੮. ਵਿਭਤ੍ਤਿਹਾਰਵਿਭਙ੍ਗੋ

੩੩. ਤਤ੍ਥ ਕਤਮੋ ਵਿਭਤ੍ਤਿਹਾਰੋ? ‘‘ਧਮ੍ਮਞ੍ਚ ਪਦਟ੍ਠਾਨਂ ਭੂਮਿਞ੍ਚਾ’’ਤਿ.

ਦ੍ਵੇ ਸੁਤ੍ਤਾਨਿ ਵਾਸਨਾਭਾਗਿਯਞ੍ਚ ਨਿਬ੍ਬੇਧਭਾਗਿਯਞ੍ਚ. ਦ੍ਵੇ ਪਟਿਪਦਾ ਪੁਞ੍ਞਭਾਗਿਯਾ ਚ ਫਲਭਾਗਿਯਾ ਚ. ਦ੍ਵੇ ਸੀਲਾਨਿ ਸਂਵਰਸੀਲਞ੍ਚ ਪਹਾਨਸੀਲਞ੍ਚ, ਤਤ੍ਥ ਭਗਵਾ ਵਾਸਨਾਭਾਗਿਯਂ ਸੁਤ੍ਤਂ ਪੁਞ੍ਞਭਾਗਿਯਾਯ ਪਟਿਪਦਾਯ ਦੇਸਯਤਿ, ਸੋ ਸਂਵਰਸੀਲੇ ਠਿਤੋ ਤੇਨ ਬ੍ਰਹ੍ਮਚਰਿਯੇਨ ਬ੍ਰਹ੍ਮਚਾਰੀ ਭਵਤਿ, ਤਤ੍ਥ ਭਗਵਾ ਨਿਬ੍ਬੇਧਭਾਗਿਯਂ ਸੁਤ੍ਤਂ ਫਲਭਾਗਿਯਾਯ ਪਟਿਪਦਾਯ ਦੇਸਯਤਿ, ਸੋ ਪਹਾਨਸੀਲੇ ਠਿਤੋ ਤੇਨ ਬ੍ਰਹ੍ਮਚਰਿਯੇਨ ਬ੍ਰਹ੍ਮਚਾਰੀ ਭਵਤਿ.

ਤਤ੍ਥ ਕਤਮਂ ਵਾਸਨਾਭਾਗਿਯਂ ਸੁਤ੍ਤਂ? ਵਾਸਨਾਭਾਗਿਯਂ ਨਾਮ ਸੁਤ੍ਤਂ ਦਾਨਕਥਾ ਸੀਲਕਥਾ ਸਗ੍ਗਕਥਾ ਕਾਮਾਨਂ ਆਦੀਨਵੋ ਨੇਕ੍ਖਮ੍ਮੇ ਆਨਿਸਂਸੋਤਿ.

ਤਤ੍ਥ ਕਤਮਂ ਨਿਬ੍ਬੇਧਭਾਗਿਯਂ ਸੁਤ੍ਤਂ? ਨਿਬ੍ਬੇਧਭਾਗਿਯਂ ਨਾਮ ਸੁਤ੍ਤਂ ਯਾ ਚਤੁਸਚ੍ਚਪ੍ਪਕਾਸਨਾ, ਵਾਸਨਾਭਾਗਿਯੇ ਸੁਤ੍ਤੇ ਨਤ੍ਥਿ ਪਜਾਨਨਾ, ਨਤ੍ਥਿ ਮਗ੍ਗੋ, ਨਤ੍ਥਿ ਫਲਂ. ਨਿਬ੍ਬੇਧਭਾਗਿਯੇ ਸੁਤ੍ਤੇ ਅਤ੍ਥਿ ਪਜਾਨਨਾ, ਅਤ੍ਥਿ ਮਗ੍ਗੋ, ਅਤ੍ਥਿ ਫਲਂ. ਇਮਾਨਿ ਚਤ੍ਤਾਰਿ ਸੁਤ੍ਤਾਨਿ. ਇਮੇਸਂ ਚਤੁਨ੍ਨਂ ਸੁਤ੍ਤਾਨਂ ਦੇਸਨਾਯ ਫਲੇਨ ਸੀਲੇਨ ਬ੍ਰਹ੍ਮਚਰਿਯੇਨ ਸਬ੍ਬਤੋ ਵਿਚਯੇਨ ਹਾਰੇਨ ਵਿਚਿਨਿਤ੍ਵਾ ਯੁਤ੍ਤਿਹਾਰੇਨ ਯੋਜਯਿਤਬ੍ਬਾ ਯਾਵਤਿਕਾ ਞਾਣਸ੍ਸ ਭੂਮਿ.

੩੪. ਤਤ੍ਥ ਕਤਮੇ ਧਮ੍ਮਾ ਸਾਧਾਰਣਾ? ਦ੍ਵੇ ਧਮ੍ਮਾ ਸਾਧਾਰਣਾ ਨਾਮਸਾਧਾਰਣਾ ਵਤ੍ਥੁਸਾਧਾਰਣਾ ਚ. ਯਂ ਵਾ ਪਨ ਕਿਞ੍ਚਿ ਅਞ੍ਞਮ੍ਪਿ ਏਵਂ ਜਾਤਿਯਂ, ਮਿਚ੍ਛਤ੍ਤਨਿਯਤਾਨਂ ਸਤ੍ਤਾਨਂ ਅਨਿਯਤਾਨਞ੍ਚ ਸਤ੍ਤਾਨਂ ਦਸ੍ਸਨਪ੍ਪਹਾਤਬ੍ਬਾ ਕਿਲੇਸਾ ਸਾਧਾਰਣਾ, ਪੁਥੁਜ੍ਜਨਸ੍ਸ ਸੋਤਾਪਨ੍ਨਸ੍ਸ ਚ ਕਾਮਰਾਗਬ੍ਯਾਪਾਦਾ ਸਾਧਾਰਣਾ, ਪੁਥੁਜ੍ਜਨਸ੍ਸ ਅਨਾਗਾਮਿਸ੍ਸ ਚ ਉਦ੍ਧਂਭਾਗਿਯਾ ਸਂਯੋਜਨਾ ਸਾਧਾਰਣਾ, ਯਂ ਕਿਞ੍ਚਿ ਅਰਿਯਸਾਵਕੋ ਲੋਕਿਯਂ ਸਮਾਪਤ੍ਤਿਂ ਸਮਾਪਜ੍ਜਤਿ, ਸਬ੍ਬਾ ਸਾ ਅਵੀਤਰਾਗੇਹਿ [ਅਵਿਗਤਰਾਗੇਹਿ (ਕ.)] ਸਾਧਾਰਣਾ, ਸਾਧਾਰਣਾ ਹਿ ਧਮ੍ਮਾ ਏਵਂ ਅਞ੍ਞਮਞ੍ਞਂ ਪਰਂ ਪਰਂ ਸਕਂ ਸਕਂ ਵਿਸਯਂ ਨਾਤਿਵਤ੍ਤਨ੍ਤਿ. ਯੋਪਿ ਇਮੇਹਿ ਧਮ੍ਮੇਹਿ ਸਮਨ੍ਨਾਗਤੋ ਨ ਸੋ ਤਂ ਧਮ੍ਮਂ ਉਪਾਤਿਵਤ੍ਤਤਿ. ਇਮੇ ਧਮ੍ਮਾ ਸਾਧਾਰਣਾ.

ਤਤ੍ਥ ਕਤਮੇ ਧਮ੍ਮਾ ਅਸਾਧਾਰਣਾ? ਯਾਵ ਦੇਸਨਂ ਉਪਾਦਾਯ ਗਵੇਸਿਤਬ੍ਬਾ ਸੇਕ੍ਖਾਸੇਕ੍ਖਾ ਭਬ੍ਬਾਭਬ੍ਬਾਤਿ, ਅਟ੍ਠਮਕਸ੍ਸ ਸੋਤਾਪਨ੍ਨਸ੍ਸ ਚ ਕਾਮਰਾਗਬ੍ਯਾਪਾਦਾ ਸਾਧਾਰਣਾ ਧਮ੍ਮਤਾ ਅਸਾਧਾਰਣਾ, ਅਟ੍ਠਮਕਸ੍ਸ ਅਨਾਗਾਮਿਸ੍ਸ ਚ ਉਦ੍ਧਮ੍ਭਾਗਿਯਾ ਸਂਯੋਜਨਾ ਸਾਧਾਰਣਾ ਧਮ੍ਮਤਾ ਅਸਾਧਾਰਣਾ. ਸਬ੍ਬੇਸਂ ਸੇਕ੍ਖਾਨਂ ਨਾਮਂ ਸਾਧਾਰਣਂ ਧਮ੍ਮਤਾ ਅਸਾਧਾਰਣਾ. ਸਬ੍ਬੇਸਂ ਪਟਿਪਨ੍ਨਕਾਨਂ ਨਾਮਂ ਸਾਧਾਰਣਂ ਧਮ੍ਮਤਾ ਅਸਾਧਾਰਣਾ. ਸਬ੍ਬੇਸਂ ਸੇਕ੍ਖਾਨਂ ਸੇਕ੍ਖਸੀਲਂ ਸਾਧਾਰਣਂ ਧਮ੍ਮਤਾ ਅਸਾਧਾਰਣਾ. ਏਵਂ ਵਿਸੇਸਾਨੁਪਸ੍ਸਿਨਾ ਹੀਨੁਕ੍ਕਟ੍ਠਮਜ੍ਝਿਮਂ ਉਪਾਦਾਯ ਗਵੇਸਿਤਬ੍ਬਂ.

ਦਸ੍ਸਨਭੂਮਿ ਨਿਯਾਮਾਵਕ੍ਕਨ੍ਤਿਯਾ ਪਦਟ੍ਠਾਨਂ, ਭਾਵਨਾਭੂਮਿ ਉਤ੍ਤਰਿਕਾਨਂ ਫਲਾਨਂ ਪਤ੍ਤਿਯਾ ਪਦਟ੍ਠਾਨਂ, ਦੁਕ੍ਖਾ ਪਟਿਪਦਾ ਦਨ੍ਧਾਭਿਞ੍ਞਾ ਸਮਥਸ੍ਸ ਪਦਟ੍ਠਾਨਂ, ਸੁਖਾ ਪਟਿਪਦਾ ਖਿਪ੍ਪਾਭਿਞ੍ਞਾ ਵਿਪਸ੍ਸਨਾਯ ਪਦਟ੍ਠਾਨਂ, ਦਾਨਮਯਂ ਪੁਞ੍ਞਕਿਰਿਯਵਤ੍ਥੁ ਪਰਤੋ ਘੋਸਸ੍ਸ ਸਾਧਾਰਣਂ ਪਦਟ੍ਠਾਨਂ, ਸੀਲਮਯਂ ਪੁਞ੍ਞਕਿਰਿਯਵਤ੍ਥੁ ਚਿਨ੍ਤਾਮਯਿਯਾ ਪਞ੍ਞਾਯ ਸਾਧਾਰਣਂ ਪਦਟ੍ਠਾਨਂ, ਭਾਵਨਾਮਯਂ ਪੁਞ੍ਞਕਿਰਿਯਵਤ੍ਥੁ ਭਾਵਨਾਮਯਿਯਾ ਪਞ੍ਞਾਯ ਸਾਧਾਰਣਂ ਪਦਟ੍ਠਾਨਂ. ਦਾਨਮਯਂ ਪੁਞ੍ਞਕਿਰਿਯਵਤ੍ਥੁ ਪਰਤੋ ਚ ਘੋਸਸ੍ਸ ਸੁਤਮਯਿਯਾ ਚ ਪਞ੍ਞਾਯ ਸਾਧਾਰਣਂ ਪਦਟ੍ਠਾਨਂ ਸੀਲਮਯਂ ਪੁਞ੍ਞਕਿਰਿਯਵਤ੍ਥੁ ਚਿਨ੍ਤਾਮਯਿਯਾ ਚ ਪਞ੍ਞਾਯ ਯੋਨਿਸੋ ਚ ਮਨਸਿਕਾਰਸ੍ਸ ਸਾਧਾਰਣਂ ਪਦਟ੍ਠਾਨਂ, ਭਾਵਨਾਮਯਂ ਪੁਞ੍ਞਕਿਰਿਯਵਤ੍ਥੁ ਭਾਵਨਾਮਯਿਯਾ ਚ ਪਞ੍ਞਾਯ ਸਮ੍ਮਾਦਿਟ੍ਠਿਯਾ ਚ ਸਾਧਾਰਣਂ ਪਦਟ੍ਠਾਨਂ. ਪਤਿਰੂਪਦੇਸਵਾਸੋ ਵਿਵੇਕਸ੍ਸ ਚ ਸਮਾਧਿਸ੍ਸ ਚ ਸਾਧਾਰਣਂ ਪਦਟ੍ਠਾਨਂ, ਸਪ੍ਪੁਰਿਸੂਪਨਿਸ੍ਸਯੋ ਤਿਣ੍ਣਞ੍ਚ ਅਵੇਚ੍ਚਪ੍ਪਸਾਦਾਨਂ ਸਮਥਸ੍ਸ ਚ ਸਾਧਾਰਣਂ ਪਦਟ੍ਠਾਨਂ, ਅਤ੍ਤਸਮ੍ਮਾਪਣਿਧਾਨਂ ਹਿਰਿਯਾ ਚ ਵਿਪਸ੍ਸਨਾਯ ਚ ਸਾਧਾਰਣਂ ਪਦਟ੍ਠਾਨਂ, ਅਕੁਸਲਪਰਿਚ੍ਚਾਗੋ ਕੁਸਲਵੀਮਂਸਾਯ ਚ ਸਮਾਧਿਨ੍ਦ੍ਰਿਯਸ੍ਸ ਚ ਸਾਧਾਰਣਂ ਪਦਟ੍ਠਾਨਂ, ਧਮ੍ਮਸ੍ਵਾਕ੍ਖਾਤਤਾ ਕੁਸਲਮੂਲਰੋਪਨਾਯ ਚ ਫਲਸਮਾਪਤ੍ਤਿਯਾ ਚ ਸਾਧਾਰਣਂ ਪਦਟ੍ਠਾਨਂ, ਸਙ੍ਘਸੁਪ੍ਪਟਿਪਨ੍ਨਤਾ ਸਙ੍ਘਸੁਟ੍ਠੁਤਾਯ ਸਾਧਾਰਣਂ ਪਦਟ੍ਠਾਨਂ, ਸਤ੍ਥੁਸਮ੍ਪਦਾ ਅਪ੍ਪਸਨ੍ਨਾਨਞ੍ਚ ਪਸਾਦਾਯ ਪਸਨ੍ਨਾਨਞ੍ਚ ਭਿਯ੍ਯੋਭਾਵਾਯ ਸਾਧਾਰਣਂ ਪਦਟ੍ਠਾਨਂ, ਅਪ੍ਪਟਿਹਤਪਾਤਿਮੋਕ੍ਖਤਾ ਦੁਮ੍ਮਙ੍ਕੂਨਞ੍ਚ ਪੁਗ੍ਗਲਾਨਂ ਨਿਗ੍ਗਹਾਯ ਪੇਸਲਾਨਞ੍ਚ ਪੁਗ੍ਗਲਾਨਂ ਫਾਸੁਵਿਹਾਰਾਯ ਸਾਧਾਰਣਂ ਪਦਟ੍ਠਾਨਂ. ਤੇਨਾਹ ਆਯਸ੍ਮਾ ਮਹਾਕਚ੍ਚਾਯਨੋ ‘‘ਧਮ੍ਮਞ੍ਚ ਪਦਟ੍ਠਾਨ’’ਨ੍ਤਿ.

ਨਿਯੁਤ੍ਤੋ ਵਿਭਤ੍ਤਿ ਹਾਰੋ.