੧੦. ਨਿਬ੍ਬਾਨਰੂਪਸਣ੍ਠਾਨਪਞ੍ਹੋ

੧੦. ‘‘ਭਨ੍ਤੇ ਨਾਗਸੇਨ, ‘ਨਿਬ੍ਬਾਨਂ ਨਿਬ੍ਬਾਨ’ਨ੍ਤਿ ਯਂ ਵਦੇਸਿ, ਸਕ੍ਕਾ ਪਨ ਤਸ੍ਸ ਨਿਬ੍ਬਾਨਸ੍ਸ ਰੂਪਂ ਵਾ ਸਣ੍ਠਾਨਂ ਵਾ ਵਯਂ ਵਾ ਪਮਾਣਂ ਵਾ ਓਪਮ੍ਮੇਨ ਵਾ ਕਾਰਣੇਨ ਵਾ ਹੇਤੁਨਾ ਵਾ ਨਯੇਨ ਵਾ ਉਪਦਸ੍ਸਯਿਤੁ’’ਨ੍ਤਿ? ‘‘ਅਪ੍ਪਟਿਭਾਗਂ, ਮਹਾਰਾਜ, ਨਿਬ੍ਬਾਨਂ, ਨ ਸਕ੍ਕਾ ਨਿਬ੍ਬਾਨਸ੍ਸ ਰੂਪਂ ਵਾ ਸਣ੍ਠਾਨਂ ਵਾ ਵਯਂ ਵਾ ਪਮਾਣਂ ਵਾ ਓਪਮ੍ਮੇਨ ਵਾ ਕਾਰਣੇਨ ਵਾ ਹੇਤੁਨਾ ਵਾ ਨਯੇਨ ਵਾ ਉਪਦਸ੍ਸਯਿਤੁ’’ਨ੍ਤਿ. ‘‘ਏਤਮ੍ਪਾਹਂ, ਭਨ੍ਤੇ ਨਾਗਸੇਨ, ਨ ਸਮ੍ਪਟਿਚ੍ਛਾਮਿ, ਯਂ ਅਤ੍ਥਿਧਮ੍ਮਸ੍ਸ ਨਿਬ੍ਬਾਨਸ੍ਸ ਰੂਪਂ ਵਾ ਸਣ੍ਠਾਨਂ ਵਾ ਵਯਂ ਵਾ ਪਮਾਣਂ ਵਾ ਓਪਮ੍ਮੇਨ ਵਾ ਕਾਰਣੇਨ ਵਾ ਹੇਤੁਨਾ ਵਾ ਨਯੇਨ ਵਾ ਅਪਞ੍ਞਾਪਨਂ, ਕਾਰਣੇਨ ਮਂ ਸਞ੍ਞਾਪੇਹੀ’’ਤਿ. ‘‘ਹੋਤੁ, ਮਹਾਰਾਜ, ਕਾਰਣੇਨ ਤਂ ਸਞ੍ਞਾਪੇਸ੍ਸਾਮਿ. ਅਤ੍ਥਿ, ਮਹਾਰਾਜ, ਮਹਾਸਮੁਦ੍ਦੋ ਨਾਮਾ’’ਤਿ? ‘‘ਆਮ, ਭਨ੍ਤੇ, ਅਤ੍ਥੇਸੋ ਮਹਾਸਮੁਦ੍ਦੋ’’ਤਿ. ‘‘ਸਚੇ ਤਂ, ਮਹਾਰਾਜ, ਕੋਚਿ ਏਵਂ ਪੁਚ੍ਛੇਯ੍ਯ ‘ਕਿਤ੍ਤਕਂ, ਮਹਾਰਾਜ, ਮਹਾਸਮੁਦ੍ਦੇ ਉਦਕਂ, ਕਤਿ ਪਨ ਤੇ ਸਤ੍ਤਾ, ਯੇ ਮਹਾਸਮੁਦ੍ਦੇ ਪਟਿਵਸਨ੍ਤੀ’ਤਿ, ਏਵਂ ਪੁਟ੍ਠੋ ਤ੍ਵਂ, ਮਹਾਰਾਜ, ਕਿਨ੍ਤਿ ਤਸ੍ਸ ਬ੍ਯਾਕਰੇਯ੍ਯਾਸੀ’’ਤਿ? ‘‘ਸਚੇ ਮਂ, ਭਨ੍ਤੇ, ਕੋਚਿ ਏਵਂ ਪੁਚ੍ਛੇਯ੍ਯ ‘ਕਿਤ੍ਤਕਂ, ਮਹਾਰਾਜ, ਮਹਾਸਮੁਦ੍ਦੇ ਉਦਕਂ, ਕਤਿ ਪਨ ਤੇ ਸਤ੍ਤਾ, ਯੇ ਮਹਾਸਮੁਦ੍ਦੇ ਪਟਿਵਸਨ੍ਤੀ’ਤਿ, ਤਮਹਂ, ਭਨ੍ਤੇ, ਏਵਂ ਵਦੇਯ੍ਯਂ ‘ਅਪੁਚ੍ਛਿਤਬ੍ਬਂ ਮਂ ਤ੍ਵਂ ਅਮ੍ਭੋ ਪੁਰਿਸ ਪੁਚ੍ਛਸਿ, ਨੇਸਾ ਪੁਚ੍ਛਾ ਕੇਨਚਿ ਪੁਚ੍ਛਿਤਬ੍ਬਾ, ਠਪਨੀਯੋ ਏਸੋ ਪਞ੍ਹੋ. ਅਵਿਭਤ੍ਤੋ ਲੋਕਕ੍ਖਾਯਿਕੇਹਿ ਮਹਾਸਮੁਦ੍ਦੋ, ਨ ਸਕ੍ਕਾ ਮਹਾਸਮੁਦ੍ਦੇ ਉਦਕਂ ਪਰਿਮਿਨਿਤੁਂ ਸਤ੍ਤਾ ਵਾ ਯੇ ਤਤ੍ਥ ਵਾਸਮੁਪਗਤਾਤਿ ਏਵਾਹਂ ਭਨ੍ਤੇ ਤਸ੍ਸ ਪਟਿਵਚਨਂ ਦਦੇਯ੍ਯ’’’ਨ੍ਤਿ.

‘‘ਕਿਸ੍ਸ ਪਨ, ਤ੍ਵਂ ਮਹਾਰਾਜ, ਅਤ੍ਥਿਧਮ੍ਮੇ ਮਹਾਸਮੁਦ੍ਦੇ ਏਵਂ ਪਟਿਵਚਨਂ ਦਦੇਯ੍ਯਾਸਿ, ਨਨੁ ਵਿਗਣੇਤ੍ਵਾ [ਮਿਨਿਤ੍ਵਾ (ਕ.)] ਤਸ੍ਸ ਆਚਿਕ੍ਖਿਤਬ੍ਬਂ ‘ਏਤ੍ਤਕਂ ਮਹਾਸਮੁਦ੍ਦੇ ਉਦਕਂ, ਏਤ੍ਤਕਾ ਚ ਸਤ੍ਤਾ ਮਹਾਸਮੁਦ੍ਦੇ ਪਟਿਵਸਨ੍ਤੀ’’ਤਿ? ‘‘ਨ ਸਕ੍ਕਾ, ਭਨ੍ਤੇ, ਅਵਿਸਯੋ ਏਸੋ ਪਞ੍ਹੋ’’ਤਿ.

‘‘ਯਥਾ, ਮਹਾਰਾਜ, ਅਤ੍ਥਿਧਮ੍ਮੇ ਯੇਵ ਮਹਾਸਮੁਦ੍ਦੇ ਨ ਸਕ੍ਕਾ ਉਦਕਂ ਪਰਿਗਣੇਤੁਂ [ਪਰਿਮਿਨਿਤੁਂ (ਕ.)] ਸਤ੍ਤਾ ਵਾ ਯੇ ਤਤ੍ਥ ਵਾਸਮੁਪਗਤਾ, ਏਵਮੇਵ ਖੋ, ਮਹਾਰਾਜ, ਅਤ੍ਥਿਧਮ੍ਮਸ੍ਸੇਵ ਨਿਬ੍ਬਾਨਸ੍ਸ ਨ ਸਕ੍ਕਾ ਰੂਪਂ ਵਾ ਸਣ੍ਠਾਨਂ ਵਾ ਵਯਂ ਵਾ ਪਮਾਣਂ ਵਾ ਓਪਮ੍ਮੇਨ ਵਾ ਕਾਰਣੇਨ ਵਾ ਹੇਤੁਨਾ ਵਾ ਨਯੇਨ ਵਾ ਉਪਦਸ੍ਸਯਿਤੁਂ, ਵਿਗਣੇਯ੍ਯ, ਮਹਾਰਾਜ, ਇਦ੍ਧਿਮਾ ਚੇਤੋਵਸਿਪ੍ਪਤ੍ਤੋ ਮਹਾਸਮੁਦ੍ਦੇ ਉਦਕਂ ਤਤ੍ਰਾਸਯੇ ਚ ਸਤ੍ਤੇ, ਨ ਤ੍ਵੇਵ ਸੋ ਇਦ੍ਧਿਮਾ ਚੇਤੋਵਸਿਪ੍ਪਤ੍ਤੋ ਸਕ੍ਕੁਣੇਯ੍ਯ ਨਿਬ੍ਬਾਨਸ੍ਸ ਰੂਪਂ ਵਾ ਸਣ੍ਠਾਨਂ ਵਾ ਵਯਂ ਵਾ ਪਮਾਣਂ ਵਾ ਓਪਮ੍ਮੇਨ ਵਾ ਕਾਰਣੇਨ ਵਾ ਹੇਤੁਨਾ ਵਾ ਨਯੇਨ ਵਾ ਉਪਦਸ੍ਸਯਿਤੁਂ.

‘‘ਅਪਰਮ੍ਪਿ, ਮਹਾਰਾਜ, ਉਤ੍ਤਰਿਂ ਕਾਰਣਂ ਸੁਣੋਹਿ, ਅਤ੍ਥਿਧਮ੍ਮਸ੍ਸੇਵ ਨਿਬ੍ਬਾਨਸ੍ਸ ਨ ਸਕ੍ਕਾ ਰੂਪਂ ਵਾ ਸਣ੍ਠਾਨਂ ਵਾ ਵਯਂ ਵਾ ਪਮਾਣਂ ਵਾ ਓਪਮ੍ਮੇਨ ਵਾ ਕਾਰਣੇਨ ਵਾ ਹੇਤੁਨਾ ਵਾ ਨਯੇਨ ਵਾ ਉਪਦਸ੍ਸਯਿਤੁਨ੍ਤਿ. ਅਤ੍ਥਿ, ਮਹਾਰਾਜ, ਦੇਵੇਸੁ ਅਰੂਪਕਾਯਿਕਾ ਨਾਮ ਦੇਵਾ’’ਤਿ. ‘‘ਆਮ, ਭਨ੍ਤੇ, ਸੁਯ੍ਯਤਿ ‘ਅਤ੍ਥਿ ਦੇਵੇਸੁ ਅਰੂਪਕਾਯਿਕਾ ਨਾਮ ਦੇਵਾ’’’ਤਿ. ‘‘ਸਕ੍ਕਾ ਪਨ, ਮਹਾਰਾਜ, ਤੇਸਂ ਅਰੂਪਕਾਯਿਕਾਨਂ ਦੇਵਾਨਂ ਰੂਪਂ ਵਾ ਸਣ੍ਠਾਨਂ ਵਾ ਵਯਂ ਵਾ ਪਮਾਣਂ ਵਾ ਓਪਮ੍ਮੇਨ ਵਾ ਕਾਰਣੇਨ ਵਾ ਹੇਤੁਨਾ ਵਾ ਨਯੇਨ ਵਾ ਉਪਦਸ੍ਸਯਿਤੁ’’ਨ੍ਤਿ? ‘‘ਨ ਹਿ, ਭਨ੍ਤੇ’’ਤਿ. ‘‘ਤੇਨ ਹਿ, ਮਹਾਰਾਜ, ਨਤ੍ਥਿ ਅਰੂਪਕਾਯਿਕਾ ਦੇਵਾ’’ਤਿ? ‘‘ਅਤ੍ਥਿ, ਭਨ੍ਤੇ, ਅਰੂਪਕਾਯਿਕਾ ਦੇਵਾ, ਨ ਚ ਸਕ੍ਕਾ ਤੇਸਂ ਰੂਪਂ ਵਾ ਸਣ੍ਠਾਨਂ ਵਾ ਵਯਂ ਵਾ ਪਮਾਣਂ ਵਾ ਓਪਮ੍ਮੇਨ ਵਾ ਕਾਰਣੇਨ ਵਾ ਹੇਤੁਨਾ ਵਾ ਨਯੇਨ ਵਾ ਉਪਦਸ੍ਸਯਿਤੁ’’ਨ੍ਤਿ. ‘‘ਯਥਾ, ਮਹਾਰਾਜ, ਅਤ੍ਥਿਸਤ੍ਤਾਨਂ ਯੇਵ ਅਰੂਪਕਾਯਿਕਾਨਂ ਦੇਵਾਨਂ ਨ ਸਕ੍ਕਾ ਰੂਪਂ ਵਾ ਸਣ੍ਠਾਨਂ ਵਾ ਵਯਂ ਵਾ ਪਮਾਣਂ ਵਾ ਓਪਮ੍ਮੇਨ ਵਾ ਕਾਰਣੇਨ ਵਾ ਹੇਤੁਨਾ ਵਾ ਨਯੇਨ ਵਾ ਉਪਦਸ੍ਸਯਿਤੁਂ, ਏਵਮੇਵ ਖੋ, ਮਹਾਰਾਜ, ਅਤ੍ਥਿਧਮ੍ਮਸ੍ਸੇਵ ਨਿਬ੍ਬਾਨਸ੍ਸ ਨ ਸਕ੍ਕਾ ਰੂਪਂ ਵਾ ਸਣ੍ਠਾਨਂ ਵਾ ਵਯਂ ਵਾ ਪਮਾਣਂ ਵਾ ਓਪਮ੍ਮੇਨ ਵਾ ਕਾਰਣੇਨ ਵਾ ਹੇਤੁਨਾ ਵਾ ਨਯੇਨ ਵਾ ਉਪਦਸ੍ਸਯਿਤੁ’’ਨ੍ਤਿ.

‘‘ਭਨ੍ਤੇ ਨਾਗਸੇਨ, ਹੋਤੁ ਏਕਨ੍ਤਸੁਖਂ ਨਿਬ੍ਬਾਨਂ, ਨ ਚ ਸਕ੍ਕਾ ਤਸ੍ਸ ਰੂਪਂ ਵਾ ਸਣ੍ਠਾਨਂ ਵਾ ਵਯਂ ਵਾ ਪਮਾਣਂ ਵਾ ਓਪਮ੍ਮੇਨ ਵਾ ਕਾਰਣੇਨ ਵਾ ਹੇਤੁਨਾ ਵਾ ਨਯੇਨ ਵਾ ਉਪਦਸ੍ਸਯਿਤੁਂ. ਅਤ੍ਥਿ ਪਨ, ਭਨ੍ਤੇ, ਨਿਬ੍ਬਾਨਸ੍ਸ ਗੁਣਂ ਅਞ੍ਞੇਹਿ ਅਨੁਪਵਿਟ੍ਠਂ ਕਿਞ੍ਚਿ ਓਪਮ੍ਮਨਿਦਸ੍ਸਨਮਤ੍ਤ’’ਨ੍ਤਿ? ‘‘ਸਰੂਪਤੋ, ਮਹਾਰਾਜ, ਨਤ੍ਥਿ, ਗੁਣਤੋ ਪਨ ਸਕ੍ਕਾ ਕਿਞ੍ਚਿ ਓਪਮ੍ਮਨਿਦਸ੍ਸਨਮਤ੍ਤਂ ਉਪਦਸ੍ਸਯਿਤੁ’’ਨ੍ਤਿ. ‘‘ਸਾਧੁ, ਭਨ੍ਤੇ ਨਾਗਸੇਨ, ਯਥਾਹਂ ਲਭਾਮਿ ਨਿਬ੍ਬਾਨਸ੍ਸ ਗੁਣਤੋਪਿ ਏਕਦੇਸਪਰਿਦੀਪਨਮਤ੍ਤਂ, ਤਥਾ ਸੀਘਂ ਬ੍ਰੂਹਿ, ਨਿਬ੍ਬਾਪੇਹਿ ਮੇ ਹਦਯਪਰਿਲ਼ਾਹਂ ਵਿਨਯ ਸੀਤਲਮਧੁਰਵਚਨਮਾਲੁਤੇਨਾ’’ਤਿ.

‘‘ਪਦੁਮਸ੍ਸ, ਮਹਾਰਾਜ, ਏਕੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ, ਉਦਕਸ੍ਸ ਦ੍ਵੇ ਗੁਣਾ, ਅਗਦਸ੍ਸ ਤਯੋ ਗੁਣਾ, ਮਹਾਸਮੁਦ੍ਦਸ੍ਸ ਚਤ੍ਤਾਰੋ ਗੁਣਾ, ਭੋਜਨਸ੍ਸ ਪਞ੍ਚ ਗੁਣਾ, ਆਕਾਸਸ੍ਸ ਦਸ ਗੁਣਾ, ਮਣਿਰਤਨਸ੍ਸ ਤਯੋ ਗੁਣਾ, ਲੋਹਿਤਚਨ੍ਦਨਸ੍ਸ ਤਯੋ ਗੁਣਾ, ਸਪ੍ਪਿਮਣ੍ਡਸ੍ਸ ਤਯੋ ਗੁਣਾ, ਗਿਰਿਸਿਖਰਸ੍ਸ ਪਞ੍ਚ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ.

‘‘ਭਨ੍ਤੇ ਨਾਗਸੇਨ, ‘ਪਦੁਮਸ੍ਸ ਏਕੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ’ਤਿ ਯਂ ਵਦੇਸਿ, ਕਤਮੋ ਪਦੁਮਸ੍ਸ ਏਕੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ’’ਤਿ? ‘‘ਯਥਾ, ਮਹਾਰਾਜ, ਪਦੁਮਂ ਅਨੁਪਲਿਤ੍ਤਂ ਉਦਕੇਨ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਸਬ੍ਬਕਿਲੇਸੇਹਿ ਅਨੁਪਲਿਤ੍ਤਂ. ਅਯਂ, ਮਹਾਰਾਜ, ਪਦੁਮਸ੍ਸ ਏਕੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ’’ਤਿ.

‘‘ਭਨ੍ਤੇ ਨਾਗਸੇਨ, ‘ਉਦਕਸ੍ਸ ਦ੍ਵੇ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’ਤਿ ਯਂ ਵਦੇਸਿ, ਕਤਮੇ ਉਦਕਸ੍ਸ ਦ੍ਵੇ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ? ‘‘ਯਥਾ, ਮਹਾਰਾਜ, ਉਦਕਂ ਸੀਤਲਂ ਪਰਿਲ਼ਾਹਨਿਬ੍ਬਾਪਨਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਸੀਤਲਂ ਸਬ੍ਬਕਿਲੇਸਪਰਿਲ਼ਾਹਨਿਬ੍ਬਾਪਨਂ. ਅਯਂ, ਮਹਾਰਾਜ, ਉਦਕਸ੍ਸ ਪਠਮੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਉਦਕਂ ਕਿਲਨ੍ਤਤਸਿਤਪਿਪਾਸਿਤਘਮ੍ਮਾਭਿਤਤ੍ਤਾਨਂ ਜਨਪਸੁਪਜਾਨਂ ਪਿਪਾਸਾਵਿਨਯਨਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਕਾਮਤਣ੍ਹਾਭਵਤਣ੍ਹਾਵਿਭਵਤਣ੍ਹਾਪਿਪਾਸਾਵਿਨਯਨਂ. ਅਯਂ, ਮਹਾਰਾਜ, ਉਦਕਸ੍ਸ ਦੁਤਿਯੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਇਮੇ ਖੋ, ਮਹਾਰਾਜ, ਉਦਕਸ੍ਸ ਦ੍ਵੇ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ.

‘‘ਭਨ੍ਤੇ ਨਾਗਸੇਨ, ‘ਅਗਦਸ੍ਸ ਤਯੋ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’ਤਿ ਯਂ ਵਦੇਸਿ, ਕਤਮੇ ਅਗਦਸ੍ਸ ਤਯੋ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ? ‘‘ਯਥਾ, ਮਹਾਰਾਜ, ਅਗਦੋ ਵਿਸਪੀਲ਼ਿਤਾਨਂ ਸਤ੍ਤਾਨਂ ਪਟਿਸਰਣਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਕਿਲੇਸਵਿਸਪੀਲ਼ਿਤਾਨਂ ਸਤ੍ਤਾਨਂ ਪਟਿਸਰਣਂ. ਅਯਂ, ਮਹਾਰਾਜ, ਅਗਦਸ੍ਸ ਪਠਮੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਅਗਦੋ ਰੋਗਾਨਂ ਅਨ੍ਤਕਰੋ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਸਬ੍ਬਦੁਕ੍ਖਾਨਂ ਅਨ੍ਤਕਰਂ. ਅਯਂ, ਮਹਾਰਾਜ, ਅਗਦਸ੍ਸ ਦੁਤਿਯੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਅਗਦੋ ਅਮਤਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਅਮਤਂ. ਅਯਂ, ਮਹਾਰਾਜ, ਅਗਦਸ੍ਸ ਤਤਿਯੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਇਮੇ ਖੋ, ਮਹਾਰਾਜ, ਅਗਦਸ੍ਸ ਤਯੋ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ.

‘‘ਭਨ੍ਤੇ ਨਾਗਸੇਨ, ‘ਮਹਾਸਮੁਦ੍ਦਸ੍ਸ ਚਤ੍ਤਾਰੋ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’ਤਿ ਯਂ ਵਦੇਸਿ, ਕਤਮੇ ਮਹਾਸਮੁਦ੍ਦਸ੍ਸ ਚਤ੍ਤਾਰੋ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ? ‘‘ਯਥਾ, ਮਹਾਰਾਜ, ਮਹਾਸਮੁਦ੍ਦੋ ਸੁਞ੍ਞੋ ਸਬ੍ਬਕੁਣਪੇਹਿ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਸੁਞ੍ਞਂ ਸਬ੍ਬਕਿਲੇਸਕੁਣਪੇਹਿ. ਅਯਂ, ਮਹਾਰਾਜ, ਮਹਾਸਮੁਦ੍ਦਸ੍ਸ ਪਠਮੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਮਹਾਸਮੁਦ੍ਦੋ ਮਹਨ੍ਤੋ ਅਨੋਰਪਾਰੋ, ਨ ਪਰਿਪੂਰਤਿ ਸਬ੍ਬਸਵਨ੍ਤੀਹਿ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਮਹਨ੍ਤਂ ਅਨੋਰਪਾਰਂ, ਨ ਪੂਰਤਿ ਸਬ੍ਬਸਤ੍ਤੇਹਿ. ਅਯਂ, ਮਹਾਰਾਜ, ਮਹਾਸਮੁਦ੍ਦਸ੍ਸ ਦੁਤਿਯੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਮਹਾਸਮੁਦ੍ਦੋ ਮਹਨ੍ਤਾਨਂ ਭੂਤਾਨਂ ਆਵਾਸੋ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਮਹਨ੍ਤਾਨਂ ਅਰਹਨ੍ਤਾਨਂ ਵਿਮਲਖੀਣਾਸਵਬਲਪ੍ਪਤ੍ਤਵਸੀਭੂਤਮਹਾਭੂਤਾਨਂ ਆਵਾਸੋ. ਅਯਂ, ਮਹਾਰਾਜ, ਮਹਾਸਮੁਦ੍ਦਸ੍ਸ ਤਤਿਯੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਮਹਾਸਮੁਦ੍ਦੋ ਅਪਰਿਮਿਤਵਿਵਿਧਵਿਪੁਲਵੀਚਿਪੁਪ੍ਫਸਂਕੁਸੁਮਿਤੋ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਅਪਰਿਮਿਤਵਿਵਿਧਵਿਪੁਲਪਰਿਸੁਦ੍ਧਵਿਜ੍ਜਾਵਿਮੁਤ੍ਤਿਪੁਪ੍ਫਸਂਕੁਸੁਮਿਤਂ. ਅਯਂ, ਮਹਾਰਾਜ, ਮਹਾਸਮੁਦ੍ਦਸ੍ਸ ਚਤੁਤ੍ਥੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਇਮੇ ਖੋ, ਮਹਾਰਾਜ, ਮਹਾਸਮੁਦ੍ਦਸ੍ਸ ਚਤ੍ਤਾਰੋ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ.

‘‘ਭਨ੍ਤੇ ਨਾਗਸੇਨ, ‘ਭੋਜਨਸ੍ਸ ਪਞ੍ਚ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’ਤਿ ਯਂ ਵਦੇਸਿ, ਕਤਮੇ ਭੋਜਨਸ੍ਸ ਪਞ੍ਚ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ? ‘‘ਯਥਾ, ਮਹਾਰਾਜ, ਭੋਜਨਂ ਸਬ੍ਬਸਤ੍ਤਾਨਂ ਆਯੁਧਾਰਣਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਸਚ੍ਛਿਕਤਂ ਜਰਾਮਰਣਨਾਸਨਤੋ ਆਯੁਧਾਰਣਂ. ਅਯਂ, ਮਹਾਰਾਜ, ਭੋਜਨਸ੍ਸ ਪਠਮੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਭੋਜਨਂ ਸਬ੍ਬਸਤ੍ਤਾਨਂ ਬਲਵਡ੍ਢਨਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਸਚ੍ਛਿਕਤਂ ਸਬ੍ਬਸਤ੍ਤਾਨਂ ਇਦ੍ਧਿਬਲਵਡ੍ਢਨਂ. ਅਯਂ, ਮਹਾਰਾਜ, ਭੋਜਨਸ੍ਸ ਦੁਤਿਯੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਭੋਜਨਂ ਸਬ੍ਬਸਤ੍ਤਾਨਂ ਵਣ੍ਣਜਨਨਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਸਚ੍ਛਿਕਤਂ ਸਬ੍ਬਸਤ੍ਤਾਨਂ ਗੁਣਵਣ੍ਣਜਨਨਂ. ਅਯਂ, ਮਹਾਰਾਜ, ਭੋਜਨਸ੍ਸ ਤਤਿਯੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਭੋਜਨਂ ਸਬ੍ਬਸਤ੍ਤਾਨਂ ਦਰਥਵੂਪਸਮਨਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਸਚ੍ਛਿਕਤਂ ਸਬ੍ਬਸਤ੍ਤਾਨਂ ਸਬ੍ਬਕਿਲੇਸਦਰਥਵੂਪਸਮਨਂ. ਅਯਂ, ਮਹਾਰਾਜ, ਭੋਜਨਸ੍ਸ ਚਤੁਤ੍ਥੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਭੋਜਨਂ ਸਬ੍ਬਸਤ੍ਤਾਨਂ ਜਿਘਚ੍ਛਾਦੁਬ੍ਬਲ੍ਯਪਟਿਵਿਨੋਦਨਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਸਚ੍ਛਿਕਤਂ ਸਬ੍ਬਸਤ੍ਤਾਨਂ ਸਬ੍ਬਦੁਕ੍ਖਜਿਘਚ੍ਛਾਦੁਬ੍ਬਲ੍ਯਪਟਿਵਿਨੋਦਨਂ. ਅਯਂ, ਮਹਾਰਾਜ, ਭੋਜਨਸ੍ਸ ਪਞ੍ਚਮੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਇਮੇ ਖੋ, ਮਹਾਰਾਜ, ਭੋਜਨਸ੍ਸ ਪਞ੍ਚ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ.

‘‘ਭਨ੍ਤੇ ਨਾਗਸੇਨ, ‘ਆਕਾਸਸ੍ਸ ਦਸ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’ਤਿ ਯਂ ਵਦੇਸਿ, ਕਤਮੇ ਆਕਾਸਸ੍ਸ ਦਸ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ? ‘‘ਯਥਾ, ਮਹਾਰਾਜ, ਆਕਾਸੋ ਨ ਜਾਯਤਿ, ਨ ਜੀਯਤਿ, ਨ ਮੀਯਤਿ, ਨ ਚਵਤਿ, ਨ ਉਪ੍ਪਜ੍ਜਤਿ, ਦੁਪ੍ਪਸਹੋ, ਅਚੋਰਾਹਰਣੋ, ਅਨਿਸ੍ਸਿਤੋ, ਵਿਹਗਗਮਨੋ, ਨਿਰਾਵਰਣੋ, ਅਨਨ੍ਤੋ. ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਨ ਜਾਯਤਿ, ਨ ਜੀਯਤਿ, ਨ ਮੀਯਤਿ, ਨ ਚਵਤਿ, ਨ ਉਪ੍ਪਜ੍ਜਤਿ, ਦੁਪ੍ਪਸਹਂ, ਅਚੋਰਾਹਰਣਂ, ਅਨਿਸ੍ਸਿਤਂ, ਅਰਿਯਗਮਨਂ, ਨਿਰਾਵਰਣਂ, ਅਨਨ੍ਤਂ. ਇਮੇ ਖੋ, ਮਹਾਰਾਜ, ਆਕਾਸਸ੍ਸ ਦਸ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ.

‘‘ਭਨ੍ਤੇ ਨਾਗਸੇਨ, ‘ਮਣਿਰਤਨਸ੍ਸ ਤਯੋ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’ਤਿ ਯਂ ਵਦੇਸਿ, ਕਤਮੇ ਮਣਿਰਤਨਸ੍ਸ ਤਯੋ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ? ‘‘ਯਥਾ, ਮਹਾਰਾਜ, ਮਣਿਰਤਨਂ ਕਾਮਦਦਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਕਾਮਦਦਂ. ਅਯਂ, ਮਹਾਰਾਜ, ਮਣਿਰਤਨਸ੍ਸ ਪਠਮੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਮਣਿਰਤਨਂ ਹਾਸਕਰਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਹਾਸਕਰਂ. ਅਯਂ, ਮਹਾਰਾਜ, ਮਣਿਰਤਨਸ੍ਸ ਦੁਤਿਯੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਮਣਿਰਤਨਂ ਉਜ੍ਜੋਤਤ੍ਤਕਰਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਉਜ੍ਜੋਤਤ੍ਤਕਰਂ [ਉਜ੍ਜੋਤਤ੍ਥਕਰਂ (ਸੀ. ਪੀ.), ਉਜ੍ਜੋਤਿਤਤ੍ਥਕਰਂ (ਸ੍ਯਾ.)]. ਅਯਂ, ਮਹਾਰਾਜ, ਮਣਿਰਤਨਸ੍ਸ ਤਤਿਯੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਇਮੇ ਖੋ, ਮਹਾਰਾਜ, ਮਣਿਰਤਨਸ੍ਸ ਤਯੋ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ.

‘‘ਭਨ੍ਤੇ ਨਾਗਸੇਨ, ‘ਲੋਹਿਤਚਨ੍ਦਨਸ੍ਸ ਤਯੋ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’ਤਿ ਯਂ ਵਦੇਸਿ, ਕਤਮੇ ਲੋਹਿਤਚਨ੍ਦਨਸ੍ਸ ਤਯੋ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ? ‘‘ਯਥਾ, ਮਹਾਰਾਜ, ਲੋਹਿਤਚਨ੍ਦਨਂ ਦੁਲ੍ਲਭਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਦੁਲ੍ਲਭਂ. ਅਯਂ, ਮਹਾਰਾਜ, ਲੋਹਿਤਚਨ੍ਦਨਸ੍ਸ ਪਠਮੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਲੋਹਿਤਚਨ੍ਦਨਂ ਅਸਮਸੁਗਨ੍ਧਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਅਸਮਸੁਗਨ੍ਧਂ. ਅਯਂ, ਮਹਾਰਾਜ, ਲੋਹਿਤਚਨ੍ਦਨਸ੍ਸ ਦੁਤਿਯੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਲੋਹਿਤਚਨ੍ਦਨਂ ਸਜ੍ਜਨਪਸਤ੍ਥਂ [ਸਬ੍ਬਜਨਪਸਤ੍ਥਂ (ਸ੍ਯਾ.)], ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਅਰਿਯਸਜ੍ਜਨਪਸਤ੍ਥਂ. ਅਯਂ, ਮਹਾਰਾਜ, ਲੋਹਿਤਚਨ੍ਦਨਸ੍ਸ ਤਤਿਯੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਇਮੇ ਖੋ, ਮਹਾਰਾਜ, ਲੋਹਿਤਚਨ੍ਦਨਸ੍ਸ ਤਯੋ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ.

‘‘ਭਨ੍ਤੇ ਨਾਗਸੇਨ, ‘ਸਪ੍ਪਿਮਣ੍ਡਸ੍ਸ ਤਯੋ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’ਤਿ ਯਂ ਵਦੇਸਿ, ਕਤਮੇ ਸਪ੍ਪਿਮਣ੍ਡਸ੍ਸ ਤਯੋ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ? ‘‘ਯਥਾ, ਮਹਾਰਾਜ, ਸਪ੍ਪਿਮਣ੍ਡੋ ਵਣ੍ਣਸਮ੍ਪਨ੍ਨੋ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਗੁਣਵਣ੍ਣਸਮ੍ਪਨ੍ਨਂ. ਅਯਂ, ਮਹਾਰਾਜ, ਸਪ੍ਪਿਮਣ੍ਡਸ੍ਸ ਪਠਮੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਸਪ੍ਪਿਮਣ੍ਡੋ ਗਨ੍ਧਸਮ੍ਪਨ੍ਨੋ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਸੀਲਗਨ੍ਧਸਮ੍ਪਨ੍ਨਂ. ਅਯਂ, ਮਹਾਰਾਜ, ਸਪ੍ਪਿਮਣ੍ਡਸ੍ਸ ਦੁਤਿਯੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਸਪ੍ਪਿਮਣ੍ਡੋ ਰਸਸਮ੍ਪਨ੍ਨੋ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਰਸਸਮ੍ਪਨ੍ਨਂ. ਅਯਂ, ਮਹਾਰਾਜ, ਸਪ੍ਪਿਮਣ੍ਡਸ੍ਸ ਤਤਿਯੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਇਮੇ ਖੋ, ਮਹਾਰਾਜ, ਸਪ੍ਪਿਮਣ੍ਡਸ੍ਸ ਤਯੋ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ.

‘‘ਭਨ੍ਤੇ ਨਾਗਸੇਨ, ‘ਗਿਰਿਸਿਖਰਸ੍ਸ ਪਞ੍ਚ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’ਤਿ ਯਂ ਵਦੇਸਿ, ਕਤਮੇ ਗਿਰਿਸਿਖਰਸ੍ਸ ਪਞ੍ਚ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ? ‘‘ਯਥਾ, ਮਹਾਰਾਜ, ਗਿਰਿਸਿਖਰਂ ਅਚ੍ਚੁਗ੍ਗਤਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਅਚ੍ਚੁਗਤਂ. ਅਯਂ, ਮਹਾਰਾਜ, ਗਿਰਿਸਿਖਰਸ੍ਸ ਪਠਮੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਗਿਰਿਸਿਖਰਂ ਅਚਲਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਅਚਲਂ. ਅਯਂ, ਮਹਾਰਾਜ, ਗਿਰਿਸਿਖਰਸ੍ਸ ਦੁਤਿਯੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਗਿਰਿਸਿਖਰਂ ਦੁਰਧਿਰੋਹਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਦੁਰਧਿਰੋਹਂ ਸਬ੍ਬਕਿਲੇਸਾਨਂ. ਅਯਂ, ਮਹਾਰਾਜ, ਗਿਰਿਸਿਖਰਸ੍ਸ ਤਤਿਯੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਗਿਰਿਸਿਖਰਂ ਸਬ੍ਬਬੀਜਾਨਂ ਅਵਿਰੂਹਨਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਸਬ੍ਬਕਿਲੇਸਾਨਂ ਅਵਿਰੂਹਨਂ. ਅਯਂ, ਮਹਾਰਾਜ, ਗਿਰਿਸਿਖਰਸ੍ਸ ਚਤੁਤ੍ਥੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਪੁਨ ਚਪਰਂ, ਮਹਾਰਾਜ, ਗਿਰਿਸਿਖਰਂ ਅਨੁਨਯਪ੍ਪਟਿਘਵਿਪ੍ਪਮੁਤ੍ਤਂ, ਏਵਮੇਵ ਖੋ, ਮਹਾਰਾਜ, ਨਿਬ੍ਬਾਨਂ ਅਨੁਨਯਪ੍ਪਟਿਘਵਿਪ੍ਪਮੁਤ੍ਤਂ. ਅਯਂ, ਮਹਾਰਾਜ, ਗਿਰਿਸਿਖਰਸ੍ਸ ਪਞ੍ਚਮੋ ਗੁਣੋ ਨਿਬ੍ਬਾਨਂ ਅਨੁਪਵਿਟ੍ਠੋ. ਇਮੇ ਖੋ, ਮਹਾਰਾਜ, ਗਿਰਿਸਿਖਰਸ੍ਸ ਪਞ੍ਚ ਗੁਣਾ ਨਿਬ੍ਬਾਨਂ ਅਨੁਪਵਿਟ੍ਠਾ’’ਤਿ. ‘‘ਸਾਧੁ, ਭਨ੍ਤੇ ਨਾਗਸੇਨ, ਏਵਮੇਤਂ ਤਥਾ ਸਮ੍ਪਟਿਚ੍ਛਾਮੀ’’ਤਿ.

ਨਿਬ੍ਬਾਨਰੂਪਸਣ੍ਠਾਨਪਞ੍ਹੋ ਦਸਮੋ.