੭. ਕੁਮ੍ਭਵਗ੍ਗੋ

੧. ਕੁਮ੍ਭਙ੍ਗਪਞ੍ਹੋ

੧. ‘‘ਭਨ੍ਤੇ ਨਾਗਸੇਨ, ‘ਕੁਮ੍ਭਸ੍ਸ ਏਕਂ ਅਙ੍ਗਂ ਗਹੇਤਬ੍ਬ’ਨ੍ਤਿ ਯਂ ਵਦੇਸਿ, ਕਤਮਂ ਤਂ ਏਕਂ ਅਙ੍ਗਂ ਗਹੇਤਬ੍ਬ’’ਨ੍ਤਿ? ‘‘ਯਥਾ, ਮਹਾਰਾਜ, ਕੁਮ੍ਭੋ ਸਮ੍ਪੁਣ੍ਣੋ ਨ ਸਣਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਆਗਮੇ ਅਧਿਗਮੇ ਪਰਿਯਤ੍ਤਿਯਂ ਸਾਮਞ੍ਞੇ ਪਾਰਮਿਂ ਪਤ੍ਵਾ ਨ ਸਣਿਤਬ੍ਬਂ, ਨ ਤੇਨ ਮਾਨੋ ਕਰਣੀਯੋ, ਨ ਦਬ੍ਬੋ [ਦਪ੍ਪੋ (ਸੀ.)] ਦਸ੍ਸੇਤਬ੍ਬੋ, ਨਿਹਤਮਾਨੇਨ ਨਿਹਤਦਬ੍ਬੇਨ ਭਵਿਤਬ੍ਬਂ, ਉਜੁਕੇਨ ਅਮੁਖਰੇਨ ਅਵਿਕਤ੍ਥਿਨਾ. ਇਦਂ, ਮਹਾਰਾਜ, ਕੁਮ੍ਭਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ਸੁਤ੍ਤਨਿਪਾਤੇ –

‘‘‘ਯਦੂਨਕਂ ਤਂ ਸਣਤਿ, ਯਂ ਪੂਰਂ ਸਨ੍ਤਮੇਵ ਤਂ;

ਅਡ੍ਢਕੁਮ੍ਭੂਪਮੋ [ਰਿਤ੍ਤਕੁਮ੍ਭੂਪਮੋ (ਸੀ.)] ਬਾਲੋ, ਰਹਦੋ ਪੂਰੋਵ ਪਣ੍ਡਿਤੋ’’’ਤਿ.

ਕੁਮ੍ਭਙ੍ਗਪਞ੍ਹੋ ਪਠਮੋ.

੨. ਕਾਲ਼ਾਯਸਙ੍ਗਪਞ੍ਹੋ

੨. ‘‘ਭਨ੍ਤੇ ਨਾਗਸੇਨ, ‘ਕਾਲ਼ਾਯਸਸ੍ਸ [ਕਾਲ਼ਹਂਸਸ੍ਸ (ਕ.)] ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਕਾਲ਼ਾਯਸੋ ਸੁਪੀਤੋ [ਸੁਥਿਤੋ (ਕ.)] ਵਮਤਿ [ਵਹਤਿ (ਸ੍ਯਾ. ਕ.)], ਏਵਮੇਵ ਖੋ, ਮਹਾਰਾਜ, ਯੋਗਿਨੋ ਯੋਗਾਵਚਰਸ੍ਸ ਮਾਨਸਂ ਯੋਨਿਸੋ ਮਨਸਿਕਾਰੇਨ [ਯੋਨਿਸੋ ਮਨਸਿਕਾਰੇ (ਸੀ. ਸ੍ਯਾ. ਕ.)] ਅਪੀਤਂ ਵਮਤਿ. ਇਦਂ, ਮਹਾਰਾਜ, ਕਾਲ਼ਾਯਸਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਕਾਲ਼ਾਯਸੋ ਸਕਿਂ ਪੀਤਂ ਉਦਕਂ ਨ ਵਮਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਯੋ ਸਕਿਂ ਉਪ੍ਪਨ੍ਨੋ ਪਸਾਦੋ, ਨ ਪੁਨ ਸੋ ਵਮਿਤਬ੍ਬੋ ‘ਉਲ਼ਾਰੋ ਸੋ ਭਗਵਾ ਸਮ੍ਮਾਸਮ੍ਬੁਦ੍ਧੋ, ਸ੍ਵਾਕ੍ਖਾਤੋ ਧਮ੍ਮੋ, ਸੁਪ੍ਪਟਿਪਨ੍ਨੋ ਸਙ੍ਘੋ’ਤਿ. ‘ਰੂਪਂ ਅਨਿਚ੍ਚਂ, ਵੇਦਨਾ ਅਨਿਚ੍ਚਾ, ਸਞ੍ਞਾ ਅਨਿਚ੍ਚਾ, ਸਙ੍ਖਾਰਾ ਅਨਿਚ੍ਚਾ, ਵਿਞ੍ਞਾਣਂ ਅਨਿਚ੍ਚਨ੍ਤਿ ਯਂ ਸਕਿਂ ਉਪ੍ਪਨ੍ਨਂ ਞਾਣਂ, ਨ ਪੁਨ ਤਂ ਵਮਿਤਬ੍ਬਂ. ਇਦਂ, ਮਹਾਰਾਜ, ਕਾਲ਼ਾਯਸਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ –

‘‘‘ਦਸ੍ਸਨਮ੍ਹਿ ਪਰਿਸੋਧਿਤੋ [ਪਰਿਸੋਧਿਕੇ (ਸੀ. ਕ.)] ਨਰੋ, ਅਰਿਯਧਮ੍ਮੇ ਨਿਯਤੋ ਵਿਸੇਸਗੂ;

ਨਪ੍ਪਵੇਧਤਿ ਅਨੇਕਭਾਗਸੋ, ਸਬ੍ਬਸੋ ਚ ਮੁਖਭਾਵਮੇਵ ਸੋ’’’ਤਿ.

ਕਾਲ਼ਾਯਸਙ੍ਗਪਞ੍ਹੋ ਦੁਤਿਯੋ.

੩. ਛਤ੍ਤਙ੍ਗਪਞ੍ਹੋ

੩. ‘‘ਭਨ੍ਤੇ ਨਾਗਸੇਨ, ‘ਛਤ੍ਤਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਛਤ੍ਤਂ ਉਪਰਿ ਮੁਦ੍ਧਨਿ ਚਰਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਕਿਲੇਸਾਨਂ ਉਪਰਿ ਮੁਦ੍ਧਨਿ ਚਰੇਨ ਭਵਿਤਬ੍ਬਂ. ਇਦਂ, ਮਹਾਰਾਜ, ਛਤ੍ਤਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਛਤ੍ਤਂ ਮੁਦ੍ਧਨੁਪਤ੍ਥਮ੍ਭਂ ਹੋਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਯੋਨਿਸੋ ਮਨਸਿਕਾਰੁਪਤ੍ਥਮ੍ਭੇਨ ਭਵਿਤਬ੍ਬਂ. ਇਦਂ, ਮਹਾਰਾਜ, ਛਤ੍ਤਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਛਤ੍ਤਂ ਵਾਤਾਤਪਮੇਘਵੁਟ੍ਠਿਯੋ ਪਟਿਹਨਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਨਾਨਾਵਿਧਦਿਟ੍ਠਿਪੁਥੁਸਮਣਬ੍ਰਾਹ੍ਮਣਾਨਂ [ਮਹਾਵਾਤ (ਕ.)] ਮਤਵਾਤਤਿਵਿਧਗ੍ਗਿਸਨ੍ਤਾਪਕਿਲੇਸਵੁਟ੍ਠਿਯੋ ਪਟਿਹਨ੍ਤਬ੍ਬਾ. ਇਦਂ, ਮਹਾਰਾਜ, ਛਤ੍ਤਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਸਾਰਿਪੁਤ੍ਤੇਨ ਧਮ੍ਮਸੇਨਾਪਤਿਨਾ –

‘‘‘ਯਥਾਪਿ ਛਤ੍ਤਂ ਵਿਪੁਲਂ, ਅਚ੍ਛਿਦ੍ਦਂ ਥਿਰਸਂਹਿਤਂ;

ਵਾਤਾਤਪਂ ਨਿਵਾਰੇਤਿ, ਮਹਤੀ ਮੇਘਵੁਟ੍ਠਿਯੋ.

‘‘‘ਤਥੇਵ ਬੁਦ੍ਧਪੁਤ੍ਤੋਪਿ, ਸੀਲਛਤ੍ਤਧਰੋ ਸੁਚਿ;

ਕਿਲੇਸਵੁਟ੍ਠਿਂ ਵਾਰੇਤਿ, ਸਨ੍ਤਾਪਤਿਵਿਧਗ੍ਗਯੋ’’’ਤਿ.

ਛਤ੍ਤਙ੍ਗਪਞ੍ਹੋ ਤਤਿਯੋ.

੪. ਖੇਤ੍ਤਙ੍ਗਪਞ੍ਹੋ

੪. ‘‘ਭਨ੍ਤੇ ਨਾਗਸੇਨ, ‘ਖੇਤ੍ਤਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਖੇਤ੍ਤਂ ਮਾਤਿਕਾਸਮ੍ਪਨ੍ਨਂ ਹੋਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਸੁਚਰਿਤਵਤ੍ਤਪ੍ਪਟਿਵਤ੍ਤਮਾਤਿਕਾਸਮ੍ਪਨ੍ਨੇਨ ਭਵਿਤਬ੍ਬਂ. ਇਦਂ, ਮਹਾਰਾਜ, ਖੇਤ੍ਤਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਖੇਤ੍ਤਂ ਮਰਿਯਾਦਾਸਮ੍ਪਨ੍ਨਂ ਹੋਤਿ, ਤਾਯ ਚ ਮਰਿਯਾਦਾਯ ਉਦਕਂ ਰਕ੍ਖਿਤ੍ਵਾ ਧਞ੍ਞਂ ਪਰਿਪਾਚੇਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਸੀਲਹਿਰਿਮਰਿਯਾਦਾਸਮ੍ਪਨ੍ਨੇਨ ਭਵਿਤਬ੍ਬਂ, ਤਾਯ ਚ ਸੀਲਹਿਰਿਮਰਿਯਾਦਾਯ ਸਾਮਞ੍ਞਂ ਰਕ੍ਖਿਤ੍ਵਾ ਚਤ੍ਤਾਰਿ ਸਾਮਞ੍ਞਫਲਾਨਿ ਗਹੇਤਬ੍ਬਾਨਿ. ਇਦਂ, ਮਹਾਰਾਜ, ਖੇਤ੍ਤਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਖੇਤ੍ਤਂ ਉਟ੍ਠਾਨਸਮ੍ਪਨ੍ਨਂ ਹੋਤਿ, ਕਸ੍ਸਕਸ੍ਸ ਹਾਸਜਨਕਂ ਅਪ੍ਪਮ੍ਪਿ ਬੀਜਂ ਵੁਤ੍ਤਂ ਬਹੁ ਹੋਤਿ, ਬਹੁ ਵੁਤ੍ਤਂ ਬਹੁਤਰਂ ਹੋਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਉਟ੍ਠਾਨਸਮ੍ਪਨ੍ਨੇਨ ਵਿਪੁਲਫਲਦਾਯਿਨਾ ਭਵਿਤਬ੍ਬਂ, ਦਾਯਕਾਨਂ ਹਾਸਜਨਕੇਨ ਭਵਿਤਬ੍ਬਂ, ਯਥਾ ਅਪ੍ਪਂ ਦਿਨ੍ਨਂ ਬਹੁ ਹੋਤਿ, ਬਹੁ ਦਿਨ੍ਨਂ ਬਹੁਤਰਂ ਹੋਤਿ. ਇਦਂ, ਮਹਾਰਾਜ, ਖੇਤ੍ਤਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਉਪਾਲਿਨਾ ਵਿਨਯਧਰੇਨ –

‘‘‘ਖੇਤ੍ਤੂਪਮੇਨ ਭਵਿਤਬ੍ਬਂ, ਉਟ੍ਠਾਨਵਿਪੁਲਦਾਯਿਨਾ;

ਏਸ ਖੇਤ੍ਤਵਰੋ ਨਾਮ, ਯੋ ਦਦਾਤਿ ਵਿਪੁਲਂ ਫਲ’’’ਨ੍ਤਿ.

ਖੇਤ੍ਤਙ੍ਗਪਞ੍ਹੋ ਚਤੁਤ੍ਥੋ.

੫. ਅਗਦਙ੍ਗਪਞ੍ਹੋ

੫. ‘‘ਭਨ੍ਤੇ ਨਾਗਸੇਨ, ‘ਅਗਦਸ੍ਸ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਦ੍ਵੇ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ. ‘‘ਯਥਾ, ਮਹਾਰਾਜ, ਅਗਦੇ ਕਿਮੀ ਨ ਸਣ੍ਠਹਨ੍ਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਮਾਨਸੇ ਕਿਲੇਸਾ ਨ ਸਣ੍ਠਪੇਤਬ੍ਬਾ. ਇਦਂ, ਮਹਾਰਾਜ, ਅਗਦਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਅਗਦੋ ਦਟ੍ਠਫੁਟ੍ਠਦਿਟ੍ਠਅਸਿਤਪੀਤਖਾਯਿਤਸਾਯਿਤਂ ਸਬ੍ਬਂ ਵਿਸਂ ਪਟਿਹਨਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਰਾਗਦੋਸਮੋਹਮਾਨਦਿਟ੍ਠਿਵਿਸਂ ਸਬ੍ਬਂ ਪਟਿਹਨਿਤਬ੍ਬਂ. ਇਦਂ, ਮਹਾਰਾਜ, ਅਗਦਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ –

‘‘‘ਸਙ੍ਖਾਰਾਨਂ ਸਭਾਵਤ੍ਥਂ, ਦਟ੍ਠੁਕਾਮੇਨ ਯੋਗਿਨਾ;

ਅਗਦੇਨੇਵ ਹੋਤਬ੍ਬਂ, ਕਿਲੇਸਵਿਸਨਾਸਨੇ’’’ਤਿ.

ਅਗਦਙ੍ਗਪਞ੍ਹੋ ਪਞ੍ਚਮੋ.

੬. ਭੋਜਨਙ੍ਗਪਞ੍ਹੋ

੬. ‘‘ਭਨ੍ਤੇ ਨਾਗਸੇਨ, ‘ਭੋਜਨਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਭੋਜਨਂ ਸਬ੍ਬਸਤ੍ਤਾਨਂ ਉਪਤ੍ਥਮ੍ਭੋ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਸਬ੍ਬਸਤ੍ਤਾਨਂ ਮਗ੍ਗੁਪਤ੍ਥਮ੍ਭੇਨ ਭਵਿਤਬ੍ਬਂ. ਇਦਂ, ਮਹਾਰਾਜ, ਭੋਜਨਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਭੋਜਨਂ ਸਬ੍ਬਸਤ੍ਤਾਨਂ ਬਲਂ ਵਡ੍ਢੇਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਪੁਞ੍ਞਵਡ੍ਢਿਯਾ ਵਡ੍ਢਿਤਬ੍ਬਂ. ਇਦਂ, ਮਹਾਰਾਜ, ਭੋਜਨਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਭੋਜਨਂ ਸਬ੍ਬਸਤ੍ਤਾਨਂ ਅਭਿਪਤ੍ਥਿਤਂ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਸਬ੍ਬਲੋਕਾਭਿਪਤ੍ਥਿਤੇਨ ਭਵਿਤਬ੍ਬਂ. ਇਦਂ, ਮਹਾਰਾਜ, ਭੋਜਨਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਮਹਾਮੋਗ੍ਗਲ੍ਲਾਨੇਨ –

‘‘‘ਸਂਯਮੇਨ ਨਿਯਮੇਨ, ਸੀਲੇਨ ਪਟਿਪਤ੍ਤਿਯਾ;

ਪਤ੍ਥਿਤੇਨ ਭਵਿਤਬ੍ਬਂ, ਸਬ੍ਬਲੋਕਸ੍ਸ ਯੋਗਿਨਾ’’’ਤਿ.

ਭੋਜਨਙ੍ਗਪਞ੍ਹੋ ਛਟ੍ਠੋ.

੭. ਇਸ੍ਸਾਸਙ੍ਗਪਞ੍ਹੋ

੭. ‘‘ਭਨ੍ਤੇ ਨਾਗਸੇਨ, ‘ਇਸ੍ਸਾਸਸ੍ਸ ਚਤ੍ਤਾਰਿ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ ਵਦੇਸਿ, ਕਤਮਾਨਿ ਤਾਨਿ ਚਤ੍ਤਾਰਿ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਇਸ੍ਸਾਸੋ ਸਰੇ ਪਾਤਯਨ੍ਤੋ ਉਭੋ ਪਾਦੇ ਪਥਵਿਯਂ ਦਲ਼੍ਹਂ ਪਤਿਟ੍ਠਾਪੇਤਿ, ਜਣ੍ਣੁਅਵੇਕਲ੍ਲਂ ਕਰੋਤਿ, ਸਰਕਲਾਪਂ ਕਟਿਸਨ੍ਧਿਮ੍ਹਿ ਠਪੇਤਿ, ਕਾਯਂ ਉਪਤ੍ਥਦ੍ਧਂ ਕਰੋਤਿ, ਦ੍ਵੇ ਹਤ੍ਥੇ ਸਨ੍ਧਿਟ੍ਠਾਨਂ ਆਰੋਪੇਤਿ, ਮੁਟ੍ਠਿਂ ਪੀਲ਼ਯਤਿ, ਅਙ੍ਗੁਲਿਯੋ ਨਿਰਨ੍ਤਰਂ ਕਰੋਤਿ, ਗੀਵਂ ਪਗ੍ਗਣ੍ਹਾਤਿ, ਚਕ੍ਖੂਨਿ ਮੁਖਞ੍ਚ ਪਿਦਹਤਿ, ਨਿਮਿਤ੍ਤਂ ਉਜੁਂ ਕਰੋਤਿ, ਹਾਸਮੁਪ੍ਪਾਦੇਤਿ ‘ਵਿਜ੍ਝਿਸ੍ਸਾਮੀ’ਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਸੀਲਪਥਵਿਯਂ ਵੀਰਿਯਪਾਦੇ ਪਤਿਟ੍ਠਾਪੇਤਬ੍ਬਂ, ਖਨ੍ਤਿਸੋਰਚ੍ਚਂ ਅਵੇਕਲ੍ਲਂ ਕਾਤਬ੍ਬਂ, ਸਂਵਰੇ ਚਿਤ੍ਤਂ ਠਪੇਤਬ੍ਬਂ, ਸਂਯਮਨਿਯਮੇ ਅਤ੍ਤਾ ਉਪਨੇਤਬ੍ਬੋ, ਇਚ੍ਛਾ ਮੁਚ੍ਛਾ ਪੀਲ਼ਯਿਤਬ੍ਬਾ, ਯੋਨਿਸੋ ਮਨਸਿਕਾਰੇ ਚਿਤ੍ਤਂ ਨਿਰਨ੍ਤਰਂ ਕਾਤਬ੍ਬਂ, ਵੀਰਿਯਂ ਪਗ੍ਗਹੇਤਬ੍ਬਂ, ਛ ਦ੍ਵਾਰਾ ਪਿਦਹਿਤਬ੍ਬਾ, ਸਤਿ ਉਪਟ੍ਠਪੇਤਬ੍ਬਾ, ਹਾਸਮੁਪ੍ਪਾਦੇਤਬ੍ਬਂ ‘ਸਬ੍ਬਕਿਲੇਸੇ ਞਾਣਨਾਰਾਚੇਨ ਵਿਜ੍ਝਿਸ੍ਸਾਮੀ’ਤਿ. ਇਦਂ, ਮਹਾਰਾਜ, ਇਸ੍ਸਾਸਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਇਸ੍ਸਾਸੋ ਆਲ਼ਕਂ ਪਰਿਹਰਤਿ ਵਙ੍ਕਜਿਮ੍ਹਕੁਟਿਲਨਾਰਾਚਸ੍ਸ ਉਜੁਕਰਣਾਯ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਇਮਸ੍ਮਿਂ ਕਾਯੇ ਸਤਿਪਟ੍ਠਾਨਆਲ਼ਕਂ ਪਰਿਹਰਿਤਬ੍ਬਂ ਵਙ੍ਕਜਿਮ੍ਹਕੁਟਿਲਚਿਤ੍ਤਸ੍ਸ ਉਜੁਕਰਣਾਯ. ਇਦਂ, ਮਹਾਰਾਜ, ਇਸ੍ਸਾਸਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਇਸ੍ਸਾਸੋ ਲਕ੍ਖੇ ਉਪਾਸੇਤਿ, ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਇਮਸ੍ਮਿਂ ਕਾਯੇ ਉਪਾਸਿਤਬ੍ਬਂ. ਕਥਂ ਮਹਾਰਾਜ ਯੋਗਿਨਾ ਯੋਗਾਵਚਰੇਨ ਇਮਸ੍ਮਿਂ ਕਾਯੇ ਉਪਾਸਿਤਬ੍ਬਂ? ਅਨਿਚ੍ਚਤੋ ਉਪਾਸਿਤਬ੍ਬਂ, ਦੁਕ੍ਖਤੋ ਉਪਾਸਿਤਬ੍ਬਂ, ਅਨਤ੍ਤਤੋ ਉਪਾਸਿਤਬ੍ਬਂ, ਰੋਗਤੋ…ਪੇ… ਗਣ੍ਡਤੋ…ਪੇ… ਸਲ੍ਲਤੋ…ਪੇ… ਅਘਤੋ…ਪੇ… ਆਬਾਧਤੋ…ਪੇ… ਪਰਤੋ…ਪੇ… ਪਲੋਕਤੋ…ਪੇ… ਈਤਿਤੋ…ਪੇ… ਉਪਦ੍ਦਵਤੋ…ਪੇ… ਭਯਤੋ…ਪੇ… ਉਪਸਗ੍ਗਤੋ…ਪੇ… ਚਲਤੋ…ਪੇ… ਪਭਙ੍ਗੁਤੋ…ਪੇ… ਅਦ੍ਧੁਵਤੋ…ਪੇ… ਅਤਾਣਤੋ…ਪੇ… ਅਲੇਣਤੋ…ਪੇ… ਅਸਰਣਤੋ…ਪੇ… ਰਿਤ੍ਤਤੋ…ਪੇ… ਤੁਚ੍ਛਤੋ…ਪੇ… ਸੁਞ੍ਞਤੋ…ਪੇ… ਆਦੀਨਵਤੋ…ਪੇ… ਵਿਪਰਿਣਾਮਧਮ੍ਮਤੋ…ਪੇ… ਅਸਾਰਤੋ …ਪੇ… ਅਘਮੂਲਤੋ…ਪੇ… ਵਧਕਤੋ…ਪੇ… ਵਿਭਵਤੋ…ਪੇ… ਸਾਸਵਤੋ…ਪੇ… ਸਙ੍ਖਤਤੋ…ਪੇ… ਮਾਰਾਮਿਸਤੋ…ਪੇ… ਜਾਤਿਧਮ੍ਮਤੋ…ਪੇ… ਜਰਾਧਮ੍ਮਤੋ…ਪੇ… ਬ੍ਯਾਧਿਧਮ੍ਮਤੋ…ਪੇ… ਮਰਣਧਮ੍ਮਤੋ…ਪੇ… ਸੋਕਧਮ੍ਮਤੋ…ਪੇ… ਪਰਿਦੇਵਧਮ੍ਮਤੋ…ਪੇ… ਉਪਾਯਾਸਧਮ੍ਮਤੋ…ਪੇ… ਸਂਕਿਲੇਸਧਮ੍ਮਤੋ…ਪੇ… ਏਵਂ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਇਮਸ੍ਮਿਂ ਕਾਯੇ ਉਪਾਸਿਤਬ੍ਬਂ. ਇਦਂ, ਮਹਾਰਾਜ, ਇਸ੍ਸਾਸਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ.

‘‘ਪੁਨ ਚਪਰਂ, ਮਹਾਰਾਜ, ਇਸ੍ਸਾਸੋ ਸਾਯਂ ਪਾਤਂ ਉਪਾਸਤਿ. ਏਵਮੇਵ ਖੋ, ਮਹਾਰਾਜ, ਯੋਗਿਨਾ ਯੋਗਾਵਚਰੇਨ ਸਾਯਂ ਪਾਤਂ ਆਰਮ੍ਮਣੇ ਉਪਾਸਿਤਬ੍ਬਂ. ਇਦਂ, ਮਹਾਰਾਜ, ਇਸ੍ਸਾਸਸ੍ਸ ਚਤੁਤ੍ਥਂ ਅਙ੍ਗਂ ਗਹੇਤਬ੍ਬਂ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਸਾਰਿਪੁਤ੍ਤੇਨ ਧਮ੍ਮਸੇਨਾਪਤਿਨਾ –

‘‘‘ਯਥਾ ਇਸ੍ਸਾਸਕੋ ਨਾਮ, ਸਾਯਂ ਪਾਤਂ ਉਪਾਸਤਿ;

ਉਪਾਸਨਂ ਅਰਿਞ੍ਚਨ੍ਤੋ [ਨ ਰਿਚ੍ਛਨ੍ਤੋ (ਸੀ. ਕ.)], ਲਭਤੇ ਭਤ੍ਤਵੇਤਨਂ.

‘‘‘ਤਥੇਵ ਬੁਦ੍ਧਪੁਤ੍ਤੋਪਿ, ਕਰੋਤਿ ਕਾਯੁਪਾਸਨਂ;

ਕਾਯੁਪਾਸਨਂ ਅਰਿਞ੍ਚਨ੍ਤੋ, ਅਰਹਤ੍ਤਮਧਿਗਚ੍ਛਤੀ’’’ਤਿ.

ਇਸ੍ਸਾਸਙ੍ਗਪਞ੍ਹੋ ਸਤ੍ਤਮੋ.

ਕੁਮ੍ਭਵਗ੍ਗੋ ਸਤ੍ਤਮੋ [ਇਤੋ ਪਰਂ ਰਾਜਙ੍ਗਪਞ੍ਹਾਦਿਕਾ ਅਟ੍ਠਤਿਂਸ ਪਞ੍ਹਾ ਵਿਨਟ੍ਠਾ, ਯੇਹਿ ਤਾ ਦਿਟ੍ਠਾ,§ਤੇਹਿ ਨੋ ਆਰੋਚੇਤਬ੍ਬਾ ਪੁਨ ਮੁਦ੍ਦਾਪਨਕਾਲੇ ਪਕ੍ਖਿਪਨਤ੍ਥਾਯਾਤਿ (ਨ, ਬੁ, ਸ)].

ਤਸ੍ਸੁਦ੍ਦਾਨਂ –

ਕੁਮ੍ਭੋ ਚ ਕਾਲ਼ਾਯਸੋ ਚ, ਛਤ੍ਤਂ ਖੇਤ੍ਤਞ੍ਚ ਅਗਦੋ;

ਭੋਜਨੇਨ ਚ ਇਸ੍ਸਾਸੋ, ਵੁਤ੍ਤਂ ਦਾਨਿ ਵਿਦੂਹੀਤਿ.

ਓਪਮ੍ਮਕਥਾਪਞ੍ਹੋ ਨਿਟ੍ਠਿਤੋ.