੪. ਇਨ੍ਦ੍ਰਿਯਕਥਾ
੧. ਪਠਮਸੁਤ੍ਤਨ੍ਤਨਿਦ੍ਦੇਸੋ
੧੮੪. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖਵੋ’’ਤਿ. ‘‘ਭਦਨ੍ਤੇ’’ਤਿ [‘‘ਭਦ੍ਦਨ੍ਤੇ’’ਤਿ (ਕ.)] ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਭਗਵਾ ਏਤਦਵੋਚ –
‘‘ਪਞ੍ਚਿਮਾਨਿ, ਭਿਕ੍ਖਵੇ, ਇਨ੍ਦ੍ਰਿਯਾਨਿ. ਕਤਮਾਨਿ ਪਞ੍ਚ? ਸਦ੍ਧਿਨ੍ਦ੍ਰਿਯਂ, ਵੀਰਿਯਿਨ੍ਦ੍ਰਿਯਂ, ਸਤਿਨ੍ਦ੍ਰਿਯਂ, ਸਮਾਧਿਨ੍ਦ੍ਰਿਯਂ, ਪਞ੍ਞਿਨ੍ਦ੍ਰਿਯਂ – ਇਮਾਨਿ ਖੋ, ਭਿਕ੍ਖਵੇ, ਪਞ੍ਚਿਨ੍ਦ੍ਰਿਯਾਨਿ’’ [ਸਂ. ਨਿ. ੫.੪੭੧].
੧੮੫. ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਕਤਿਹਾਕਾਰੇਹਿ ਵਿਸੁਜ੍ਝਨ੍ਤਿ? ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਪਨ੍ਨਰਸਹਿ ਆਕਾਰੇਹਿ ਵਿਸੁਜ੍ਝਨ੍ਤਿ. ਅਸ੍ਸਦ੍ਧੇ ਪੁਗ੍ਗਲੇ ਪਰਿਵਜ੍ਜਯਤੋ, ਸਦ੍ਧੇ ਪੁਗ੍ਗਲੇ ਸੇਵਤੋ ਭਜਤੋ ਪਯਿਰੁਪਾਸਤੋ, ਪਸਾਦਨੀਯੇ ਸੁਤ੍ਤਨ੍ਤੇ ਪਚ੍ਚਵੇਕ੍ਖਤੋ – ਇਮੇਹਿ ਤੀਹਾਕਾਰੇਹਿ ਸਦ੍ਧਿਨ੍ਦ੍ਰਿਯਂ ਵਿਸੁਜ੍ਝਤਿ. ਕੁਸੀਤੇ ਪੁਗ੍ਗਲੇ ਪਰਿਵਜ੍ਜਯਤੋ, ਆਰਦ੍ਧਵੀਰਿਯੇ ਪੁਗ੍ਗਲੇ ਸੇਵਤੋ ਭਜਤੋ ਪਯਿਰੁਪਾਸਤੋ, ਸਮ੍ਮਪ੍ਪਧਾਨੇ ਪਚ੍ਚਵੇਕ੍ਖਤੋ – ਇਮੇਹਿ ਤੀਹਾਕਾਰੇਹਿ ਵੀਰਿਯਿਨ੍ਦ੍ਰਿਯਂ ਵਿਸੁਜ੍ਝਤਿ. ਮੁਟ੍ਠਸ੍ਸਤੀ ਪੁਗ੍ਗਲੇ ਪਰਿਵਜ੍ਜਯਤੋ, ਉਪਟ੍ਠਿਤਸ੍ਸਤੀ ਪੁਗ੍ਗਲੇ ਸੇਵਤੋ ਭਜਤੋ ਪਯਿਰੁਪਾਸਤੋ, ਸਤਿਪਟ੍ਠਾਨੇ ਪਚ੍ਚਵੇਕ੍ਖਤੋ – ਇਮੇਹਿ ਤੀਹਾਕਾਰੇਹਿ ਸਤਿਨ੍ਦ੍ਰਿਯਂ ਵਿਸੁਜ੍ਝਤਿ. ਅਸਮਾਹਿਤੇ ਪੁਗ੍ਗਲੇ ਪਰਿਵਜ੍ਜਯਤੋ, ਸਮਾਹਿਤੇ ਪੁਗ੍ਗਲੇ ਸੇਵਤੋ ਭਜਤੋ ਪਯਿਰੁਪਾਸਤੋ, ਝਾਨਵਿਮੋਕ੍ਖੇ ਪਚ੍ਚਵੇਕ੍ਖਤੋ – ਇਮੇਹਿ ਤੀਹਾਕਾਰੇਹਿ ਸਮਾਧਿਨ੍ਦ੍ਰਿਯਂ ਵਿਸੁਜ੍ਝਤਿ. ਦੁਪ੍ਪਞ੍ਞੇ ਪੁਗ੍ਗਲੇ ਪਰਿਵਜ੍ਜਯਤੋ, ਪਞ੍ਞਵਨ੍ਤੇ ਪੁਗ੍ਗਲੇ ਸੇਵਤੋ ਭਜਤੋ ਪਯਿਰੁਪਾਸਤੋ, ਗਮ੍ਭੀਰਞਾਣਚਰਿਯਂ ਪਚ੍ਚਵੇਕ੍ਖਤੋ – ਇਮੇਹਿ ਤੀਹਾਕਾਰੇਹਿ ਪਞ੍ਞਿਨ੍ਦ੍ਰਿਯਂ ਵਿਸੁਜ੍ਝਤਿ. ਇਤਿ ਇਮੇ ਪਞ੍ਚ ਪੁਗ੍ਗਲੇ ਪਰਿਵਜ੍ਜਯਤੋ, ਪਞ੍ਚ ਪੁਗ੍ਗਲੇ ਸੇਵਤੋ ਭਜਤੋ ਪਯਿਰੁਪਾਸਤੋ, ਪਞ੍ਚ ਸੁਤ੍ਤਨ੍ਤਕ੍ਖਨ੍ਧੇ ਪਚ੍ਚਵੇਕ੍ਖਤੋ – ਇਮੇਹਿ ਪਨ੍ਨਰਸਹਿ ਆਕਾਰੇਹਿ ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਵਿਸੁਜ੍ਝਨ੍ਤਿ.
ਕਤਿਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਭਾਵਿਯਨ੍ਤਿ, ਕਤਿਹਾਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਭਾਵਨਾ ਹੋਤਿ? ਦਸਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਭਾਵਿਯਨ੍ਤਿ, ਦਸਹਾਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਭਾਵਨਾ ਹੋਤਿ. ਅਸ੍ਸਦ੍ਧਿਯਂ ਪਜਹਨ੍ਤੋ ਸਦ੍ਧਿਨ੍ਦ੍ਰਿਯਂ ਭਾਵੇਤਿ, ਸਦ੍ਧਿਨ੍ਦ੍ਰਿਯਂ ਭਾਵੇਨ੍ਤੋ ਅਸ੍ਸਦ੍ਧਿਯਂ ਪਜਹਤਿ; ਕੋਸਜ੍ਜਂ ਪਜਹਨ੍ਤੋ ਵੀਰਿਯਿਨ੍ਦ੍ਰਿਯਂ ਭਾਵੇਤਿ, ਵੀਰਿਯਿਨ੍ਦ੍ਰਿਯਂ ਭਾਵੇਨ੍ਤੋ ਕੋਸਜ੍ਜਂ ਪਜਹਤਿ; ਪਮਾਦਂ ਪਜਹਨ੍ਤੋ ਸਤਿਨ੍ਦ੍ਰਿਯਂ ਭਾਵੇਤਿ, ਸਤਿਨ੍ਦ੍ਰਿਯਂ ਭਾਵੇਨ੍ਤੋ ਪਮਾਦਂ ਪਜਹਤਿ; ਉਦ੍ਧਚ੍ਚਂ ਪਜਹਨ੍ਤੋ ਸਮਾਧਿਨ੍ਦ੍ਰਿਯਂ ਭਾਵੇਤਿ, ਸਮਾਧਿਨ੍ਦ੍ਰਿਯਂ ਭਾਵੇਨ੍ਤੋ ਉਦ੍ਧਚ੍ਚਂ ਪਜਹਤਿ; ਅਵਿਜ੍ਜਂ ਪਜਹਨ੍ਤੋ ਪਞ੍ਞਿਨ੍ਦ੍ਰਿਯਂ ਭਾਵੇਤਿ, ਪਞ੍ਞਿਨ੍ਦ੍ਰਿਯਂ ਭਾਵੇਨ੍ਤੋ ਅਵਿਜ੍ਜਂ ਪਜਹਤਿ. ਇਮੇਹਿ ਦਸਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਭਾਵਿਯਨ੍ਤਿ, ਇਮੇਹਿ ਦਸਹਾਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਭਾਵਨਾ ਹੋਤਿ.
ਕਤਿਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਭਾਵਿਤਾਨਿ ਹੋਨ੍ਤਿ ਸੁਭਾਵਿਤਾਨਿ? ਦਸਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਭਾਵਿਤਾਨਿ ਹੋਨ੍ਤਿ ਸੁਭਾਵਿਤਾਨਿ. ਅਸ੍ਸਦ੍ਧਿਯਸ੍ਸ ਪਹੀਨਤ੍ਤਾ ਸੁਪ੍ਪਹੀਨਤ੍ਤਾ ਸਦ੍ਧਿਨ੍ਦ੍ਰਿਯਂ ਭਾਵਿਤਂ ਹੋਤਿ ਸੁਭਾਵਿਤਂ; ਸਦ੍ਧਿਨ੍ਦ੍ਰਿਯਸ੍ਸ ਭਾਵਿਤਤ੍ਤਾ ਸੁਭਾਵਿਤਤ੍ਤਾ ਅਸ੍ਸਦ੍ਧਿਯਂ ਪਹੀਨਂ ਹੋਤਿ ਸੁਪ੍ਪਹੀਨਂ. ਕੋਸਜ੍ਜਸ੍ਸ ਪਹੀਨਤ੍ਤਾ ਸੁਪ੍ਪਹੀਨਤ੍ਤਾ ਵੀਰਿਯਿਨ੍ਦ੍ਰਿਯਂ ਭਾਵਿਤਂ ਹੋਤਿ ਸੁਭਾਵਿਤਂ; ਵੀਰਿਯਿਨ੍ਦ੍ਰਿਯਸ੍ਸ ਭਾਵਿਤਤ੍ਤਾ ਸੁਭਾਵਿਤਤ੍ਤਾ ਕੋਸਜ੍ਜਂ ਪਹੀਨਂ ਹੋਤਿ ਸੁਪ੍ਪਹੀਨਂ. ਪਮਾਦਸ੍ਸ ਪਹੀਨਤ੍ਤਾ ਸੁਪ੍ਪਹੀਨਤ੍ਤਾ ਸਤਿਨ੍ਦ੍ਰਿਯਂ ਭਾਵਿਤਂ ਹੋਤਿ ਸੁਭਾਵਿਤਂ; ਸਤਿਨ੍ਦ੍ਰਿਯਸ੍ਸ ਭਾਵਿਤਤ੍ਤਾ ਸੁਭਾਵਿਤਤ੍ਤਾ ਪਮਾਦੋ ਪਹੀਨੋ ਹੋਤਿ ਸੁਪ੍ਪਹੀਨੋ. ਉਦ੍ਧਚ੍ਚਸ੍ਸ ਪਹੀਨਤ੍ਤਾ ਸੁਪ੍ਪਹੀਨਤ੍ਤਾ ਸਮਾਧਿਨ੍ਦ੍ਰਿਯਂ ਭਾਵਿਤਂ ਹੋਤਿ ਸੁਭਾਵਿਤਂ; ਸਮਾਧਿਨ੍ਦ੍ਰਿਯਸ੍ਸ ਭਾਵਿਤਤ੍ਤਾ ਸੁਭਾਵਿਤਤ੍ਤਾ ਉਦ੍ਧਚ੍ਚਂ ਪਹੀਨਂ ਹੋਤਿ ਸੁਪ੍ਪਹੀਨਂ. ਅਵਿਜ੍ਜਾਯ ਪਹੀਨਤ੍ਤਾ ਪਞ੍ਞਿਨ੍ਦ੍ਰਿਯਂ ਭਾਵਿਤਂ ਹੋਤਿ ਸੁਭਾਵਿਤਂ; ਪਞ੍ਞਿਨ੍ਦ੍ਰਿਯਸ੍ਸ ਭਾਵਿਤਤ੍ਤਾ ਸੁਭਾਵਿਤਤ੍ਤਾ ਅਵਿਜ੍ਜਾ ਪਹੀਨਾ ਹੋਤਿ ਸੁਪ੍ਪਹੀਨਾ. ਇਮੇਹਿ ਦਸਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਭਾਵਿਤਾਨਿ ਹੋਨ੍ਤਿ ਸੁਭਾਵਿਤਾਨਿ.
੧੮੬. ਕਤਿਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਭਾਵਿਯਨ੍ਤਿ, ਕਤਿਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਭਾਵਿਤਾਨਿ ਚੇਵ ਹੋਨ੍ਤਿ ਸੁਭਾਵਿਤਾਨਿ ਚ ਪਟਿਪ੍ਪਸ੍ਸਦ੍ਧਾਨਿ ਚ ਸੁਪ੍ਪਟਿਪ੍ਪਸ੍ਸਦ੍ਧਾਨਿ ਚ? ਚਤੂਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਭਾਵਿਯਨ੍ਤਿ ਚਤੂਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਭਾਵਿਤਾਨਿ ਚੇਵ ਹੋਨ੍ਤਿ ਸੁਭਾਵਿਤਾਨਿ ਚ ਪਟਿਪ੍ਪਸ੍ਸਦ੍ਧਾਨਿ ਚ ਸੁਪ੍ਪਟਿਪ੍ਪਸ੍ਸਦ੍ਧਾਨਿ ਚ. ਸੋਤਾਪਤ੍ਤਿਮਗ੍ਗਕ੍ਖਣੇ ਪਞ੍ਚਿਨ੍ਦ੍ਰਿਯਾਨਿ ਭਾਵਿਯਨ੍ਤਿ; ਸੋਤਾਪਤ੍ਤਿਫਲਕ੍ਖਣੇ ਪਞ੍ਚਿਨ੍ਦ੍ਰਿਯਾਨਿ ਭਾਵਿਤਾਨਿ ਚੇਵ ਹੋਨ੍ਤਿ ਸੁਭਾਵਿਤਾਨਿ ਚ ਪਟਿਪ੍ਪਸ੍ਸਦ੍ਧਾਨਿ ਚ ਸੁਪ੍ਪਟਿਪ੍ਪਸ੍ਸਦ੍ਧਾਨਿ ਚ. ਸਕਦਾਗਾਮਿਮਗ੍ਗਕ੍ਖਣੇ ਪਞ੍ਚਿਨ੍ਦ੍ਰਿਯਾਨਿ ਭਾਵਿਯਨ੍ਤਿ; ਸਕਦਾਗਾਮਿਫਲਕ੍ਖਣੇ ਪਞ੍ਚਿਨ੍ਦ੍ਰਿਯਾਨਿ ਭਾਵਿਤਾਨਿ ਚੇਵ ਹੋਨ੍ਤਿ ਸੁਭਾਵਿਤਾਨਿ ਚ ਪਟਿਪ੍ਪਸ੍ਸਦ੍ਧਾਨਿ ਚ ਸੁਪ੍ਪਟਿਪ੍ਪਸ੍ਸਦ੍ਧਾਨਿ ਚ. ਅਨਾਗਾਮਿਮਗ੍ਗਕ੍ਖਣੇ ਪਞ੍ਚਿਨ੍ਦ੍ਰਿਯਾਨਿ ਭਾਵਿਯਨ੍ਤਿ; ਅਨਾਗਾਮਿਫਲਕ੍ਖਣੇ ਪਞ੍ਚਿਨ੍ਦ੍ਰਿਯਾਨਿ ਭਾਵਿਤਾਨਿ ਚੇਵ ਹੋਨ੍ਤਿ ਸੁਭਾਵਿਤਾਨਿ ਚ ਪਟਿਪ੍ਪਸ੍ਸਦ੍ਧਾਨਿ ਚ ਸੁਪ੍ਪਟਿਪ੍ਪਸ੍ਸਦ੍ਧਾਨਿ ਚ. ਅਰਹਤ੍ਤਮਗ੍ਗਕ੍ਖਣੇ ਪਞ੍ਚਿਨ੍ਦ੍ਰਿਯਾਨਿ ਭਾਵਿਯਨ੍ਤਿ; ਅਰਹਤ੍ਤਫਲਕ੍ਖਣੇ ਪਞ੍ਚਿਨ੍ਦ੍ਰਿਯਾਨਿ ਭਾਵਿਤਾਨਿ ਚੇਵ ਹੋਨ੍ਤਿ ਸੁਭਾਵਿਤਾਨਿ ਚ ਪਟਿਪ੍ਪਸ੍ਸਦ੍ਧਾਨਿ ਚ ਸੁਪ੍ਪਟਿਪ੍ਪਸ੍ਸਦ੍ਧਾਨਿ ਚ. ਇਤਿ ਚਤਸ੍ਸੋ ਮਗ੍ਗਵਿਸੁਦ੍ਧਿਯੋ, ਚਤਸ੍ਸੋ ਫਲਵਿਸੁਦ੍ਧਿਯੋ, ਚਤਸ੍ਸੋ ਸਮੁਚ੍ਛੇਦਵਿਸੁਦ੍ਧਿਯੋ, ਚਤਸ੍ਸੋ ਪਟਿਪ੍ਪਸ੍ਸਦ੍ਧਿਵਿਸੁਦ੍ਧਿਯੋ. ਇਮੇਹਿ ਚਤੂਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਭਾਵਿਯਨ੍ਤਿ; ਇਮੇਹਿ ਚਤੂਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਭਾਵਿਤਾਨਿ ਚੇਵ ਹੋਨ੍ਤਿ ਸੁਭਾਵਿਤਾਨਿ ਚ ਪਟਿਪ੍ਪਸ੍ਸਦ੍ਧਾਨਿ ਚ ਸੁਪ੍ਪਟਿਪ੍ਪਸ੍ਸਦ੍ਧਾਨਿ ਚ.
ਕਤਿਨਂ ਪੁਗ੍ਗਲਾਨਂ ਇਨ੍ਦ੍ਰਿਯਭਾਵਨਾ; ਕਤਿ ਪੁਗ੍ਗਲਾ ਭਾਵਿਤਿਨ੍ਦ੍ਰਿਯਾ? ਅਟ੍ਠਨ੍ਨਂ ਪੁਗ੍ਗਲਾਨਂ ਇਨ੍ਦ੍ਰਿਯਭਾਵਨਾ; ਤਯੋ ਪੁਗ੍ਗਲਾ ਭਾਵਿਤਿਨ੍ਦ੍ਰਿਯਾ. ਕਤਮੇਸਂ ਅਟ੍ਠਨ੍ਨਂ ਪੁਗ੍ਗਲਾਨਂ ਇਨ੍ਦ੍ਰਿਯਭਾਵਨਾ? ਸਤ੍ਤਨ੍ਨਞ੍ਚ ਸੇਕ੍ਖਾਨਂ, ਪੁਥੁਜ੍ਜਨਕਲ੍ਯਾਣਕਸ੍ਸ ਚ – ਇਮੇਸਂ ਅਟ੍ਠਨ੍ਨਂ ਪੁਗ੍ਗਲਾਨਂ ਇਨ੍ਦ੍ਰਿਯਭਾਵਨਾ. ਕਤਮੇ ਤਯੋ ਪੁਗ੍ਗਲਾ ਭਾਵਿਤਿਨ੍ਦ੍ਰਿਯਾ? ਸਵਨੇਨ ਬੁਦ੍ਧੋ ਤਥਾਗਤਸ੍ਸ ਸਾਵਕੋ ਖੀਣਾਸਵੋ ਭਾਵਿਤਿਨ੍ਦ੍ਰਿਯੋ, ਸਯਂ ਭੂਤਟ੍ਠੇਨ ਪਚ੍ਚੇਕਸਮ੍ਬੁਦ੍ਧੋ ਭਾਵਿਤਿਨ੍ਦ੍ਰਿਯੋ, ਅਪ੍ਪਮੇਯ੍ਯਟ੍ਠੇਨ ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ ਭਾਵਿਤਿਨ੍ਦ੍ਰਿਯੋ – ਇਮੇ ਤਯੋ ਪੁਗ੍ਗਲਾ ਭਾਵਿਤਿਨ੍ਦ੍ਰਿਯਾ. ਇਤਿ ਇਮੇਸਂ ਅਟ੍ਠਨ੍ਨਂ ਪੁਗ੍ਗਲਾਨਂ ਇਨ੍ਦ੍ਰਿਯਭਾਵਨਾ; ਇਮੇ ਤਯੋ ਪੁਗ੍ਗਲਾ ਭਾਵਿਤਿਨ੍ਦ੍ਰਿਯਾ.
ਸੁਤ੍ਤਨ੍ਤਨਿਦ੍ਦੇਸੋ ਪਠਮੋ.
੨. ਦੁਤਿਯਸੁਤ੍ਤਨ੍ਤਨਿਦ੍ਦੇਸੋ
੧੮੭. ਸਾਵਤ੍ਥਿਨਿਦਾਨਂ. ‘‘ਪਞ੍ਚਿਮਾਨਿ, ਭਿਕ੍ਖਵੇ, ਇਨ੍ਦ੍ਰਿਯਾਨਿ. ਕਤਮਾਨਿ ਪਞ੍ਚ? ਸਦ੍ਧਿਨ੍ਦ੍ਰਿਯਂ, ਵੀਰਿਯਿਨ੍ਦ੍ਰਿਯਂ, ਸਤਿਨ੍ਦ੍ਰਿਯਂ, ਸਮਾਧਿਨ੍ਦ੍ਰਿਯਂ, ਪਞ੍ਞਿਨ੍ਦ੍ਰਿਯਂ. ਯੇ ਹਿ ਕੇਚਿ, ਭਿਕ੍ਖਵੇ, ਸਮਣਾ ਵਾ ਬ੍ਰਾਹ੍ਮਣਾ ਵਾ ਇਮੇਸਂ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਅਸ੍ਸਾਦਞ੍ਚ ਆਦੀਨਵਞ੍ਚ ਨਿਸ੍ਸਰਣਞ੍ਚ ਯਥਾਭੂਤਂ ਨਪ੍ਪਜਾਨਨ੍ਤਿ, ਨ ਮੇ ਤੇ, ਭਿਕ੍ਖਵੇ, ਸਮਣਾ ਵਾ ਬ੍ਰਾਹ੍ਮਣਾ ਵਾ ਸਮਣੇਸੁ [ਚੇਵ (ਕ.) ਸਂ. ਨਿ. ੫.੪੭੬] ਵਾ ਸਮਣਸਮ੍ਮਤਾ, ਬ੍ਰਾਹ੍ਮਣੇਸੁ ਵਾ ਬ੍ਰਾਹ੍ਮਣਸਮ੍ਮਤਾ; ਨ ਚ ਪਨੇਤੇ ਆਯਸ੍ਮਨ੍ਤਾ [ਆਯਸ੍ਮਨ੍ਤੋ ਸਂ. ਨਿ. ੫.੪੭੬] ਸਾਮਞ੍ਞਤ੍ਥਂ ਵਾ ਬ੍ਰਹ੍ਮਞ੍ਞਤ੍ਥਂ ਵਾ ਦਿਟ੍ਠੇਵ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਨ੍ਤਿ. ਯੇ ਚ ਖੋ ਕੇਚਿ [ਯੇ ਕੇਚਿ ਖੋ (ਸ੍ਯਾ.), ਯੇ ਹਿ ਕੇਚਿ ਖੋ (ਕ.) ਸਂ. ਨਿ. ੫.੪੭੬ ਪਸ੍ਸਿਤਬ੍ਬਾ] ਭਿਕ੍ਖਵੇ ਸਮਣਾ ਵਾ ਬ੍ਰਾਹ੍ਮਣਾ ਵਾ ਇਮੇਸਂ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚ ਅਸ੍ਸਾਦਞ੍ਚ ਆਦੀਨਵਞ੍ਚ ਨਿਸ੍ਸਰਣਞ੍ਚ ਯਥਾਭੂਤਂ ਪਜਾਨਨ੍ਤਿ, ਤੇ ਖੋ ਮੇ, ਭਿਕ੍ਖਵੇ, ਸਮਣਾ ਵਾ ਬ੍ਰਾਹ੍ਮਣਾ ਵਾ ਸਮਣੇਸੁ ਵਾ ਸਮਣਸਮ੍ਮਤਾ, ਬ੍ਰਾਹ੍ਮਣੇਸੁ ਵਾ ਬ੍ਰਾਹ੍ਮਣਸਮ੍ਮਤਾ; ਤੇ ਚ ਪਨਾਯਸ੍ਮਨ੍ਤਾ ਸਾਮਞ੍ਞਤ੍ਥਞ੍ਚ ਬ੍ਰਹ੍ਮਞ੍ਞਤ੍ਥਞ੍ਚ ਦਿਟ੍ਠੇਵ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਨ੍ਤੀ’’ਤਿ.
੧੮੮. ਕਤਿਹਾਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਸਮੁਦਯੋ ਹੋਤਿ; ਕਤਿਹਾਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਸਮੁਦਯਂ ਪਜਾਨਾਤਿ? ਕਤਿਹਾਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਤ੍ਥਙ੍ਗਮੋ ਹੋਤਿ; ਕਤਿਹਾਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਤ੍ਥਙ੍ਗਮਂ ਪਜਾਨਾਤਿ? ਕਤਿਹਾਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਸ੍ਸਾਦੋ ਹੋਤਿ, ਕਤਿਹਾਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਸ੍ਸਾਦਂ ਪਜਾਨਾਤਿ? ਕਤਿਹਾਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਆਦੀਨਵੋ ਹੋਤਿ; ਕਤਿਹਾਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਆਦੀਨਵਂ ਪਜਾਨਾਤਿ? ਕਤਿਹਾਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਨਿਸ੍ਸਰਣਂ ਹੋਤਿ; ਕਤਿਹਾਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਨਿਸ੍ਸਰਣਂ ਪਜਾਨਾਤਿ?
ਚਤ੍ਤਾਰੀਸਾਯ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਸਮੁਦਯੋ ਹੋਤਿ; ਚਤ੍ਤਾਰੀਸਾਯ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਸਮੁਦਯਂ ਪਜਾਨਾਤਿ. ਚਤ੍ਤਾਰੀਸਾਯ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਤ੍ਥਙ੍ਗਮੋ ਹੋਤਿ; ਚਤ੍ਤਾਰੀਸਾਯ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਤ੍ਥਙ੍ਗਮਂ ਪਜਾਨਾਤਿ. ਪਞ੍ਚਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਸ੍ਸਾਦੋ ਹੋਤਿ; ਪਞ੍ਚਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਸ੍ਸਾਦਂ ਪਜਾਨਾਤਿ. ਪਞ੍ਚਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਆਦੀਨਵੋ ਹੋਤਿ; ਪਞ੍ਚਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਆਦੀਨਵਂ ਪਜਾਨਾਤਿ. ਅਸੀਤਿਸਤਂ ਆਕਾਰੇਹਿ [ਅਸੀਤਿਸਤਾਕਾਰੇਹਿ (ਸ੍ਯਾ.)] ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਨਿਸ੍ਸਰਣਂ ਹੋਤਿ; ਅਸੀਤਿਸਤਂ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਨਿਸ੍ਸਰਣਂ ਪਜਾਨਾਤਿ.
ਕਤਮੇਹਿ ਚਤ੍ਤਾਰੀਸਾਯ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਸਮੁਦਯੋ ਹੋਤਿ; ਕਤਮੇਹਿ ਚਤ੍ਤਾਰੀਸਾਯ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਸਮੁਦਯਂ ਪਜਾਨਾਤਿ? ਅਧਿਮੋਕ੍ਖਤ੍ਥਾਯ ਆਵਜ੍ਜਨਾਯ ਸਮੁਦਯੋ ਸਦ੍ਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਅਧਿਮੋਕ੍ਖਵਸੇਨ ਛਨ੍ਦਸ੍ਸ ਸਮੁਦਯੋ ਸਦ੍ਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਅਧਿਮੋਕ੍ਖਵਸੇਨ ਮਨਸਿਕਾਰਸ੍ਸ ਸਮੁਦਯੋ ਸਦ੍ਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤੁਪਟ੍ਠਾਨਂ ਸਦ੍ਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ; ਪਗ੍ਗਹਤ੍ਥਾਯ ਆਵਜ੍ਜਨਾਯ ਸਮੁਦਯੋ ਵੀਰਿਯਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਪਗ੍ਗਹਵਸੇਨ ਛਨ੍ਦਸ੍ਸ ਸਮੁਦਯੋ ਵੀਰਿਯਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਪਗ੍ਗਹਵਸੇਨ ਮਨਸਿਕਾਰਸ੍ਸ ਸਮੁਦਯੋ ਵੀਰਿਯਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਵੀਰਿਯਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤੁਪਟ੍ਠਾਨਂ ਵੀਰਿਯਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ; ਉਪਟ੍ਠਾਨਤ੍ਥਾਯ ਆਵਜ੍ਜਨਾਯ ਸਮੁਦਯੋ ਸਤਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਉਪਟ੍ਠਾਨਵਸੇਨ ਛਨ੍ਦਸ੍ਸ ਸਮੁਦਯੋ ਸਤਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਉਪਟ੍ਠਾਨਵਸੇਨ ਮਨਸਿਕਾਰਸ੍ਸ ਸਮੁਦਯੋ ਸਤਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਸਤਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤੁਪਟ੍ਠਾਨਂ ਸਤਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ; ਅਵਿਕ੍ਖੇਪਤ੍ਥਾਯ ਆਵਜ੍ਜਨਾਯ ਸਮੁਦਯੋ ਸਮਾਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਅਵਿਕ੍ਖੇਪਵਸੇਨ ਛਨ੍ਦਸ੍ਸ ਸਮੁਦਯੋ ਸਮਾਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਅਵਿਕ੍ਖੇਪਵਸੇਨ ਮਨਸਿਕਾਰਸ੍ਸ ਸਮੁਦਯੋ ਸਮਾਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਸਮਾਧਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤੁਪਟ੍ਠਾਨਂ ਸਮਾਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ; ਦਸ੍ਸਨਤ੍ਥਾਯ ਆਵਜ੍ਜਨਾਯ ਸਮੁਦਯੋ ਪਞ੍ਞਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਦਸ੍ਸਨਵਸੇਨ ਛਨ੍ਦਸ੍ਸ ਸਮੁਦਯੋ ਪਞ੍ਞਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਦਸ੍ਸਨਵਸੇਨ ਮਨਸਿਕਾਰਸ੍ਸ ਸਮੁਦਯੋ ਪਞ੍ਞਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤੁਪਟ੍ਠਾਨਂ ਪਞ੍ਞਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ. ਅਧਿਮੋਕ੍ਖਤ੍ਥਾਯ ਆਵਜ੍ਜਨਾਯ ਸਮੁਦਯੋ ਸਦ੍ਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਪਗ੍ਗਹਤ੍ਥਾਯ ਆਵਜ੍ਜਨਾਯ ਸਮੁਦਯੋ ਵੀਰਿਯਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਉਪਟ੍ਠਾਨਤ੍ਥਾਯ ਆਵਜ੍ਜਨਾਯ ਸਮੁਦਯੋ ਸਤਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਅਵਿਕ੍ਖੇਪਤ੍ਥਾਯ ਆਵਜ੍ਜਨਾਯ ਸਮੁਦਯੋ ਸਮਾਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਦਸ੍ਸਨਤ੍ਥਾਯ ਆਵਜ੍ਜਨਾਯ ਸਮੁਦਯੋ ਪਞ੍ਞਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ. ਅਧਿਮੋਕ੍ਖਵਸੇਨ ਛਨ੍ਦਸ੍ਸ ਸਮੁਦਯੋ ਸਦ੍ਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਪਗ੍ਗਹਵਸੇਨ ਛਨ੍ਦਸ੍ਸ ਸਮੁਦਯੋ ਵੀਰਿਯਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਉਪਟ੍ਠਾਨਵਸੇਨ ਛਨ੍ਦਸ੍ਸ ਸਮੁਦਯੋ ਸਤਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਅਵਿਕ੍ਖੇਪਵਸੇਨ ਛਨ੍ਦਸ੍ਸ ਸਮੁਦਯੋ ਸਮਾਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਦਸ੍ਸਨਵਸੇਨ ਛਨ੍ਦਸ੍ਸ ਸਮੁਦਯੋ ਪਞ੍ਞਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ. ਅਧਿਮੋਕ੍ਖਵਸੇਨ ਮਨਸਿਕਾਰਸ੍ਸ ਸਮੁਦਯੋ ਸਦ੍ਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਪਗ੍ਗਹਵਸੇਨ ਮਨਸਿਕਾਰਸ੍ਸ ਸਮੁਦਯੋ ਵੀਰਿਯਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਉਪਟ੍ਠਾਨਵਸੇਨ ਮਨਸਿਕਾਰਸ੍ਸ ਸਮੁਦਯੋ ਸਤਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਅਵਿਕ੍ਖੇਪਵਸੇਨ ਮਨਸਿਕਾਰਸ੍ਸ ਸਮੁਦਯੋ ਸਮਾਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਦਸ੍ਸਨਵਸੇਨ ਮਨਸਿਕਾਰਸ੍ਸ ਸਮੁਦਯੋ ਪਞ੍ਞਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ. ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤੁਪਟ੍ਠਾਨਂ ਸਦ੍ਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ ਵੀਰਿਯਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤੁਪਟ੍ਠਾਨਂ ਵੀਰਿਯਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਸਤਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤੁਪਟ੍ਠਾਨਂ ਸਤਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਸਮਾਧਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤੁਪਟ੍ਠਾਨਂ ਸਮਾਧਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ, ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤੁਪਟ੍ਠਾਨਂ ਪਞ੍ਞਿਨ੍ਦ੍ਰਿਯਸ੍ਸ ਸਮੁਦਯੋ ਹੋਤਿ.
ਇਮੇਹਿ ਚਤ੍ਤਾਰੀਸਾਯ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਸਮੁਦਯੋ ਹੋਤਿ, ਇਮੇਹਿ ਚਤ੍ਤਾਰੀਸਾਯ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਸਮੁਦਯਂ ਪਜਾਨਾਤਿ.
ਕਤਮੇਹਿ ਚਤ੍ਤਾਰੀਸਾਯ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਤ੍ਥਙ੍ਗਮੋ ਹੋਤਿ; ਕਤਮੇਹਿ ਚਤ੍ਤਾਰੀਸਾਯ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਤ੍ਥਙ੍ਗਮਂ ਪਜਾਨਾਤਿ? ਅਧਿਮੋਕ੍ਖਤ੍ਥਾਯ ਆਵਜ੍ਜਨਾਯ ਅਤ੍ਥਙ੍ਗਮੋ ਸਦ੍ਧਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਅਧਿਮੋਕ੍ਖਵਸੇਨ ਛਨ੍ਦਸ੍ਸ ਅਤ੍ਥਙ੍ਗਮੋ ਸਦ੍ਧਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਅਧਿਮੋਕ੍ਖਵਸੇਨ ਮਨਸਿਕਾਰਸ੍ਸ ਅਤ੍ਥਙ੍ਗਮੋ ਸਦ੍ਧਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤਅਨੁਪਟ੍ਠਾਨਂ [ਏਕਤ੍ਤਂ ਅਨੁਪਟ੍ਠਾਨਂ (ਸ੍ਯਾ.)] ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਅਤ੍ਥਙ੍ਗਮੋ ਹੋਤਿ; ਪਗ੍ਗਹਤ੍ਥਾਯ ਆਵਜ੍ਜਨਾਯ ਅਤ੍ਥਙ੍ਗਮੋ ਵੀਰਿਯਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਪਗ੍ਗਹਵਸੇਨ ਛਨ੍ਦਸ੍ਸ ਅਤ੍ਥਙ੍ਗਮੋ ਵੀਰਿਯਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਪਗ੍ਗਹਵਸੇਨ ਮਨਸਿਕਾਰਸ੍ਸ ਅਤ੍ਥਙ੍ਗਮੋ ਵੀਰਿਯਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਵੀਰਿਯਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤਅਨੁਪਟ੍ਠਾਨਂ ਵੀਰਿਯਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ; ਉਪਟ੍ਠਾਨਤ੍ਥਾਯ ਆਵਜ੍ਜਨਾਯ ਅਤ੍ਥਙ੍ਗਮੋ ਸਤਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਉਪਟ੍ਠਾਨਵਸੇਨ ਛਨ੍ਦਸ੍ਸ ਅਤ੍ਥਙ੍ਗਮੋ ਸਤਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਉਪਟ੍ਠਾਨਵਸੇਨ ਮਨਸਿਕਾਰਸ੍ਸ ਅਤ੍ਥਙ੍ਗਮੋ ਸਤਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਸਤਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤਅਨੁਪਟ੍ਠਾਨਂ ਸਤਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ; ਅਵਿਕ੍ਖੇਪਤ੍ਥਾਯ ਆਵਜ੍ਜਨਾਯ ਅਤ੍ਥਙ੍ਗਮੋ ਸਮਾਧਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਅਵਿਕ੍ਖੇਪਵਸੇਨ ਛਨ੍ਦਸ੍ਸ ਅਤ੍ਥਙ੍ਗਮੋ ਸਮਾਧਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਅਵਿਕ੍ਖੇਪਵਸੇਨ ਮਨਸਿਕਾਰਸ੍ਸ ਅਤ੍ਥਙ੍ਗਮੋ ਸਮਾਧਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਸਮਾਧਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤਅਨੁਪਟ੍ਠਾਨਂ ਸਮਾਧਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ; ਦਸ੍ਸਨਤ੍ਥਾਯ ਆਵਜ੍ਜਨਾਯ ਅਤ੍ਥਙ੍ਗਮੋ ਪਞ੍ਞਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਦਸ੍ਸਨਵਸੇਨ ਛਨ੍ਦਸ੍ਸ ਅਤ੍ਥਙ੍ਗਮੋ ਪਞ੍ਞਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਦਸ੍ਸਨਵਸੇਨ ਮਨਸਿਕਾਰਸ੍ਸ ਅਤ੍ਥਙ੍ਗਮੋ ਪਞ੍ਞਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤਅਨੁਪਟ੍ਠਾਨਂ ਪਞ੍ਞਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ.
ਅਧਿਮੋਕ੍ਖਤ੍ਥਾਯ ਆਵਜ੍ਜਨਾਯ ਅਤ੍ਥਙ੍ਗਮੋ ਸਦ੍ਧਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਪਗ੍ਗਹਤ੍ਥਾਯ ਆਵਜ੍ਜਨਾਯ ਅਤ੍ਥਙ੍ਗਮੋ ਵੀਰਿਯਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਉਪਟ੍ਠਾਨਤ੍ਥਾਯ ਆਵਜ੍ਜਨਾਯ ਅਤ੍ਥਙ੍ਗਮੋ ਸਤਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਅਵਿਕ੍ਖੇਪਤ੍ਥਾਯ ਆਵਜ੍ਜਨਾਯ ਅਤ੍ਥਙ੍ਗਮੋ ਸਮਾਧਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਦਸ੍ਸਨਤ੍ਥਾਯ ਆਵਜ੍ਜਨਾਯ ਅਤ੍ਥਙ੍ਗਮੋ ਪਞ੍ਞਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ. ਅਧਿਮੋਕ੍ਖਵਸੇਨ ਛਨ੍ਦਸ੍ਸ ਅਤ੍ਥਙ੍ਗਮੋ ਸਦ੍ਧਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਪਗ੍ਗਹਵਸੇਨ ਛਨ੍ਦਸ੍ਸ ਅਤ੍ਥਙ੍ਗਮੋ ਵੀਰਿਯਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਉਪਟ੍ਠਾਨਵਸੇਨ ਛਨ੍ਦਸ੍ਸ ਅਤ੍ਥਙ੍ਗਮੋ ਸਤਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਅਵਿਕ੍ਖੇਪਵਸੇਨ ਛਨ੍ਦਸ੍ਸ ਅਤ੍ਥਙ੍ਗਮੋ ਸਮਾਧਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਦਸ੍ਸਨਵਸੇਨ ਛਨ੍ਦਸ੍ਸ ਅਤ੍ਥਙ੍ਗਮੋ ਪਞ੍ਞਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ. ਅਧਿਮੋਕ੍ਖਵਸੇਨ ਮਨਸਿਕਾਰਸ੍ਸ ਅਤ੍ਥਙ੍ਗਮੋ ਸਦ੍ਧਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਪਗ੍ਗਹਵਸੇਨ ਮਨਸਿਕਾਰਸ੍ਸ ਅਤ੍ਥਙ੍ਗਮੋ ਵੀਰਿਯਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਉਪਟ੍ਠਾਨਵਸੇਨ ਮਨਸਿਕਾਰਸ੍ਸ ਅਤ੍ਥਙ੍ਗਮੋ ਸਤਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਅਵਿਕ੍ਖੇਪਵਸੇਨ ਮਨਸਿਕਾਰਸ੍ਸ ਅਤ੍ਥਙ੍ਗਮੋ ਸਮਾਧਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਦਸ੍ਸਨਵਸੇਨ ਮਨਸਿਕਾਰਸ੍ਸ ਅਤ੍ਥਙ੍ਗਮੋ ਪਞ੍ਞਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ. ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤਅਨੁਪਟ੍ਠਾਨਂ ਸਦ੍ਧਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਵੀਰਿਯਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤਅਨੁਪਟ੍ਠਾਨਂ ਵੀਰਿਯਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਸਤਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤਅਨੁਪਟ੍ਠਾਨਂ ਸਤਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਸਮਾਧਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤਅਨੁਪਟ੍ਠਾਨਂ ਸਮਾਧਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ, ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਏਕਤ੍ਤਅਨੁਪਟ੍ਠਾਨਂ ਪਞ੍ਞਿਨ੍ਦ੍ਰਿਯਸ੍ਸ ਅਤ੍ਥਙ੍ਗਮੋ ਹੋਤਿ.
ਇਮੇਹਿ ਚਤ੍ਤਾਰੀਸਾਯ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਤ੍ਥਙ੍ਗਮੋ ਹੋਤਿ; ਇਮੇਹਿ ਚਤ੍ਤਾਰੀਸਾਯ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਤ੍ਥਙ੍ਗਮਂ ਪਜਾਨਾਤਿ.
ਕ. ਅਸ੍ਸਾਦਨਿਦ੍ਦੇਸੋ
੧੮੯. ਕਤਮੇਹਿ ਪਞ੍ਚਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਸ੍ਸਾਦੋ ਹੋਤਿ; ਕਤਮੇਹਿ ਪਞ੍ਚਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਸ੍ਸਾਦਂ ਪਜਾਨਾਤਿ? ਅਸ੍ਸਦ੍ਧਿਯਸ੍ਸ ਅਨੁਪਟ੍ਠਾਨਂ ਸਦ੍ਧਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਅਸ੍ਸਦ੍ਧਿਯਪਰਿਲ਼ਾਹਸ੍ਸ ਅਨੁਪਟ੍ਠਾਨਂ ਸਦ੍ਧਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਅਧਿਮੋਕ੍ਖਚਰਿਯਾਯ ਵੇਸਾਰਜ੍ਜਂ ਸਦ੍ਧਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਸਨ੍ਤੋ ਚ ਵਿਹਾਰਾਧਿਗਮੋ ਸਦ੍ਧਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਯਂ ਸਦ੍ਧਿਨ੍ਦ੍ਰਿਯਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਂ ਸੋਮਨਸ੍ਸਂ ਅਯਂ ਸਦ੍ਧਿਨ੍ਦ੍ਰਿਯਸ੍ਸ ਅਸ੍ਸਾਦੋ.
ਕੋਸਜ੍ਜਸ੍ਸ ਅਨੁਪਟ੍ਠਾਨਂ ਵੀਰਿਯਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਕੋਸਜ੍ਜਪਰਿਲ਼ਾਹਸ੍ਸ ਅਨੁਪਟ੍ਠਾਨਂ ਵੀਰਿਯਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਪਗ੍ਗਹਚਰਿਯਾਯ ਵੇਸਾਰਜ੍ਜਂ ਵੀਰਿਯਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਸਨ੍ਤੋ ਚ ਵਿਹਾਰਾਧਿਗਮੋ ਵੀਰਿਯਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਯਂ ਵੀਰਿਯਿਨ੍ਦ੍ਰਿਯਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਂ ਸੋਮਨਸ੍ਸਂ ਅਯਂ ਵੀਰਿਯਿਨ੍ਦ੍ਰਿਯਸ੍ਸ ਅਸ੍ਸਾਦੋ.
ਪਮਾਦਸ੍ਸ ਅਨੁਪਟ੍ਠਾਨਂ ਸਤਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਪਮਾਦਪਰਿਲ਼ਾਹਸ੍ਸ ਅਨੁਪਟ੍ਠਾਨਂ ਸਤਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਉਪਟ੍ਠਾਨਚਰਿਯਾਯ ਵੇਸਾਰਜ੍ਜਂ ਸਤਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਸਨ੍ਤੋ ਚ ਵਿਹਾਰਾਧਿਗਮੋ ਸਤਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਯਂ ਸਤਿਨ੍ਦ੍ਰਿਯਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਂ ਸੋਮਨਸ੍ਸਂ ਅਯਂ ਸਤਿਨ੍ਦ੍ਰਿਯਸ੍ਸ ਅਸ੍ਸਾਦੋ.
ਉਦ੍ਧਚ੍ਚਸ੍ਸ ਅਨੁਪਟ੍ਠਾਨਂ ਸਮਾਧਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਉਦ੍ਧਚ੍ਚਪਰਿਲ਼ਾਹਸ੍ਸ ਅਨੁਪਟ੍ਠਾਨਂ ਸਮਾਧਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਅਵਿਕ੍ਖੇਪਚਰਿਯਾਯ ਵੇਸਾਰਜ੍ਜਂ ਸਮਾਧਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਸਨ੍ਤੋ ਚ ਵਿਹਾਰਾਧਿਗਮੋ ਸਮਾਧਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਯਂ ਸਮਾਧਿਨ੍ਦ੍ਰਿਯਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਂ ਸੋਮਨਸ੍ਸਂ ਅਯਂ ਸਮਾਧਿਨ੍ਦ੍ਰਿਯਸ੍ਸ ਅਸ੍ਸਾਦੋ.
ਅਵਿਜ੍ਜਾਯ ਅਨੁਪਟ੍ਠਾਨਂ ਪਞ੍ਞਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਅਵਿਜ੍ਜਾਪਰਿਲ਼ਾਹਸ੍ਸ ਅਨੁਪਟ੍ਠਾਨਂ ਪਞ੍ਞਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਦਸ੍ਸਨਚਰਿਯਾਯ ਵੇਸਾਰਜ੍ਜਂ ਪਞ੍ਞਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਸਨ੍ਤੋ ਚ ਵਿਹਾਰਾਧਿਗਮੋ ਪਞ੍ਞਿਨ੍ਦ੍ਰਿਯਸ੍ਸ ਅਸ੍ਸਾਦੋ ਹੋਤਿ, ਯਂ ਪਞ੍ਞਿਨ੍ਦ੍ਰਿਯਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਂ ਸੋਮਨਸ੍ਸਂ ਅਯਂ ਪਞ੍ਞਿਨ੍ਦ੍ਰਿਯਸ੍ਸ ਅਸ੍ਸਾਦੋ.
ਇਮੇਹਿ ਪਞ੍ਚਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਸ੍ਸਾਦੋ ਹੋਤਿ; ਇਮੇਹਿ ਪਞ੍ਚਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਸ੍ਸਾਦਂ ਪਜਾਨਾਤਿ.
ਖ. ਆਦੀਨਵਨਿਦ੍ਦੇਸੋ
੧੯੦. ਕਤਮੇਹਿ ਪਞ੍ਚਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਆਦੀਨਵੋ ਹੋਤਿ; ਕਤਮੇਹਿ ਪਞ੍ਚਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਆਦੀਨਵਂ ਪਜਾਨਾਤਿ? ਅਸ੍ਸਦ੍ਧਿਯਸ੍ਸ ਉਪਟ੍ਠਾਨਂ ਸਦ੍ਧਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਅਸ੍ਸਦ੍ਧਿਯਪਰਿਲ਼ਾਹਸ੍ਸ ਉਪਟ੍ਠਾਨਂ ਸਦ੍ਧਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਅਨਿਚ੍ਚਟ੍ਠੇਨ ਸਦ੍ਧਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਦੁਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਅਨਤ੍ਤਟ੍ਠੇਨ ਸਦ੍ਧਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ.
ਕੋਸਜ੍ਜਸ੍ਸ ਉਪਟ੍ਠਾਨਂ ਵੀਰਿਯਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਕੋਸਜ੍ਜਪਰਿਲ਼ਾਹਸ੍ਸ ਉਪਟ੍ਠਾਨਂ ਵੀਰਿਯਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਅਨਿਚ੍ਚਟ੍ਠੇਨ ਵੀਰਿਯਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਦੁਕ੍ਖਟ੍ਠੇਨ…ਪੇ… ਅਨਤ੍ਤਟ੍ਠੇਨ ਵੀਰਿਯਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ.
ਪਮਾਦਸ੍ਸ ਉਪਟ੍ਠਾਨਂ ਸਤਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਪਮਾਦਪਰਿਲ਼ਾਹਸ੍ਸ ਉਪਟ੍ਠਾਨਂ ਸਤਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਅਨਿਚ੍ਚਟ੍ਠੇਨ ਸਤਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਦੁਕ੍ਖਟ੍ਠੇਨ…ਪੇ… ਅਨਤ੍ਤਟ੍ਠੇਨ ਸਤਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ.
ਉਦ੍ਧਚ੍ਚਸ੍ਸ ਉਪਟ੍ਠਾਨਂ ਸਮਾਧਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਉਦ੍ਧਚ੍ਚਪਰਿਲ਼ਾਹਸ੍ਸ ਉਪਟ੍ਠਾਨਂ ਸਮਾਧਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਅਨਿਚ੍ਚਟ੍ਠੇਨ ਸਮਾਧਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਦੁਕ੍ਖਟ੍ਠੇਨ…ਪੇ… ਅਨਤ੍ਤਟ੍ਠੇਨ ਸਮਾਧਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ.
ਅਵਿਜ੍ਜਾਯ ਉਪਟ੍ਠਾਨਂ ਪਞ੍ਞਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਅਵਿਜ੍ਜਾਪਰਿਲ਼ਾਹਸ੍ਸ ਉਪਟ੍ਠਾਨਂ ਪਞ੍ਞਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਅਨਿਚ੍ਚਟ੍ਠੇਨ ਪਞ੍ਞਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਦੁਕ੍ਖਟ੍ਠੇਨ ਪਞ੍ਞਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ, ਅਨਤ੍ਤਟ੍ਠੇਨ ਪਞ੍ਞਿਨ੍ਦ੍ਰਿਯਸ੍ਸ ਆਦੀਨਵੋ ਹੋਤਿ.
ਇਮੇਹਿ ਪਞ੍ਚਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਆਦੀਨਵੋ ਹੋਤਿ; ਇਮੇਹਿ ਪਞ੍ਚਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਆਦੀਨਵਂ ਪਜਾਨਾਤਿ.
ਗ. ਨਿਸ੍ਸਰਣਨਿਦ੍ਦੇਸੋ
੧੯੧. ਕਤਮੇਹਿ ਅਸੀਤਿਸਤਂ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਨਿਸ੍ਸਰਣਂ ਹੋਤਿ; ਕਤਮੇਹਿ ਅਸੀਤਿਸਤਂ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਨਿਸ੍ਸਰਣਂ ਪਜਾਨਾਤਿ? ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਅਸ੍ਸਦ੍ਧਿਯਾ ਨਿਸ੍ਸਟਂ ਹੋਤਿ, ਅਸ੍ਸਦ੍ਧਿਯਪਰਿਲ਼ਾਹਾ ਨਿਸ੍ਸਟਂ ਹੋਤਿ, ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਨਿਸ੍ਸਟਂ ਹੋਤਿ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਨਿਸ੍ਸਟਂ ਹੋਤਿ, ਤਤੋ ਪਣੀਤਤਰਸਦ੍ਧਿਨ੍ਦ੍ਰਿਯਸ੍ਸ ਪਟਿਲਾਭਾ ਪੁਰਿਮਤਰਸਦ੍ਧਿਨ੍ਦ੍ਰਿਯਾ ਨਿਸ੍ਸਟਂ ਹੋਤਿ; ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਕੋਸਜ੍ਜਾ ਨਿਸ੍ਸਟਂ ਹੋਤਿ, ਕੋਸਜ੍ਜਪਰਿਲ਼ਾਹਾ ਨਿਸ੍ਸਟਂ ਹੋਤਿ, ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਨਿਸ੍ਸਟਂ ਹੋਤਿ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਨਿਸ੍ਸਟਂ ਹੋਤਿ, ਤਤੋ ਪਣੀਤਤਰਵੀਰਿਯਿਨ੍ਦ੍ਰਿਯਸ੍ਸ ਪਟਿਲਾਭਾ ਪੁਰਿਮਤਰਵੀਰਿਯਿਨ੍ਦ੍ਰਿਯਾ ਨਿਸ੍ਸਟਂ ਹੋਤਿ; ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਪਮਾਦਾ ਨਿਸ੍ਸਟਂ ਹੋਤਿ, ਪਮਾਦਪਰਿਲ਼ਾਹਾ ਨਿਸ੍ਸਟਂ ਹੋਤਿ, ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਨਿਸ੍ਸਟਂ ਹੋਤਿ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਨਿਸ੍ਸਟਂ ਹੋਤਿ, ਤਤੋ ਪਣੀਤਤਰਸਤਿਨ੍ਦ੍ਰਿਯਸ੍ਸ ਪਟਿਲਾਭਾ ਪੁਰਿਮਤਰਸਤਿਨ੍ਦ੍ਰਿਯਾ ਨਿਸ੍ਸਟਂ ਹੋਤਿ; ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਉਦ੍ਧਚ੍ਚਾ ਨਿਸ੍ਸਟਂ ਹੋਤਿ, ਉਦ੍ਧਚ੍ਚਪਰਿਲ਼ਾਹਾ ਨਿਸ੍ਸਟਂ ਹੋਤਿ, ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਨਿਸ੍ਸਟਂ ਹੋਤਿ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਨਿਸ੍ਸਟਂ ਹੋਤਿ, ਤਤੋ ਪਣੀਤਤਰਸਮਾਧਿਨ੍ਦ੍ਰਿਯਸ੍ਸ ਪਟਿਲਾਭਾ ਪੁਰਿਮਤਰਸਮਾਧਿਨ੍ਦ੍ਰਿਯਾ ਨਿਸ੍ਸਟਂ ਹੋਤਿ; ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਅਵਿਜ੍ਜਾਯ ਨਿਸ੍ਸਟਂ ਹੋਤਿ, ਅਵਿਜ੍ਜਾਪਰਿਲ਼ਾਹਾ ਨਿਸ੍ਸਟਂ ਹੋਤਿ, ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਨਿਸ੍ਸਟਂ ਹੋਤਿ, ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਨਿਸ੍ਸਟਂ ਹੋਤਿ, ਤਤੋ ਪਣੀਤਤਰਪਞ੍ਞਿਨ੍ਦ੍ਰਿਯਸ੍ਸ ਪਟਿਲਾਭਾ ਪੁਰਿਮਤਰਪਞ੍ਞਿਨ੍ਦ੍ਰਿਯਾ ਨਿਸ੍ਸਟਂ ਹੋਤਿ.
੧੯੨. ਪੁਬ੍ਬਭਾਗੇ ਪਞ੍ਚਹਿ ਇਨ੍ਦ੍ਰਿਯੇਹਿ ਪਠਮਜ੍ਝਾਨਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਪਠਮੇ ਝਾਨੇ ਪਞ੍ਚਹਿਨ੍ਦ੍ਰਿਯੇਹਿ ਦੁਤਿਯਜ੍ਝਾਨਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਦੁਤਿਯੇ ਝਾਨੇ ਪਞ੍ਚਹਿਨ੍ਦ੍ਰਿਯੇਹਿ ਤਤਿਯਜ੍ਝਾਨਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਤਤਿਯੇ ਝਾਨੇ ਪਞ੍ਚਹਿਨ੍ਦ੍ਰਿਯੇਹਿ ਚਤੁਤ੍ਥਜ੍ਝਾਨਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਚਤੁਤ੍ਥੇ ਝਾਨੇ ਪਞ੍ਚਹਿਨ੍ਦ੍ਰਿਯੇਹਿ ਆਕਾਸਾਨਞ੍ਚਾਯਤਨਸਮਾਪਤ੍ਤਿਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਆਕਾਸਾਨਞ੍ਚਾਯਤਨਸਮਾਪਤ੍ਤਿਯਾ ਪਞ੍ਚਹਿਨ੍ਦ੍ਰਿਯੇਹਿ ਵਿਞ੍ਞਾਣਞ੍ਚਾਯਤਨਸਮਾਪਤ੍ਤਿਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਵਿਞ੍ਞਾਣਞ੍ਚਾਯਤਨਸਮਾਪਤ੍ਤਿਯਾ ਪਞ੍ਚਹਿਨ੍ਦ੍ਰਿਯੇਹਿ ਆਕਿਞ੍ਚਞ੍ਞਾਯਤਨਸਮਾਪਤ੍ਤਿਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਆਕਿਞ੍ਚਞ੍ਞਾਯਤਨਸਮਾਪਤ੍ਤਿਯਾ ਪਞ੍ਚਹਿਨ੍ਦ੍ਰਿਯੇਹਿ ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਯਾ ਪਞ੍ਚਹਿਨ੍ਦ੍ਰਿਯੇਹਿ ਅਨਿਚ੍ਚਾਨੁਪਸ੍ਸਨਾਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ.
ਅਨਿਚ੍ਚਾਨੁਪਸ੍ਸਨਾ ਪਞ੍ਚਹਿਨ੍ਦ੍ਰਿਯੇਹਿ ਦੁਕ੍ਖਾਨੁਪਸ੍ਸਨਾਵਸੇ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਦੁਕ੍ਖਾਨੁਪਸ੍ਸਨਾ ਪਞ੍ਚਹਿਨ੍ਦ੍ਰਿਯੇਹਿ ਅਨਤ੍ਤਾਨੁਪਸ੍ਸਨਾਵਸੇ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਅਨਤ੍ਤਾਨੁਪਸ੍ਸਨਾ ਪਞ੍ਚਹਿਨ੍ਦ੍ਰਿਯੇਹਿ ਨਿਬ੍ਬਿਦਾਨੁਪਸ੍ਸਨਾਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਨਿਬ੍ਬਿਦਾਨੁਪਸ੍ਸਨਾਯ ਪਞ੍ਚਹਿਨ੍ਦ੍ਰਿਯੇਹਿ ਵਿਰਾਗਾਨੁਪਸ੍ਸਨਾਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਵਿਰਾਗਾਨੁਪਸ੍ਸਨਾਯ ਪਞ੍ਚਹਿਨ੍ਦ੍ਰਿਯੇਹਿ ਨਿਰੋਧਾਨੁਪਸ੍ਸਨਾਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਨਿਰੋਧਾਨੁਪਸ੍ਸਨਾਯ ਪਞ੍ਚਹਿਨ੍ਦ੍ਰਿਯੇਹਿ ਪਟਿਨਿਸ੍ਸਗ੍ਗਾਨੁਪਸ੍ਸਨਾਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਪਟਿਨਿਸ੍ਸਗ੍ਗਾਨੁਪਸ੍ਸਨਾਯ ਪਞ੍ਚਹਿਨ੍ਦ੍ਰਿਯੇਹਿ ਖਯਾਨੁਪਸ੍ਸਨਾਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਖਯਾਨੁਪਸ੍ਸਨਾਯ ਪਞ੍ਚਹਿਨ੍ਦ੍ਰਿਯੇਹਿ ਵਯਾਨੁਪਸ੍ਸਨਾਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਵਯਾਨੁਪਸ੍ਸਨਾਯ ਪਞ੍ਚਹਿਨ੍ਦ੍ਰਿਯੇਹਿ ਵਿਪਰਿਣਾਮਾਨੁਪਸ੍ਸਨਾਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਵਿਪਰਿਣਾਮਾਨੁਪਸ੍ਸਨਾਯ ਪਞ੍ਚਹਿਨ੍ਦ੍ਰਿਯੇਹਿ ਅਨਿਮਿਤ੍ਤਾਨੁਪਸ੍ਸਨਾਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਅਨਿਮਿਤ੍ਤਾਨੁਪਸ੍ਸਨਾਯ ਪਞ੍ਚਹਿਨ੍ਦ੍ਰਿਯੇਹਿ ਅਪ੍ਪਣਿਹਿਤਾਨੁਪਸ੍ਸਨਾਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਅਪ੍ਪਣਿਹਿਤਾਨੁਪਸ੍ਸਨਾਯ ਪਞ੍ਚਹਿਨ੍ਦ੍ਰਿਯੇਹਿ ਸੁਞ੍ਞਤਾਨੁਪਸ੍ਸਨਾਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ ਸੁਞ੍ਞਤਾਨੁਪਸ੍ਸਨਾਯ ਪਞ੍ਚਹਿਨ੍ਦ੍ਰਿਯੇਹਿ ਅਧਿਪਞ੍ਞਾਧਮ੍ਮਵਿਪਸ੍ਸਨਾਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ. ਅਧਿਪਞ੍ਞਾਧਮ੍ਮਵਿਪਸ੍ਸਨਾਯ ਪਞ੍ਚਹਿਨ੍ਦ੍ਰਿਯੇਹਿ ਯਥਾਭੂਤਞਾਣਦਸ੍ਸਨਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਯਥਾਭੂਤਞਾਣਦਸ੍ਸਨੇ ਪਞ੍ਚਹਿਨ੍ਦ੍ਰਿਯੇਹਿ ਆਦੀਨਵਾਨੁਪਸ੍ਸਨਾਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਆਦੀਨਵਾਨੁਪਸ੍ਸਨਾਯ ਪਞ੍ਚਹਿਨ੍ਦ੍ਰਿਯੇਹਿ ਪਟਿਸਙ੍ਖਾਨੁਪਸ੍ਸਨਾਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਪਟਿਸਙ੍ਖਾਨੁਪਸ੍ਸਨਾਯ ਪਞ੍ਚਹਿਨ੍ਦ੍ਰਿਯੇਹਿ ਵਿਵਟ੍ਟਨਾਨੁਪਸ੍ਸਨਾਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ. ਵਿਵਟ੍ਟਨਾਨੁਪਸ੍ਸਨਾਯ ਪਞ੍ਚਹਿਨ੍ਦ੍ਰਿਯੇਹਿ ਸੋਤਾਪਤ੍ਤਿਮਗ੍ਗਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ.
ਸੋਤਾਪਤ੍ਤਿਮਗ੍ਗੇ ਪਞ੍ਚਹਿਨ੍ਦ੍ਰਿਯੇਹਿ ਸੋਤਾਪਤ੍ਤਿਫਲਸਮਾਪਤ੍ਤਿਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਸੋਤਾਪਤ੍ਤਿਫਲਸਮਾਪਤ੍ਤਿਯਾ ਪਞ੍ਚਹਿਨ੍ਦ੍ਰਿਯੇਹਿ ਸਕਦਾਗਾਮਿਮਗ੍ਗਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਸਕਦਾਗਾਮਿਮਗ੍ਗੇ ਪਞ੍ਚਹਿਨ੍ਦ੍ਰਿਯੇਹਿ ਸਕਦਾਗਾਮਿਫਲਸਮਾਪਤ੍ਤਿਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਸਕਦਾਗਾਮਿਫਲਸਮਾਪਤ੍ਤਿਯਾ ਪਞ੍ਚਹਿਨ੍ਦ੍ਰਿਯੇਹਿ ਅਨਾਗਾਮਿਮਗ੍ਗਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਅਨਾਗਾਮਿਮਗ੍ਗੇ ਪਞ੍ਚਹਿਨ੍ਦ੍ਰਿਯੇਹਿ ਅਨਾਗਾਮਿਫਲਸਮਾਪਤ੍ਤਿਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਅਨਾਗਾਮਿਫਲਸਮਾਪਤ੍ਤਿਯਾ ਪਞ੍ਚਹਿਨ੍ਦ੍ਰਿਯੇਹਿ ਅਰਹਤ੍ਤਮਗ੍ਗਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ, ਅਰਹਤ੍ਤਮਗ੍ਗੇ ਪਞ੍ਚਹਿਨ੍ਦ੍ਰਿਯੇਹਿ ਅਰਹਤ੍ਤਫਲਸਮਾਪਤ੍ਤਿਵਸੇਨ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਹੋਨ੍ਤਿ.
ਨੇਕ੍ਖਮ੍ਮੇ ਪਞ੍ਚਿਨ੍ਦ੍ਰਿਯਾਨਿ ਕਾਮਚ੍ਛਨ੍ਦਤੋ ਨਿਸ੍ਸਟਾਨਿ ਹੋਨ੍ਤਿ, ਅਬ੍ਯਾਪਾਦੇ ਪਞ੍ਚਿਨ੍ਦ੍ਰਿਯਾਨਿ ਬ੍ਯਾਪਾਦਤੋ ਨਿਸ੍ਸਟਾਨਿ ਹੋਨ੍ਤਿ, ਆਲੋਕਸਞ੍ਞਾਯ ਪਞ੍ਚਿਨ੍ਦ੍ਰਿਯਾਨਿ ਥਿਨਮਿਦ੍ਧਤੋ ਨਿਸ੍ਸਟਾਨਿ ਹੋਨ੍ਤਿ, ਅਵਿਕ੍ਖੇਪੇ ਪਞ੍ਚਿਨ੍ਦ੍ਰਿਯਾਨਿ ਉਦ੍ਧਚ੍ਚਤੋ ਨਿਸ੍ਸਟਾਨਿ ਹੋਨ੍ਤਿ, ਧਮ੍ਮਵਵਤ੍ਥਾਨੇ ਪਞ੍ਚਿਨ੍ਦ੍ਰਿਯਾਨਿ ਵਿਚਿਕਿਚ੍ਛਾਯ ਨਿਸ੍ਸਟਾਨਿ ਹੋਨ੍ਤਿ, ਞਾਣੇ ਪਞ੍ਚਿਨ੍ਦ੍ਰਿਯਾਨਿ ਅਵਿਜ੍ਜਾਯ ਨਿਸ੍ਸਟਾਨਿ ਹੋਨ੍ਤਿ, ਪਾਮੋਜ੍ਜੇ ਪਞ੍ਚਿਨ੍ਦ੍ਰਿਯਾਨਿ ਅਰਤਿਯਾ ਨਿਸ੍ਸਟਾਨਿ ਹੋਨ੍ਤਿ.
੧੯੩. ਪਠਮੇ ਝਾਨੇ ਪਞ੍ਚਿਨ੍ਦ੍ਰਿਯਾਨਿ ਨੀਵਰਣੇਹਿ ਨਿਸ੍ਸਟਾਨਿ ਹੋਨ੍ਤਿ, ਦੁਤਿਯੇ ਝਾਨੇ ਪਞ੍ਚਿਨ੍ਦ੍ਰਿਯਾਨਿ ਵਿਤਕ੍ਕਵਿਚਾਰੇਹਿ ਨਿਸ੍ਸਟਾਨਿ ਹੋਨ੍ਤਿ, ਤਤਿਯੇ ਝਾਨੇ ਪਞ੍ਚਿਨ੍ਦ੍ਰਿਯਾਨਿ ਪੀਤਿਯਾ ਨਿਸ੍ਸਟਾਨਿ ਹੋਨ੍ਤਿ, ਚਤੁਤ੍ਥੇ ਝਾਨੇ ਪਞ੍ਚਿਨ੍ਦ੍ਰਿਯਾਨਿ ਸੁਖਦੁਕ੍ਖੇਹਿ ਨਿਸ੍ਸਟਾਨਿ ਹੋਨ੍ਤਿ, ਆਕਾਸਾਨਞ੍ਚਾਯਤਨਸਮਾਪਤ੍ਤਿਯਾ ਪਞ੍ਚਿਨ੍ਦ੍ਰਿਯਾਨਿ ਰੂਪਸਞ੍ਞਾਯ ਪਟਿਘਸਞ੍ਞਾਯ ਨਾਨਤ੍ਤਸਞ੍ਞਾਯ ਨਿਸ੍ਸਟਾਨਿ ਹੋਨ੍ਤਿ, ਵਿਞ੍ਞਾਣਞ੍ਚਾਯਤਨਸਮਾਪਤ੍ਤਿਯਾ ਪਞ੍ਚਿਨ੍ਦ੍ਰਿਯਾਨਿ ਆਕਾਸਾਨਞ੍ਚਾਯਤਨਸਞ੍ਞਾਯ ਨਿਸ੍ਸਟਾਨਿ ਹੋਨ੍ਤਿ, ਆਕਿਞ੍ਚਞ੍ਞਾਯਤਨਸਮਾਪਤ੍ਤਿਯਾ ਪਞ੍ਚਿਨ੍ਦ੍ਰਿਯਾਨਿ ਵਿਞ੍ਞਾਣਞ੍ਚਾਯਤਨਸਞ੍ਞਾਯ ਨਿਸ੍ਸਟਾਨਿ ਹੋਨ੍ਤਿ, ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਯਾ ਪਞ੍ਚਿਨ੍ਦ੍ਰਿਯਾਨਿ ਆਕਿਞ੍ਚਞ੍ਞਾਯਤਨਸਞ੍ਞਾਯ ਨਿਸ੍ਸਟਾਨਿ ਹੋਨ੍ਤਿ.
ਅਨਿਚ੍ਚਾਨੁਪਸ੍ਸਨਾ ਪਞ੍ਚਿਨ੍ਦ੍ਰਿਯਾਨਿ ਨਿਚ੍ਚਸਞ੍ਞਾਯ ਨਿਸ੍ਸਟਾਨਿ ਹੋਨ੍ਤਿ, ਦੁਕ੍ਖਾਨੁਪਸ੍ਸਨਾ ਪਞ੍ਚਿਨ੍ਦ੍ਰਿਯਾਨਿ ਸੁਖਸਞ੍ਞਾਯ ਨਿਸ੍ਸਟਾਨਿ ਹੋਨ੍ਤਿ, ਅਨਤ੍ਤਾਨੁਪਸ੍ਸਨਾ ਪਞ੍ਚਿਨ੍ਦ੍ਰਿਯਾਨਿ ਅਤ੍ਤਸਞ੍ਞਾਯ ਨਿਸ੍ਸਟਾਨਿ ਹੋਨ੍ਤਿ, ਨਿਬ੍ਬਿਦਾਨੁਪਸ੍ਸਨਾਯ ਪਞ੍ਚਿਨ੍ਦ੍ਰਿਯਾਨਿ ਨਨ੍ਦਿਯਾ ਨਿਸ੍ਸਟਾਨਿ ਹੋਨ੍ਤਿ, ਵਿਰਾਗਾਨੁਪਸ੍ਸਨਾਯ ਪਞ੍ਚਿਨ੍ਦ੍ਰਿਯਾਨਿ ਰਾਗਤੋ ਨਿਸ੍ਸਟਾਨਿ ਹੋਨ੍ਤਿ, ਨਿਰੋਧਾਨੁਪਸ੍ਸਨਾਯ ਪਞ੍ਚਿਨ੍ਦ੍ਰਿਯਾਨਿ ਸਮੁਦਯਤੋ ਨਿਸ੍ਸਟਾਨਿ ਹੋਨ੍ਤਿ, ਪਟਿਨਿਸ੍ਸਗ੍ਗਾਨੁਪਸ੍ਸਨਾਯ ਪਞ੍ਚਿਨ੍ਦ੍ਰਿਯਾਨਿ ਆਦਾਨਤੋ ਨਿਸ੍ਸਟਾਨਿ ਹੋਨ੍ਤਿ, ਖਯਾਨੁਪਸ੍ਸਨਾਯ ਪਞ੍ਚਿਨ੍ਦ੍ਰਿਯਾਨਿ ਘਨਸਞ੍ਞਾਯ ਨਿਸ੍ਸਟਾਨਿ ਹੋਨ੍ਤਿ, ਵਯਾਨੁਪਸ੍ਸਨਾਯ ਪਞ੍ਚਿਨ੍ਦ੍ਰਿਯਾਨਿ ਆਯੂਹਨਤੋ ਨਿਸ੍ਸਟਾਨਿ ਹੋਨ੍ਤਿ, ਵਿਪਰਿਣਾਮਾਨੁਪਸ੍ਸਨਾਯ ਪਞ੍ਚਿਨ੍ਦ੍ਰਿਯਾਨਿ ਧੁਵਸਞ੍ਞਾਯ ਨਿਸ੍ਸਟਾਨਿ ਹੋਨ੍ਤਿ, ਅਨਿਮਿਤ੍ਤਾਨੁਪਸ੍ਸਨਾਯ ਪਞ੍ਚਿਨ੍ਦ੍ਰਿਯਾਨਿ ਨਿਮਿਤ੍ਤਤੋ ਨਿਸ੍ਸਟਾਨਿ ਹੋਨ੍ਤਿ, ਅਪ੍ਪਣਿਹਿਤਾਨੁਪਸ੍ਸਨਾਯ ਪਞ੍ਚਿਨ੍ਦ੍ਰਿਯਾਨਿ ਪਣਿਧਿਯਾ ਨਿਸ੍ਸਟਾਨਿ ਹੋਨ੍ਤਿ, ਸੁਞ੍ਞਤਾਨੁਪਸ੍ਸਨਾਯ ਪਞ੍ਚਿਨ੍ਦ੍ਰਿਯਾਨਿ ਅਭਿਨਿਵੇਸਤੋ ਨਿਸ੍ਸਟਾਨਿ ਹੋਨ੍ਤਿ. ਅਧਿਪਞ੍ਞਾਧਮ੍ਮਵਿਪਸ੍ਸਨਾਯ ਪਞ੍ਚਿਨ੍ਦ੍ਰਿਯਾਨਿ ਸਾਰਾਦਾਨਾਭਿਨਿਵੇਸਤੋ ਨਿਸ੍ਸਟਾਨਿ ਹੋਨ੍ਤਿ, ਯਥਾਭੂਤਞਾਣਦਸ੍ਸਨੇ ਪਞ੍ਚਿਨ੍ਦ੍ਰਿਯਾਨਿ ਸਮ੍ਮੋਹਾਭਿਨਿਵੇਸਤੋ ਨਿਸ੍ਸਟਾਨਿ ਹੋਨ੍ਤਿ, ਆਦੀਨਵਾਨੁਪਸ੍ਸਨਾਯ ਪਞ੍ਚਿਨ੍ਦ੍ਰਿਯਾਨਿ ਆਲਯਾਭਿਨਿਵੇਸਤੋ ਨਿਸ੍ਸਟਾਨਿ ਹੋਨ੍ਤਿ, ਪਟਿਸਙ੍ਖਾਨੁਪਸ੍ਸਨਾਯ ਪਞ੍ਚਿਨ੍ਦ੍ਰਿਯਾਨਿ ਅਪ੍ਪਟਿਸਙ੍ਖਾਯ ਨਿਸ੍ਸਟਾਨਿ ਹੋਨ੍ਤਿ, ਵਿਵਟ੍ਟਨਾਨੁਪਸ੍ਸਨਾਯ ਪਞ੍ਚਿਨ੍ਦ੍ਰਿਯਾਨਿ ਸਞ੍ਞੋਗਾਭਿਨਿਵੇਸਤੋ ਨਿਸ੍ਸਟਾਨਿ ਹੋਨ੍ਤਿ.
ਸੋਤਾਪਤ੍ਤਿਮਗ੍ਗੇ ਪਞ੍ਚਿਨ੍ਦ੍ਰਿਯਾਨਿ ਦਿਟ੍ਠੇਕਟ੍ਠੇਹਿ ਕਿਲੇਸੇਹਿ ਨਿਸ੍ਸਟਾਨਿ ਹੋਨ੍ਤਿ, ਸਕਦਾਗਾਮਿਮਗ੍ਗੇ ਪਞ੍ਚਿਨ੍ਦ੍ਰਿਯਾਨਿ ਓਲ਼ਾਰਿਕੇਹਿ ਕਿਲੇਸੇਹਿ ਨਿਸ੍ਸਟਾਨਿ ਹੋਨ੍ਤਿ, ਅਨਾਗਾਮਿਮਗ੍ਗੇ ਪਞ੍ਚਿਨ੍ਦ੍ਰਿਯਾਨਿ ਅਨੁਸਹਗਤੇਹਿ ਕਿਲੇਸੇਹਿ ਨਿਸ੍ਸਟਾਨਿ ਹੋਨ੍ਤਿ, ਅਰਹਤ੍ਤਮਗ੍ਗੇ ਪਞ੍ਚਿਨ੍ਦ੍ਰਿਯਾਨਿ ਸਬ੍ਬਕਿਲੇਸੇਹਿ ਨਿਸ੍ਸਟਾਨਿ ਹੋਨ੍ਤਿ, ਸਬ੍ਬੇਸਞ੍ਞੇਵ ਖੀਣਾਸਵਾਨਂ ਤਤ੍ਥ ਤਤ੍ਥ ਪਞ੍ਚਿਨ੍ਦ੍ਰਿਯਾਨਿ ਨਿਸ੍ਸਟਾਨਿ ਚੇਵ ਹੋਨ੍ਤਿ ਸੁਨਿਸ੍ਸਟਾਨਿ ਚ ਪਟਿਪ੍ਪਸ੍ਸਦ੍ਧਾਨਿ ਚ ਸੁਪ੍ਪਟਿਪ੍ਪਸ੍ਸਦ੍ਧਾਨਿ ਚ.
ਇਮੇਹਿ ਅਸੀਤਿਸਤਂ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਨਿਸ੍ਸਰਣਂ ਹੋਤਿ; ਇਮੇਹਿ ਅਸੀਤਿਸਤਂ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਨਿਸ੍ਸਰਣਂ ਪਜਾਨਾਤਿ.
ਸੁਤ੍ਤਨ੍ਤਨਿਦ੍ਦੇਸੋ ਦੁਤਿਯੋ.
ਪਠਮਭਾਣਵਾਰੋ.
੩. ਤਤਿਯਸੁਤ੍ਤਨ੍ਤਨਿਦ੍ਦੇਸੋ
੧੯੪. ਸਾਵਤ੍ਥਿਨਿਦਾਨਂ [ਸਂ. ਨਿ. ੫.੪੭੮-੪੭੯ ਪਸ੍ਸਿਤਬ੍ਬਾ]. ‘‘ਪਞ੍ਚਿਮਾਨਿ, ਭਿਕ੍ਖਵੇ, ਇਨ੍ਦ੍ਰਿਯਾਨਿ. ਕਤਮਾਨਿ ਪਞ੍ਚ? ਸਦ੍ਧਿਨ੍ਦ੍ਰਿਯਂ, ਵੀਰਿਯਿਨ੍ਦ੍ਰਿਯਂ, ਸਤਿਨ੍ਦ੍ਰਿਯਂ, ਸਮਾਧਿਨ੍ਦ੍ਰਿਯਂ, ਪਞ੍ਞਿਨ੍ਦ੍ਰਿਯਂ. ਕਤ੍ਥ ਚ, ਭਿਕ੍ਖਵੇ, ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ? ਚਤੂਸੁ ਸੋਤਾਪਤ੍ਤਿਯਙ੍ਗੇਸੁ – ਏਤ੍ਥ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ. ਕਤ੍ਥ ਚ, ਭਿਕ੍ਖਵੇ, ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ? ਚਤੂਸੁ ਸਮ੍ਮਪ੍ਪਧਾਨੇਸੁ – ਏਤ੍ਥ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ. ਕਤ੍ਥ ਚ, ਭਿਕ੍ਖਵੇ, ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ? ਚਤੂਸੁ ਸਤਿਪਟ੍ਠਾਨੇਸੁ – ਏਤ੍ਥ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ. ਕਤ੍ਥ ਚ, ਭਿਕ੍ਖਵੇ, ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ? ਚਤੂਸੁ ਝਾਨੇਸੁ – ਏਤ੍ਥ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ. ਕਤ੍ਥ ਚ, ਭਿਕ੍ਖਵੇ, ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ? ਚਤੂਸੁ ਅਰਿਯਸਚ੍ਚੇਸੁ – ਏਤ੍ਥ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ’’.
ਚਤੂਸੁ ਸੋਤਾਪਤ੍ਤਿਯਙ੍ਗੇਸੁ ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਕਤਿਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ? ਚਤੂਸੁ ਸਮ੍ਮਪ੍ਪਧਾਨੇਸੁ ਵੀਰਿਯਿਨ੍ਦ੍ਰਿਯਸ੍ਸ ਵਸੇਨ ਕਤਿਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ? ਚਤੂਸੁ ਸਤਿਪਟ੍ਠਾਨੇਸੁ ਸਤਿਨ੍ਦ੍ਰਿਯਸ੍ਸ ਵਸੇਨ ਕਤਿਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ? ਚਤੂਸੁ ਝਾਨੇਸੁ ਸਮਾਧਿਨ੍ਦ੍ਰਿਯਸ੍ਸ ਵਸੇਨ ਕਤਿਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ? ਚਤੂਸੁ ਅਰਿਯਸਚ੍ਚੇਸੁ ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਕਤਿਹਾਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ?
ਚਤੂਸੁ ਸੋਤਾਪਤ੍ਤਿਯਙ੍ਗੇਸੁ ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਵੀਸਤਿਯਾ ਆਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ. ਚਤੂਸੁ ਸਮ੍ਮਪ੍ਪਧਾਨੇਸੁ ਵੀਰਿਯਿਨ੍ਦ੍ਰਿਯਸ੍ਸ ਵਸੇਨ ਵੀਸਤਿਯਾ ਆਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ. ਚਤੂਸੁ ਸਤਿਪਟ੍ਠਾਨੇਸੁ ਸਤਿਨ੍ਦ੍ਰਿਯਸ੍ਸ ਵਸੇਨ ਵੀਸਤਿਯਾ ਆਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ. ਚਤੂਸੁ ਝਾਨੇਸੁ ਸਮਾਧਿਨ੍ਦ੍ਰਿਯਸ੍ਸ ਵਸੇਨ ਵੀਸਤਿਯਾ ਆਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ. ਚਤੂਸੁ ਅਰਿਯਸਚ੍ਚੇਸੁ ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਵੀਸਤਿਯਾ ਆਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ.
ਕ. ਪਭੇਦਗਣਨਨਿਦ੍ਦੇਸੋ
੧੯੫. ਚਤੂਸੁ ਸੋਤਾਪਤ੍ਤਿਯਙ੍ਗੇਸੁ ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਕਤਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ? ਸਪ੍ਪੁਰਿਸਸਂਸੇਵੇ ਸੋਤਾਪਤ੍ਤਿਯਙ੍ਗੇ ਅਧਿਮੋਕ੍ਖਾਧਿਪਤੇਯ੍ਯਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ; ਸਦ੍ਧਮ੍ਮਸਵਨੇ ਸੋਤਾਪਤ੍ਤਿਯਙ੍ਗੇ… ਯੋਨਿਸੋਮਨਸਿਕਾਰੇ ਸੋਤਾਪਤ੍ਤਿਯਙ੍ਗੇ… ਧਮ੍ਮਾਨੁਧਮ੍ਮਪਟਿਪਤ੍ਤਿਯਾ ਸੋਤਾਪਤ੍ਤਿਯਙ੍ਗੇ ਅਧਿਮੋਕ੍ਖਾਧਿਪਤੇਯ੍ਯਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ. ਚਤੂਸੁ ਸੋਤਾਪਤ੍ਤਿਯਙ੍ਗੇਸੁ ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਇਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ.
ਚਤੂਸੁ ਸਮ੍ਮਪ੍ਪਧਾਨੇਸੁ ਵੀਰਿਯਿਨ੍ਦ੍ਰਿਯਸ੍ਸ ਵਸੇਨ ਕਤਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ? ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾਯ ਸਮ੍ਮਪ੍ਪਧਾਨੇ ਪਗ੍ਗਹਾਧਿਪਤੇਯ੍ਯਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਵੀਰਿਯਿਨ੍ਦ੍ਰਿਯਸ੍ਸ ਵਸੇਨ ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ. ਉਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ ਸਮ੍ਮਪ੍ਪਧਾਨੇ…ਪੇ… ਅਨੁਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਉਪ੍ਪਾਦਾਯ ਸਮ੍ਮਪ੍ਪਧਾਨੇ…ਪੇ… ਉਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਠਿਤਿਯਾ ਅਸਮ੍ਮੋਸਾਯ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਭਾਵਨਾਯ ਪਾਰਿਪੂਰਿਯਾ ਸਮ੍ਮਪ੍ਪਧਾਨੇ ਪਗ੍ਗਹਾਧਿਪਤੇਯ੍ਯਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਵੀਰਿਯਿਨ੍ਦ੍ਰਿਯਸ੍ਸ ਵਸੇਨ ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ. ਚਤੂਸੁ ਸਮ੍ਮਪ੍ਪਧਾਨੇਸੁ ਵੀਰਿਯਿਨ੍ਦ੍ਰਿਯਸ੍ਸ ਵਸੇਨ ਇਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ.
ਚਤੂਸੁ ਸਤਿਪਟ੍ਠਾਨੇਸੁ ਸਤਿਨ੍ਦ੍ਰਿਯਸ੍ਸ ਵਸੇਨ ਕਤਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ? ਕਾਯੇ ਕਾਯਾਨੁਪਸ੍ਸਨਾਸਤਿਪਟ੍ਠਾਨੇ ਉਪਟ੍ਠਾਨਾਧਿਪਤੇਯ੍ਯਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਸਤਿਨ੍ਦ੍ਰਿਯਸ੍ਸ ਵਸੇਨ ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ. ਵੇਦਨਾਸੁ ਵੇਦਨਾਨੁਪਸ੍ਸਨਾਸਤਿਪਟ੍ਠਾਨੇ…ਪੇ… ਚਿਤ੍ਤੇ ਚਿਤ੍ਤਾਨੁਪਸ੍ਸਨਾਸਤਿਪਟ੍ਠਾਨੇ… ਧਮ੍ਮੇਸੁ ਧਮ੍ਮਾਨੁਪਸ੍ਸਨਾਸਤਿਪਟ੍ਠਾਨੇ ਉਪਟ੍ਠਾਨਾਧਿਪਤੇਯ੍ਯਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਸਤਿਨ੍ਦ੍ਰਿਯਸ੍ਸ ਵਸੇਨ ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ. ਚਤੂਸੁ ਸਤਿਪਟ੍ਠਾਨੇਸੁ ਸਤਿਨ੍ਦ੍ਰਿਯਸ੍ਸ ਵਸੇਨ ਇਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ.
ਚਤੂਸੁ ਝਾਨੇਸੁ ਸਮਾਧਿਨ੍ਦ੍ਰਿਯਸ੍ਸ ਵਸੇਨ ਕਤਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ? ਪਠਮੇ ਝਾਨੇ ਅਵਿਕ੍ਖੇਪਾਧਿਪਤੇਯ੍ਯਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਸਮਾਧਿਨ੍ਦ੍ਰਿਯਸ੍ਸ ਵਸੇਨ ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ. ਦੁਤਿਯੇ ਝਾਨੇ…ਪੇ… ਤਤਿਯੇ ਝਾਨੇ… ਚਤੁਤ੍ਥੇ ਝਾਨੇ ਅਵਿਕ੍ਖੇਪਾਧਿਪਤੇਯ੍ਯਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਸਮਾਧਿਨ੍ਦ੍ਰਿਯਸ੍ਸ ਵਸੇਨ ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ. ਚਤੂਸੁ ਝਾਨੇਸੁ ਸਮਾਧਿਨ੍ਦ੍ਰਿਯਸ੍ਸ ਵਸੇਨ ਇਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ.
ਚਤੂਸੁ ਅਰਿਯਸਚ੍ਚੇਸੁ ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਕਤਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ? ਦੁਕ੍ਖੇ ਅਰਿਯਸਚ੍ਚੇ ਦਸ੍ਸਨਾਧਿਪਤੇਯ੍ਯਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ. ਦੁਕ੍ਖਸਮੁਦਯੇ ਅਰਿਯਸਚ੍ਚੇ…ਪੇ… ਦੁਕ੍ਖਨਿਰੋਧੇ ਅਰਿਯਸਚ੍ਚੇ… ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਅਰਿਯਸਚ੍ਚੇ ਦਸ੍ਸਨਾਧਿਪਤੇਯ੍ਯਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ. ਚਤੂਸੁ ਅਰਿਯਸਚ੍ਚੇਸੁ ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਇਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਿਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ.
ਖ. ਚਰਿਯਵਾਰੋ
੧੯੬. ਚਤੂਸੁ ਸੋਤਾਪਤ੍ਤਿਯਙ੍ਗੇਸੁ ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਕਤਿਹਾਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਚਰਿਯਾ ਦਟ੍ਠਬ੍ਬਾ?
ਚਤੂਸੁ ਸਮ੍ਮਪ੍ਪਧਾਨੇਸੁ…ਪੇ… ਚਤੂਸੁ ਸਤਿਪਟ੍ਠਾਨੇਸੁ… ਚਤੂਸੁ ਝਾਨੇਸੁ… ਚਤੂਸੁ ਅਰਿਯਸਚ੍ਚੇਸੁ ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਕਤਿਹਾਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਚਰਿਯਾ ਦਟ੍ਠਬ੍ਬਾ? ਚਤੂਸੁ ਸੋਤਾਪਤ੍ਤਿਯਙ੍ਗੇਸੁ ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਚਰਿਯਾ ਦਟ੍ਠਬ੍ਬਾ. ਚਤੂਸੁ ਸਮ੍ਮਪ੍ਪਧਾਨੇਸੁ…ਪੇ… ਚਤੂਸੁ ਸਤਿਪਟ੍ਠਾਨੇਸੁ… ਚਤੂਸੁ ਝਾਨੇਸੁ… ਚਤੂਸੁ ਅਰਿਯਸਚ੍ਚੇਸੁ ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਚਰਿਯਾ ਦਟ੍ਠਬ੍ਬਾ.
ਚਤੂਸੁ ਸੋਤਾਪਤ੍ਤਿਯਙ੍ਗੇਸੁ ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਕਤਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਚਰਿਯਾ ਦਟ੍ਠਬ੍ਬਾ? ਸਪ੍ਪੁਰਿਸਸਂਸੇਵੇ ਸੋਤਾਪਤ੍ਤਿਯਙ੍ਗੇ ਅਧਿਮੋਕ੍ਖਾਧਿਪਤੇਯ੍ਯਟ੍ਠੇਨ ਸਦ੍ਧਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ. ਸਦ੍ਧਮ੍ਮਸਵਨੇ ਸੋਤਾਪਤ੍ਤਿਯਙ੍ਗੇ…ਪੇ… ਯੋਨਿਸੋ ਮਨਸਿਕਾਰੇ ਸੋਤਾਪਤ੍ਤਿਯਙ੍ਗੇ… ਧਮ੍ਮਾਨੁਧਮ੍ਮਪਟਿਪਤ੍ਤਿਯਾ ਸੋਤਾਪਤ੍ਤਿਯਙ੍ਗੇ ਅਧਿਮੋਕ੍ਖਾਧਿਪਤੇਯ੍ਯਟ੍ਠੇਨ ਸਦ੍ਧਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ. ਚਤੂਸੁ ਸੋਤਾਪਤ੍ਤਿਯਙ੍ਗੇਸੁ ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਇਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਚਰਿਯਾ ਦਟ੍ਠਬ੍ਬਾ.
ਚਤੂਸੁ ਸਮ੍ਮਪ੍ਪਧਾਨੇਸੁ ਵੀਰਿਯਿਨ੍ਦ੍ਰਿਯਸ੍ਸ ਵਸੇਨ ਕਤਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਚਰਿਯਾ ਦਟ੍ਠਬ੍ਬਾ? ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾਯ ਸਮ੍ਮਪ੍ਪਧਾਨੇ ਪਗ੍ਗਹਾਧਿਪਤੇਯ੍ਯਟ੍ਠੇਨ ਵੀਰਿਯਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਵੀਰਿਯਿਨ੍ਦ੍ਰਿਯਸ੍ਸ ਵਸੇਨ ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ. ਉਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ ਸਮ੍ਮਪ੍ਪਧਾਨੇ…ਪੇ… ਅਨੁਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਉਪ੍ਪਾਦਾਯ ਸਮ੍ਮਪ੍ਪਧਾਨੇ…ਪੇ… ਉਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਠਿਤਿਯਾ ਅਸਮ੍ਮੋਸਾਯ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਭਾਵਨਾਯ ਪਾਰਿਪੂਰਿਯਾ ਸਮ੍ਮਪ੍ਪਧਾਨੇ ਪਗ੍ਗਹਾਧਿਪਤੇਯ੍ਯਟ੍ਠੇਨ ਵੀਰਿਯਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ…ਪੇ… ਚਤੂਸੁ ਸਮ੍ਮਪ੍ਪਧਾਨੇਸੁ ਵੀਰਿਯਿਨ੍ਦ੍ਰਿਯਸ੍ਸ ਵਸੇਨ ਇਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਚਰਿਯਾ ਦਟ੍ਠਬ੍ਬਾ.
ਚਤੂਸੁ ਸਤਿਪਟ੍ਠਾਨੇਸੁ ਸਤਿਨ੍ਦ੍ਰਿਯਸ੍ਸ ਵਸੇਨ ਕਤਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਚਰਿਯਾ ਦਟ੍ਠਬ੍ਬਾ? ਕਾਯੇ ਕਾਯਾਨੁਪਸ੍ਸਨਾਸਤਿਪਟ੍ਠਾਨੇ ਉਪਟ੍ਠਾਨਾਧਿਪਤੇਯ੍ਯਟ੍ਠੇਨ ਸਤਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਸਤਿਨ੍ਦ੍ਰਿਯਸ੍ਸ ਵਸੇਨ ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ. ਵੇਦਨਾਸੁ ਵੇਦਨਾਨੁਪਸ੍ਸਨਾਸਤਿਪਟ੍ਠਾਨੇ…ਪੇ… ਚਿਤ੍ਤੇ ਚਿਤ੍ਤਾਨੁਪਸ੍ਸਨਾਸਤਿਪਟ੍ਠਾਨੇ…ਪੇ… ਧਮ੍ਮੇਸੁ ਧਮ੍ਮਾਨੁਪਸ੍ਸਨਾਸਤਿਪਟ੍ਠਾਨੇ ਉਪਟ੍ਠਾਨਾਧਿਪਤੇਯ੍ਯਟ੍ਠੇਨ ਸਤਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ…ਪੇ… ਚਤੂਸੁ ਸਤਿਪਟ੍ਠਾਨੇਸੁ ਸਤਿਨ੍ਦ੍ਰਿਯਸ੍ਸ ਵਸੇਨ ਇਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਚਰਿਯਾ ਦਟ੍ਠਬ੍ਬਾ.
ਚਤੂਸੁ ਝਾਨੇਸੁ ਸਮਾਧਿਨ੍ਦ੍ਰਿਯਸ੍ਸ ਵਸੇਨ ਕਤਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਚਰਿਯਾ ਦਟ੍ਠਬ੍ਬਾ? ਪਠਮੇ ਝਾਨੇ ਅਵਿਕ੍ਖੇਪਾਧਿਪਤੇਯ੍ਯਟ੍ਠੇਨ ਸਮਾਧਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਸਮਾਧਿਨ੍ਦ੍ਰਿਯਸ੍ਸ ਵਸੇਨ ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ. ਦੁਤਿਯੇ ਝਾਨੇ…ਪੇ… ਤਤਿਯੇ ਝਾਨੇ…ਪੇ… ਚਤੁਤ੍ਥੇ ਝਾਨੇ ਅਵਿਕ੍ਖੇਪਾਧਿਪਤੇਯ੍ਯਟ੍ਠੇਨ ਸਮਾਧਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ…ਪੇ… ਚਤੂਸੁ ਝਾਨੇਸੁ ਸਮਾਧਿਨ੍ਦ੍ਰਿਯਸ੍ਸ ਵਸੇਨ ਇਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਚਰਿਯਾ ਦਟ੍ਠਬ੍ਬਾ.
ਚਤੂਸੁ ਅਰਿਯਸਚ੍ਚੇਸੁ ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਕਤਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਚਰਿਯਾ ਦਟ੍ਠਬ੍ਬਾ? ਦੁਕ੍ਖੇ ਅਰਿਯਸਚ੍ਚੇ ਦਸ੍ਸਨਾਧਿਪਤੇਯ੍ਯਟ੍ਠੇਨ ਪਞ੍ਞਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ. ਦੁਕ੍ਖਸਮੁਦਯੇ ਅਰਿਯਸਚ੍ਚੇ…ਪੇ… ਦੁਕ੍ਖਨਿਰੋਧੇ ਅਰਿਯਸਚ੍ਚੇ… ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਅਰਿਯਸਚ੍ਚੇ ਦਸ੍ਸਨਾਧਿਪਤੇਯ੍ਯਟ੍ਠੇਨ ਪਞ੍ਞਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਸ੍ਸ ਚਰਿਯਾ ਦਟ੍ਠਬ੍ਬਾ. ਚਤੂਸੁ ਅਰਿਯਸਚ੍ਚੇਸੁ ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਇਮੇਹਿ ਵੀਸਤਿਯਾ ਆਕਾਰੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਚਰਿਯਾ ਦਟ੍ਠਬ੍ਬਾ.
ਗ. ਚਾਰਵਿਹਾਰਨਿਦ੍ਦੇਸੋ
੧੯੭. ਚਾਰੋ ਚ ਵਿਹਾਰੋ ਚ ਅਨੁਬੁਦ੍ਧੋ ਹੋਤਿ ਪਟਿਵਿਦ੍ਧੋ, ਯਥਾਚਰਨ੍ਤਂ ਯਥਾਵਿਹਰਨ੍ਤਂ ਵਿਞ੍ਞੂ ਸਬ੍ਰਹ੍ਮਚਾਰੀ ਗਮ੍ਭੀਰੇਸੁ ਠਾਨੇਸੁ ਓਕਪ੍ਪੇਯ੍ਯੁਂ – ‘‘ਅਦ੍ਧਾ, ਅਯਮਾਯਸ੍ਮਾ ਪਤ੍ਤੋ ਵਾ ਪਾਪੁਣਿਸ੍ਸਤਿ ਵਾ’’.
ਚਰਿਯਾਤਿ ਅਟ੍ਠ ਚਰਿਯਾਯੋ – ਇਰਿਯਾਪਥਚਰਿਯਾ, ਆਯਤਨਚਰਿਯਾ, ਸਤਿਚਰਿਯਾ, ਸਮਾਧਿਚਰਿਯਾ, ਞਾਣਚਰਿਯਾ, ਮਗ੍ਗਚਰਿਯਾ, ਪਤ੍ਤਿਚਰਿਯਾ, ਲੋਕਤ੍ਥਚਰਿਯਾਤਿ. ਇਰਿਯਾਪਥਚਰਿਯਾਤਿ ਚਤੂਸੁ ਇਰਿਯਾਪਥੇਸੁ. ਆਯਤਨਚਰਿਯਾਤਿ ਛਸੁ ਅਜ੍ਝਤ੍ਤਿਕਬਾਹਿਰੇਸੁ ਆਯਤਨੇਸੁ. ਸਤਿਚਰਿਯਾਤਿ ਚਤੂਸੁ ਸਤਿਪਟ੍ਠਾਨੇਸੁ. ਸਮਾਧਿਚਰਿਯਾਤਿ ਚਤੂਸੁ ਝਾਨੇਸੁ. ਞਾਣਚਰਿਯਾਤਿ ਚਤੂਸੁ ਅਰਿਯਸਚ੍ਚੇਸੁ. ਮਗ੍ਗਚਰਿਯਾਤਿ ਚਤੂਸੁ ਅਰਿਯਮਗ੍ਗੇਸੁ. ਪਤ੍ਤਿਚਰਿਯਾਤਿ ਚਤੂਸੁ ਸਾਮਞ੍ਞਫਲੇਸੁ. ਲੋਕਤ੍ਥਚਰਿਯਾਤਿ ਤਥਾਗਤੇਸੁ ਅਰਹਨ੍ਤੇਸੁ ਸਮ੍ਮਾਸਮ੍ਬੁਦ੍ਧੇਸੁ, ਪਦੇਸੇ ਪਚ੍ਚੇਕਬੁਦ੍ਧੇਸੁ, ਪਦੇਸੇ ਸਾਵਕੇਸੁ. ਇਰਿਯਾਪਥਚਰਿਯਾ ਚ ਪਣਿਧਿਸਮ੍ਪਨ੍ਨਾਨਂ, ਆਯਤਨਚਰਿਯਾ ਚ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਾਨਂ, ਸਤਿਚਰਿਯਾ ਚ ਅਪ੍ਪਮਾਦਵਿਹਾਰੀਨਂ, ਸਮਾਧਿਚਰਿਯਾ ਚ ਅਧਿਚਿਤ੍ਤਮਨੁਯੁਤ੍ਤਾਨਂ, ਞਾਣਚਰਿਯਾ ਚ ਬੁਦ੍ਧਿਸਮ੍ਪਨ੍ਨਾਨਂ, ਮਗ੍ਗਚਰਿਯਾ ਚ ਸਮ੍ਮਾਪਟਿਪਨ੍ਨਾਨਂ, ਪਤ੍ਤਿਚਰਿਯਾ ਚ ਅਧਿਗਤਫਲਾਨਂ, ਲੋਕਤ੍ਥਚਰਿਯਾ ਚ ਤਥਾਗਤਾਨਂ ਅਰਹਨ੍ਤਾਨਂ ਸਮ੍ਮਾਸਮ੍ਬੁਦ੍ਧਾਨਂ, ਪਦੇਸੇ ਪਚ੍ਚੇਕਬੁਦ੍ਧਾਨਂ, ਪਦੇਸੇ ਸਾਵਕਾਨਂ. ਇਮਾ ਅਟ੍ਠ ਚਰਿਯਾਯੋ.
ਅਪਰਾਪਿ ਅਟ੍ਠ ਚਰਿਯਾਯੋ. ਅਧਿਮੁਚ੍ਚਨ੍ਤੋ ਸਦ੍ਧਾਯ ਚਰਤਿ, ਪਗ੍ਗਣ੍ਹਨ੍ਤੋ ਵੀਰਿਯੇਨ ਚਰਤਿ, ਉਪਟ੍ਠਾਪੇਨ੍ਤੋ ਸਤਿਯਾ ਚਰਤਿ, ਅਵਿਕ੍ਖੇਪਂ ਕਰੋਨ੍ਤੋ ਸਮਾਧਿਨਾ ਚਰਤਿ, ਪਜਾਨਨ੍ਤੋ ਪਞ੍ਞਾਯ ਚਰਤਿ, ਵਿਜਾਨਨ੍ਤੋ ਵਿਞ੍ਞਾਣਚਰਿਯਾਯ ਚਰਤਿ, ਏਵਂ ਪਟਿਪਨ੍ਨਸ੍ਸ ਕੁਸਲਾ ਧਮ੍ਮਾ ਆਯਾਪੇਨ੍ਤੀਤਿ ਆਯਤਨਚਰਿਯਾਯ ਚਰਤਿ, ਏਵਂ ਪਟਿਪਨ੍ਨੋ ਵਿਸੇਸਮਧਿਗਚ੍ਛਤੀਤਿ ਵਿਸੇਸਚਰਿਯਾਯ ਚਰਤਿ – ਇਮਾ ਅਟ੍ਠ ਚਰਿਯਾਯੋ.
ਅਪਰਾਪਿ ਅਟ੍ਠ ਚਰਿਯਾਯੋ. ਦਸ੍ਸਨਚਰਿਯਾ ਚ ਸਮ੍ਮਾਦਿਟ੍ਠਿਯਾ, ਅਭਿਨਿਰੋਪਨਚਰਿਯਾ ਚ ਸਮ੍ਮਾਸਙ੍ਕਪ੍ਪਸ੍ਸ, ਪਰਿਗ੍ਗਹਚਰਿਯਾ ਚ ਸਮ੍ਮਾਵਾਚਾਯ, ਸਮੁਟ੍ਠਾਨਚਰਿਯਾ ਚ ਸਮ੍ਮਾਕਮ੍ਮਨ੍ਤਸ੍ਸ, ਵੋਦਾਨਚਰਿਯਾ ਚ ਸਮ੍ਮਾਆਜੀਵਸ੍ਸ, ਪਗ੍ਗਹਚਰਿਯਾ ਚ ਸਮ੍ਮਾਵਾਯਾਮਸ੍ਸ, ਉਪਟ੍ਠਾਨਚਰਿਯਾ ਚ ਸਮ੍ਮਾਸਤਿਯਾ, ਅਵਿਕ੍ਖੇਪਚਰਿਯਾ ਚ ਸਮ੍ਮਾਸਮਾਧਿਸ੍ਸ – ਇਮਾ ਅਟ੍ਠ ਚਰਿਯਾਯੋ.
ਵਿਹਾਰੋਤਿ ਅਧਿਮੁਚ੍ਚਨ੍ਤੋ ਸਦ੍ਧਾਯ ਵਿਹਰਤਿ, ਪਗ੍ਗਣ੍ਹਨ੍ਤੋ ਵੀਰਿਯੇਨ ਵਿਹਰਤਿ, ਉਪਟ੍ਠਾਪੇਨ੍ਤੋ ਸਤਿਯਾ ਵਿਹਰਤਿ, ਅਵਿਕ੍ਖੇਪਂ ਕਰੋਨ੍ਤੋ ਸਮਾਧਿਨਾ ਵਿਹਰਤਿ, ਪਜਾਨਨ੍ਤੋ ਪਞ੍ਞਾਯ ਵਿਹਰਤਿ.
ਅਨੁਬੁਦ੍ਧੋਤਿ ਸਦ੍ਧਿਨ੍ਦ੍ਰਿਯਸ੍ਸ ਅਧਿਮੋਕ੍ਖਟ੍ਠੋ ਅਨੁਬੁਦ੍ਧੋ ਹੋਤਿ, ਵੀਰਿਯਿਨ੍ਦ੍ਰਿਯਸ੍ਸ ਪਗ੍ਗਹਟ੍ਠੋ ਅਨੁਬੁਦ੍ਧੋ ਹੋਤਿ, ਸਤਿਨ੍ਦ੍ਰਿਯਸ੍ਸ ਉਪਟ੍ਠਾਨਟ੍ਠੋ ਅਨੁਬੁਦ੍ਧੋ ਹੋਤਿ, ਸਮਾਧਿਨ੍ਦ੍ਰਿਯਸ੍ਸ ਅਵਿਕ੍ਖੇਪਟ੍ਠੋ ਅਨੁਬੁਦ੍ਧੋ ਹੋਤਿ, ਪਞ੍ਞਿਨ੍ਦ੍ਰਿਯਸ੍ਸ ਦਸ੍ਸਨਟ੍ਠੋ ਅਨੁਬੁਦ੍ਧੋ ਹੋਤਿ.
ਪਟਿਵਿਦ੍ਧੋਤਿ ਸਦ੍ਧਿਨ੍ਦ੍ਰਿਯਸ੍ਸ ਅਧਿਮੋਕ੍ਖਟ੍ਠੋ ਪਟਿਵਿਦ੍ਧੋ ਹੋਤਿ, ਵੀਰਿਯਿਨ੍ਦ੍ਰਿਯਸ੍ਸ ਪਗ੍ਗਹਟ੍ਠੋ ਪਟਿਵਿਦ੍ਧੋ ਹੋਤਿ, ਸਤਿਨ੍ਦ੍ਰਿਯਸ੍ਸ ਉਪਟ੍ਠਾਨਟ੍ਠੋ ਪਟਿਵਿਦ੍ਧੋ ਹੋਤਿ, ਸਮਾਧਿਨ੍ਦ੍ਰਿਯਸ੍ਸ ਅਵਿਕ੍ਖੇਪਟ੍ਠੋ ਪਟਿਵਿਦ੍ਧੋ ਹੋਤਿ, ਪਞ੍ਞਿਨ੍ਦ੍ਰਿਯਸ੍ਸ ਦਸ੍ਸਨਟ੍ਠੋ ਪਟਿਵਿਦ੍ਧੋ ਹੋਤਿ. ਯਥਾਚਰਨ੍ਤਨ੍ਤਿ ਏਵਂ ਸਦ੍ਧਾਯ ਚਰਨ੍ਤਂ, ਏਵਂ ਵੀਰਿਯੇਨ ਚਰਨ੍ਤਂ, ਏਵਂ ਸਤਿਯਾ ਚਰਨ੍ਤਂ, ਏਵਂ ਸਮਾਧਿਨਾ ਚਰਨ੍ਤਂ, ਏਵਂ ਪਞ੍ਞਾਯ ਚਰਨ੍ਤਂ. ਯਥਾਵਿਹਰਨ੍ਤਨ੍ਤਿ ਏਵਂ ਸਦ੍ਧਾਯ ਵਿਹਰਨ੍ਤਂ, ਏਵਂ ਵੀਰਿਯੇਨ ਵਿਹਰਨ੍ਤਂ, ਏਵਂ ਸਤਿਯਾ ਵਿਹਰਨ੍ਤਂ, ਏਵਂ ਸਮਾਧਿਨਾ ਵਿਹਰਨ੍ਤਂ, ਏਵਂ ਪਞ੍ਞਾਯ ਵਿਹਰਨ੍ਤਂ. ਵਿਞ੍ਞੂਤਿ ਵਿਞ੍ਞੂ ਵਿਭਾਵੀ ਮੇਧਾਵੀ ਪਣ੍ਡਿਤਾ ਬੁਦ੍ਧਿਸਮ੍ਪਨ੍ਨਾ. ਸਬ੍ਰਹ੍ਮਚਾਰੀਤਿ ਏਕਕਮ੍ਮਂ ਏਕੁਦ੍ਦੇਸੋ ਸਮਸਿਕ੍ਖਤਾ. ਗਮ੍ਭੀਰੇਸੁ ਠਾਨੇਸੂਤਿ ਗਮ੍ਭੀਰਾਨਿ ਠਾਨਾਨਿ ਵੁਚ੍ਚਨ੍ਤਿ ਝਾਨਾ ਚ ਵਿਮੋਕ੍ਖਾ ਚ ਸਮਾਧੀ ਚ ਸਮਾਪਤ੍ਤਿਯੋ ਚ ਮਗ੍ਗਾ ਚ ਫਲਾਨਿ ਚ ਅਭਿਞ੍ਞਾਯੋ ਚ ਪਟਿਸਮ੍ਭਿਦਾ ਚ. ਓਕਪ੍ਪੇਯ੍ਯੁਨ੍ਤਿ ਸਦ੍ਦਹੇਯ੍ਯੁਂ ਅਧਿਮੁਚ੍ਚੇਯ੍ਯੁਂ. ਅਦ੍ਧਾਤਿ ਏਕਂਸਵਚਨਮੇਤਂ ਨਿਸ੍ਸਂਸਯਵਚਨਮੇਤਂ ਨਿਕ੍ਕਙ੍ਖਵਚਨਮੇਤਂ ਅਦ੍ਵੇਜ੍ਝਵਚਨਮੇਤਂ ਅਦ੍ਵੇਲ਼੍ਹਕਵਚਨਮੇਤਂ ਨਿਯੋਗਵਚਨਮੇਤਂ ਅਪਣ੍ਣਕਵਚਨਮੇਤਂ ਅਵਤ੍ਥਾਪਨਵਚਨਮੇਤਂ – ਅਦ੍ਧਾਤਿ. ਆਯਸ੍ਮਾਤਿ ਪਿਯਵਚਨਮੇਤਂ ਗਰੁਵਚਨਮੇਤਂ ਸਗਾਰਵਸਪ੍ਪਤਿਸ੍ਸਾਧਿਵਚਨਮੇਤਂ – ਆਯਸ੍ਮਾਤਿ. ਪਤ੍ਤੋ ਵਾਤਿ ਅਧਿਗਤੋ ਵਾ. ਪਾਪੁਣਿਸ੍ਸਤਿ ਵਾਤਿ ਅਧਿਗਮਿਸ੍ਸਤਿ ਵਾ.
ਸੁਤ੍ਤਨ੍ਤਨਿਦ੍ਦੇਸੋ ਤਤਿਯੋ.
੪. ਚਤੁਤ੍ਥਸੁਤ੍ਤਨ੍ਤਨਿਦ੍ਦੇਸੋ
੧੯੮. ਪੁਰਿਮਨਿਦਾਨਂ [ਪਰਿਪੁਣ੍ਣਨਿਦਾਨਂ (ਸ੍ਯਾ. ਕ.)]. ‘‘ਪਞ੍ਚਿਮਾਨਿ, ਭਿਕ੍ਖਵੇ, ਇਨ੍ਦ੍ਰਿਯਾਨਿ. ਕਤਮਾਨਿ ਪਞ੍ਚ? ਸਦ੍ਧਿਨ੍ਦ੍ਰਿਯਂ, ਵੀਰਿਯਿਨ੍ਦ੍ਰਿਯਂ, ਸਤਿਨ੍ਦ੍ਰਿਯਂ, ਸਮਾਧਿਨ੍ਦ੍ਰਿਯਂ, ਪਞ੍ਞਿਨ੍ਦ੍ਰਿਯਂ – ਇਮਾਨਿ ਖੋ, ਭਿਕ੍ਖਵੇ, ਪਞ੍ਚਿਨ੍ਦ੍ਰਿਯਾਨਿ. ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਕਤਿਹਾਕਾਰੇਹਿ ਕੇਨਟ੍ਠੇਨ ਦਟ੍ਠਬ੍ਬਾਨਿ? ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਛਹਾਕਾਰੇਹਿ ਤੇਨਟ੍ਠੇਨ ਦਟ੍ਠਬ੍ਬਾਨਿ – ਆਧਿਪਤੇਯ੍ਯਟ੍ਠੇਨ ਆਦਿਵਿਸੋਧਨਟ੍ਠੇਨ ਅਧਿਮਤ੍ਤਟ੍ਠੇਨ, ਅਧਿਟ੍ਠਾਨਟ੍ਠੇਨ, ਪਰਿਯਾਦਾਨਟ੍ਠੇਨ, ਪਤਿਟ੍ਠਾਪਕਟ੍ਠੇਨ’’.
ਕ. ਆਧਿਪਤੇਯ੍ਯਟ੍ਠਨਿਦ੍ਦੇਸੋ
੧੯੯. ਕਥਂ ਆਧਿਪਤੇਯ੍ਯਟ੍ਠੇਨ ਇਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ? ਅਸ੍ਸਦ੍ਧਿਯਂ ਪਜਹਤੋ ਅਧਿਮੋਕ੍ਖਾਧਿਪਤੇਯ੍ਯਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ. ਕੋਸਜ੍ਜਂ ਪਜਹਤੋ ਪਗ੍ਗਹਾਧਿਪਤੇਯ੍ਯਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਵੀਰਿਯਿਨ੍ਦ੍ਰਿਯਸ੍ਸ ਵਸੇਨ ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ. ਪਮਾਦਂ ਪਜਹਤੋ ਉਪਟ੍ਠਾਨਾਧਿਪਤੇਯ੍ਯਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਸਤਿਨ੍ਦ੍ਰਿਯਸ੍ਸ ਵਸੇਨ ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ. ਉਦ੍ਧਚ੍ਚਂ ਪਜਹਤੋ ਅਵਿਕ੍ਖੇਪਾਧਿਪਤੇਯ੍ਯਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਸਮਾਧਿਨ੍ਦ੍ਰਿਯਸ੍ਸ ਵਸੇਨ ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ. ਅਵਿਜ੍ਜਂ ਪਜਹਤੋ ਦਸ੍ਸਨਾਧਿਪਤੇਯ੍ਯਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ.
ਕਾਮਚ੍ਛਨ੍ਦਂ ਪਜਹਤੋ ਨੇਕ੍ਖਮ੍ਮਵਸੇਨ ਅਧਿਮੋਕ੍ਖਾਧਿਪਤੇਯ੍ਯਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ. ਕਾਮਚ੍ਛਨ੍ਦਂ ਪਜਹਤੋ ਨੇਕ੍ਖਮ੍ਮਵਸੇਨ ਪਗ੍ਗਹਾਧਿਪਤੇਯ੍ਯਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਵੀਰਿਯਿਨ੍ਦ੍ਰਿਯਸ੍ਸ ਵਸੇਨ ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ. ਕਾਮਚ੍ਛਨ੍ਦਂ ਪਜਹਤੋ ਨੇਕ੍ਖਮ੍ਮਵਸੇਨ ਉਪਟ੍ਠਾਨਾਧਿਪਤੇਯ੍ਯਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਸਤਿਨ੍ਦ੍ਰਿਯਸ੍ਸ ਵਸੇਨ ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ. ਕਾਮਚ੍ਛਨ੍ਦਂ ਪਜਹਤੋ ਨੇਕ੍ਖਮ੍ਮਵਸੇਨ ਅਵਿਕ੍ਖੇਪਾਧਿਪਤੇਯ੍ਯਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਸਮਾਧਿਨ੍ਦ੍ਰਿਯਸ੍ਸ ਵਸੇਨ ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ. ਕਾਮਚ੍ਛਨ੍ਦਂ ਪਜਹਤੋ ਨੇਕ੍ਖਮ੍ਮਵਸੇਨ ਦਸ੍ਸਨਾਧਿਪਤੇਯ੍ਯਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ.
ਬ੍ਯਾਪਾਦਂ ਪਜਹਤੋ ਅਬ੍ਯਾਪਾਦਵਸੇਨ…ਪੇ… ਥਿਨਮਿਦ੍ਧਂ ਪਜਹਤੋ ਆਲੋਕਸਞ੍ਞਾਵਸੇਨ…ਪੇ… ਸਬ੍ਬਕਿਲੇਸੇ ਪਜਹਤੋ ਅਰਹਤ੍ਤਮਗ੍ਗਵਸੇਨ ਅਧਿਮੋਕ੍ਖਾਧਿਪਤੇਯ੍ਯਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ…ਪੇ… ਸਬ੍ਬਕਿਲੇਸੇ ਪਜਹਤੋ ਅਰਹਤ੍ਤਮਗ੍ਗਵਸੇਨ ਦਸ੍ਸਨਾਧਿਪਤੇਯ੍ਯਟ੍ਠੇਨ ਪਞ੍ਞਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਦਟ੍ਠਬ੍ਬਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਦਟ੍ਠਬ੍ਬਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਦਟ੍ਠਬ੍ਬਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਦਟ੍ਠਬ੍ਬਂ. ਏਵਂ ਆਧਿਪਤੇਯ੍ਯਟ੍ਠੇਨ ਇਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ.
ਖ. ਆਦਿਵਿਸੋਧਨਟ੍ਠਨਿਦ੍ਦੇਸੋ
੨੦੦. ਕਥਂ ਆਦਿਵਿਸੋਧਨਟ੍ਠੇਨ ਇਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ? ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ, ਅਸ੍ਸਦ੍ਧਿਯਸਂਵਰਟ੍ਠੇਨ [ਅਸ੍ਸਦ੍ਧਿਯਂ ਸਂਵਰਟ੍ਠੇਨ (ਸ੍ਯਾ. ਕ.) ਏਵਮੀਦਿਸੇਸੁ ਪਦੇਸੁਪਿ] ਸੀਲਵਿਸੁਦ੍ਧਿ – ਸਦ੍ਧਿਨ੍ਦ੍ਰਿਯਸ੍ਸ ਆਦਿਵਿਸੋਧਨਾ. ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ, ਕੋਸਜ੍ਜਸਂਵਰਟ੍ਠੇਨ ਸੀਲਵਿਸੁਦ੍ਧਿ – ਵੀਰਿਯਿਨ੍ਦ੍ਰਿਯਸ੍ਸ ਆਦਿਵਿਸੋਧਨਾ. ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ, ਪਮਾਦਸਂਵਰਟ੍ਠੇਨ ਸੀਲਵਿਸੁਦ੍ਧਿ – ਸਤਿਨ੍ਦ੍ਰਿਯਸ੍ਸ ਆਦਿਵਿਸੋਧਨਾ. ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ, ਉਦ੍ਧਚ੍ਚਸਂਵਰਟ੍ਠੇਨ ਸੀਲਵਿਸੁਦ੍ਧਿ – ਸਮਾਧਿਨ੍ਦ੍ਰਿਯਸ੍ਸ ਆਦਿਵਿਸੋਧਨਾ. ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ, ਅਵਿਜ੍ਜਾਸਂਵਰਟ੍ਠੇਨ ਸੀਲਵਿਸੁਦ੍ਧਿ – ਪਞ੍ਞਿਨ੍ਦ੍ਰਿਯਸ੍ਸ ਆਦਿਵਿਸੋਧਨਾ. ਨੇਕ੍ਖਮ੍ਮੇ ਪਞ੍ਚਿਨ੍ਦ੍ਰਿਯਾਨਿ, ਕਾਮਚ੍ਛਨ੍ਦਸਂਵਰਟ੍ਠੇਨ ਸੀਲਵਿਸੁਦ੍ਧਿ – ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਆਦਿਵਿਸੋਧਨਾ. ਅਬ੍ਯਾਪਾਦੇ ਪਞ੍ਚਿਨ੍ਦ੍ਰਿਯਾਨਿ, ਬ੍ਯਾਪਾਦਸਂਵਰਟ੍ਠੇਨ ਸੀਲਵਿਸੁਦ੍ਧਿ – ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਆਦਿਵਿਸੋਧਨਾ…ਪੇ… ਅਰਹਤ੍ਤਮਗ੍ਗੇ ਪਞ੍ਚਿਨ੍ਦ੍ਰਿਯਾਨਿ, ਸਬ੍ਬਕਿਲੇਸਸਂਵਰਟ੍ਠੇਨ ਸੀਲਵਿਸੁਦ੍ਧਿ – ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਆਦਿਵਿਸੋਧਨਾ. ਏਵਂ ਆਦਿਵਿਸੋਧਨਟ੍ਠੇਨ ਇਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ.
ਗ. ਅਧਿਮਤ੍ਤਟ੍ਠਨਿਦ੍ਦੇਸੋ
੨੦੧. ਕਥਂ ਅਧਿਮਤ੍ਤਟ੍ਠੇਨ ਇਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ? ਸਦ੍ਧਿਨ੍ਦ੍ਰਿਯਸ੍ਸ ਭਾਵਨਾਯ ਛਨ੍ਦੋ ਉਪ੍ਪਜ੍ਜਤਿ – ਛਨ੍ਦਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਛਨ੍ਦਵਸੇਨ ਪਾਮੋਜ੍ਜਂ ਉਪ੍ਪਜ੍ਜਤਿ – ਪਾਮੋਜ੍ਜਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਪਾਮੋਜ੍ਜਵਸੇਨ ਪੀਤਿ ਉਪ੍ਪਜ੍ਜਤਿ – ਪੀਤਿਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਪੀਤਿਵਸੇਨ ਪਸ੍ਸਦ੍ਧਿ ਉਪ੍ਪਜ੍ਜਤਿ – ਪਸ੍ਸਦ੍ਧਿਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਪਸ੍ਸਦ੍ਧਿਵਸੇਨ ਸੁਖਂ ਉਪ੍ਪਜ੍ਜਤਿ – ਸੁਖਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਸੁਖਵਸੇਨ ਓਭਾਸੋ ਉਪ੍ਪਜ੍ਜਤਿ – ਓਭਾਸਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਓਭਾਸਵਸੇਨ ਸਂਵੇਗੋ ਉਪ੍ਪਜ੍ਜਤਿ – ਸਂਵੇਗਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਸਂਵੇਜੇਤ੍ਵਾ ਚਿਤ੍ਤਂ ਸਮਾਦਹਤਿ – ਸਮਾਧਿਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਤਥਾ ਸਮਾਹਿਤਂ ਚਿਤ੍ਤਂ ਸਾਧੁਕਂ ਪਗ੍ਗਣ੍ਹਾਤਿ – ਪਗ੍ਗਹਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਤਥਾਪਗ੍ਗਹਿਤਂ ਚਿਤ੍ਤਂ ਸਾਧੁਕਂ ਅਜ੍ਝੁਪੇਕ੍ਖਤਿ – ਉਪੇਕ੍ਖਾਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਉਪੇਕ੍ਖਾਵਸੇਨ ਨਾਨਤ੍ਤਕਿਲੇਸੇਹਿ ਚਿਤ੍ਤਂ ਵਿਮੁਚ੍ਚਤਿ – ਵਿਮੋਕ੍ਖਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਵਿਮੁਤ੍ਤਤ੍ਤਾ ਤੇ ਧਮ੍ਮਾ ਏਕਰਸਾ ਹੋਨ੍ਤਿ – ਏਕਰਸਟ੍ਠੇਨ ਭਾਵਨਾਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਭਾਵਿਤਤ੍ਤਾ ਤਤੋ ਪਣੀਤਤਰੇ ਵਿਵਟ੍ਟਨ੍ਤਿ – ਵਿਵਟ੍ਟਨਾਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਵਿਵਟ੍ਟਿਤਤ੍ਤਾ ਤਤੋ ਵੋਸਜ੍ਜਤਿ [ਵੋਸ੍ਸਜ੍ਜਤਿ (ਸ੍ਯਾ. ਕ.)] – ਵੋਸਗ੍ਗਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਵੋਸਜ੍ਜਿਤਤ੍ਤਾ ਤਤੋ ਨਿਰੁਜ੍ਝਨ੍ਤਿ – ਨਿਰੋਧਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਨਿਰੋਧਵਸੇਨ ਦ੍ਵੇ ਵੋਸਗ੍ਗਾ – ਪਰਿਚ੍ਚਾਗਵੋਸਗ੍ਗੋ ਚ, ਪਕ੍ਖਨ੍ਦਨਵੋਸਗ੍ਗੋ ਚ. ਕਿਲੇਸੇ ਚ ਖਨ੍ਧੇ ਚ ਪਰਿਚ੍ਚਜਤੀਤਿ – ਪਰਿਚ੍ਚਾਗਵੋਸਗ੍ਗੋ. ਨਿਰੋਧਨਿਬ੍ਬਾਨਧਾਤੁਯਾ ਚਿਤ੍ਤਂ ਪਕ੍ਖਨ੍ਦਤੀਤਿ – ਪਕ੍ਖਨ੍ਦਨਵੋਸਗ੍ਗੋ. ਨਿਰੋਧਵਸੇਨ ਇਮੇ ਦ੍ਵੇ ਵੋਸਗ੍ਗਾ.
ਅਸ੍ਸਦ੍ਧਿਯਸ੍ਸ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ…ਪੇ… ਅਸ੍ਸਦ੍ਧਿਯਪਰਿਲ਼ਾਹਸ੍ਸ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ… ਦਿਟ੍ਠੇਕਟ੍ਠਾਨਂ ਕਿਲੇਸਾਨਂ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ… ਓਲ਼ਾਰਿਕਾਨਂ ਕਿਲੇਸਾਨਂ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ… ਅਨੁਸਹਗਤਾਨਂ ਕਿਲੇਸਾਨਂ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ… ਸਬ੍ਬਕਿਲੇਸਾਨਂ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ – ਛਨ੍ਦਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ…ਪੇ… ਵੀਰਿਯਿਨ੍ਦ੍ਰਿਯਸ੍ਸ ਭਾਵਨਾਯ ਛਨ੍ਦੋ ਉਪ੍ਪਜ੍ਜਤਿ…ਪੇ… ਕੋਸਜ੍ਜਸ੍ਸ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ… ਕੋਸਜ੍ਜਪਰਿਲ਼ਾਹਸ੍ਸ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ… ਦਿਟ੍ਠੇਕਟ੍ਠਾਨਂ ਕਿਲੇਸਾਨਂ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ…ਪੇ… ਸਬ੍ਬਕਿਲੇਸਾਨਂ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ… ਸਤਿਨ੍ਦ੍ਰਿਯਸ੍ਸ ਭਾਵਨਾਯ ਛਨ੍ਦੋ ਉਪ੍ਪਜ੍ਜਤਿ…ਪੇ… ਪਮਾਦਸ੍ਸ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ… ਪਮਾਦਪਰਿਲ਼ਾਹਸ੍ਸ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ…ਪੇ… ਸਬ੍ਬਕਿਲੇਸਾਨਂ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ… ਸਮਾਧਿਨ੍ਦ੍ਰਿਯਸ੍ਸ ਭਾਵਨਾਯ ਛਨ੍ਦੋ ਉਪ੍ਪਜ੍ਜਤਿ…ਪੇ… ਉਦ੍ਧਚ੍ਚਸ੍ਸ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ ਉਦ੍ਧਚ੍ਚਪਰਿਲ਼ਾਹਸ੍ਸ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ…ਪੇ… ਸਬ੍ਬਕਿਲੇਸਾਨਂ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ… ਪਞ੍ਞਿਨ੍ਦ੍ਰਿਯਸ੍ਸ ਭਾਵਨਾਯ ਛਨ੍ਦੋ ਉਪ੍ਪਜ੍ਜਤਿ…ਪੇ… ਅਵਿਜ੍ਜਾਯ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ… ਅਵਿਜ੍ਜਾਪਰਿਲ਼ਾਹਸ੍ਸ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ… ਦਿਟ੍ਠੇਕਟ੍ਠਾਨਂ ਕਿਲੇਸਾਨਂ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ… ਓਲ਼ਾਰਿਕਾਨਂ ਕਿਲੇਸਾਨਂ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ… ਅਨੁਸਹਗਤਾਨਂ ਕਿਲੇਸਾਨਂ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ… ਸਬ੍ਬਕਿਲੇਸਾਨਂ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤਿ – ਛਨ੍ਦਵਸੇਨ ਪਞ੍ਞਾਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਛਨ੍ਦਵਸੇਨ ਪਾਮੋਜ੍ਜਂ ਉਪ੍ਪਜ੍ਜਤਿ – ਪਾਮੋਜ੍ਜਵਸੇਨ ਪਞ੍ਞਾਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਪਾਮੋਜ੍ਜਵਸੇਨ ਪੀਤਿ ਉਪ੍ਪਜ੍ਜਤਿ – ਪੀਤਿਵਸੇਨ ਪਞ੍ਞਾ ਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਪੀਤਿਵਸੇਨ ਪਸ੍ਸਦ੍ਧਿ ਉਪ੍ਪਜ੍ਜਤਿ – ਪਸ੍ਸਦ੍ਧਿਵਸੇਨ ਪਞ੍ਞਾਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਪਸ੍ਸਦ੍ਧਿਵਸੇਨ ਸੁਖਂ ਉਪ੍ਪਜ੍ਜਤਿ – ਸੁਖਵਸੇਨ ਪਞ੍ਞਾਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਸੁਖਵਸੇਨ ਓਭਾਸੋ ਉਪ੍ਪਜ੍ਜਤਿ – ਓਭਾਸਵਸੇਨ ਪਞ੍ਞਾਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਓਭਾਸਵਸੇਨ ਸਂਵੇਗੋ ਉਪ੍ਪਜ੍ਜਤਿ – ਸਂਵੇਗਵਸੇਨ ਪਞ੍ਞਾਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਸਂਵੇਜੇਤ੍ਵਾ ਚਿਤ੍ਤਂ ਸਮਾਦਹਤਿ – ਸਮਾਧਿਵਸੇਨ ਪਞ੍ਞਾਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਤਥਾਸਮਾਹਿਤਂ ਚਿਤ੍ਤਂ ਸਾਧੁਕਂ ਪਗ੍ਗਣ੍ਹਾਤਿ – ਪਗ੍ਗਹਵਸੇਨ ਪਞ੍ਞਾਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਤਥਾਪਗ੍ਗਹਿਤਂ ਚਿਤ੍ਤਂ ਸਾਧੁਕਂ ਅਜ੍ਝੁਪੇਕ੍ਖਤਿ – ਉਪੇਕ੍ਖਾਵਸੇਨ ਪਞ੍ਞਾਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਉਪੇਕ੍ਖਾਵਸੇਨ ਨਾਨਤ੍ਤਕਿਲੇਸੇਹਿ ਚਿਤ੍ਤਂ ਵਿਮੁਚ੍ਚਤਿ – ਵਿਮੋਕ੍ਖਵਸੇਨ ਪਞ੍ਞਾਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਵਿਮੁਤ੍ਤਤ੍ਤਾ ਤੇ ਧਮ੍ਮਾ ਏਕਰਸਾ ਹੋਨ੍ਤਿ – ਭਾਵਨਾਵਸੇਨ [ਏਕਰਸਟ੍ਠੇਨ ਭਾਵਨਾਵਸੇਨ (ਸ੍ਯਾ. ਕ.) ਅਟ੍ਠਕਥਾ ਓਲੋਕੇਤਬ੍ਬੋ] ਪਞ੍ਞਾਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਭਾਵਿਤਤ੍ਤਾ ਤਤੋ ਪਣੀਤਤਰੇ ਵਿਵਟ੍ਟਨ੍ਤਿ – ਵਿਵਟ੍ਟਨਾਵਸੇਨ ਪਞ੍ਞਾਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਵਿਵਟ੍ਟਿਤਤ੍ਤਾ ਤਤੋ ਵੋਸਜ੍ਜਤਿ – ਵੋਸਗ੍ਗਵਸੇਨ ਪਞ੍ਞਾਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਵੋਸਜ੍ਜਿਤਤ੍ਤਾ ਤਤੋ ਨਿਰੁਜ੍ਝਨ੍ਤਿ – ਨਿਰੋਧਵਸੇਨ ਪਞ੍ਞਾਵਸੇਨ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਨਿਰੋਧਵਸੇਨ ਦ੍ਵੇ ਵੋਸਗ੍ਗਾ – ਪਰਿਚ੍ਚਾਗਵੋਸਗ੍ਗੋ ਚ, ਪਕ੍ਖਨ੍ਦਨਵੋਸਗ੍ਗੋ ਚ. ਕਿਲੇਸੇ ਚ ਖਨ੍ਧੇ ਚ ਪਰਿਚ੍ਚਜਤੀਤਿ – ਪਰਿਚ੍ਚਾਗਵੋਸਗ੍ਗੋ. ਨਿਰੋਧਨਿਬ੍ਬਾਨਧਾਤੁਯਾ ਚਿਤ੍ਤਂ ਪਕ੍ਖਨ੍ਦਤੀਤਿ – ਪਕ੍ਖਨ੍ਦਨਵੋਸਗ੍ਗੋ. ਨਿਰੋਧਵਸੇਨ ਇਮੇ ਦ੍ਵੇ ਵੋਸਗ੍ਗਾ. ਏਵਂ ਅਧਿਮਤ੍ਤਟ੍ਠੇਨ ਇਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ.
ਦੁਤਿਯਭਾਣਵਾਰੋ.
ਘ. ਅਧਿਟ੍ਠਾਨਟ੍ਠਨਿਦ੍ਦੇਸੋ
੨੦੨. ਕਥਂ ਅਧਿਟ੍ਠਾਨਟ੍ਠੇਨ ਇਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ? ਸਦ੍ਧਿਨ੍ਦ੍ਰਿਯਸ੍ਸ ਭਾਵਨਾਯ ਛਨ੍ਦੋ ਉਪ੍ਪਜ੍ਜਤਿ – ਛਨ੍ਦਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਟ੍ਠਾਤਿ. ਛਨ੍ਦਵਸੇਨ ਪਾਮੋਜ੍ਜਂ ਉਪ੍ਪਜ੍ਜਤਿ – ਪਾਮੋਜ੍ਜਵਸੇਨ ਸਦ੍ਧਾਵਸੇਨ ਸਦ੍ਧਿਨ੍ਦ੍ਰਿਯਂ ਅਧਿਟ੍ਠਾਤਿ…ਪੇ… ਏਵਂ ਅਧਿਟ੍ਠਾਨਟ੍ਠੇਨ ਇਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ.
ਙ. ਪਰਿਯਾਦਾਨਟ੍ਠਨਿਦ੍ਦੇਸੋ
ਕਥਂ ਪਰਿਯਾਦਾਨਟ੍ਠੇਨ ਇਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ? ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਅਸ੍ਸਦ੍ਧਿਯਂ ਪਰਿਯਾਦਿਯਤਿ, ਅਸ੍ਸਦ੍ਧਿਯਪਰਿਲ਼ਾਹਂ ਪਰਿਯਾਦਿਯਤਿ. ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ ਕੋਸਜ੍ਜਂ ਪਰਿਯਾਦਿਯਤਿ, ਕੋਸਜ੍ਜਪਰਿਲ਼ਾਹਂ ਪਰਿਯਾਦਿਯਤਿ. ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ ਪਮਾਦਂ ਪਰਿਯਾਦਿਯਤਿ, ਪਮਾਦਪਰਿਲ਼ਾਹਂ ਪਰਿਯਾਦਿਯਤਿ. ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ ਉਦ੍ਧਚ੍ਚਂ ਪਰਿਯਾਦਿਯਤਿ, ਉਦ੍ਧਚ੍ਚਪਰਿਲ਼ਾਹਂ ਪਰਿਯਾਦਿਯਤਿ. ਦਸ੍ਸਨਟ੍ਠੇਨ ਪਞ੍ਞਿਨ੍ਦ੍ਰਿਯਂ ਅਵਿਜ੍ਜਂ ਪਰਿਯਾਦਿਯਤਿ, ਅਵਿਜ੍ਜਾਪਰਿਲ਼ਾਹਂ ਪਰਿਯਾਦਿਯਤਿ. ਨੇਕ੍ਖਮ੍ਮੇ ਪਞ੍ਚਿਨ੍ਦ੍ਰਿਯਾਨਿ ਕਾਮਚ੍ਛਨ੍ਦਂ ਪਰਿਯਾਦਿਯਨ੍ਤਿ. ਅਬ੍ਯਾਪਾਦੇ ਪਞ੍ਚਿਨ੍ਦ੍ਰਿਯਾਨਿ ਬ੍ਯਾਪਾਦਂ ਪਰਿਯਾਦਿਯਨ੍ਤਿ. ਆਲੋਕਸਞ੍ਞਾਯ ਪਞ੍ਚਿਨ੍ਦ੍ਰਿਯਾਨਿ ਥਿਨਮਿਦ੍ਧਂ ਪਰਿਯਾਦਿਯਨ੍ਤਿ. ਅਵਿਕ੍ਖੇਪੇ ਪਞ੍ਚਿਨ੍ਦ੍ਰਿਯਾਨਿ ਉਦ੍ਧਚ੍ਚਂ ਪਰਿਯਾਦਿਯਨ੍ਤਿ…ਪੇ… ਅਰਹਤ੍ਤਮਗ੍ਗੇ ਪਞ੍ਚਿਨ੍ਦ੍ਰਿਯਾਨਿ ਸਬ੍ਬਕਿਲੇਸੇ ਪਰਿਯਾਦਿਯਨ੍ਤਿ. ਏਵਂ ਪਰਿਯਾਦਾਨਟ੍ਠੇਨ ਇਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ.
ਚ. ਪਤਿਟ੍ਠਾਪਕਟ੍ਠਨਿਦ੍ਦੇਸੋ
੨੦੩. ਕਥਂ ਪਤਿਟ੍ਠਾਪਕਟ੍ਠੇਨ ਇਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ? ਸਦ੍ਧੋ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖੇ ਪਤਿਟ੍ਠਾਪੇਤਿ, ਸਦ੍ਧਸ੍ਸ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖੇ ਪਤਿਟ੍ਠਾਪੇਤਿ. ਵੀਰਿਯਵਾ ਵੀਰਿਯਿਨ੍ਦ੍ਰਿਯਂ ਪਗ੍ਗਹੇ ਪਤਿਟ੍ਠਾਪੇਤਿ, ਵੀਰਿਯਵਤੋ ਵੀਰਿਯਿਨ੍ਦ੍ਰਿਯਂ ਪਗ੍ਗਹੇ ਪਤਿਟ੍ਠਾਪੇਤਿ. ਸਤਿਮਾ ਸਤਿਨ੍ਦ੍ਰਿਯਂ ਉਪਟ੍ਠਾਨੇ ਪਤਿਟ੍ਠਾਪੇਤਿ, ਸਤਿਮਤੋ ਸਤਿਨ੍ਦ੍ਰਿਯਂ ਉਪਟ੍ਠਾਨੇ ਪਤਿਟ੍ਠਾਪੇਤਿ. ਸਮਾਹਿਤੋ ਸਮਾਧਿਨ੍ਦ੍ਰਿਯਂ ਅਵਿਕ੍ਖੇਪੇ ਪਤਿਟ੍ਠਾਪੇਤਿ, ਸਮਾਹਿਤਸ੍ਸ ਸਮਾਧਿਨ੍ਦ੍ਰਿਯਂ ਅਵਿਕ੍ਖੇਪੇ ਪਤਿਟ੍ਠਾਪੇਤਿ. ਪਞ੍ਞਵਾ ਪਞ੍ਞਿਨ੍ਦ੍ਰਿਯਂ ਦਸ੍ਸਨੇ ਪਤਿਟ੍ਠਾਪੇਤਿ, ਪਞ੍ਞਵਤੋ ਪਞ੍ਞਿਨ੍ਦ੍ਰਿਯਂ ਦਸ੍ਸਨੇ ਪਤਿਟ੍ਠਾਪੇਤਿ. ਯੋਗਾਵਚਰੋ ਪਞ੍ਚਿਨ੍ਦ੍ਰਿਯਾਨਿ ਨੇਕ੍ਖਮ੍ਮੇ ਪਤਿਟ੍ਠਾਪੇਤਿ, ਯੋਗਾਵਚਰਸ੍ਸ ਪਞ੍ਚਿਨ੍ਦ੍ਰਿਯਾਨਿ ਨੇਕ੍ਖਮ੍ਮੇ ਪਤਿਟ੍ਠਾਪੇਨ੍ਤਿ. ਯੋਗਾਵਚਰੋ ਪਞ੍ਚਿਨ੍ਦ੍ਰਿਯਾਨਿ ਅਬ੍ਯਾਪਾਦੇ ਪਤਿਟ੍ਠਾਪੇਤਿ, ਯੋਗਾਵਚਰਸ੍ਸ ਪਞ੍ਚਿਨ੍ਦ੍ਰਿਯਾਨਿ ਅਬ੍ਯਾਪਾਦੇ ਪਤਿਟ੍ਠਾਪੇਨ੍ਤਿ. ਯੋਗਾਵਚਰੋ ਪਞ੍ਚਿਨ੍ਦ੍ਰਿਯਾਨਿ ਆਲੋਕਸਞ੍ਞਾਯ ਪਤਿਟ੍ਠਾਪੇਤਿ, ਯੋਗਾਵਚਰਸ੍ਸ ਪਞ੍ਚਿਨ੍ਦ੍ਰਿਯਾਨਿ ਆਲੋਕਸਞ੍ਞਾਯ ਪਤਿਟ੍ਠਾਪੇਨ੍ਤਿ. ਯੋਗਾਵਚਰੋ ਪਞ੍ਚਿਨ੍ਦ੍ਰਿਯਾਨਿ ਅਵਿਕ੍ਖੇਪੇ ਪਤਿਟ੍ਠਾਪੇਤਿ, ਯੋਗਾਵਚਰਸ੍ਸ ਪਞ੍ਚਿਨ੍ਦ੍ਰਿਯਾਨਿ ਅਵਿਕ੍ਖੇਪੇ ਪਤਿਟ੍ਠਾਪੇਨ੍ਤਿ…ਪੇ… ਯੋਗਾਵਚਰੋ ਪਞ੍ਚਿਨ੍ਦ੍ਰਿਯਾਨਿ ਅਰਹਤ੍ਤਮਗ੍ਗੇ ਪਤਿਟ੍ਠਾਪੇਤਿ, ਯੋਗਾਵਚਰਸ੍ਸ ਪਞ੍ਚਿਨ੍ਦ੍ਰਿਯਾਨਿ ਅਰਹਤ੍ਤਮਗ੍ਗੇ ਪਤਿਟ੍ਠਾਪੇਨ੍ਤਿ. ਏਵਂ ਪਤਿਟ੍ਠਾਪਕਟ੍ਠੇਨ ਇਨ੍ਦ੍ਰਿਯਾਨਿ ਦਟ੍ਠਬ੍ਬਾਨਿ.
ਸੁਤ੍ਤਨ੍ਤਨਿਦ੍ਦੇਸੋ ਚਤੁਤ੍ਥੋ.
੫. ਇਨ੍ਦ੍ਰਿਯਸਮੋਧਾਨਂ
੨੦੪. ਪੁਥੁਜ੍ਜਨੋ ਸਮਾਧਿਂ ਭਾਵੇਨ੍ਤੋ ਕਤਿਹਾਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ? ਸੇਕ੍ਖੋ ਸਮਾਧਿਂ ਭਾਵੇਨ੍ਤੋ ਕਤਿਹਾਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ? ਵੀਤਰਾਗੋ ਸਮਾਧਿਂ ਭਾਵੇਨ੍ਤੋ ਕਤਿਹਾਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ? ਪੁਥੁਜ੍ਜਨੋ ਸਮਾਧਿਂ ਭਾਵੇਨ੍ਤੋ ਸਤ੍ਤਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ. ਸੇਕ੍ਖੋ ਸਮਾਧਿਂ ਭਾਵੇਨ੍ਤੋ ਅਟ੍ਠਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ. ਵੀਤਰਾਗੋ ਸਮਾਧਿਂ ਭਾਵੇਨ੍ਤੋ ਦਸਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ.
ਪੁਥੁਜ੍ਜਨੋ ਸਮਾਧਿਂ ਭਾਵੇਨ੍ਤੋ ਕਤਮੇਹਿ ਸਤ੍ਤਹਾਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ? ਆਵਜ੍ਜਿਤਤ੍ਤਾ ਆਰਮ੍ਮਣੂਪਟ੍ਠਾਨਕੁਸਲੋ ਹੋਤਿ, ਸਮਥਨਿਮਿਤ੍ਤੂਪਟ੍ਠਾਨਕੁਸਲੋ ਹੋਤਿ, ਪਗ੍ਗਹਨਿਮਿਤ੍ਤੂਪਟ੍ਠਾਨਕੁਸਲੋ ਹੋਤਿ, ਅਵਿਕ੍ਖੇਪੂਪਟ੍ਠਾਨਕੁਸਲੋ ਹੋਤਿ, ਓਭਾਸੂਪਟ੍ਠਾਨਕੁਸਲੋ ਹੋਤਿ, ਸਮ੍ਪਹਂਸਨੂਪਟ੍ਠਾਨਕੁਸਲੋ ਹੋਤਿ, ਉਪੇਕ੍ਖੂਪਟ੍ਠਾਨਕੁਸਲੋ ਹੋਤਿ – ਪੁਥੁਜ੍ਜਨੋ ਸਮਾਧਿਂ ਭਾਵੇਨ੍ਤੋ ਇਮੇਹਿ ਸਤ੍ਤਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ.
ਸੇਕ੍ਖੋ ਸਮਾਧਿਂ ਭਾਵੇਨ੍ਤੋ ਕਤਮੇਹਿ ਅਟ੍ਠਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ? ਆਵਜ੍ਜਿਤਤ੍ਤਾ ਆਰਮ੍ਮਣੂਪਟ੍ਠਾਨਕੁਸਲੋ ਹੋਤਿ, ਸਮਥਨਿਮਿਤ੍ਤੂਪਟ੍ਠਾਨਕੁਸਲੋ ਹੋਤਿ, ਪਗ੍ਗਹਨਿਮਿਤ੍ਤੂਪਟ੍ਠਾਨਕੁਸਲੋ ਹੋਤਿ, ਅਵਿਕ੍ਖੇਪੂਪਟ੍ਠਾਨਕੁਸਲੋ ਹੋਤਿ, ਓਭਾਸੂਪਟ੍ਠਾਨਕੁਸਲੋ ਹੋਤਿ, ਸਮ੍ਪਹਂਸਨੂਪਟ੍ਠਾਨਕੁਸਲੋ ਹੋਤਿ, ਉਪੇਕ੍ਖੂਪਟ੍ਠਾਨਕੁਸਲੋ ਹੋਤਿ, ਏਕਤ੍ਤੂਪਟ੍ਠਾਨਕੁਸਲੋ ਹੋਤਿ – ਸੇਕ੍ਖੋ ਸਮਾਧਿਂ ਭਾਵੇਨ੍ਤੋ ਇਮੇਹਿ ਅਟ੍ਠਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ.
ਵੀਤਰਾਗੋ ਸਮਾਧਿਂ ਭਾਵੇਨ੍ਤੋ ਕਤਮੇਹਿ ਦਸਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ? ਆਵਜ੍ਜਿਤਤ੍ਤਾ ਆਰਮ੍ਮਣੂਪਟ੍ਠਾਨਕੁਸਲੋ ਹੋਤਿ…ਪੇ… ਏਕਤ੍ਤੂਪਟ੍ਠਾਨਕੁਸਲੋ ਹੋਤਿ, ਞਾਣੂਪਟ੍ਠਾਨਕੁਸਲੋ ਹੋਤਿ, ਵਿਮੁਤ੍ਤੂਪਟ੍ਠਾਨਕੁਸਲੋ ਹੋਤਿ – ਵੀਤਰਾਗੋ ਸਮਾਧਿਂ ਭਾਵੇਨ੍ਤੋ ਇਮੇਹਿ ਦਸਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ.
੨੦੫. ਪੁਥੁਜ੍ਜਨੋ ਵਿਪਸ੍ਸਨਂ ਭਾਵੇਨ੍ਤੋ ਕਤਿਹਾਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ, ਕਤਿਹਾਕਾਰੇਹਿ ਅਨੁਪਟ੍ਠਾਨਕੁਸਲੋ ਹੋਤਿ? ਸੇਕ੍ਖੋ ਵਿਪਸ੍ਸਨਂ ਭਾਵੇਨ੍ਤੋ ਕਤਿਹਾਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ, ਕਤਿਹਾਕਾਰੇਹਿ ਅਨੁਪਟ੍ਠਾਨਕੁਸਲੋ ਹੋਤਿ? ਵੀਤਰਾਗੋ ਵਿਪਸ੍ਸਨਂ ਭਾਵੇਨ੍ਤੋ ਕਤਿਹਾਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ, ਕਤਿਹਾਕਾਰੇਹਿ ਅਨੁਪਟ੍ਠਾਨਕੁਸਲੋ ਹੋਤਿ?
ਪੁਥੁਜ੍ਜਨੋ ਵਿਪਸ੍ਸਨਂ ਭਾਵੇਨ੍ਤੋ ਨਵਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ, ਨਵਹਿ ਆਕਾਰੇਹਿ ਅਨੁਪਟ੍ਠਾਨਕੁਸਲੋ ਹੋਤਿ. ਸੇਕ੍ਖੋ ਵਿਪਸ੍ਸਨਂ ਭਾਵੇਨ੍ਤੋ ਦਸਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ, ਦਸਹਿ ਆਕਾਰੇਹਿ ਅਨੁਪਟ੍ਠਾਨਕੁਸਲੋ ਹੋਤਿ. ਵੀਤਰਾਗੋ ਵਿਪਸ੍ਸਨਂ ਭਾਵੇਨ੍ਤੋ ਦ੍ਵਾਦਸਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ, ਦ੍ਵਾਦਸਹਿ ਆਕਾਰੇਹਿ ਅਨੁਪਟ੍ਠਾਨਕੁਸਲੋ ਹੋਤਿ.
ਪੁਥੁਜ੍ਜਨੋ ਵਿਪਸ੍ਸਨਂ ਭਾਵੇਨ੍ਤੋ ਕਤਮੇਹਿ ਨਵਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ, ਕਤਮੇਹਿ ਨਵਹਿ ਆਕਾਰੇਹਿ ਅਨੁਪਟ੍ਠਾਨਕੁਸਲੋ ਹੋਤਿ? ਅਨਿਚ੍ਚਤੋ ਉਪਟ੍ਠਾਨਕੁਸਲੋ ਹੋਤਿ, ਨਿਚ੍ਚਤੋ ਅਨੁਪਟ੍ਠਾਨਕੁਸਲੋ ਹੋਤਿ. ਦੁਕ੍ਖਤੋ ਉਪਟ੍ਠਾਨਕੁਸਲੋ ਹੋਤਿ, ਸੁਖਤੋ ਅਨੁਪਟ੍ਠਾਨਕੁਸਲੋ ਹੋਤਿ. ਅਨਤ੍ਤਤੋ ਉਪਟ੍ਠਾਨਕੁਸਲੋ ਹੋਤਿ, ਅਤ੍ਤਤੋ ਅਨੁਪਟ੍ਠਾਨਕੁਸਲੋ ਹੋਤਿ. ਖਯਤੋ ਉਪਟ੍ਠਾਨਕੁਸਲੋ ਹੋਤਿ, ਘਨਤੋ ਅਨੁਪਟ੍ਠਾਨਕੁਸਲੋ ਹੋਤਿ. ਵਯਤੋ ਉਪਟ੍ਠਾਨਕੁਸਲੋ ਹੋਤਿ, ਆਯੂਹਨਾਨੁਪਟ੍ਠਾਨਕੁਸਲੋ ਹੋਤਿ. ਵਿਪਰਿਣਾਮੂਪਟ੍ਠਾਨਕੁਸਲੋ ਹੋਤਿ, ਧੁਵਤੋ ਅਨੁਪਟ੍ਠਾਨਕੁਸਲੋ ਹੋਤਿ. ਅਨਿਮਿਤ੍ਤੂਪਟ੍ਠਾਨਕੁਸਲੋ ਹੋਤਿ, ਨਿਮਿਤ੍ਤਾਨੁਪਟ੍ਠਾਨਕੁਸਲੋ ਹੋਤਿ. ਅਪ੍ਪਣਿਹਿਤੂਪਟ੍ਠਾਨਕੁਸਲੋ ਹੋਤਿ, ਪਣਿਧਿਅਨੁਪਟ੍ਠਾਨਕੁਸਲੋ [ਪਣਿਧਾਨੁਪਟ੍ਠਾਨਕੁਸਲੋ (ਸ੍ਯਾ.)] ਹੋਤਿ. ਸੁਞ੍ਞਤੂਪਟ੍ਠਾਨਕੁਸਲੋ ਹੋਤਿ, ਅਭਿਨਿਵੇਸਾਨੁਪਟ੍ਠਾਨਕੁਸਲੋ ਹੋਤਿ – ਪੁਥੁਜ੍ਜਨੋ ਵਿਪਸ੍ਸਨਂ ਭਾਵੇਨ੍ਤੋ ਇਮੇਹਿ ਨਵਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ, ਇਮੇਹਿ ਨਵਹਿ ਆਕਾਰੇਹਿ ਅਨੁਪਟ੍ਠਾਨਕੁਸਲੋ ਹੋਤਿ.
੨੦੬. ਸੇਕ੍ਖੋ ਵਿਪਸ੍ਸਨਂ ਭਾਵੇਨ੍ਤੋ ਕਤਮੇਹਿ ਦਸਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ, ਕਤਮੇਹਿ ਦਸਹਿ ਆਕਾਰੇਹਿ ਅਨੁਪਟ੍ਠਾਨਕੁਸਲੋ ਹੋਤਿ? ਅਨਿਚ੍ਚਤੋ ਉਪਟ੍ਠਾਨਕੁਸਲੋ ਹੋਤਿ, ਨਿਚ੍ਚਤੋ ਅਨੁਪਟ੍ਠਾਨਕੁਸਲੋ ਹੋਤਿ…ਪੇ… ਸੁਞ੍ਞਤੂਪਟ੍ਠਾਨਕੁਸਲੋ ਹੋਤਿ, ਅਭਿਨਿਵੇਸਾਨੂਪਟ੍ਠਾਨਕੁਸਲੋ ਹੋਤਿ. ਞਾਣੂਪਟ੍ਠਾਨਕੁਸਲੋ ਹੋਤਿ, ਅਞਾਣਅਨੁਪਟ੍ਠਾਨਕੁਸਲੋ ਹੋਤਿ – ਸੇਕ੍ਖੋ ਵਿਪਸ੍ਸਨਂ ਭਾਵੇਨ੍ਤੋ ਇਮੇਹਿ ਦਸਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ, ਇਮੇਹਿ ਦਸਹਿ ਆਕਾਰੇਹਿ ਅਨੁਪਟ੍ਠਾਨਕੁਸਲੋ ਹੋਤਿ.
ਵੀਤਰਾਗੋ ਵਿਪਸ੍ਸਨਂ ਭਾਵੇਨ੍ਤੋ ਕਤਮੇਹਿ ਦ੍ਵਾਦਸਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ, ਕਤਮੇਹਿ ਦ੍ਵਾਦਸਹਿ ਆਕਾਰੇਹਿ ਅਨੁਪਟ੍ਠਾਨਕੁਸਲੋ ਹੋਤਿ? ਅਨਿਚ੍ਚਤੋ ਉਪਟ੍ਠਾਨਕੁਸਲੋ ਹੋਤਿ, ਨਿਚ੍ਚਤੋ ਅਨੁਪਟ੍ਠਾਨਕੁਸਲੋ ਹੋਤਿ…ਪੇ… ਞਾਣੂਪਟ੍ਠਾਨਕੁਸਲੋ ਹੋਤਿ, ਅਞਾਣਾਨੁਪਟ੍ਠਾਨਕੁਸਲੋ ਹੋਤਿ. ਵਿਸਞ੍ਞੋਗੂਪਟ੍ਠਾਨਕੁਸਲੋ ਹੋਤਿ, ਸਞ੍ਞੋਗਾਨੁਪਟ੍ਠਾਨਕੁਸਲੋ ਹੋਤਿ. ਨਿਰੋਧੂਪਟ੍ਠਾਨਕੁਸਲੋ ਹੋਤਿ, ਸਙ੍ਖਾਰਾਨੁਪਟ੍ਠਾਨਕੁਸਲੋ ਹੋਤਿ – ਵੀਤਰਾਗੋ ਵਿਪਸ੍ਸਨਂ ਭਾਵੇਨ੍ਤੋ ਇਮੇਹਿ ਦ੍ਵਾਦਸਹਿ ਆਕਾਰੇਹਿ ਉਪਟ੍ਠਾਨਕੁਸਲੋ ਹੋਤਿ, ਇਮੇਹਿ ਦ੍ਵਾਦਸਹਿ ਆਕਾਰੇਹਿ ਅਨੁਪਟ੍ਠਾਨਕੁਸਲੋ ਹੋਤਿ.
ਆਵਜ੍ਜਿਤਤ੍ਤਾ ਆਰਮ੍ਮਣੂਪਟ੍ਠਾਨਕੁਸਲਵਸੇਨ ਇਨ੍ਦ੍ਰਿਯਾਨਿ ਸਮੋਧਾਨੇਤਿ, ਗੋਚਰਞ੍ਚ ਪਜਾਨਾਤਿ, ਸਮਤ੍ਥਞ੍ਚ ਪਟਿਵਿਜ੍ਝਤਿ…ਪੇ… ਧਮ੍ਮੇ ਸਮੋਧਾਨੇਤਿ, ਗੋਚਰਞ੍ਚ ਪਜਾਨਾਤਿ, ਸਮਤ੍ਥਞ੍ਚ ਪਟਿਵਿਜ੍ਝਤਿ. ਇਨ੍ਦ੍ਰਿਯਾਨਿ ਸਮੋਧਾਨੇਤੀਤਿ ਕਥਂ ਇਨ੍ਦ੍ਰਿਯਾਨਿ ਸਮੋਧਾਨੇਤਿ? ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ ਸਮੋਧਾਨੇਤਿ…ਪੇ… ਸਮਥਨਿਮਿਤ੍ਤੂਪਟ੍ਠਾਨਕੁਸਲਵਸੇਨ, ਪਗ੍ਗਹਨਿਮਿਤ੍ਤੂਪਟ੍ਠਾਨਕੁਸਲਵਸੇਨ, ਅਵਿਕ੍ਖੇਪੂਪਟ੍ਠਾਨਕੁਸਲਵਸੇਨ, ਓਭਾਸੂਪਟ੍ਠਾਨਕੁਸਲਵਸੇਨ, ਸਮ੍ਪਹਂਸਨੂਪਟ੍ਠਾਨਕੁਸਲਵਸੇਨ, ਉਪੇਕ੍ਖੂਪਟ੍ਠਾਨਕੁਸਲਵਸੇਨ, ਏਕਤ੍ਤੂਪਟ੍ਠਾਨਕੁਸਲਵਸੇਨ, ਞਾਣੂਪਟ੍ਠਾਨਕੁਸਲਵਸੇਨ, ਵਿਮੁਤ੍ਤੂਪਟ੍ਠਾਨਕੁਸਲਵਸੇਨ.
ਅਨਿਚ੍ਚਤੋ ਉਪਟ੍ਠਾਨਕੁਸਲਵਸੇਨ, ਨਿਚ੍ਚਤੋ ਅਨੁਪਟ੍ਠਾਨਕੁਸਲਵਸੇਨ, ਦੁਕ੍ਖਤੋ ਉਪਟ੍ਠਾਨਕੁਸਲਵਸੇਨ, ਸੁਖਤੋ ਅਨੁਪਟ੍ਠਾਨਕੁਸਲਵਸੇਨ, ਅਨਤ੍ਤਤੋ ਉਪਟ੍ਠਾਨਕੁਸਲਵਸੇਨ, ਅਤ੍ਤਤੋ ਅਨੁਪਟ੍ਠਾਨਕੁਸਲਵਸੇਨ, ਖਯਤੋ ਉਪਟ੍ਠਾਨਕੁਸਲਵਸੇਨ, ਘਨਤੋ ਅਨੁਪਟ੍ਠਾਨਕੁਸਲਵਸੇਨ, ਵਯਤੋ ਉਪਟ੍ਠਾਨਕੁਸਲਵਸੇਨ, ਆਯੂਹਨਾਨੁਪਟ੍ਠਾਨਕੁਸਲਵਸੇਨ, ਵਿਪਰਿਣਾਮੂਪਟ੍ਠਾਨਕੁਸਲਵਸੇਨ, ਧੁਵਤੋ ਅਨੁਪਟ੍ਠਾਨਕੁਸਲਵਸੇਨ, ਅਨਿਮਿਤ੍ਤੂਪਟ੍ਠਾਨਕੁਸਲਵਸੇਨ, ਨਿਮਿਤ੍ਤਾਨੁਪਟ੍ਠਾਨਕੁਸਲਵਸੇਨ, ਅਪ੍ਪਣਿਹਿਤੂਪਟ੍ਠਾਨਕੁਸਲਵਸੇਨ, ਪਣਿਧਿਅਨੁਪਟ੍ਠਾਨਕੁਸਲਵਸੇਨ, ਸੁਞ੍ਞਤੂਪਟ੍ਠਾਨਕੁਸਲਵਸੇਨ, ਅਭਿਨਿਵੇਸਾਨੁਪਟ੍ਠਾਨਕੁਸਲਵਸੇਨ, ਞਾਣੂਪਟ੍ਠਾਨਕੁਸਲਵਸੇਨ, ਅਞਾਣਾਨੁਪਟ੍ਠਾਨਕੁਸਲਵਸੇਨ, ਵਿਸਞ੍ਞੋਗੂਪਟ੍ਠਾਨਕੁਸਲਵਸੇਨ, ਸਞ੍ਞੋਗਾਨੁਪਟ੍ਠਾਨਕੁਸਲਵਸੇਨ, ਨਿਰੋਧੂਪਟ੍ਠਾਨਕੁਸਲਵਸੇਨ, ਸਙ੍ਖਾਰਾਨੁਪਟ੍ਠਾਨਕੁਸਲਵਸੇਨ ਇਨ੍ਦ੍ਰਿਯਾਨਿ ਸਮੋਧਾਨੇਤਿ, ਗੋਚਰਞ੍ਚ ਪਜਾਨਾਤਿ, ਸਮਤ੍ਥਞ੍ਚ ਪਟਿਵਿਜ੍ਝਤਿ.
੨੦੭. ਚਤੁਸਟ੍ਠਿਯਾ ਆਕਾਰੇਹਿ ਤਿਣ੍ਣਨ੍ਨਂ ਇਨ੍ਦ੍ਰਿਯਾਨਂ ਵਸੀਭਾਵਤਾਪਞ੍ਞਾ ਆਸਵਾਨਂ ਖਯੇ ਞਾਣਂ. ਕਤਮੇਸਂ ਤਿਣ੍ਣਨ੍ਨਂ ਇਨ੍ਦ੍ਰਿਯਾਨਂ? ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਸ੍ਸ, ਅਞ੍ਞਿਨ੍ਦ੍ਰਿਯਸ੍ਸ, ਅਞ੍ਞਾਤਾਵਿਨ੍ਦ੍ਰਿਯਸ੍ਸ.
ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਂ ਕਤਿ ਠਾਨਾਨਿ ਗਚ੍ਛਤਿ? ਅਞ੍ਞਿਨ੍ਦ੍ਰਿਯਂ ਕਤਿ ਠਾਨਾਨਿ ਗਚ੍ਛਤਿ? ਅਞ੍ਞਾਤਾਵਿਨ੍ਦ੍ਰਿਯਂ ਕਤਿ ਠਾਨਾਨਿ ਗਚ੍ਛਤਿ? ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਂ ਏਕਂ ਠਾਨਂ ਗਚ੍ਛਤਿ – ਸੋਤਾਪਤ੍ਤਿਮਗ੍ਗਂ. ਅਞ੍ਞਿਨ੍ਦ੍ਰਿਯਂ ਛ ਠਾਨਾਨਿ ਗਚ੍ਛਤਿ – ਸੋਤਾਪਤ੍ਤਿਫਲਂ, ਸਕਦਾਗਾਮਿਮਗ੍ਗਂ, ਸਕਦਾਗਾਮਿਫਲਂ, ਅਨਾਗਾਮਿਮਗ੍ਗਂ, ਅਨਾਗਾਮਿਫਲਂ, ਅਰਹਤ੍ਤਮਗ੍ਗਂ. ਅਞ੍ਞਾਤਾਵਿਨ੍ਦ੍ਰਿਯਂ ਏਕਂ ਠਾਨਂ ਗਚ੍ਛਤਿ – ਅਰਹਤ੍ਤਫਲਂ.
ਸੋਤਾਪਤ੍ਤਿਮਗ੍ਗਕ੍ਖਣੇ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਸ੍ਸ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖਪਰਿਵਾਰਂ ਹੋਤਿ, ਵੀਰਿਯਿਨ੍ਦ੍ਰਿਯਂ ਪਗ੍ਗਹਪਰਿਵਾਰਂ ਹੋਤਿ, ਸਤਿਨ੍ਦ੍ਰਿਯਂ ਉਪਟ੍ਠਾਨਪਰਿਵਾਰਂ ਹੋਤਿ, ਸਮਾਧਿਨ੍ਦ੍ਰਿਯਂ ਅਵਿਕ੍ਖੇਪਪਰਿਵਾਰਂ ਹੋਤਿ, ਪਞ੍ਞਿਨ੍ਦ੍ਰਿਯਂ ਦਸ੍ਸਨਪਰਿਵਾਰਂ ਹੋਤਿ, ਮਨਿਨ੍ਦ੍ਰਿਯਂ ਵਿਜਾਨਨਪਰਿਵਾਰਂ ਹੋਤਿ, ਸੋਮਨਸ੍ਸਿਨ੍ਦ੍ਰਿਯਂ ਅਭਿਸਨ੍ਦਨਪਰਿਵਾਰਂ ਹੋਤਿ, ਜੀਵਿਤਿਨ੍ਦ੍ਰਿਯਂ ਪਵਤ੍ਤਸਨ੍ਤਤਾਧਿਪਤੇਯ੍ਯਪਰਿਵਾਰਂ ਹੋਤਿ. ਸੋਤਾਪਤ੍ਤਿਮਗ੍ਗਕ੍ਖਣੇ ਜਾਤਾ ਧਮ੍ਮਾ, ਠਪੇਤ੍ਵਾ ਚਿਤ੍ਤਸਮੁਟ੍ਠਾਨਂ ਰੂਪਂ, ਸਬ੍ਬੇਵ ਕੁਸਲਾ ਹੋਨ੍ਤਿ, ਸਬ੍ਬੇਵ ਅਨਾਸਵਾ ਹੋਨ੍ਤਿ, ਸਬ੍ਬੇਵ ਨਿਯ੍ਯਾਨਿਕਾ ਹੋਨ੍ਤਿ, ਸਬ੍ਬੇਵ ਅਪਚਯਗਾਮਿਨੋ ਹੋਨ੍ਤਿ, ਸਬ੍ਬੇਵ ਲੋਕੁਤ੍ਤਰਾ ਹੋਨ੍ਤਿ, ਸਬ੍ਬੇਵ ਨਿਬ੍ਬਾਨਾਰਮ੍ਮਣਾ ਹੋਨ੍ਤਿ. ਸੋਤਾਪਤ੍ਤਿਮਗ੍ਗਕ੍ਖਣੇ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਸ੍ਸ ਇਮਾਨਿ ਅਟ੍ਠਿਨ੍ਦ੍ਰਿਯਾਨਿ ਸਹਜਾਤਪਰਿਵਾਰਾ ਹੋਨ੍ਤਿ, ਅਞ੍ਞਮਞ੍ਞਪਰਿਵਾਰਾ ਹੋਨ੍ਤਿ, ਨਿਸ੍ਸਯਪਰਿਵਾਰਾ ਹੋਨ੍ਤਿ, ਸਮ੍ਪਯੁਤ੍ਤਪਰਿਵਾਰਾ ਹੋਨ੍ਤਿ, ਸਹਗਤਾ ਹੋਨ੍ਤਿ, ਸਹਜਾਤਾ ਹੋਨ੍ਤਿ, ਸਂਸਟ੍ਠਾ ਹੋਨ੍ਤਿ, ਸਮ੍ਪਯੁਤ੍ਤਾ ਹੋਨ੍ਤਿ. ਤੇਵ ਤਸ੍ਸ ਆਕਾਰਾ ਚੇਵ ਹੋਨ੍ਤਿ ਪਰਿਵਾਰਾ ਚ.
ਸੋਤਾਪਤ੍ਤਿਫਲਕ੍ਖਣੇ…ਪੇ… ਅਰਹਤ੍ਤਫਲਕ੍ਖਣੇ ਅਞ੍ਞਾਤਾਵਿਨ੍ਦ੍ਰਿਯਸ੍ਸ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖਪਰਿਵਾਰਂ ਹੋਤਿ…ਪੇ… ਜੀਵਿਤਿਨ੍ਦ੍ਰਿਯਂ ਪਵਤ੍ਤਸਨ੍ਤਤਾਧਿਪਤੇਯ੍ਯਪਰਿਵਾਰਂ ਹੋਤਿ. ਅਰਹਤ੍ਤਫਲਕ੍ਖਣੇ ਜਾਤਾ ਧਮ੍ਮਾ ਸਬ੍ਬੇਵ ਅਬ੍ਯਾਕਤਾ ਹੋਨ੍ਤਿ, ਠਪੇਤ੍ਵਾ ਚਿਤ੍ਤਸਮੁਟ੍ਠਾਨਂ ਰੂਪਂ ਸਬ੍ਬੇਵ ਅਨਾਸਵਾ ਹੋਨ੍ਤਿ, ਸਬ੍ਬੇਵ ਲੋਕੁਤ੍ਤਰਾ ਹੋਨ੍ਤਿ, ਸਬ੍ਬੇਵ ਨਿਬ੍ਬਾਨਾਰਮ੍ਮਣਾ ਹੋਨ੍ਤਿ. ਅਰਹਤ੍ਤਫਲਕ੍ਖਣੇ ਅਞ੍ਞਾਤਾਵਿਨ੍ਦ੍ਰਿਯਸ੍ਸ ਇਮਾਨਿ ਅਟ੍ਠਿਨ੍ਦ੍ਰਿਯਾਨਿ ਸਹਜਾਤਪਰਿਵਾਰਾ ਹੋਨ੍ਤਿ. ਤੇਵ ਤਸ੍ਸ ਆਕਾਰਾ ਚੇਵ ਹੋਨ੍ਤਿ ਪਰਿਵਾਰਾ ਚ. ਇਤਿ ਇਮਾਨਿ ਅਟ੍ਠ ਅਟ੍ਠਕਾਨਿ ਚਤੁਸਟ੍ਠਿ ਹੋਨ੍ਤਿ.
ਆਸਵਾਤਿ ਕਤਮੇ ਤੇ ਆਸਵਾ? ਕਾਮਾਸਵੋ, ਭਵਾਸਵੋ, ਦਿਟ੍ਠਾਸਵੋ, ਅਵਿਜ੍ਜਾਸਵੋ. ਕਤ੍ਥੇਤੇ ਆਸਵਾ ਖੀਯਨ੍ਤਿ [ਖਿਯ੍ਯਨ੍ਤਿ (ਕ.)]? ਸੋਤਾਪਤ੍ਤਿਮਗ੍ਗੇਨ ਅਨਵਸੇਸੋ ਦਿਟ੍ਠਾਸਵੋ ਖੀਯਤਿ. ਅਪਾਯਗਮਨੀਯੋ ਕਾਮਾਸਵੋ ਖੀਯਤਿ, ਅਪਾਯਗਮਨੀਯੋ ਭਵਾਸਵੋ ਖੀਯਤਿ, ਅਪਾਯਗਮਨੀਯੋ ਅਵਿਜ੍ਜਾਸਵੋ ਖੀਯਤਿ. ਏਤ੍ਥੇਤੇ ਆਸਵਾ ਖੀਯਨ੍ਤਿ. ਸਕਦਾਗਾਮਿਮਗ੍ਗੇਨ ਓਲ਼ਾਰਿਕੋ ਕਾਮਾਸਵੋ ਖੀਯਤਿ, ਤਦੇਕਟ੍ਠੋ ਭਵਾਸਵੋ ਖੀਯਤਿ, ਤਦੇਕਟ੍ਠੋ ਅਵਿਜ੍ਜਾਸਵੋ ਖੀਯਤਿ. ਏਤ੍ਥੇਤੇ ਆਸਵਾ ਖੀਯਨ੍ਤਿ. ਅਨਾਗਾਮਿਮਗ੍ਗੇਨ ਅਨਵਸੇਸੋ ਕਾਮਾਸਵੋ ਖੀਯਤਿ, ਤਦੇਕਟ੍ਠੋ ਭਵਾਸਵੋ ਖੀਯਤਿ, ਤਦੇਕਟ੍ਠੋ ਅਵਿਜ੍ਜਾਸਵੋ ਖੀਯਤਿ. ਏਤ੍ਥੇਤੇ ਆਸਵਾ ਖੀਯਨ੍ਤਿ. ਅਰਹਤ੍ਤਮਗ੍ਗੇਨ ਅਨਵਸੇਸੋ ਭਵਾਸਵੋ ਖੀਯਤਿ, ਅਨਵਸੇਸੋ ਅਵਿਜ੍ਜਾਸਵੋ ਖੀਯਤਿ. ਏਤ੍ਥੇਤੇ ਆਸਵਾ ਖੀਯਨ੍ਤਿ.
੨੦੮. ਨ ਤਸ੍ਸ ਅਦ੍ਦਿਟ੍ਠਮਿਧਤ੍ਥਿ ਕਿਞ੍ਚਿ, ਅਥੋ ਅਵਿਞ੍ਞਾਤਮਜਾਨਿਤਬ੍ਬਂ;
ਸਬ੍ਬਂ ਅਭਿਞ੍ਞਾਸਿ ਯਦਤ੍ਥਿ ਨੇਯ੍ਯਂ, ਤਥਾਗਤੋ ਤੇਨ ਸਮਨ੍ਤਚਕ੍ਖੂਤਿ.
ਸਮਨ੍ਤਚਕ੍ਖੂਤਿ ਕੇਨਟ੍ਠੇਨ ਸਮਨ੍ਤਚਕ੍ਖੁ? ਚੁਦ੍ਦਸ ਬੁਦ੍ਧਞਾਣਾਨਿ – ਦੁਕ੍ਖੇ ਞਾਣਂ ਬੁਦ੍ਧਞਾਣਂ, ਦੁਕ੍ਖਸਮੁਦਯੇ ਞਾਣਂ ਬੁਦ੍ਧਞਾਣਂ…ਪੇ… ਸਬ੍ਬਞ੍ਞੁਤਞਾਣਂ ਬੁਦ੍ਧਞਾਣਂ, ਅਨਾਵਰਣਞਾਣਂ ਬੁਦ੍ਧਞਾਣਂ. ਇਮਾਨਿ ਚੁਦ੍ਦਸ ਬੁਦ੍ਧਞਾਣਾਨਿ. ਇਮੇਸਂ ਚੁਦ੍ਦਸਨ੍ਨਂ ਬੁਦ੍ਧਞਾਣਾਨਂ ਅਟ੍ਠ ਞਾਣਾਨਿ ਸਾਵਕਸਾਧਾਰਣਾਨਿ, ਛ ਞਾਣਾਨਿ ਅਸਾਧਾਰਣਾਨਿ ਸਾਵਕੇਹਿ.
ਯਾਵਤਾ ਦੁਕ੍ਖਸ੍ਸ ਦੁਕ੍ਖਟ੍ਠੋ ਞਾਤੋ, ਅਞ੍ਞਾਤੋ ਦੁਕ੍ਖਟ੍ਠੋ ਨਤ੍ਥੀਤਿ – ਸਮਨ੍ਤਚਕ੍ਖੁ. ਯਂ ਸਮਨ੍ਤਚਕ੍ਖੁ ਤਂ ਪਞ੍ਞਿਨ੍ਦ੍ਰਿਯਂ. ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ. ਯਾਵਤਾ ਦੁਕ੍ਖਸ੍ਸ ਦੁਕ੍ਖਟ੍ਠੋ ਦਿਟ੍ਠੋ ਵਿਦਿਤੋ ਸਚ੍ਛਿਕਤੋ ਫਸ੍ਸਿਤੋ ਪਞ੍ਞਾਯ; ਅਫਸ੍ਸਿਤੋ ਪਞ੍ਞਾਯ ਦੁਕ੍ਖਟ੍ਠੋ ਨਤ੍ਥੀਤਿ – ਸਮਨ੍ਤਚਕ੍ਖੁ. ਯਂ ਸਮਨ੍ਤਚਕ੍ਖੁ ਤਂ ਪਞ੍ਞਿਨ੍ਦ੍ਰਿਯਂ. ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ. ਯਾਵਤਾ ਸਮੁਦਯਸ੍ਸ ਸਮੁਦਯਟ੍ਠੋ…ਪੇ… ਯਾਵਤਾ ਨਿਰੋਧਸ੍ਸ ਨਿਰੋਧਟ੍ਠੋ… ਯਾਵਤਾ ਮਗ੍ਗਸ੍ਸ ਮਗ੍ਗਟ੍ਠੋ… ਯਾਵਤਾ ਅਤ੍ਥਪਟਿਸਮ੍ਭਿਦਾਯ ਅਤ੍ਥਪਟਿਸਮ੍ਭਿਦਟ੍ਠੋ… ਯਾਵਤਾ ਧਮ੍ਮਪਟਿਸਮ੍ਭਿਦਾਯ ਧਮ੍ਮਪਟਿਸਮ੍ਭਿਦਟ੍ਠੋ… ਯਾਵਤਾ ਨਿਰੁਤ੍ਤਿਪਟਿਸਮ੍ਭਿਦਾਯ ਨਿਰੁਤ੍ਤਿਪਟਿਸਮ੍ਭਿਦਟ੍ਠੋ… ਯਾਵਤਾ ਪਟਿਭਾਨਪਟਿਸਮ੍ਭਿਦਾਯ ਪਟਿਭਾਨਪਟਿਸਮ੍ਭਿਦਟ੍ਠੋ… ਯਾਵਤਾ ਇਨ੍ਦ੍ਰਿਯਪਰੋਪਰਿਯਤ੍ਤੇ ਞਾਣਂ… ਯਾਵਤਾ ਸਤ੍ਤਾਨਂ ਆਸਯਾਨੁਸਯੇ ਞਾਣਂ… ਯਾਵਤਾ ਯਮਕਪਾਟਿਹੀਰੇ ਞਾਣਂ… ਯਾਵਤਾ ਮਹਾਕਰੁਣਾਸਮਾਪਤ੍ਤਿਯਾ ਞਾਣਂ… ਯਾਵਤਾ ਸਦੇਵਕਸ੍ਸ ਲੋਕਸ੍ਸ ਸਮਾਰਕਸ੍ਸ ਸਬ੍ਰਹ੍ਮਕਸ੍ਸ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ ਪਤ੍ਤਂ ਪਰਿਯੇਸਿਤਂ ਅਨੁਵਿਚਰਿਤਂ ਮਨਸਾ, ਤਂ ਞਾਤਂ ਦਿਟ੍ਠਂ ਵਿਦਿਤਂ ਸਚ੍ਛਿਕਤਂ ਫਸ੍ਸਿਤਂ ਪਞ੍ਞਾਯ. ਅਫਸ੍ਸਿਤਂ ਪਞ੍ਞਾਯ ਨਤ੍ਥੀਤਿ – ਸਮਨ੍ਤਚਕ੍ਖੁ. ਯਂ ਸਮਨ੍ਤਚਕ੍ਖੁ ਤਂ ਪਞ੍ਞਿਨ੍ਦ੍ਰਿਯਂ. ਪਞ੍ਞਿਨ੍ਦ੍ਰਿਯਸ੍ਸ ਵਸੇਨ ਅਧਿਮੋਕ੍ਖਟ੍ਠੇਨ ਸਦ੍ਧਿਨ੍ਦ੍ਰਿਯਂ, ਪਗ੍ਗਹਟ੍ਠੇਨ ਵੀਰਿਯਿਨ੍ਦ੍ਰਿਯਂ, ਉਪਟ੍ਠਾਨਟ੍ਠੇਨ ਸਤਿਨ੍ਦ੍ਰਿਯਂ, ਅਵਿਕ੍ਖੇਪਟ੍ਠੇਨ ਸਮਾਧਿਨ੍ਦ੍ਰਿਯਂ.
ਸਦ੍ਦਹਨ੍ਤੋ ਪਗ੍ਗਣ੍ਹਾਤਿ, ਪਗ੍ਗਣ੍ਹਨ੍ਤੋ ਸਦ੍ਦਹਤਿ. ਸਦ੍ਦਹਨ੍ਤੋ ਉਪਟ੍ਠਾਪੇਤਿ, ਉਪਟ੍ਠਾਪੇਨ੍ਤੋ ਸਦ੍ਦਹਤਿ. ਸਦ੍ਦਹਨ੍ਤੋ ਸਮਾਦਹਤਿ, ਸਮਾਦਹਨ੍ਤੋ ਸਦ੍ਦਹਤਿ. ਸਦ੍ਦਹਨ੍ਤੋ ਪਜਾਨਾਤਿ, ਪਜਾਨਨ੍ਤੋ ਸਦ੍ਦਹਤਿ. ਪਗ੍ਗਣ੍ਹਨ੍ਤੋ ਉਪਟ੍ਠਾਪੇਤਿ, ਉਪਟ੍ਠਾਪੇਨ੍ਤੋ ਪਗ੍ਗਣ੍ਹਾਤਿ. ਪਗ੍ਗਣ੍ਹਨ੍ਤੋ ਸਮਾਦਹਤਿ, ਸਮਾਦਹਨ੍ਤੋ ਪਗ੍ਗਣ੍ਹਾਤਿ. ਪਗ੍ਗਣ੍ਹਨ੍ਤੋ ਪਜਾਨਾਤਿ, ਪਜਾਨਨ੍ਤੋ ਪਗ੍ਗਣ੍ਹਾਤਿ. ਪਗ੍ਗਣ੍ਹਨ੍ਤੋ ਸਦ੍ਦਹਤਿ, ਸਦ੍ਦਹਨ੍ਤੋ ਪਗ੍ਗਣ੍ਹਾਤਿ. ਉਪਟ੍ਠਾਪੇਨ੍ਤੋ ਸਮਾਦਹਤਿ, ਸਮਾਦਹਨ੍ਤੋ ਉਪਟ੍ਠਾਪੇਤਿ. ਉਪਟ੍ਠਾਪੇਨ੍ਤੋ ਪਜਾਨਾਤਿ, ਪਜਾਨਨ੍ਤੋ ਉਪਟ੍ਠਾਪੇਤਿ. ਉਪਟ੍ਠਾਪੇਨ੍ਤੋ ਸਦ੍ਦਹਤਿ, ਸਦ੍ਦਹਨ੍ਤੋ ਉਪਟ੍ਠਾਪੇਤਿ. ਉਪਟ੍ਠਾਪੇਨ੍ਤੋ ਪਗ੍ਗਣ੍ਹਾਤਿ, ਪਗ੍ਗਣ੍ਹਨ੍ਤੋ ਉਪਟ੍ਠਾਪੇਤਿ. ਸਮਾਦਹਨ੍ਤੋ ਪਜਾਨਾਤਿ, ਪਜਾਨਨ੍ਤੋ ਸਮਾਦਹਤਿ. ਸਮਾਦਹਨ੍ਤੋ ਸਦ੍ਦਹਤਿ, ਸਦ੍ਦਹਨ੍ਤੋ ਸਮਾਦਹਤਿ. ਸਮਾਦਹਨ੍ਤੋ ਪਗ੍ਗਣ੍ਹਾਤਿ, ਪਗ੍ਗਣ੍ਹਨ੍ਤੋ ਸਮਾਦਹਤਿ. ਸਮਾਦਹਨ੍ਤੋ ਉਪਟ੍ਠਾਪੇਤਿ, ਉਪਟ੍ਠਾਪੇਨ੍ਤੋ ਸਮਾਦਹਤਿ. ਪਜਾਨਨ੍ਤੋ ਸਦ੍ਦਹਤਿ, ਸਦ੍ਦਹਨ੍ਤੋ ਪਜਾਨਾਤਿ. ਪਜਾਨਨ੍ਤੋ ਪਗ੍ਗਣ੍ਹਾਤਿ, ਪਗ੍ਗਣ੍ਹਨ੍ਤੋ ਪਜਾਨਾਤਿ. ਪਜਾਨਨ੍ਤੋ ਉਪਟ੍ਠਾਪੇਤਿ, ਉਪਟ੍ਠਾਪੇਨ੍ਤੋ ਪਜਾਨਾਤਿ. ਪਜਾਨਨ੍ਤੋ ਸਮਾਦਹਤਿ, ਸਮਾਦਹਨ੍ਤੋ ਪਜਾਨਾਤਿ.
ਸਦ੍ਦਹਿਤਤ੍ਤਾ ਪਗ੍ਗਹਿਤਂ, ਪਗ੍ਗਹਿਤਤ੍ਤਾ ਸਦ੍ਦਹਿਤਂ. ਸਦ੍ਦਹਿਤਤ੍ਤਾ ਉਪਟ੍ਠਾਪਿਤਂ, ਉਪਟ੍ਠਾਪਿਤਤ੍ਤਾ ਸਦ੍ਦਹਿਤਂ. ਸਦ੍ਦਹਿਤਤ੍ਤਾ ਸਮਾਦਹਿਤਂ, ਸਮਾਦਹਿਤਤ੍ਤਾ ਸਦ੍ਦਹਿਤਂ. ਸਦ੍ਦਹਿਤਤ੍ਤਾ ਪਜਾਨਿਤਂ, ਪਜਾਨਿਤਤ੍ਤਾ ਸਦ੍ਦਹਿਤਂ. ਪਗ੍ਗਹਿਤਤ੍ਤਾ ਉਪਟ੍ਠਾਪਿਤਂ, ਉਪਟ੍ਠਾਪਿਤਤ੍ਤਾ ਪਗ੍ਗਹਿਤਂ. ਪਗ੍ਗਹਿਤਤ੍ਤਾ ਸਮਾਦਹਿਤਂ, ਸਮਾਦਹਿਤਤ੍ਤਾ ਪਗ੍ਗਹਿਤਂ. ਪਗ੍ਗਹਿਤਤ੍ਤਾ ਪਜਾਨਿਤਂ ਪਜਾਨਿਤਤ੍ਤਾ ਪਗ੍ਗਹਿਤਂ. ਪਗ੍ਗਹਿਤਤ੍ਤਾ ਸਦ੍ਦਹਿਤਂ, ਸਦ੍ਦਹਿਤਤ੍ਤਾ ਪਗ੍ਗਹਿਤਂ. ਉਪਟ੍ਠਾਪਿਤਤ੍ਤਾ ਸਮਾਦਹਿਤਂ, ਸਮਾਦਹਿਤਤ੍ਤਾ ਉਪਟ੍ਠਾਪਿਤਂ. ਉਪਟ੍ਠਾਪਿਤਤ੍ਤਾ ਪਜਾਨਿਤਂ, ਪਜਾਨਿਤਤ੍ਤਾ ਉਪਟ੍ਠਾਪਿਤਂ. ਉਪਟ੍ਠਾਪਿਤਤ੍ਤਾ ਸਦ੍ਦਹਿਤਂ, ਸਦ੍ਦਹਿਤਤ੍ਤਾ ਉਪਟ੍ਠਾਪਿਤਂ. ਉਪਟ੍ਠਾਪਿਤਤ੍ਤਾ ਪਗ੍ਗਹਿਤਂ, ਪਗ੍ਗਹਿਤਤ੍ਤਾ ਉਪਟ੍ਠਾਪਿਤਂ. ਸਮਾਦਹਿਤਤ੍ਤਾ ਪਜਾਨਿਤਂ, ਪਜਾਨਿਤਤ੍ਤਾ ਸਮਾਦਹਿਤਂ. ਸਮਾਦਹਿਤਤ੍ਤਾ ਸਦ੍ਦਹਿਤਂ, ਸਦ੍ਦਹਿਤਤ੍ਤਾ ਸਮਾਦਹਿਤਂ. ਸਮਾਦਹਿਤਤ੍ਤਾ ਪਗ੍ਗਹਿਤਂ, ਪਗ੍ਗਹਿਤਤ੍ਤਾ ਸਮਾਦਹਿਤਂ. ਸਮਾਦਹਿਤਤ੍ਤਾ ਉਪਟ੍ਠਾਪਿਤਂ, ਉਪਟ੍ਠਾਪਿਤਤ੍ਤਾ ਸਮਾਦਹਿਤਂ. ਪਜਾਨਿਤਤ੍ਤਾ ਸਦ੍ਦਹਿਤਂ, ਸਦ੍ਦਹਿਤਤ੍ਤਾ ਪਜਾਨਿਤਂ. ਪਜਾਨਿਤਤ੍ਤਾ ਪਗ੍ਗਹਿਤਂ, ਪਗ੍ਗਹਿਤਤ੍ਤਾ ਪਜਾਨਿਤਂ. ਪਜਾਨਿਤਤ੍ਤਾ ਉਪਟ੍ਠਾਪਿਤਂ, ਉਪਟ੍ਠਾਪਿਤਤ੍ਤਾ ਪਜਾਨਿਤਂ. ਪਜਾਨਿਤਤ੍ਤਾ ਸਮਾਦਹਿਤਂ, ਸਮਾਦਹਿਤਤ੍ਤਾ ਪਜਾਨਿਤਂ.
ਯਂ ਬੁਦ੍ਧਚਕ੍ਖੁ ਤਂ ਬੁਦ੍ਧਞਾਣਂ, ਯਂ ਬੁਦ੍ਧਞਾਣਂ ਤਂ ਬੁਦ੍ਧਚਕ੍ਖੁ, ਯੇਨ ਚਕ੍ਖੁਨਾ ਤਥਾਗਤੋ ਸਤ੍ਤੇ ਪਸ੍ਸਤਿ ਅਪ੍ਪਰਜਕ੍ਖੇ ਮਹਾਰਜਕ੍ਖੇ ਤਿਕ੍ਖਿਨ੍ਦ੍ਰਿਯੇ ਮੁਦਿਨ੍ਦ੍ਰਿਯੇ ਸ੍ਵਾਕਾਰੇ ਦ੍ਵਾਕਾਰੇ ਸੁਵਿਞ੍ਞਾਪਯੇ ਦੁਵਿਞ੍ਞਾਪਯੇ ਅਪ੍ਪੇਕਚ੍ਚੇ ਪਰਲੋਕਵਜ੍ਜਭਯਦਸ੍ਸਾਵਿਨੋ [ਪਰਲੋਕਵਜ੍ਜਭਯਦਸ੍ਸਾਵਿਨੇ (ਸ੍ਯਾ. ਕ.)], ਅਪ੍ਪੇਕਚ੍ਚੇ ਨਪਰਲੋਕਵਜ੍ਜਭਯਦਸ੍ਸਾਵਿਨੋ.
ਅਪ੍ਪਰਜਕ੍ਖੇ ਮਹਾਰਜਕ੍ਖੇਤਿ ਸਦ੍ਧੋ ਪੁਗ੍ਗਲੋ ਅਪ੍ਪਰਜਕ੍ਖੋ, ਅਸ੍ਸਦ੍ਧੋ ਪੁਗ੍ਗਲੋ ਮਹਾਰਜਕ੍ਖੋ. ਆਰਦ੍ਧਵੀਰਿਯੋ ਪੁਗ੍ਗਲੋ ਅਪ੍ਪਰਜਕ੍ਖੋ, ਕੁਸੀਤੋ ਪੁਗ੍ਗਲੋ ਮਹਾਰਜਕ੍ਖੋ. ਉਪਟ੍ਠਿਤਸ੍ਸਤਿ ਪੁਗ੍ਗਲੋ ਅਪ੍ਪਰਜਕ੍ਖੋ, ਮੁਟ੍ਠਸ੍ਸਤਿ ਪੁਗ੍ਗਲੋ ਮਹਾਰਜਕ੍ਖੋ. ਸਮਾਹਿਤੋ ਪੁਗ੍ਗਲੋ ਅਪ੍ਪਰਜਕ੍ਖੋ, ਅਸਮਾਹਿਤੋ ਪੁਗ੍ਗਲੋ ਮਹਾਰਜਕ੍ਖੋ. ਪਞ੍ਞਵਾ ਪੁਗ੍ਗਲੋ ਅਪ੍ਪਰਜਕ੍ਖੋ, ਦੁਪ੍ਪਞ੍ਞੋ ਪੁਗ੍ਗਲੋ ਮਹਾਰਜਕ੍ਖੋ.
ਤਿਕ੍ਖਿਨ੍ਦ੍ਰਿਯੇ ਮੁਦਿਨ੍ਦ੍ਰਿਯੇਤਿ ਸਦ੍ਧੋ ਪੁਗ੍ਗਲੋ ਤਿਕ੍ਖਿਨ੍ਦ੍ਰਿਯੋ, ਅਸ੍ਸਦ੍ਧੋ ਪੁਗ੍ਗਲੋ ਮੁਦਿਨ੍ਦ੍ਰਿਯੋ…ਪੇ… ਪਞ੍ਞਵਾ ਪੁਗ੍ਗਲੋ ਤਿਕ੍ਖਿਨ੍ਦ੍ਰਿਯੋ, ਦੁਪ੍ਪਞ੍ਞੋ ਪੁਗ੍ਗਲੋ ਮੁਦਿਨ੍ਦ੍ਰਿਯੋ. ਸ੍ਵਾਕਾਰੇ ਦ੍ਵਾਕਾਰੇਤਿ ਸਦ੍ਧੋ ਪੁਗ੍ਗਲੋ ਸ੍ਵਾਕਾਰੋ, ਅਸ੍ਸਦ੍ਧੋ ਪੁਗ੍ਗਲੋ ਦ੍ਵਾਕਾਰੋ…ਪੇ… ਪਞ੍ਞਵਾ ਪੁਗ੍ਗਲੋ ਸ੍ਵਾਕਾਰੋ, ਦੁਪ੍ਪਞ੍ਞੋ ਪੁਗ੍ਗਲੋ ਦ੍ਵਾਕਾਰੋ. ਸੁਵਿਞ੍ਞਾਪਯੇ ਦੁਵਿਞ੍ਞਾਪਯੇਤਿ ਸਦ੍ਧੋ ਪੁਗ੍ਗਲੋ ਸੁਵਿਞ੍ਞਾਪਯੋ, ਅਸ੍ਸਦ੍ਧੋ ਪੁਗ੍ਗਲੋ ਦੁਵਿਞ੍ਞਾਪਯੋ…ਪੇ… ਪਞ੍ਞਵਾ ਪੁਗ੍ਗਲੋ ਸੁਵਿਞ੍ਞਾਪਯੋ, ਦੁਪ੍ਪਞ੍ਞੋ ਪੁਗ੍ਗਲੋ ਦੁਵਿਞ੍ਞਾਪਯੋ.
ਅਪ੍ਪੇਕਚ੍ਚੇ ਪਰਲੋਕਵਜ੍ਜਭਯਦਸ੍ਸਾਵਿਨੋ, ਅਪ੍ਪੇਕਚ੍ਚੇ ਨਪਰਲੋਕਵਜ੍ਜਭਯਦਸ੍ਸਾਵਿਨੋਤਿ ਸਦ੍ਧੋ ਪੁਗ੍ਗਲੋ ਪਰਲੋਕਵਜ੍ਜਭਯਦਸ੍ਸਾਵੀ, ਅਸ੍ਸਦ੍ਧੋ ਪੁਗ੍ਗਲੋ ਨਪਰਲੋਕਵਜ੍ਜਭਯਦਸ੍ਸਾਵੀ. ਆਰਦ੍ਧਵੀਰਿਯੋ ਪੁਗ੍ਗਲੋ ਪਰਲੋਕਵਜ੍ਜਭਯਦਸ੍ਸਾਵੀ, ਕੁਸੀਤੋ ਪੁਗ੍ਗਲੋ ਨਪਰਲੋਕਵਜ੍ਜਭਯਦਸ੍ਸਾਵੀ…ਪੇ… ਪਞ੍ਞਵਾ ਪੁਗ੍ਗਲੋ ਪਰਲੋਕਵਜ੍ਜਭਯਦਸ੍ਸਾਵੀ, ਦੁਪ੍ਪਞ੍ਞੋ ਪੁਗ੍ਗਲੋ ਨਪਰਲੋਕਵਜ੍ਜਭਯਦਸ੍ਸਾਵੀ.
ਲੋਕੋਤਿ ਖਨ੍ਧਲੋਕੋ ਧਾਤੁਲੋਕੋ ਆਯਤਨਲੋਕੋ ਵਿਪਤ੍ਤਿਭਵਲੋਕੋ ਵਿਪਤ੍ਤਿਸਮ੍ਭਵਲੋਕੋ ਸਮ੍ਪਤ੍ਤਿਭਵਲੋਕੋ ਸਮ੍ਪਤ੍ਤਿਸਮ੍ਭਵਲੋਕੋ.
ਏਕੋ ਲੋਕੋ – ਸਬ੍ਬੇ ਸਤ੍ਤਾ ਆਹਾਰਟ੍ਠਿਤਿਕਾ. ਦ੍ਵੇ ਲੋਕਾ – ਨਾਮਞ੍ਚ ਰੂਪਞ੍ਚ. ਤਯੋ ਲੋਕਾ – ਤਿਸ੍ਸੋ ਵੇਦਨਾ. ਚਤ੍ਤਾਰੋ ਲੋਕਾ – ਚਤ੍ਤਾਰੋ ਆਹਾਰਾ. ਪਞ੍ਚ ਲੋਕਾ – ਪਞ੍ਚੁਪਾਦਾਨਕ੍ਖਨ੍ਧਾ. ਛ ਲੋਕਾ – ਛ ਅਜ੍ਝਤ੍ਤਿਕਾਨਿ ਆਯਤਨਾਨਿ. ਸਤ੍ਤ ਲੋਕਾ – ਸਤ੍ਤ ਵਿਞ੍ਞਾਣਟ੍ਠਿਤਿਯੋ. ਅਟ੍ਠ ਲੋਕਾ – ਅਟ੍ਠ ਲੋਕਧਮ੍ਮਾ. ਨਵ ਲੋਕਾ – ਨਵ ਸਤ੍ਤਾਵਾਸਾ. ਦਸ ਲੋਕਾ – ਦਸਾਯਤਨਾਨਿ. ਦ੍ਵਾਦਸ ਲੋਕਾ – ਦ੍ਵਾਦਸਾਯਤਨਾਨਿ. ਅਟ੍ਠਾਰਸ ਲੋਕਾ – ਅਟ੍ਠਾਰਸ ਧਾਤੁਯੋ.
ਵਜ੍ਜਨ੍ਤਿ ਸਬ੍ਬੇ ਕਿਲੇਸਾ ਵਜ੍ਜਾ, ਸਬ੍ਬੇ ਦੁਚ੍ਚਰਿਤਾ ਵਜ੍ਜਾ, ਸਬ੍ਬੇ ਅਭਿਸਙ੍ਖਾਰਾ ਵਜ੍ਜਾ, ਸਬ੍ਬੇ ਭਵਗਾਮਿਕਮ੍ਮਾ ਵਜ੍ਜਾ. ਇਤਿ ਇਮਸ੍ਮਿਞ੍ਚ ਲੋਕੇ ਇਮਸ੍ਮਿਞ੍ਚ ਵਜ੍ਜੇ ਤਿਬ੍ਬਾ ਭਯਸਞ੍ਞਾ ਪਚ੍ਚੁਪਟ੍ਠਿਤਾ ਹੋਨ੍ਤਿ, ਸੇਯ੍ਯਥਾਪਿ ਉਕ੍ਖਿਤ੍ਤਾਸਿਕੇ ਵਧਕੇ. ਇਮੇਹਿ ਪਞ੍ਞਾਸਾਯ ਆਕਾਰੇਹਿ ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਜਾਨਾਤਿ ਪਸ੍ਸਤਿ ਅਞ੍ਞਾਤਿ ਪਟਿਵਿਜ੍ਝਤੀਤਿ.
ਇਨ੍ਦ੍ਰਿਯਸਮੋਧਾਨੋ ਪਞ੍ਚਮੋ.
ਤਤਿਯਭਾਣਵਾਰੋ.
ਇਨ੍ਦ੍ਰਿਯਕਥਾ ਨਿਟ੍ਠਿਤਾ.