੩. ਉਪਕ੍ਕਿਲੇਸਞਾਣਨਿਦ੍ਦੇਸੋ
ਪਠਮਚ੍ਛਕ੍ਕਂ
੧੫੪. ਇਮੇਹਿ ਚ ਪਨ ਨੀਵਰਣੇਹਿ ਵਿਸੁਦ੍ਧਚਿਤ੍ਤਸ੍ਸ ਸੋਲ਼ਸਵਤ੍ਥੁਕਂ ਆਨਾਪਾਨਸ੍ਸਤਿਸਮਾਧਿਂ ਭਾਵਯਤੋ ਖਣਿਕਸਮੋਧਾਨਾ ਕਤਮੇ ਅਟ੍ਠਾਰਸ ਉਪਕ੍ਕਿਲੇਸਾ ਉਪ੍ਪਜ੍ਜਨ੍ਤਿ? ਅਸ੍ਸਾਸਾਦਿਮਜ੍ਝਪਰਿਯੋਸਾਨਂ ਸਤਿਯਾ ਅਨੁਗਚ੍ਛਤੋ ਅਜ੍ਝਤ੍ਤਵਿਕ੍ਖੇਪਗਤਂ ਚਿਤ੍ਤਂ ਸਮਾਧਿਸ੍ਸ ਪਰਿਪਨ੍ਥੋ. ਪਸ੍ਸਾਸਾਦਿਮਜ੍ਝਪਰਿਯੋਸਾਨਂ ਸਤਿਯਾ ਅਨੁਗਚ੍ਛਤੋ ਬਹਿਦ੍ਧਾਵਿਕ੍ਖੇਪਗਤਂ ਚਿਤ੍ਤਂ ਸਮਾਧਿਸ੍ਸ ਪਰਿਪਨ੍ਥੋ. ਅਸ੍ਸਾਸਪਟਿਕਙ੍ਖਨਾ ਨਿਕਨ੍ਤਿ ਤਣ੍ਹਾਚਰਿਯਾ ਸਮਾਧਿਸ੍ਸ ਪਰਿਪਨ੍ਥੋ. ਪਸ੍ਸਾਸਪਟਿਕਙ੍ਖਨਾ ਨਿਕਨ੍ਤਿ ਤਣ੍ਹਾਚਰਿਯਾ ਸਮਾਧਿਸ੍ਸ ਪਰਿਪਨ੍ਥੋ. ਅਸ੍ਸਾਸੇਨਾਭਿਤੁਨ੍ਨਸ੍ਸ ਪਸ੍ਸਾਸਪਟਿਲਾਭੇ ਮੁਚ੍ਛਨਾ ਸਮਾਧਿਸ੍ਸ ਪਰਿਪਨ੍ਥੋ. ਪਸ੍ਸਾਸੇਨਾਭਿਤੁਨ੍ਨਸ੍ਸ ਅਸ੍ਸਾਸਪਟਿਲਾਭੇ ਮੁਚ੍ਛਨਾ ਸਮਾਧਿਸ੍ਸ ਪਰਿਪਨ੍ਥੋ.
ਅਨੁਗਚ੍ਛਨਾ ਚ ਅਸ੍ਸਾਸਂ, ਪਸ੍ਸਾਸਂ ਅਨੁਗਚ੍ਛਨਾ;
ਸਤਿ ਅਜ੍ਝਤ੍ਤਵਿਕ੍ਖੇਪਾ, ਕਙ੍ਖਨਾ ਬਹਿਦ੍ਧਾਵਿਕ੍ਖੇਪਪਤ੍ਥਨਾ [ਵਿਕ੍ਖੇਪਪਨ੍ਥਨਾ (ਸ੍ਯਾ.)].
ਅਸ੍ਸਾਸੇਨਾਭਿਤੁਨ੍ਨਸ੍ਸ, ਪਸ੍ਸਾਸਪਟਿਲਾਭੇ ਮੁਚ੍ਛਨਾ;
ਪਸ੍ਸਾਸੇਨਾਭਿਤੁਨ੍ਨਸ੍ਸ, ਅਸ੍ਸਾਸਪਟਿਲਾਭੇ ਮੁਚ੍ਛਨਾ.
ਛ ਏਤੇ ਉਪਕ੍ਕਿਲੇਸਾ, ਆਨਾਪਾਨਸ੍ਸਤਿਸਮਾਧਿਸ੍ਸ;
ਯੇਹਿ ਵਿਕ੍ਖਿਪ੍ਪਮਾਨਸ੍ਸ [ਵਿਕਮ੍ਪਮਾਨਸ੍ਸ (ਸ੍ਯਾ.)], ਨੋ ਚ ਚਿਤ੍ਤਂ ਵਿਮੁਚ੍ਚਤਿ;
ਵਿਮੋਕ੍ਖਂ ਅਪ੍ਪਜਾਨਨ੍ਤਾ, ਤੇ ਹੋਨ੍ਤਿ ਪਰਪਤ੍ਤਿਯਾਤਿ.
ਦੁਤਿਯਚ੍ਛਕ੍ਕਂ
੧੫੫. ਨਿਮਿਤ੍ਤਂ ਆਵਜ੍ਜਤੋ ਅਸ੍ਸਾਸੇ ਚਿਤ੍ਤਂ ਵਿਕਮ੍ਪਤਿ – ਸਮਾਧਿਸ੍ਸ ਪਰਿਪਨ੍ਥੋ. ਅਸ੍ਸਾਸਂ ਆਵਜ੍ਜਤੋ ਨਿਮਿਤ੍ਤੇ ਚਿਤ੍ਤਂ ਵਿਕਮ੍ਪਤਿ – ਸਮਾਧਿਸ੍ਸ ਪਰਿਪਨ੍ਥੋ. ਨਿਮਿਤ੍ਤਂ ਆਵਜ੍ਜਤੋ ਪਸ੍ਸਾਸੇ ਚਿਤ੍ਤਂ ਵਿਕਮ੍ਪਤਿ – ਸਮਾਧਿਸ੍ਸ ਪਰਿਪਨ੍ਥੋ. ਪਸ੍ਸਾਸਂ ਆਵਜ੍ਜਤੋ ਨਿਮਿਤ੍ਤੇ ਚਿਤ੍ਤਂ ਵਿਕਮ੍ਪਤਿ – ਸਮਾਧਿਸ੍ਸ ਪਰਿਪਨ੍ਥੋ. ਅਸ੍ਸਾਸਂ ਆਵਜ੍ਜਤੋ ਪਸ੍ਸਾਸੇ ਚਿਤ੍ਤਂ ਵਿਕਮ੍ਪਤਿ – ਸਮਾਧਿਸ੍ਸ ਪਰਿਪਨ੍ਥੋ. ਪਸ੍ਸਾਸਂ ਆਵਜ੍ਜਤੋ ਅਸ੍ਸਾਸੇ ਚਿਤ੍ਤਂ ਵਿਕਮ੍ਪਤਿ – ਸਮਾਧਿਸ੍ਸ ਪਰਿਪਨ੍ਥੋ.
ਨਿਮਿਤ੍ਤਂ ਆਵਜ੍ਜਮਾਨਸ੍ਸ, ਅਸ੍ਸਾਸੇ ਵਿਕ੍ਖਿਪਤੇ ਮਨੋ;
ਅਸ੍ਸਾਸਂ ਆਵਜ੍ਜਮਾਨਸ੍ਸ, ਨਿਮਿਤ੍ਤੇ ਚਿਤ੍ਤਂ ਵਿਕਮ੍ਪਤਿ.
ਨਿਮਿਤ੍ਤਂ ਆਵਜ੍ਜਮਾਨਸ੍ਸ, ਪਸ੍ਸਾਸੇ ਵਿਕ੍ਖਿਪਤੇ ਮਨੋ;
ਪਸ੍ਸਾਸਂ ਆਵਜ੍ਜਮਾਨਸ੍ਸ, ਨਿਮਿਤ੍ਤੇ ਚਿਤ੍ਤਂ ਵਿਕਮ੍ਪਤਿ.
ਅਸ੍ਸਾਸਂ ਆਵਜ੍ਜਮਾਨਸ੍ਸ, ਪਸ੍ਸਾਸੇ ਵਿਕ੍ਖਿਪਤੇ ਮਨੋ;
ਪਸ੍ਸਾਸਂ ਆਵਜ੍ਜਮਾਨਸ੍ਸ, ਅਸ੍ਸਾਸੇ ਚਿਤ੍ਤਂ ਵਿਕਮ੍ਪਤਿ.
ਛ ਏਤੇ ਉਪਕ੍ਕਿਲੇਸਾ, ਆਨਾਪਾਨਸ੍ਸਤਿਸਮਾਧਿਸ੍ਸ;
ਯੇਹਿ ਵਿਕ੍ਖਿਪ੍ਪਮਾਨਸ੍ਸ, ਨੋ ਚ ਚਿਤ੍ਤਂ ਵਿਮੁਚ੍ਚਤਿ;
ਵਿਮੋਕ੍ਖਂ ਅਪ੍ਪਜਾਨਨ੍ਤਾ, ਤੇ ਹੋਨ੍ਤਿ ਪਰਪਤ੍ਤਿਯਾਤਿ.
ਤਤਿਯਚ੍ਛਕ੍ਕਂ
੧੫੬. ਅਤੀਤਾਨੁਧਾਵਨਂ ਚਿਤ੍ਤਂ ਵਿਕ੍ਖੇਪਾਨੁਪਤਿਤਂ – ਸਮਾਧਿਸ੍ਸ ਪਰਿਪਨ੍ਥੋ. ਅਨਾਗਤਪਟਿਕਙ੍ਖਨਂ ਚਿਤ੍ਤਂ ਵਿਕਮ੍ਪਿਤਂ – ਸਮਾਧਿਸ੍ਸ ਪਰਿਪਨ੍ਥੋ. ਲੀਨਂ ਚਿਤ੍ਤਂ ਕੋਸਜ੍ਜਾਨੁਪਤਿਤਂ – ਸਮਾਧਿਸ੍ਸ ਪਰਿਪਨ੍ਥੋ. ਅਤਿਪਗ੍ਗਹਿਤਂ ਚਿਤ੍ਤਂ ਉਦ੍ਧਚ੍ਚਾਨੁਪਤਿਤਂ – ਸਮਾਧਿਸ੍ਸ ਪਰਿਪਨ੍ਥੋ. ਅਭਿਨਤਂ ਚਿਤ੍ਤਂ ਰਾਗਾਨੁਪਤਿਤਂ – ਸਮਾਧਿਸ੍ਸ ਪਰਿਪਨ੍ਥੋ. ਅਪਨਤਂ ਚਿਤ੍ਤਂ ਬ੍ਯਾਪਾਦਾਨੁਪਤਿਤਂ – ਸਮਾਧਿਸ੍ਸ ਪਰਿਪਨ੍ਥੋ.
ਅਤੀਤਾਨੁਧਾਵਨਂ ਚਿਤ੍ਤਂ, ਅਨਾਗਤਪਟਿਕਙ੍ਖਨਂ ਲੀਨਂ;
ਅਤਿਪਗ੍ਗਹਿਤਂ ਅਭਿਨਤਂ, ਅਪਨਤਂ ਚਿਤ੍ਤਂ ਨ ਸਮਾਧਿਯਤਿ.
ਛ ਏਤੇ ਉਪਕ੍ਕਿਲੇਸਾ, ਆਨਾਪਾਨਸ੍ਸਤਿਸਮਾਧਿਸ੍ਸ;
ਯੇਹਿ ਉਪਕ੍ਕਿਲਿਟ੍ਠਸਙ੍ਕਪ੍ਪੋ, ਅਧਿਚਿਤ੍ਤਂ ਨਪ੍ਪਜਾਨਾਤੀਤਿ.
੧੫੭. ਅਸ੍ਸਾਸਾਦਿਮਜ੍ਝਪਰਿਯੋਸਾਨਂ ਸਤਿਯਾ ਅਨੁਗਚ੍ਛਤੋ ਅਜ੍ਝਤ੍ਤਂ ਵਿਕ੍ਖੇਪਗਤੇਨ ਚਿਤ੍ਤੇਨ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਪਸ੍ਸਾਸਾਦਿਮਜ੍ਝਪਰਿਯੋਸਾਨਂ ਸਤਿਯਾ ਅਨੁਗਚ੍ਛਤੋ ਬਹਿਦ੍ਧਾਵਿਕ੍ਖੇਪਗਤੇਨ ਚਿਤ੍ਤੇਨ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਅਸ੍ਸਾਸਪਟਿਕਙ੍ਖਨਾਯ ਨਿਕਨ੍ਤਿਯਾ ਤਣ੍ਹਾਚਰਿਯਾਯ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਪਸ੍ਸਾਸਪਟਿਕਙ੍ਖਨਾਯ ਨਿਕਨ੍ਤਿਯਾ ਤਣ੍ਹਾਚਰਿਯਾਯ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਅਸ੍ਸਾਸੇਨਾਭਿਤੁਨ੍ਨਸ੍ਸ ਪਸ੍ਸਾਸਪਟਿਲਾਭੇ ਮੁਚ੍ਛਿਤਤ੍ਤਾ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਪਸ੍ਸਾਸੇਨਾਭਿਤੁਨ੍ਨਸ੍ਸ ਅਸ੍ਸਾਸਪਟਿਲਾਭੇ ਮੁਚ੍ਛਿਤਤ੍ਤਾ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਨਿਮਿਤ੍ਤਂ ਆਵਜ੍ਜਤੋ ਅਸ੍ਸਾਸੇ ਚਿਤ੍ਤਂ ਵਿਕਮ੍ਪਿਤਤ੍ਤਾ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਅਸ੍ਸਾਸਂ ਆਵਜ੍ਜਤੋ ਨਿਮਿਤ੍ਤੇ ਚਿਤ੍ਤਂ ਵਿਕਮ੍ਪਿਤਤ੍ਤਾ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਨਿਮਿਤ੍ਤਂ ਆਵਜ੍ਜਤੋ ਪਸ੍ਸਾਸੇ ਚਿਤ੍ਤਂ ਵਿਕਮ੍ਪਿਤਤ੍ਤਾ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਪਸ੍ਸਾਸਂ ਆਵਜ੍ਜਤੋ ਨਿਮਿਤ੍ਤੇ ਚਿਤ੍ਤਂ ਵਿਕਮ੍ਪਿਤਤ੍ਤਾ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਅਸ੍ਸਾਸਂ ਆਵਜ੍ਜਤੋ ਪਸ੍ਸਾਸੇ ਚਿਤ੍ਤਂ ਵਿਕਮ੍ਪਿਤਤ੍ਤਾ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਪਸ੍ਸਾਸਂ ਆਵਜ੍ਜਤੋ ਅਸ੍ਸਾਸੇ ਚਿਤ੍ਤਂ ਵਿਕਮ੍ਪਿਤਤ੍ਤਾ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਅਤੀਤਾਨੁਧਾਵਨੇਨ ਚਿਤ੍ਤੇਨ ਵਿਕ੍ਖੇਪਾਨੁਪਤਿਤੇਨ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਅਨਾਗਤਪਟਿਕਙ੍ਖਨੇਨ ਚਿਤ੍ਤੇਨ ਵਿਕਮ੍ਪਿਤੇਨ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਲੀਨੇਨ ਚਿਤ੍ਤੇਨ ਕੋਸਜ੍ਜਾਨੁਪਤਿਤੇਨ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਅਤਿਪਗ੍ਗਹਿਤੇਨ ਚਿਤ੍ਤੇਨ ਉਦ੍ਧਚ੍ਚਾਨੁਪਤਿਤੇਨ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਅਭਿਨਤੇਨ ਚਿਤ੍ਤੇਨ ਰਾਗਾਨੁਪਤਿਤੇਨ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ. ਅਪਨਤੇਨ ਚਿਤ੍ਤੇਨ ਬ੍ਯਾਪਾਦਾਨੁਪਤਿਤੇਨ ਕਾਯੋਪਿ ਚਿਤ੍ਤਮ੍ਪਿ ਸਾਰਦ੍ਧਾ ਚ ਹੋਨ੍ਤਿ ਇਞ੍ਜਿਤਾ ਚ ਫਨ੍ਦਿਤਾ ਚ.
ਆਨਾਪਾਨਸ੍ਸਤਿ ਯਸ੍ਸ, ਪਰਿਪੁਣ੍ਣਾ ਅਭਾਵਿਤਾ;
ਕਾਯੋਪਿ ਇਞ੍ਜਿਤੋ ਹੋਤਿ, ਚਿਤ੍ਤਮ੍ਪਿ ਹੋਤਿ ਇਞ੍ਜਿਤਂ;
ਕਾਯੋਪਿ ਫਨ੍ਦਿਤੋ ਹੋਤਿ, ਚਿਤ੍ਤਮ੍ਪਿ ਹੋਤਿ ਫਨ੍ਦਿਤਂ.
ਆਨਾਪਾਨਸ੍ਸਤਿ ਯਸ੍ਸ, ਪਰਿਪੁਣ੍ਣਾ ਸੁਭਾਵਿਤਾ;
ਕਾਯੋਪਿ ਅਨਿਞ੍ਜਿਤੋ ਹੋਤਿ, ਚਿਤ੍ਤਮ੍ਪਿ ਹੋਤਿ ਅਨਿਞ੍ਜਿਤਂ;
ਕਾਯੋਪਿ ਅਫਨ੍ਦਿਤੋ ਹੋਤਿ, ਚਿਤ੍ਤਮ੍ਪਿ ਹੋਤਿ ਅਫਨ੍ਦਿਤਨ੍ਤਿ.
ਇਮੇਹਿ ਚ ਪਨ ਨੀਵਰਣੇਹਿ ਵਿਸੁਦ੍ਧਚਿਤ੍ਤਸ੍ਸ ਸੋਲ਼ਸਵਤ੍ਥੁਕਂ ਆਨਾਪਾਨਸ੍ਸਤਿਸਮਾਧਿਂ ਭਾਵਯਤੋ ਖਣਿਕਸਮੋਧਾਨਾ ਇਮੇ ਅਟ੍ਠਾਰਸ ਉਪਕ੍ਕਿਲੇਸਾ ਉਪ੍ਪਜ੍ਜਨ੍ਤਿ.
ਉਪਕ੍ਕਿਲੇਸਞਾਣਨਿਦ੍ਦੇਸੋ ਤਤਿਯੋ.