੫. ਅਗਦਙ੍ਗਪਞ੍ਹੋ

੫. ‘‘ਭਨ੍ਤੇ ਨਾਗਸੇਨ, ‘ਅਗਦਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ. ‘‘ਯਥਾ, ਮਹਾਰਾਜ, ਅਗਦੇ ਕਿਮੀ ਨ ਸਣ੍ਠਹਨ੍ਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਮਾਨਸੇ ਕਿਲੇਸਾ ਨ ਸਣ੍ਠਪੇਤਬ੍ਬਾ. ਇਦਂ, ਮਹਾਰਾਜ, ਅਗਦਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਅਗਦੋ ਦਟ੍ਠਫੁਟ੍ਠਦਿਟ੍ਠਅਸਿਤਪੀਤਖਾਯਿਤਸਾਯਿਤਂ ਸਬ੍ਬਂ ਵਿਸਂ ਪਟਿਹਨਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਰਾਗਦੋਸਮੋਹਮਾਨਦਿਟ੍ਠਿਵਿਸਂ ਸਬ੍ਬਂ ਪਟਿਹਨਿਤਬ੍ਬਂ. ਇਦਂ, ਮਹਾਰਾਜ, ਅਗਦਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ –

‘‘‘ਸਙ੍ਖਾਰਾਨਂ ਸਭਾਵਤ੍ਥਂ, ਦਟ੍ਠੁਕਾਮੇਨ ਯੋਗਿਨਾ;

ਅਗਦੇਨੇਵ ਹੋਤਬ੍ਬਂ, ਕਿਲੇਸਵਿਸਨਾਸਨੇ’’’ਤਿ.

ਅਗਦਙ੍ਗਪਞ੍ਹੋ ਪਞ੍ਚਮੋ.