੬. ਞਾਣਰਾਸਿਛਕ੍ਕਨਿਦ੍ਦੇਸੋ
੧੮੩. ਕਤਮਾਨਿ ਚਤੁਵੀਸਤਿ ਸਮਾਧਿਵਸੇਨ ਞਾਣਾਨਿ? ਦੀਘਂ ਅਸ੍ਸਾਸਵਸੇਨ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ, ਦੀਘਂ ਪਸ੍ਸਾਸਵਸੇਨ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ…ਪੇ… ਵਿਮੋਚਯਂ ਚਿਤ੍ਤਂ ਅਸ੍ਸਾਸਵਸੇਨ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ, ਵਿਮੋਚਯਂ ਚਿਤ੍ਤਂ ਪਸ੍ਸਾਸਵਸੇਨ ਚਿਤ੍ਤਸ੍ਸ ਏਕਗ੍ਗਤਾ ਅਵਿਕ੍ਖੇਪੋ ਸਮਾਧਿ. ਇਮਾਨਿ ਚਤੁਵੀਸਤਿ ਸਮਾਧਿਵਸੇਨ ਞਾਣਾਨਿ.
ਕਤਮਾਨਿ ਦ੍ਵੇਸਤ੍ਤਤਿ ਵਿਪਸ੍ਸਨਾਵਸੇਨ ਞਾਣਾਨਿ? ਦੀਘਂ ਅਸ੍ਸਾਸਂ ਅਨਿਚ੍ਚਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਦੁਕ੍ਖਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਅਨਤ੍ਤਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਦੀਘਂ ਪਸ੍ਸਾਸਂ ਅਨਿਚ੍ਚਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਦੁਕ੍ਖਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਅਨਤ੍ਤਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ…ਪੇ… ਵਿਮੋਚਯਂ ਚਿਤ੍ਤਂ ਅਸ੍ਸਾਸਂ, ਵਿਮੋਚਯਂ ਚਿਤ੍ਤਂ ਪਸ੍ਸਾਸਂ ਅਨਿਚ੍ਚਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਦੁਕ੍ਖਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ, ਅਨਤ੍ਤਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾ. ਇਮਾਨਿ ਦ੍ਵੇਸਤ੍ਤਤਿ ਵਿਪਸ੍ਸਨਾਵਸੇਨ ਞਾਣਾਨਿ.
ਕਤਮਾਨਿ ਅਟ੍ਠ ਨਿਬ੍ਬਿਦਾਞਾਣਾਨਿ? ਅਨਿਚ੍ਚਾਨੁਪਸ੍ਸੀ ਅਸ੍ਸਾਸਂ ਯਥਾਭੂਤਂ ਜਾਨਾਤਿ ਪਸ੍ਸਤੀਤਿ – ਨਿਬ੍ਬਿਦਾਞਾਣਂ, ਅਨਿਚ੍ਚਾਨੁਪਸ੍ਸੀ ਪਸ੍ਸਾਸਂ ਯਥਾਭੂਤਂ ਜਾਨਾਤਿ ਪਸ੍ਸਤੀਤਿ – ਨਿਬ੍ਬਿਦਾਞਾਣਂ…ਪੇ… ਪਟਿਨਿਸ੍ਸਗ੍ਗਾਨੁਪਸ੍ਸੀ ਅਸ੍ਸਾਸਂ ਯਥਾਭੂਤਂ ਜਾਨਾਤਿ ਪਸ੍ਸਤੀਤਿ – ਨਿਬ੍ਬਿਦਾਞਾਣਂ, ਪਟਿਨਿਸ੍ਸਗ੍ਗਾਨੁਪਸ੍ਸੀ ਪਸ੍ਸਾਸਂ ਯਥਾਭੂਤਂ ਜਾਨਾਤਿ ਪਸ੍ਸਤੀਤਿ – ਨਿਬ੍ਬਿਦਾਞਾਣਂ. ਇਮਾਨਿ ਅਟ੍ਠ ਨਿਬ੍ਬਿਦਾਞਾਣਾਨਿ.
ਕਤਮਾਨਿ ਅਟ੍ਠ ਨਿਬ੍ਬਿਦਾਨੁਲੋਮੇ ਞਾਣਾਨਿ? ਅਨਿਚ੍ਚਾਨੁਪਸ੍ਸੀ ਅਸ੍ਸਾਸਂ ਭਯਤੁਪਟ੍ਠਾਨੇ ਪਞ੍ਞਾ ਨਿਬ੍ਬਿਦਾਨੁਲੋਮੇ ਞਾਣਂ, ਅਨਿਚ੍ਚਾਨੁਪਸ੍ਸੀ ਪਸ੍ਸਾਸਂ ਭਯਤੁਪਟ੍ਠਾਨੇ ਪਞ੍ਞਾ ਨਿਬ੍ਬਿਦਾਨੁਲੋਮੇ ਞਾਣਂ…ਪੇ… ਪਟਿਨਿਸ੍ਸਗ੍ਗਾਨੁਪਸ੍ਸੀ ਅਸ੍ਸਾਸਂ ਭਯਤੁਪਟ੍ਠਾਨੇ ਪਞ੍ਞਾ ਨਿਬ੍ਬਿਦਾਨੁਲੋਮੇ ਞਾਣਂ, ਪਟਿਨਿਸ੍ਸਗ੍ਗਾਨੁਪਸ੍ਸੀ ਪਸ੍ਸਾਸਂ ਭਯਤੁਪਟ੍ਠਾਨੇ ਪਞ੍ਞਾ ਨਿਬ੍ਬਿਦਾਨੁਲੋਮੇ ਞਾਣਂ – ਇਮਾਨਿ ਅਟ੍ਠ ਨਿਬ੍ਬਿਦਾਨੁਲੋਮੇ ਞਾਣਾਨਿ.
ਕਤਮਾਨਿ ਅਟ੍ਠ ਨਿਬ੍ਬਿਦਾਪਟਿਪ੍ਪਸ੍ਸਦ੍ਧਿਞਾਣਾਨਿ? ਅਨਿਚ੍ਚਾਨੁਪਸ੍ਸੀ ਅਸ੍ਸਾਸਂ ਪਟਿਸਙ੍ਖਾ ਸਨ੍ਤਿਟ੍ਠਨਾ ਪਞ੍ਞਾ ਨਿਬ੍ਬਿਦਾਪਟਿਪ੍ਪਸ੍ਸਦ੍ਧਿਞਾਣਂ, ਅਨਿਚ੍ਚਾਨੁਪਸ੍ਸੀ ਪਸ੍ਸਾਸਂ ਪਟਿਸਙ੍ਖਾ ਸਨ੍ਤਿਟ੍ਠਨਾ ਪਞ੍ਞਾ ਨਿਬ੍ਬਿਦਾਪਟਿਪ੍ਪਸ੍ਸਦ੍ਧਿਞਾਣਂ…ਪੇ… ਪਟਿਨਿਸ੍ਸਗ੍ਗਾਨੁਪਸ੍ਸੀ ਅਸ੍ਸਾਸਂ ਪਟਿਸਙ੍ਖਾ ਸਨ੍ਤਿਟ੍ਠਨਾ ਪਞ੍ਞਾ ਨਿਬ੍ਬਿਦਾਪਟਿਪ੍ਪਸ੍ਸਦ੍ਧਿਞਾਣਂ, ਪਟਿਨਿਸ੍ਸਗ੍ਗਾਨੁਪਸ੍ਸੀ ਪਸ੍ਸਾਸਂ ਪਟਿਸਙ੍ਖਾ ਸਨ੍ਤਿਟ੍ਠਨਾ ਪਞ੍ਞਾ ਨਿਬ੍ਬਿਦਾਪਟਿਪ੍ਪਸ੍ਸਦ੍ਧਿਞਾਣਂ – ਇਮਾਨਿ ਅਟ੍ਠ ਨਿਬ੍ਬਿਦਾਪਟਿਪ੍ਪਸ੍ਸਦ੍ਧਿਞਾਣਾਨਿ.
ਕਤਮਾਨਿ ਏਕਵੀਸਤਿ ਵਿਮੁਤ੍ਤਿਸੁਖੇ ਞਾਣਾਨਿ? ਸੋਤਾਪਤ੍ਤਿਮਗ੍ਗੇਨ ਸਕ੍ਕਾਯਦਿਟ੍ਠਿਯਾ ਪਹੀਨਤ੍ਤਾ ਸਮੁਚ੍ਛਿਨ੍ਨਤ੍ਤਾ ਉਪ੍ਪਜ੍ਜਤਿ ਵਿਮੁਤ੍ਤਿਸੁਖੇ ਞਾਣਂ, ਵਿਚਿਕਿਚ੍ਛਾਯ ਪਹੀਨਤ੍ਤਾ ਸਮੁਚ੍ਛਿਨ੍ਨਤ੍ਤਾ ਉਪ੍ਪਜ੍ਜਤਿ ਵਿਮੁਤ੍ਤਿਸੁਖੇ ਞਾਣਂ, ਸੀਲਬ੍ਬਤਪਰਾਮਾਸਸ੍ਸ…ਪੇ… ਦਿਟ੍ਠਾਨੁਸਯਸ੍ਸ, ਵਿਚਿਕਿਚ੍ਛਾਨੁਸਯਸ੍ਸ ਪਹੀਨਤ੍ਤਾ ਸਮੁਚ੍ਛਿਨ੍ਨਤ੍ਤਾ ਉਪ੍ਪਜ੍ਜਤਿ ਵਿਮੁਤ੍ਤਿਸੁਖੇ ਞਾਣਂ, ਸਕਦਾਗਾਮਿਮਗ੍ਗੇਨ ਓਲ਼ਾਰਿਕਸ੍ਸ, ਕਾਮਰਾਗਸਞ੍ਞੋਜਨਸ੍ਸ…ਪੇ… ਪਟਿਘਸਞ੍ਞੋਜਨਸ੍ਸ, ਓਲ਼ਾਰਿਕਸ੍ਸ ਕਾਮਰਾਗਾਨੁਸਯਸ੍ਸ, ਪਟਿਘਾਨੁਸਯਸ੍ਸ ਪਹੀਨਤ੍ਤਾ ਸਮੁਚ੍ਛਿਨ੍ਨਤ੍ਤਾ ਉਪ੍ਪਜ੍ਜਤਿ ਵਿਮੁਤ੍ਤਿਸੁਖੇ ਞਾਣਂ, ਅਨਾਗਾਮਿਮਗ੍ਗੇਨ ਅਨੁਸਹਗਤਸ੍ਸ ਕਾਮਰਾਗਸਞ੍ਞੋਜਨਸ੍ਸ…ਪੇ… ਪਟਿਘਸਞ੍ਞੋਜਨਸ੍ਸ, ਅਨੁਸਹਗਤਸ੍ਸ ਕਾਮਰਾਗਾਨੁਸਯਸ੍ਸ, ਪਟਿਘਾਨੁਸਯਸ੍ਸ ਪਹੀਨਤ੍ਤਾ ਸਮੁਚ੍ਛਿਨ੍ਨਤ੍ਤਾ ਉਪ੍ਪਜ੍ਜਤਿ ਵਿਮੁਤ੍ਤਿਸੁਖੇ ਞਾਣਂ, ਅਰਹਤ੍ਤਮਗ੍ਗੇਨ, ਰੂਪਰਾਗਸ੍ਸ…ਪੇ… ਅਰੂਪਰਾਗਸ੍ਸ, ਮਾਨਸ੍ਸ, ਉਦ੍ਧਚ੍ਚਸ੍ਸ, ਅਵਿਜ੍ਜਾਯ, ਮਾਨਾਨੁਸਯਸ੍ਸ, ਭਵਰਾਗਾਨੁਸਯਸ੍ਸ, ਅਵਿਜ੍ਜਾਨੁਸਯਸ੍ਸ ਪਹੀਨਤ੍ਤਾ ਸਮੁਚ੍ਛਿਨ੍ਨਤ੍ਤਾ ਉਪ੍ਪਜ੍ਜਤਿ ਵਿਮੁਤ੍ਤਿਸੁਖੇ ਞਾਣਂ. ਇਮਾਨਿ ਏਕਵੀਸਤਿ ਵਿਮੁਤ੍ਤਿਸੁਖੇ ਞਾਣਾਨਿ. ਸੋਲ਼ਸਵਤ੍ਥੁਕਂ ਆਨਾਪਾਨਸ੍ਸਤਿਸਮਾਧਿਂ ਭਾਵਯਤੋ ਸਮਧਿਕਾਨਿ ਇਮਾਨਿ ਦ੍ਵੇ ਞਾਣਸਤਾਨਿ ਉਪ੍ਪਜ੍ਜਨ੍ਤਿ.
ਞਾਣਰਾਸਿਛਕ੍ਕਨਿਦ੍ਦੇਸੋ ਛਟ੍ਠੋ.
ਆਨਾਪਾਨਸ੍ਸਤਿਕਥਾ [ਆਨਾਪਾਨਕਥਾ (ਸ੍ਯਾ. ਕ.)] ਨਿਟ੍ਠਿਤਾ.