੪. ਪਦਟ੍ਠਾਨਹਾਰਵਿਭਙ੍ਗੋ
੨੨. ਤਤ੍ਥ ਕਤਮੋ ਪਦਟ੍ਠਾਨੋ ਹਾਰੋ? ‘‘ਧਮ੍ਮਂ ਦੇਸੇਤਿ ਜਿਨੋ’’ਤਿ, ਅਯਂ ਪਦਟ੍ਠਾਨੋ ਹਾਰੋ. ਕਿਂ ਦੇਸੇਤਿ? ਸਬ੍ਬਧਮ੍ਮਯਾਥਾਵਅਸਮ੍ਪਟਿਵੇਧਲਕ੍ਖਣਾ ਅਵਿਜ੍ਜਾ, ਤਸ੍ਸਾ ਵਿਪਲ੍ਲਾਸਾ ਪਦਟ੍ਠਾਨਂ. ਅਜ੍ਝੋਸਾਨਲਕ੍ਖਣਾ ਤਣ੍ਹਾ, ਤਸ੍ਸਾ ਪਿਯਰੂਪਂ ਸਾਤਰੂਪਂ ਪਦਟ੍ਠਾਨਂ. ਪਤ੍ਥਨਲਕ੍ਖਣੋ ਲੋਭੋ, ਤਸ੍ਸ ਅਦਿਨ੍ਨਾਦਾਨਂ ਪਦਟ੍ਠਾਨਂ. ਵਣ੍ਣਸਣ੍ਠਾਨਬ੍ਯਞ੍ਜਨਗ੍ਗਹਣਲਕ੍ਖਣਾ ਸੁਭਸਞ੍ਞਾ, ਤਸ੍ਸਾ ਇਨ੍ਦ੍ਰਿਯਾ ਸਂਵਰੋ ਪਦਟ੍ਠਾਨਂ. ਸਾਸਵਫਸ੍ਸਉਪਗਮਨਲਕ੍ਖਣਾ ਸੁਖਸਞ੍ਞਾ, ਤਸ੍ਸਾ ਅਸ੍ਸਾਦੋ ਪਦਟ੍ਠਾਨਂ. ਸਙ੍ਖਤਲਕ੍ਖਣਾਨਂ ਧਮ੍ਮਾਨਂ ਅਸਮਨੁਪਸ੍ਸਨਲਕ੍ਖਣਾ ਨਿਚ੍ਚਸਞ੍ਞਾ, ਤਸ੍ਸਾ ਵਿਞ੍ਞਾਣਂ ਪਦਟ੍ਠਾਨਂ. ਅਨਿਚ੍ਚਸਞ੍ਞਾਦੁਕ੍ਖਸਞ੍ਞਾਅਸਮਨੁਪਸ੍ਸਨਲਕ੍ਖਣਾ ਅਤ੍ਤਸਞ੍ਞਾ, ਤਸ੍ਸਾ ਨਾਮਕਾਯੋ ਪਦਟ੍ਠਾਨਂ. ਸਬ੍ਬਧਮ੍ਮਸਮ੍ਪਟਿਵੇਧਲਕ੍ਖਣਾ ਵਿਜ੍ਜਾ, ਤਸ੍ਸਾ ਸਬ੍ਬਂ ਨੇਯ੍ਯਂ ਪਦਟ੍ਠਾਨਂ. ਚਿਤ੍ਤਵਿਕ੍ਖੇਪਪਟਿਸਂਹਰਣਲਕ੍ਖਣੋ ਸਮਥੋ, ਤਸ੍ਸ ਅਸੁਭਾ ਪਦਟ੍ਠਾਨਂ. ਇਚ੍ਛਾਵਚਰਪਟਿਸਂਹਰਣਲਕ੍ਖਣੋ ਅਲੋਭੋ, ਤਸ੍ਸ ਅਦਿਨ੍ਨਾਦਾਨਾ ਵੇਰਮਣੀ [ਵੇਰਮਣਿ (ਕ.)] ਪਦਟ੍ਠਾਨਂ. ਅਬ੍ਯਾਪਜ੍ਜਲਕ੍ਖਣੋ ਅਦੋਸੋ, ਤਸ੍ਸ ਪਾਣਾਤਿਪਾਤਾ ਵੇਰਮਣੀ ਪਦਟ੍ਠਾਨਂ. ਵਤ੍ਥੁਅਵਿਪ੍ਪਟਿਪਤ੍ਤਿਲਕ੍ਖਣੋ [ਵਤ੍ਥੁਅਵਿਪ੍ਪਟਿਪਾਦਾਨਲਕ੍ਖਣੋ (ਸੀ. ਕ.)] ਅਮੋਹੋ, ਤਸ੍ਸ ਸਮ੍ਮਾਪਟਿਪਤ੍ਤਿ ਪਦਟ੍ਠਾਨਂ. ਵਿਨੀਲਕਵਿਪੁਬ੍ਬਕਗਹਣਲਕ੍ਖਣਾ ਅਸੁਭਸਞ੍ਞਾ, ਤਸ੍ਸਾ ਨਿਬ੍ਬਿਦਾ ਪਦਟ੍ਠਾਨਂ. ਸਾਸਵਫਸ੍ਸਪਰਿਜਾਨਨਲਕ੍ਖਣਾ ਦੁਕ੍ਖਸਞ੍ਞਾ, ਤਸ੍ਸਾ ਵੇਦਨਾ ਪਦਟ੍ਠਾਨਂ. ਸਙ੍ਖਤਲਕ੍ਖਣਾਨਂ ਧਮ੍ਮਾਨਂ ਸਮਨੁਪਸ੍ਸਨਲਕ੍ਖਣਾ ਅਨਿਚ੍ਚਸਞ੍ਞਾ, ਤਸ੍ਸਾ ਉਪ੍ਪਾਦਵਯਾ ਪਦਟ੍ਠਾਨਂ. ਸਬ੍ਬਧਮ੍ਮਅਭਿਨਿਵੇਸਲਕ੍ਖਣਾ ਅਨਤ੍ਤਸਞ੍ਞਾ, ਤਸ੍ਸਾ ਧਮ੍ਮਸਞ੍ਞਾ ਪਦਟ੍ਠਾਨਂ.
ਪਞ੍ਚ ਕਾਮਗੁਣਾ ਕਾਮਰਾਗਸ੍ਸ ਪਦਟ੍ਠਾਨਂ, ਪਞ੍ਚਿਨ੍ਦ੍ਰਿਯਾਨਿ ਰੂਪੀਨਿ ਰੂਪਰਾਗਸ੍ਸ ਪਦਟ੍ਠਾਨਂ, ਛਟ੍ਠਾਯਤਨਂ ਭਵਰਾਗਸ੍ਸ ਪਦਟ੍ਠਾਨਂ, ਨਿਬ੍ਬਤ੍ਤਭਵਾਨੁਪਸ੍ਸਿਤਾ ਪਞ੍ਚਨ੍ਨਂ ਉਪਾਦਾਨਕ੍ਖਨ੍ਧਾਨਂ ਪਦਟ੍ਠਾਨਂ, ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਦਸ੍ਸਨਸ੍ਸ ਪਦਟ੍ਠਾਨਂ. ਓਕਪ੍ਪਨਲਕ੍ਖਣਾ ਸਦ੍ਧਾ ਅਧਿਮੁਤ੍ਤਿਪਚ੍ਚੁਪਟ੍ਠਾਨਾ ਚ, ਅਨਾਵਿਲਲਕ੍ਖਣੋ ਪਸਾਦੋ ਸਮ੍ਪਸੀਦਨਪਚ੍ਚੁਪਟ੍ਠਾਨੋ ਚ. ਅਭਿਪਤ੍ਥਿਯਨਲਕ੍ਖਣਾ ਸਦ੍ਧਾ, ਤਸ੍ਸਾ ਅਵੇਚ੍ਚਪਸਾਦੋ ਪਦਟ੍ਠਾਨਂ. ਅਨਾਵਿਲਲਕ੍ਖਣੋ ਪਸਾਦੋ, ਤਸ੍ਸ ਸਦ੍ਧਾ ਪਦਟ੍ਠਾਨਂ. ਆਰਮ੍ਭਲਕ੍ਖਣਂ ਵੀਰਿਯਂ, ਤਸ੍ਸ ਸਮ੍ਮਪ੍ਪਧਾਨਂ ਪਦਟ੍ਠਾਨਂ. ਅਪਿਲਾਪਨਲਕ੍ਖਣਾ ਸਤਿ, ਤਸ੍ਸਾ ਸਤਿਪਟ੍ਠਾਨਂ ਪਦਟ੍ਠਾਨਂ. ਏਕਗ੍ਗਲਕ੍ਖਣੋ ਸਮਾਧਿ, ਤਸ੍ਸ ਝਾਨਾਨਿ ਪਦਟ੍ਠਾਨਂ. ਪਜਾਨਨਲਕ੍ਖਣਾ ਪਞ੍ਞਾ, ਤਸ੍ਸਾ ਸਚ੍ਚਾਨਿ ਪਦਟ੍ਠਾਨਂ.
ਅਪਰੋ ਨਯੋ, ਅਸ੍ਸਾਦਮਨਸਿਕਾਰਲਕ੍ਖਣੋ ਅਯੋਨਿਸੋਮਨਸਿਕਾਰੋ, ਤਸ੍ਸ ਅਵਿਜ੍ਜਾ ਪਦਟ੍ਠਾਨਂ. ਸਚ੍ਚਸਮ੍ਮੋਹਨਲਕ੍ਖਣਾ ਅਵਿਜ੍ਜਾ, ਸਾ ਸਙ੍ਖਾਰਾਨਂ ਪਦਟ੍ਠਾਨਂ. ਪੁਨਬ੍ਭਵਵਿਰੋਹਣਲਕ੍ਖਣਾ ਸਙ੍ਖਾਰਾ, ਤੇ [ਤਂ (ਕ.)] ਵਿਞ੍ਞਾਣਸ੍ਸ ਪਦਟ੍ਠਾਨਂ. ਓਪਪਚ੍ਚਯਿਕਨਿਬ੍ਬਤ੍ਤਿਲਕ੍ਖਣਂ ਵਿਞ੍ਞਾਣਂ, ਤਂ ਨਾਮਰੂਪਸ੍ਸ ਪਦਟ੍ਠਾਨਂ. ਨਾਮਕਾਯਰੂਪਕਾਯਸਙ੍ਘਾਤਲਕ੍ਖਣਂ ਨਾਮਰੂਪਂ, ਤਂ ਛਲ਼ਾਯਤਨਸ੍ਸ ਪਦਟ੍ਠਾਨਂ. ਇਨ੍ਦ੍ਰਿਯਵਵਤ੍ਥਾਨਲਕ੍ਖਣਂ ਛਲ਼ਾਯਤਨਂ, ਤਂ ਫਸ੍ਸਸ੍ਸ ਪਦਟ੍ਠਾਨਂ. ਚਕ੍ਖੁਰੂਪਵਿਞ੍ਞਾਣਸਨ੍ਨਿਪਾਤਲਕ੍ਖਣੋ ਫਸ੍ਸੋ, ਸੋ ਵੇਦਨਾਯ ਪਦਟ੍ਠਾਨਂ. ਇਟ੍ਠਾਨਿਟ੍ਠਅਨੁਭਵਨਲਕ੍ਖਣਾ ਵੇਦਨਾ, ਸਾ ਤਣ੍ਹਾਯ ਪਦਟ੍ਠਾਨਂ. ਅਜ੍ਝੋਸਾਨਲਕ੍ਖਣਾ ਤਣ੍ਹਾ, ਸਾ ਉਪਾਦਾਨਸ੍ਸ ਪਦਟ੍ਠਾਨਂ. ਓਪਪਚ੍ਚਯਿਕਂ ਉਪਾਦਾਨਂ, ਤਂ ਭਵਸ੍ਸ ਪਦਟ੍ਠਾਨਂ. ਨਾਮਕਾਯਰੂਪਕਾਯਸਮ੍ਭਵਨਲਕ੍ਖਣੋ ਭਵੋ, ਸੋ ਜਾਤਿਯਾ ਪਦਟ੍ਠਾਨਂ. ਖਨ੍ਧਪਾਤੁਭਵਨਲਕ੍ਖਣਾ ਜਾਤਿ, ਸਾ ਜਰਾਯ ਪਦਟ੍ਠਾਨਂ. ਉਪਧਿਪਰਿਪਾਕਲਕ੍ਖਣਾ ਜਰਾ, ਸਾ ਮਰਣਸ੍ਸ ਪਦਟ੍ਠਾਨਂ. ਜੀਵਿਤਿਨ੍ਦ੍ਰਿਯੁਪਚ੍ਛੇਦਲਕ੍ਖਣਂ ਮਰਣਂ, ਤਂ ਸੋਕਸ੍ਸ ਪਦਟ੍ਠਾਨਂ. ਉਸ੍ਸੁਕ੍ਕਕਾਰਕੋ ਸੋਕੋ, ਸੋ ਪਰਿਦੇਵਸ੍ਸ ਪਦਟ੍ਠਾਨਂ. ਲਾਲਪ੍ਪਕਾਰਕੋ ਪਰਿਦੇਵੋ, ਸੋ ਦੁਕ੍ਖਸ੍ਸ ਪਦਟ੍ਠਾਨਂ. ਕਾਯਸਂਪੀਲ਼ਨਂ ਦੁਕ੍ਖਂ, ਤਂ ਦੋਮਨਸ੍ਸਸ੍ਸ ਪਦਟ੍ਠਾਨਂ. ਚਿਤ੍ਤਸਂਪੀਲ਼ਨਂ ਦੋਮਨਸ੍ਸਂ, ਤਂ ਉਪਾਯਾਸਸ੍ਸ ਪਦਟ੍ਠਾਨਂ. ਓਦਹਨਕਾਰਕੋ ਉਪਾਯਾਸੋ, ਸੋ ਭਵਸ੍ਸ ਪਦਟ੍ਠਾਨਂ. ਇਮਾਨਿ ਭਵਙ੍ਗਾਨਿ ਯਦਾ ਸਮਗ੍ਗਾਨਿ ਨਿਬ੍ਬਤ੍ਤਾਨਿ ਭਵਨ੍ਤਿ ਸੋ ਭਵੋ, ਤਂ ਸਂਸਾਰਸ੍ਸ ਪਦਟ੍ਠਾਨਂ. ਨਿਯ੍ਯਾਨਿਕਲਕ੍ਖਣੋ ਮਗ੍ਗੋ, ਸੋ ਨਿਰੋਧਸ੍ਸ ਪਦਟ੍ਠਾਨਂ.
ਤਿਤ੍ਥਞ੍ਞੁਤਾ ਪੀਤਞ੍ਞੁਤਾਯ ਪਦਟ੍ਠਾਨਂ, ਪੀਤਞ੍ਞੁਤਾ ਪਤ੍ਤਞ੍ਞੁਤਾਯ [ਮਤ੍ਤਞ੍ਞੁਤਾਯ (ਸੀ. ਕ.)] ਪਦਟ੍ਠਾਨਂ, ਪਤ੍ਤਞ੍ਞੁਤਾ ਅਤ੍ਤਞ੍ਞੁਤਾਯ ਪਦਟ੍ਠਾਨਂ, ਅਤ੍ਤਞ੍ਞੁਤਾ ਪੁਬ੍ਬੇਕਤਪੁਞ੍ਞਤਾਯ ਪਦਟ੍ਠਾਨਂ, ਪੁਬ੍ਬੇਕਤਪੁਞ੍ਞਤਾ ਪਤਿਰੂਪਦੇਸਵਾਸਸ੍ਸ ਪਦਟ੍ਠਾਨਂ, ਪਤਿਰੂਪਦੇਸਵਾਸੋ ਸਪ੍ਪੁਰਿਸੂਪਨਿਸ੍ਸਯਸ੍ਸ ਪਦਟ੍ਠਾਨਂ, ਸਪ੍ਪੁਰਿਸੂਪਨਿਸ੍ਸਯੋ ਅਤ੍ਤਸਮ੍ਮਾਪਣਿਧਾਨਸ੍ਸ ਪਦਟ੍ਠਾਨਂ, ਅਤ੍ਤਸਮ੍ਮਾਪਣਿਧਾਨਂ ਸੀਲਾਨਂ ਪਦਟ੍ਠਾਨਂ, ਸੀਲਾਨਿ ਅਵਿਪ੍ਪਟਿਸਾਰਸ੍ਸ ਪਦਟ੍ਠਾਨਂ, ਅਵਿਪ੍ਪਟਿਸਾਰੋ ਪਾਮੋਜ੍ਜਸ੍ਸ ਪਦਟ੍ਠਾਨਂ, ਪਾਮੋਜ੍ਜਂ ਪੀਤਿਯਾ ਪਦਟ੍ਠਾਨਂ, ਪੀਤਿ ਪਸ੍ਸਦ੍ਧਿਯਾ ਪਦਟ੍ਠਾਨਂ, ਪਸ੍ਸਦ੍ਧਿ ਸੁਖਸ੍ਸ ਪਦਟ੍ਠਾਨਂ, ਸੁਖਂ ਸਮਾਧਿਸ੍ਸ ਪਦਟ੍ਠਾਨਂ, ਸਮਾਧਿ ਯਥਾਭੂਤਞਾਣਦਸ੍ਸਨਸ੍ਸ ਪਦਟ੍ਠਾਨਂ, ਯਥਾਭੂਤਞਾਣਦਸ੍ਸਨਂ ਨਿਬ੍ਬਿਦਾਯ ਪਦਟ੍ਠਾਨਂ, ਨਿਬ੍ਬਿਦਾ ਵਿਰਾਗਸ੍ਸ ਪਦਟ੍ਠਾਨਂ, ਵਿਰਾਗੋ ਵਿਮੁਤ੍ਤਿਯਾ ਪਦਟ੍ਠਾਨਂ. ਵਿਮੁਤ੍ਤਿ ਵਿਮੁਤ੍ਤਿਞਾਣਦਸ੍ਸਨਸ੍ਸ ਪਦਟ੍ਠਾਨਂ. ਏਵਂ ਯੋ ਕੋਚਿ ਉਪਨਿਸ੍ਸਯੋ ਯੋ ਕੋਚਿ ਪਚ੍ਚਯੋ, ਸਬ੍ਬੋ ਸੋ ਪਦਟ੍ਠਾਨਂ. ਤੇਨਾਹ ਆਯਸ੍ਮਾ ਮਹਾਕਚ੍ਚਾਯਨੋ ‘‘ਧਮ੍ਮਂ ਦੇਸੇਤਿ ਜਿਨੋ’’ਤਿ.
ਨਿਯੁਤ੍ਤੋ ਪਦਟ੍ਠਾਨੋ ਹਾਰੋ.