੫. ਵਿਰਾਗਕਥਾ

੨੮. ਵਿਰਾਗੋ ਮਗ੍ਗੋ, ਵਿਮੁਤ੍ਤਿ ਫਲਂ. ਕਥਂ ਵਿਰਾਗੋ ਮਗ੍ਗੋ? ਸੋਤਾਪਤ੍ਤਿਮਗ੍ਗਕ੍ਖਣੇ ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿ ਮਿਚ੍ਛਾਦਿਟ੍ਠਿਯਾ ਵਿਰਜ੍ਜਤਿ, ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਵਿਰਜ੍ਜਤਿ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਵਿਰਜ੍ਜਤਿ. ਵਿਰਾਗੋ ਵਿਰਾਗਾਰਮ੍ਮਣੋ ਵਿਰਾਗਗੋਚਰੋ ਵਿਰਾਗੇ ਸਮੁਦਾਗਤੋ [ਸਮੁਪਾਗਤੋ (ਸ੍ਯਾ.)] ਵਿਰਾਗੇ ਠਿਤੋ ਵਿਰਾਗੇ ਪਤਿਟ੍ਠਿਤੋ.

ਵਿਰਾਗੋਤਿ ਦ੍ਵੇ ਵਿਰਾਗਾ – ਨਿਬ੍ਬਾਨਞ੍ਚ ਵਿਰਾਗੋ, ਯੇ ਚ ਨਿਬ੍ਬਾਨਾਰਮ੍ਮਣਤਾਜਾਤਾ ਧਮ੍ਮਾ ਸਬ੍ਬੇ ਵਿਰਾਗਾ ਹੋਨ੍ਤੀਤਿ – ਵਿਰਾਗਾ. ਸਹਜਾਤਾਨਿ ਸਤ੍ਤਙ੍ਗਾਨਿ ਵਿਰਾਗਂ ਗਚ੍ਛਨ੍ਤੀਤਿ – ਵਿਰਾਗੋ ਮਗ੍ਗੋ. ਏਤੇਨ ਮਗ੍ਗੇਨ ਬੁਦ੍ਧਾ ਚ ਸਾਵਕਾ ਚ ਅਗਤਂ ਦਿਸਂ ਨਿਬ੍ਬਾਨਂ ਗਚ੍ਛਨ੍ਤੀਤਿ – ਅਟ੍ਠਙ੍ਗਿਕੋ ਮਗ੍ਗੋ. ਯਾਵਤਾ ਪੁਥੁਸਮਣਬ੍ਰਾਹ੍ਮਣਾਨਂ ਪਰਪ੍ਪਵਾਦਾਨਂ ਮਗ੍ਗਾ, ਅਯਮੇਵ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਅਗ੍ਗੋ ਚ ਸੇਟ੍ਠੋ ਚ ਪਾਮੋਕ੍ਖੋ [ਵਿਮੋਕ੍ਖੋ (ਸ੍ਯਾ.), ਮੋਕ੍ਖੋ (ਅਟ੍ਠ.)] ਚ ਉਤ੍ਤਮੋ ਚ ਪਵਰੋ ਚਾਤਿ – ਮਗ੍ਗਾਨਂ ਅਟ੍ਠਙ੍ਗਿਕੋ ਸੇਟ੍ਠੋ.

ਅਭਿਨਿਰੋਪਨਟ੍ਠੇਨ ਸਮ੍ਮਾਸਙ੍ਕਪ੍ਪੋ ਮਿਚ੍ਛਾਸਙ੍ਕਪ੍ਪਾ ਵਿਰਜ੍ਜਤਿ. ਪਰਿਗ੍ਗਹਟ੍ਠੇਨ ਸਮ੍ਮਾਵਾਚਾ ਮਿਚ੍ਛਾਵਾਚਾਯ ਵਿਰਜ੍ਜਤਿ. ਸਮੁਟ੍ਠਾਨਟ੍ਠੇਨ ਸਮ੍ਮਾਕਮ੍ਮਨ੍ਤੋ ਮਿਚ੍ਛਾਕਮ੍ਮਨ੍ਤਾ ਵਿਰਜ੍ਜਤਿ. ਵੋਦਾਨਟ੍ਠੇਨ ਸਮ੍ਮਾਆਜੀਵੋ ਮਿਚ੍ਛਾਆਜੀਵਾ ਵਿਰਜ੍ਜਤਿ. ਪਗ੍ਗਹਟ੍ਠੇਨ ਸਮ੍ਮਾਵਾਯਾਮੋ ਮਿਚ੍ਛਾਵਾਯਾਮਾ ਵਿਰਜ੍ਜਤਿ. ਉਪਟ੍ਠਾਨਟ੍ਠੇਨ ਸਮ੍ਮਾਸਤਿ ਮਿਚ੍ਛਾਸਤਿਯਾ ਵਿਰਜ੍ਜਤਿ. ਅਵਿਕ੍ਖੇਪਟ੍ਠੇਨ ਸਮ੍ਮਾਸਮਾਧਿ ਮਿਚ੍ਛਾਸਮਾਧਿਤੋ ਵਿਰਜ੍ਜਤਿ. ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਵਿਰਜ੍ਜਤਿ. ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਵਿਰਜ੍ਜਤਿ. ਵਿਰਾਗੋ ਵਿਰਾਗਾਰਮ੍ਮਣੋ ਵਿਰਾਗਗੋਚਰੋ ਵਿਰਾਗੇ ਸਮੁਦਾਗਤੋ ਵਿਰਾਗੇ ਠਿਤੋ ਵਿਰਾਗੇ ਪਤਿਟ੍ਠਿਤੋ.

ਵਿਰਾਗੋਤਿ ਦ੍ਵੇ ਵਿਰਾਗਾ – ਨਿਬ੍ਬਾਨਞ੍ਚ ਵਿਰਾਗੋ, ਯੇ ਚ ਨਿਬ੍ਬਾਨਾਰਮ੍ਮਣਤਾਜਾਤਾ ਧਮ੍ਮਾ ਸਬ੍ਬੇ ਵਿਰਾਗਾ ਹੋਨ੍ਤੀਤਿ – ਵਿਰਾਗਾ. ਸਹਜਾਤਾਨਿ ਸਤ੍ਤਙ੍ਗਾਨਿ ਵਿਰਾਗਂ ਗਚ੍ਛਨ੍ਤੀਤਿ – ਵਿਰਾਗੋ ਮਗ੍ਗੋ. ਏਤੇਨ ਮਗ੍ਗੇਨ ਬੁਦ੍ਧਾ ਚ ਸਾਵਕਾ ਚ ਅਗਤਂ ਦਿਸਂ ਨਿਬ੍ਬਾਨਂ ਗਚ੍ਛਨ੍ਤੀਤਿ – ਅਟ੍ਠਙ੍ਗਿਕੋ ਮਗ੍ਗੋ. ਯਾਵਤਾ ਪੁਥੁਸਮਣਬ੍ਰਾਹ੍ਮਣਾਨਂ ਪਰਪ੍ਪਵਾਦਾਨਂ ਮਗ੍ਗਾ, ਅਯਮੇਵ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਅਗ੍ਗੋ ਚ ਸੇਟ੍ਠੋ ਚ ਪਾਮੋਕ੍ਖੋ ਚ ਉਤ੍ਤਮੋ ਚ ਪਵਰੋ ਚਾਤਿ – ਮਗ੍ਗਾਨਂ ਅਟ੍ਠਙ੍ਗਿਕੋ ਸੇਟ੍ਠੋ.

ਸਕਦਾਗਾਮਿਮਗ੍ਗਕ੍ਖਣੇ ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿ…ਪੇ… ਅਵਿਕ੍ਖੇਪਟ੍ਠੇਨ ਸਮ੍ਮਾਸਮਾਧਿ ਓਲ਼ਾਰਿਕਾ ਕਾਮਰਾਗਸਞ੍ਞੋਜਨਾ ਪਟਿਘਸਞ੍ਞੋਜਨਾ ਓਲ਼ਾਰਿਕਾ ਕਾਮਰਾਗਾਨੁਸਯਾ ਪਟਿਘਾਨੁਸਯਾ ਵਿਰਜ੍ਜਤਿ, ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਵਿਰਜ੍ਜਤਿ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਵਿਰਜ੍ਜਤਿ. ਵਿਰਾਗੋ ਵਿਰਾਗਾਰਮ੍ਮਣੋ ਵਿਰਾਗਗੋਚਰੋ ਵਿਰਾਗੇ ਸਮੁਦਾਗਤੋ ਵਿਰਾਗੇ ਠਿਤੋ ਵਿਰਾਗੇ ਪਤਿਟ੍ਠਿਤੋ.

ਵਿਰਾਗੋਤਿ ਦ੍ਵੇ ਵਿਰਾਗਾ – ਨਿਬ੍ਬਾਨਞ੍ਚ ਵਿਰਾਗੋ, ਯੇ ਚ ਨਿਬ੍ਬਾਨਾਰਮ੍ਮਣਤਾਜਾਤਾ ਧਮ੍ਮਾ ਸਬ੍ਬੇ ਵਿਰਾਗਾ ਹੋਨ੍ਤੀਤਿ – ਵਿਰਾਗਾ. ਸਹਜਾਤਾਨਿ ਸਤ੍ਤਙ੍ਗਾਨਿ ਵਿਰਾਗਂ ਗਚ੍ਛਨ੍ਤੀਤਿ – ਵਿਰਾਗੋ ਮਗ੍ਗੋ. ਏਤੇਨ ਮਗ੍ਗੇਨ ਬੁਦ੍ਧਾ ਚ ਸਾਵਕਾ ਚ ਅਗਤਂ ਦਿਸਂ ਨਿਬ੍ਬਾਨਂ ਗਚ੍ਛਨ੍ਤੀਤਿ – ਅਟ੍ਠਙ੍ਗਿਕੋ ਮਗ੍ਗੋ. ਯਾਵਤਾ ਪੁਥੁਸਮਣਬ੍ਰਾਹ੍ਮਣਾਨਂ ਪਰਪ੍ਪਵਾਦਾਨਂ ਮਗ੍ਗਾ. ਅਯਮੇਵ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਅਗ੍ਗੋ ਚ ਸੇਟ੍ਠੋ ਚ ਪਾਮੋਕ੍ਖੋ ਚ ਉਤ੍ਤਮੋ ਚ ਪਵਰੋ ਚਾਤਿ – ਮਗ੍ਗਾਨਂ ਅਟ੍ਠਙ੍ਗਿਕੋ ਸੇਟ੍ਠੋ.

ਅਨਾਗਾਮਿਮਗ੍ਗਕ੍ਖਣੇ ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿ…ਪੇ… ਅਵਿਕ੍ਖੇਪਟ੍ਠੇਨ ਸਮ੍ਮਾਸਮਾਧਿ ਅਨੁਸਹਗਤਾ ਕਾਮਰਾਗਸਞ੍ਞੋਜਨਾ ਪਟਿਘਸਞ੍ਞੋਜਨਾ ਅਨੁਸਹਗਤਾ ਕਾਮਰਾਗਾਨੁਸਯਾ ਪਟਿਘਾਨੁਸਯਾ ਵਿਰਜ੍ਜਤਿ, ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਵਿਰਜ੍ਜਤਿ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਵਿਰਜ੍ਜਤਿ. ਵਿਰਾਗੋ ਵਿਰਾਗਾਰਮ੍ਮਣੋ…ਪੇ… ਮਗ੍ਗਾਨਂ ਅਟ੍ਠਙ੍ਗਿਕੋ ਸੇਟ੍ਠੋ.

ਅਰਹਤ੍ਤਮਗ੍ਗਕ੍ਖਣੇ ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿ…ਪੇ… ਅਵਿਕ੍ਖੇਪਟ੍ਠੇਨ ਸਮ੍ਮਾਸਮਾਧਿ ਰੂਪਰਾਗਾ ਅਰੂਪਰਾਗਾ ਮਾਨਾ ਉਦ੍ਧਚ੍ਚਾ ਅਵਿਜ੍ਜਾਯ ਮਾਨਾਨੁਸਯਾ ਭਵਰਾਗਾਨੁਸਯਾ ਅਵਿਜ੍ਜਾਨੁਸਯਾ ਵਿਰਜ੍ਜਤਿ, ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਵਿਰਜ੍ਜਤਿ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਵਿਰਜ੍ਜਤਿ ਵਿਰਾਗੋ ਵਿਰਾਗਾਰਮ੍ਮਣੋ ਵਿਰਾਗਗੋਚਰੋ ਵਿਰਾਗੇ ਸਮੁਦਾਗਤੋ ਵਿਰਾਗੇ ਠਿਤੋ ਵਿਰਾਗੇ ਪਤਿਟ੍ਠਿਤੋ.

ਵਿਰਾਗੋਤਿ ਦ੍ਵੇ ਵਿਰਾਗਾ – ਨਿਬ੍ਬਾਨਞ੍ਚ ਵਿਰਾਗੋ, ਯੇ ਚ ਨਿਬ੍ਬਾਨਾਰਮ੍ਮਣਤਾਜਾਤਾ ਧਮ੍ਮਾ ਸਬ੍ਬੇ ਵਿਰਾਗਾ ਹੋਨ੍ਤੀਤਿ – ਵਿਰਾਗਾ. ਸਹਜਾਤਾਨਿ ਸਤ੍ਤਙ੍ਗਾਨਿ ਵਿਰਾਗਂ ਗਚ੍ਛਨ੍ਤੀਤਿ – ਵਿਰਾਗੋ ਮਗ੍ਗੋ. ਏਤੇਨ ਮਗ੍ਗੇਨ ਬੁਦ੍ਧਾ ਚ ਸਾਵਕਾ ਚ ਅਗਤਂ ਦਿਸਂ ਨਿਬ੍ਬਾਨਂ ਗਚ੍ਛਨ੍ਤੀਤਿ – ਅਟ੍ਠਙ੍ਗਿਕੋ ਮਗ੍ਗੋ. ਯਾਵਤਾ ਪੁਥੁਸਮਣਬ੍ਰਾਹ੍ਮਣਾਨਂ ਪਰਪ੍ਪਵਾਦਾਨਂ ਮਗ੍ਗਾ. ਅਯਮੇਵ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਅਗ੍ਗੋ ਚ ਸੇਟ੍ਠੋ ਚ ਪਾਮੋਕ੍ਖੋ ਚ ਉਤ੍ਤਮੋ ਚ ਪਵਰੋ ਚਾਤਿ – ਮਗ੍ਗਾਨਂ ਅਟ੍ਠਙ੍ਗਿਕੋ ਸੇਟ੍ਠੋ.

ਦਸ੍ਸਨਵਿਰਾਗੋ ਸਮ੍ਮਾਦਿਟ੍ਠਿ. ਅਭਿਨਿਰੋਪਨਵਿਰਾਗੋ ਸਮ੍ਮਾਸਙ੍ਕਪ੍ਪੋ. ਪਰਿਗ੍ਗਹਵਿਰਾਗੋ ਸਮ੍ਮਾਵਾਚਾ. ਸਮੁਟ੍ਠਾਨਵਿਰਾਗੋ ਸਮ੍ਮਾਕਮ੍ਮਨ੍ਤੋ. ਵੋਦਾਨਵਿਰਾਗੋ ਸਮ੍ਮਾਆਜੀਵੋ. ਪਗ੍ਗਹਵਿਰਾਗੋ ਸਮ੍ਮਾਵਾਯਾਮੋ. ਉਪਟ੍ਠਾਨਵਿਰਾਗੋ ਸਮ੍ਮਾਸਤਿ. ਅਵਿਕ੍ਖੇਪਵਿਰਾਗੋ ਸਮ੍ਮਾਸਮਾਧਿ. ਉਪਟ੍ਠਾਨਵਿਰਾਗੋ ਸਤਿਸਮ੍ਬੋਜ੍ਝਙ੍ਗੋ. ਪਵਿਚਯਵਿਰਾਗੋ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ. ਪਗ੍ਗਹਵਿਰਾਗੋ ਵੀਰਿਯਸਮ੍ਬੋਜ੍ਝਙ੍ਗੋ. ਫਰਣਵਿਰਾਗੋ ਪੀਤਿਸਮ੍ਬੋਜ੍ਝਙ੍ਗੋ. ਉਪਸਮਵਿਰਾਗੋ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗੋ. ਅਵਿਕ੍ਖੇਪਵਿਰਾਗੋ ਸਮਾਧਿਸਮ੍ਬੋਜ੍ਝਙ੍ਗੋ. ਪਟਿਸਙ੍ਖਾਨਵਿਰਾਗੋ ਉਪੇਕ੍ਖਾਸਮ੍ਬੋਜ੍ਝਙ੍ਗੋ. ਅਸ੍ਸਦ੍ਧਿਯੇ ਅਕਮ੍ਪਿਯਵਿਰਾਗੋ ਸਦ੍ਧਾਬਲਂ. ਕੋਸਜ੍ਜੇ ਅਕਮ੍ਪਿਯਵਿਰਾਗੋ ਵੀਰਿਯਬਲਂ. ਪਮਾਦੇ ਅਕਮ੍ਪਿਯਵਿਰਾਗੋ ਸਤਿਬਲਂ. ਉਦ੍ਧਚ੍ਚੇ ਅਕਮ੍ਪਿਯਵਿਰਾਗੋ ਸਮਾਧਿਬਲਂ. ਅਵਿਜ੍ਜਾਯ ਅਕਮ੍ਪਿਯਵਿਰਾਗੋ ਪਞ੍ਞਾਬਲਂ. ਅਧਿਮੋਕ੍ਖਵਿਰਾਗੋ ਸਦ੍ਧਿਨ੍ਦ੍ਰਿਯਂ. ਪਗ੍ਗਹਵਿਰਾਗੋ ਵੀਰਿਯਿਨ੍ਦ੍ਰਿਯਂ. ਉਪਟ੍ਠਾਨਵਿਰਾਗੋ ਸਤਿਨ੍ਦ੍ਰਿਯਂ. ਅਵਿਕ੍ਖੇਪਵਿਰਾਗੋ ਸਮਾਧਿਨ੍ਦ੍ਰਿਯਂ. ਦਸ੍ਸਨਵਿਰਾਗੋ ਪਞ੍ਞਿਨ੍ਦ੍ਰਿਯਂ. ਆਧਿਪਤੇਯ੍ਯਟ੍ਠੇਨ ਇਨ੍ਦ੍ਰਿਯਾਨਿ ਵਿਰਾਗੋ. ਅਕਮ੍ਪਿਯਟ੍ਠੇਨ ਬਲਂ ਵਿਰਾਗੋ. ਨਿਯ੍ਯਾਨਟ੍ਠੇਨ ਬੋਜ੍ਝਙ੍ਗਾ ਵਿਰਾਗੋ. ਹੇਤੁਟ੍ਠੇਨ ਮਗ੍ਗੋ ਵਿਰਾਗੋ. ਉਪਟ੍ਠਾਨਟ੍ਠੇਨ ਸਤਿਪਟ੍ਠਾਨਾ ਵਿਰਾਗੋ. ਪਦਹਨਟ੍ਠੇਨ ਸਮ੍ਮਪ੍ਪਧਾਨਾ ਵਿਰਾਗੋ. ਇਜ੍ਝਨਟ੍ਠੇਨ ਇਦ੍ਧਿਪਾਦਾ ਵਿਰਾਗੋ. ਤਥਟ੍ਠੇਨ ਸਚ੍ਚਾ ਵਿਰਾਗੋ. ਅਵਿਕ੍ਖੇਪਟ੍ਠੇਨ ਸਮਥੋ ਵਿਰਾਗੋ. ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਵਿਰਾਗੋ. ਏਕਰਸਟ੍ਠੇਨ ਸਮਥਵਿਪਸ੍ਸਨਾ ਵਿਰਾਗੋ. ਅਨਤਿਵਤ੍ਤਨਟ੍ਠੇਨ ਯੁਗਨਦ੍ਧਂ ਵਿਰਾਗੋ. ਸਂਵਰਟ੍ਠੇਨ ਸੀਲਵਿਸੁਦ੍ਧਿ ਵਿਰਾਗੋ. ਅਵਿਕ੍ਖੇਪਟ੍ਠੇਨ ਚਿਤ੍ਤਵਿਸੁਦ੍ਧਿ ਵਿਰਾਗੋ. ਦਸ੍ਸਨਟ੍ਠੇਨ ਦਿਟ੍ਠਿਵਿਸੁਦ੍ਧਿ ਵਿਰਾਗੋ. ਵਿਮੁਤ੍ਤਟ੍ਠੇਨ ਵਿਮੋਕ੍ਖੋ ਵਿਰਾਗੋ. ਪਟਿਵੇਧਟ੍ਠੇਨ ਵਿਜ੍ਜਾ ਵਿਰਾਗੋ. ਪਰਿਚ੍ਚਾਗਟ੍ਠੇਨ ਵਿਮੁਤ੍ਤਿ ਵਿਰਾਗੋ. ਸਮੁਚ੍ਛੇਦਟ੍ਠੇਨ ਖਯੇ ਞਾਣਂ ਵਿਰਾਗੋ. ਛਨ੍ਦੋ ਮੂਲਟ੍ਠੇਨ ਵਿਰਾਗੋ. ਮਨਸਿਕਾਰੋ ਸਮੁਟ੍ਠਾਨਟ੍ਠੇਨ ਵਿਰਾਗੋ. ਫਸ੍ਸੋ ਸਮੋਧਾਨਟ੍ਠੇਨ ਵਿਰਾਗੋ. ਵੇਦਨਾ ਸਮੋਸਰਣਟ੍ਠੇਨ ਵਿਰਾਗੋ. ਸਮਾਧਿ ਪਮੁਖਟ੍ਠੇਨ ਵਿਰਾਗੋ. ਸਤਿ ਆਧਿਪਤੇਯ੍ਯਟ੍ਠੇਨ ਵਿਰਾਗੋ. ਪਞ੍ਞਾ ਤਤੁਤ੍ਤਰਟ੍ਠੇਨ ਵਿਰਾਗੋ. ਵਿਮੁਤ੍ਤਿ ਸਾਰਟ੍ਠੇਨ ਵਿਰਾਗੋ. ਅਮਤੋਗਧਂ ਨਿਬ੍ਬਾਨਂ ਪਰਿਯੋਸਾਨਟ੍ਠੇਨ ਮਗ੍ਗੋ.

ਦਸ੍ਸਨਮਗ੍ਗੋ ਸਮ੍ਮਾਦਿਟ੍ਠਿ, ਅਭਿਨਿਰੋਪਨਮਗ੍ਗੋ ਸਮ੍ਮਾਸਙ੍ਕਪ੍ਪੋ…ਪੇ… ਅਮਤੋਗਧਂ ਨਿਬ੍ਬਾਨਂ ਪਰਿਯੋਸਾਨਟ੍ਠੇਨ ਮਗ੍ਗੋ. ਏਵਂ ਵਿਰਾਗੋ ਮਗ੍ਗੋ.

੨੯. ਕਥਂ ਵਿਮੁਤ੍ਤਿ ਫਲਂ? ਸੋਤਾਪਤ੍ਤਿਫਲਕ੍ਖਣੇ ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿ ਮਿਚ੍ਛਾਦਿਟ੍ਠਿਯਾ ਵਿਮੁਤ੍ਤਾ ਹੋਤਿ, ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਵਿਮੁਤ੍ਤਾ ਹੋਤਿ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਵਿਮੁਤ੍ਤਾ ਹੋਤਿ, ਵਿਮੁਤ੍ਤਿ ਵਿਮੁਤ੍ਤਾਰਮ੍ਮਣਾ ਵਿਮੁਤ੍ਤਿਗੋਚਰਾ ਵਿਮੁਤ੍ਤਿਯਾ ਸਮੁਦਾਗਤਾ ਵਿਮੁਤ੍ਤਿਯਾ ਠਿਤਾ ਵਿਮੁਤ੍ਤਿਯਾ ਪਤਿਟ੍ਠਿਤਾ. ਵਿਮੁਤ੍ਤੀਤਿ ਦ੍ਵੇ ਮੁਤ੍ਤਿਯੋ – ਨਿਬ੍ਬਾਨਞ੍ਚ ਵਿਮੁਤ੍ਤਿ, ਯੇ ਚ ਨਿਬ੍ਬਾਨਾਰਮ੍ਮਣਤਾਜਾਤਾ ਧਮ੍ਮਾ ਸਬ੍ਬੇ ਚ ਵਿਮੁਤ੍ਤਾ ਹੋਨ੍ਤੀਤਿ – ਵਿਮੁਤ੍ਤਿ ਫਲਂ.

ਅਭਿਨਿਰੋਪਨਟ੍ਠੇਨ ਸਮ੍ਮਾਸਙ੍ਕਪ੍ਪੋ ਮਿਚ੍ਛਾਸਙ੍ਕਪ੍ਪਾ ਵਿਮੁਤ੍ਤੋ ਹੋਤਿ, ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਵਿਮੁਤ੍ਤੋ ਹੋਤਿ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਵਿਮੁਤ੍ਤੋ ਹੋਤਿ, ਵਿਮੁਤ੍ਤਿ ਵਿਮੁਤ੍ਤਾਰਮ੍ਮਣਾ ਵਿਮੁਤ੍ਤਿਗੋਚਰਾ ਵਿਮੁਤ੍ਤਿਯਾ ਸਮੁਦਾਗਤਾ ਵਿਮੁਤ੍ਤਿਯਾ ਠਿਤਾ ਵਿਮੁਤ੍ਤਿਯਾ ਪਤਿਟ੍ਠਿਤਾ. ਵਿਮੁਤ੍ਤੀਤਿ ਦ੍ਵੇ ਵਿਮੁਤ੍ਤਿਯੋ – ਨਿਬ੍ਬਾਨਞ੍ਚ ਵਿਮੁਤ੍ਤਿ, ਯੇ ਚ ਨਿਬ੍ਬਾਨਾਰਮ੍ਮਣਤਾਜਾਤਾ ਧਮ੍ਮਾ ਸਬ੍ਬੇ ਵਿਮੁਤ੍ਤਾ ਹੋਨ੍ਤੀਤਿ – ਵਿਮੁਤ੍ਤਿ ਫਲਂ.

ਪਰਿਗ੍ਗਹਟ੍ਠੇਨ ਸਮ੍ਮਾਵਾਚਾ ਮਿਚ੍ਛਾਵਾਚਾਯ ਵਿਮੁਤ੍ਤਾ ਹੋਤਿ, ਸਮੁਟ੍ਠਾਨਟ੍ਠੇਨ ਸਮ੍ਮਾਕਮ੍ਮਨ੍ਤੋ ਮਿਚ੍ਛਾਕਮ੍ਮਨ੍ਤਾ ਵਿਮੁਤ੍ਤੋ ਹੋਤਿ, ਵੋਦਾਨਟ੍ਠੇਨ ਸਮ੍ਮਾਆਜੀਵੋ ਮਿਚ੍ਛਾਆਜੀਵਾ ਵਿਮੁਤ੍ਤੋ ਹੋਤਿ, ਪਗ੍ਗਹਟ੍ਠੇਨ ਸਮ੍ਮਾਵਾਯਾਮੋ ਮਿਚ੍ਛਾਵਾਯਾਮਾ ਵਿਮੁਤ੍ਤੋ ਹੋਤਿ, ਉਪਟ੍ਠਾਨਟ੍ਠੇਨ ਸਮ੍ਮਾਸਤਿ ਮਿਚ੍ਛਾਸਤਿਯਾ ਵਿਮੁਤ੍ਤਾ ਹੋਤਿ, ਅਵਿਕ੍ਖੇਪਟ੍ਠੇਨ ਸਮ੍ਮਾਸਮਾਧਿ ਮਿਚ੍ਛਾਸਮਾਧਿਤੋ ਵਿਮੁਤ੍ਤੋ ਹੋਤਿ, ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਵਿਮੁਤ੍ਤੋ ਹੋਤਿ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਵਿਮੁਤ੍ਤੋ ਹੋਤਿ, ਵਿਮੁਤ੍ਤਿ ਵਿਮੁਤ੍ਤਾਰਮ੍ਮਣਾ ਵਿਮੁਤ੍ਤਿਗੋਚਰਾ ਵਿਮੁਤ੍ਤਿਯਾ ਸਮੁਦਾਗਤਾ ਵਿਮੁਤ੍ਤਿਯਾ ਠਿਤਾ ਵਿਮੁਤ੍ਤਿਯਾ ਪਤਿਟ੍ਠਿਤਾ. ਵਿਮੁਤ੍ਤੀਤਿ. ਦ੍ਵੇ ਵਿਮੁਤ੍ਤਿਯੋ – ਨਿਬ੍ਬਾਨਞ੍ਚ ਵਿਮੁਤ੍ਤਿ, ਯੇ ਚ ਨਿਬ੍ਬਾਨਾਰਮ੍ਮਣਤਾਜਾਤਾ ਧਮ੍ਮਾ ਸਬ੍ਬੇ ਵਿਮੁਤ੍ਤਾ ਹੋਨ੍ਤੀਤਿ – ਵਿਮੁਤ੍ਤਿ ਫਲਂ.

ਸਕਦਾਗਾਮਿਫਲਕ੍ਖਣੇ ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿ…ਪੇ… ਅਵਿਕ੍ਖੇਪਟ੍ਠੇਨ ਸਮ੍ਮਾਸਮਾਧਿ ਓਲ਼ਾਰਿਕਾ ਕਾਮਰਾਗਸਞ੍ਞੋਜਨਾ ਪਟਿਘਸਞ੍ਞੋਜਨਾ ਓਲ਼ਾਰਿਕਾ ਕਾਮਰਾਗਾਨੁਸਯਾ ਪਟਿਘਾਨੁਸਯਾ ਵਿਮੁਤ੍ਤੋ ਹੋਤਿ, ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਵਿਮੁਤ੍ਤੋ ਹੋਤਿ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਵਿਮੁਤ੍ਤੋ ਹੋਤਿ, ਵਿਮੁਤ੍ਤਿ ਵਿਮੁਤ੍ਤਾਰਮ੍ਮਣਾ ਵਿਮੁਤ੍ਤਿਗੋਚਰਾ ਵਿਮੁਤ੍ਤਿਯਾ ਸਮੁਦਾਗਤਾ ਵਿਮੁਤ੍ਤਿਯਾ ਠਿਤਾ ਵਿਮੁਤ੍ਤਿਯਾ ਪਤਿਟ੍ਠਿਤਾ. ਵਿਮੁਤ੍ਤੀਤਿ ਦ੍ਵੇ ਵਿਮੁਤ੍ਤਿਯੋ – ਨਿਬ੍ਬਾਨਞ੍ਚ ਵਿਮੁਤ੍ਤਿ, ਯੇ ਚ ਨਿਬ੍ਬਾਨਾਰਮ੍ਮਣਤਾਜਾਤਾ ਧਮ੍ਮਾ ਸਬ੍ਬੇ ਵਿਮੁਤ੍ਤਾ ਹੋਨ੍ਤੀਤਿ – ਵਿਮੁਤ੍ਤਿ ਫਲਂ.

ਅਨਾਗਾਮਿਫਲਕ੍ਖਣੇ ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿ…ਪੇ… ਅਵਿਕ੍ਖੇਪਟ੍ਠੇਨ ਸਮ੍ਮਾਸਮਾਧਿ ਅਨੁਸਹਗਤਾ ਕਾਮਰਾਗਸਞ੍ਞੋਜਨਾ ਪਟਿਘਸਞ੍ਞੋਜਨਾ ਅਨੁਸਹਗਤਾ ਕਾਮਰਾਗਾਨੁਸਯਾ ਪਟਿਘਾਨੁਸਯਾ ਵਿਮੁਤ੍ਤੋ ਹੋਤਿ, ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਵਿਮੁਤ੍ਤੋ ਹੋਤਿ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਵਿਮੁਤ੍ਤੋ ਹੋਤਿ, ਵਿਮੁਤ੍ਤਿ ਵਿਮੁਤ੍ਤਾਰਮ੍ਮਣਾ ਵਿਮੁਤ੍ਤਿਗੋਚਰਾ ਵਿਮੁਤ੍ਤਿਯਾ ਸਮੁਦਾਗਤਾ ਵਿਮੁਤ੍ਤਿਯਾ ਠਿਤਾ ਵਿਮੁਤ੍ਤਿਯਾ ਪਤਿਟ੍ਠਿਤਾ…ਪੇ….

ਅਰਹਤ੍ਤਫਲਕ੍ਖਣੇ ਦਸ੍ਸਨਟ੍ਠੇਨ ਸਮ੍ਮਾਦਿਟ੍ਠਿ…ਪੇ… ਅਵਿਕ੍ਖੇਪਟ੍ਠੇਨ ਸਮ੍ਮਾਸਮਾਧਿ ਰੂਪਰਾਗਾ ਅਰੂਪਰਾਗਾ ਮਾਨਾ ਉਦ੍ਧਚ੍ਚਾ ਅਵਿਜ੍ਜਾਯ ਮਾਨਾਨੁਸਯਾ ਭਵਰਾਗਾਨੁਸਯਾ ਅਵਿਜ੍ਜਾਨੁਸਯਾ ਵਿਮੁਤ੍ਤੋ ਹੋਤਿ, ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਵਿਮੁਤ੍ਤੋ ਹੋਤਿ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਵਿਮੁਤ੍ਤੋ ਹੋਤਿ, ਵਿਮੁਤ੍ਤਿ ਵਿਮੁਤ੍ਤਾਰਮ੍ਮਣਾ ਵਿਮੁਤ੍ਤਿਗੋਚਰਾ ਵਿਮੁਤ੍ਤਿਯਾ ਸਮੁਦਾਗਤਾ ਵਿਮੁਤ੍ਤਿਯਾ ਠਿਤਾ ਵਿਮੁਤ੍ਤਿਯਾ ਪਤਿਟ੍ਠਿਤਾ. ਵਿਮੁਤ੍ਤੀਤਿ ਦ੍ਵੇ ਵਿਮੁਤ੍ਤਿਯੋ – ਨਿਬ੍ਬਾਨਞ੍ਚ ਵਿਮੁਤ੍ਤਿ, ਯੇ ਚ ਨਿਬ੍ਬਾਨਾਰਮ੍ਮਣਤਾ ਜਾਤਾ ਧਮ੍ਮਾ ਸਬ੍ਬੇ ਵਿਮੁਤ੍ਤਾ ਹੋਨ੍ਤੀਤਿ – ਵਿਮੁਤ੍ਤਿ ਫਲਂ.

ਦਸ੍ਸਨਵਿਮੁਤ੍ਤਿ ਸਮ੍ਮਾਦਿਟ੍ਠਿ…ਪੇ… ਅਵਿਕ੍ਖੇਪਵਿਮੁਤ੍ਤਿ ਸਮ੍ਮਾਸਮਾਧਿ, ਉਪਟ੍ਠਾਨਵਿਮੁਤ੍ਤਿ ਸਤਿਸਮ੍ਬੋਜ੍ਝਙ੍ਗੋ, ਪਟਿਸਙ੍ਖਾਨਵਿਮੁਤ੍ਤਿ ਉਪੇਕ੍ਖਾਸਮ੍ਬੋਜ੍ਝਙ੍ਗੋ. ਅਸ੍ਸਦ੍ਧਿਯੇ ਅਕਮ੍ਪਿਯਵਿਮੁਤ੍ਤਿ ਸਦ੍ਧਾਬਲਂ…ਪੇ… ਅਵਿਜ੍ਜਾਯ ਅਕਮ੍ਪਿਯਵਿਮੁਤ੍ਤਿ ਪਞ੍ਞਾਬਲਂ. ਅਧਿਮੋਕ੍ਖਵਿਮੁਤ੍ਤਿ ਸਦ੍ਧਿਨ੍ਦ੍ਰਿਯਂ…ਪੇ… ਦਸ੍ਸਨਵਿਮੁਤ੍ਤਿ ਪਞ੍ਞਿਨ੍ਦ੍ਰਿਯਂ.

ਆਧਿਪਤੇਯ੍ਯਟ੍ਠੇਨ ਇਨ੍ਦ੍ਰਿਯਾ ਵਿਮੁਤ੍ਤਿ. ਅਕਮ੍ਪਿਯਟ੍ਠੇਨ ਬਲਾ ਵਿਮੁਤ੍ਤਿ, ਨਿਯ੍ਯਾਨਟ੍ਠੇਨ ਬੋਜ੍ਝਙ੍ਗਾ ਵਿਮੁਤ੍ਤਿ, ਹੇਤੁਟ੍ਠੇਨ ਮਗ੍ਗੋ ਵਿਮੁਤ੍ਤਿ, ਉਪਟ੍ਠਾਨਟ੍ਠੇਨ ਸਤਿਪਟ੍ਠਾਨਾ ਵਿਮੁਤ੍ਤਿ, ਪਦਹਨਟ੍ਠੇਨ ਸਮ੍ਮਪ੍ਪਧਾਨਾ ਵਿਮੁਤ੍ਤਿ, ਇਜ੍ਝਨਟ੍ਠੇਨ ਇਦ੍ਧਿਪਾਦਾ ਵਿਮੁਤ੍ਤਿ, ਤਥਟ੍ਠੇਨ ਸਚ੍ਚਾ ਵਿਮੁਤ੍ਤਿ, ਅਵਿਕ੍ਖੇਪਟ੍ਠੇਨ ਸਮਥੋ ਵਿਮੁਤ੍ਤਿ, ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ ਵਿਮੁਤ੍ਤਿ, ਏਕਰਸਟ੍ਠੇਨ ਸਮਥਵਿਪਸ੍ਸਨਾ ਵਿਮੁਤ੍ਤਿ, ਅਨਤਿਵਤ੍ਤਨਟ੍ਠੇਨ ਯੁਗਨਦ੍ਧਂ ਵਿਮੁਤ੍ਤਿ, ਸਂਵਰਟ੍ਠੇਨ ਸੀਲਵਿਸੁਦ੍ਧਿ ਵਿਮੁਤ੍ਤਿ, ਅਵਿਕ੍ਖੇਪਟ੍ਠੇਨ ਚਿਤ੍ਤਵਿਸੁਦ੍ਧਿ ਵਿਮੁਤ੍ਤਿ, ਦਸ੍ਸਨਟ੍ਠੇਨ ਦਿਟ੍ਠਿਵਿਸੁਦ੍ਧਿ ਵਿਮੁਤ੍ਤਿ, ਵਿਮੁਤ੍ਤਟ੍ਠੇਨ ਵਿਮੋਕ੍ਖੋ ਵਿਮੁਤ੍ਤਿ, ਪਟਿਵੇਧਟ੍ਠੇਨ ਵਿਜ੍ਜਾ ਵਿਮੁਤ੍ਤਿ, ਪਰਿਚ੍ਚਾਗਟ੍ਠੇਨ ਵਿਮੁਤ੍ਤਿ ਵਿਮੁਤ੍ਤਿ, ਪਟਿਪ੍ਪਸ੍ਸਦ੍ਧਿਯਟ੍ਠੇਨ ਅਨੁਪ੍ਪਾਦੇ ਞਾਣਂ ਵਿਮੁਤ੍ਤਿ, ਛਨ੍ਦੋ ਮੂਲਟ੍ਠੇਨ ਵਿਮੁਤ੍ਤਿ, ਮਨਸਿਕਾਰੋ ਸਮੁਟ੍ਠਾਨਟ੍ਠੇਨ ਵਿਮੁਤ੍ਤਿ, ਫਸ੍ਸੋ ਸਮੋਧਾਨਟ੍ਠੇਨ ਵਿਮੁਤ੍ਤਿ, ਵੇਦਨਾ ਸਮੋਸਰਣਟ੍ਠੇਨ ਵਿਮੁਤ੍ਤਿ, ਸਮਾਧਿ ਪਮੁਖਟ੍ਠੇਨ ਵਿਮੁਤ੍ਤਿ, ਸਤਿ ਆਧਿਪਤੇਯ੍ਯਟ੍ਠੇਨ ਵਿਮੁਤ੍ਤਿ, ਪਞ੍ਞਾ ਤਤੁਤ੍ਤਰਟ੍ਠੇਨ ਵਿਮੁਤ੍ਤਿ, ਵਿਮੁਤ੍ਤਿ ਸਾਰਟ੍ਠੇਨ ਵਿਮੁਤ੍ਤਿ, ਅਮਤੋਗਧਂ ਨਿਬ੍ਬਾਨਂ ਪਰਿਯੋਸਾਨਟ੍ਠੇਨ ਵਿਮੁਤ੍ਤਿ. ਏਵਂ ਵਿਮੁਤ੍ਤਿ ਫਲਂ. ਏਵਂ ਵਿਰਾਗੋ ਮਗ੍ਗੋ, ਵਿਮੁਤ੍ਤਿ ਫਲਨ੍ਤਿ.

ਵਿਰਾਗਕਥਾ ਨਿਟ੍ਠਿਤਾ.