੭. ਆਵਟ੍ਟਹਾਰਵਿਭਙ੍ਗੋ
੨੯. ਤਤ੍ਥ ਕਤਮੋ ਆਵਟ੍ਟੋ ਹਾਰੋ? ‘‘ਏਕਮ੍ਹਿ ਪਦਟ੍ਠਾਨੇ’’ਤਿ ਅਯਂ.
‘‘ਆਰਮ੍ਭਥ [ਆਰਬ੍ਭਥ (ਸੀ.) ਸਂ. ਨਿ. ੧.੧੮੫; ਥੇਰਗਾ. ੨੫੬ ਪਸ੍ਸਿਤਬ੍ਬਂ] ਨਿਕ੍ਕਮਥ, ਯੁਞ੍ਜਥ ਬੁਦ੍ਧਸਾਸਨੇ;
ਧੁਨਾਥ ਮਚ੍ਚੁਨੋ ਸੇਨਂ, ਨਲ਼ਾਗਾਰਂਵ ਕੁਞ੍ਜਰੋ’’ਤਿ.
‘‘ਆਰਮ੍ਭਥ ਨਿਕ੍ਕਮਥਾ’’ਤਿ ਵੀਰਿਯਸ੍ਸ ਪਦਟ੍ਠਾਨਂ. ‘‘ਯੁਞ੍ਜਥ ਬੁਦ੍ਧਸਾਸਨੇ’’ਤਿ ਸਮਾਧਿਸ੍ਸ ਪਦਟ੍ਠਾਨਂ. ‘‘ਧੁਨਾਥ ਮਚ੍ਚੁਨੋ ਸੇਨਂ, ਨਲ਼ਾਗਾਰਂਵ ਕੁਞ੍ਜਰੋ’’ਤਿ ਪਞ੍ਞਾਯ ਪਦਟ੍ਠਾਨਂ. ‘‘ਆਰਮ੍ਭਥ ਨਿਕ੍ਕਮਥਾ’’ਤਿ ਵੀਰਿਯਿਨ੍ਦ੍ਰਿਯਸ੍ਸ ਪਦਟ੍ਠਾਨਂ. ‘‘ਯੁਞ੍ਜਥ ਬੁਦ੍ਧਸਾਸਨੇ’’ਤਿ ਸਮਾਧਿਨ੍ਦ੍ਰਿਯਸ੍ਸ ਪਦਟ੍ਠਾਨਂ. ‘‘ਧੁਨਾਥ ਮਚ੍ਚੁਨੋ ਸੇਨਂ, ਨਲ਼ਾਗਾਰਂਵ ਕੁਞ੍ਜਰੋ’’ਤਿ ਪਞ੍ਞਿਨ੍ਦ੍ਰਿਯਸ੍ਸ ਪਦਟ੍ਠਾਨਂ. ਇਮਾਨਿ ਪਦਟ੍ਠਾਨਾਨਿ ਦੇਸਨਾ.
ਅਯੁਞ੍ਜਨ੍ਤਾਨਂ ਵਾ ਸਤ੍ਤਾਨਂ ਯੋਗੇ, ਯੁਞ੍ਜਨ੍ਤਾਨਂ ਵਾ ਆਰਮ੍ਭੋ.
ਤਤ੍ਥ ਯੇ ਨ ਯੁਞ੍ਜਨ੍ਤਿ, ਤੇ ਪਮਾਦਮੂਲਕਾ ਨ ਯੁਞ੍ਜਨ੍ਤਿ. ਸੋ ਪਮਾਦੋ ਦੁਵਿਧੋ ਤਣ੍ਹਾਮੂਲਕੋ ਅਵਿਜ੍ਜਾਮੂਲਕੋ ਚ. ਤਤ੍ਥ ਅਵਿਜ੍ਜਾਮੂਲਕੋ ਯੇਨ ਅਞ੍ਞਾਣੇਨ ਨਿਵੁਤੋ ਞੇਯ੍ਯਟ੍ਠਾਨਂ ਨਪ੍ਪਜਾਨਾਤਿ ਪਞ੍ਚਕ੍ਖਨ੍ਧਾ ਉਪ੍ਪਾਦਵਯਧਮ੍ਮਾਤਿ, ਅਯਂ ਅਵਿਜ੍ਜਾਮੂਲਕੋ. ਯੋ ਤਣ੍ਹਾਮੂਲਕੋ, ਸੋ ਤਿਵਿਧੋ ਅਨੁਪ੍ਪਨ੍ਨਾਨਂ ਭੋਗਾਨਂ ਉਪ੍ਪਾਦਾਯ ਪਰਿਯੇਸਨ੍ਤੋ ਪਮਾਦਂ ਆਪਜ੍ਜਤਿ, ਉਪ੍ਪਨ੍ਨਾਨਂ ਭੋਗਾਨਂ ਆਰਕ੍ਖਨਿਮਿਤ੍ਤਂ ਪਰਿਭੋਗਨਿਮਿਤ੍ਤਞ੍ਚ ਪਮਾਦਂ ਆਪਜ੍ਜਤਿ ਅਯਂ ਲੋਕੇ ਚਤੁਬ੍ਬਿਧੋ ਪਮਾਦੋ ਏਕਵਿਧੋ ਅਵਿਜ੍ਜਾਯ ਤਿਵਿਧੋ ਤਣ੍ਹਾਯ. ਤਤ੍ਥ ਅਵਿਜ੍ਜਾਯ ਨਾਮਕਾਯੋ ਪਦਟ੍ਠਾਨਂ. ਤਣ੍ਹਾਯ ਰੂਪਕਾਯੋ ਪਦਟ੍ਠਾਨਂ. ਤਂ ਕਿਸ੍ਸ ਹੇਤੁ, ਰੂਪੀਸੁ ਭਵੇਸੁ ਅਜ੍ਝੋਸਾਨਂ, ਅਰੂਪੀਸੁ ਸਮ੍ਮੋਹੋ? ਤਤ੍ਥ ਰੂਪਕਾਯੋ ਰੂਪਕ੍ਖਨ੍ਧੋ ਨਾਮਕਾਯੋ ਚਤ੍ਤਾਰੋ ਅਰੂਪਿਨੋ ਖਨ੍ਧਾ. ਇਮੇ ਪਞ੍ਚਕ੍ਖਨ੍ਧਾ ਕਤਮੇਨ ਉਪਾਦਾਨੇਨ ਸਉਪਾਦਾਨਾ, ਤਣ੍ਹਾਯ ਚ ਅਵਿਜ੍ਜਾਯ ਚ? ਤਤ੍ਥ ਤਣ੍ਹਾ ਦ੍ਵੇ ਉਪਾਦਾਨਾਨਿ ਕਾਮੁਪਾਦਾਨਞ੍ਚ ਸੀਲਬ੍ਬਤੁਪਾਦਾਨਞ੍ਚ. ਅਵਿਜ੍ਜਾ ਦ੍ਵੇ ਉਪਾਦਾਨਾਨਿ ਦਿਟ੍ਠੁਪਾਦਾਨਞ੍ਚ ਅਤ੍ਤਵਾਦੁਪਾਦਾਨਞ੍ਚ. ਇਮੇਹਿ ਚਤੂਹਿ ਉਪਾਦਾਨੇਹਿ ਯੇ ਸਉਪਾਦਾਨਾ ਖਨ੍ਧਾ, ਇਦਂ ਦੁਕ੍ਖਂ. ਚਤ੍ਤਾਰਿ ਉਪਾਦਾਨਾਨਿ, ਅਯਂ ਸਮੁਦਯੋ. ਪਞ੍ਚਕ੍ਖਨ੍ਧਾ ਦੁਕ੍ਖਂ. ਤੇਸਂ ਭਗਵਾ ਪਰਿਞ੍ਞਾਯ ਪਹਾਨਾਯ ਚ ਧਮ੍ਮਂ ਦੇਸੇਤਿ ਦੁਕ੍ਖਸ੍ਸ ਪਰਿਞ੍ਞਾਯ ਸਮੁਦਯਸ੍ਸ ਪਹਾਨਾਯ.
੩੦. ਤਤ੍ਥ ਯੋ ਤਿਵਿਧੋ ਤਣ੍ਹਾਮੂਲਕੋ ਪਮਾਦੋ ਅਨੁਪ੍ਪਨ੍ਨਾਨਂ ਭੋਗਾਨਂ ਉਪ੍ਪਾਦਾਯ ਪਰਿਯੇਸਤਿ, ਉਪ੍ਪਨ੍ਨਾਨਂ ਭੋਗਾਨਂ ਆਰਕ੍ਖਣਞ੍ਚ ਕਰੋਤਿ ਪਰਿਭੋਗਨਿਮਿਤ੍ਤਞ੍ਚ, ਤਸ੍ਸ ਸਮ੍ਪਟਿਵੇਧੇਨ ਰਕ੍ਖਣਾ ਪਟਿਸਂਹਰਣਾ, ਅਯਂ ਸਮਥੋ.
ਸੋ ਕਥਂ ਭਵਤਿ? ਯਦਾ ਜਾਨਾਤਿ ਕਾਮਾਨਂ ਅਸ੍ਸਾਦਞ੍ਚ ਅਸ੍ਸਾਦਤੋ ਆਦੀਨਵਞ੍ਚ ਆਦੀਨਵਤੋ ਨਿਸ੍ਸਰਣਞ੍ਚ ਨਿਸ੍ਸਰਣਤੋ ਓਕਾਰਞ੍ਚ ਸਂਕਿਲੇਸਞ੍ਚ ਵੋਦਾਨਞ੍ਚ ਨੇਕ੍ਖਮ੍ਮੇ ਚ ਆਨਿਸਂਸਂ. ਤਤ੍ਥ ਯਾ ਵੀਮਂਸਾ ਉਪਪਰਿਕ੍ਖਾ ਅਯਂ ਵਿਪਸ੍ਸਨਾ. ਇਮੇ ਦ੍ਵੇ ਧਮ੍ਮਾ ਭਾਵਨਾਪਾਰਿਪੂਰਿਂ ਗਚ੍ਛਨ੍ਤਿ ਸਮਥੋ ਚ ਵਿਪਸ੍ਸਨਾ ਚ. ਇਮੇਸੁ ਦ੍ਵੀਸੁ ਧਮ੍ਮੇਸੁ ਭਾਵਿਯਮਾਨੇਸੁ ਦ੍ਵੇ ਧਮ੍ਮਾ ਪਹੀਯਨ੍ਤਿ ਤਣ੍ਹਾ ਚ ਅਵਿਜ੍ਜਾ ਚ, ਇਮੇਸੁ ਦ੍ਵੀਸੁ ਧਮ੍ਮੇਸੁ ਪਹੀਨੇਸੁ ਚਤ੍ਤਾਰਿ ਉਪਾਦਾਨਾਨਿ ਨਿਰੁਜ੍ਝਨ੍ਤਿ. ਉਪਾਦਾਨਨਿਰੋਧਾ ਭਵਨਿਰੋਧੋ, ਭਵਨਿਰੋਧਾ ਜਾਤਿਨਿਰੋਧੋ, ਜਾਤਿਨਿਰੋਧਾ ਜਰਾਮਰਣਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ ਨਿਰੁਜ੍ਝਨ੍ਤਿ. ਏਵਮੇਤਸ੍ਸ ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਨਿਰੋਧੋ ਹੋਤਿ. ਇਤਿ ਪੁਰਿਮਕਾਨਿ ਚ ਦ੍ਵੇ ਸਚ੍ਚਾਨਿ ਦੁਕ੍ਖਂ ਸਮੁਦਯੋ ਚ, ਸਮਥੋ ਚ ਵਿਪਸ੍ਸਨਾ ਚ ਮਗ੍ਗੋ. ਭਵਨਿਰੋਧੋ ਨਿਬ੍ਬਾਨਂ ਇਮਾਨਿ ਚਤ੍ਤਾਰਿ ਸਚ੍ਚਾਨਿ. ਤੇਨਾਹ ਭਗਵਾ ‘‘ਆਰਮ੍ਭਥ ਨਿਕ੍ਕਮਥਾ’’ਤਿ.
ਯਥਾਪਿ ਮੂਲੇ ਅਨੁਪਦ੍ਦਵੇ ਦਲ਼੍ਹੇ, ਛਿਨ੍ਨੋਪਿ ਰੁਕ੍ਖੋ ਪੁਨਰੇਵ [ਪੁਨਦੇਵ (ਕ.) ਪਸ੍ਸ ਧ. ਪ. ੩੩੮] ਰੂਹਤਿ;
ਏਵਮ੍ਪਿ ਤਣ੍ਹਾਨੁਸਯੇ ਅਨੂਹਤੇ, ਨਿਬ੍ਬਤ੍ਤਤੀ ਦੁਕ੍ਖਮਿਦਂ ਪੁਨਪ੍ਪੁਨਂ.
ਅਯਂ ਤਣ੍ਹਾਨੁਸਯੋ. ਕਤਮਸ੍ਸਾ ਤਣ੍ਹਾਯ? ਭਵਤਣ੍ਹਾਯ. ਯੋ ਏਤਸ੍ਸ ਧਮ੍ਮਸ੍ਸ ਪਚ੍ਚਯੋ ਅਯਂ ਅਵਿਜ੍ਜਾ. ਅਵਿਜ੍ਜਾਪਚ੍ਚਯਾ ਹਿ ਭਵਤਣ੍ਹਾ. ਇਮੇ ਦ੍ਵੇ ਕਿਲੇਸਾ ਤਣ੍ਹਾ ਚ ਅਵਿਜ੍ਜਾ ਚ. ਤਾਨਿ ਚਤ੍ਤਾਰਿ ਉਪਾਦਾਨਾਨਿ ਤੇਹਿ ਚਤੂਹਿ ਉਪਾਦਾਨੇਹਿ ਯੇ ਸਉਪਾਦਾਨਾ ਖਨ੍ਧਾ, ਇਦਂ ਦੁਕ੍ਖਂ. ਚਤ੍ਤਾਰਿ ਉਪਾਦਾਨਾਨਿ ਅਯਂ ਸਮੁਦਯੋ. ਪਞ੍ਚਕ੍ਖਨ੍ਧਾ ਦੁਕ੍ਖਂ. ਤੇਸਂ ਭਗਵਾ ਪਰਿਞ੍ਞਾਯ ਚ ਪਹਾਨਾਯ ਚ ਧਮ੍ਮਂ ਦੇਸੇਤਿ ਦੁਕ੍ਖਸ੍ਸ ਪਰਿਞ੍ਞਾਯ ਸਮੁਦਯਸ੍ਸ ਪਹਾਨਾਯ.
ਯੇਨ ਤਣ੍ਹਾਨੁਸਯਂ ਸਮੂਹਨਤਿ [ਸਮੂਹਨ੍ਤਿ (ਸੀ.)], ਅਯਂ ਸਮਥੋ. ਯੇਨ ਤਣ੍ਹਾਨੁਸਯਸ੍ਸ ਪਚ੍ਚਯਂ ਅਵਿਜ੍ਜਂ ਵਾਰਯਤਿ, ਅਯਂ ਵਿਪਸ੍ਸਨਾ. ਇਮੇ ਦ੍ਵੇ ਧਮ੍ਮਾ ਭਾਵਨਾਪਾਰਿਪੂਰਿਂ ਗਚ੍ਛਨ੍ਤਿ ਸਮਥੋ ਚ ਵਿਪਸ੍ਸਨਾ ਚ. ਤਤ੍ਥ ਸਮਥਸ੍ਸ ਫਲਂ ਰਾਗਵਿਰਾਗਾ ਚੇਤੋਵਿਮੁਤ੍ਤਿ, ਵਿਪਸ੍ਸਨਾਯ ਫਲਂ ਅਵਿਜ੍ਜਾਵਿਰਾਗਾ ਪਞ੍ਞਾਵਿਮੁਤ੍ਤਿ. ਇਤਿ ਪੁਰਿਮਕਾਨਿ ਚ ਦ੍ਵੇ ਸਚ੍ਚਾਨਿ ਦੁਕ੍ਖਂ ਸਮੁਦਯੋ ਚ, ਸਮਥੋ ਵਿਪਸ੍ਸਨਾ ਚ ਮਗ੍ਗੋ, ਦ੍ਵੇ ਚ ਵਿਮੁਤ੍ਤਿਯੋ ਨਿਰੋਧੋ. ਇਮਾਨਿ ਚਤ੍ਤਾਰਿ ਸਚ੍ਚਾਨਿ. ਤੇਨਾਹ ਭਗਵਾ ‘‘ਯਥਾਪਿ ਮੂਲੇ’’ਤਿ.
‘‘ਸਬ੍ਬਪਾਪਸ੍ਸ ਅਕਰਣਂ, ਕੁਸਲਸ੍ਸ ਉਪਸਮ੍ਪਦਾ;
ਸਚਿਤ੍ਤਪਰਿਯੋਦਾਪਨਂ [ਪਰਿਯੋਦਪਨਂ (ਸੀ.) ਧ. ਪ. ੧੮੩; ਦੀ. ਨਿ. ੨.੯੦ ਪਸ੍ਸਿਤਬ੍ਬਂ], ਏਤਂ ਬੁਦ੍ਧਾਨ ਸਾਸਨ’’ਨ੍ਤਿ.
ਸਬ੍ਬਪਾਪਂ ਨਾਮ ਤੀਣਿ ਦੁਚ੍ਚਰਿਤਾਨਿ ਕਾਯਦੁਚ੍ਚਰਿਤਂ ਵਚੀਦੁਚ੍ਚਰਿਤਂ ਮਨੋਦੁਚ੍ਚਰਿਤਂ, ਤੇ ਦਸ ਅਕੁਸਲਕਮ੍ਮਪਥਾ ਪਾਣਾਤਿਪਾਤੋ ਅਦਿਨ੍ਨਾਦਾਨਂ ਕਾਮੇਸੁਮਿਚ੍ਛਾਚਾਰੋ ਮੁਸਾਵਾਦੋ ਪਿਸੁਣਾ ਵਾਚਾ ਫਰੁਸਾ ਵਾਚਾ ਸਮ੍ਫਪ੍ਪਲਾਪੋ ਅਭਿਜ੍ਝਾ ਬ੍ਯਾਪਾਦੋ ਮਿਚ੍ਛਾਦਿਟ੍ਠਿ, ਤਾਨਿ ਦ੍ਵੇ ਕਮ੍ਮਾਨਿ ਚੇਤਨਾ ਚੇਤਸਿਕਞ੍ਚ. ਤਤ੍ਥ ਯੋ ਚ ਪਾਣਾਤਿਪਾਤੋ ਯਾ ਚ ਪਿਸੁਣਾ ਵਾਚਾ ਯਾ ਚ ਫਰੁਸਾ ਵਾਚਾ, ਇਦਂ ਦੋਸਸਮੁਟ੍ਠਾਨਂ. ਯਞ੍ਚ ਅਦਿਨ੍ਨਾਦਾਨਂ ਯੋ ਚ ਕਾਮੇਸੁਮਿਚ੍ਛਾਚਾਰੋ ਯੋ ਚ ਮੁਸਾਵਾਦੋ, ਇਦਂ ਲੋਭਸਮੁਟ੍ਠਾਨਂ, ਯੋ ਸਮ੍ਫਪ੍ਪਲਾਪੋ, ਇਦਂ ਮੋਹਸਮੁਟ੍ਠਾਨਂ. ਇਮਾਨਿ ਸਤ੍ਤ ਕਾਰਣਾਨਿ ਚੇਤਨਾਕਮ੍ਮਂ. ਯਾ ਅਭਿਜ੍ਝਾ, ਅਯਂ ਲੋਭੋ ਅਕੁਸਲਮੂਲਂ. ਯੋ ਬ੍ਯਾਪਾਦੋ, ਅਯਂ ਦੋਸੋ ਅਕੁਸਲਮੂਲਂ. ਯਾ ਮਿਚ੍ਛਾਦਿਟ੍ਠਿ, ਅਯਂ ਮਿਚ੍ਛਾਮਗ੍ਗੋ. ਇਮਾਨਿ ਤੀਣਿ ਕਾਰਣਾਨਿ ਚੇਤਸਿਕਕਮ੍ਮਂ. ਤੇਨਾਹ ‘‘ਚੇਤਨਾਕਮ੍ਮਂ ਚੇਤਸਿਕਕਮ੍ਮ’’ਨ੍ਤਿ.
ਅਕੁਸਲਮੂਲਂ ਪਯੋਗਂ ਗਚ੍ਛਨ੍ਤਂ ਚਤੁਬ੍ਬਿਧਂ ਅਗਤਿਂ ਗਚ੍ਛਤਿ ਛਨ੍ਦਾ ਦੋਸਾ ਭਯਾ ਮੋਹਾ. ਤਤ੍ਥ ਯਂ ਛਨ੍ਦਾ ਅਗਤਿਂ ਗਚ੍ਛਤਿ, ਇਦਂ ਲੋਭਸਮੁਟ੍ਠਾਨਂ. ਯਂ ਦੋਸਾ ਅਗਤਿਂ ਗਚ੍ਛਤਿ, ਇਦਂ ਦੋਸਸਮੁਟ੍ਠਾਨਂ. ਯਂ ਭਯਾ ਚ ਮੋਹਾ ਚ ਅਗਤਿਂ ਗਚ੍ਛਤਿ, ਇਦਂ ਮੋਹਸਮੁਟ੍ਠਾਨਂ. ਤਤ੍ਥ ਲੋਭੋ ਅਸੁਭਾਯ ਪਹੀਯਤਿ. ਦੋਸੋ ਮੇਤ੍ਤਾਯ. ਮੋਹੋ ਪਞ੍ਞਾਯ. ਤਥਾ ਲੋਭੋ ਉਪੇਕ੍ਖਾਯ ਪਹੀਯਤਿ. ਦੋਸੋ ਮੇਤ੍ਤਾਯ ਚ ਕਰੁਣਾਯ ਚ. ਮੋਹੋ ਮੁਦਿਤਾਯ ਪਹਾਨਂ ਅਬ੍ਭਤ੍ਥਂ ਗਚ੍ਛਤਿ. ਤੇਨਾਹ ਭਗਵਾ ‘‘ਸਬ੍ਬਪਾਪਸ੍ਸ ਅਕਰਣ’’ਨ੍ਤਿ.
੩੧. ਸਬ੍ਬਪਾਪਂ ਨਾਮ ਅਟ੍ਠ ਮਿਚ੍ਛਤ੍ਤਾਨਿ ਮਿਚ੍ਛਾਦਿਟ੍ਠਿ ਮਿਚ੍ਛਾਸਙ੍ਕਪ੍ਪੋ ਮਿਚ੍ਛਾਵਾਚਾ ਮਿਚ੍ਛਾਕਮ੍ਮਨ੍ਤੋ ਮਿਚ੍ਛਾਆਜੀਵੋ ਮਿਚ੍ਛਾਵਾਯਾਮੋ ਮਿਚ੍ਛਾਸਤਿ ਮਿਚ੍ਛਾਸਮਾਧਿ, ਇਦਂ ਵੁਚ੍ਚਤਿ ਸਬ੍ਬਪਾਪਂ. ਇਮੇਸਂ ਅਟ੍ਠਨ੍ਨਂ ਮਿਚ੍ਛਤ੍ਤਾਨਂ ਯਾ ਅਕਿਰਿਯਾ ਅਕਰਣਂ ਅਨਜ੍ਝਾਚਾਰੋ, ਇਦਂ ਵੁਚ੍ਚਤਿ ਸਬ੍ਬਪਾਪਸ੍ਸ ਅਕਰਣਂ.
ਅਟ੍ਠਸੁ ਮਿਚ੍ਛਤ੍ਤੇਸੁ ਪਹੀਨੇਸੁ ਅਟ੍ਠ ਸਮ੍ਮਤ੍ਤਾਨਿ ਸਮ੍ਪਜ੍ਜਨ੍ਤਿ. ਅਟ੍ਠਨ੍ਨਂ ਸਮ੍ਮਤ੍ਤਾਨਂ ਯਾ ਕਿਰਿਯਾ ਕਰਣਂ ਸਮ੍ਪਾਦਨਂ, ਅਯਂ ਵੁਚ੍ਚਤਿ ਕੁਸਲਸ੍ਸ ਉਪਸਮ੍ਪਦਾ. ਸਚਿਤ੍ਤਪਰਿਯੋਦਾਪਨਨ੍ਤਿ ਅਤੀਤਸ੍ਸ ਮਗ੍ਗਸ੍ਸ ਭਾਵਨਾਕਿਰਿਯਂ ਦਸ੍ਸਯਤਿ, ਚਿਤ੍ਤੇ ਪਰਿਯੋਦਾਪਿਤੇ [ਪਰਿਯੋਦਪਿਤੇ (ਸੀ. ਕ.)] ਪਞ੍ਚਕ੍ਖਨ੍ਧਾ ਪਰਿਯੋਦਾਪਿਤਾ ਭਵਨ੍ਤਿ, ਏਵਞ੍ਹਿ ਭਗਵਾ ਆਹ ‘‘ਚੇਤੋਵਿਸੁਦ੍ਧਤ੍ਥਂ, ਭਿਕ੍ਖਵੇ, ਤਥਾਗਤੇ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ. ਦੁਵਿਧਾ ਹਿ ਪਰਿਯੋਦਾਪਨਾ ਨੀਵਰਣਪ੍ਪਹਾਨਞ੍ਚ ਅਨੁਸਯਸਮੁਗ੍ਘਾਤੋ ਚ. ਦ੍ਵੇ ਪਰਿਯੋਦਾਪਨਭੂਮਿਯੋ ਦਸ੍ਸਨਭੂਮਿ ਚ, ਭਾਵਨਾਭੂਮਿ ਚ, ਤਤ੍ਥ ਯਂ ਪਟਿਵੇਧੇਨ ਪਰਿਯੋਦਾਪੇਤਿ, ਇਦਂ ਦੁਕ੍ਖਂ. ਯਤੋ ਪਰਿਯੋਦਾਪੇਤਿ, ਅਯਂ ਸਮੁਦਯੋ. ਯੇਨ ਪਰਿਯੋਦਾਪੇਤਿ, ਅਯਂ ਮਗ੍ਗੋ. ਯਂ ਪਰਿਯੋਦਾਪਿਤਂ, ਅਯਂ ਨਿਰੋਧੋ. ਇਮਾਨਿ ਚਤ੍ਤਾਰਿ ਸਚ੍ਚਾਨਿ. ਤੇਨਾਹ ਭਗਵਾ ‘‘ਸਬ੍ਬਪਾਪਸ੍ਸ ਅਕਰਣ’’ਨ੍ਤਿ.
‘‘ਧਮ੍ਮੋ ਹਵੇ ਰਕ੍ਖਤਿ ਧਮ੍ਮਚਾਰਿਂ, ਛਤ੍ਤਂ ਮਹਨ੍ਤਂ ਯਥ ਵਸ੍ਸਕਾਲੇ;
ਏਸਾਨਿਸਂਸੋ ਧਮ੍ਮੇ ਸੁਚਿਣ੍ਣੇ, ਨ ਦੁਗ੍ਗਤਿਂ ਗਚ੍ਛਤਿ ਧਮ੍ਮਚਾਰੀ’’ਤਿ.
ਧਮ੍ਮੋ ਨਾਮ ਦੁਵਿਧੋ ਇਨ੍ਦ੍ਰਿਯਸਂਵਰੋ ਮਗ੍ਗੋ ਚ. ਦੁਗ੍ਗਤਿ ਨਾਮ ਦੁਵਿਧਾ ਦੇਵਮਨੁਸ੍ਸੇ ਵਾ ਉਪਨਿਧਾਯ ਅਪਾਯਾ ਦੁਗ੍ਗਤਿ, ਨਿਬ੍ਬਾਨਂ ਵਾ ਉਪਨਿਧਾਯ ਸਬ੍ਬਾ ਉਪਪਤ੍ਤਿਯੋ ਦੁਗ੍ਗਤਿ. ਤਤ੍ਥ ਯਾ ਸਂਵਰਸੀਲੇ ਅਖਣ੍ਡਕਾਰਿਤਾ, ਅਯਂ ਧਮ੍ਮੋ ਸੁਚਿਣ੍ਣੋ ਅਪਾਯੇਹਿ ਰਕ੍ਖਤਿ. ਏਵਂ ਭਗਵਾ ਆਹ – ਦ੍ਵੇਮਾ, ਭਿਕ੍ਖਵੇ, ਸੀਲਵਤੋ ਗਤਿਯੋ ਦੇਵਾ ਚ ਮਨੁਸ੍ਸਾ ਚ. ਏਵਞ੍ਚ ਨਾਲ਼ਨ੍ਦਾਯਂ ਨਿਗਮੇ ਅਸਿਬਨ੍ਧਕਪੁਤ੍ਤੋ ਗਾਮਣਿ ਭਗਵਨ੍ਤਂ ਏਤਦਵੋਚ –
‘‘ਬ੍ਰਾਹ੍ਮਣਾ, ਭਨ੍ਤੇ, ਪਚ੍ਛਾਭੂਮਕਾ ਕਾਮਣ੍ਡਲੁਕਾ ਸੇਵਾਲਮਾਲਿਕਾ ਉਦਕੋਰੋਹਕਾ ਅਗ੍ਗਿਪਰਿਚਾਰਕਾ, ਤੇ ਮਤਂ ਕਾਲਙ੍ਕਤਂ ਉਯ੍ਯਾਪੇਨ੍ਤਿ ਨਾਮ, ਸਞ੍ਞਾਪੇਨ੍ਤਿ ਨਾਮ, ਸਗ੍ਗਂ ਨਾਮ ਓਕ੍ਕਾਮੇਨ੍ਤਿ [ਉਗ੍ਗਮੇਨ੍ਤਿ (ਸੀ.) ਪਸ੍ਸ ਸਂ. ਨਿ. ੪.੩੫੮]. ਭਗਵਾ ਪਨ, ਭਨ੍ਤੇ, ਅਰਹਂ ਸਮ੍ਮਾਸਮ੍ਬੁਦ੍ਧੋ ਪਹੋਤਿ ਤਥਾ ਕਾਤੁਂ, ਯਥਾ ਸਬ੍ਬੋ ਲੋਕੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜੇਯ੍ਯਾ’’ਤਿ.
‘‘ਤੇਨ ਹਿ, ਗਾਮਣਿ, ਤਞ੍ਞੇਵੇਤ੍ਥ ਪਟਿਪੁਚ੍ਛਿਸ੍ਸਾਮਿ, ਯਥਾ ਤੇ ਖਮੇਯ੍ਯ, ਤਥਾ ਨਂ ਬ੍ਯਾਕਰੇਯ੍ਯਾਸੀਤਿ.
‘‘ਤਂ ਕਿਂ ਮਞ੍ਞਸਿ, ਗਾਮਣਿ, ਇਧਸ੍ਸ ਪੁਰਿਸੋ ਪਾਣਾਤਿਪਾਤੀ ਅਦਿਨ੍ਨਾਦਾਯੀ ਕਾਮੇਸੁਮਿਚ੍ਛਾਚਾਰੀ ਮੁਸਾਵਾਦੀ ਪਿਸੁਣਵਾਚੋ ਫਰੁਸਵਾਚੋ ਸਮ੍ਫਪ੍ਪਲਾਪੀ ਅਭਿਜ੍ਝਾਲੁ ਬ੍ਯਾਪਨ੍ਨਚਿਤ੍ਤੋ ਮਿਚ੍ਛਾਦਿਟ੍ਠਿਕੋ, ਤਮੇਨਂ ਮਹਾਜਨਕਾਯੋ ਸਙ੍ਗਮ੍ਮ ਸਮਾਗਮ੍ਮ ਆਯਾਚੇਯ੍ਯ ਥੋਮੇਯ੍ਯ ਪਞ੍ਜਲਿਕੋ ਅਨੁਪਰਿਸਕ੍ਕੇਯ੍ਯ ‘ਅਯਂ ਪੁਰਿਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤੂ’ਤਿ. ਤਂ ਕਿਂ ਮਞ੍ਞਸਿ, ਗਾਮਣਿ, ਅਪਿ ਨੁ ਸੋ ਪੁਰਿਸੋ ਮਹਤੋ ਜਨਕਾਯਸ੍ਸ ਆਯਾਚਨਹੇਤੁ ਵਾ ਥੋਮਨਹੇਤੁਵਾ ਪਞ੍ਜਲਿਕਂ [ਪਞ੍ਜਲਿਕਾ ਸਂ. ਨਿ. ੪.੩੫੮] ਅਨੁਪਰਿਸਕ੍ਕਨਹੇਤੁ ਵਾ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜੇਯ੍ਯਾ’’ਤਿ. ‘‘ਨੋ ਹੇਤਂ, ਭਨ੍ਤੇ’’.
‘‘ਸੇਯ੍ਯਥਾਪਿ, ਗਾਮਣਿ, ਪੁਰਿਸੋ ਮਹਤਿਂ ਪੁਥੁਸਿਲਂ ਗਮ੍ਭੀਰੇ ਉਦਕਰਹਦੇ [ਉਦਕਦਹੇ (ਕ.)] ਪਕ੍ਖਿਪੇਯ੍ਯ, ਤਮੇਨਂ ਮਹਾਜਨਕਾਯੋ ਸਙ੍ਗਮ੍ਮ ਸਮਾਗਮ੍ਮ ਆਯਾਚੇਯ੍ਯ ਥੋਮੇਯ੍ਯ ਪਞ੍ਜਲਿਕੋ ਅਨੁਪਰਿਸਕ੍ਕੇਯ੍ਯ ‘ਉਮ੍ਮੁਜ੍ਜ, ਭੋ, ਪੁਥੁਸਿਲੇ, ਉਪ੍ਲਵ ਭੋ ਪੁਥੁਸਿਲੇ, ਥਲਮੁਪ੍ਲਵ, ਭੋ ਪੁਥੁਸਿਲੇ’ਤਿ. ਤਂ ਕਿਂ ਮਞ੍ਞਸਿ ਗਾਮਣਿ, ਅਪਿ ਨੁ ਸਾ ਮਹਤੀ ਪੁਥੁਸਿਲਾ ਮਹਤੋ ਜਨਕਾਯਸ੍ਸ ਆਯਾਚਨਹੇਤੁ ਵਾ ਥੋਮਨਹੇਤੁ ਵਾ ਪਞ੍ਜਲਿਕਂ ਅਨੁਪਰਿਸਕ੍ਕਨਹੇਤੁ ਵਾ ਉਮ੍ਮੁਜ੍ਜੇਯ੍ਯ ਵਾ ਉਪ੍ਲਵੇਯ੍ਯ ਵਾ ਥਲਂ ਵਾ ਉਪ੍ਲਵੇਯ੍ਯਾ’’ਤਿ. ‘‘ਨੋ ਹੇਤਂ, ਭਨ੍ਤੇ’’. ‘‘ਏਵਮੇਵ ਖੋ, ਗਾਮਣਿ, ਯੋ ਸੋ ਪੁਰਿਸੋ ਪਾਣਾਤਿਪਾਤੀ…ਪੇ… ਮਿਚ੍ਛਾਦਿਟ੍ਠਿਕੋ, ਕਿਞ੍ਚਾਪਿ ਨਂ ਮਹਾਜਨਕਾਯੋ ਸਙ੍ਗਮ੍ਮ ਸਮਾਗਮ੍ਮ ਆਯਾਚੇਯ੍ਯ ਥੋਮੇਯ੍ਯ ਪਞ੍ਜਲਿਕੋ ਅਨੁਪਰਿਸਕ੍ਕੇਯ੍ਯ ‘ਅਯਂ ਪੁਰਿਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤੂ’ਤਿ. ਅਥ ਖੋ ਸੋ ਪੁਰਿਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜੇਯ੍ਯ.
‘‘ਤਂ ਕਿਂ ਮਞ੍ਞਸਿ, ਗਾਮਣਿ, ਇਧਸ੍ਸ ਪੁਰਿਸੋ ਪਾਣਾਤਿਪਾਤਾ ਪਟਿਵਿਰਤੋ ਅਦਿਨ੍ਨਾਦਾਨਾ ਪਟਿਵਿਰਤੋ ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤੋ ਮੁਸਾਵਾਦਾ ਪਟਿਵਿਰਤੋ ਪਿਸੁਣਾਯ ਵਾਚਾਯ ਪਟਿਵਿਰਤੋ ਫਰੁਸਾਯ ਵਾਚਾਯ ਪਟਿਵਿਰਤੋ ਸਮ੍ਫਪ੍ਪਲਾਪਾ ਪਟਿਵਿਰਤੋ ਅਨਭਿਜ੍ਝਾਲੁ ਅਬ੍ਯਾਪਨ੍ਨਚਿਤ੍ਤੋ ਸਮ੍ਮਾਦਿਟ੍ਠਿਕੋ, ਤਮੇਨਂ ਮਹਾਜਨਕਾਯੋ ਸਙ੍ਗਮ੍ਮ ਸਮਾਗਮ੍ਮ ਆਯਾਚੇਯ੍ਯ ਥੋਮੇਯ੍ਯ ਪਞ੍ਜਲਿਕੋ ਅਨੁਪਰਿਸਕ੍ਕੇਯ੍ਯ ‘ਅਯਂ ਪੁਰਿਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜਤੂ’ਤਿ. ਤਂ ਕਿਂ ਮਞ੍ਞਸਿ, ਗਾਮਣਿ, ਅਪਿ ਨੁ ਸੋ ਪੁਰਿਸੋ ਮਹਤੋ ਜਨਕਾਯਸ੍ਸ ਆਯਾਚਨਹੇਤੁ ਵਾ ਥੋਮਨਹੇਤੁ ਵਾ ਪਞ੍ਜਲਿਕਂ ਅਨੁਪਰਿਸਕ੍ਕਨਹੇਤੁ ਵਾ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜੇਯ੍ਯਾ’’ਤਿ. ‘‘ਨੋ ਹੇਤਂ, ਭਨ੍ਤੇ’’.
‘‘ਸੇਯ੍ਯਥਾਪਿ, ਗਾਮਣਿ, ਪੁਰਿਸੋ ਸਪ੍ਪਿਕੁਮ੍ਭਂ ਵਾ ਤੇਲਕੁਮ੍ਭਂ ਵਾ ਗਮ੍ਭੀਰੇ [ਗਮ੍ਭੀਰਂ (ਸੀ. ਕ.) ਪਸ੍ਸ ਸਂ. ਨਿ. ੪.੩੫੮] ਉਦਕਰਹਦੇ ਓਗਾਹੇਤ੍ਵਾ ਭਿਨ੍ਦੇਯ੍ਯ. ਤਤ੍ਰ ਯਾਸ੍ਸ ਸਕ੍ਖਰਾ ਵਾ ਕਠਲਾ [ਕਥਲਾ (ਕ.)], ਸਾ ਅਧੋਗਾਮੀ ਅਸ੍ਸ. ਯਞ੍ਚ ਖ੍ਵਸ੍ਸ ਤਤ੍ਰ ਸਪ੍ਪਿ ਵਾ ਤੇਲਂ ਵਾ, ਤਂ ਉਦ੍ਧਂਗਾਮਿ ਅਸ੍ਸ. ਤਮੇਨਂ ਮਹਾਜਨਕਾਯੋ ਸਙ੍ਗਮ੍ਮ ਸਮਾਗਮ੍ਮ ਆਯਾਚੇਯ੍ਯ ਥੋਮੇਯ੍ਯ ਪਞ੍ਜਲਿਕੋ ਅਨੁਪਰਿਸਕ੍ਕੇਯ੍ਯ ‘ਓਸੀਦ, ਭੋ ਸਪ੍ਪਿਤੇਲ, ਸਂਸੀਦ, ਭੋ ਸਪ੍ਪਿਤੇਲ, ਅਧੋ ਗਚ੍ਛ [ਅਵਂਗਚ੍ਛ (ਸੀ. ਕ.)]‘ਭੋ ਸਪ੍ਪਿਤੇਲਾ’ਤਿ. ਤਂ ਕਿਂ ਮਞ੍ਞਸਿ ਗਾਮਣਿ, ਅਪਿ ਨੁ ਤਂ ਸਪ੍ਪਿਤੇਲਂ ਮਹਤੋ ਜਨਕਾਯਸ੍ਸ ਆਯਾਚਨਹੇਤੁ ਵਾ ਥੋਮਨਹੇਤੁ ਵਾ ਪਞ੍ਜਲਿਕਂ ਅਨੁਪਰਿਸਕ੍ਕਨਹੇਤੁ ਵਾ ‘ਓਸੀਦੇਯ੍ਯ ਵਾ ਸਂਸੀਦੇਯ੍ਯ ਵਾ ਅਧੋ ਵਾ ਗਚ੍ਛੇਯ੍ਯਾ’ਤਿ. ‘‘ਨੋ ਹੇਤਂ, ਭਨ੍ਤੇ’’.
‘‘ਏਵਮੇਵ ਖੋ, ਗਾਮਣਿ, ਯੋ ਸੋ ਪੁਰਿਸੋ ਪਾਣਾਤਿਪਾਤਾ ਪਟਿਵਿਰਤੋ…ਪੇ… ਸਮ੍ਮਾਦਿਟ੍ਠਿਕੋ, ਕਿਞ੍ਚਾਪਿ ਨਂ ਮਹਾਜਨਕਾਯੋ ਸਙ੍ਗਮ੍ਮ ਸਮਾਗਮ੍ਮ ਆਯਾਚੇਯ੍ਯ ਥੋਮੇਯ੍ਯ ਪਞ੍ਜਲਿਕੋ ਅਨੁਪਰਿਸਕ੍ਕੇਯ੍ਯ ‘ਅਯਂ ਪੁਰਿਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜਤੂ’’’ਤਿ. ਅਥ ਖੋ ਸੋ ਪੁਰਿਸੋ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜੇਯ੍ਯ. ਇਤਿ ਧਮ੍ਮੋ ਸੁਚਿਣ੍ਣੋ ਅਪਾਯੇਹਿ ਰਕ੍ਖਤਿ. ਤਤ੍ਥ ਯਾ ਮਗ੍ਗਸ੍ਸ ਤਿਕ੍ਖਤਾ ਅਧਿਮਤ੍ਤਤਾ, ਅਯਂ ਧਮ੍ਮੋ ਸੁਚਿਣ੍ਣੋ ਸਬ੍ਬਾਹਿ ਉਪਪਤ੍ਤੀਹਿ ਰਕ੍ਖਤਿ. ਏਵਂ ਭਗਵਾ ਆਹ –
‘‘ਤਸ੍ਮਾ ਰਕ੍ਖਿਤਚਿਤ੍ਤਸ੍ਸ [ਪਸ੍ਸ ਉਦਾ. ੩੨], ਸਮ੍ਮਾਸਙ੍ਕਪ੍ਪਗੋਚਰੋ;
ਸਮ੍ਮਾਦਿਟ੍ਠਿਪੁਰੇਕ੍ਖਾਰੋ, ਞਤ੍ਵਾਨ ਉਦਯਬ੍ਬਯਂ;
ਥਿਨਮਿਦ੍ਧਾਭਿਭੂ ਭਿਕ੍ਖੁ, ਸਬ੍ਬਾ ਦੁਗ੍ਗਤਿਯੋ ਜਹੇ’’ਤਿ.
੩੨. ਤਤ੍ਥ ਦੁਗ੍ਗਤੀਨਂ ਹੇਤੁ ਤਣ੍ਹਾ ਚ ਅਵਿਜ੍ਜਾ ਚ, ਤਾਨਿ ਚਤ੍ਤਾਰਿ ਉਪਾਦਾਨਾਨਿ, ਤੇਹਿ ਚਤੂਹਿ ਉਪਾਦਾਨੇਹਿ ਯੇ ਸਉਪਾਦਾਨਾ ਖਨ੍ਧਾ, ਇਦਂ ਦੁਕ੍ਖਂ. ਚਤ੍ਤਾਰਿ ਉਪਾਦਾਨਾਨਿ, ਅਯਂ ਸਮੁਦਯੋ. ਪਞ੍ਚਕ੍ਖਨ੍ਧਾ ਦੁਕ੍ਖਂ, ਤੇਸਂ ਭਗਵਾ ਪਰਿਞ੍ਞਾਯ ਚ ਪਹਾਨਾਯ ਚ ਧਮ੍ਮਂ ਦੇਸੇਤਿ ਦੁਕ੍ਖਸ੍ਸ ਪਰਿਞ੍ਞਾਯ ਸਮੁਦਯਸ੍ਸ ਪਹਾਨਾਯ. ਤਤ੍ਥ ਤਣ੍ਹਾਯ ਪਞ੍ਚਿਨ੍ਦ੍ਰਿਯਾਨਿ ਰੂਪੀਨਿ ਪਦਟ੍ਠਾਨਂ. ਅਵਿਜ੍ਜਾਯ ਮਨਿਨ੍ਦ੍ਰਿਯਂ ਪਦਟ੍ਠਾਨਂ. ਪਞ੍ਚਿਨ੍ਦ੍ਰਿਯਾਨਿ ਰੂਪੀਨਿ ਰਕ੍ਖਨ੍ਤੋ ਸਮਾਧਿਂ ਭਾਵਯਤਿ, ਤਣ੍ਹਞ੍ਚ ਨਿਗ੍ਗਣ੍ਹਾਤਿ. ਮਨਿਨ੍ਦ੍ਰਿਯਂ ਰਕ੍ਖਨ੍ਤੋ ਵਿਪਸ੍ਸਨਂ ਭਾਵਯਤਿ, ਅਵਿਜ੍ਜਞ੍ਚ ਨਿਗ੍ਗਣ੍ਹਾਤਿ. ਤਣ੍ਹਾਨਿਗ੍ਗਹੇਨ ਦ੍ਵੇ ਉਪਾਦਾਨਾਨਿ ਪਹੀਯਨ੍ਤਿ ਕਾਮੁਪਾਦਾਨਞ੍ਚ ਸੀਲਬ੍ਬਤੁਪਾਦਾਨਞ੍ਚ. ਅਵਿਜ੍ਜਾਨਿਗ੍ਗਹੇਨ ਦ੍ਵੇ ਉਪਾਦਾਨਾਨਿ ਪਹੀਯਨ੍ਤਿ ਦਿਟ੍ਠੁਪਾਦਾਨਞ੍ਚ ਅਤ੍ਤਵਾਦੁਪਾਦਾਨਞ੍ਚ. ਚਤੂਸੁ ਉਪਾਦਾਨੇਸੁ ਪਹੀਨੇਸੁ ਦ੍ਵੇ ਧਮ੍ਮਾ ਭਾਵਨਾਪਾਰਿਪੂਰਿਂ ਗਚ੍ਛਨ੍ਤਿ ਸਮਥੋ ਚ ਵਿਪਸ੍ਸਨਾ ਚ. ਇਦਂ ਵੁਚ੍ਚਤਿ ਬ੍ਰਹ੍ਮਚਰਿਯਨ੍ਤਿ.
ਤਤ੍ਥ ਬ੍ਰਹ੍ਮਚਰਿਯਸ੍ਸ ਫਲਂ ਚਤ੍ਤਾਰਿ ਸਾਮਞ੍ਞਫਲਾਨਿ ਸੋਤਾਪਤ੍ਤਿਫਲਂ ਸਕਦਾਗਾਮਿਫਲਂ ਅਨਾਗਾਮਿਫਲਂ ਅਰਹਤ੍ਤਂ [ਅਰਹਤ੍ਤਫਲਂ (ਕ.)] ਅਗ੍ਗਫਲਂ. ਇਮਾਨਿ ਚਤ੍ਤਾਰਿ ਬ੍ਰਹ੍ਮਚਰਿਯਸ੍ਸ ਫਲਾਨਿ [ਬ੍ਰਹ੍ਮਚਰਿਯਫਲਾਨੀਤਿ (ਸੀ.)]. ਇਤਿ ਪੁਰਿਮਕਾਨਿ ਚ ਦ੍ਵੇ ਸਚ੍ਚਾਨਿ ਦੁਕ੍ਖਂ ਸਮੁਦਯੋ ਚ. ਸਮਥੋ ਚ ਵਿਪਸ੍ਸਨਾ ਚ ਬ੍ਰਹ੍ਮਚਰਿਯਞ੍ਚ ਮਗ੍ਗੋ, ਬ੍ਰਹ੍ਮਚਰਿਯਸ੍ਸ ਫਲਾਨਿ ਚ ਤਦਾਰਮ੍ਮਣਾ ਚ ਅਸਙ੍ਖਤਾਧਾਤੁ ਨਿਰੋਧੋ. ਇਮਾਨਿ ਚਤ੍ਤਾਰਿ ਸਚ੍ਚਾਨਿ. ਤੇਨਾਹ ਭਗਵਾ ‘‘ਧਮ੍ਮੋ ਹਵੇ ਰਕ੍ਖਤੀ’’ਤਿ.
ਤਤ੍ਥ ਯਂ ਪਟਿਵੇਧੇਨ ਰਕ੍ਖਤਿ, ਇਦਂ ਦੁਕ੍ਖਂ. ਯਤੋ ਰਕ੍ਖਤਿ, ਅਯਂ ਸਮੁਦਯੋ. ਯੇਨ ਰਕ੍ਖਤਿ, ਅਯਂ ਮਗ੍ਗੋ. ਯਂ ਰਕ੍ਖਤਿ, ਅਯਂ ਨਿਰੋਧੋ. ਇਮਾਨਿ ਚਤ੍ਤਾਰਿ ਸਚ੍ਚਾਨਿ. ਤੇਨਾਹ ਆਯਸ੍ਮਾ ਮਹਾਕਚ੍ਚਾਯਨੋ ‘‘ਏਕਮ੍ਹਿ ਪਦਟ੍ਠਾਨੇ’’ਤਿ.
ਨਿਯੁਤ੍ਤੋ ਆਵਟ੍ਟੋ ਹਾਰੋ.