੩. ਯੁਤ੍ਤਿਹਾਰਵਿਭਙ੍ਗੋ
੧੮. ਤਤ੍ਥ ਕਤਮੋ ਯੁਤ੍ਤਿਹਾਰੋ? ‘‘ਸਬ੍ਬੇਸਂ ਹਾਰਾਨ’’ਨ੍ਤਿ, ਅਯਂ ਯੁਤ੍ਤਿਹਾਰੋ. ਕਿਂ ਯੋਜਯਤਿ [ਯੋਜੇਤਿ (ਸੀ.)]? ਚਤ੍ਤਾਰੋ ਮਹਾਪਦੇਸਾ ਬੁਦ੍ਧਾਪਦੇਸੋ ਸਙ੍ਘਾਪਦੇਸੋ ਸਮ੍ਬਹੁਲਤ੍ਥੇਰਾਪਦੇਸੋ [ਸਮ੍ਪਹੁਲ… (ਕ.)] ਏਕਤ੍ਥੇਰਾਪਦੇਸੋ. ਇਮੇ ਚਤ੍ਤਾਰੋ ਮਹਾਪਦੇਸਾ, ਤਾਨਿ ਪਦਬ੍ਯਞ੍ਜਨਾਨਿ ਸੁਤ੍ਤੇ ਓਤਾਰਯਿਤਬ੍ਬਾਨਿ, ਵਿਨਯੇ ਸਨ੍ਦਸ੍ਸਯਿਤਬ੍ਬਾਨਿ, ਧਮ੍ਮਤਾਯਂ ਉਪਨਿਕ੍ਖਿਪਿਤਬ੍ਬਾਨਿ.
ਕਤਮਸ੍ਮਿਂ ਸੁਤ੍ਤੇ ਓਤਾਰਯਿਤਬ੍ਬਾਨਿ? ਚਤੂਸੁ ਅਰਿਯਸਚ੍ਚੇਸੁ. ਕਤਮਸ੍ਮਿਂ ਵਿਨਯੇ ਸਨ੍ਦਸ੍ਸਯਿਤਬ੍ਬਾਨਿ? ਰਾਗਵਿਨਯੇ ਦੋਸਵਿਨਯੇ ਮੋਹਵਿਨਯੇ. ਕਤਮਿਸ੍ਸਂ [ਕਤਮਿਯਂ (ਸੀ.)] ਧਮ੍ਮਤਾਯਂ ਉਪਨਿਕ੍ਖਿਪਿਤਬ੍ਬਾਨਿ? ਪਟਿਚ੍ਚਸਮੁਪ੍ਪਾਦੇ. ਯਦਿ ਚਤੂਸੁ ਅਰਿਯਸਚ੍ਚੇਸੁ ਅਵਤਰਤਿ, ਕਿਲੇਸਵਿਨਯੇ ਸਨ੍ਦਿਸ੍ਸਤਿ, ਧਮ੍ਮਤਞ੍ਚ ਨ ਵਿਲੋਮੇਤਿ, ਏਵਂ ਆਸਵੇ ਨ ਜਨੇਤਿ. ਚਤੂਹਿ ਮਹਾਪਦੇਸੇਹਿ ਯਂ ਯਂ ਯੁਜ੍ਜਤਿ, ਯੇਨ ਯੇਨ ਯੁਜ੍ਜਤਿ, ਯਥਾ ਯਥਾ ਯੁਜ੍ਜਤਿ, ਤਂ ਤਂ ਗਹੇਤਬ੍ਬਂ.
੧੯. ਪਞ੍ਹਂ ਪੁਚ੍ਛਿਤੇਨ ਕਤਿ ਪਦਾਨਿ ਪਞ੍ਹੇਤਿ ਪਦਸੋ ਪਰਿਯੋਗਾਹਿਤਬ੍ਬਂ ਵਿਚੇਤਬ੍ਬਂ? ਯਦਿ ਸਬ੍ਬਾਨਿ ਪਦਾਨਿ ਏਕਂ ਅਤ੍ਥਂ ਅਭਿਵਦਨ੍ਤਿ, ਏਕੋ ਪਞ੍ਹੋ. ਅਥ ਚਤ੍ਤਾਰਿ ਪਦਾਨਿ ਏਕਂ ਅਤ੍ਥਂ ਅਭਿਵਦਨ੍ਤਿ, ਏਕੋ ਪਞ੍ਹੋ. ਅਥ ਤੀਣਿ ਪਦਾਨਿ ਏਕਂ ਅਤ੍ਥਂ ਅਭਿਵਦਨ੍ਤਿ, ਏਕੋ ਪਞ੍ਹੋ. ਅਥ ਦ੍ਵੇ ਪਦਾਨਿ ਏਕਂ ਅਤ੍ਥਂ ਅਭਿਵਦਨ੍ਤਿ, ਏਕੋ ਪਞ੍ਹੋ. ਅਥ ਏਕਂ ਪਦਂ ਏਕਂ ਅਤ੍ਥਂ ਅਭਿਵਦਤਿ, ਏਕੋ ਪਞ੍ਹੋ. ਤਂ ਉਪਪਰਿਕ੍ਖਮਾਨੇਨ ਅਞ੍ਞਾਤਬ੍ਬਂ ਕਿਂ ਇਮੇ ਧਮ੍ਮਾ ਨਾਨਤ੍ਥਾ ਨਾਨਾਬ੍ਯਞ੍ਜਨਾ, ਉਦਾਹੁ ਇਮੇਸਂ ਧਮ੍ਮਾਨਂ ਏਕੋ ਅਤ੍ਥੋ ਬ੍ਯਞ੍ਜਨਮੇਵ ਨਾਨਨ੍ਤਿ. ਯਥਾ ਕਿਂ ਭਵੇ? ਯਥਾ ਸਾ ਦੇਵਤਾ ਭਗਵਨ੍ਤਂ ਪਞ੍ਹਂ ਪੁਚ੍ਛਤਿ.
‘‘ਕੇਨਸ੍ਸੁਬ੍ਭਾਹਤੋ [ਪਸ੍ਸ ਸ. ਨਿ. ੧.੬੬] ਲੋਕੋ, ਕੇਨਸ੍ਸੁ ਪਰਿਵਾਰਿਤੋ;
ਕੇਨ ਸਲ੍ਲੇਨ ਓਤਿਣ੍ਣੋ, ਕਿਸ੍ਸ ਧੂਪਾਯਿਤੋ ਸਦਾ’’ਤਿ.
ਇਮਾਨਿ ਚਤ੍ਤਾਰਿ ਪਦਾਨਿ ਪੁਚ੍ਛਿਤਾਨਿ. ਤੇ ਤਯੋ ਪਞ੍ਹਾ ਕਥਂ ਞਾਯਤਿ? ਭਗਵਾ ਹਿ ਦੇਵਤਾਯ ਵਿਸਜ੍ਜੇਤਿ.
‘‘ਮਚ੍ਚੁਨਾਬ੍ਭਾਹਤੋ [ਮਚ੍ਚੁਨਬ੍ਭਾਹਤੋ (ਕ.) ਥੇਰਗਾ. ੪੪੮; ਸਂ. ਨਿ. ੧.੬੬ ਪਸ੍ਸਿਤਬ੍ਬਂ] ਲੋਕੋ, ਜਰਾਯ ਪਰਿਵਾਰਿਤੋ;
ਤਣ੍ਹਾਸਲ੍ਲੇਨ ਓਤਿਣ੍ਣੋ, ਇਚ੍ਛਾਧੂਪਾਯਿਤੋ ਸਦਾ’’ਤਿ.
੨੦. ਤਤ੍ਥ ਜਰਾ ਚ ਮਰਣਞ੍ਚ ਇਮਾਨਿ ਦ੍ਵੇ ਸਙ੍ਖਤਸ੍ਸ ਸਙ੍ਖਤਲਕ੍ਖਣਾਨਿ. ਜਰਾਯਂ ਠਿਤਸ੍ਸ ਅਞ੍ਞਥਤ੍ਤਂ, ਮਰਣਂ ਵਯੋ. ਤਤ੍ਥ ਜਰਾਯ ਚ ਮਰਣਸ੍ਸ ਚ ਅਤ੍ਥਤੋ ਨਾਨਤ੍ਤਂ. ਕੇਨ ਕਾਰਣੇਨ, ਗਬ੍ਭਗਤਾਪਿ ਹਿ ਮੀਯਨ੍ਤਿ, ਨ ਚ ਤੇ ਜਿਣ੍ਣਾ ਭਵਨ੍ਤਿ. ਅਤ੍ਥਿ ਚ ਦੇਵਾਨਂ ਮਰਣਂ, ਨ ਚ ਤੇਸਂ ਸਰੀਰਾਨਿ ਜੀਰਨ੍ਤਿ. ਸਕ੍ਕਤੇਵ ਜਰਾਯ ਪਟਿਕਮ੍ਮਂ ਕਾਤੁਂ, ਨ ਪਨ ਸਕ੍ਕਤੇ ਮਰਣਸ੍ਸ ਪਟਿਕਮ੍ਮਂ ਕਾਤੁਂ ਅਞ੍ਞਤ੍ਰੇਵ ਇਦ੍ਧਿਮਨ੍ਤਾਨਂ ਇਦ੍ਧਿਵਿਸਯਾ. ਯਂ ਪਨਾਹ ਤਣ੍ਹਾਸਲ੍ਲੇਨ ਓਤਿਣ੍ਣੋਤਿ ਦਿਸ੍ਸਨ੍ਤਿ ਵੀਤਰਾਗਾ ਜੀਰਨ੍ਤਾਪਿ ਮੀਯਨ੍ਤਾਪਿ. ਯਦਿ ਚ ਯਥਾ ਜਰਾਮਰਣਂ, ਏਵਂ ਤਣ੍ਹਾਪਿ ਸਿਯਾ. ਏਵਂ ਸਨ੍ਤੇ ਸਬ੍ਬੇ ਯੋਬ੍ਬਨਟ੍ਠਾਪਿ ਵਿਗਤਤਣ੍ਹਾ ਸਿਯੁਂ. ਯਥਾ ਚ ਤਣ੍ਹਾ ਦੁਕ੍ਖਸ੍ਸ ਸਮੁਦਯੋ, ਏਵਂ ਜਰਾਮਰਣਮ੍ਪਿ ਸਿਯਾ ਦੁਕ੍ਖਸ੍ਸ ਸਮੁਦਯੋ, ਨ ਚ ਸਿਯਾ ਤਣ੍ਹਾ ਦੁਕ੍ਖਸ੍ਸ ਸਮੁਦਯੋ, ਨ ਹਿ ਜਰਾਮਰਣਂ ਦੁਕ੍ਖਸ੍ਸ ਸਮੁਦਯੋ, ਤਣ੍ਹਾ ਦੁਕ੍ਖਸ੍ਸ ਸਮੁਦਯੋ. ਯਥਾ ਚ ਤਣ੍ਹਾ ਮਗ੍ਗਵਜ੍ਝਾ, ਏਵਂ ਜਰਾਮਰਣਮ੍ਪਿ ਸਿਯਾ ਮਗ੍ਗਵਜ੍ਝਂ. ਇਮਾਯ ਯੁਤ੍ਤਿਯਾ ਅਞ੍ਞਮਞ੍ਞੇਹਿ ਕਾਰਣੇਹਿ ਗਵੇਸਿਤਬ੍ਬਂ. ਯਦਿ ਚ ਸਨ੍ਦਿਸ੍ਸਤਿ ਯੁਤ੍ਤਿਸਮਾਰੂਲ਼੍ਹਂ ਅਤ੍ਥਤੋ ਚ ਅਞ੍ਞਤ੍ਤਂ, ਬ੍ਯਞ੍ਜਨਤੋਪਿ ਗਵੇਸਿਤਬ੍ਬਂ.
ਸਲ੍ਲੋਤਿ ਵਾ ਧੂਪਾਯਨਨ੍ਤਿ ਵਾ ਇਮੇਸਂ ਧਮ੍ਮਾਨਂ ਅਤ੍ਥਤੋ ਏਕਤ੍ਤਂ. ਨ ਹਿ ਯੁਜ੍ਜਤਿ ਇਚ੍ਛਾਯ ਚ ਤਣ੍ਹਾਯ ਚ ਅਤ੍ਥਤੋ ਅਞ੍ਞਤ੍ਤਂ. ਤਣ੍ਹਾਯ ਅਧਿਪ੍ਪਾਯੇ ਅਪਰਿਪੂਰਮਾਨੇ ਨਵਸੁ ਆਘਾਤਵਤ੍ਥੂਸੁ ਕੋਧੋ ਚ ਉਪਨਾਹੋ ਚ ਉਪ੍ਪਜ੍ਜਤਿ. ਇਮਾਯ ਯੁਤ੍ਤਿਯਾ ਜਰਾਯ ਚ ਮਰਣਸ੍ਸ ਚ ਤਣ੍ਹਾਯ ਚ ਅਤ੍ਥਤੋ ਅਞ੍ਞਤ੍ਤਂ.
ਯਂ ਪਨਿਦਂ ਭਗਵਤਾ ਦ੍ਵੀਹਿ ਨਾਮੇਹਿ ਅਭਿਲਪਿਤਂ ਇਚ੍ਛਾਤਿਪਿ ਤਣ੍ਹਾਤਿਪਿ, ਇਦਂ ਭਗਵਤਾ ਬਾਹਿਰਾਨਂ ਵਤ੍ਥੂਨਂ ਆਰਮ੍ਮਣਵਸੇਨ ਦ੍ਵੀਹਿ ਨਾਮੇਹਿ ਅਭਿਲਪਿਤਂ ਇਚ੍ਛਾਤਿਪਿ ਤਣ੍ਹਾਤਿਪਿ, ਸਬ੍ਬਾ ਹਿ ਤਣ੍ਹਾ ਅਜ੍ਝੋਸਾਨਲਕ੍ਖਣੇਨ ਏਕਲਕ੍ਖਣਾ. ਯਥਾ ਸਬ੍ਬੋ ਅਗ੍ਗਿ ਉਣ੍ਹਤ੍ਤਲਕ੍ਖਣੇਨ ਏਕਲਕ੍ਖਣੋ, ਅਪਿ ਚ ਉਪਾਦਾਨਵਸੇਨ ਅਞ੍ਞਮਞ੍ਞਾਨਿ ਨਾਮਾਨਿ ਲਭਤਿ, ਕਟ੍ਠਗ੍ਗੀਤਿਪਿ ਤਿਣਗ੍ਗੀਤਿਪਿ ਸਕਲਿਕਗ੍ਗੀਤਿਪਿ ਗੋਮਯਗ੍ਗੀਤਿਪਿ ਥੁਸਗ੍ਗੀਤਿਪਿ ਸਙ੍ਕਾਰਗ੍ਗੀਤਿਪਿ, ਸਬ੍ਬੋ ਹਿ ਅਗ੍ਗਿ ਉਣ੍ਹਤ੍ਤਲਕ੍ਖਣੋਵ. ਏਵਂ ਸਬ੍ਬਾ ਤਣ੍ਹਾ ਅਜ੍ਝੋਸਾਨਲਕ੍ਖਣੇਨ ਏਕਲਕ੍ਖਣਾ, ਅਪਿ ਤੁ ਆਰਮ੍ਮਣਉਪਾਦਾਨਵਸੇਨ ਅਞ੍ਞਮਞ੍ਞੇਹਿ ਨਾਮੇਹਿ ਅਭਿਲਪਿਤਾ ਇਚ੍ਛਾਇਤਿਪਿ ਤਣ੍ਹਾਇਤਿਪਿ ਸਲ੍ਲੋਇਤਿਪਿ ਧੂਪਾਯਨਾਇਤਿਪਿ ਸਰਿਤਾਇਤਿਪਿ ਵਿਸਤ੍ਤਿਕਾਇਤਿਪਿ ਸਿਨੇਹੋਇਤਿਪਿ ਕਿਲਮਥੋਇਤਿਪਿ ਲਤਾਇਤਿਪਿ ਮਞ੍ਞਨਾਇਤਿਪਿ ਬਨ੍ਧੋਇਤਿਪਿ ਆਸਾਇਤਿਪਿ ਪਿਪਾਸਾਇਤਿਪਿ ਅਭਿਨਨ੍ਦਨਾਇਤਿਪਿ, ਇਤਿ ਸਬ੍ਬਾ ਤਣ੍ਹਾ ਅਜ੍ਝੋਸਾਨਲਕ੍ਖਣੇਨ ਏਕਲਕ੍ਖਣਾ. ਯਥਾ ਚ ਵੇਵਚਨੇ ਵੁਤ੍ਤਾ.
‘‘ਆਸਾ ਚ ਪਿਹਾ ਅਭਿਨਨ੍ਦਨਾ ਚ, ਅਨੇਕਧਾਤੂਸੁ ਸਰਾ ਪਤਿਟ੍ਠਿਤਾ;
ਅਞ੍ਞਾਣਮੂਲਪ੍ਪਭਵਾ ਪਜਪ੍ਪਿਤਾ, ਸਬ੍ਬਾ ਮਯਾ ਬ੍ਯਨ੍ਤਿਕਤਾ ਸਮੂਲਕਾ’’ਤਿ [ਸਮੂਲਿਕਾ (ਸੀ.)].
ਤਣ੍ਹਾਯੇਤਂ ਵੇਵਚਨਂ. ਯਥਾਹ ਭਗਵਾ – ਰੂਪੇ ਤਿਸ੍ਸ ਅਵਿਗਤਰਾਗਸ੍ਸ ਅਵਿਗਤਚ੍ਛਨ੍ਦਸ੍ਸ ਅਵਿਗਤਪੇਮਸ੍ਸ ਅਵਿਗਤਪਿਪਾਸਸ੍ਸ ਅਵਿਗਤਪਰਿਲ਼ਾਹਸ੍ਸ. ਏਵਂ ਵੇਦਨਾਯ ਸਞ੍ਞਾਯ ਸਙ੍ਖਾਰੇਸੁ ਵਿਞ੍ਞਾਣੇ ਅਵਿਗਤਰਾਗਸ੍ਸ ਅਵਿਗਤਚ੍ਛਨ੍ਦਸ੍ਸ ਅਵਿਗਤਪੇਮਸ੍ਸ ਅਵਿਗਤਪਿਪਾਸਸ੍ਸ ਅਵਿਗਤਪਰਿਲ਼ਾਹਸ੍ਸ ਸਬ੍ਬਂ ਸੁਤ੍ਤਂ ਵਿਤ੍ਥਾਰੇਤਬ੍ਬਂ. ਤਣ੍ਹਾਯੇਤਂ ਵੇਵਚਨਂ. ਏਵਂ ਯੁਜ੍ਜਤਿ.
੨੧. ਸਬ੍ਬੋ ਦੁਕ੍ਖੂਪਚਾਰੋ ਕਾਮਤਣ੍ਹਾਸਙ੍ਖਾਰਮੂਲਕੋ, ਨ ਪਨ ਯੁਜ੍ਜਤਿ ਸਬ੍ਬੋ ਨਿਬ੍ਬਿਦੂਪਚਾਰੋ ਕਾਮਤਣ੍ਹਾਪਰਿਕ੍ਖਾਰਮੂਲਕੋ. ਇਮਾਯ ਯੁਤ੍ਤਿਯਾ ਅਞ੍ਞਮਞ੍ਞੇਹਿ ਕਾਰਣੇਹਿ ਗਵੇਸਿਤਬ੍ਬਂ.
ਯਥਾ ਹਿ [ਯਥਾਹ (ਸੀ.)] ਭਗਵਾ ਰਾਗਚਰਿਤਸ੍ਸ ਪੁਗ੍ਗਲਸ੍ਸ ਅਸੁਭਂ ਦੇਸਯਤਿ, ਦੋਸਚਰਿਤਸ੍ਸ ਭਗਵਾ ਪੁਗ੍ਗਲਸ੍ਸ ਮੇਤ੍ਤਂ ਦੇਸਯਤਿ. ਮੋਹਚਰਿਤਸ੍ਸ ਭਗਵਾ ਪੁਗ੍ਗਲਸ੍ਸ ਪਟਿਚ੍ਚਸਮੁਪ੍ਪਾਦਂ ਦੇਸਯਤਿ. ਯਦਿ ਹਿ ਭਗਵਾ ਰਾਗਚਰਿਤਸ੍ਸ ਪੁਗ੍ਗਲਸ੍ਸ ਮੇਤ੍ਤਂ ਚੇਤੋਵਿਮੁਤ੍ਤਿਂ ਦੇਸੇਯ੍ਯ. ਸੁਖਂ ਵਾ ਪਟਿਪਦਂ ਦਨ੍ਧਾਭਿਞ੍ਞਂ ਸੁਖਂ ਵਾ ਪਟਿਪਦਂ ਖਿਪ੍ਪਾਭਿਞ੍ਞਂ ਵਿਪਸ੍ਸਨਾਪੁਬ੍ਬਙ੍ਗਮਂ ਵਾ ਪਹਾਨਂ ਦੇਸੇਯ੍ਯ, ਨ ਯੁਜ੍ਜਤਿ ਦੇਸਨਾ. ਏਵਂ ਯਂ ਕਿਞ੍ਚਿ ਰਾਗਸ੍ਸ ਅਨੁਲੋਮਪ੍ਪਹਾਨਂ ਦੋਸਸ੍ਸ ਅਨੁਲੋਮਪ੍ਪਹਾਨਂ ਮੋਹਸ੍ਸ ਅਨੁਲੋਮਪ੍ਪਹਾਨਂ. ਸਬ੍ਬਂ ਤਂ ਵਿਚਯੇਨ ਹਾਰੇਨ ਵਿਚਿਨਿਤ੍ਵਾ ਯੁਤ੍ਤਿਹਾਰੇਨ ਯੋਜੇਤਬ੍ਬਂ. ਯਾਵਤਿਕਾ ਞਾਣਸ੍ਸ ਭੂਮਿ.
ਮੇਤ੍ਤਾਵਿਹਾਰਿਸ੍ਸ ਸਤੋ ਬ੍ਯਾਪਾਦੋ ਚਿਤ੍ਤਂ ਪਰਿਯਾਦਾਯ ਠਸ੍ਸਤੀਤਿ ਨ ਯੁਜ੍ਜਤਿ ਦੇਸਨਾ, ਬ੍ਯਾਪਾਦੋ ਪਹਾਨਂ ਅਬ੍ਭਤ੍ਥਂ ਗਚ੍ਛਤੀਤਿ ਯੁਜ੍ਜਤਿ ਦੇਸਨਾ. ਕਰੁਣਾਵਿਹਾਰਿਸ੍ਸ ਸਤੋ ਵਿਹੇਸਾ ਚਿਤ੍ਤਂ ਪਰਿਯਾਦਾਯ ਠਸ੍ਸਤੀਤਿ ਨ ਯੁਜ੍ਜਤਿ ਦੇਸਨਾ, ਵਿਹੇਸਾ ਪਹਾਨਂ ਅਬ੍ਭਤ੍ਥਂ ਗਚ੍ਛਤੀਤਿ ਯੁਜ੍ਜਤਿ ਦੇਸਨਾ. ਮੁਦਿਤਾ ਵਿਹਾਰਿਸ੍ਸ ਸਤੋ ਅਰਤਿ ਚਿਤ੍ਤਂ ਪਰਿਯਾਦਾਯ ਠਸ੍ਸਤੀਤਿ ਨ ਯੁਜ੍ਜਤਿ ਦੇਸਨਾ, ਅਰਤਿ ਪਹਾਨਂ ਅਬ੍ਭਤ੍ਥਂ ਗਚ੍ਛਤੀਤਿ ਯੁਜ੍ਜਤਿ ਦੇਸਨਾ. ਉਪੇਕ੍ਖਾਵਿਹਾਰਿਸ੍ਸ ਸਤੋ ਰਾਗੋ ਚਿਤ੍ਤਂ ਪਰਿਯਾਦਾਯ ਠਸ੍ਸਤੀਤਿ ਨ ਯੁਜ੍ਜਤਿ ਦੇਸਨਾ, ਰਾਗੋ ਪਹਾਨਂ ਅਬ੍ਭਤ੍ਥਂ ਗਚ੍ਛਤੀਤਿ ਯੁਜ੍ਜਤਿ ਦੇਸਨਾ. ਅਨਿਮਿਤ੍ਤਵਿਹਾਰਿਸ੍ਸ ਸਤੋ ਨਿਮਿਤ੍ਤਾਨੁਸਾਰੀ ਤੇਨ ਤੇਨੇਵ ਵਿਞ੍ਞਾਣਂ ਪਵਤ੍ਤਤੀਤਿ ਨ ਯੁਜ੍ਜਤਿ ਦੇਸਨਾ, ਨਿਮਿਤ੍ਤਂ ਪਹਾਨਂ ਅਬ੍ਭਤ੍ਥਂ ਗਚ੍ਛਤੀਤਿ ਯੁਜ੍ਜਤਿ ਦੇਸਨਾ. ਅਸ੍ਮੀਤਿ ਵਿਗਤਂ ਅਯਮਹਮਸ੍ਮੀਤਿ ਨ ਸਮਨੁਪਸ੍ਸਾਮਿ. ਅਥ ਚ ਪਨ ਮੇ ਕਿਸ੍ਮੀਤਿ ਕਥਸ੍ਮੀਤਿ ਵਿਚਿਕਿਚ੍ਛਾ ਕਥਂਕਥਾਸਲ੍ਲਂ ਚਿਤ੍ਤਂ ਪਰਿਯਾਦਾਯ ਠਸ੍ਸਤੀਤਿ ਨ ਯੁਜ੍ਜਤਿ ਦੇਸਨਾ, ਵਿਚਿਕਿਚ੍ਛਾ ਕਥਂਕਥਾਸਲ੍ਲਂ ਪਹਾਨਂ ਅਬ੍ਭਤ੍ਥਂ ਗਚ੍ਛਤੀਤਿ ਯੁਜ੍ਜਤਿ ਦੇਸਨਾ.
ਯਥਾ ਵਾ ਪਨ ਪਠਮਂ ਝਾਨਂ ਸਮਾਪਨ੍ਨਸ੍ਸ ਸਤੋ ਕਾਮਰਾਗਬ੍ਯਾਪਾਦਾ ਵਿਸੇਸਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਹਾਨਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ. ਵਿਤਕ੍ਕਸਹਗਤਾ ਵਾ ਸਞ੍ਞਾਮਨਸਿਕਾਰਾ ਹਾਨਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਵਿਸੇਸਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ. ਦੁਤਿਯਂ ਝਾਨਂ ਸਮਾਪਨ੍ਨਸ੍ਸ ਸਤੋ ਵਿਤਕ੍ਕਵਿਚਾਰਸਹਗਤਾ ਸਞ੍ਞਾਮਨਸਿਕਾਰਾ ਵਿਸੇਸਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਹਾਨਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ. ਉਪੇਕ੍ਖਾਸੁਖਸਹਗਤਾ ਵਾ ਸਞ੍ਞਾਮਨਸਿਕਾਰਾ ਹਾਨਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਵਿਸੇਸਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ. ਤਤਿਯਂ ਝਾਨਂ ਸਮਾਪਨ੍ਨਸ੍ਸ ਸਤੋ ਪੀਤਿਸੁਖਸਹਗਤਾ ਸਞ੍ਞਾਮਨਸਿਕਾਰਾ ਵਿਸੇਸਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਹਾਨਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ, ਉਪੇਕ੍ਖਾਸਤਿਪਾਰਿਸੁਦ੍ਧਿਸਹਗਤਾ ਵਾ ਸਞ੍ਞਾਮਨਸਿਕਾਰਾ ਹਾਨਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਵਿਸੇਸਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ. ਚਤੁਤ੍ਥਂ ਝਾਨਂ ਸਮਾਪਨ੍ਨਸ੍ਸ ਸਤੋ ਉਪੇਕ੍ਖਾਸਹਗਤਾ ਸਞ੍ਞਾਮਨਸਿਕਾਰਾ ਵਿਸੇਸਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਹਾਨਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ. ਆਕਾਸਾਨਞ੍ਚਾਯਤਨਸਹਗਤਾ ਵਾ ਸਞ੍ਞਾਮਨਸਿਕਾਰਾ ਹਾਨਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਵਿਸੇਸਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ.
ਆਕਾਸਾਨਞ੍ਚਾਯਤਨਂ ਸਮਾਪਨ੍ਨਸ੍ਸ ਸਤੋ ਰੂਪਸਹਗਤਾ ਸਞ੍ਞਾਮਨਸਿਕਾਰਾ ਵਿਸੇਸਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਹਾਨਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ. ਵਿਞ੍ਞਾਣਞ੍ਚਾਯਤਨਸਹਗਤਾ ਵਾ ਸਞ੍ਞਾਮਨਸਿਕਾਰਾ ਹਾਨਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਵਿਸੇਸਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ. ਵਿਞ੍ਞਾਣਞ੍ਚਾਯਤਨਂ ਸਮਾਪਨ੍ਨਸ੍ਸ ਸਤੋ ਆਕਾਸਾਨਞ੍ਚਾਯਤਨਸਹਗਤਾ ਸਞ੍ਞਾਮਨਸਿਕਾਰਾ ਵਿਸੇਸਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਹਾਨਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ. ਆਕਿਞ੍ਚਞ੍ਞਾਯਤਨਸਹਗਤਾ ਵਾ ਸਞ੍ਞਾਮਨਸਿਕਾਰਾ ਹਾਨਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਵਿਸੇਸਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ.
ਆਕਿਞ੍ਚਞ੍ਞਾਯਤਨਂ ਸਮਾਪਨ੍ਨਸ੍ਸ ਸਤੋ ਵਿਞ੍ਞਾਣਞ੍ਚਾਯਤਨਸਹਗਤਾ ਸਞ੍ਞਾਮਨਸਿਕਾਰਾ ਵਿਸੇਸਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਹਾਨਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ. ਨੇਵਸਞ੍ਞਾਨਾਸਞ੍ਞਾਯਤਨਸਹਗਤਾ ਵਾ ਸਞ੍ਞਾਮਨਸਿਕਾਰਾ ਹਾਨਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਵਿਸੇਸਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ. ਨੇਵਸਞ੍ਞਾਨਾਸਞ੍ਞਾਯਤਨਂ ਸਮਾਪਨ੍ਨਸ੍ਸ ਸਤੋ ਸਞ੍ਞੂਪਚਾਰਾ ਵਿਸੇਸਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਹਾਨਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ. ਸਞ੍ਞਾਵੇਦਯਿਤਨਿਰੋਧਸਹਗਤਾ ਵਾ ਸਞ੍ਞਾਮਨਸਿਕਾਰਾ ਹਾਨਾਯ ਸਂਵਤ੍ਤਨ੍ਤੀਤਿ ਨ ਯੁਜ੍ਜਤਿ ਦੇਸਨਾ, ਵਿਸੇਸਾਯ ਸਂਵਤ੍ਤਨ੍ਤੀਤਿ ਯੁਜ੍ਜਤਿ ਦੇਸਨਾ. ਕਲ੍ਲਤਾਪਰਿਚਿਤਂ ਚਿਤ੍ਤਂ ਨ ਚ ਅਭਿਨੀਹਾਰਂ ਖਮਤੀਤਿ ਨ ਯੁਜ੍ਜਤਿ ਦੇਸਨਾ, ਕਲ੍ਲਤਾਪਰਿਚਿਤਂ ਚਿਤ੍ਤਂ ਅਥ ਚ ਅਭਿਨੀਹਾਰਂ ਖਮਤੀਤਿ ਯੁਜ੍ਜਤਿ ਦੇਸਨਾ.
ਏਵਂ ਸਬ੍ਬੇ ਨਵਸੁਤ੍ਤਨ੍ਤਾ ਯਥਾਧਮ੍ਮਂ ਯਥਾਵਿਨਯਂ ਯਥਾਸਤ੍ਥੁਸਾਸਨਂ ਸਬ੍ਬਤੋ ਵਿਚਯੇਨ ਹਾਰੇਨ ਵਿਚਿਨਿਤ੍ਵਾ ਯੁਤ੍ਤਿਹਾਰੇਨ ਯੋਜੇਤਬ੍ਬਾਤਿ. ਤੇਨਾਹ ਆਯਸ੍ਮਾ ਮਹਾਕਚ੍ਚਾਯਨੋ ‘‘ਸਬ੍ਬੇਸਂ ਹਾਰਾਨਂ ਯਾ ਭੂਮਿ ਯੋ ਚ ਗੋਚਰੋ ਤੇਸ’’ਨ੍ਤਿ.
ਨਿਯੁਤ੍ਤੋ ਯੁਤ੍ਤਿ ਹਾਰੋ.