਮਪਰਿਗ੍ਗਹਟ੍ਠੇਨ ਬੋਜ੍ਝਙ੍ਗਾ, ਨੇਕ੍ਖਮ੍ਮਪਰਿਵਾਰਟ੍ਠੇਨ ਬੋਜ੍ਝਙ੍ਗਾ, ਨੇਕ੍ਖਮ੍ਮਪਰਿਪੂਰਣਟ੍ਠੇਨ ਬੋਜ੍ਝਙ੍ਗਾ, ਨੇਕ੍ਖਮ੍ਮਪਰਿਪਾਕਟ੍ਠੇਨ ਬੋਜ੍ਝਙ੍ਗਾ, ਨੇਕ੍ਖਮ੍ਮਪਟਿਸਮ੍ਭਿਦਟ੍ਠੇਨ ਬੋਜ੍ਝਙ੍ਗਾ, ਨੇਕ੍ਖਮ੍ਮਪਟਿਸਮ੍ਭਿਦਾਪਾਪਨਟ੍ਠੇਨ ਬੋਜ੍ਝਙ੍ਗਾ, ਨੇਕ੍ਖਮ੍ਮਪਟਿਸਮ੍ਭਿਦਾਯ ਵਸੀਭਾਵਟ੍ਠੇਨ ਬੋਜ੍ਝਙ੍ਗਾ, ਨੇਕ੍ਖਮ੍ਮਪਟਿਸਮ੍ਭਿਦਾਯ ਵਸੀਭਾਵਪ੍ਪਤ੍ਤਾਨਮ੍ਪਿ ਬੋਜ੍ਝਙ੍ਗਾ.

ਵਿਮੁਤ੍ਤਟ੍ਠੇਨ ਬੋਜ੍ਝਙ੍ਗਾ, ਵਿਮੁਤ੍ਤਿਚਰਿਯਟ੍ਠੇਨ ਬੋਜ੍ਝਙ੍ਗਾ, ਵਿਮੁਤ੍ਤਿਪਰਿਗ੍ਗਹਟ੍ਠੇਨ ਬੋਜ੍ਝਙ੍ਗਾ, ਵਿਮੁਤ੍ਤਿਪਰਿਵਾਰਟ੍ਠੇਨ ਬੋਜ੍ਝਙ੍ਗਾ, ਵਿਮੁਤ੍ਤਿਪਰਿਪੂਰਣਟ੍ਠੇਨ ਬੋਜ੍ਝਙ੍ਗਾ, ਵਿਮੁਤ੍ਤਿਪਰਿਪਾਕਟ੍ਠੇਨ ਬੋਜ੍ਝਙ੍ਗਾ, ਵਿਮੁਤ੍ਤਿਪਟਿਸਮ੍ਭਿਦਟ੍ਠੇਨ ਬੋਜ੍ਝਙ੍ਗਾ, ਵਿਮੁਤ੍ਤਿਪਟਿਸਮ੍ਭਿਦਾਪਾਪਨਟ੍ਠੇਨ ਬੋਜ੍ਝਙ੍ਗਾ, ਵਿਮੁਤ੍ਤਿਪਟਿਸਮ੍ਭਿਦਾਯ ਵਸੀਭਾਵਟ੍ਠੇਨ ਬੋਜ੍ਝਙ੍ਗਾ, ਵਿਮੁਤ੍ਤਿਪਟਿਸਮ੍ਭਿਦਾਯ ਵਸੀਭਾਵਪ੍ਪਤ੍ਤਾਨਮ੍ਪਿ ਬੋਜ੍ਝਙ੍ਗਾ.

ਅਨਾਸਵਟ੍ਠੇਨ ਬੋਜ੍ਝਙ੍ਗਾ, ਅਨਾਸਵਚਰਿਯਟ੍ਠੇਨ ਬੋਜ੍ਝਙ੍ਗਾ, ਅਨਾਸਵਪਰਿਗ੍ਗਹਟ੍ਠੇਨ ਬੋਜ੍ਝਙ੍ਗਾ, ਅਨਾਸਵਪਰਿਵਾਰਟ੍ਠੇਨ ਬੋਜ੍ਝਙ੍ਗਾ, ਅਨਾਸਵਪਰਿਪੂਰਣਟ੍ਠੇਨ ਬੋਜ੍ਝਙ੍ਗਾ, ਅਨਾਸਵਪਰਿਪਾਕਟ੍ਠੇਨ ਬੋਜ੍ਝਙ੍ਗਾ, ਅਨਾਸਵਪਟਿਸਮ੍ਭਿਦਟ੍ਠੇਨ ਬੋਜ੍ਝਙ੍ਗਾ, ਅਨਾਸਵਪਟਿਸਮ੍ਭਿਦਾਪਾਪਨਟ੍ਠੇਨ ਬੋਜ੍ਝਙ੍ਗਾ, ਅਨਾਸਵਪਟਿਸਮ੍ਭਿਦਾਯ ਵਸੀਭਾਵਟ੍ਠੇਨ ਬੋਜ੍ਝਙ੍ਗਾ, ਅਨਾਸਵਪਟਿਸਮ੍ਭਿਦਾਯ ਵਸੀਭਾਵਪ੍ਪਤ੍ਤਾਨਮ੍ਪਿ ਬੋਜ੍ਝਙ੍ਗਾ.

ਵਿਵੇਕਟ੍ਠੇਨ ਬੋਜ੍ਝਙ੍ਗਾ, ਵਿਵੇਕਚਰਿਯਟ੍ਠੇਨ ਬੋਜ੍ਝਙ੍ਗਾ, ਵਿਵੇਕਪਰਿਗ੍ਗਹਟ੍ਠੇਨ ਬੋਜ੍ਝਙ੍ਗਾ, ਵਿਵੇਕਪਰਿਵਾਰਟ੍ਠੇਨ ਬੋਜ੍ਝਙ੍ਗਾ, ਵਿਵੇਕਪਰਿਪੂਰਣਟ੍ਠੇਨ ਬੋਜ੍ਝਙ੍ਗਾ, ਵਿਵੇਕਪਰਿਪਾਕਟ੍ਠੇਨ ਬੋਜ੍ਝਙ੍ਗਾ, ਵਿਵੇਕਪਟਿਸਮ੍ਭਿਦਟ੍ਠੇਨ ਬੋਜ੍ਝਙ੍ਗਾ, ਵਿਵੇਕਪਟਿਸਮ੍ਭਿਦਾਪਾਪਨਟ੍ਠੇਨ ਬੋਜ੍ਝਙ੍ਗਾ, ਵਿਵੇਕਪਟਿਸਮ੍ਭਿਦਾਯ ਵਸੀਭਾਵਟ੍ਠੇਨ ਬੋਜ੍ਝਙ੍ਗਾ, ਵਿਵੇਕਪਟਿਸਮ੍ਭਿਦਾਯ ਵਸੀਭਾਵਪ੍ਪਤ੍ਤਾਨਮ੍ਪਿ ਬੋਜ੍ਝਙ੍ਗਾ.

ਵੋਸਗ੍ਗਟ੍ਠੇਨ ਬੋਜ੍ਝਙ੍ਗਾ, ਵੋਸਗ੍ਗਚਰਿਯਟ੍ਠੇਨ ਬੋਜ੍ਝਙ੍ਗਾ, ਵੋਸਗ੍ਗਪਰਿਗ੍ਗਹਟ੍ਠੇਨ ਬੋਜ੍ਝਙ੍ਗਾ, ਵੋਸਗ੍ਗਪਰਿਵਾਰਟ੍ਠੇਨ ਬੋਜ੍ਝਙ੍ਗਾ, ਵੋਸਗ੍ਗਪਰਿਪੂਰਣਟ੍ਠੇਨ ਬੋਜ੍ਝਙ੍ਗਾ, ਵੋਸਗ੍ਗਪਰਿਪਾਕਟ੍ਠੇਨ ਬੋਜ੍ਝਙ੍ਗਾ, ਵੋਸਗ੍ਗਪਟਿਸਮ੍ਭਿਦਟ੍ਠੇਨ ਬੋਜ੍ਝਙ੍ਗਾ, ਵੋਸਗ੍ਗਪਟਿਸਮ੍ਭਿਦਾਪਾਪਨਟ੍ਠੇਨ ਬੋਜ੍ਝਙ੍ਗਾ, ਵੋਸਗ੍ਗਪਟਿਸਮ੍ਭਿਦਾਯ ਵਸੀਭਾਵਟ੍ਠੇਨ ਬੋਜ੍ਝਙ੍ਗਾ, ਵੋਸਗ੍ਗਪਟਿਸਮ੍ਭਿਦਾਯ ਵਸੀਭਾਵਪ੍ਪਤ੍ਤਾਨਮ੍ਪਿ ਬੋਜ੍ਝਙ੍ਗਾ.

੧੯. ਮੂਲਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਹੇਤੁਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਚ੍ਚਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਸੁਦ੍ਧਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਨਵਜ੍ਜਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਨੇਕ੍ਖਮ੍ਮਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਮੁਤ੍ਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਨਾਸਵਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਵੇਕਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵੋਸਗ੍ਗਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਮੂਲਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਹੇਤੁਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਚ੍ਚਯਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਸੁਦ੍ਧਿਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਨਵਜ੍ਜਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਨੇਕ੍ਖਮ੍ਮਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਮੁਤ੍ਤਿਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਨਾਸਵਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਵੇਕਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵੋਸਗ੍ਗਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਮੂਲਪਰਿਗ੍ਗਹਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਵੋਸਗ੍ਗਪਰਿਗ੍ਗਹਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਮੂਲਪਰਿਵਾਰਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਵੋਸਗ੍ਗਪਰਿਵਾਰਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਮੂਲਪਰਿਪੂਰਣਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਵੋਸਗ੍ਗਪਰਿਪੂਰਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਮੂਲਪਰਿਪਾਕਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਵੋਸਗ੍ਗਪਰਿਪਾਕਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਮੂਲਪਟਿਸਮ੍ਭਿਦਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਵੋਸਗ੍ਗਪਟਿਸਮ੍ਭਿਦਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਮੂਲਪਟਿਸਮ੍ਭਿਦਾਪਾਪਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਵੋਸਗ੍ਗਪਟਿਸਮ੍ਭਿਦਾਪਾਪਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਮੂਲਪਟਿਸਮ੍ਭਿਦਾਯ ਵਸੀਭਾਵਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਵੋਸਗ੍ਗਪਟਿਸਮ੍ਭਿਦਾਯ ਵਸੀਭਾਵਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ….

ਪਰਿਗ੍ਗਹਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਰਿਵਾਰਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਰਿਪੂਰਣਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਗ੍ਗਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਵਿਕ੍ਖੇਪਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਗ੍ਗਹਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਵਿਸਾਰਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਨਾਵਿਲਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਨਿਞ੍ਜਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੁਪਟ੍ਠਾਨਵਸੇਨ ਚਿਤ੍ਤਸ੍ਸ ਠਿਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਆਰਮ੍ਮਣਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਗੋਚਰਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਹਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਰਿਚ੍ਚਾਗਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵੁਟ੍ਠਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਵਟ੍ਟਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਨ੍ਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਣੀਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਮੁਤ੍ਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਨਾਸਵਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਤਰਣਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਨਿਮਿਤ੍ਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਪ੍ਪਣਿਹਿਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸੁਞ੍ਞਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਰਸਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਨਤਿਵਤ੍ਤਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਯੁਗਨਦ੍ਧਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਨਿਯ੍ਯਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਹੇਤੁਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਦਸ੍ਸਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਆਧਿਪਤੇਯ੍ਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਸਮਥਸ੍ਸ ਅਵਿਕ੍ਖੇਪਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਪਸ੍ਸਨਾਯ ਅਨੁਪਸ੍ਸਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਮਥਵਿਪਸ੍ਸਨਾਨਂ ਏਕਰਸਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਯੁਗਨਦ੍ਧਸ੍ਸ ਅਨਤਿਵਤ੍ਤਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਿਕ੍ਖਾਯ ਸਮਾਦਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਆਰਮ੍ਮਣਸ੍ਸ ਗੋਚਰਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਲੀਨਸ੍ਸ ਚਿਤ੍ਤਸ੍ਸ ਪਗ੍ਗਹਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਉਦ੍ਧਤਸ੍ਸ ਚਿਤ੍ਤਸ੍ਸ ਨਿਗ੍ਗਹਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਉਭੋਵਿਸੁਦ੍ਧਾਨਂ ਅਜ੍ਝੁਪੇਕ੍ਖਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਸੇਸਾਧਿਗਮਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਉਤ੍ਤਰਿ ਪਟਿਵੇਧਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਚ੍ਚਾਭਿਸਮਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਨਿਰੋਧੇ ਪਤਿਟ੍ਠਾਪਕਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਸਦ੍ਧਿਨ੍ਦ੍ਰਿਯਸ੍ਸ ਅਧਿਮੋਕ੍ਖਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਪਞ੍ਞਿਨ੍ਦ੍ਰਿਯਸ੍ਸ ਦਸ੍ਸਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਦ੍ਧਾਬਲਸ੍ਸ ਅਸ੍ਸਦ੍ਧਿਯੇ ਅਕਮ੍ਪਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਪਞ੍ਞਾਬਲਸ੍ਸ ਅਵਿਜ੍ਜਾਯ ਅਕਮ੍ਪਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਤਿਸਮ੍ਬੋਜ੍ਝਙ੍ਗਸ੍ਸ ਉਪਟ੍ਠਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਉਪੇਕ੍ਖਾਸਮ੍ਬੋਜ੍ਝਙ੍ਗਸ੍ਸ ਪਟਿਸਙ੍ਖਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਮ੍ਮਾਦਿਟ੍ਠਿਯਾ ਦਸ੍ਸਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਸਮ੍ਮਾਸਮਾਧਿਸ੍ਸ ਅਵਿਕ੍ਖੇਪਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਇਨ੍ਦ੍ਰਿਯਾਨਂ ਆਧਿਪਤੇਯ੍ਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਬਲਾਨਂ ਅਕਮ੍ਪਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਨਿਯ੍ਯਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਮਗ੍ਗਸ੍ਸ ਹੇਤੁਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਤਿਪਟ੍ਠਾਨਾਨਂ ਉਪਟ੍ਠਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਮ੍ਮਪ੍ਪਧਾਨਾਨਂ ਪਦਹਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਇਦ੍ਧਿਪਾਦਾਨਂ ਇਜ੍ਝਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਚ੍ਚਾਨਂ ਤਥਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਯੋਗਾਨਂ ਪਟਿਪ੍ਪਸ੍ਸਦ੍ਧਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਫਲਾਨਂ ਸਚ੍ਛਿਕਿਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਵਿਤਕ੍ਕਸ੍ਸ ਅਭਿਨਿਰੋਪਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਚਾਰਸ੍ਸ ਉਪਵਿਚਾਰਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪੀਤਿਯਾ ਫਰਣਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸੁਖਸ੍ਸ ਅਭਿਸਨ੍ਦਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਚਿਤ੍ਤਸ੍ਸ ਏਕਗ੍ਗਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਆਵਜ੍ਜਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਜਾਨਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਜਾਨਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਞ੍ਜਾਨਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕੋਦਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਭਿਞ੍ਞਾਯ ਞਾਤਟ੍ਠਂ [ਅਭਿਞ੍ਞੇਯ੍ਯਤ੍ਥਂ (ਸ੍ਯਾ.)] ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਰਿਞ੍ਞਾਯ ਤੀਰਣਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਹਾਨਸ੍ਸ ਪਰਿਚ੍ਚਾਗਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਭਾਵਨਾਯ ਏਕਰਸਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਚ੍ਛਿਕਿਰਿਯਾਯ ਫਸ੍ਸਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਖਨ੍ਧਾਨਂ ਖਨ੍ਧਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਧਾਤੂਨਂ ਧਾਤੁਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਆਯਤਨਾਨਂ ਆਯਤਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਙ੍ਖਤਾਨਂ ਸਙ੍ਖਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਸਙ੍ਖਤਸ੍ਸ ਅਸਙ੍ਖਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਚਿਤ੍ਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਚਿਤ੍ਤਾਨਨ੍ਤਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਚਿਤ੍ਤਸ੍ਸ ਵੁਟ੍ਠਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਚਿਤ੍ਤਸ੍ਸ ਵਿਵਟ੍ਟਨਟ੍ਠਂ [ਵਿਵਜ੍ਜਨਟ੍ਠਂ (ਸ੍ਯਾ.)] ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਚਿਤ੍ਤਸ੍ਸ ਹੇਤੁਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਚਿਤ੍ਤਸ੍ਸ ਪਚ੍ਚਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਚਿਤ੍ਤਸ੍ਸ ਵਤ੍ਥੁਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਚਿਤ੍ਤਸ੍ਸ ਭੂਮਟ੍ਠਂ [ਭੁਮ੍ਮਟ੍ਠਂ (ਸ੍ਯਾ.) ਪਟਿ. ਮ. ੧.੧੪ ਪਸ੍ਸਿਤਬ੍ਬਾ] ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਚਿਤ੍ਤਸ੍ਸ ਆਰਮ੍ਮਣਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਚਿਤ੍ਤਸ੍ਸ ਗੋਚਰਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਚਿਤ੍ਤਸ੍ਸ ਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਚਿਤ੍ਤਸ੍ਸ ਗਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਚਿਤ੍ਤਸ੍ਸ ਅਭਿਨੀਹਾਰਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਚਿਤ੍ਤਸ੍ਸ ਨਿਯ੍ਯਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਚਿਤ੍ਤਸ੍ਸ ਨਿਸ੍ਸਰਣਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਏਕਤ੍ਤੇ ਆਵਜ੍ਜਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਵਿਜਾਨਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਪਜਾਨਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਸਞ੍ਜਾਨਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਏਕੋਦਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ( ) [(ਏਕਤ੍ਤੇ ਉਪਨਿਬਨ੍ਧਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ) (ਸਬ੍ਬਤ੍ਥ)]. ਏਕਤ੍ਤੇ ਪਕ੍ਖਨ੍ਦਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਪਸੀਦਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਸਨ੍ਤਿਟ੍ਠਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਵਿਮੁਚ੍ਚਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਏਤਂ ਸਨ੍ਤਨ੍ਤਿ ਪਸ੍ਸਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਯਾਨੀਕਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਵਤ੍ਥੁਕਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਅਨੁਟ੍ਠਿਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਪਰਿਚਿਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਸੁਸਮਾਰਦ੍ਧਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਪਰਿਗ੍ਗਹਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਪਰਿਵਾਰਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਪਰਿਪੂਰਣਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਸਮੋਧਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਅਧਿਟ੍ਠਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਆਸੇਵਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਭਾਵਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਬਹੁਲੀਕਮ੍ਮਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਸੁਸਮੁਗ੍ਗਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਸੁਵਿਮੁਤ੍ਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਬੁਜ੍ਝਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਅਨੁਬੁਜ੍ਝਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਪਟਿਬੁਜ੍ਝਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਸਮ੍ਬੁਜ੍ਝਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਬੋਧਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਅਨੁਬੋਧਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਪਟਿਬੋਧਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਸਮ੍ਬੁਜ੍ਝਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਬੋਧਿਪਕ੍ਖਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਅਨੁਬੋਧਿਪਕ੍ਖਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਪਟਿਬੋਧਿਪਕ੍ਖਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਸਮ੍ਬੋਧਿਪਕ੍ਖਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਜੋਤਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਉਜ੍ਜੋਤਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਅਨੁਜੋਤਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਪਟਿਜੋਤਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਏਕਤ੍ਤੇ ਸਞ੍ਜੋਤਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਪਤਾਪਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਰੋਚਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਕਿਲੇਸਾਨਂ ਸਨ੍ਤਾਪਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਮਲਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਮਲਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਨਿਮ੍ਮਲਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਮਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਮਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਵੇਕਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਵੇਕਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਰਾਗਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਰਾਗਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਨਿਰੋਧਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਨਿਰੋਧਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵੋਸਗ੍ਗਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵੋਸਗ੍ਗਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਮੁਤ੍ਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਮੁਤ੍ਤਿਚਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਛਨ੍ਦਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਛਨ੍ਦਸ੍ਸ ਮੂਲਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਛਨ੍ਦਸ੍ਸ ਪਾਦਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਛਨ੍ਦਸ੍ਸ ਪਧਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਛਨ੍ਦਸ੍ਸ ਇਜ੍ਝਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਛਨ੍ਦਸ੍ਸ ਅਧਿਮੋਕ੍ਖਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਛਨ੍ਦਸ੍ਸ ਪਗ੍ਗਹਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਛਨ੍ਦਸ੍ਸ ਉਪਟ੍ਠਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਛਨ੍ਦਸ੍ਸ ਅਵਿਕ੍ਖੇਪਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਛਨ੍ਦਸ੍ਸ ਦਸ੍ਸਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਵੀਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਚਿਤ੍ਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਵੀਮਂਸਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵੀਮਂਸਾਯ ਮੂਲਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵੀਮਂਸਾਯ ਪਾਦਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵੀਮਂਸਾਯ ਪਧਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵੀਮਂਸਾਯ ਇਜ੍ਝਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵੀਮਂਸਾਯ ਅਧਿਮੋਕ੍ਖਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵੀਮਂਸਾਯ ਪਗ੍ਗਹਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵੀਮਂਸਾਯ ਉਪਟ੍ਠਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵੀਮਂਸਾਯ ਅਵਿਕ੍ਖੇਪਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵੀਮਂਸਾਯ ਦਸ੍ਸਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਦੁਕ੍ਖਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਦੁਕ੍ਖਸ੍ਸ ਪੀਲ਼ਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਦੁਕ੍ਖਸ੍ਸ ਸਙ੍ਖਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਦੁਕ੍ਖਸ੍ਸ ਸਨ੍ਤਾਪਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਦੁਕ੍ਖਸ੍ਸ ਵਿਪਰਿਣਾਮਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਮੁਦਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਮੁਦਯਸ੍ਸ ਆਯੂਹਨਟ੍ਠਂ ਨਿਦਾਨਟ੍ਠਂ ਸਞ੍ਞੋਗਟ੍ਠਂ ਪਲਿਬੋਧਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਨਿਰੋਧਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਨਿਰੋਧਸ੍ਸ ਨਿਸ੍ਸਰਣਟ੍ਠਂ ਵਿਵੇਕਟ੍ਠਂ ਅਸਙ੍ਖਤਟ੍ਠਂ ਅਮਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਮਗ੍ਗਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਮਗ੍ਗਸ੍ਸ ਨਿਯ੍ਯਾਨਟ੍ਠਂ ਹੇਤੁਟ੍ਠਂ ਦਸ੍ਸਨਟ੍ਠਂ ਆਧਿਪਤੇਯ੍ਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਤਥਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਨਤ੍ਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਚ੍ਚਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਟਿਵੇਧਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਭਿਜਾਨਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਰਿਜਾਨਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਧਮ੍ਮਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਧਾਤੁਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਞਾਤਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਚ੍ਛਿਕਿਰਿਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਫਸ੍ਸਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਭਿਸਮਯਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਨੇਕ੍ਖਮ੍ਮਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਬ੍ਯਾਪਾਦਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਆਲੋਕਸਞ੍ਞਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਵਿਕ੍ਖੇਪਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਧਮ੍ਮਵਵਤ੍ਥਾਨਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਞਾਣਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਾਮੋਜ੍ਜਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਠਮਂ ਝਾਨਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਅਰਹਤ੍ਤਮਗ੍ਗਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਰਹਤ੍ਤਫਲਸਮਾਪਤ੍ਤਿਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਸ੍ਸਦ੍ਧਿਯੇ ਅਕਮ੍ਪਿਯਟ੍ਠੇਨ ਸਦ੍ਧਾਬਲਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਅਵਿਜ੍ਜਾਯ ਅਕਮ੍ਪਿਯਟ੍ਠੇਨ ਪਞ੍ਞਾਬਲਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਉਪਟ੍ਠਾਨਟ੍ਠੇਨ ਸਤਿਸਮ੍ਬੋਜ੍ਝਙ੍ਗਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਪਟਿਸਙ੍ਖਾਨਟ੍ਠੇਨ ਉਪੇਕ੍ਖਾਸਮ੍ਬੋਜ੍ਝਙ੍ਗਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ…ਪੇ… ਅਵਿਕ੍ਖੇਪਟ੍ਠੇਨ ਸਮ੍ਮਾਸਮਾਧਿਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਆਧਿਪਤੇਯ੍ਯਟ੍ਠੇਨ ਇਨ੍ਦ੍ਰਿਯਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਕਮ੍ਪਿਯਟ੍ਠੇਨ ਬਲਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਨਿਯ੍ਯਾਨਟ੍ਠਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਹੇਤੁਟ੍ਠੇਨ ਮਗ੍ਗਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਉਪਟ੍ਠਾਨਟ੍ਠੇਨ ਸਤਿਪਟ੍ਠਾਨਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਦਹਨਟ੍ਠੇਨ ਸਮ੍ਮਪ੍ਪਧਾਨਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਇਜ੍ਝਨਟ੍ਠੇਨ ਇਦ੍ਧਿਪਾਦਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਤਥਟ੍ਠੇਨ ਸਚ੍ਚਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਵਿਕ੍ਖੇਪਟ੍ਠੇਨ ਸਮਥਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਨੁਪਸ੍ਸਨਟ੍ਠੇ ਵਿਪਸ੍ਸਨਂ …ਪੇ… ਏਕਰਸਟ੍ਠੇਨ ਸਮਥਵਿਪਸ੍ਸਨਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਨਤਿਵਤ੍ਤਨਟ੍ਠੇਨ ਯੁਗਨਦ੍ਧਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਂਵਰਟ੍ਠੇਨ ਸੀਲਵਿਸੁਦ੍ਧਿਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਵਿਕ੍ਖੇਪਟ੍ਠੇਨ ਚਿਤ੍ਤਵਿਸੁਦ੍ਧਿਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਦਸ੍ਸਨਟ੍ਠੇਨ ਦਿਟ੍ਠਿਵਿਸੁਦ੍ਧਿਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਮੁਤ੍ਤਟ੍ਠੇਨ ਵਿਮੋਕ੍ਖਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਟਿਵੇਧਟ੍ਠੇਨ ਵਿਜ੍ਜਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਰਿਚ੍ਚਾਗਟ੍ਠੇਨ ਵਿਮੁਤ੍ਤਿਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਮੁਚ੍ਛੇਦਟ੍ਠੇਨ ਖਯੇ ਞਾਣਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਟਿਪ੍ਪਸ੍ਸਦ੍ਧਟ੍ਠੇਨ ਅਨੁਪ੍ਪਾਦੇ ਞਾਣਂ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

ਛਨ੍ਦਂ ਮੂਲਟ੍ਠੇਨ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਮਨਸਿਕਾਰਂ ਸਮੁਟ੍ਠਾਨਟ੍ਠੇਨ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਫਸ੍ਸਂ ਸਮੋਧਾਨਟ੍ਠੇਨ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵੇਦਨਂ ਸਮੋਸਰਣਟ੍ਠੇਨ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਮਾਧਿਂ ਪਮੁਖਟ੍ਠੇਨ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਸਤਿਂ ਆਧਿਪਤੇਯ੍ਯਟ੍ਠੇਨ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਪਞ੍ਞਂ ਤਤੁਤ੍ਤਰਟ੍ਠੇਨ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਵਿਮੁਤ੍ਤਿਂ ਸਾਰਟ੍ਠੇਨ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ. ਅਮਤੋਗਧਂ ਨਿਬ੍ਬਾਨਂ ਪਰਿਯੋਸਾਨਟ੍ਠੇਨ ਬੁਜ੍ਝਨ੍ਤੀਤਿ – ਬੋਜ੍ਝਙ੍ਗਾ.

੨੦. ਸਾਵਤ੍ਥਿਨਿਦਾਨਂ. ਤਤ੍ਰ ਖੋ ਆਯਸ੍ਮਾ ਸਾਰਿਪੁਤ੍ਤੋ ਭਿਕ੍ਖੂ ਆਮਨ੍ਤੇਸਿ – ‘‘ਆਵੁਸੋ ਭਿਕ੍ਖਵੋ’’ਤਿ [ਆਵੁਸੋਤਿ (ਸ੍ਯਾ.) ਸਂ. ਨਿ. ੫.੧੮੫ ਪਸ੍ਸਿਤਬ੍ਬਾ]. ‘‘ਆਵੁਸੋ’’ਤਿ ਖੋ ਤੇ ਭਿਕ੍ਖੂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਪਚ੍ਚਸ੍ਸੋਸੁਂ. ਆਯਸ੍ਮਾ ਸਾਰਿਪੁਤ੍ਤੋ ਏਤਦਵੋਚ –

‘‘ਸਤ੍ਤਿਮੇ, ਆਵੁਸੋ, ਬੋਜ੍ਝਙ੍ਗਾ. ਕਤਮੇ ਸਤ੍ਤ? ਸਤਿਸਮ੍ਬੋਜ੍ਝਙ੍ਗੋ, ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ…ਪੇ… ਉਪੇਕ੍ਖਾਸਮ੍ਬੋਜ੍ਝਙ੍ਗੋ – ਇਮੇ ਖੋ, ਆਵੁਸੋ, ਸਤ੍ਤ ਬੋਜ੍ਝਙ੍ਗਾ. ਇਮੇਸਂ ਖ੍ਵਾਹਂ, ਆਵੁਸੋ, ਸਤ੍ਤਨ੍ਨਂ ਬੋਜ੍ਝਙ੍ਗਾਨਂ ਯੇਨ ਯੇਨ ਬੋਜ੍ਝਙ੍ਗੇਨ ਆਕਙ੍ਖਾਮਿ ਪੁਬ੍ਬਣ੍ਹਸਮਯਂ ਵਿਹਰਿਤੁਂ, ਤੇਨ ਤੇਨ ਬੋਜ੍ਝਙ੍ਗੇਨ ਪੁਬ੍ਬਣ੍ਹਸਮਯਂ ਵਿਹਰਾਮਿ. ਯੇਨ ਯੇਨ ਬੋਜ੍ਝਙ੍ਗੇਨ ਆਕਙ੍ਖਾਮਿ ਮਜ੍ਝਨ੍ਹਿਕਸਮਯਂ…ਪੇ… ਸਾਯਨ੍ਹਸਮਯਂ ਵਿਹਰਿਤੁਂ, ਤੇਨ ਤੇਨ ਬੋਜ੍ਝਙ੍ਗੇਨ ਸਾਯਨ੍ਹਸਮਯਂ ਵਿਹਰਾਮਿ. ਸਤਿਸਮ੍ਬੋਜ੍ਝਙ੍ਗੋ ਇਤਿ ਚੇ ਮੇ, ‘ਆਵੁਸੋ, ਹੋਤਿ, ਅਪ੍ਪਮਾਣੋ’ਤਿ ਮੇ ਹੋਤਿ, ‘ਸੁਸਮਾਰਦ੍ਧੋ’ਤਿ ਮੇ ਹੋਤਿ. ਤਿਟ੍ਠਨ੍ਤਞ੍ਚ ਨਂ [ਤਿਟ੍ਠਨ੍ਤਂ ਚਰਂ (ਸ੍ਯਾ.) ਸਂ. ਨਿ. ੫.੧੮੫ ਪਸ੍ਸਿਤਬ੍ਬਾ] ‘ਤਿਟ੍ਠਤੀ’ਤਿ ਪਜਾਨਾਮਿ. ਸਚੇਪਿ ਮੇ ਚਵਤਿ, ‘ਇਦਪ੍ਪਚ੍ਚਯਾ ਮੇ ਚਵਤੀ’ਤਿ ਪਜਾਨਾਮਿ. ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ…ਪੇ… ਉਪੇਕ੍ਖਾਸਮ੍ਬੋਜ੍ਝਙ੍ਗੋ ਇਤਿ ਚੇ ਮੇ, ਆਵੁਸੋ, ਹੋਤਿ, ‘ਅਪ੍ਪਮਾਣੋ’ਤਿ ਮੇ ਹੋਤਿ, ‘ਸੁਸਮਾਰਦ੍ਧੋ’ਤਿ ਮੇ ਹੋਤਿ. ਤਿਟ੍ਠਨ੍ਤਞ੍ਚ ਨਂ ‘ਤਿਟ੍ਠਤੀ’ਤਿ ਪਜਾਨਾਮਿ. ਸਚੇਪਿ ਮੇ ਚਵਤਿ, ‘ਇਦਪ੍ਪਚ੍ਚਯਾ ਮੇ ਚਵਤੀ’ਤਿ ਪਜਾਨਾਮਿ.

‘‘ਸੇਯ੍ਯਥਾਪਿ, ਆਵੁਸੋ, ਰਞ੍ਞੋ ਵਾ ਰਾਜਮਹਾਮਤ੍ਤਸ੍ਸ ਵਾ ਨਾਨਾਰਤ੍ਤਾਨਂ ਦੁਸ੍ਸਾਨਂ ਦੁਸ੍ਸਕਰਣ੍ਡਕੋ ਪੂਰੋ ਅਸ੍ਸ. ਸੋ ਯਞ੍ਞਦੇਵ ਦੁਸ੍ਸਯੁਗਂ ਆਕਙ੍ਖੇਯ੍ਯ ਪੁਬ੍ਬਣ੍ਹਸਮਯਂ ਪਾਰੁਪਿਤੁਂ, ਤਂ ਤਦੇਵ ਦੁਸ੍ਸਯੁਗਂ ਪੁਬ੍ਬਣ੍ਹਸਮਯਂ ਪਾਰੁਪੇਯ੍ਯ. ਯਞ੍ਞਦੇਵ ਦੁਸ੍ਸਯੁਗਂ ਆਕਙ੍ਖੇਯ੍ਯ ਮਜ੍ਝਨ੍ਹਿਕਸਮਯਂ…ਪੇ… ਸਾਯਨ੍ਹਸਮਯਂ ਪਾਰੁਪਿਤੁਂ, ਤਂ ਤਦੇਵ ਦੁਸ੍ਸਯੁਗਂ ਸਾਯਨ੍ਹਸਮਯਂ ਪਾਰੁਪੇਯ੍ਯ. ਏਵਮੇਵ ਖ੍ਵਾਹਂ, ਆਵੁਸੋ, ਇਮੇਸਂ ਸਤ੍ਤਨ੍ਨਂ ਬੋਜ੍ਝਙ੍ਗਾਨਂ ਯੇਨ ਯੇਨ ਬੋਜ੍ਝਙ੍ਗੇਨ ਆਕਙ੍ਖਾਮਿ ਪੁਬ੍ਬਣ੍ਹਸਮਯਂ ਵਿਹਰਿਤੁਂ, ਤੇਨ ਤੇਨ ਬੋਜ੍ਝਙ੍ਗੇਨ ਪੁਬ੍ਬਣ੍ਹਸਮਯਂ ਵਿਹਰਾਮਿ. ਯੇਨ ਯੇਨ ਬੋਜ੍ਝਙ੍ਗੇਨ ਆਕਙ੍ਖਾਮਿ ਮਜ੍ਝਨ੍ਹਿਕਸਮਯਂ…ਪੇ… ਸਾਯਨ੍ਹਸਮਯਂ ਵਿਹਰਿਤੁਂ, ਤੇਨ ਤੇਨ ਬੋਜ੍ਝਙ੍ਗੇਨ ਸਾਯਨ੍ਹਸਮਯਂ ਵਿਹਰਾਮਿ. ਸਤਿਸਮ੍ਬੋਜ੍ਝਙ੍ਗੋ ਇਤਿ ਚੇ ਮੇ, ਆਵੁਸੋ, ਹੋਤਿ, ‘ਅਪ੍ਪਮਾਣੋ’ਤਿ ਮੇ ਹੋਤਿ, ‘ਸੁਸਮਾਰਦ੍ਧੋ’ਤਿ ਮੇ ਹੋਤਿ. ਤਿਟ੍ਠਨ੍ਤਞ੍ਚ ਨਂ ‘ਤਿਟ੍ਠਤੀ’ਤਿ ਪਜਾਨਾਮਿ. ਸਚੇਪਿ ਮੇ ਚਵਤਿ, ‘ਇਦਪ੍ਪਚ੍ਚਯਾ ਮੇ ਚਵਤੀ’ਤਿ ਪਜਾਨਾਮਿ…ਪੇ… ਉਪੇਕ੍ਖਾਸਮ੍ਬੋਜ੍ਝਙ੍ਗੋ ਇਤਿ ਚੇ ਮੇ, ਆਵੁਸੋ, ਹੋਤਿ, ‘ਅਪ੍ਪਮਾਣੋ’ਤਿ ਮੇ ਹੋਤਿ, ‘ਸੁਸਮਾਰਦ੍ਧੋ’ਤਿ ਮੇ ਹੋਤਿ. ਤਿਟ੍ਠਨ੍ਤਞ੍ਚ ਨਂ ‘ਤਿਟ੍ਠਤੀ’ਤਿ ਪਜਾਨਾਮਿ. ਸਚੇਪਿ ਮੇ ਚਵਤਿ, ‘ਇਦਪ੍ਪਚ੍ਚਯਾ ਮੇ ਚਵਤੀ’ਤਿ ਪਜਾਨਾਮਿ’’.

ਸੁਤ੍ਤਨ੍ਤਨਿਦ੍ਦੇਸੋ

੨੧. ਕਥਂ ਸਤਿਸਮ੍ਬੋਜ੍ਝਙ੍ਗੋ ਇਤਿ ਚੇ ਮੇ ਹੋਤੀਤਿ ਬੋਜ੍ਝਙ੍ਗੋ? ਯਾਵਤਾ ਨਿਰੋਧੂਪਟ੍ਠਾਤਿ ਤਾਵਤਾ ਸਤਿਸਮ੍ਬੋਜ੍ਝਙ੍ਗੋ. ਇਤਿ ਚੇ ਮੇ ਹੋਤੀਤਿ ਬੋਜ੍ਝਙ੍ਗੋ. ਸੇਯ੍ਯਥਾਪਿ ਤੇਲਪ੍ਪਦੀਪਸ੍ਸ ਝਾਯਤੋ ਯਾਵਤਾ ਅਚ੍ਚਿ ਤਾਵਤਾ ਵਣ੍ਣੋ, ਯਾਵਤਾ ਵਣ੍ਣੋ ਤਾਵਤਾ ਅਚ੍ਚਿ. ਏਵਮੇਵ ਯਾਵਤਾ ਨਿਰੋਧੂਪਟ੍ਠਾਤਿ ਤਾਵਤਾ ਸਤਿਸਮ੍ਬੋਜ੍ਝਙ੍ਗੋ. ਇਤਿ ਚੇ ਮੇ ਹੋਤੀਤਿ ਬੋਜ੍ਝਙ੍ਗੋ.

ਕਥਂ ਅਪ੍ਪਮਾਣੋ ਇਤਿ ਚੇ ਮੇ ਹੋਤੀਤਿ ਬੋਜ੍ਝਙ੍ਗੋ? ਪਮਾਣਬਦ੍ਧਾ [ਪਮਾਣਵਨ੍ਤਾ (ਸ੍ਯਾ.), ਅਟ੍ਠਕਥਾ ਓਲੋਕੇਤਬ੍ਬਾ] ਕਿਲੇਸਾ, ਸਬ੍ਬੇ ਚ ਪਰਿਯੁਟ੍ਠਾਨਾ, ਯੇ ਚ ਸਙ੍ਖਾਰਾ ਪੋਨੋਭਵਿਕਾ ਅਪ੍ਪਮਾਣੋ ਨਿਰੋਧੋ ਅਚਲਟ੍ਠੇਨ ਅਸਙ੍ਖਤਟ੍ਠੇਨ. ਯਾਵਤਾ ਨਿਰੋਧੂਪਟ੍ਠਾਤਿ ਤਾਵਤਾ ਅਪ੍ਪਮਾਣੋ. ਇਤਿ ਚੇ ਮੇ ਹੋਤੀਤਿ ਬੋਜ੍ਝਙ੍ਗੋ.

ਕਥਂ ਸੁਸਮਾਰਦ੍ਧੋ ਇਤਿ ਚੇ ਮੇ ਹੋਤੀਤਿ – ਬੋਜ੍ਝਙ੍ਗੋ? ਵਿਸਮਾ ਕਿਲੇਸਾ, ਸਬ੍ਬੇ ਚ ਪਰਿਯੁਟ੍ਠਾਨਾ, ਯੇ ਚ ਸਙ੍ਖਾਰਾ ਪੋਨੋਭਵਿਕਾ, ਸਮਧਮ੍ਮੋ ਨਿਰੋਧੋ ਸਨ੍ਤਟ੍ਠੇਨ ਪਣੀਤਟ੍ਠੇਨ. ਯਾਵਤਾ ਨਿਰੋਧੂਪਟ੍ਠਾਤਿ ਤਾਵਤਾ ਸੁਸਮਾਰਦ੍ਧੋ ਇਤਿ ਚੇ ਮੇ ਹੋਤੀਤਿ ਬੋਜ੍ਝਙ੍ਗੋ.

ਕਥਂ ‘‘ਤਿਟ੍ਠਨ੍ਤਞ੍ਚ ਨਂ ਤਿਟ੍ਠਤੀ’’ਤਿ ਪਜਾਨਾਮਿ; ਸਚੇਪਿ ਚਵਤਿ ‘‘ਇਦਪ੍ਪਚ੍ਚਯਾ ਚਵਤੀ’’ਤਿ ਪਜਾਨਾਮਿ? ਕਤਿਹਾਕਾਰੇਹਿ ਸਤਿਸਮ੍ਬੋਜ੍ਝਙ੍ਗੋ ਤਿਟ੍ਠਤਿ? ਕਤਿਹਾਕਾਰੇਹਿ ਸਤਿਸਮ੍ਬੋਜ੍ਝਙ੍ਗੋ ਚਵਤਿ? ਅਟ੍ਠਹਾਕਾਰੇਹਿ ਸਤਿਸਮ੍ਬੋਜ੍ਝਙ੍ਗੋ ਤਿਟ੍ਠਤਿ. ਅਟ੍ਠਹਾਕਾਰੇਹਿ ਸਤਿਸਮ੍ਬੋਜ੍ਝਙ੍ਗੋ ਚਵਤਿ.

ਕਤਮੇਹਿ ਅਟ੍ਠਹਾਕਾਰੇਹਿ ਸਤਿਸਮ੍ਬੋਜ੍ਝਙ੍ਗੋ ਤਿਟ੍ਠਤਿ? ਅਨੁਪ੍ਪਾਦਂ ਆਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਤਿਟ੍ਠਤਿ, ਉਪ੍ਪਾਦਂ ਅਨਾਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਤਿਟ੍ਠਤਿ, ਅਪ੍ਪਵਤ੍ਤਂ ਆਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਤਿਟ੍ਠਤਿ, ਪਵਤ੍ਤਂ ਅਨਾਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਤਿਟ੍ਠਤਿ, ਅਨਿਮਿਤ੍ਤਂ ਆਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਤਿਟ੍ਠਤਿ, ਨਿਮਿਤ੍ਤਂ ਅਨਾਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਤਿਟ੍ਠਤਿ, ਨਿਰੋਧਂ ਆਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਤਿਟ੍ਠਤਿ, ਸਙ੍ਖਾਰੇ ਅਨਾਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਤਿਟ੍ਠਤਿ – ਇਮੇਹਿ ਅਟ੍ਠਹਾਕਾਰੇਹਿ ਸਤਿਸਮ੍ਬੋਜ੍ਝਙ੍ਗੋ ਤਿਟ੍ਠਤਿ.

ਕਤਮੇਹਿ ਅਟ੍ਠਹਾਕਾਰੇਹਿ ਸਤਿਸਮ੍ਬੋਜ੍ਝਙ੍ਗੋ ਚਵਤਿ? ਉਪ੍ਪਾਦਂ ਆਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਚਵਤਿ, ਅਨੁਪ੍ਪਾਦਂ ਅਨਾਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਚਵਤਿ, ਪਵਤ੍ਤਂ ਆਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਚਵਤਿ, ਅਪ੍ਪਵਤ੍ਤਂ ਅਨਾਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਚਵਤਿ, ਨਿਮਿਤ੍ਤਂ ਆਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਚਵਤਿ, ਅਨਿਮਿਤ੍ਤਂ ਅਨਾਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਚਵਤਿ, ਸਙ੍ਖਾਰੇ ਆਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਚਵਤਿ, ਨਿਰੋਧਂ ਅਨਾਵਜ੍ਜਿਤਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਚਵਤਿ – ਇਮੇਹਿ ਅਟ੍ਠਹਾਕਾਰੇਹਿ ਸਤਿਸਮ੍ਬੋਜ੍ਝਙ੍ਗੋ ਚਵਤਿ. ਏਵਂ ‘‘ਤਿਟ੍ਠਨ੍ਤਞ੍ਚ ਨਂ ਤਿਟ੍ਠਤੀ’’ਤਿ ਪਜਾਨਾਮਿ. ਸਚੇਪਿ ਚਵਤਿ, ‘‘ਇਦਪ੍ਪਚ੍ਚਯਾ ਮੇ ਚਵਤੀ’’ਤਿ ਪਜਾਨਾਮਿ…ਪੇ….