੪. ਮੇਤ੍ਤਾਕਥਾ

੨੨. ਸਾਵਤ੍ਥਿਨਿਦਾਨਂ. ‘‘ਮੇਤ੍ਤਾਯ, ਭਿਕ੍ਖਵੇ, ਚੇਤੋਵਿਮੁਤ੍ਤਿਯਾ ਆਸੇਵਿਤਾਯ ਭਾਵਿਤਾਯ ਬਹੁਲੀਕਤਾਯ ਯਾਨੀਕਤਾਯ ਵਤ੍ਥੁਕਤਾਯ ਅਨੁਟ੍ਠਿਤਾਯ ਪਰਿਚਿਤਾਯ ਸੁਸਮਾਰਦ੍ਧਾਯ ਏਕਾਦਸਾਨਿਸਂਸਾ ਪਾਟਿਕਙ੍ਖਾ. ਕਤਮੇ ਏਕਾਦਸ? ਸੁਖਂ ਸੁਪਤਿ, ਸੁਖਂ ਪਟਿਬੁਜ੍ਝਤਿ, ਨ ਪਾਪਕਂ ਸੁਪਿਨਂ ਪਸ੍ਸਤਿ, ਮਨੁਸ੍ਸਾਨਂ ਪਿਯੋ ਹੋਤਿ, ਅਮਨੁਸ੍ਸਾਨਂ ਪਿਯੋ ਹੋਤਿ, ਦੇਵਤਾ ਰਕ੍ਖਨ੍ਤਿ, ਨਾਸ੍ਸ ਅਗ੍ਗਿ ਵਾ ਵਿਸਂ ਵਾ ਸਤ੍ਥਂ ਵਾ ਕਮਤਿ, ਤੁਵਟਂ ਚਿਤ੍ਤਂ ਸਮਾਧਿਯਤਿ, ਮੁਖਵਣ੍ਣੋ ਵਿਪ੍ਪਸੀਦਤਿ, ਅਸਮ੍ਮੂਲ਼੍ਹੋ ਕਾਲਙ੍ਕਰੋਤਿ, ਉਤ੍ਤਰਿ [ਉਤ੍ਤਰਿਂ (ਸ੍ਯਾ. ਪੀ.) ਅ. ਨਿ. ੧੧.੧੫ ਪਸ੍ਸਿਤਬ੍ਬਾ] ਅਪ੍ਪਟਿਵਿਜ੍ਝਨ੍ਤੋ ਬ੍ਰਹ੍ਮਲੋਕੂਪਗੋ ਹੋਤਿ. ਮੇਤ੍ਤਾਯ, ਭਿਕ੍ਖਵੇ, ਚੇਤੋਵਿਮੁਤ੍ਤਿਯਾ ਆਸੇਵਿਤਾਯ ਭਾਵਿਤਾਯ ਬਹੁਲੀਕਤਾਯ ਯਾਨੀਕਤਾਯ ਵਤ੍ਥੁਕਤਾਯ ਅਨੁਟ੍ਠਿਤਾਯ ਪਰਿਚਿਤਾਯ ਸੁਸਮਾਰਦ੍ਧਾਯ – ਇਮੇ ਏਕਾਦਸਾਨਿਸਂਸਾ ਪਾਟਿਕਙ੍ਖਾ’’.

ਅਤ੍ਥਿ ਅਨੋਧਿਸੋ ਫਰਣਾ ਮੇਤ੍ਤਾਚੇਤੋਵਿਮੁਤ੍ਤਿ, ਅਤ੍ਥਿ ਓਧਿਸੋ ਫਰਣਾ ਮੇਤ੍ਤਾਚੇਤੋਵਿਮੁਤ੍ਤਿ, ਅਤ੍ਥਿ ਦਿਸਾਫਰਣਾ ਮੇਤ੍ਤਾਚੇਤੋਵਿਮੁਤ੍ਤਿ. ਕਤਿਹਾਕਾਰੇਹਿ ਅਨੋਧਿਸੋ ਫਰਣਾ ਮੇਤ੍ਤਾਚੇਤੋਵਿਮੁਤ੍ਤਿ, ਕਤਿਹਾਕਾਰੇਹਿ ਓਧਿਸੋ ਫਰਣਾ ਮੇਤ੍ਤਾਚੇਤੋਵਿਮੁਤ੍ਤਿ, ਕਤਿਹਾਕਾਰੇਹਿ ਦਿਸਾਫਰਣਾ ਮੇਤ੍ਤਾਚੇਤੋਵਿਮੁਤ੍ਤਿ? ਪਞ੍ਚਹਾਕਾਰੇਹਿ ਅਨੋਧਿਸੋ ਫਰਣਾ ਮੇਤ੍ਤਾਚੇਤੋਵਿਮੁਤ੍ਤਿ, ਸਤ੍ਤਹਾਕਾਰੇਹਿ ਓਧਿਸੋ ਫਰਣਾ ਮੇਤ੍ਤਾਚੇਤੋਵਿਮੁਤ੍ਤਿ, ਦਸਹਾਕਾਰੇਹਿ ਦਿਸਾਫਰਣਾ ਮੇਤ੍ਤਾਚੇਤੋਵਿਮੁਤ੍ਤਿ.

ਕਤਮੇਹਿ ਪਞ੍ਚਹਾਕਾਰੇਹਿ ਅਨੋਧਿਸੋ ਫਰਣਾ ਮੇਤ੍ਤਾਚੇਤੋਵਿਮੁਤ੍ਤਿ? ਸਬ੍ਬੇ ਸਤ੍ਤਾ ਅਵੇਰਾ ਅਬ੍ਯਾਪਜ੍ਜਾ [ਅਬ੍ਯਾਪਜ੍ਝਾ (ਸ੍ਯਾ.)] ਅਨੀਘਾ ਸੁਖੀ ਅਤ੍ਤਾਨਂ ਪਰਿਹਰਨ੍ਤੁ. ਸਬ੍ਬੇ ਪਾਣਾ…ਪੇ… ਸਬ੍ਬੇ ਭੂਤਾ…ਪੇ… ਸਬ੍ਬੇ ਪੁਗ੍ਗਲਾ…ਪੇ… ਸਬ੍ਬੇ ਅਤ੍ਤਭਾਵਪਰਿਯਾਪਨ੍ਨਾ ਅਵੇਰਾ ਅਬ੍ਯਾਪਜ੍ਜਾ ਅਨੀਘਾ ਸੁਖੀ ਅਤ੍ਤਾਨਂ ਪਰਿਹਰਨ੍ਤੂਤਿ. ਇਮੇਹਿ ਪਞ੍ਚਹਾਕਾਰੇਹਿ ਅਨੋਧਿਸੋ ਫਰਣਾ ਮੇਤ੍ਤਾਚੇਤੋਵਿਮੁਤ੍ਤਿ.

ਕਤਮੇਹਿ ਸਤ੍ਤਹਾਕਾਰੇਹਿ ਓਧਿਸੋ ਫਰਣਾ ਮੇਤ੍ਤਾਚੇਤੋਵਿਮੁਤ੍ਤਿ? ਸਬ੍ਬਾ ਇਤ੍ਥਿਯੋ ਅਵੇਰਾ ਅਬ੍ਯਾਪਜ੍ਜਾ ਅਨੀਘਾ ਸੁਖੀ ਅਤ੍ਤਾਨਂ ਪਰਿਹਰਨ੍ਤੁ. ਸਬ੍ਬੇ ਪੁਰਿਸਾ…ਪੇ… ਸਬ੍ਬੇ ਅਰਿਯਾ…ਪੇ… ਸਬ੍ਬੇ ਅਨਰਿਯਾ…ਪੇ… ਸਬ੍ਬੇ ਦੇਵਾ…ਪੇ… ਸਬ੍ਬੇ ਮਨੁਸ੍ਸਾ…ਪੇ… ਸਬ੍ਬੇ ਵਿਨਿਪਾਤਿਕਾ ਅਵੇਰਾ ਅਬ੍ਯਾਪਜ੍ਜਾ ਅਨੀਘਾ ਸੁਖੀ ਅਤ੍ਤਾਨਂ ਪਰਿਹਰਨ੍ਤੂਤਿ. ਇਮੇਹਿ ਸਤ੍ਤਹਾਕਾਰੇਹਿ ਓਧਿਸੋ ਫਰਣਾ ਮੇਤ੍ਤਾਚੇਤੋਵਿਮੁਤ੍ਤਿ.

ਕਤਮੇਹਿ ਦਸਹਾਕਾਰੇਹਿ ਦਿਸਾਫਰਣਾ ਮੇਤ੍ਤਾਚੇਤੋਵਿਮੁਤ੍ਤਿ? ਸਬ੍ਬੇ ਪੁਰਤ੍ਥਿਮਾਯ ਦਿਸਾਯ ਸਤ੍ਤਾ ਅਵੇਰਾ ਅਬ੍ਯਾਪਜ੍ਜਾ ਅਨੀਘਾ ਸੁਖੀ ਅਤ੍ਤਾਨਂ ਪਰਿਹਰਨ੍ਤੁ. ਸਬ੍ਬੇ ਪਚ੍ਛਿਮਾਯ ਦਿਸਾਯ ਸਤ੍ਤਾ…ਪੇ… ਸਬ੍ਬੇ ਉਤ੍ਤਰਾਯ ਦਿਸਾਯ ਸਤ੍ਤਾ…ਪੇ… ਸਬ੍ਬੇ ਦਕ੍ਖਿਣਾਯ ਦਿਸਾਯ ਸਤ੍ਤਾ…ਪੇ… ਸਬ੍ਬੇ ਪੁਰਤ੍ਥਿਮਾਯ ਅਨੁਦਿਸਾਯ ਸਤ੍ਤਾ…ਪੇ… ਸਬ੍ਬੇ ਪਚ੍ਛਿਮਾਯ ਅਨੁਦਿਸਾਯ ਸਤ੍ਤਾ…ਪੇ… ਸਬ੍ਬੇ ਉਤ੍ਤਰਾਯ ਅਨੁਦਿਸਾਯ ਸਤ੍ਤਾ…ਪੇ… ਸਬ੍ਬੇ ਦਕ੍ਖਿਣਾਯ ਅਨੁਦਿਸਾਯ ਸਤ੍ਤਾ…ਪੇ… ਸਬ੍ਬੇ ਹੇਟ੍ਠਿਮਾਯ ਦਿਸਾਯ ਸਤ੍ਤਾ…ਪੇ… ਸਬ੍ਬੇ ਉਪਰਿਮਾਯ ਦਿਸਾਯ ਸਤ੍ਤਾ ਅਵੇਰਾ ਅਬ੍ਯਾਪਜ੍ਜਾ ਅਨੀਘਾ ਸੁਖੀ ਅਤ੍ਤਾਨਂ ਪਰਿਹਰਨ੍ਤੁ. ਸਬ੍ਬੇ ਪੁਰਤ੍ਥਿਮਾਯ ਦਿਸਾਯ ਪਾਣਾ…ਪੇ… ਭੂਤਾ… ਪੁਗ੍ਗਲਾ… ਅਤ੍ਤਭਾਵਪਰਿਯਾਪਨ੍ਨਾ… ਸਬ੍ਬਾ ਇਤ੍ਥਿਯੋ… ਸਬ੍ਬੇ ਪੁਰਿਸਾ… ਸਬ੍ਬੇ ਅਰਿਯਾ… ਸਬ੍ਬੇ ਅਨਰਿਯਾ… ਸਬ੍ਬੇ ਦੇਵਾ… ਸਬ੍ਬੇ ਮਨੁਸ੍ਸਾ… ਸਬ੍ਬੇ ਵਿਨਿਪਾਤਿਕਾ ਅਵੇਰਾ ਅਬ੍ਯਾਪਜ੍ਜਾ ਅਨੀਘਾ ਸੁਖੀ ਅਤ੍ਤਾਨਂ ਪਰਿਹਰਨ੍ਤੁ. ਸਬ੍ਬੇ ਪਚ੍ਛਿਮਾਯ ਦਿਸਾਯ ਵਿਨਿਪਾਤਿਕਾ…ਪੇ… ਸਬ੍ਬੇ ਉਤ੍ਤਰਾਯ ਦਿਸਾਯ ਵਿਨਿਪਾਤਿਕਾ… ਸਬ੍ਬੇ ਦਕ੍ਖਿਣਾਯ ਦਿਸਾਯ ਵਿਨਿਪਾਤਿਕਾ… ਸਬ੍ਬੇ ਪੁਰਤ੍ਥਿਮਾਯ ਅਨੁਦਿਸਾਯ ਵਿਨਿਪਾਤਿਕਾ… ਸਬ੍ਬੇ ਪਚ੍ਛਿਮਾਯ ਅਨੁਦਿਸਾਯ ਵਿਨਿਪਾਤਿਕਾ… ਸਬ੍ਬੇ ਉਤ੍ਤਰਾਯ ਅਨੁਦਿਸਾਯ ਵਿਨਿਪਾਤਿਕਾ… ਸਬ੍ਬੇ ਦਕ੍ਖਿਣਾਯ ਅਨੁਦਿਸਾਯ ਵਿਨਿਪਾਤਿਕਾ… ਸਬ੍ਬੇ ਹੇਟ੍ਠਿਮਾਯ ਦਿਸਾਯ ਵਿਨਿਪਾਤਿਕਾ… ਸਬ੍ਬੇ ਉਪਰਿਮਾਯ ਦਿਸਾਯ ਵਿਨਿਪਾਤਿਕਾ ਅਵੇਰਾ ਅਬ੍ਯਾਪਜ੍ਜਾ ਅਨੀਘਾ ਸੁਖੀ ਅਤ੍ਤਾਨਂ ਪਰਿਹਰਨ੍ਤੂਤਿ. ਇਮੇਹਿ ਦਸਹਾਕਾਰੇਹਿ ਦਿਸਾਫਰਣਾ ਮੇਤ੍ਤਾਚੇਤੋਵਿਮੁਤ੍ਤਿ.

੧. ਇਨ੍ਦ੍ਰਿਯਵਾਰੋ

੨੩. ਸਬ੍ਬੇਸਂ ਸਤ੍ਤਾਨਂ ਪੀਲ਼ਨਂ ਵਜ੍ਜੇਤ੍ਵਾ ਅਪੀਲ਼ਨਾਯ, ਉਪਘਾਤਂ ਵਜ੍ਜੇਤ੍ਵਾ ਅਨੁਪਘਾਤੇਨ, ਸਨ੍ਤਾਪਂ ਵਜ੍ਜੇਤ੍ਵਾ ਅਸਨ੍ਤਾਪੇਨ, ਪਰਿਯਾਦਾਨਂ ਵਜ੍ਜੇਤ੍ਵਾ ਅਪਰਿਯਾਦਾਨੇਨ, ਵਿਹੇਸਂ ਵਜ੍ਜੇਤ੍ਵਾ ਅਵਿਹੇਸਾਯ, ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ ਮਾ ਵੇਰਿਨੋ, ਸੁਖਿਨੋ ਹੋਨ੍ਤੁ ਮਾ ਦੁਕ੍ਖਿਨੋ, ਸੁਖਿਤਤ੍ਤਾ ਹੋਨ੍ਤੁ ਮਾ ਦੁਕ੍ਖਿਤਤ੍ਤਾਤਿ – ਇਮੇਹਿ ਅਟ੍ਠਹਾਕਾਰੇਹਿ ਸਬ੍ਬੇ ਸਤ੍ਤੇ ਮੇਤ੍ਤਾਯਤੀਤਿ – ਮੇਤ੍ਤਾ. ਤਂ ਧਮ੍ਮਂ ਚੇਤਯਤੀਤਿ – ਚੇਤੋ. ਸਬ੍ਬਬ੍ਯਾਪਾਦਪਰਿਯੁਟ੍ਠਾਨੇਹਿ ਵਿਮੁਚ੍ਚਤੀਤਿ – ਵਿਮੁਤ੍ਤਿ. ਮੇਤ੍ਤਾ ਚ ਚੇਤੋ ਚ ਵਿਮੁਤ੍ਤਿ ਚਾਤਿ – ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਦ੍ਧਾਯ ਅਧਿਮੁਚ੍ਚਤਿ. ਸਦ੍ਧਿਨ੍ਦ੍ਰਿਯਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਵੀਰਿਯਂ ਪਗ੍ਗਣ੍ਹਾਤਿ. ਵੀਰਿਯਿਨ੍ਦ੍ਰਿਯਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਤਿਂ ਉਪਟ੍ਠਾਪੇਤਿ. ਸਤਿਨ੍ਦ੍ਰਿਯਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਚਿਤ੍ਤਂ ਸਮਾਦਹਤਿ. ਸਮਾਧਿਨ੍ਦ੍ਰਿਯਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਪਞ੍ਞਾਯ ਪਜਾਨਾਤਿ. ਪਞ੍ਞਿਨ੍ਦ੍ਰਿਯਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਆਸੇਵਨਾ ਹੋਨ੍ਤਿ. ਇਮੇਹਿ ਪਞ੍ਚਹਿ ਇਨ੍ਦ੍ਰਿਯੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਆਸੇਵੀਯਤਿ. ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਭਾਵਨਾ ਹੋਨ੍ਤਿ. ਇਮੇਹਿ ਪਞ੍ਚਹਿ ਇਨ੍ਦ੍ਰਿਯੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਭਾਵੀਯਤਿ. ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਬਹੁਲੀਕਤਾ ਹੋਨ੍ਤਿ. ਇਮੇਹਿ ਪਞ੍ਚਹਿ ਇਨ੍ਦ੍ਰਿਯੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਬਹੁਲੀਕਰੀਯਤਿ. ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਅਲਙ੍ਕਾਰਾ ਹੋਨ੍ਤਿ. ਇਮੇਹਿ ਪਞ੍ਚਹਿ ਇਨ੍ਦ੍ਰਿਯੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਸ੍ਵਾਲਙ੍ਕਤਾ ਹੋਤਿ. ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਪਰਿਕ੍ਖਾਰਾ ਹੋਨ੍ਤਿ. ਇਮੇਹਿ ਪਞ੍ਚਹਿ ਇਨ੍ਦ੍ਰਿਯੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਸੁਪਰਿਕ੍ਖਤਾ ਹੋਤਿ. ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਪਰਿਵਾਰਾ ਹੋਨ੍ਤਿ. ਇਮੇਹਿ ਪਞ੍ਚਹਿ ਇਨ੍ਦ੍ਰਿਯੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਸੁਪਰਿਵੁਤਾ ਹੋਤਿ. ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਆਸੇਵਨਾ ਹੋਨ੍ਤਿ, ਭਾਵਨਾ ਹੋਨ੍ਤਿ, ਬਹੁਲੀਕਤਾ ਹੋਨ੍ਤਿ, ਅਲਙ੍ਕਾਰਾ ਹੋਨ੍ਤਿ, ਪਰਿਕ੍ਖਾਰਾ ਹੋਨ੍ਤਿ, ਪਰਿਵਾਰਾ ਹੋਨ੍ਤਿ, ਪਾਰਿਪੂਰੀ ਹੋਨ੍ਤਿ, ਸਹਗਤਾ ਹੋਨ੍ਤਿ, ਸਹਜਾਤਾ ਹੋਨ੍ਤਿ, ਸਂਸਟ੍ਠਾ ਹੋਨ੍ਤਿ, ਸਮ੍ਪਯੁਤ੍ਤਾ ਹੋਨ੍ਤਿ, ਪਕ੍ਖਨ੍ਦਨਾ ਹੋਨ੍ਤਿ, ਪਸੀਦਨਾ [ਸਂਸੀਦਨਾ (ਕ. ਸੀ. ਅਟ੍ਠ.)] ਹੋਨ੍ਤਿ, ਸਨ੍ਤਿਟ੍ਠਨਾ ਹੋਨ੍ਤਿ, ਵਿਮੁਚ੍ਚਨਾ ਹੋਨ੍ਤਿ, ‘‘ਏਤਂ ਸਨ੍ਤ’’ਨ੍ਤਿ ਫਸ੍ਸਨਾ ਹੋਨ੍ਤਿ, ਯਾਨੀਕਤਾ ਹੋਨ੍ਤਿ, ਵਤ੍ਥੁਕਤਾ ਹੋਨ੍ਤਿ, ਅਨੁਟ੍ਠਿਤਾ ਹੋਨ੍ਤਿ, ਪਰਿਚਿਤਾ ਹੋਨ੍ਤਿ, ਸੁਸਮਾਰਦ੍ਧਾ ਹੋਨ੍ਤਿ, ਸੁਭਾਵਿਤਾ ਹੋਨ੍ਤਿ, ਸ੍ਵਾਧਿਟ੍ਠਿਤਾ ਹੋਨ੍ਤਿ, ਸੁਸਮੁਗ੍ਗਤਾ ਹੋਨ੍ਤਿ, ਸੁਵਿਮੁਤ੍ਤਾ ਹੋਨ੍ਤਿ, ਨਿਬ੍ਬਤ੍ਤੇਨ੍ਤਿ ਜੋਤੇਨ੍ਤਿ ਪਤਾਪੇਨ੍ਤਿ.

੨. ਬਲਵਾਰੋ

੨੪. ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਅਸ੍ਸਦ੍ਧਿਯੇ ਨ ਕਮ੍ਪਤਿ. ਸਦ੍ਧਾਬਲਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਕੋਸਜ੍ਜੇ ਨ ਕਮ੍ਪਤਿ. ਵੀਰਿਯਬਲਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਪਮਾਦੇ ਨ ਕਮ੍ਪਤਿ. ਸਤਿਬਲਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਉਦ੍ਧਚ੍ਚੇ ਨ ਕਮ੍ਪਤਿ. ਸਮਾਧਿਬਲਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਅਵਿਜ੍ਜਾਯ ਨ ਕਮ੍ਪਤਿ. ਪਞ੍ਞਾਬਲਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਇਮਾਨਿ ਪਞ੍ਚ ਬਲਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਆਸੇਵਨਾ ਹੋਨ੍ਤਿ. ਇਮੇਹਿ ਪਞ੍ਚਹਿ ਬਲੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਆਸੇਵੀਯਤਿ. ਇਮਾਨਿ ਪਞ੍ਚ ਬਲਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਭਾਵਨਾ ਹੋਨ੍ਤਿ. ਇਮੇਹਿ ਪਞ੍ਚਹਿ ਬਲੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਭਾਵੀਯਤਿ. ਇਮਾਨਿ ਪਞ੍ਚ ਬਲਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਬਹੁਲੀਕਤਾ ਹੋਨ੍ਤਿ. ਇਮੇਹਿ ਪਞ੍ਚਹਿ ਬਲੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਬਹੁਲੀਕਰੀਯਤਿ. ਇਮਾਨਿ ਪਞ੍ਚ ਬਲਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਅਲਙ੍ਕਾਰਾ ਹੋਨ੍ਤਿ. ਇਮੇਹਿ ਪਞ੍ਚਹਿ ਬਲੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਸ੍ਵਾਲਙ੍ਕਤਾ ਹੋਤਿ. ਇਮਾਨਿ ਪਞ੍ਚ ਬਲਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਪਰਿਕ੍ਖਾਰਾ ਹੋਨ੍ਤਿ. ਇਮੇਹਿ ਪਞ੍ਚਹਿ ਬਲੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਸੁਪਰਿਕ੍ਖਤਾ ਹੋਤਿ. ਇਮਾਨਿ ਪਞ੍ਚ ਬਲਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਪਰਿਵਾਰਾ ਹੋਨ੍ਤਿ. ਇਮੇਹਿ ਪਞ੍ਚਹਿ ਬਲੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਸੁਪਰਿਵੁਤਾ ਹੋਤਿ. ਇਮਾਨਿ ਪਞ੍ਚ ਬਲਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਆਸੇਵਨਾ ਹੋਨ੍ਤਿ, ਭਾਵਨਾ ਹੋਨ੍ਤਿ, ਬਹੁਲੀਕਤਾ ਹੋਨ੍ਤਿ, ਅਲਙ੍ਕਾਰਾ ਹੋਨ੍ਤਿ, ਪਰਿਕ੍ਖਾਰਾ ਹੋਨ੍ਤਿ, ਪਰਿਵਾਰਾ ਹੋਨ੍ਤਿ, ਪਾਰਿਪੂਰੀ ਹੋਨ੍ਤਿ, ਸਹਗਤਾ ਹੋਨ੍ਤਿ, ਸਹਜਾਤਾ ਹੋਨ੍ਤਿ, ਸਂਸਟ੍ਠਾ ਹੋਨ੍ਤਿ, ਸਮ੍ਪਯੁਤ੍ਤਾ ਹੋਨ੍ਤਿ, ਪਕ੍ਖਨ੍ਦਨਾ ਹੋਨ੍ਤਿ, ਪਸੀਦਨਾ ਹੋਨ੍ਤਿ, ਸਨ੍ਤਿਟ੍ਠਨਾ ਹੋਨ੍ਤਿ, ਵਿਮੁਚ੍ਚਨਾ ਹੋਨ੍ਤਿ, ‘‘ਏਤਂ ਸਨ੍ਤ’’ਨ੍ਤਿ ਫਸ੍ਸਨਾ ਹੋਨ੍ਤਿ, ਯਾਨੀਕਤਾ ਹੋਨ੍ਤਿ, ਵਤ੍ਥੁਕਤਾ ਹੋਨ੍ਤਿ, ਅਨੁਟ੍ਠਿਤਾ ਹੋਨ੍ਤਿ, ਪਰਿਚਿਤਾ ਹੋਨ੍ਤਿ, ਸੁਸਮਾਰਦ੍ਧਾ ਹੋਨ੍ਤਿ, ਸੁਭਾਵਿਤਾ ਹੋਨ੍ਤਿ, ਸ੍ਵਾਧਿਟ੍ਠਿਤਾ ਹੋਨ੍ਤਿ, ਸੁਸਮੁਗ੍ਗਤਾ ਹੋਨ੍ਤਿ, ਸੁਵਿਮੁਤ੍ਤਾ ਹੋਨ੍ਤਿ ਨਿਬ੍ਬਤ੍ਤੇਨ੍ਤਿ ਜੋਤੇਨ੍ਤਿ ਪਤਾਪੇਨ੍ਤਿ.

੩. ਬੋਜ੍ਝਙ੍ਗਵਾਰੋ

੨੫. ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਤਿਂ ਉਪਟ੍ਠਾਪੇਤਿ. ਸਤਿਸਮ੍ਬੋਜ੍ਝਙ੍ਗਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਪਞ੍ਞਾਯ ਪਵਿਚਿਨਾਤਿ. ਧਮ੍ਮਵਿਚਯਸਮ੍ਬੋਜ੍ਝਙ੍ਗਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਵੀਰਿਯਂ ਪਗ੍ਗਣ੍ਹਾਤਿ. ਵੀਰਿਯਸਮ੍ਬੋਜ੍ਝਙ੍ਗਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਪਰਿਲ਼ਾਹਂ ਪਟਿਪ੍ਪਸ੍ਸਮ੍ਭੇਤਿ. ਪੀਤਿਸਮ੍ਬੋਜ੍ਝਙ੍ਗਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਦੁਟ੍ਠੁਲ੍ਲਂ ਪਟਿਪ੍ਪਸ੍ਸਮ੍ਭੇਤਿ. ਪਸ੍ਸਦ੍ਧਿਸਮ੍ਬੋਜ੍ਝਙ੍ਗਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਚਿਤ੍ਤਂ ਸਮਾਦਹਤਿ. ਸਮਾਧਿਸਮ੍ਬੋਜ੍ਝਙ੍ਗਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਞਾਣੇਨ ਕਿਲੇਸੇ ਪਟਿਸਙ੍ਖਾਤਿ. ਉਪੇਕ੍ਖਾਸਮ੍ਬੋਜ੍ਝਙ੍ਗਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਇਮੇ ਸਤ੍ਤ ਬੋਜ੍ਝਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਆਸੇਵਨਾ ਹੋਨ੍ਤਿ. ਇਮੇਹਿ ਸਤ੍ਤਹਿ ਬੋਜ੍ਝਙ੍ਗੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਆਸੇਵੀਯਤਿ. ਇਮੇ ਸਤ੍ਤ ਬੋਜ੍ਝਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਭਾਵਨਾ ਹੋਨ੍ਤਿ. ਇਮੇਹਿ ਸਤ੍ਤਹਿ ਬੋਜ੍ਝਙ੍ਗੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਭਾਵੀਯਤਿ. ਇਮੇ ਸਤ੍ਤ ਬੋਜ੍ਝਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਬਹੁਲੀਕਤਾ ਹੋਨ੍ਤਿ. ਇਮੇਹਿ ਸਤ੍ਤਹਿ ਬੋਜ੍ਝਙ੍ਗੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਬਹੁਲੀਕਰੀਯਤਿ. ਇਮੇ ਸਤ੍ਤ ਬੋਜ੍ਝਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਅਲਙ੍ਕਾਰਾ ਹੋਨ੍ਤਿ. ਇਮੇਹਿ ਸਤ੍ਤਹਿ ਬੋਜ੍ਝਙ੍ਗੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਸ੍ਵਾਲਙ੍ਕਤਾ ਹੋਤਿ. ਇਮੇ ਸਤ੍ਤ ਬੋਜ੍ਝਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਪਰਿਕ੍ਖਾਰਾ ਹੋਨ੍ਤਿ. ਇਮੇਹਿ ਸਤ੍ਤਹਿ ਬੋਜ੍ਝਙ੍ਗੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਸੁਪਰਿਕ੍ਖਤਾ ਹੋਤਿ. ਇਮੇ ਸਤ੍ਤ ਬੋਜ੍ਝਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਪਰਿਵਾਰਾ ਹੋਨ੍ਤਿ. ਇਮੇਹਿ ਸਤ੍ਤਹਿ ਬੋਜ੍ਝਙ੍ਗੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਸੁਪਰਿਵੁਤਾ ਹੋਤਿ. ਇਮੇ ਸਤ੍ਤ ਬੋਜ੍ਝਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਆਸੇਵਨਾ ਹੋਨ੍ਤਿ, ਭਾਵਨਾ ਹੋਨ੍ਤਿ, ਬਹੁਲੀਕਤਾ ਹੋਨ੍ਤਿ, ਅਲਙ੍ਕਾਰਾ ਹੋਨ੍ਤਿ, ਪਰਿਕ੍ਖਾਰਾ ਹੋਨ੍ਤਿ, ਪਰਿਵਾਰਾ ਹੋਨ੍ਤਿ, ਪਾਰਿਪੂਰੀ ਹੋਨ੍ਤਿ, ਸਹਗਤਾ ਹੋਨ੍ਤਿ, ਸਹਜਾਤਾ ਹੋਨ੍ਤਿ, ਸਂਸਟ੍ਠਾ ਹੋਨ੍ਤਿ, ਸਮ੍ਪਯੁਤ੍ਤਾ ਹੋਨ੍ਤਿ, ਪਕ੍ਖਨ੍ਦਨਾ ਹੋਨ੍ਤਿ, ਪਸੀਦਨਾ ਹੋਨ੍ਤਿ, ਸਨ੍ਤਿਟ੍ਠਨਾ ਹੋਨ੍ਤਿ, ਵਿਮੁਚ੍ਚਨਾ ਹੋਨ੍ਤਿ, ‘‘ਏਤਂ ਸਨ੍ਤ’’ਨ੍ਤਿ ਫਸ੍ਸਨਾ ਹੋਨ੍ਤਿ, ਯਾਨੀਕਤਾ ਹੋਨ੍ਤਿ, ਵਤ੍ਥੁਕਤਾ ਹੋਨ੍ਤਿ, ਅਨੁਟ੍ਠਿਤਾ ਹੋਨ੍ਤਿ, ਪਰਿਚਿਤਾ ਹੋਨ੍ਤਿ, ਸੁਸਮਾਰਦ੍ਧਾ ਹੋਨ੍ਤਿ, ਸੁਭਾਵਿਤਾ ਹੋਨ੍ਤਿ, ਸ੍ਵਾਧਿਟ੍ਠਿਤਾ ਹੋਨ੍ਤਿ, ਸੁਸਮੁਗ੍ਗਤਾ ਹੋਨ੍ਤਿ, ਸੁਵਿਮੁਤ੍ਤਾ ਹੋਨ੍ਤਿ, ਨਿਬ੍ਬਤ੍ਤੇਨ੍ਤਿ ਜੋਤੇਨ੍ਤਿ ਪਤਾਪੇਨ੍ਤਿ.

੪. ਮਗ੍ਗਙ੍ਗਵਾਰੋ

੨੬. ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਮ੍ਮਾ ਪਸ੍ਸਤਿ. ਸਮ੍ਮਾਦਿਟ੍ਠਿਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਮ੍ਮਾ ਅਭਿਨਿਰੋਪੇਤਿ. ਸਮ੍ਮਾਸਙ੍ਕਪ੍ਪਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਮ੍ਮਾ ਪਰਿਗ੍ਗਣ੍ਹਾਤਿ. ਸਮ੍ਮਾਵਾਚਾਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਮ੍ਮਾ ਸਮੁਟ੍ਠਾਪੇਤਿ. ਸਮ੍ਮਾਕਮ੍ਮਨ੍ਤਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਮ੍ਮਾ ਵੋਦਾਪੇਤਿ. ਸਮ੍ਮਾਆਜੀਵਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਮ੍ਮਾ ਪਗ੍ਗਣ੍ਹਾਤਿ. ਸਮ੍ਮਾਵਾਯਾਮਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਮ੍ਮਾ ਉਪਟ੍ਠਾਪੇਤਿ. ਸਮ੍ਮਾਸਤਿਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਮ੍ਮਾ ਸਮਾਦਹਤਿ. ਸਮ੍ਮਾਸਮਾਧਿਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਇਮੇ ਅਟ੍ਠ ਮਗ੍ਗਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਆਸੇਵਨਾ ਹੋਨ੍ਤਿ. ਇਮੇਹਿ ਅਟ੍ਠਹਿ ਮਗ੍ਗਙ੍ਗੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਆਸੇਵੀਯਤਿ. ਇਮੇ ਅਟ੍ਠ ਮਗ੍ਗਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਭਾਵਨਾ ਹੋਨ੍ਤਿ. ਇਮੇਹਿ ਅਟ੍ਠਹਿ ਮਗ੍ਗਙ੍ਗੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਭਾਵੀਯਤਿ. ਇਮੇ ਅਟ੍ਠ ਮਗ੍ਗਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਬਹੁਲੀਕਤਾ ਹੋਨ੍ਤਿ. ਇਮੇਹਿ ਅਟ੍ਠਹਿ ਮਗ੍ਗਙ੍ਗੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਬਹੁਲੀਕਰੀਯਤਿ. ਇਮੇ ਅਟ੍ਠ ਮਗ੍ਗਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਅਲਙ੍ਕਾਰਾ ਹੋਨ੍ਤਿ. ਇਮੇਹਿ ਅਟ੍ਠਹਿ ਮਗ੍ਗਙ੍ਗੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਸ੍ਵਾਲਙ੍ਕਤਾ ਹੋਨ੍ਤਿ. ਇਮੇ ਅਟ੍ਠ ਮਗ੍ਗਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਪਰਿਕ੍ਖਾਰਾ ਹੋਨ੍ਤਿ. ਇਮੇਹਿ ਅਟ੍ਠਹਿ ਮਗ੍ਗਙ੍ਗੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਸੁਪਰਿਕ੍ਖਤਾ ਹੋਤਿ. ਇਮੇ ਅਟ੍ਠ ਮਗ੍ਗਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਪਰਿਵਾਰਾ ਹੋਨ੍ਤਿ. ਇਮੇਹਿ ਅਟ੍ਠਹਿ ਮਗ੍ਗਙ੍ਗੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਸੁਪਰਿਵੁਤਾ ਹੋਤਿ. ਇਮੇ ਅਟ੍ਠ ਮਗ੍ਗਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਆਸੇਵਨਾ ਹੋਨ੍ਤਿ, ਭਾਵਨਾ ਹੋਨ੍ਤਿ, ਬਹੁਲੀਕਤਾ ਹੋਨ੍ਤਿ, ਅਲਙ੍ਕਾਰਾ ਹੋਨ੍ਤਿ, ਪਰਿਕ੍ਖਾਰਾ ਹੋਨ੍ਤਿ, ਪਰਿਵਾਰਾ ਹੋਨ੍ਤਿ, ਪਾਰਿਪੂਰੀ ਹੋਨ੍ਤਿ, ਸਹਗਤਾ ਹੋਨ੍ਤਿ, ਸਹਜਾਤਾ ਹੋਨ੍ਤਿ, ਸਂਸਟ੍ਠਾ ਹੋਨ੍ਤਿ, ਸਮ੍ਪਯੁਤ੍ਤਾ ਹੋਨ੍ਤਿ, ਪਕ੍ਖਨ੍ਦਨਾ ਹੋਨ੍ਤਿ, ਪਸੀਦਨਾ ਹੋਨ੍ਤਿ, ਸਨ੍ਤਿਟ੍ਠਨਾ ਹੋਨ੍ਤਿ, ਵਿਮੁਚ੍ਚਨਾ ਹੋਨ੍ਤਿ, ‘‘ਏਤਂ ਸਨ੍ਤ’’ਨ੍ਤਿ ਫਸ੍ਸਨਾ ਹੋਨ੍ਤਿ, ਯਾਨੀਕਤਾ ਹੋਨ੍ਤਿ, ਵਤ੍ਥੁਕਤਾ ਹੋਨ੍ਤਿ, ਅਨੁਟ੍ਠਿਤਾ ਹੋਨ੍ਤਿ, ਪਰਿਚਿਤਾ ਹੋਨ੍ਤਿ, ਸੁਸਮਾਰਦ੍ਧਾ ਹੋਨ੍ਤਿ, ਸੁਭਾਵਿਤਾ ਹੋਨ੍ਤਿ, ਸ੍ਵਾਧਿਟ੍ਠਿਤਾ ਹੋਨ੍ਤਿ, ਸੁਸਮੁਗ੍ਗਤਾ ਹੋਨ੍ਤਿ, ਸੁਵਿਮੁਤ੍ਤਾ ਹੋਨ੍ਤਿ ਨਿਬ੍ਬਤ੍ਤੇਨ੍ਤਿ ਜੋਤੇਨ੍ਤਿ ਪਤਾਪੇਨ੍ਤਿ.

੨੭. ਸਬ੍ਬੇਸਂ ਪਾਣਾਨਂ…ਪੇ… ਸਬ੍ਬੇਸਂ ਭੂਤਾਨਂ… ਸਬ੍ਬੇਸਂ ਪੁਗ੍ਗਲਾਨਂ… ਸਬ੍ਬੇਸਂ ਅਤ੍ਤਭਾਵਪਰਿਯਾਪਨ੍ਨਾਨਂ… ਸਬ੍ਬਾਸਂ ਇਤ੍ਥੀਨਂ… ਸਬ੍ਬੇਸਂ ਪੁਰਿਸਾਨਂ… ਸਬ੍ਬੇਸਂ ਅਰਿਯਾਨਂ… ਸਬ੍ਬੇਸਂ ਅਨਰਿਯਾਨਂ… ਸਬ੍ਬੇਸਂ ਦੇਵਾਨਂ… ਸਬ੍ਬੇਸਂ ਮਨੁਸ੍ਸਾਨਂ… ਸਬ੍ਬੇਸਂ ਵਿਨਿਪਾਤਿਕਾਨਂ ਪੀਲ਼ਨਂ ਵਜ੍ਜੇਤ੍ਵਾ ਅਪੀਲ਼ਨਾਯ, ਉਪਘਾਤਂ ਵਜ੍ਜੇਤ੍ਵਾ ਅਨੁਪਘਾਤੇਨ, ਸਨ੍ਤਾਪਂ ਵਜ੍ਜੇਤ੍ਵਾ ਅਸਨ੍ਤਾਪੇਨ, ਪਰਿਯਾਦਾਨਂ ਵਜ੍ਜੇਤ੍ਵਾ ਅਪਰਿਯਾਦਾਨੇਨ, ਵਿਹੇਸਂ ਵਜ੍ਜੇਤ੍ਵਾ ਅਵਿਹੇਸਾਯ, ਸਬ੍ਬੇ ਵਿਨਿਪਾਤਿਕਾ ਅਵੇਰਿਨੋ ਹੋਨ੍ਤੁ ਮਾ ਵੇਰਿਨੋ, ਸੁਖਿਨੋ ਹੋਨ੍ਤੁ ਮਾ ਦੁਕ੍ਖਿਨੋ, ਸੁਖਿਤਤ੍ਤਾ ਹੋਨ੍ਤੁ ਮਾ ਦੁਕ੍ਖਿਤਤ੍ਤਾਤਿ – ਇਮੇਹਿ ਅਟ੍ਠਹਾਕਾਰੇਹਿ ਸਬ੍ਬੇ ਵਿਨਿਪਾਤਿਕੇ ਮੇਤ੍ਤਾਯਤੀਤਿ – ਮੇਤ੍ਤਾ. ਤਂ ਧਮ੍ਮਂ ਚੇਤਯਤੀਤਿ – ਚੇਤੋ. ਸਬ੍ਬਬ੍ਯਾਪਾਦਪਰਿਯੁਟ੍ਠਾਨੇਹਿ ਵਿਮੁਚ੍ਚਤੀਤਿ – ਵਿਮੁਤ੍ਤਿ. ਮੇਤ੍ਤਾ ਚ ਚੇਤੋ ਚ ਵਿਮੁਤ੍ਤਿ ਚਾਤਿ – ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਵਿਨਿਪਾਤਿਕਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਦ੍ਧਾਯ ਅਧਿਮੁਚ੍ਚਤਿ. ਸਦ੍ਧਿਨ੍ਦ੍ਰਿਯਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ…ਪੇ… ਨਿਬ੍ਬਤ੍ਤੇਨ੍ਤਿ ਜੋਤੇਨ੍ਤਿ ਪਤਾਪੇਨ੍ਤਿ.

ਸਬ੍ਬੇਸਂ ਪੁਰਤ੍ਥਿਮਾਯ ਦਿਸਾਯ ਸਤ੍ਤਾਨਂ…ਪੇ… ਸਬ੍ਬੇਸਂ ਪਚ੍ਛਿਮਾਯ ਦਿਸਾਯ ਸਤ੍ਤਾਨਂ… ਸਬ੍ਬੇਸਂ ਉਤ੍ਤਰਾਯ ਦਿਸਾਯ ਸਤ੍ਤਾਨਂ… ਸਬ੍ਬੇਸਂ ਦਕ੍ਖਿਣਾਯ ਦਿਸਾਯ ਸਤ੍ਤਾਨਂ… ਸਬ੍ਬੇਸਂ ਪੁਰਤ੍ਥਿਮਾਯ ਅਨੁਦਿਸਾਯ ਸਤ੍ਤਾਨਂ… ਸਬ੍ਬੇਸਂ ਪਚ੍ਛਿਮਾਯ ਅਨੁਦਿਸਾਯ ਸਤ੍ਤਾਨਂ… ਸਬ੍ਬੇਸਂ ਉਤ੍ਤਰਾਯ ਅਨੁਦਿਸਾਯ ਸਤ੍ਤਾਨਂ… ਸਬ੍ਬੇਸਂ ਦਕ੍ਖਿਣਾਯ ਅਨੁਦਿਸਾਯ ਸਤ੍ਤਾਨਂ… ਸਬ੍ਬੇਸਂ ਹੇਟ੍ਠਿਮਾਯ ਦਿਸਾਯ ਸਤ੍ਤਾਨਂ… ਸਬ੍ਬੇਸਂ ਉਪਰਿਮਾਯ ਦਿਸਾਯ ਸਤ੍ਤਾਨਂ ਪੀਲ਼ਨਂ ਵਜ੍ਜੇਤ੍ਵਾ ਅਪੀਲ਼ਨਾਯ, ਉਪਘਾਤਂ ਵਜ੍ਜੇਤ੍ਵਾ ਅਨੁਪਘਾਤੇਨ, ਸਨ੍ਤਾਪਂ ਵਜ੍ਜੇਤ੍ਵਾ ਅਸਨ੍ਤਾਪੇਨ, ਪਰਿਯਾਦਾਨਂ ਵਜ੍ਜੇਤ੍ਵਾ ਅਪਰਿਯਾਦਾਨੇਨ, ਵਿਹੇਸਂ ਵਜ੍ਜੇਤ੍ਵਾ ਅਵਿਹੇਸਾਯ, ਸਬ੍ਬੇ ਉਪਰਿਮਾਯ ਦਿਸਾਯ ਸਤ੍ਤਾ ਅਵੇਰਿਨੋ ਹੋਨ੍ਤੁ ਮਾ ਵੇਰਿਨੋ, ਸੁਖਿਨੋ ਹੋਨ੍ਤੁ ਮਾ ਦੁਕ੍ਖਿਨੋ, ਸੁਖਿਤਤ੍ਤਾ ਹੋਨ੍ਤੁ ਮਾ ਦੁਕ੍ਖਿਤਤ੍ਤਾਤਿ – ਇਮੇਹਿ ਅਟ੍ਠਹਾਕਾਰੇਹਿ ਸਬ੍ਬੇ ਉਪਰਿਮਾਯ ਦਿਸਾਯ ਸਤ੍ਤੇ ਮੇਤ੍ਤਾਯਤੀਤਿ – ਮੇਤ੍ਤਾ. ਤਂ ਧਮ੍ਮਂ ਚੇਤਯਤੀਤਿ – ਚੇਤੋ. ਸਬ੍ਬਬ੍ਯਾਪਾਦਪਰਿਯੁਟ੍ਠਾਨੇਹਿ ਵਿਮੁਚ੍ਚਤੀਤਿ – ਵਿਮੁਤ੍ਤਿ. ਮੇਤ੍ਤਾ ਚ ਚੇਤੋ ਚ ਵਿਮੁਤ੍ਤਿ ਚਾਤਿ – ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਉਪਰਿਮਾਯ ਦਿਸਾਯ ਸਤ੍ਤਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਦ੍ਧਾਯ ਅਧਿਮੁਚ੍ਚਤਿ. ਸਦ੍ਧਿਨ੍ਦ੍ਰਿਯਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ…ਪੇ… ਨਿਬ੍ਬਤ੍ਤੇਨ੍ਤਿ ਜੋਤੇਨ੍ਤਿ ਪਤਾਪੇਨ੍ਤਿ.

ਸਬ੍ਬੇਸਂ ਪੁਰਤ੍ਥਿਮਾਯ ਦਿਸਾਯ ਪਾਣਾਨਂ…ਪੇ… ਭੂਤਾਨਂ… ਪੁਗ੍ਗਲਾਨਂ ਅਤ੍ਤਭਾਵਪਰਿਯਾਪਨ੍ਨਾਨਂ… ਸਬ੍ਬਾਸਂ ਇਤ੍ਥੀਨਂ… ਸਬ੍ਬੇਸਂ ਪੁਰਿਸਾਨਂ… ਸਬ੍ਬੇਸਂ ਅਰਿਯਾਨਂ… ਸਬ੍ਬੇਸਂ ਅਨਰਿਯਾਨਂ… ਸਬ੍ਬੇਸਂ ਦੇਵਾਨਂ… ਸਬ੍ਬੇਸਂ ਮਨੁਸ੍ਸਾਨਂ… ਸਬ੍ਬੇਸਂ ਵਿਨਿਪਾਤਿਕਾਨਂ… ਸਬ੍ਬੇਸਂ ਪਚ੍ਛਿਮਾਯ ਦਿਸਾਯ ਵਿਨਿਪਾਤਿਕਾਨਂ… ਸਬ੍ਬੇਸਂ ਉਤ੍ਤਰਾਯ ਦਿਸਾਯ ਵਿਨਿਪਾਤਿਕਾਨਂ… ਸਬ੍ਬੇਸਂ ਦਕ੍ਖਿਣਾਯ ਦਿਸਾਯ ਵਿਨਿਪਾਤਿਕਾਨਂ… ਸਬ੍ਬੇਸਂ ਪੁਰਤ੍ਥਿਮਾਯ ਅਨੁਦਿਸਾਯ ਵਿਨਿਪਾਤਿਕਾਨਂ… ਸਬ੍ਬੇਸਂ ਪਚ੍ਛਿਮਾਯ ਅਨੁਦਿਸਾਯ ਵਿਨਿਪਾਤਿਕਾਨਂ… ਸਬ੍ਬੇਸਂ ਉਤ੍ਤਰਾਯ ਅਨੁਦਿਸਾਯ ਵਿਨਿਪਾਤਿਕਾਨਂ… ਸਬ੍ਬੇਸਂ ਦਕ੍ਖਿਣਾਯ ਅਨੁਦਿਸਾਯ ਵਿਨਿਪਾਤਿਕਾਨਂ… ਸਬ੍ਬੇਸਂ ਹੇਟ੍ਠਿਮਾਯ ਦਿਸਾਯ ਵਿਨਿਪਾਤਿਕਾਨਂ… ਸਬ੍ਬੇਸਂ ਉਪਰਿਮਾਯ ਦਿਸਾਯ ਵਿਨਿਪਾਤਿਕਾਨਂ ਪੀਲ਼ਨਂ ਵਜ੍ਜੇਤ੍ਵਾ ਅਪੀਲ਼ਨਾਯ, ਉਪਘਾਤਂ ਵਜ੍ਜੇਤ੍ਵਾ ਅਨੁਪਘਾਤੇਨ, ਸਨ੍ਤਾਪਂ ਵਜ੍ਜੇਤ੍ਵਾ ਅਸਨ੍ਤਾਪੇਨ, ਪਰਿਯਾਦਾਨਂ ਵਜ੍ਜੇਤ੍ਵਾ ਅਪਰਿਯਾਦਾਨੇਨ, ਵਿਹੇਸਂ ਵਜ੍ਜੇਤ੍ਵਾ ਅਵਿਹੇਸਾਯ, ਸਬ੍ਬੇ ਉਪਰਿਮਾਯ ਦਿਸਾਯ ਵਿਨਿਪਾਤਿਕਾ ਅਵੇਰਿਨੋ ਹੋਨ੍ਤੁ ਮਾ ਵੇਰਿਨੋ, ਸੁਖਿਨੋ ਹੋਨ੍ਤੁ ਮਾ ਦੁਕ੍ਖਿਨੋ, ਸੁਖਿਤਤ੍ਤਾ ਹੋਨ੍ਤੁ ਮਾ ਦੁਕ੍ਖਿਤਤ੍ਤਾਤਿ – ਇਮੇਹਿ ਅਟ੍ਠਹਾਕਾਰੇਹਿ ਸਬ੍ਬੇ ਉਪਰਿਮਾਯ ਦਿਸਾਯ ਵਿਨਿਪਾਤਿਕੇ ਮੇਤ੍ਤਾਯਤੀਤਿ – ਮੇਤ੍ਤਾ. ਤਂ ਧਮ੍ਮਂ ਚੇਤਯਤੀਤਿ – ਚੇਤੋ. ਸਬ੍ਬਬ੍ਯਾਪਾਦਪਰਿਯੁਟ੍ਠਾਨੇਹਿ ਵਿਮੁਚ੍ਚਤੀਤਿ – ਵਿਮੁਤ੍ਤਿ. ਮੇਤ੍ਤਾ ਚ ਚੇਤੋ ਚ ਵਿਮੁਤ੍ਤਿ ਚਾਤਿ – ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਉਪਰਿਮਾਯ ਦਿਸਾਯ ਵਿਨਿਪਾਤਿਕਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਦ੍ਧਾਯ ਅਧਿਮੁਚ੍ਚਤਿ. ਸਦ੍ਧਿਨ੍ਦ੍ਰਿਯਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਬ੍ਬੇ ਉਪਰਿਮਾਯ ਦਿਸਾਯ ਵਿਨਿਪਾਤਿਕਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਵੀਰਿਯਂ ਪਗ੍ਗਣ੍ਹਾਤਿ. ਵੀਰਿਯਿਨ੍ਦ੍ਰਿਯਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਸਤਿਂ ਉਪਟ੍ਠਾਪੇਤਿ. ਸਤਿਨ੍ਦ੍ਰਿਯਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਚਿਤ੍ਤਂ ਸਮਾਦਹਤਿ. ਸਮਾਧਿਨ੍ਦ੍ਰਿਯਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਪਞ੍ਞਾਯ ਪਜਾਨਾਤਿ. ਪਞ੍ਞਿਨ੍ਦ੍ਰਿਯਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਆਸੇਵਨਾ ਹੋਨ੍ਤਿ. ਇਮੇਹਿ ਪਞ੍ਚਹਿ ਇਨ੍ਦ੍ਰਿਯੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਆਸੇਵੀਯਤਿ…ਪੇ… ਨਿਬ੍ਬਤ੍ਤੇਨ੍ਤਿ ਜੋਤੇਨ੍ਤਿ ਪਤਾਪੇਨ੍ਤਿ.

ਸਬ੍ਬੇ ਉਪਰਿਮਾਯ ਦਿਸਾਯ ਵਿਨਿਪਾਤਿਕਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਅਸ੍ਸਦ੍ਧਿਯੇ ਨ ਕਮ੍ਪਤਿ. ਸਦ੍ਧਾਬਲਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਕੋਸਜ੍ਜੇ ਨ ਕਮ੍ਪਤਿ. ਵੀਰਿਯਬਲਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਪਮਾਦੇ ਨ ਕਮ੍ਪਤਿ. ਸਤਿਬਲਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਉਦ੍ਧਚ੍ਚੇ ਨ ਕਮ੍ਪਤਿ. ਸਮਾਧਿਬਲਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਅਵਿਜ੍ਜਾਯ ਨ ਕਮ੍ਪਤਿ. ਪਞ੍ਞਾਬਲਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਇਮਾਨਿ ਪਞ੍ਚ ਬਲਾਨਿ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਆਸੇਵਨਾ ਹੋਨ੍ਤਿ. ਇਮੇਹਿ ਪਞ੍ਚਹਿ ਬਲੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਆਸੇਵੀਯਤਿ…ਪੇ… ਨਿਬ੍ਬਤ੍ਤੇਨ੍ਤਿ ਜੋਤੇਨ੍ਤਿ ਪਤਾਪੇਨ੍ਤਿ.

ਸਬ੍ਬੇ ਉਪਰਿਮਾਯ ਦਿਸਾਯ ਵਿਨਿਪਾਤਿਕਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਤਿਂ ਉਪਟ੍ਠਾਪੇਤਿ. ਸਤਿਸਮ੍ਬੋਜ੍ਝਙ੍ਗਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਪਞ੍ਞਾਯ ਪਵਿਚਿਨਾਤਿ. ਧਮ੍ਮਵਿਚਯਸਮ੍ਬੋਜ੍ਝਙ੍ਗਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਵੀਰਿਯਂ ਪਗ੍ਗਣ੍ਹਾਤਿ. ਵੀਰਿਯਸਮ੍ਬੋਜ੍ਝਙ੍ਗਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਪਰਿਲ਼ਾਹਂ ਪਟਿਪ੍ਪਸ੍ਸਮ੍ਭੇਤਿ. ਪੀਤਿਸਮ੍ਬੋਜ੍ਝਙ੍ਗਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਦੁਟ੍ਠੁਲ੍ਲਂ ਪਟਿਪ੍ਪਸ੍ਸਮ੍ਭੇਤਿ. ਪਸ੍ਸਦ੍ਧਿਸਮ੍ਬੋਜ੍ਝਙ੍ਗਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਚਿਤ੍ਤਂ ਸਮਾਦਹਤਿ. ਸਮਾਧਿਸਮ੍ਬੋਜ੍ਝਙ੍ਗਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਞਾਣੇਨ ਕਿਲੇਸੇ ਪਟਿਸਙ੍ਖਾਤਿ. ਉਪੇਕ੍ਖਾਸਮ੍ਬੋਜ੍ਝਙ੍ਗਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਇਮੇ ਸਤ੍ਤ ਬੋਜ੍ਝਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਆਸੇਵਨਾ ਹੋਨ੍ਤਿ. ਇਮੇਹਿ ਸਤ੍ਤਹਿ ਬੋਜ੍ਝਙ੍ਗੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਆਸੇਵੀਯਤਿ…ਪੇ… ਨਿਬ੍ਬਤ੍ਤੇਨ੍ਤਿ ਜੋਤੇਨ੍ਤਿ ਪਤਾਪੇਨ੍ਤਿ.

ਸਬ੍ਬੇ ਉਪਰਿਮਾਯ ਦਿਸਾਯ ਵਿਨਿਪਾਤਿਕਾ ਅਵੇਰਿਨੋ ਹੋਨ੍ਤੁ, ਖੇਮਿਨੋ ਹੋਨ੍ਤੁ, ਸੁਖਿਨੋ ਹੋਨ੍ਤੂਤਿ – ਸਮ੍ਮਾ ਪਸ੍ਸਤਿ. ਸਮ੍ਮਾਦਿਟ੍ਠਿ ਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਸਮ੍ਮਾ ਅਭਿਨਿਰੋਪੇਤਿ. ਸਮ੍ਮਾਸਙ੍ਕਪ੍ਪਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਸਮ੍ਮਾ ਪਰਿਗ੍ਗਣ੍ਹਾਤਿ. ਸਮ੍ਮਾਵਾਚਾਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਸਮ੍ਮਾ ਸਮੁਟ੍ਠਾਪੇਤਿ. ਸਮ੍ਮਾਕਮ੍ਮਨ੍ਤਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਸਮ੍ਮਾ ਵੋਦਾਪੇਤਿ. ਸਮ੍ਮਾ ਆਜੀਵਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਸਮ੍ਮਾ ਪਗ੍ਗਣ੍ਹਾਤਿ. ਸਮ੍ਮਾਵਾਯਾਮਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਸਮ੍ਮਾ ਉਪਟ੍ਠਾਤਿ. ਸਮ੍ਮਾਸਤਿਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਸਮ੍ਮਾ ਸਮਾਦਹਤਿ. ਸਮ੍ਮਾਸਮਾਧਿਪਰਿਭਾਵਿਤਾ ਹੋਤਿ ਮੇਤ੍ਤਾਚੇਤੋਵਿਮੁਤ੍ਤਿ.

ਇਮੇ ਅਟ੍ਠ ਮਗ੍ਗਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਆਸੇਵਨਾ ਹੋਨ੍ਤਿ. ਇਮੇਹਿ ਅਟ੍ਠਹਿ ਮਗ੍ਗਙ੍ਗੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਆਸੇਵੀਯਤਿ…ਪੇ… ਇਮੇ ਅਟ੍ਠ ਮਗ੍ਗਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਪਰਿਭਾਵਿਤਾ ਹੋਨ੍ਤਿ. ਇਮੇਹਿ ਅਟ੍ਠਹਿ ਮਗ੍ਗਙ੍ਗੇਹਿ ਮੇਤ੍ਤਾਚੇਤੋਵਿਮੁਤ੍ਤਿ ਸੁਪਰਿਵੁਤਾ ਹੋਤਿ. ਇਮੇ ਅਟ੍ਠ ਮਗ੍ਗਙ੍ਗਾ ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਆਸੇਵਨਾ ਹੋਨ੍ਤਿ, ਭਾਵਨਾ ਹੋਨ੍ਤਿ, ਬਹੁਲੀਕਤਾ ਹੋਨ੍ਤਿ, ਅਲਙ੍ਕਾਰਾ ਹੋਨ੍ਤਿ, ਪਰਿਕ੍ਖਾਰਾ ਹੋਨ੍ਤਿ, ਪਰਿਵਾਰਾ ਹੋਨ੍ਤਿ, ਪਾਰਿਪੂਰੀ ਹੋਨ੍ਤਿ, ਸਹਗਤਾ ਹੋਨ੍ਤਿ, ਸਹਜਾਤਾ ਹੋਨ੍ਤਿ, ਸਂਸਟ੍ਠਾ ਹੋਨ੍ਤਿ, ਸਮ੍ਪਯੁਤ੍ਤਾ ਹੋਨ੍ਤਿ, ਪਕ੍ਖਨ੍ਦਨਾ ਹੋਨ੍ਤਿ, ਪਸੀਦਨਾ ਹੋਨ੍ਤਿ, ਸਨ੍ਤਿਟ੍ਠਨਾ ਹੋਨ੍ਤਿ, ਵਿਮੁਚ੍ਚਨਾ ਹੋਨ੍ਤਿ, ‘‘ਏਤਂ ਸਨ੍ਤ’’ਨ੍ਤਿ ਫਸ੍ਸਨਾ ਹੋਨ੍ਤਿ, ਯਾਨੀਕਤਾ ਹੋਨ੍ਤਿ, ਵਤ੍ਥੁਕਤਾ ਹੋਨ੍ਤਿ, ਅਨੁਟ੍ਠਿਤਾ ਹੋਨ੍ਤਿ, ਪਰਿਚਿਤਾ ਹੋਨ੍ਤਿ, ਸੁਸਮਾਰਦ੍ਧਾ ਹੋਨ੍ਤਿ, ਸੁਭਾਵਿਤਾ ਹੋਨ੍ਤਿ, ਸ੍ਵਾਧਿਟ੍ਠਿਤਾ ਹੋਨ੍ਤਿ, ਸੁਸਮੁਗ੍ਗਤਾ ਹੋਨ੍ਤਿ, ਸੁਵਿਮੁਤ੍ਤਾ ਹੋਨ੍ਤਿ ਨਿਬ੍ਬਤ੍ਤੇਨ੍ਤਿ ਜੋਤੇਨ੍ਤਿ ਪਤਾਪੇਨ੍ਤੀਤਿ.

ਮੇਤ੍ਤਾਕਥਾ ਨਿਟ੍ਠਿਤਾ.