੧. ਦੇਸਨਾਹਾਰਵਿਭਙ੍ਗੋ
੫. ਤਤ੍ਥ ਕਤਮੋ ਦੇਸਨਾਹਾਰੋ? ‘‘ਅਸ੍ਸਾਦਾਦੀਨਵਤਾ’’ਤਿ ਗਾਥਾ ਅਯਂ ਦੇਸਨਾਹਾਰੋ. ਕਿਂ ਦੇਸਯਤਿ? ਅਸ੍ਸਾਦਂ ਆਦੀਨਵਂ ਨਿਸ੍ਸਰਣਂ ਫਲਂ ਉਪਾਯਂ ਆਣਤ੍ਤਿਂ. ਧਮ੍ਮਂ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਂ ਸਾਤ੍ਥਂ ਸਬ੍ਯਞ੍ਜਨਂ ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਪਕਾਸੇਸ੍ਸਾਮੀਤਿ.
ਤਤ੍ਥ ਕਤਮੋ ਅਸ੍ਸਾਦੋ?
‘‘ਕਾਮਂ [ਕਾਮਮਾਦਿਕਾ ਇਮਾ ਛ ਗਾਥਾ ਸੁ. ਨਿ. ੭੭੨ ਪਸ੍ਸਿਤਬ੍ਬਾ] ਕਾਮਯਮਾਨਸ੍ਸ, ਤਸ੍ਸ ਚੇਤਂ ਸਮਿਜ੍ਝਤਿ;
ਅਦ੍ਧਾ ਪੀਤਿਮਨੋ ਹੋਤਿ, ਲਦ੍ਧਾ ਮਚ੍ਚੋ ਯਦਿਚ੍ਛਤੀ’’ਤਿ.
ਅਯਂ ਅਸ੍ਸਾਦੋ.
ਤਤ੍ਥ ਕਤਮੋ ਆਦੀਨਵੋ?
‘‘ਤਸ੍ਸ ਚੇ ਕਾਮਯਾਨਸ੍ਸ, ਛਨ੍ਦਜਾਤਸ੍ਸ ਜਨ੍ਤੁਨੋ;
ਤੇ ਕਾਮਾ ਪਰਿਹਾਯਨ੍ਤਿ, ਸਲ੍ਲਵਿਦ੍ਧੋਵ ਰੁਪ੍ਪਤੀ’’ਤਿ.
ਅਯਂ ਆਦੀਨਵੋ.
ਤਤ੍ਥ ਕਤਮਂ ਨਿਸ੍ਸਰਣਂ?
‘‘ਯੋ ਕਾਮੇ ਪਰਿਵਜ੍ਜੇਤਿ, ਸਪ੍ਪਸ੍ਸੇਵ ਪਦਾ ਸਿਰੋ;
ਸੋਮਂ ਵਿਸਤ੍ਤਿਕਂ ਲੋਕੇ, ਸਤੋ ਸਮਤਿਵਤ੍ਤਤੀ’’ਤਿ.
ਇਦਂ ਨਿਸ੍ਸਰਣਂ.
ਤਤ੍ਥ ਕਤਮੋ ਅਸ੍ਸਾਦੋ?
‘‘ਖੇਤ੍ਤਂ ਵਤ੍ਥੁਂ ਹਿਰਞ੍ਞਂ ਵਾ, ਗਵਾਸ੍ਸਂ ਦਾਸਪੋਰਿਸਂ;
ਥਿਯੋ ਬਨ੍ਧੂ ਪੁਥੂ ਕਾਮੇ, ਯੋ ਨਰੋ ਅਨੁਗਿਜ੍ਝਤੀ’’ਤਿ.
ਅਯਂ ਅਸ੍ਸਾਦੋ.
ਤਤ੍ਥ ਕਤਮੋ ਆਦੀਨਵੋ?
‘‘ਅਬਲਾ ਨਂ ਬਲੀਯਨ੍ਤਿ, ਮਦ੍ਦਨ੍ਤੇ ਨਂ ਪਰਿਸ੍ਸਯਾ;
ਤਤੋ ਨਂ ਦੁਕ੍ਖਮਨ੍ਵੇਤਿ, ਨਾਵਂ ਭਿਨ੍ਨਮਿਵੋਦਕ’’ਨ੍ਤਿ.
ਅਯਂ ਆਦੀਨਵੋ.
ਤਤ੍ਥ ਕਤਮਂ ਨਿਸ੍ਸਰਣਂ?
‘‘ਤਸ੍ਮਾ ਜਨ੍ਤੁ ਸਦਾ ਸਤੋ, ਕਾਮਾਨਿ ਪਰਿਵਜ੍ਜਯੇ;
ਤੇ ਪਹਾਯ ਤਰੇ ਓਘਂ, ਨਾਵਂ ਸਿਤ੍ਵਾਵ ਪਾਰਗੂ’’ਤਿ.
ਇਦਂ ਨਿਸ੍ਸਰਣਂ.
ਤਤ੍ਥ ਕਤਮਂ ਫਲਂ?
‘‘ਧਮ੍ਮੋ ਹਵੇ ਰਕ੍ਖਤਿ ਧਮ੍ਮਚਾਰਿਂ, ਛਤ੍ਤਂ ਮਹਨ੍ਤਂ ਯਥ ਵਸ੍ਸਕਾਲੇ;
ਏਸਾਨਿਸਂਸੋ ਧਮ੍ਮੇ ਸੁਚਿਣ੍ਣੇ, ਨ ਦੁਗ੍ਗਤਿਂ ਗਚ੍ਛਤਿ ਧਮ੍ਮਚਾਰੀ’’ਤਿ.
ਇਦਂ ਫਲਂ.
ਤਤ੍ਥ ਕਤਮੋ ਉਪਾਯੋ?
‘‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ’’ਤਿ…ਪੇ…
‘‘ਸਬ੍ਬੇ ਸਙ੍ਖਾਰਾ [ਪਸ੍ਸ ਧ. ਪ. ੨੭੭] ਦੁਕ੍ਖਾ’’ਤਿ…ਪੇ…
‘‘ਸਬ੍ਬੇ ਧਮ੍ਮਾ ਅਨਤ੍ਤਾ’’ਤਿ, ਯਦਾ ਪਞ੍ਞਾਯ ਪਸ੍ਸਤਿ;
ਅਥ ਨਿਬ੍ਬਿਨ੍ਦਤਿ ਦੁਕ੍ਖੇ, ਏਸ ਮਗ੍ਗੋ ਵਿਸੁਦ੍ਧਿਯਾ’’ਤਿ.
ਅਯਂ ਉਪਾਯੋ.
ਤਤ੍ਥ ਕਤਮਾ ਆਣਤ੍ਤਿ?
‘‘ਚਕ੍ਖੁਮਾ [ਪਸ੍ਸ ਉਦਾ. ੪੩] ਵਿਸਮਾਨੀਵ, ਵਿਜ੍ਜਮਾਨੇ ਪਰਕ੍ਕਮੇ;
ਪਣ੍ਡਿਤੋ ਜੀਵਲੋਕਸ੍ਮਿਂ, ਪਾਪਾਨਿ ਪਰਿਵਜ੍ਜਯੇ’’ਤਿ.
ਅਯਂ ਆਣਤ੍ਤਿ.
‘‘‘ਸੁਞ੍ਞਤੋ ਲੋਕਂ ਅਵੇਕ੍ਖਸ੍ਸੁ,
ਮੋਘਰਾਜਾ’ਤਿ ਆਣਤ੍ਤਿ, ‘ਸਦਾ ਸਤੋ’ਤਿ ਉਪਾਯੋ;
‘ਅਤ੍ਤਾਨੁਦਿਟ੍ਠਿਂ ਊਹਚ੍ਚ [ਉਹਚ੍ਚ (ਕ.) ਪਸ੍ਸ ਸੁ. ਨਿ. ੧੧੨੫], ਏਵਂ ਮਚ੍ਚੁਤਰੋ ਸਿਯਾ’’’.
ਇਦਂ ਫਲਂ.
੬. ਤਤ੍ਥ ਭਗਵਾ ਉਗ੍ਘਟਿਤਞ੍ਞੁਸ੍ਸ ਪੁਗ੍ਗਲਸ੍ਸ ਨਿਸ੍ਸਰਣਂ ਦੇਸਯਤਿ, ਵਿਪਞ੍ਚਿਤਞ੍ਞੁਸ੍ਸ ਪੁਗ੍ਗਲਸ੍ਸ ਆਦੀਨਵਞ੍ਚ ਨਿਸ੍ਸਰਣਞ੍ਚ ਦੇਸਯਤਿ, ਨੇਯ੍ਯਸ੍ਸ ਪੁਗ੍ਗਲਸ੍ਸ ਅਸ੍ਸਾਦਞ੍ਚ ਆਦੀਨਵਞ੍ਚ ਨਿਸ੍ਸਰਣਞ੍ਚ ਦੇਸਯਤਿ.
ਤਤ੍ਥ ਚਤਸ੍ਸੋ ਪਟਿਪਦਾ, ਚਤ੍ਤਾਰੋ ਪੁਗ੍ਗਲਾ. ਤਣ੍ਹਾਚਰਿਤੋ ਮਨ੍ਦੋ ਸਤਿਨ੍ਦ੍ਰਿਯੇਨ ਦੁਕ੍ਖਾਯ ਪਟਿਪਦਾਯ ਦਨ੍ਧਾਭਿਞ੍ਞਾਯ ਨਿਯ੍ਯਾਤਿ ਸਤਿਪਟ੍ਠਾਨੇਹਿ ਨਿਸ੍ਸਯੇਹਿ. ਤਣ੍ਹਾਚਰਿਤੋ ਉਦਤ੍ਤੋ [ਉਦਤ੍ਥੋ (ਸੀ.) ਉ + ਆ + ਦਾ + ਤ] ਸਮਾਧਿਨ੍ਦ੍ਰਿਯੇਨ ਦੁਕ੍ਖਾਯ ਪਟਿਪਦਾਯ ਖਿਪ੍ਪਾਭਿਞ੍ਞਾਯ ਨਿਯ੍ਯਾਤਿ ਝਾਨੇਹਿ ਨਿਸ੍ਸਯੇਹਿ. ਦਿਟ੍ਠਿਚਰਿਤੋ ਮਨ੍ਦੋ ਵੀਰਿਯਿਨ੍ਦ੍ਰਿਯੇਨ ਸੁਖਾਯ ਪਟਿਪਦਾਯ ਦਨ੍ਧਾਭਿਞ੍ਞਾਯ ਨਿਯ੍ਯਾਤਿ ਸਮ੍ਮਪ੍ਪਧਾਨੇਹਿ ਨਿਸ੍ਸਯੇਹਿ. ਦਿਟ੍ਠਿਚਰਿਤੋ ਉਦਤ੍ਤੋ ਪਞ੍ਞਿਨ੍ਦ੍ਰਿਯੇਨ ਸੁਖਾਯ ਪਟਿਪਦਾਯ ਖਿਪ੍ਪਾਭਿਞ੍ਞਾਯ ਨਿਯ੍ਯਾਤਿ ਸਚ੍ਚੇਹਿ ਨਿਸ੍ਸਯੇਹਿ.
ਉਭੋ ਤਣ੍ਹਾਚਰਿਤਾ ਸਮਥਪੁਬ੍ਬਙ੍ਗਮਾਯ ਵਿਪਸ੍ਸਨਾ ਨਿਯ੍ਯਨ੍ਤਿ ਰਾਗਵਿਰਾਗਾਯ ਚੇਤੋਵਿਮੁਤ੍ਤਿਯਾ. ਉਭੋ ਦਿਟ੍ਠਿਚਰਿਤਾ ਵਿਪਸ੍ਸਨਾਪੁਬ੍ਬਙ੍ਗਮੇ ਸਮਥੇਨ ਨਿਯ੍ਯਨ੍ਤਿ ਅਵਿਜ੍ਜਾਵਿਰਾਗਾਯ ਪਞ੍ਞਾਵਿਮੁਤ੍ਤਿਯਾ.
ਤਤ੍ਥ ਯੇ ਸਮਥਪੁਬ੍ਬਙ੍ਗਮਾਹਿ ਪਟਿਪਦਾਹਿ ਨਿਯ੍ਯਨ੍ਤਿ, ਤੇ ਨਨ੍ਦਿਯਾਵਟ੍ਟੇਨ ਨਯੇਨ ਹਾਤਬ੍ਬਾ, ਯੇ ਵਿਪਸ੍ਸਨਾਪੁਬ੍ਬਙ੍ਗਮਾਹਿ ਪਟਿਪਦਾਹਿ ਨਿਯ੍ਯਨ੍ਤਿ, ਤੇ ਸੀਹਵਿਕ੍ਕੀਲ਼ਿਤੇਨ ਨਯੇਨ ਹਾਤਬ੍ਬਾ.
੭. ਸ੍ਵਾਯਂ ਹਾਰੋ ਕਤ੍ਥ ਸਮ੍ਭਵਤਿ, ਯਸ੍ਸ ਸਤ੍ਥਾ ਵਾ ਧਮ੍ਮਂ ਦੇਸਯਤਿ ਅਞ੍ਞਤਰੋ ਵਾ ਗਰੁਟ੍ਠਾਨੀਯੋ ਸਬ੍ਰਹ੍ਮਚਾਰੀ, ਸੋ ਤਂ ਧਮ੍ਮਂ ਸੁਤ੍ਵਾ ਸਦ੍ਧਂ ਪਟਿਲਭਤਿ. ਤਤ੍ਥ ਯਾ ਵੀਮਂਸਾ ਉਸ੍ਸਾਹਨਾ ਤੁਲਨਾ ਉਪਪਰਿਕ੍ਖਾ, ਅਯਂ ਸੁਤਮਯੀ ਪਞ੍ਞਾ. ਤਥਾ ਸੁਤੇਨ ਨਿਸ੍ਸਯੇਨ ਯਾ ਵੀਮਂਸਾ ਤੁਲਨਾ ਉਪਪਰਿਕ੍ਖਾ ਮਨਸਾਨੁਪੇਕ੍ਖਣਾ, ਅਯਂ ਚਿਨ੍ਤਾਮਯੀ ਪਞ੍ਞਾ. ਇਮਾਹਿ ਦ੍ਵੀਹਿ ਪਞ੍ਞਾਹਿ ਮਨਸਿਕਾਰਸਮ੍ਪਯੁਤ੍ਤਸ੍ਸ ਯਂ ਞਾਣਂ ਉਪ੍ਪਜ੍ਜਤਿ ਦਸ੍ਸਨਭੂਮਿਯਂ ਵਾ ਭਾਵਨਾਭੂਮਿਯਂ ਵਾ, ਅਯਂ ਭਾਵਨਾਮਯੀ ਪਞ੍ਞਾ.
੮. ਪਰਤੋਘੋਸਾ ਸੁਤਮਯੀ ਪਞ੍ਞਾ. ਪਚ੍ਚਤ੍ਤਸਮੁਟ੍ਠਿਤਾ ਯੋਨਿਸੋ ਮਨਸਿਕਾਰਾ ਚਿਨ੍ਤਾਮਯੀ ਪਞ੍ਞਾ. ਯਂ ਪਰਤੋ ਚ ਘੋਸੇਨ ਪਚ੍ਚਤ੍ਤਸਮੁਟ੍ਠਿਤੇਨ ਚ ਯੋਨਿਸੋਮਨਸਿਕਾਰੇਨ ਞਾਣਂ ਉਪ੍ਪਜ੍ਜਤਿ, ਅਯਂ ਭਾਵਨਾਮਯੀ ਪਞ੍ਞਾ. ਯਸ੍ਸ ਇਮਾ ਦ੍ਵੇ ਪਞ੍ਞਾ ਅਤ੍ਥਿ ਸੁਤਮਯੀ ਚਿਨ੍ਤਾਮਯੀ ਚ, ਅਯਂ ਉਗ੍ਘਟਿਤਞ੍ਞੂ. ਯਸ੍ਸ ਸੁਤਮਯੀ ਪਞ੍ਞਾ ਅਤ੍ਥਿ, ਚਿਨ੍ਤਾਮਯੀ ਨਤ੍ਥਿ, ਅਯਂ ਵਿਪਞ੍ਚਿਤਞ੍ਞੂ [ਵਿਪਚ੍ਚਿਤਞ੍ਞੂ (ਸੀ.)]. ਯਸ੍ਸ ਨੇਵ ਸੁਤਮਯੀ ਪਞ੍ਞਾ ਅਤ੍ਥਿ ਨ ਚਿਨ੍ਤਾਮਯੀ, ਅਯਂ ਨੇਯ੍ਯੋ.
੯. ਸਾਯਂ ਧਮ੍ਮਦੇਸਨਾ ਕਿਂ ਦੇਸਯਤਿ? ਚਤ੍ਤਾਰਿ ਸਚ੍ਚਾਨਿ ਦੁਕ੍ਖਂ ਸਮੁਦਯਂ ਨਿਰੋਧਂ ਮਗ੍ਗਂ. ਆਦੀਨਵੋ ਚ ਫਲਞ੍ਚ ਦੁਕ੍ਖਂ, ਅਸ੍ਸਾਦੋ ਸਮੁਦਯੋ, ਨਿਸ੍ਸਰਣਂ ਨਿਰੋਧੋ, ਉਪਾਯੋ ਆਣਤ੍ਤਿ ਚ ਮਗ੍ਗੋ. ਇਮਾਨਿ ਚਤ੍ਤਾਰਿ ਸਚ੍ਚਾਨਿ. ਇਦਂ ਧਮ੍ਮਚਕ੍ਕਂ.
ਯਥਾਹ ਭਗਵਾ – ‘‘ਇਦਂ ਦੁਕ੍ਖ’’ਨ੍ਤਿ ਮੇ, ਭਿਕ੍ਖਵੇ, ਬਾਰਾਣਸਿਯਂ ਇਸਿਪਤਨੇ ਮਿਗਦਾਯੇ ਅਨੁਤ੍ਤਰਂ ਧਮ੍ਮਚਕ੍ਕਂ ਪਵਤ੍ਤਿਤਂ ਅਪ੍ਪਟਿਵਤ੍ਤਿਯਂ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਕੇਨਚਿ ਵਾ ਲੋਕਸ੍ਮਿਂ, ਸਬ੍ਬਂ ਧਮ੍ਮਚਕ੍ਕਂ.
ਤਤ੍ਥ ਅਪਰਿਮਾਣਾ ਪਦਾ, ਅਪਰਿਮਾਣਾ ਅਕ੍ਖਰਾ, ਅਪਰਿਮਾਣਾ ਬ੍ਯਞ੍ਜਨਾ, ਅਪਰਿਮਾਣਾ ਆਕਾਰਾ ਨੇਰੁਤ੍ਤਾ ਨਿਦ੍ਦੇਸਾ. ਏਤਸ੍ਸੇਵ ਅਤ੍ਥਸ੍ਸ ਸਙ੍ਕਾਸਨਾ ਪਕਾਸਨਾ ਵਿਵਰਣਾ ਵਿਭਜਨਾ ਉਤ੍ਤਾਨੀਕਮ੍ਮਂ [ਉਤ੍ਤਾਨਿਕਮ੍ਮਂ (ਕ.)] ਪਞ੍ਞਤ੍ਤਿ, ਇਤਿਪਿਦਂ ਦੁਕ੍ਖਂ ਅਰਿਯਸਚ੍ਚਂ.
‘‘ਅਯਂ ਦੁਕ੍ਖਸਮੁਦਯੋ’’ਤਿ ਮੇ, ਭਿਕ੍ਖਵੇ, ਬਾਰਾਣਸਿਯਂ ਇਸਿਪਤਨੇ ਮਿਗਦਾਯੇ ਅਨੁਤ੍ਤਰਂ ਧਮ੍ਮਚਕ੍ਕਂ ਪਵਤ੍ਤਿਤਂ…ਪੇ… ‘‘ਅਯਂ ਦੁਕ੍ਖਨਿਰੋਧੋ’’ਤਿ ਮੇ, ਭਿਕ੍ਖਵੇ…ਪੇ… ‘‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’’ਤਿ ਮੇ, ਭਿਕ੍ਖਵੇ, ਬਾਰਾਣਸਿਯਂ ਇਸਿਪਤਨੇ ਮਿਗਦਾਯੇ ਅਨੁਤ੍ਤਰਂ ਧਮ੍ਮਚਕ੍ਕਂ ਪਵਤ੍ਤਿਤਂ ਅਪ੍ਪਟਿਵਤ੍ਤਿਯਂ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਕੇਨਚਿ ਵਾ ਲੋਕਸ੍ਮਿਂ.
ਤਤ੍ਥ ਅਪਰਿਮਾਣਾ ਪਦਾ, ਅਪਰਿਮਾਣਾ ਅਕ੍ਖਰਾ, ਅਪਰਿਮਾਣਾ ਬ੍ਯਞ੍ਜਨਾ, ਅਪਰਿਮਾਣਾ ਆਕਾਰਾ ਨੇਰੁਤ੍ਤਾ ਨਿਦ੍ਦੇਸਾ. ਏਤਸ੍ਸੇਵ ਅਤ੍ਥਸ੍ਸ ਸਙ੍ਕਾਸਨਾ ਪਕਾਸਨਾ ਵਿਵਰਣਾ ਵਿਭਜਨਾ ਉਤ੍ਤਾਨੀਕਮ੍ਮਂ ਪਞ੍ਞਤ੍ਤਿ ਇਤਿਪਿਦਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਅਰਿਯਸਚ੍ਚਂ.
ਤਤ੍ਥ ਭਗਵਾ ਅਕ੍ਖਰੇਹਿ ਸਙ੍ਕਾਸੇਤਿ, ਪਦੇਹਿ ਪਕਾਸੇਤਿ, ਬ੍ਯਞ੍ਜਨੇਹਿ ਵਿਵਰਤਿ, ਆਕਾਰੇਹਿ ਵਿਭਜਤਿ, ਨਿਰੁਤ੍ਤੀਹਿ ਉਤ੍ਤਾਨੀਕਰੋਤਿ [ਉਤ੍ਤਾਨਿਂ ਕਰੋਤਿ (ਕ.)], ਨਿਦ੍ਦੇਸੇਹਿ ਪਞ੍ਞਪੇਤਿ. ਤਤ੍ਥ ਭਗਵਾ ਅਕ੍ਖਰੇਹਿ ਚ ਪਦੇਹਿ ਚ ਉਗ੍ਘਟੇਤਿ [ਉਗ੍ਘਾਟੇਤਿ (ਸੀ.)], ਬ੍ਯਞ੍ਜਨੇਹਿ ਚ ਆਕਾਰੇਹਿ ਚ ਵਿਪਞ੍ਚਯਤਿ, ਨਿਰੁਤ੍ਤੀਹਿ ਚ ਨਿਦ੍ਦੇਸੇਹਿ ਚ ਵਿਤ੍ਥਾਰੇਤਿ. ਤਤ੍ਥ ਉਗ੍ਘਟਨਾ [ਉਗ੍ਘਾਟਨਾ (ਸੀ.)] ਆਦਿ, ਵਿਪਞ੍ਚਨਾ ਮਜ੍ਝੇ, ਵਿਤ੍ਥਾਰਣਾ ਪਰਿਯੋਸਾਨਂ. ਸੋਯਂ ਧਮ੍ਮਵਿਨਯੋ ਉਗ੍ਘਟੀਯਨ੍ਤੋ ਉਗ੍ਘਟਿਤਞ੍ਞੂਪੁਗ੍ਗਲਂ ਵਿਨੇਤਿ, ਤੇਨ ਨਂ ਆਹੁ ‘‘ਆਦਿਕਲ੍ਯਾਣੋ’’ਤਿ. ਵਿਪਞ੍ਚੀਯਨ੍ਤੋ ਵਿਪਞ੍ਚਿਤਞ੍ਞੂਪੁਗ੍ਗਲਂ ਵਿਨੇਤਿ, ਤੇਨ ਨਂ ਆਹੁ ‘‘ਮਜ੍ਝੇਕਲ੍ਯਾਣੋ’’ਤਿ. ਵਿਤ੍ਥਾਰੀਯਨ੍ਤੋ ਨੇਯ੍ਯਂ ਪੁਗ੍ਗਲਂ ਵਿਨੇਤਿ, ਤੇਨ ਨਂ ਆਹੁ ‘‘ਪਰਿਯੋਸਾਨਕਲ੍ਯਾਣੋ’’ਤਿ.
੧੦. ਤਤ੍ਥ ਛਪ੍ਪਦਾਨਿ ਅਤ੍ਥੋ ਸਙ੍ਕਾਸਨਾ ਪਕਾਸਨਾ ਵਿਵਰਣਾ ਵਿਭਜਨਾ ਉਤ੍ਤਾਨੀਕਮ੍ਮਂ ਪਞ੍ਞਤ੍ਤਿ, ਇਮਾਨਿ ਛਪ੍ਪਦਾਨਿ ਅਤ੍ਥੋ. ਛਪ੍ਪਦਾਨਿ ਬ੍ਯਞ੍ਜਨਂ ਅਕ੍ਖਰਂ ਪਦਂ ਬ੍ਯਞ੍ਜਨਂ ਆਕਾਰੋ ਨਿਰੁਤ੍ਤਿ ਨਿਦ੍ਦੇਸੋ, ਇਮਾਨਿ ਛਪ੍ਪਦਾਨਿ ਬ੍ਯਞ੍ਜਨਂ. ਤੇਨਾਹ ਭਗਵਾ ‘‘ਧਮ੍ਮਂ ਵੋ, ਭਿਕ੍ਖਵੇ, ਦੇਸੇਸ੍ਸਾਮਿ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਂ ਸਾਤ੍ਥਂ ਸਬ੍ਯਞ੍ਜਨ’’ਨ੍ਤਿ.
ਕੇਵਲਨ੍ਤਿ ਲੋਕੁਤ੍ਤਰਂ, ਨ ਮਿਸ੍ਸਂ ਲੋਕਿਯੇਹਿ ਧਮ੍ਮੇਹਿ. ਪਰਿਪੁਣ੍ਣਨ੍ਤਿ ਪਰਿਪੂਰਂ ਅਨੂਨਂ ਅਨਤਿਰੇਕਂ. ਪਰਿਸੁਦ੍ਧਨ੍ਤਿ ਨਿਮ੍ਮਲਂ ਸਬ੍ਬਮਲਾਪਗਤਂ ਪਰਿਯੋਦਾਤਂ ਉਪਟ੍ਠਿਤਂ ਸਬ੍ਬਵਿਸੇਸਾਨਂ, ਇਦਂ ਵੁਚ੍ਚਤਿ ਤਥਾਗਤਪਦਂਇਤਿਪਿ ਤਥਾਗਤਨਿਸੇਵਿਤਂਇਤਿਪਿ ਤਥਾਗਤਾਰਞ੍ਜਿਤਂਇਤਿਪਿ, ਅਤੋਚੇਤਂ ਬ੍ਰਹ੍ਮਚਰਿਯਂ ਪਞ੍ਞਾਯਤਿ. ਤੇਨਾਹ ਭਗਵਾ ‘‘ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਪਕਾਸੇਸ੍ਸਾਮੀ’’ਤਿ.
ਕੇਸਂ ਅਯਂ ਧਮ੍ਮਦੇਸਨਾ, ਯੋਗੀਨਂ. ਤੇਨਾਹ ਆਯਸ੍ਮਾ ਮਹਾਕਚ੍ਚਾਯਨੋ –
‘‘ਅਸ੍ਸਾਦਾਦੀਨਵਤਾ, ਨਿਸ੍ਸਰਣਮ੍ਪਿ ਚ ਫਲਂ ਉਪਾਯੋ ਚ;
ਆਣਤ੍ਤੀ ਚ ਭਗਵਤੋ, ਯੋਗੀਨਂ ਦੇਸਨਾਹਾਰੋ’’ਤਿ.
ਨਿਯੁਤ੍ਤੋ ਦੇਸਨਾਹਾਰੋ.