੧੦. ਸੁਞ੍ਞਕਥਾ

੪੬. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਆਯਸ੍ਮਾ ਆਨਨ੍ਦੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ –

‘‘‘ਸੁਞ੍ਞੋ ਲੋਕੋ, ਸੁਞ੍ਞੋ ਲੋਕੋ’ਤਿ, ਭਨ੍ਤੇ, ਵੁਚ੍ਚਤਿ. ਕਿਤ੍ਤਾਵਤਾ ਨੁ ਖੋ, ਭਨ੍ਤੇ, ‘ਸੁਞ੍ਞੋ ਲੋਕੋ’ਤਿ ਵੁਚ੍ਚਤੀ’’ਤਿ? ‘‘ਯਸ੍ਮਾ ਖੋ, ਆਨਨ੍ਦ, ਸੁਞ੍ਞਂ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ, ਤਸ੍ਮਾ ‘ਸੁਞ੍ਞੋ ਲੋਕੋ’ਤਿ ਵੁਚ੍ਚਤਿ. ਕਿਞ੍ਚਾਨਨ੍ਦ [ਕਿਞ੍ਚ ਆਨਨ੍ਦ ਸਂ. ਨਿ. ੪.੮੫], ਸੁਞ੍ਞਂ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ? ਚਕ੍ਖੁ ਖੋ, ਆਨਨ੍ਦ, ਸੁਞ੍ਞਂ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ. ਰੂਪਾ ਸੁਞ੍ਞਾ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ. ਚਕ੍ਖੁਵਿਞ੍ਞਾਣਂ ਸੁਞ੍ਞਂ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ. ਚਕ੍ਖੁਸਮ੍ਫਸ੍ਸੋ ਸੁਞ੍ਞੋ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ. ਯਮ੍ਪਿਦਂ [ਯਦਿਦਂ (ਕ.) ਸਂ. ਨਿ. ੪.੮੫ ਪਸ੍ਸਿਤਬ੍ਬਾ] ਚਕ੍ਖੁਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ, ਤਮ੍ਪਿ ਸੁਞ੍ਞਂ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ.

‘‘ਸੋਤਂ ਸੁਞ੍ਞਂ…ਪੇ… ਸਦ੍ਦਾ ਸੁਞ੍ਞਾ… ਘਾਨਂ ਸੁਞ੍ਞਂ… ਗਨ੍ਧਾ ਸੁਞ੍ਞਾ… ਜਿਵ੍ਹਾ ਸੁਞ੍ਞਾ… ਰਸਾ ਸੁਞ੍ਞਾ… ਕਾਯੋ ਸੁਞ੍ਞੋ… ਫੋਟ੍ਠਬ੍ਬਾ ਸੁਞ੍ਞਾ… ਮਨੋ ਸੁਞ੍ਞੋ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ. ਧਮ੍ਮਾ ਸੁਞ੍ਞਾ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ. ਮਨੋਵਿਞ੍ਞਾਣਂ ਸੁਞ੍ਞਂ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ. ਮਨੋਸਮ੍ਫਸ੍ਸੋ ਸੁਞ੍ਞੋ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ. ਯਮ੍ਪਿਦਂ ਮਨੋਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ, ਤਮ੍ਪਿ ਸੁਞ੍ਞਂ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ. ਯਸ੍ਮਾ ਖੋ, ਆਨਨ੍ਦ, ਸੁਞ੍ਞਂ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ ਤਸ੍ਮਾ ‘ਸੁਞ੍ਞੋ ਲੋਕੋ’ਤਿ ਵੁਚ੍ਚਤੀ’’ਤਿ.

੧. ਮਾਤਿਕਾ

੪੭. ਸੁਞ੍ਞਸੁਞ੍ਞਂ [ਸੁਞ੍ਞਂ ਸੁਞ੍ਞਂ (ਸ੍ਯਾ.)], ਸਙ੍ਖਾਰਸੁਞ੍ਞਂ, ਵਿਪਰਿਣਾਮਸੁਞ੍ਞਂ, ਅਗ੍ਗਸੁਞ੍ਞਂ, ਲਕ੍ਖਣਸੁਞ੍ਞਂ, ਵਿਕ੍ਖਮ੍ਭਨਸੁਞ੍ਞਂ, ਤਦਙ੍ਗਸੁਞ੍ਞਂ, ਸਮੁਚ੍ਛੇਦਸੁਞ੍ਞਂ, ਪਟਿਪ੍ਪਸ੍ਸਦ੍ਧਿਸੁਞ੍ਞਂ, ਨਿਸ੍ਸਰਣਸੁਞ੍ਞਂ, ਅਜ੍ਝਤ੍ਤਸੁਞ੍ਞਂ, ਬਹਿਦ੍ਧਾਸੁਞ੍ਞਂ, ਦੁਭਤੋਸੁਞ੍ਞਂ, ਸਭਾਗਸੁਞ੍ਞਂ, ਵਿਸਭਾਗਸੁਞ੍ਞਂ, ਏਸਨਾਸੁਞ੍ਞਂ, ਪਰਿਗ੍ਗਹਸੁਞ੍ਞਂ, ਪਟਿਲਾਭਸੁਞ੍ਞਂ, ਪਟਿਵੇਧਸੁਞ੍ਞਂ, ਏਕਤ੍ਤਸੁਞ੍ਞਂ, ਨਾਨਤ੍ਤਸੁਞ੍ਞਂ, ਖਨ੍ਤਿਸੁਞ੍ਞਂ, ਅਧਿਟ੍ਠਾਨਸੁਞ੍ਞਂ, ਪਰਿਯੋਗਾਹਣਸੁਞ੍ਞਂ [ਪਰਿਯੋਗਾਹਨਸੁਞ੍ਞਂ (ਸ੍ਯਾ.)], ਸਮ੍ਪਜਾਨਸ੍ਸ ਪਵਤ੍ਤਪਰਿਯਾਦਾਨਂ ਸਬ੍ਬਸੁਞ੍ਞਤਾਨਂ ਪਰਮਤ੍ਥਸੁਞ੍ਞਂ.

੨. ਨਿਦ੍ਦੇਸੋ

੪੮. ਕਤਮਂ ਸੁਞ੍ਞਸੁਞ੍ਞਂ? ਚਕ੍ਖੁ ਸੁਞ੍ਞਂ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ ਨਿਚ੍ਚੇਨ ਵਾ ਧੁਵੇਨ ਵਾ ਸਸ੍ਸਤੇਨ ਵਾ ਅਵਿਪਰਿਣਾਮਧਮ੍ਮੇਨ ਵਾ. ਸੋਤਂ ਸੁਞ੍ਞਂ…ਪੇ… ਘਾਨਂ ਸੁਞ੍ਞਂ… ਜਿਵ੍ਹਾ ਸੁਞ੍ਞਾ… ਕਾਯੋ ਸੁਞ੍ਞੋ… ਮਨੋ ਸੁਞ੍ਞੋ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ ਨਿਚ੍ਚੇਨ ਵਾ ਧੁਵੇਨ ਵਾ ਸਸ੍ਸਤੇਨ ਵਾ ਅਵਿਪਰਿਣਾਮਧਮ੍ਮੇਨ ਵਾ. ਇਦਂ ਸੁਞ੍ਞਸੁਞ੍ਞਂ.

ਕਤਮਂ ਸਙ੍ਖਾਰਸੁਞ੍ਞਂ? ਤਯੋ ਸਙ੍ਖਾਰਾ – ਪੁਞ੍ਞਾਭਿਸਙ੍ਖਾਰੋ, ਅਪੁਞ੍ਞਾਭਿਸਙ੍ਖਾਰੋ, ਆਨੇਞ੍ਜਾਭਿਸਙ੍ਖਾਰੋ. ਪੁਞ੍ਞਾਭਿਸਙ੍ਖਾਰੋ ਅਪੁਞ੍ਞਾਭਿਸਙ੍ਖਾਰੇਨ ਚ ਆਨੇਞ੍ਜਾਭਿਸਙ੍ਖਾਰੇਨ ਚ ਸੁਞ੍ਞੋ. ਅਪੁਞ੍ਞਾਭਿਸਙ੍ਖਾਰੋ ਪੁਞ੍ਞਾਭਿਸਙ੍ਖਾਰੇਨ ਚ ਆਨੇਞ੍ਜਾਭਿਸਙ੍ਖਾਰੇਨ ਚ ਸੁਞ੍ਞੋ. ਆਨੇਞ੍ਜਾਭਿਸਙ੍ਖਾਰੋ ਪੁਞ੍ਞਾਭਿਸਙ੍ਖਾਰੇਨ ਚ ਅਪੁਞ੍ਞਾਭਿਸਙ੍ਖਾਰੇਨ ਚ ਸੁਞ੍ਞੋ. ਇਮੇ ਤਯੋ ਸਙ੍ਖਾਰਾ.

ਅਪਰੇਪਿ ਤਯੋ ਸਙ੍ਖਾਰਾ – ਕਾਯਸਙ੍ਖਾਰੋ, ਵਚੀਸਙ੍ਖਾਰੋ, ਚਿਤ੍ਤਸਙ੍ਖਾਰੋ. ਕਾਯਸਙ੍ਖਾਰੋ ਵਚੀਸਙ੍ਖਾਰੇਨ ਚ ਚਿਤ੍ਤਸਙ੍ਖਾਰੇਨ ਚ ਸੁਞ੍ਞੋ. ਵਚੀਸਙ੍ਖਾਰੋ ਕਾਯਸਙ੍ਖਾਰੇਨ ਚ ਚਿਤ੍ਤਸਙ੍ਖਾਰੇਨ ਚ ਸੁਞ੍ਞੋ. ਚਿਤ੍ਤਸਙ੍ਖਾਰੋ ਕਾਯਸਙ੍ਖਾਰੇਨ ਚ ਵਚੀਸਙ੍ਖਾਰੇਨ ਚ ਸੁਞ੍ਞੋ. ਇਮੇ ਤਯੋ ਸਙ੍ਖਾਰਾ.

ਅਪਰੇਪਿ ਤਯੋ ਸਙ੍ਖਾਰਾ – ਅਤੀਤਾ ਸਙ੍ਖਾਰਾ, ਅਨਾਗਤਾ ਸਙ੍ਖਾਰਾ, ਪਚ੍ਚੁਪ੍ਪਨ੍ਨਾ ਸਙ੍ਖਾਰਾ. ਅਤੀਤਾ ਸਙ੍ਖਾਰਾ ਅਨਾਗਤੇਹਿ ਚ ਪਚ੍ਚੁਪ੍ਪਨ੍ਨੇਹਿ ਚ ਸਙ੍ਖਾਰੇਹਿ ਸੁਞ੍ਞਾ. ਅਨਾਗਤਾ ਸਙ੍ਖਾਰਾ ਅਤੀਤੇਹਿ ਚ ਪਚ੍ਚੁਪ੍ਪਨ੍ਨੇਹਿ ਚ ਸਙ੍ਖਾਰੇਹਿ ਸੁਞ੍ਞਾ ਪਚ੍ਚੁਪ੍ਪਨ੍ਨਾ ਸਙ੍ਖਾਰਾ ਅਤੀਤੇਹਿ ਚ ਅਨਾਗਤੇਹਿ ਚ ਸਙ੍ਖਾਰੇਹਿ ਸੁਞ੍ਞਾ. ਇਮੇ ਤਯੋ ਸਙ੍ਖਾਰਾ; ਇਦਂ ਸਙ੍ਖਾਰਸੁਞ੍ਞਂ.

ਕਤਮਂ ਵਿਪਰਿਣਾਮਸੁਞ੍ਞਂ? ਜਾਤਂ ਰੂਪਂ ਸਭਾਵੇਨ ਸੁਞ੍ਞਂ. ਵਿਗਤਂ ਰੂਪਂ ਵਿਪਰਿਣਤਞ੍ਚੇਵ ਸੁਞ੍ਞਞ੍ਚ. ਜਾਤਾ ਵੇਦਨਾ ਸਭਾਵੇਨ ਸੁਞ੍ਞਾ. ਵਿਗਤਾ ਵੇਦਨਾ ਵਿਪਰਿਣਤਾ ਚੇਵ ਸੁਞ੍ਞਾ ਚ …ਪੇ… ਜਾਤਾ ਸਞ੍ਞਾ… ਜਾਤਾ ਸਙ੍ਖਾਰਾ… ਜਾਤਂ ਵਿਞ੍ਞਾਣਂ… ਜਾਤਂ ਚਕ੍ਖੁ…ਪੇ… ਜਾਤੋ ਭਵੋ ਸਭਾਵੇਨ ਸੁਞ੍ਞੋ. ਵਿਗਤੋ ਭਵੋ ਵਿਪਰਿਣਤੋ ਚੇਵ ਸੁਞ੍ਞੋ ਚ. ਇਦਂ ਵਿਪਰਿਣਾਮਸੁਞ੍ਞਂ.

ਕਤਮਂ ਅਗ੍ਗਸੁਞ੍ਞਂ? ਅਗ੍ਗਮੇਤਂ ਪਦਂ ਸੇਟ੍ਠਮੇਤਂ ਪਦਂ ਵਿਸਿਟ੍ਠਮੇਤਂ [ਵਿਸੇਟ੍ਠਮੇਤਂ (ਕ.)] ਪਦਂ ਯਦਿਦਂ ਸਬ੍ਬਸਙ੍ਖਾਰਸਮਥੋ ਸਬ੍ਬੂਪਧਿਪਟਿਨਿਸ੍ਸਗ੍ਗੋ ਤਣ੍ਹਕ੍ਖਯੋ ਵਿਰਾਗੋ ਨਿਰੋਧੋ ਨਿਬ੍ਬਾਨਂ. ਇਦਂ ਅਗ੍ਗਸੁਞ੍ਞਂ.

ਕਤਮਂ ਲਕ੍ਖਣਸੁਞ੍ਞਂ? ਦ੍ਵੇ ਲਕ੍ਖਣਾਨਿ – ਬਾਲਲਕ੍ਖਣਞ੍ਚ ਪਣ੍ਡਿਤਲਕ੍ਖਣਞ੍ਚ. ਬਾਲਲਕ੍ਖਣਂ ਪਣ੍ਡਿਤਲਕ੍ਖਣੇਨ ਸੁਞ੍ਞਂ. ਪਣ੍ਡਿਤਲਕ੍ਖਣਂ ਬਾਲਲਕ੍ਖਣੇਨ ਸੁਞ੍ਞਂ. ਤੀਣਿ ਲਕ੍ਖਣਾਨਿ – ਉਪ੍ਪਾਦਲਕ੍ਖਣਂ, ਵਯਲਕ੍ਖਣਂ, ਠਿਤਞ੍ਞਥਤ੍ਤਲਕ੍ਖਣਂ. ਉਪ੍ਪਾਦਲਕ੍ਖਣਂ ਵਯਲਕ੍ਖਣੇਨ ਚ ਠਿਤਞ੍ਞਥਤ੍ਤਲਕ੍ਖਣੇਨ ਚ ਸੁਞ੍ਞਂ. ਵਯਲਕ੍ਖਣਂ ਉਪ੍ਪਾਦਲਕ੍ਖਣੇਨ ਚ ਠਿਤਞ੍ਞਥਤ੍ਤਲਕ੍ਖਣੇਨ ਚ ਸੁਞ੍ਞਂ, ਠਿਤਞ੍ਞਥਤ੍ਤਲਕ੍ਖਣਂ ਉਪ੍ਪਾਦਲਕ੍ਖਣੇਨ ਚ ਵਯਲਕ੍ਖਣੇਨ ਚ ਸੁਞ੍ਞਂ.

ਰੂਪਸ੍ਸ ਉਪ੍ਪਾਦਲਕ੍ਖਣਂ ਵਯਲਕ੍ਖਣੇਨ ਚ ਠਿਤਞ੍ਞਥਤ੍ਤਲਕ੍ਖਣੇਨ ਚ ਸੁਞ੍ਞਂ. ਰੂਪਸ੍ਸ ਵਯਲਕ੍ਖਣਂ ਉਪ੍ਪਾਦਲਕ੍ਖਣੇਨ ਚ ਠਿਤਞ੍ਞਥਤ੍ਤਲਕ੍ਖਣੇਨ ਚ ਸੁਞ੍ਞਂ. ਰੂਪਸ੍ਸ ਠਿਤਞ੍ਞਥਤ੍ਤਲਕ੍ਖਣਂ ਉਪ੍ਪਾਦਲਕ੍ਖਣੇਨ ਚ ਵਯਲਕ੍ਖਣੇਨ ਚ ਸੁਞ੍ਞਂ. ਵੇਦਨਾਯ…ਪੇ… ਸਞ੍ਞਾਯ… ਸਙ੍ਖਾਰਾਨਂ… ਵਿਞ੍ਞਾਣਸ੍ਸ… ਚਕ੍ਖੁਸ੍ਸ… ਜਰਾਮਰਣਸ੍ਸ ਉਪ੍ਪਾਦਲਕ੍ਖਣਂ ਵਯਲਕ੍ਖਣੇਨ ਚ ਠਿਤਞ੍ਞਥਤ੍ਤਲਕ੍ਖਣੇਨ ਚ ਸੁਞ੍ਞਂ. ਜਰਾਮਰਣਸ੍ਸ ਵਯਲਕ੍ਖਣਂ ਉਪ੍ਪਾਦਲਕ੍ਖਣੇਨ ਚ ਠਿਤਞ੍ਞਥਤ੍ਤਲਕ੍ਖਣੇਨ ਚ ਸੁਞ੍ਞਂ. ਜਰਾਮਰਣਸ੍ਸ ਠਿਤਞ੍ਞਥਤ੍ਤਲਕ੍ਖਣਂ ਉਪ੍ਪਾਦਲਕ੍ਖਣੇਨ ਚ ਵਯਲਕ੍ਖਣੇਨ ਚ ਸੁਞ੍ਞਂ. ਇਦਂ ਲਕ੍ਖਣਸੁਞ੍ਞਂ.

ਕਤਮਂ ਵਿਕ੍ਖਮ੍ਭਨਸੁਞ੍ਞਂ? ਨੇਕ੍ਖਮ੍ਮੇਨ ਕਾਮਚ੍ਛਨ੍ਦੋ ਵਿਕ੍ਖਮ੍ਭਿਤੋ ਚੇਵ ਸੁਞ੍ਞੋ ਚ. ਅਬ੍ਯਾਪਾਦੇਨ ਬ੍ਯਾਪਾਦੋ ਵਿਕ੍ਖਮ੍ਭਿਤੋ ਚੇਵ ਸੁਞ੍ਞੋ ਚ. ਆਲੋਕਸਞ੍ਞਾਯ ਥਿਨਮਿਦ੍ਧਂ ਵਿਕ੍ਖਮ੍ਭਿਤਞ੍ਚੇਵ ਸੁਞ੍ਞਞ੍ਚ. ਅਵਿਕ੍ਖੇਪੇਨ ਉਦ੍ਧਚ੍ਚਂ ਵਿਕ੍ਖਮ੍ਭਿਤਞ੍ਚੇਵ ਸੁਞ੍ਞਞ੍ਚ. ਧਮ੍ਮਵਵਤ੍ਥਾਨੇਨ ਵਿਚਿਕਿਚ੍ਛਾ ਵਿਕ੍ਖਮ੍ਭਿਤਾ ਚੇਵ ਸੁਞ੍ਞਾ ਚ. ਞਾਣੇਨ ਅਵਿਜ੍ਜਾ ਵਿਕ੍ਖਮ੍ਭਿਤਾ ਚੇਵ ਸੁਞ੍ਞਾ ਚ. ਪਾਮੋਜ੍ਜੇਨ ਅਰਤਿ ਵਿਕ੍ਖਮ੍ਭਿਤਾ ਚੇਵ ਸੁਞ੍ਞਾ ਚ. ਪਠਮੇਨ ਝਾਨੇਨ ਨੀਵਰਣਾ ਵਿਕ੍ਖਮ੍ਭਿਤਾ ਚੇਵ ਸੁਞ੍ਞਾ ਚ…ਪੇ… ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸਾ ਵਿਕ੍ਖਮ੍ਭਿਤਾ ਚੇਵ ਸੁਞ੍ਞਾ ਚ. ਇਦਂ ਵਿਕ੍ਖਮ੍ਭਨਸੁਞ੍ਞਂ.

ਕਤਮਂ ਤਦਙ੍ਗਸੁਞ੍ਞਂ? ਨੇਕ੍ਖਮ੍ਮੇਨ ਕਾਮਚ੍ਛਨ੍ਦੋ ਤਦਙ੍ਗਸੁਞ੍ਞੋ. ਅਬ੍ਯਾਪਾਦੇਨ ਬ੍ਯਾਪਾਦੋ ਤਦਙ੍ਗਸੁਞ੍ਞੋ. ਆਲੋਕਸਞ੍ਞਾਯ ਥਿਨਮਿਦ੍ਧਂ ਤਦਙ੍ਗਸੁਞ੍ਞਂ. ਅਵਿਕ੍ਖੇਪੇਨ ਉਦ੍ਧਚ੍ਚਂ ਤਦਙ੍ਗਸੁਞ੍ਞਂ. ਧਮ੍ਮਵਵਤ੍ਥਾਨੇਨ ਵਿਚਿਕਿਚ੍ਛਾ ਤਦਙ੍ਗਸੁਞ੍ਞਾ. ਞਾਣੇਨ ਅਵਿਜ੍ਜਾ ਤਦਙ੍ਗਸੁਞ੍ਞਾ. ਪਾਮੋਜ੍ਜੇਨ ਅਰਤਿ ਤਦਙ੍ਗਸੁਞ੍ਞਾ. ਪਠਮੇਨ ਝਾਨੇਨ ਨੀਵਰਣਾ ਤਦਙ੍ਗਸੁਞ੍ਞਾ…ਪੇ… ਵਿਵਟ੍ਟਨਾਨੁਪਸ੍ਸਨਾਯ ਸਞ੍ਞੋਗਾਭਿਨਿਵੇਸੋ ਤਦਙ੍ਗਸੁਞ੍ਞੋ. ਇਦਂ ਤਦਙ੍ਗਸੁਞ੍ਞਂ.

ਕਤਮਂ ਸਮੁਚ੍ਛੇਦਸੁਞ੍ਞਂ? ਨੇਕ੍ਖਮ੍ਮੇਨ ਕਾਮਚ੍ਛਨ੍ਦੋ ਸਮੁਚ੍ਛਿਨ੍ਨੋ ਚੇਵ ਸੁਞ੍ਞੋ ਚ. ਅਬ੍ਯਾਪਾਦੇਨ ਬ੍ਯਾਪਾਦੋ ਸਮੁਚ੍ਛਿਨ੍ਨੋ ਚੇਵ ਸੁਞ੍ਞੋ ਚ. ਆਲੋਕਸਞ੍ਞਾਯ ਥਿਨਮਿਦ੍ਧਂ ਸਮੁਚ੍ਛਿਨ੍ਨਞ੍ਚੇਵ ਸੁਞ੍ਞਞ੍ਚ. ਅਵਿਕ੍ਖੇਪੇਨ ਉਦ੍ਧਚ੍ਚਂ ਸਮੁਚ੍ਛਿਨ੍ਨਞ੍ਚੇਵ ਸੁਞ੍ਞਞ੍ਚ. ਧਮ੍ਮਵਵਤ੍ਥਾਨੇਨ ਵਿਚਿਕਿਚ੍ਛਾ ਸਮੁਚ੍ਛਿਨ੍ਨਾ ਚੇਵ ਸੁਞ੍ਞਾ ਚ. ਞਾਣੇਨ ਅਵਿਜ੍ਜਾ ਸਮੁਚ੍ਛਿਨ੍ਨਾ ਚੇਵ ਸੁਞ੍ਞਾ ਚ. ਪਾਮੋਜ੍ਜੇਨ ਅਰਤਿ ਸਮੁਚ੍ਛਿਨ੍ਨਾ ਚੇਵ ਸੁਞ੍ਞਾ ਚ. ਪਠਮੇਨ ਝਾਨੇਨ ਨੀਵਰਣਾ ਸਮੁਚ੍ਛਿਨ੍ਨਾ ਚੇਵ ਸੁਞ੍ਞਾ ਚ…ਪੇ… ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸਾ ਸਮੁਚ੍ਛਿਨ੍ਨਾ ਚੇਵ ਸੁਞ੍ਞਾ ਚ. ਇਦਂ ਸਮੁਚ੍ਛੇਦਸੁਞ੍ਞਂ.

ਕਤਮਂ ਪਟਿਪ੍ਪਸ੍ਸਦ੍ਧਿਸੁਞ੍ਞਂ? ਨੇਕ੍ਖਮ੍ਮੇਨ ਕਾਮਚ੍ਛਨ੍ਦੋ ਪਟਿਪ੍ਪਸ੍ਸਦ੍ਧੋ ਚੇਵ ਸੁਞ੍ਞੋ ਚ. ਅਬ੍ਯਾਪਾਦੇਨ ਬ੍ਯਾਪਾਦੋ ਪਟਿਪ੍ਪਸ੍ਸਦ੍ਧੋ ਚੇਵ ਸੁਞ੍ਞੋ ਚ. ਆਲੋਕਸਞ੍ਞਾਯ ਥਿਨਮਿਦ੍ਧਂ ਪਟਿਪ੍ਪਸ੍ਸਦ੍ਧਞ੍ਚੇਵ ਸੁਞ੍ਞਞ੍ਚ. ਅਵਿਕ੍ਖੇਪੇਨ ਉਦ੍ਧਚ੍ਚਂ ਪਟਿਪ੍ਪਸ੍ਸਦ੍ਧਞ੍ਚੇਵ ਸੁਞ੍ਞਞ੍ਚ. ਧਮ੍ਮਵਵਤ੍ਥਾਨੇਨ ਵਿਚਿਕਿਚ੍ਛਾ ਪਟਿਪ੍ਪਸ੍ਸਦ੍ਧਾ ਚੇਵ ਸੁਞ੍ਞਾ ਚ. ਞਾਣੇਨ ਅਵਿਜ੍ਜਾ ਪਟਿਪ੍ਪਸ੍ਸਦ੍ਧਾ ਚੇਵ ਸੁਞ੍ਞਾ ਚ. ਪਾਮੋਜ੍ਜੇਨ ਅਰਤਿ ਪਟਿਪ੍ਪਸ੍ਸਦ੍ਧਾ ਚੇਵ ਸੁਞ੍ਞਾ ਚ. ਪਠਮੇਨ ਝਾਨੇਨ ਨੀਵਰਣਾ ਪਟਿਪ੍ਪਸ੍ਸਦ੍ਧਾ ਚੇਵ ਸੁਞ੍ਞਾ ਚ…ਪੇ… ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸਾ ਪਟਿਪ੍ਪਸ੍ਸਦ੍ਧਾ ਚੇਵ ਸੁਞ੍ਞਾ ਚ. ਇਦਂ ਪਟਿਪ੍ਪਸ੍ਸਦ੍ਧਿਸੁਞ੍ਞਂ.

ਕਤਮਂ ਨਿਸ੍ਸਰਣਸੁਞ੍ਞਂ? ਨੇਕ੍ਖਮ੍ਮੇਨ ਕਾਮਚ੍ਛਨ੍ਦੋ ਨਿਸ੍ਸਟੋ ਚੇਵ ਸੁਞ੍ਞੋ ਚ. ਅਬ੍ਯਾਪਾਦੇਨ ਬ੍ਯਾਪਾਦੋ ਨਿਸ੍ਸਟੋ ਚੇਵ ਸੁਞ੍ਞੋ ਚ. ਆਲੋਕਸਞ੍ਞਾਯ ਥਿਨਮਿਦ੍ਧਂ ਨਿਸ੍ਸਟਞ੍ਚੇਵ ਸੁਞ੍ਞਞ੍ਚ. ਅਵਿਕ੍ਖੇਪੇਨ ਉਦ੍ਧਚ੍ਚਂ ਨਿਸ੍ਸਟਞ੍ਚੇਵ ਸੁਞ੍ਞਞ੍ਚ. ਧਮ੍ਮਵਵਤ੍ਥਾਨੇਨ ਵਿਚਿਕਿਚ੍ਛਾ ਨਿਸ੍ਸਟਾ ਚੇਵ ਸੁਞ੍ਞਾ ਚ. ਞਾਣੇਨ ਅਵਿਜ੍ਜਾ ਨਿਸ੍ਸਟਾ ਚੇਵ ਸੁਞ੍ਞਾ ਚ. ਪਾਮੋਜ੍ਜੇਨ ਅਰਤਿ ਨਿਸ੍ਸਟਾ ਚੇਵ ਸੁਞ੍ਞਾ ਚ. ਪਠਮੇਨ ਝਾਨੇਨ ਨੀਵਰਣਾ ਨਿਸ੍ਸਟਾ ਚੇਵ ਸੁਞ੍ਞਾ ਚ …ਪੇ… ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸਾ ਨਿਸ੍ਸਟਾ ਚੇਵ ਸੁਞ੍ਞਾ ਚ. ਇਦਂ ਨਿਸ੍ਸਰਣਸੁਞ੍ਞਂ.

ਕਤਮਂ ਅਜ੍ਝਤ੍ਤਸੁਞ੍ਞਂ? ਅਜ੍ਝਤ੍ਤਂ ਚਕ੍ਖੁਂ ਸੁਞ੍ਞਂ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ ਨਿਚ੍ਚੇਨ ਵਾ ਧੁਵੇਨ ਵਾ ਸਸ੍ਸਤੇਨ ਵਾ ਅਵਿਪਰਿਣਾਮਧਮ੍ਮੇਨ ਵਾ. ਅਜ੍ਝਤ੍ਤਂ ਸੋਤਂ ਸੁਞ੍ਞਂ… ਅਜ੍ਝਤ੍ਤਂ ਘਾਨਂ ਸੁਞ੍ਞਂ… ਅਜ੍ਝਤ੍ਤਂ ਜਿਵ੍ਹਾ ਸੁਞ੍ਞਾ… ਅਜ੍ਝਤ੍ਤਂ ਕਾਯੋ ਸੁਞ੍ਞੋ… ਅਜ੍ਝਤ੍ਤਂ ਮਨੋ ਸੁਞ੍ਞੋ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ ਨਿਚ੍ਚੇਨ ਵਾ ਧੁਵੇਨ ਵਾ ਸਸ੍ਸਤੇਨ ਵਾ ਅਵਿਪਰਿਣਾਮਧਮ੍ਮੇਨ ਵਾ. ਇਦਂ ਅਜ੍ਝਤ੍ਤਸੁਞ੍ਞਂ.

ਕਤਮਂ ਬਹਿਦ੍ਧਾਸੁਞ੍ਞਂ? ਬਹਿਦ੍ਧਾ ਰੂਪਾ ਸੁਞ੍ਞਾ…ਪੇ… ਬਹਿਦ੍ਧਾ ਧਮ੍ਮਾ ਸੁਞ੍ਞਾ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ ਨਿਚ੍ਚੇਨ ਵਾ ਧੁਵੇਨ ਵਾ ਸਸ੍ਸਤੇਨ ਵਾ ਅਵਿਪਰਿਣਾਮਧਮ੍ਮੇਨ ਵਾ. ਇਦਂ ਬਹਿਦ੍ਧਾਸੁਞ੍ਞਂ.

ਕਤਮਂ ਦੁਭਤੋਸੁਞ੍ਞਂ? ਯਞ੍ਚ ਅਜ੍ਝਤ੍ਤਂ ਚਕ੍ਖੁ ਯੇ ਚ ਬਹਿਦ੍ਧਾ ਰੂਪਾ ਉਭਯਮੇਤਂ ਸੁਞ੍ਞਂ [ਉਭਯਤੋ ਤਂ ਸੁਞ੍ਞਾ (ਸ੍ਯਾ.)] ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ ਨਿਚ੍ਚੇਨ ਵਾ ਧੁਵੇਨ ਵਾ ਸਸ੍ਸਤੇਨ ਵਾ ਅਵਿਪਰਿਣਾਮਧਮ੍ਮੇਨ ਵਾ. ਯਞ੍ਚ ਅਜ੍ਝਤ੍ਤਂ ਸੋਤਂ ਯੇ ਚ ਬਹਿਦ੍ਧਾ ਸਦ੍ਦਾ…ਪੇ… ਯਞ੍ਚ ਅਜ੍ਝਤ੍ਤਂ ਘਾਨਂ ਯੇ ਚ ਬਹਿਦ੍ਧਾ ਗਨ੍ਧਾ… ਯਾ ਚ ਅਜ੍ਝਤ੍ਤਂ ਜਿਵ੍ਹਾ ਯੇ ਚ ਬਹਿਦ੍ਧਾ ਰਸਾ… ਯੋ ਚ ਅਜ੍ਝਤ੍ਤਂ ਕਾਯੋ ਯੇ ਚ ਬਹਿਦ੍ਧਾ ਫੋਟ੍ਠਬ੍ਬਾ… ਯੋ ਚ ਅਜ੍ਝਤ੍ਤਂ ਮਨੋ ਯੇ ਚ ਬਹਿਦ੍ਧਾ ਧਮ੍ਮਾ ਉਭਯਮੇਤਂ ਸੁਞ੍ਞਂ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ ਨਿਚ੍ਚੇਨ ਵਾ ਧੁਵੇਨ ਵਾ ਸਸ੍ਸਤੇਨ ਵਾ ਅਵਿਪਰਿਣਾਮਧਮ੍ਮੇਨ ਵਾ. ਇਦਂ ਦੁਭਤੋਸੁਞ੍ਞਂ.

ਕਤਮਂ ਸਭਾਗਸੁਞ੍ਞਂ? ਛ ਅਜ੍ਝਤ੍ਤਿਕਾਨਿ ਆਯਤਨਾਨਿ ਸਭਾਗਾਨਿ ਚੇਵ ਸੁਞ੍ਞਾਨਿ ਚ. ਛ ਬਾਹਿਰਾਨਿ ਆਯਤਨਾਨਿ ਸਭਾਗਾਨਿ ਚੇਵ ਸੁਞ੍ਞਾਨਿ ਚ. ਛ ਵਿਞ੍ਞਾਣਕਾਯਾ ਸਭਾਗਾ ਚੇਵ ਸੁਞ੍ਞਾ ਚ. ਛ ਫਸ੍ਸਕਾਯਾ ਸਭਾਗਾ ਚੇਵ ਸੁਞ੍ਞਾ ਚ. ਛ ਵੇਦਨਾਕਾਯਾ ਸਭਾਗਾ ਚੇਵ ਸੁਞ੍ਞਾ ਚ. ਛ ਸਞ੍ਞਾਕਾਯਾ ਸਭਾਗਾ ਚੇਵ ਸੁਞ੍ਞਾ ਚ. ਛ ਚੇਤਨਾਕਾਯਾ ਸਭਾਗਾ ਚੇਵ ਸੁਞ੍ਞਾ ਚ. ਇਦਂ ਸਭਾਗਸੁਞ੍ਞਂ.

ਕਤਮਂ ਵਿਸਭਾਗਸੁਞ੍ਞਂ? ਛ ਅਜ੍ਝਤ੍ਤਿਕਾਨਿ ਆਯਤਨਾਨਿ ਛਹਿ ਬਾਹਿਰੇਹਿ ਆਯਤਨੇਹਿ ਵਿਸਭਾਗਾਨਿ ਚੇਵ ਸੁਞ੍ਞਾਨਿ ਚ. ਛ ਬਾਹਿਰਾਨਿ ਆਯਤਨਾਨਿ ਛਹਿ ਵਿਞ੍ਞਾਣਕਾਯੇਹਿ ਵਿਸਭਾਗਾਨਿ ਚੇਵ ਸੁਞ੍ਞਾਨਿ ਚ. ਛ ਵਿਞ੍ਞਾਣਕਾਯਾ ਛਹਿ ਫਸ੍ਸਕਾਯੇਹਿ ਵਿਸਭਾਗਾ ਚੇਵ ਸੁਞ੍ਞਾ ਚ. ਛ ਫਸ੍ਸਕਾਯਾ ਛਹਿ ਵੇਦਨਾਕਾਯੇਹਿ ਵਿਸਭਾਗਾ ਚੇਵ ਸੁਞ੍ਞਾ ਚ. ਛ ਵੇਦਨਾਕਾਯਾ ਛਹਿ ਸਞ੍ਞਾਕਾਯੇਹਿ ਵਿਸਭਾਗਾ ਚੇਵ ਸੁਞ੍ਞਾ ਚ. ਛ ਸਞ੍ਞਾਕਾਯਾ ਛਹਿ ਚੇਤਨਾਕਾਯੇਹਿ ਵਿਸਭਾਗਾ ਚੇਵ ਸੁਞ੍ਞਾ ਚ. ਇਦਂ ਵਿਸਭਾਗਸੁਞ੍ਞਂ.

ਕਤਮਂ ਏਸਨਾਸੁਞ੍ਞਂ? ਨੇਕ੍ਖਮ੍ਮੇਸਨਾ ਕਾਮਚ੍ਛਨ੍ਦੇਨ ਸੁਞ੍ਞਾ. ਅਬ੍ਯਾਪਾਦੇਸਨਾ ਬ੍ਯਾਪਾਦੇਨ ਸੁਞ੍ਞਾ. ਆਲੋਕਸਞ੍ਞੇਸਨਾ ਥਿਨਮਿਦ੍ਧੇਨ ਸੁਞ੍ਞਾ. ਅਵਿਕ੍ਖੇਪੇਸਨਾ ਉਦ੍ਧਚ੍ਚੇਨ ਸੁਞ੍ਞਾ. ਧਮ੍ਮਵਵਤ੍ਥਾਨੇਸਨਾ ਵਿਚਿਕਿਚ੍ਛਾਯ ਸੁਞ੍ਞਾ. ਞਾਣੇਸਨਾ ਅਵਿਜ੍ਜਾਯ ਸੁਞ੍ਞਾ. ਪਾਮੋਜ੍ਜੇਸਨਾ ਅਰਤਿਯਾ ਸੁਞ੍ਞਾ. ਪਠਮਜ੍ਝਾਨੇਸਨਾ ਨੀਵਰਣੇਹਿ ਸੁਞ੍ਞਾ…ਪੇ… ਅਰਹਤ੍ਤਮਗ੍ਗੇਸਨਾ ਸਬ੍ਬਕਿਲੇਸੇਹਿ ਸੁਞ੍ਞਾ. ਇਦਂ ਏਸਨਾਸੁਞ੍ਞਂ.

ਕਤਮਂ ਪਰਿਗ੍ਗਹਸੁਞ੍ਞਂ? ਨੇਕ੍ਖਮ੍ਮਪਰਿਗ੍ਗਹੋ ਕਾਮਚ੍ਛਨ੍ਦੇਨ ਸੁਞ੍ਞੋ. ਅਬ੍ਯਾਪਾਦਪਰਿਗ੍ਗਹੋ ਬ੍ਯਾਪਾਦੇਨ ਸੁਞ੍ਞੋ. ਆਲੋਕਸਞ੍ਞਾਪਰਿਗ੍ਗਹੋ ਥਿਨਮਿਦ੍ਧੇਨ ਸੁਞ੍ਞੋ. ਅਵਿਕ੍ਖੇਪਪਰਿਗ੍ਗਹੋ ਉਦ੍ਧਚ੍ਚੇਨ ਸੁਞ੍ਞੋ. ਧਮ੍ਮਵਵਤ੍ਥਾਨਪਰਿਗ੍ਗਹੋ ਵਿਚਿਕਿਚ੍ਛਾਯ ਸੁਞ੍ਞੋ. ਞਾਣਪਰਿਗ੍ਗਹੋ ਅਵਿਜ੍ਜਾਯ ਸੁਞ੍ਞੋ. ਪਾਮੋਜ੍ਜਪਰਿਗ੍ਗਹੋ ਅਰਤਿਯਾ ਸੁਞ੍ਞੋ. ਪਠਮਜ੍ਝਾਨਪਰਿਗ੍ਗਹੋ ਨੀਵਰਣੇਹਿ ਸੁਞ੍ਞੋ…ਪੇ… ਅਰਹਤ੍ਤਮਗ੍ਗਪਰਿਗ੍ਗਹੋ ਸਬ੍ਬਕਿਲੇਸੇਹਿ ਸੁਞ੍ਞੋ. ਇਦਂ ਪਰਿਗ੍ਗਹਸੁਞ੍ਞਂ.

ਕਤਮਂ ਪਟਿਲਾਭਸੁਞ੍ਞਂ? ਨੇਕ੍ਖਮ੍ਮਪਟਿਲਾਭੋ ਕਾਮਚ੍ਛਨ੍ਦੇਨ ਸੁਞ੍ਞੋ. ਅਬ੍ਯਾਪਾਦਪਟਿਲਾਭੋ ਬ੍ਯਾਪਾਦੇਨ ਸੁਞ੍ਞੋ. ਆਲੋਕਸਞ੍ਞਾਪਟਿਲਾਭੋ ਥਿਨਮਿਦ੍ਧੇਨ ਸੁਞ੍ਞੋ. ਅਵਿਕ੍ਖੇਪਪਟਿਲਾਭੋ ਉਦ੍ਧਚ੍ਚੇਨ ਸੁਞ੍ਞੋ. ਧਮ੍ਮਵਵਤ੍ਥਾਨਪਟਿਲਾਭੋ ਵਿਚਿਕਿਚ੍ਛਾਯ ਸੁਞ੍ਞੋ. ਞਾਣਪਟਿਲਾਭੋ ਅਵਿਜ੍ਜਾਯ ਸੁਞ੍ਞੋ. ਪਾਮੋਜ੍ਜਪਟਿਲਾਭੋ ਅਰਤਿਯਾ ਸੁਞ੍ਞੋ. ਪਠਮਜ੍ਝਾਨਪਟਿਲਾਭੋ ਨੀਵਰਣੇਹਿ ਸੁਞ੍ਞੋ…ਪੇ… ਅਰਹਤ੍ਤਮਗ੍ਗਪਟਿਲਾਭੋ ਸਬ੍ਬਕਿਲੇਸੇਹਿ ਸੁਞ੍ਞੋ. ਇਦਂ ਪਟਿਲਾਭਸੁਞ੍ਞਂ.

ਕਤਮਂ ਪਟਿਵੇਧਸੁਞ੍ਞਂ? ਨੇਕ੍ਖਮ੍ਮਪ੍ਪਟਿਵੇਧੋ ਕਾਮਚ੍ਛਨ੍ਦੇਨ ਸੁਞ੍ਞੋ. ਅਬ੍ਯਾਪਾਦਪ੍ਪਟਿਵੇਧੋ ਬ੍ਯਾਪਾਦੇਨ ਸੁਞ੍ਞੋ. ਆਲੋਕਸਞ੍ਞਾਪ੍ਪਟਿਵੇਧੋ ਥਿਨਮਿਦ੍ਧੇਨ ਸੁਞ੍ਞੋ. ਅਵਿਕ੍ਖੇਪਪ੍ਪਟਿਵੇਧੋ ਉਦ੍ਧਚ੍ਚੇਨ ਸੁਞ੍ਞੋ. ਧਮ੍ਮਵਵਤ੍ਥਾਨਪ੍ਪਟਿਵੇਧੋ ਵਿਚਿਕਿਚ੍ਛਾਯ ਸੁਞ੍ਞੋ. ਞਾਣਪ੍ਪਟਿਵੇਧੋ ਅਵਿਜ੍ਜਾਯ ਸੁਞ੍ਞੋ. ਪਾਮੋਜ੍ਜਪ੍ਪਟਿਵੇਧੋ ਅਰਤਿਯਾ ਸੁਞ੍ਞੋ. ਪਠਮਜ੍ਝਾਨਪ੍ਪਟਿਵੇਧੋ ਨੀਵਰਣੇਹਿ ਸੁਞ੍ਞੋ…ਪੇ… ਅਰਹਤ੍ਤਮਗ੍ਗਪ੍ਪਟਿਵੇਧੋ ਸਬ੍ਬਕਿਲੇਸੇਹਿ ਸੁਞ੍ਞੋ. ਇਦਂ ਪਟਿਵੇਧਸੁਞ੍ਞਂ.

ਕਤਮਂ ਏਕਤ੍ਤਸੁਞ੍ਞਂ, ਨਾਨਤ੍ਤਸੁਞ੍ਞਂ? ਕਾਮਚ੍ਛਨ੍ਦੋ ਨਾਨਤ੍ਤਂ, ਨੇਕ੍ਖਮ੍ਮਂ ਏਕਤ੍ਤਂ. ਨੇਕ੍ਖਮ੍ਮੇਕਤ੍ਤਂ ਚੇਤਯਤੋ ਕਾਮਚ੍ਛਨ੍ਦੇਨ ਸੁਞ੍ਞਂ. ਬ੍ਯਾਪਾਦੋ ਨਾਨਤ੍ਤਂ, ਅਬ੍ਯਾਪਾਦੋ ਏਕਤ੍ਤਂ. ਅਬ੍ਯਾਪਾਦੇਕਤ੍ਤਂ ਚੇਤਯਤੋ ਬ੍ਯਾਪਾਦੇਨ ਸੁਞ੍ਞਂ. ਥਿਨਮਿਦ੍ਧਂ ਨਾਨਤ੍ਤਂ, ਆਲੋਕਸਞ੍ਞਾ ਏਕਤ੍ਤਂ. ਆਲੋਕਸਞ੍ਞੇਕਤ੍ਤਂ ਚੇਤਯਤੋ ਥਿਨਮਿਦ੍ਧੇਨ ਸੁਞ੍ਞਂ. ਉਦ੍ਧਚ੍ਚਂ ਨਾਨਤ੍ਤਂ, ਅਵਿਕ੍ਖੇਪੋ ਏਕਤ੍ਤਂ. ਅਵਿਕ੍ਖੇਪੇਕਤ੍ਤਂ ਚੇਤਯਤੋ ਉਦ੍ਧਚ੍ਚੇਨ ਸੁਞ੍ਞਂ. ਵਿਚਿਕਿਚ੍ਛਾ ਨਾਨਤ੍ਤਂ, ਧਮ੍ਮਵਵਤ੍ਥਾਨਂ ਏਕਤ੍ਤਂ. ਧਮ੍ਮਵਵਤ੍ਥਾਨੇਕਤ੍ਤਂ ਚੇਤਯਤੋ ਵਿਚਿਕਿਚ੍ਛਾਯ ਸੁਞ੍ਞਂ. ਅਵਿਜ੍ਜਾ ਨਾਨਤ੍ਤਂ, ਞਾਣਂ ਏਕਤ੍ਤਂ. ਞਾਣੇਕਤ੍ਤਂ ਚੇਤਯਤੋ ਅਵਿਜ੍ਜਾਯ ਸੁਞ੍ਞਂ. ਅਰਤਿ ਨਾਨਤ੍ਤਂ, ਪਾਮੋਜ੍ਜਂ ਏਕਤ੍ਤਂ. ਪਾਮੋਜ੍ਜੇਕਤ੍ਤਂ ਚੇਤਯਤੋ ਅਰਤਿਯਾ ਸੁਞ੍ਞਂ. ਨੀਵਰਣਾ ਨਾਨਤ੍ਤਂ, ਪਠਮਜ੍ਝਾਨਂ ਏਕਤ੍ਤਂ. ਪਠਮਜ੍ਝਾਨੇਕਤ੍ਤਂ ਚੇਤਯਤੋ ਨੀਵਰਣੇਹਿ ਸੁਞ੍ਞਂ…ਪੇ… ਸਬ੍ਬਕਿਲੇਸਾ ਨਾਨਤ੍ਤਂ, ਅਰਹਤ੍ਤਮਗ੍ਗੋ ਏਕਤ੍ਤਂ. ਅਰਹਤ੍ਤਮਗ੍ਗੇਕਤ੍ਤਂ ਚੇਤਯਤੋ ਸਬ੍ਬਕਿਲੇਸੇਹਿ ਸੁਞ੍ਞਂ. ਇਦਂ ਏਕਤ੍ਤਸੁਞ੍ਞਂ ਨਾਨਤ੍ਤਸੁਞ੍ਞਂ.

ਕਤਮਂ ਖਨ੍ਤਿਸੁਞ੍ਞਂ? ਨੇਕ੍ਖਮ੍ਮਖਨ੍ਤਿ ਕਾਮਚ੍ਛਨ੍ਦੇਨ ਸੁਞ੍ਞਾ. ਅਬ੍ਯਾਪਾਦਖਨ੍ਤਿ ਬ੍ਯਾਪਾਦੇਨ ਸੁਞ੍ਞਾ. ਆਲੋਕਸਞ੍ਞਾਖਨ੍ਤਿ ਥਿਨਮਿਦ੍ਧੇਨ ਸੁਞ੍ਞਾ. ਅਵਿਕ੍ਖੇਪਖਨ੍ਤਿ ਉਦ੍ਧਚ੍ਚੇਨ ਸੁਞ੍ਞਾ. ਧਮ੍ਮਵਵਤ੍ਥਾਨਖਨ੍ਤਿ ਵਿਚਿਕਿਚ੍ਛਾਯ ਸੁਞ੍ਞਾ. ਞਾਣਖਨ੍ਤਿ ਅਵਿਜ੍ਜਾਯ ਸੁਞ੍ਞਾ. ਪਾਮੋਜ੍ਜਖਨ੍ਤਿ ਅਰਤਿਯਾ ਸੁਞ੍ਞਾ. ਪਠਮਜ੍ਝਾਨਖਨ੍ਤਿ ਨੀਵਰਣੇਹਿ ਸੁਞ੍ਞਾ…ਪੇ… ਅਰਹਤ੍ਤਮਗ੍ਗਖਨ੍ਤਿ ਸਬ੍ਬਕਿਲੇਸੇਹਿ ਸੁਞ੍ਞਾ. ਇਦਂ ਖਨ੍ਤਿਸੁਞ੍ਞਂ.

ਕਤਮਂ ਅਧਿਟ੍ਠਾਨਸੁਞ੍ਞਂ? ਨੇਕ੍ਖਮ੍ਮਾਧਿਟ੍ਠਾਨਂ ਕਾਮਚ੍ਛਨ੍ਦੇਨ ਸੁਞ੍ਞਂ. ਅਬ੍ਯਾਪਾਦਾਧਿਟ੍ਠਾਨਂ ਬ੍ਯਾਪਾਦੇਨ ਸੁਞ੍ਞਂ. ਆਲੋਕਸਞ੍ਞਾਧਿਟ੍ਠਾਨਂ ਥਿਨਮਿਦ੍ਧੇਨ ਸੁਞ੍ਞਂ. ਅਵਿਕ੍ਖੇਪਾਧਿਟ੍ਠਾਨਂ ਉਦ੍ਧਚ੍ਚੇਨ ਸੁਞ੍ਞਂ. ਧਮ੍ਮਵਵਤ੍ਥਾਨਾਧਿਟ੍ਠਾਨਂ ਵਿਚਿਕਿਚ੍ਛਾਯ ਸੁਞ੍ਞਂ. ਞਾਣਾਧਿਟ੍ਠਾਨਂ ਅਵਿਜ੍ਜਾਯ ਸੁਞ੍ਞਂ. ਪਾਮੋਜ੍ਜਾਧਿਟ੍ਠਾਨਂ ਅਰਤਿਯਾ ਸੁਞ੍ਞਂ. ਪਠਮਜ੍ਝਾਨਾਧਿਟ੍ਠਾਨਂ ਨੀਵਰਣੇਹਿ ਸੁਞ੍ਞਂ…ਪੇ… ਅਰਹਤ੍ਤਮਗ੍ਗਾਧਿਟ੍ਠਾਨਂ ਸਬ੍ਬਕਿਲੇਸੇਹਿ ਸੁਞ੍ਞਂ. ਇਦਂ ਅਧਿਟ੍ਠਾਨਸੁਞ੍ਞਂ.

ਕਤਮਂ ਪਰਿਯੋਗਾਹਣਸੁਞ੍ਞਂ? ਨੇਕ੍ਖਮ੍ਮਪਰਿਯੋਗਾਹਣਂ ਕਾਮਚ੍ਛਨ੍ਦੇਨ ਸੁਞ੍ਞਂ. ਅਬ੍ਯਾਪਾਦਪਰਿਯੋਗਾਹਣਂ ਬ੍ਯਾਪਾਦੇਨ ਸੁਞ੍ਞਂ. ਆਲੋਕਸਞ੍ਞਾਪਰਿਯੋਗਾਹਣਂ ਥਿਨਮਿਦ੍ਧੇਨ ਸੁਞ੍ਞਂ. ਅਵਿਕ੍ਖੇਪਪਰਿਯੋਗਾਹਣਂ ਉਦ੍ਧਚ੍ਚੇਨ ਸੁਞ੍ਞਂ. ਧਮ੍ਮਵਵਤ੍ਥਾਨਪਰਿਯੋਗਾਹਣਂ ਵਿਚਿਕਿਚ੍ਛਾਯ ਸੁਞ੍ਞਂ. ਞਾਣਪਰਿਯੋਗਾਹਣਂ ਅਵਿਜ੍ਜਾਯ ਸੁਞ੍ਞਂ. ਪਾਮੋਜ੍ਜਪਰਿਯੋਗਾਹਣਂ ਅਰਤਿਯਾ ਸੁਞ੍ਞਂ. ਪਠਮਜ੍ਝਾਨਪਰਿਯੋਗਾਹਣਂ ਨੀਵਰਣੇਹਿ ਸੁਞ੍ਞਂ…ਪੇ… ਅਰਹਤ੍ਤਮਗ੍ਗਪਰਿਯੋਗਾਹਣਂ ਸਬ੍ਬਕਿਲੇਸੇਹਿ ਸੁਞ੍ਞਂ. ਇਦਂ ਪਰਿਯੋਗਾਹਣਸੁਞ੍ਞਂ.

ਕਤਮਂ ਸਮ੍ਪਜਾਨਸ੍ਸ ਪਵਤ੍ਤਪਰਿਯਾਦਾਨਂ ਸਬ੍ਬਸੁਞ੍ਞਤਾਨਂ ਪਰਮਤ੍ਥਸੁਞ੍ਞਂ? ਇਧ ਸਮ੍ਪਜਾਨੋ ਨੇਕ੍ਖਮ੍ਮੇਨ ਕਾਮਚ੍ਛਨ੍ਦਸ੍ਸ ਪਵਤ੍ਤਂ ਪਰਿਯਾਦਿਯਤਿ, ਅਬ੍ਯਾਪਾਦੇਨ ਬ੍ਯਾਪਾਦਸ੍ਸ ਪਵਤ੍ਤਂ ਪਰਿਯਾਦਿਯਤਿ, ਆਲੋਕਸਞ੍ਞਾਯ ਥਿਨਮਿਦ੍ਧਸ੍ਸ ਪਵਤ੍ਤਂ ਪਰਿਯਾਦਿਯਤਿ, ਅਵਿਕ੍ਖੇਪੇਨ ਉਦ੍ਧਚ੍ਚਸ੍ਸ ਪਵਤ੍ਤਂ ਪਰਿਯਾਦਿਯਤਿ, ਧਮ੍ਮਵਵਤ੍ਥਾਨੇਨ ਵਿਚਿਕਿਚ੍ਛਾਯ ਪਵਤ੍ਤਂ ਪਰਿਯਾਦਿਯਤਿ, ਞਾਣੇਨ ਅਵਿਜ੍ਜਾਯ ਪਵਤ੍ਤਂ ਪਰਿਯਾਦਿਯਤਿ, ਪਾਮੋਜ੍ਜੇਨ ਅਰਤਿਯਾ ਪਵਤ੍ਤਂ ਪਰਿਯਾਦਿਯਤਿ, ਪਠਮੇਨ ਝਾਨੇਨ ਨੀਵਰਣਾਨਂ ਪਵਤ੍ਤਂ ਪਰਿਯਾਦਿਯਤਿ…ਪੇ… ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸਾਨਂ ਪਵਤ੍ਤਂ ਪਰਿਯਾਦਿਯਤਿ. ਅਥ ਵਾ ਪਨ ਸਮ੍ਪਜਾਨਸ੍ਸ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਨ੍ਤਸ੍ਸ ਇਦਂ ਚੇਵ ਚਕ੍ਖੁਪਵਤ੍ਤਂ ਪਰਿਯਾਦਿਯਤਿ, ਅਞ੍ਞਞ੍ਚ ਚਕ੍ਖੁਪਵਤ੍ਤਂ ਨ ਉਪ੍ਪਜ੍ਜਤਿ. ਇਦਞ੍ਚੇਵ ਸੋਤਪਵਤ੍ਤਂ…ਪੇ… ਘਾਨਪਵਤ੍ਤਂ… ਜਿਵ੍ਹਾਪਵਤ੍ਤਂ… ਕਾਯਪਵਤ੍ਤਂ… ਮਨੋਪਵਤ੍ਤਂ ਪਰਿਯਾਦਿਯਤਿ, ਅਞ੍ਞਞ੍ਚ ਮਨੋਪਵਤ੍ਤਂ ਨ ਉਪ੍ਪਜ੍ਜਤਿ. ਇਦਂ ਸਮ੍ਪਜਾਨਸ੍ਸ ਪਵਤ੍ਤਪਰਿਯਾਦਾਨਂ ਸਬ੍ਬਸੁਞ੍ਞਤਾਨਂ ਪਰਮਤ੍ਥਸੁਞ੍ਞਨ੍ਤਿ.

ਸੁਞ੍ਞਕਥਾ ਨਿਟ੍ਠਿਤਾ.

ਯੁਗਨਦ੍ਧਵਗ੍ਗੋ ਦੁਤਿਯੋ.