੪. ਸਬ੍ਬਞ੍ਞੁਤਞਾਣਵਗ੍ਗੋ

੧. ਇਦ੍ਧਿਕਮ੍ਮਵਿਪਾਕਪਞ੍ਹੋ

੧. ‘‘ਭਨ੍ਤੇ ਨਾਗਸੇਨ, ਭਾਸਿਤਮ੍ਪੇਤਂ ਭਗਵਤਾ ‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਇਦ੍ਧਿਮਨ੍ਤਾਨਂ ਯਦਿਦਂ ਮਹਾਮੋਗ੍ਗਲ੍ਲਾਨੋ’ਤਿ. ਪੁਨ ਚ ਕਿਰ ਸੋ ਲਗੁਲ਼ੇਹਿ ਪਰਿਪੋਥਿਤੋ ਭਿਨ੍ਨਸੀਸੋ ਸਞ੍ਚੁਣ੍ਣਿਤਟ੍ਠਿਮਂਸਧਮਨਿਛਿਨ੍ਨਪਰਿਗਤ੍ਤੋ ਪਰਿਨਿਬ੍ਬੁਤੋ [ਧਮਨਿਮਜ੍ਜਪਰਿਕਤ੍ਤੋ (ਸੀ. ਪੀ.), ਧਮ੍ਮਨਿਮਿਞ੍ਜਪਰਿਗਤ੍ਤੋ (ਸ੍ਯਾ.)]. ਯਦਿ, ਭਨ੍ਤੇ ਨਾਗਸੇਨ, ਥੇਰੋ ਮਹਾਮੋਗ੍ਗਲ੍ਲਾਨੋ ਇਦ੍ਧਿਯਾ ਕੋਟਿਂ ਗਤੋ, ਤੇਨ ਹਿ ਲਗੁਲ਼ੇਹਿ ਪੋਥਿਤੋ ਪਰਿਨਿਬ੍ਬੁਤੋਤਿ ਯਂ ਵਚਨਂ, ਤਂ ਮਿਚ੍ਛਾ. ਯਦਿ ਲਗੁਲ਼ੇਹਿ ਪਰਿਪੋਥਿਤੋ ਪਰਿਨਿਬ੍ਬੁਤੋ, ਤੇਨ ਹਿ ਇਦ੍ਧਿਯਾ ਕੋਟਿਂ ਗਤੋਤਿ ਤਮ੍ਪਿ ਵਚਨਂ ਮਿਚ੍ਛਾ. ਕਿਂ ਨ ਸਮਤ੍ਥੋ ਇਦ੍ਧਿਯਾ ਅਤ੍ਤਨੋ ਉਪਘਾਤਂ ਅਪਨਯਿਤੁਂ, ਸਦੇਵਕਸ੍ਸਪਿ ਲੋਕਸ੍ਸ ਪਟਿਸਰਣਂ ਭਵਿਤੁਂ ਅਰਹੋਤਿ? ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਤਵਾਨੁਪ੍ਪਤ੍ਤੋ, ਸੋ ਤਯਾ ਨਿਬ੍ਬਾਹਿਤਬ੍ਬੋ’’ਤਿ.

‘‘ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਇਦ੍ਧਿਮਨ੍ਤਾਨਂ ਯਦਿਦਂ ਮਹਾਮੋਗ੍ਗਲ੍ਲਾਨੋ’ਤਿ. ਆਯਸ੍ਮਾ ਚ ਮਹਾਮੋਗ੍ਗਲ੍ਲਾਨੋ ਲਗੁਲ਼ਹਤੋ ਪਰਿਨਿਬ੍ਬੁਤੋ, ਤਞ੍ਚ ਪਨ ਕਮ੍ਮਾਧਿਗ੍ਗਹਿਤੇਨਾ’’ਤਿ.

‘‘ਨਨੁ, ਭਨ੍ਤੇ ਨਾਗਸੇਨ, ਇਦ੍ਧਿਮਤੋ ਇਦ੍ਧਿਵਿਸਯੋਪਿ ਕਮ੍ਮਵਿਪਾਕੋਪਿ ਦ੍ਵੇ ਅਚਿਨ੍ਤਿਯਾ, ਅਚਿਨ੍ਤਿਯੇਨ ਅਚਿਨ੍ਤਿਯਂ ਅਪਨਯਿਤਬ੍ਬਂ. ਯਥਾ ਨਾਮ, ਭਨ੍ਤੇ, ਕੇਚਿ ਫਲਕਾਮਾ ਕਪਿਤ੍ਥੇਨ ਕਪਿਤ੍ਥਂ ਪੋਥੇਨ੍ਤਿ, ਅਮ੍ਬੇਨ ਅਮ੍ਬਂ ਪੋਥੇਨ੍ਤਿ, ਏਵਮੇਵ ਖੋ, ਭਨ੍ਤੇ ਨਾਗਸੇਨ, ਅਚਿਨ੍ਤਿਯੇਨ ਅਚਿਨ੍ਤਿਯਂ ਪੋਥਯਿਤ੍ਵਾ ਅਪਨੇਤਬ੍ਬ’’ਨ੍ਤਿ? ‘‘ਅਚਿਨ੍ਤਿਯਾਨਮ੍ਪਿ, ਮਹਾਰਾਜ, ਏਕਂ ਅਧਿਮਤ੍ਤਂ ਬਲਵਤਰਂ, ਯਥਾ, ਮਹਾਰਾਜ, ਮਹਿਯਾ ਰਾਜਾਨੋ ਹੋਨ੍ਤਿ ਸਮਜਚ੍ਚਾ, ਸਮਜਚ੍ਚਾਨਮ੍ਪਿ ਤੇਸਂ ਏਕੋ ਸਬ੍ਬੇ ਅਭਿਭਵਿਤ੍ਵਾ ਆਣਂ ਪਵਤ੍ਤੇਤਿ. ਏਵਮੇਵ ਖੋ, ਮਹਾਰਾਜ, ਤੇਸਂ ਅਚਿਨ੍ਤਿਯਾਨਂ ਕਮ੍ਮਵਿਪਾਕਂ ਯੇਵ ਅਧਿਮਤ੍ਤਂ ਬਲਵਤਰਂ, ਕਮ੍ਮਵਿਪਾਕਂ ਯੇਵ ਸਬ੍ਬੇ ਅਭਿਭਵਿਯ ਆਣਂ ਪਵਤ੍ਤੇਤਿ, ਕਮ੍ਮਾਧਿਗ੍ਗਹਿਤਸ੍ਸ ਅਵਸੇਸਾ ਕਿਰਿਯਾ ਓਕਾਸਂ ਨ ਲਭਨ੍ਤਿ.

‘‘ਇਧ ਪਨ, ਮਹਾਰਾਜ, ਕੋਚਿ ਪੁਰਿਸੋ ਕਿਸ੍ਮਿਞ੍ਚਿਦੇਵ ਪਕਰਣੇ ਅਪਰਜ੍ਝਤਿ, ਨ ਤਸ੍ਸ ਮਾਤਾ ਵਾ ਪਿਤਾ ਵਾ ਭਗਿਨੀ ਵਾ ਭਾਤਰੋ ਵਾ ਸਖੀ ਵਾ ਸਹਾਯਕਾ ਵਾ [ਭਗਿਨਿਭਾਤਰੋ ਵਾ ਸਖਿਸਹਾਯਕਾ ਵਾ (ਸੀ. ਪੀ. ਕ.)] ਤਾਯਨ੍ਤਿ, ਅਥ ਖੋ ਰਾਜਾ ਯੇਵ ਤਤ੍ਥ ਅਭਿਭਵਿਯ ਆਣਂ ਪਵਤ੍ਤੇਤਿ. ਕਿਂ ਤਤ੍ਥ ਕਾਰਣਂ? ਅਪਰਾਧਿਕਤਾ. ਏਵਮੇਵ ਖੋ, ਮਹਾਰਾਜ, ਤੇਸਂ ਅਚਿਨ੍ਤਿਯਾਨਂ ਕਮ੍ਮਵਿਪਾਕਂ ਯੇਵ ਅਧਿਮਤ੍ਤਂ ਬਲਵਤਰਂ, ਕਮ੍ਮਵਿਪਾਕਂ ਯੇਵ ਸਬ੍ਬੇ ਅਭਿਭਵਿਯ ਆਣਂ ਪਵਤ੍ਤੇਤਿ, ਕਮ੍ਮਾਧਿਗ੍ਗਹਿਤਸ੍ਸ ਅਵਸੇਸਾ ਕਿਰਿਯਾ ਓਕਾਸਂ ਨ ਲਭਨ੍ਤਿ.

‘‘ਯਥਾ ਵਾ ਪਨ, ਮਹਾਰਾਜ, ਮਹਿਯਾ ਦਵਡਾਹੇ ਸਮੁਟ੍ਠਿਤੇ ਘਟਸਹਸ੍ਸਮ੍ਪਿ ਉਦਕਂ ਨ ਸਕ੍ਕੋਤਿ ਨਿਬ੍ਬਾਪੇਤੁਂ, ਅਥ ਖੋ ਅਗ੍ਗਿ ਯੇਵ ਤਤ੍ਥ ਅਭਿਭਵਿਯ ਆਣਂ ਪਵਤ੍ਤੇਤਿ. ਕਿਂ ਤਤ੍ਥ ਕਾਰਣਂ? ਬਲਵਤਾ ਤੇਜਸ੍ਸ. ਏਵਮੇਵ ਖੋ, ਮਹਾਰਾਜ, ਤੇਸਂ ਅਚਿਨ੍ਤਿਯਾਨਂ ਕਮ੍ਮਵਿਪਾਕਂ ਯੇਵ ਅਧਿਮਤ੍ਤਂ ਬਲਵਤਰਂ, ਕਮ੍ਮਵਿਪਾਕਂ ਯੇਵ ਸਬ੍ਬੇ ਅਭਿਭਵਿਯ ਆਣਂ ਪਵਤ੍ਤੇਤਿ, ਕਮ੍ਮਾਧਿਗ੍ਗਹਿਤਸ੍ਸ ਅਵਸੇਸਾ ਕਿਰਿਯਾ ਓਕਾਸਂ ਨ ਲਭਨ੍ਤਿ, ਤਸ੍ਮਾ, ਮਹਾਰਾਜ, ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਕਮ੍ਮਾਧਿਗ੍ਗਹਿਤਸ੍ਸ ਲਗੁਲ਼ੇਹਿ ਪੋਥਿਯਮਾਨਸ੍ਸ ਇਦ੍ਧਿਯਾ ਸਮਨ੍ਨਾਹਾਰੋ ਨਾਹੋਸੀ’’ਤਿ. ‘‘ਸਾਧੁ, ਭਨ੍ਤੇ ਨਾਗਸੇਨ, ਏਵਮੇਤਂ ਤਥਾ ਸਮ੍ਪਟਿਚ੍ਛਾਮੀ’’ਤਿ.

ਇਦ੍ਧਿਕਮ੍ਮਵਿਪਾਕਪਞ੍ਹੋ ਪਠਮੋ.

੨. ਧਮ੍ਮਵਿਨਯਪਟਿਚ੍ਛਨ੍ਨਾਪਟਿਚ੍ਛਨ੍ਨਪਞ੍ਹੋ

੨. ‘‘ਭਨ੍ਤੇ ਨਾਗਸੇਨ, ਭਾਸਿਤਮ੍ਪੇਤਂ ਭਗਵਤਾ ‘ਤਥਾਗਤਪ੍ਪਵੇਦਿਤੋ, ਭਿਕ੍ਖਵੇ, ਧਮ੍ਮਵਿਨਯੋ ਵਿਵਟੋ ਵਿਰੋਚਤਿ ਨੋ ਪਟਿਚ੍ਛਨ੍ਨੋ’ਤਿ. ਪੁਨ ਚ ਪਾਤਿਮੋਕ੍ਖੁਦ੍ਦੇਸੋ ਕੇਵਲਞ੍ਚ ਵਿਨਯਪਿਟਕਂ ਪਿਹਿਤਂ ਪਟਿਚ੍ਛਨ੍ਨਂ. ਯਦਿ, ਭਨ੍ਤੇ ਨਾਗਸੇਨ, ਜਿਨਸਾਸਨੇ ਯੁਤ੍ਤਂ ਵਾ ਪਤ੍ਤਂ ਵਾ ਸਮਯਂ ਲਭੇਥ, ਵਿਨਯਪਣ੍ਣਤ੍ਤਿ ਵਿਵਟਾ ਸੋਭੇਯ੍ਯ. ਕੇਨ ਕਾਰਣੇਨ? ਕੇਵਲਂ ਤਤ੍ਥ ਸਿਕ੍ਖਾ ਸਂਯਮੋ ਨਿਯਮੋ ਸੀਲਗੁਣਆਚਾਰਪਣ੍ਣਤ੍ਤਿ ਅਤ੍ਥਰਸੋ ਧਮ੍ਮਰਸੋ ਵਿਮੁਤ੍ਤਿਰਸੋ. ਯਦਿ, ਭਨ੍ਤੇ ਨਾਗਸੇਨ, ਭਗਵਤਾ ਭਣਿਤਂ ‘ਤਥਾਗਤਪ੍ਪਵੇਦਿਤੋ, ਭਿਕ੍ਖਵੇ, ਧਮ੍ਮਵਿਨਯੋ ਵਿਵਟੋ ਵਿਰੋਚਤਿ ਨੋ ਪਟਿਚ੍ਛਨ੍ਨੋ’ਤਿ, ਤੇਨ ਹਿ ‘ਪਾਤਿਮੋਕ੍ਖੁਦ੍ਦੇਸੋ ਕੇਵਲਞ੍ਚ ਵਿਨਯਪਿਟਕਂ ਪਿਹਿਤਂ ਪਟਿਚ੍ਛਨ੍ਨ’ਨ੍ਤਿ ਯਂ ਵਚਨਂ, ਤਂ ਮਿਚ੍ਛਾ. ਯਦਿ ਪਾਤਿਮੋਕ੍ਖੁਦ੍ਦੇਸੋ ਕੇਵਲਞ੍ਚ ਵਿਨਯਪਿਟਕਂ ਪਿਹਿਤਂ ਪਟਿਚ੍ਛਨ੍ਨਂ, ਤੇਨ ਹਿ ‘ਤਥਾਗਤਪ੍ਪਵੇਦਿਤੋ, ਭਿਕ੍ਖਵੇ, ਧਮ੍ਮਵਿਨਯੋ ਵਿਵਟੋ ਵਿਰੋਚਤਿ ਨੋ ਪਟਿਚ੍ਛਨ੍ਨੋ’ਤਿ ਤਮ੍ਪਿ ਵਚਨਂ ਮਿਚ੍ਛਾ. ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਤਵਾਨੁਪ੍ਪਤ੍ਤੋ, ਸੋ ਤਯਾ ਨਿਬ੍ਬਾਹਿਤਬ੍ਬੋ’’ਤਿ.

‘‘ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ‘ਤਥਾਗਤਪ੍ਪਵੇਦਿਤੋ, ਭਿਕ੍ਖਵੇ, ਧਮ੍ਮਵਿਨਯੋ ਵਿਵਟੋ ਵਿਰੋਚਤਿ ਨੋ ਪਟਿਚ੍ਛਨ੍ਨੋ’ਤਿ. ਪੁਨ ਚ ਪਾਤਿਮੋਕ੍ਖੁਦ੍ਦੇਸੋ ਕੇਵਲਞ੍ਚ ਵਿਨਯਪਿਟਕਂ ਪਿਹਿਤਂ ਪਟਿਚ੍ਛਨ੍ਨਂ, ਤਞ੍ਚ ਪਨ ਨ ਸਬ੍ਬੇਸਂ, ਸੀਮਂ ਕਤ੍ਵਾ ਪਿਹਿਤਂ.

‘‘ਤਿਵਿਧੇਨ, ਮਹਾਰਾਜ, ਭਗਵਤਾ ਪਾਤਿਮੋਕ੍ਖੁਦ੍ਦੇਸੋ ਸੀਮਂ ਕਤ੍ਵਾ ਪਿਹਿਤੋ, ਪੁਬ੍ਬਕਾਨਂ ਤਥਾਗਤਾਨਂ ਵਂਸਵਸੇਨ ਪਾਤਿਮੋਕ੍ਖੁਦ੍ਦੇਸੋ ਸੀਮਂ ਕਤ੍ਵਾ ਪਿਹਿਤੋ, ਧਮ੍ਮਸ੍ਸ ਗਰੁਕਤ੍ਤਾ ਪਿਹਿਤੋ, ਭਿਕ੍ਖੁਭੂਮਿਯਾ ਗਰੁਕਤ੍ਤਾ ਪਿਹਿਤੋ.

‘‘ਕਥਂ ਪੁਬ੍ਬਕਾਨਂ ਤਥਾਗਤਾਨਂ ਵਂਸਵਸੇਨ ਪਾਤਿਮੋਕ੍ਖੁਦ੍ਦੇਸੋ ਸੀਮਂ ਕਤ੍ਵਾ ਪਿਹਿਤੋ, ਏਸੋ ਵਂਸੋ, ਮਹਾਰਾਜ, ਸਬ੍ਬੇਸਂ ਪੁਬ੍ਬਕਾਨਂ ਤਥਾਗਤਾਨਂ ਯਦਿਦਂ ਭਿਕ੍ਖੁਮਜ੍ਝੇ ਪਾਤਿਮੋਕ੍ਖੁਦ੍ਦੇਸੋ ਅਵਸੇਸਾਨਂ ਪਿਹਿਤੋ. ਯਥਾ, ਮਹਾਰਾਜ, ਖਤ੍ਤਿਯਾਨਂ ਖਤ੍ਤਿਯਮਾਯਾ ਖਤ੍ਤਿਯੇਸੁ ਯੇਵ ਚਰਤਿ, ਏਵਮੇਤਂ ਖਤ੍ਤਿਯਾਨਂ ਲੋਕਸ੍ਸ ਪਵੇਣੀ ਅਵਸੇਸਾਨਂ ਪਿਹਿਤਾ. ਏਵਮੇਵ ਖੋ, ਮਹਾਰਾਜ, ਏਸੋ ਵਂਸੋ ਸਬ੍ਬੇਸਂ ਪੁਬ੍ਬਕਾਨਂ ਤਥਾਗਤਾਨਂ ਯਦਿਦਂ ਭਿਕ੍ਖੁਮਜ੍ਝੇ ਪਾਤਿਮੋਕ੍ਖੁਦ੍ਦੇਸੋ ਅਵਸੇਸਾਨਂ ਪਿਹਿਤੋ.

‘‘ਯਥਾ ਵਾ ਪਨ, ਮਹਾਰਾਜ, ਮਹਿਯਾ ਗਣਾ ਵਤ੍ਤਨ੍ਤਿ, ਸੇਯ੍ਯਥਿਦਂ, ਮਲ੍ਲਾ ਅਤੋਣਾ ਪਬ੍ਬਤਾ ਧਮ੍ਮਗਿਰਿਯਾ ਬ੍ਰਹ੍ਮਗਿਰਿਯਾ ਨਟਕਾ ਨਚ੍ਚਕਾ ਲਙ੍ਘਕਾ ਪਿਸਾਚਾ ਮਣਿਭਦ੍ਦਾ ਪੁਣ੍ਣਬਦ੍ਧਾ ਚਨ੍ਦਿਮਸੂਰਿਯਾ ਸਿਰਿਦੇਵਤਾ ਕਾਲਿਦੇਵਤਾ, ਸਿਵਾ ਵਸੁਦੇਵਾ ਘਨਿਕਾ ਅਸਿਪਾਸਾ ਭਦ੍ਦਿਪੁਤ੍ਤਾਤਿ, ਤੇਸਂ ਤੇਸਂ ਰਹਸ੍ਸਂ ਤੇਸੁ ਤੇਸੁ ਗਣੇਸੁ ਯੇਵ ਚਰਤਿ, ਅਵਸੇਸਾਨਂ ਪਿਹਿਤਂ. ਏਵਮੇਵ ਖੋ, ਮਹਾਰਾਜ, ਏਸੋ ਵਂਸੋ ਸਬ੍ਬੇਸਂ ਪੁਬ੍ਬਕਾਨਂ ਤਥਾਗਤਾਨਂ ਯਦਿਦਂ ਭਿਕ੍ਖੁਮਜ੍ਝੇ ਪਾਤਿਮੋਕ੍ਖੁਦ੍ਦੇਸੋ ਅਵਸੇਸਾਨਂ ਪਿਹਿਤੋ. ਏਵਂ ਪੁਬ੍ਬਕਾਨਂ ਤਥਾਗਤਾਨਂ ਵਂਸਵਸੇਨ ਪਾਤਿਮੋਕ੍ਖੁਦ੍ਦੇਸੋ ਸੀਮਂ ਕਤ੍ਵਾ ਪਿਹਿਤੋ.

‘‘ਕਥਂ ਧਮ੍ਮਸ੍ਸ ਗਰੁਕਤ੍ਤਾ ਪਾਤਿਮੋਕ੍ਖੁਦ੍ਦੇਸੋ ਸੀਮਂ ਕਤ੍ਵਾ ਪਿਹਿਤੋ? ਧਮ੍ਮੋ, ਮਹਾਰਾਜ, ਗਰੁਕੋ ਭਾਰਿਯੋ, ਤਤ੍ਥ ਸਮ੍ਮਤ੍ਤਕਾਰੀ ਅਞ੍ਞਂ ਆਰਾਧੇਤਿ, ਤਂ ਤਤ੍ਥ ਪਰਮ੍ਪਰਾਸਮ੍ਮਤ੍ਤਕਾਰਿਤਾਯ ਪਾਪੁਣਾਤਿ, ਨ ਤਂ ਤਤ੍ਥ ਪਰਮ੍ਪਰਾਸਮ੍ਮਤ੍ਤਕਾਰਿਤਾਯ ਪਾਪੁਣਾਤਿ, ਮਾ ਚਾਯਂ ਸਾਰਧਮ੍ਮੋ ਵਰਧਮ੍ਮੋ ਅਸਮ੍ਮਤ੍ਤਕਾਰੀਨਂ ਹਤ੍ਥਗਤੋ ਓਞ੍ਞਾਤੋ ਅਵਞ੍ਞਾਤੋ ਹੀਲ਼ਿਤੋ ਖੀਲ਼ਿਤੋ ਗਰਹਿਤੋ ਭਵਤੁ, ਮਾ ਚਾਯਂ ਸਾਰਧਮ੍ਮੋ ਵਰਧਮ੍ਮੋ ਦੁਜ੍ਜਨਗਤੋ ਓਞ੍ਞਾਤੋ ਅਵਞ੍ਞਾਤੋ ਹੀਲ਼ਿਤੋ ਖੀਲ਼ਿਤੋ ਗਰਹਿਤੋ ਭਵਤੂਤਿ. ਏਵਂ ਧਮ੍ਮਸ੍ਸ ਗਰੁਕਤ੍ਤਾ ਪਾਤਿਮੋਕ੍ਖੁਦ੍ਦੇਸੋ ਸੀਮਂ ਕਤ੍ਵਾ ਪਿਹਿਤੋ.

‘‘ਯਥਾ, ਮਹਾਰਾਜ, ਸਾਰਵਰਪਵਰਅਭਿਜਾਤਜਾਤਿਮਨ੍ਤਰਤ੍ਤਲੋਹਿਤਚਨ੍ਦਨਂ ਨਾਮ ਸਵਰਪੁਰਮਨੁਗਤਂ ਓਞ੍ਞਾਤਂ ਅਵਞ੍ਞਾਤਂ ਹੀਲ਼ਿਤਂ ਖੀਲ਼ਿਤਂ ਗਰਹਿਤਂ ਭਵਤਿ, ਏਵਮੇਵ ਖੋ, ਮਹਾਰਾਜ, ਮਾ ਚਾਯਂ ਸਾਰਧਮ੍ਮੋ ਵਰਧਮ੍ਮੋ ਪਰਮ੍ਪਰਾਅਸਮ੍ਮਤ੍ਤਕਾਰੀਨਂ ਹਤ੍ਥਗਤੋ ਓਞ੍ਞਾਤੋ ਅਵਞ੍ਞਾਤੋ ਹੀਲ਼ਿਤੋ ਖੀਲ਼ਿਤੋ ਗਰਹਿਤੋ ਭਵਤੁ, ਮਾ ਚਾਯਂ ਸਾਰਧਮ੍ਮੋ ਵਰਧਮ੍ਮੋ ਦੁਜ੍ਜਨਗਤੋ ਓਞ੍ਞਾਤੋ ਅਵਞ੍ਞਾਤੋ ਹੀਲ਼ਿਤੋ ਖੀਲ਼ਿਤੋ ਗਰਹਿਤੋ ਭਵਤੂਤਿ. ਏਵਂ ਧਮ੍ਮਸ੍ਸ ਗਰੁਕਤ੍ਤਾ ਪਾਤਿਮੋਕ੍ਖੁਦ੍ਦੇਸੋ ਸੀਮਂ ਕਤ੍ਵਾ ਪਿਹਿਤੋ.

‘‘ਕਥਂ ਭਿਕ੍ਖੁਭੂਮਿਯਾ ਗਰੁਕਤ੍ਤਾ ਪਾਤਿਮੋਕ੍ਖੁਦ੍ਦੇਸੋ ਸੀਮਂ ਕਤ੍ਵਾ ਪਿਹਿਤੋ, ਭਿਕ੍ਖੁਭਾਵੋ ਖੋ, ਮਹਾਰਾਜ, ਲੋਕੇ ਅਤੁਲਿਯੋ ਅਪ੍ਪਮਾਣੋ ਅਨਗ੍ਘਿਯੋ, ਨ ਸਕ੍ਕਾ ਕੇਨਚਿ ਅਗ੍ਘਾਪੇਤੁਂ ਤੁਲੇਤੁਂ ਪਰਿਮੇਤੁਂ, ਮਾਯਂ ਏਵਰੂਪੇ ਭਿਕ੍ਖੁਭਾਵੇ ਠਿਤੋ ਲੋਕੇਨ ਸਮਸਮੋ ਭਵਤੂਤਿ ਭਿਕ੍ਖੂਨਂ ਯੇਵ ਅਨ੍ਤਰੇ ਪਾਤਿਮੋਕ੍ਖੁਦ੍ਦੇਸੋ ਚਰਤਿ. ਯਥਾ, ਮਹਾਰਾਜ, ਲੋਕੇ ਵਰਪਵਰਭਣ੍ਡਂ ਵਤ੍ਥਂ ਵਾ ਅਤ੍ਥਰਣਂ ਵਾ ਗਜਤੁਰਙ੍ਗਰਥਸੁਵਣ੍ਣਰਜਤਮਣਿਮੁਤ੍ਤਾਇਤ੍ਥਿਰਤਨਾਦੀਨਿ ਵਾ ਵਿਜਿਤਕਮ੍ਮਸੂਰਾ ਵਾ [ਨਿਜ੍ਜਿਤਕਮ੍ਮਸੂਰਾ ਵਾ (ਸੀ. ਪੀ.)] ਸਬ੍ਬੇ ਤੇ ਰਾਜਾਨਮੁਪਗਚ੍ਛਨ੍ਤਿ, ਏਵਮੇਵ ਖੋ, ਮਹਾਰਾਜ, ਯਾਵਤਾ ਲੋਕੇ [ਲੋਕੇ ਸਿਕ੍ਖਾ (ਸੀ. ਪੀ.)] ਸੁਗਤਾਗਮਪਰਿਯਤ੍ਤਿਆਚਾਰਸਂਯਮਸੀਲਸਂਵਰਗੁਣਾ, ਸਬ੍ਬੇ ਤੇ ਭਿਕ੍ਖੁਸਙ੍ਘਮੁਪਗਤਾ ਭਵਨ੍ਤਿ. ਏਵਂ ਭਿਕ੍ਖੁਭੂਮਿਯਾ ਗਰੁਕਤ੍ਤਾ ਪਾਤਿਮੋਕ੍ਖੁਦ੍ਦੇਸੋ ਸੀਮਂ ਕਤ੍ਵਾ ਪਿਹਿਤੋ’’ਤਿ. ‘‘ਸਾਧੁ, ਭਨ੍ਤੇ ਨਾਗਸੇਨ, ਏਵਮੇਤਂ ਤਥਾ ਸਮ੍ਪਿਟਿਚ੍ਛਾਮੀ’’ਤਿ.

ਧਮ੍ਮਵਿਨਯਪਟਿਚ੍ਛਨ੍ਨਾਪਟਿਚ੍ਛਨ੍ਨਪਞ੍ਹੋ ਦੁਤਿਯੋ.

੩. ਮੁਸਾਵਾਦਗਰੁਲਹੁਭਾਵਪਞ੍ਹੋ

੩. ‘‘ਭਨ੍ਤੇ ਨਾਗਸੇਨ, ਭਾਸਿਤਮ੍ਪੇਤਂ ਭਗਵਤਾ ‘ਸਮ੍ਪਜਾਨਮੁਸਾਵਾਦੇ ਪਾਰਾਜਿਕੋ ਹੋਤੀ’ਤਿ. ਪੁਨ ਚ ਭਣਿਤਂ ‘ਸਮ੍ਪਜਾਨਮੁਸਾਵਾਦੇ ਲਹੁਕਂ ਆਪਤ੍ਤਿਂ ਆਪਜ੍ਜਤਿ ਏਕਸ੍ਸ ਸਨ੍ਤਿਕੇ ਦੇਸਨਾਵਤ੍ਥੁਕ’ਨ੍ਤਿ. ਭਨ੍ਤੇ ਨਾਗਸੇਨ, ਕੋ ਪਨੇਤ੍ਥ ਵਿਸੇਸੋ, ਕਿਂ ਕਾਰਣਂ, ਯਞ੍ਚੇਕੇਨ ਮੁਸਾਵਾਦੇਨ ਉਚ੍ਛਿਜ੍ਜਤਿ, ਯਞ੍ਚੇਕੇਨ ਮੁਸਾਵਾਦੇਨ ਸਤੇਕਿਚ੍ਛੋ ਹੋਤਿ? ਯਦਿ, ਭਨ੍ਤੇ ਨਾਗਸੇਨ, ਭਗਵਤਾ ਭਣਿਤਂ ‘ਸਮ੍ਪਜਾਨਮੁਸਾਵਾਦੇ ਪਾਰਾਜਿਕੋ ਹੋਤੀ’ਤਿ, ਤੇਨ ਹਿ ‘ਸਮ੍ਪਜਾਨਮੁਸਾਵਾਦੇ ਲਹੁਕਂ ਆਪਤ੍ਤਿਂ ਆਪਜ੍ਜਤਿ ਏਕਸ੍ਸ ਸਨ੍ਤਿਕੇ ਦੇਸਨਾਵਤ੍ਥੁਕ’ਨ੍ਤਿ ਯਂ ਵਚਨਂ, ਤਂ ਮਿਚ੍ਛਾ. ਯਦਿ ਤਥਾਗਤੇਨ ਭਣਿਤਂ ‘ਸਮ੍ਪਜਾਨਮੁਸਾਵਾਦੇ ਲਹੁਕਂ ਆਪਤ੍ਤਿਂ ਆਪਜ੍ਜਤਿ ਏਕਸ੍ਸ ਸਨ੍ਤਿਕੇ ਦੇਸਨਾਵਤ੍ਥੁਕ’ਨ੍ਤਿ, ਤੇਨ ਹਿ ‘ਸਮ੍ਪਜਾਨਮੁਸਾਵਾਦੇ ਪਾਰਾਜਿਕੋ ਹੋਤੀ’ਤਿ ਤਮ੍ਪਿ ਵਚਨਂ ਮਿਚ੍ਛਾ. ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਤਵਾਨੁਪ੍ਪਤ੍ਤੋ, ਸੋ ਤਯਾ ਨਿਬ੍ਬਾਹਿਤਬ੍ਬੋ’’ਤਿ.

‘‘ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ‘ਸਮ੍ਪਜਾਨਮੁਸਾਵਾਦੇ ਪਾਰਾਜਿਕੋ ਹੋਤੀ’ਤਿ. ਭਣਿਤਞ੍ਚ ‘ਸਮ੍ਪਜਾਨਮੁਸਾਵਾਦੇ ਲਹੁਕਂ ਆਪਤ੍ਤਿਂ ਆਪਜ੍ਜਤਿ ਏਕਸ੍ਸ ਸਨ੍ਤਿਕੇ ਦੇਸਨਾਵਤ੍ਥੁਕ’ਨ੍ਤਿ, ਤਞ੍ਚ ਪਨ ਵਤ੍ਥੁਵਸੇਨ ਗਰੁਕਲਹੁਕਂ ਹੋਤਿ. ਤਂ ਕਿਂ ਮਞ੍ਞਸਿ, ਮਹਾਰਾਜ, ਇਧ ਕੋਚਿ ਪੁਰਿਸੋ ਪਰਸ੍ਸ ਪਾਣਿਨਾ ਪਹਾਰਂ ਦਦੇਯ੍ਯ, ਤਸ੍ਸ ਤੁਮ੍ਹੇ ਕਿਂ ਦਣ੍ਡਂ ਧਾਰੇਥਾ’’ਤਿ? ‘‘ਯਦਿ ਸੋ, ਭਨ੍ਤੇ, ਆਹ ‘ਨਕ੍ਖਮਾਮੀ’ਤਿ, ਤਸ੍ਸ ਮਯਂ ਅਕ੍ਖਮਮਾਨੇ ਕਹਾਪਣਂ ਹਰਾਪੇਮਾ’’ਤਿ ‘‘ਇਧ ਪਨ, ਮਹਾਰਾਜ, ਸੋ ਯੇਵ ਪੁਰਿਸੋ ਤਵ ਪਾਣਿਨਾ ਪਹਾਰਂ ਦਦੇਯ੍ਯ, ਤਸ੍ਸ ਪਨ ਕੋ ਦਣ੍ਡੋ’’ਤਿ? ‘‘ਹਤ੍ਥਮ੍ਪਿਸ੍ਸ, ਭਨ੍ਤੇ, ਛੇਦਾਪੇਯ੍ਯਾਮ, ਪਾਦਮ੍ਪਿ ਛੇਦਾਪੇਯ੍ਯਾਮ, ਯਾਵ ਸੀਸਂ ਕਲ਼ੀਰਚ੍ਛੇਜ੍ਜਂ ਛੇਦਾਪੇਯ੍ਯਾਮ, ਸਬ੍ਬਮ੍ਪਿ ਤਂ ਗੇਹਂ ਵਿਲੁਮ੍ਪਾਪੇਯ੍ਯਾਮ, ਉਭਤੋਪਕ੍ਖੇ [ਉਭਤੋਪਸ੍ਸੇ (ਸੀ. ਪੀ. ਕ.)] ਯਾਵ ਸਤ੍ਤਮਂ ਕੁਲਂ ਸਮੁਗ੍ਘਾਤਾਪੇਯ੍ਯਾਮਾ’’ਤਿ. ‘‘ਕੋ ਪਨੇਤ੍ਥ, ਮਹਾਰਾਜ, ਵਿਸੇਸੋ, ਕਿਂ ਕਾਰਣਂ, ਯਂ ਏਕਸ੍ਸ ਪਾਣਿਪ੍ਪਹਾਰੇ ਸੁਖੁਮੋ ਕਹਾਪਣੋ ਦਣ੍ਡੋ, ਯਂ ਤਵ ਪਾਣਿਪ੍ਪਹਾਰੇ ਹਤ੍ਥਚ੍ਛੇਜ੍ਜਂ ਪਾਦਚ੍ਛੇਜ੍ਜਂ ਯਾਵ ਕਲ਼ੀਰਚ੍ਛੇਜ੍ਜਂ ਸਬ੍ਬਗੇਹਾਦਾਨਂ ਉਭਤੋਪਕ੍ਖੇ ਯਾਵ ਸਤ੍ਤਮਕੁਲਾ ਸਮੁਗ੍ਘਾਤੋ’’ਤਿ? ‘‘ਮਨੁਸ੍ਸਨ੍ਤਰੇਨ, ਭਨ੍ਤੇ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਸਮ੍ਪਜਾਨਮੁਸਾਵਾਦੋ ਵਤ੍ਥੁਵਸੇਨ ਗਰੁਕਲਹੁਕੋ ਹੋਤੀ’’ਤਿ. ‘‘ਸਾਧੁ, ਭਨ੍ਤੇ ਨਾਗਸੇਨ, ਏਵਮੇਤਂ ਤਥਾ ਸਮ੍ਪਟਿਚ੍ਛਾਮੀ’’ਤਿ.

ਮੁਸਾਵਾਦਗਰੁਲਹੁਭਾਵਪਞ੍ਹੋ ਤਤਿਯੋ.

੪. ਬੋਧਿਸਤ੍ਤਧਮ੍ਮਤਾਪਞ੍ਹੋ

੪. ‘‘ਭਨ੍ਤੇ ਨਾਗਸੇਨ, ਭਾਸਿਤਮ੍ਪੇਤਂ ਭਗਵਤਾ ਧਮ੍ਮਤਾਧਮ੍ਮਪਰਿਯਾਯੇ ‘ਪੁਬ੍ਬੇਵ ਬੋਧਿਸਤ੍ਤਾਨਂ ਮਾਤਾਪਿਤਰੋ ਨਿਯਤਾ ਹੋਨ੍ਤਿ, ਬੋਧਿ ਨਿਯਤਾ ਹੋਤਿ, ਅਗ੍ਗਸਾਵਕਾ ਨਿਯਤਾ ਹੋਨ੍ਤਿ, ਪੁਤ੍ਤੋ ਨਿਯਤੋ ਹੋਤਿ, ਉਪਟ੍ਠਾਕੋ ਨਿਯਤੋ ਹੋਤੀ’ਤਿ. ਪੁਨ ਚ ਤੁਮ੍ਹੇ ਭਣਥ ‘ਤੁਸਿਤੇ ਕਾਯੇ ਠਿਤੋ ਬੋਧਿਸਤ੍ਤੋ ਅਟ੍ਠ ਮਹਾਵਿਲੋਕਨਾਨਿ ਵਿਲੋਕੇਤਿ, ਕਾਲਂ ਵਿਲੋਕੇਤਿ, ਦੀਪਂ ਵਿਲੋਕੇਤਿ, ਦੇਸਂ ਵਿਲੋਕੇਤਿ, ਕੁਲਂ ਵਿਲੋਕੇਤਿ, ਜਨੇਤ੍ਤਿਂ ਵਿਲੋਕੇਤਿ, ਆਯੁਂ ਵਿਲੋਕੇਤਿ, ਮਾਸਂ ਵਿਲੋਕੇਤਿ, ਨੇਕ੍ਖਮ੍ਮਂ ਵਿਲੋਕੇਤੀ’ਤਿ. ਭਨ੍ਤੇ ਨਾਗਸੇਨ, ਅਪਰਿਪਕ੍ਕੇ ਞਾਣੇ ਬੁਜ੍ਝਨਂ ਨਤ੍ਥਿ, ਪਰਿਪਕ੍ਕੇ ਞਾਣੇ ਨ ਸਕ੍ਕਾ ਨਿਮੇਸਨ੍ਤਰਮ੍ਪਿ ਆਗਮੇਤੁਂ, ਅਨਤਿਕ੍ਕਮਨੀਯਂ ਪਰਿਪਕ੍ਕਮਾਨਸਂ. ਕਸ੍ਮਾ ਬੋਧਿਸਤ੍ਤੋ ਕਾਲਂ ਵਿਲੋਕੇਹਿ ‘ਕਮ੍ਹਿ ਕਾਲੇ ਉਪ੍ਪਜ੍ਜਾਮੀ’ਤਿ. ਅਪਰਿਪਕ੍ਕੇ ਞਾਣੇ ਬੁਜ੍ਝਨਂ ਨਤ੍ਥਿ, ਪਰਿਪਕ੍ਕੇ ਞਾਣੇ ਨ ਸਕ੍ਕਾ ਨਿਮੇਸਨ੍ਤਰਮ੍ਪਿ ਆਗਮੇਤੁਂ, ਕਸ੍ਮਾ ਬੋਧਿਸਤ੍ਤੋ ਕੁਲਂ ਵਿਲੋਕੇਤਿ ‘ਕੁਮ੍ਹਿ ਕੁਲੇ ਉਪ੍ਪਜ੍ਜਾਮੀ’ਤਿ. ਯਦਿ, ਭਨ੍ਤੇ ਨਾਗਸੇਨ, ਪੁਬ੍ਬੇਵ ਬੋਧਿਸਤ੍ਤਸ੍ਸ ਮਾਤਾਪਿਤਰੋ ਨਿਯਤਾ, ਤੇਨ ਹਿ ‘ਕੁਲਂ ਵਿਲੋਕੇਤੀ’ਤਿ ਯਂ ਵਚਨਂ, ਤਂ ਮਿਚ੍ਛਾ. ਯਦਿ ਕੁਲਂ ਵਿਲੋਕੇਤਿ, ਤੇਨ ਹਿ ‘ਪੁਬ੍ਬੇਵ ਬੋਧਿਸਤ੍ਤਸ੍ਸ ਮਾਤਾਪਿਤਰੋ ਨਿਯਤਾ’ਤਿ ਤਮ੍ਪਿ ਵਚਨਂ ਮਿਚ੍ਛਾ. ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਤਵਾਨੁਪ੍ਪਤ੍ਤੋ, ਸੋ ਤਯਾ ਨਿਬ੍ਬਾਹਿਤਬ੍ਬੋ’’ਤਿ.

‘‘ਨਿਯਤਾ, ਮਹਾਰਾਜ, ਪੁਬ੍ਬੇਵ ਬੋਧਿਸਤ੍ਤਸ੍ਸ ਮਾਤਾਪਿਤਰੋ, ਕੁਲਞ੍ਚ ਬੋਧਿਸਤ੍ਤੋ ਵਿਲੋਕੇਤਿ. ਕਿਨ੍ਤਿ ਪਨ ਕੁਲਂ ਵਿਲੋਕੇਤਿ ‘ਯੇ ਮੇ ਮਾਤਾਪਿਤਰੋ, ਤੇ ਖਤ੍ਤਿਯਾ ਉਦਾਹੁ ਬ੍ਰਾਹ੍ਮਣਾ’ਤਿ. ਏਵਂ ਕੁਲਂ ਵਿਲੋਕੇਤਿ.

‘‘ਅਟ੍ਠਨ੍ਨਂ, ਮਹਾਰਾਜ, ਪੁਬ੍ਬੇਵ ਅਨਾਗਤਂ ਓਲੋਕੇਤਬ੍ਬਂ ਹੋਤਿ. ਕਤਮੇਸਂ ਅਟ੍ਠਨ੍ਨਂ? ਵਾਣਿਜਸ੍ਸ, ਮਹਾਰਾਜ, ਪੁਬ੍ਬੇਵ ਵਿਕ੍ਕਯਭਣ੍ਡਂ ਓਲੋਕੇਤਬ੍ਬਂ ਹੋਤਿ, ਹਤ੍ਥਿਨਾਗਸ੍ਸ ਪੁਬ੍ਬੇਵ ਸੋਣ੍ਡਾਯ ਅਨਾਗਤੋ ਮਗ੍ਗੋ ਓਲੋਕੇਤਬ੍ਬੋ ਹੋਤਿ, ਸਾਕਟਿਕਸ੍ਸ ਪੁਬ੍ਬੇਵ ਅਨਾਗਤਂ ਤਿਤ੍ਥਂ ਓਲੋਕੇਤਬ੍ਬਂ ਹੋਤਿ, ਨਿਯਾਮਕਸ੍ਸ ਪੁਬ੍ਬੇਵ ਅਨਾਗਤਂ ਤੀਰਂ ਓਲੋਕੇਤ੍ਵਾ ਨਾਵਾ ਪੇਸੇਤਬ੍ਬਾ ਹੋਤਿ, ਭਿਸਕ੍ਕਸ੍ਸ ਪੁਬ੍ਬੇਵ ਆਯੁਂ ਓਲੋਕੇਤ੍ਵਾ ਆਤੁਰੋ ਉਪਸਙ੍ਕਮਿਤਬ੍ਬੋ ਹੋਤਿ, ਉਤ੍ਤਰਸੇਤੁਸ੍ਸ ਪੁਬ੍ਬੇਵ ਥਿਰਾਥਿਰਭਾਵਂ ਜਾਨਿਤ੍ਵਾ ਅਭਿਰੁਹਿਤਬ੍ਬਂ ਹੋਤਿ, ਭਿਕ੍ਖੁਸ੍ਸ ਪੁਬ੍ਬੇਵ ਅਨਾਗਤਂ ਕਾਲਂ ਪਚ੍ਚਵੇਕ੍ਖਿਤ੍ਵਾ ਭੋਜਨਂ ਭੁਞ੍ਜਿਤਬ੍ਬਂ ਹੋਤਿ, ਬੋਧਿਸਤ੍ਤਾਨਂ ਪੁਬ੍ਬੇਵ ਕੁਲਂ ਓਲੋਕੇਤਬ੍ਬਂ ਹੋਤਿ ‘ਖਤ੍ਤਿਯਕੁਲਂ ਵਾ ਬ੍ਰਾਹ੍ਮਣਕੁਲਂ ਵਾ’ਤਿ. ਇਮੇਸਂ ਖੋ, ਮਹਾਰਾਜ, ਅਟ੍ਠਨ੍ਨਂ ਪੁਬ੍ਬੇਵ ਅਨਾਗਤਂ ਓਲੋਕੇਤਬ੍ਬਂ ਹੋਤੀ’’ਤਿ. ‘‘ਸਾਧੁ, ਭਨ੍ਤੇ ਨਾਗਸੇਨ, ਏਵਮੇਤਂ ਤਥਾ ਸਮ੍ਪਟਿਚ੍ਛਾਮੀ’’ਤਿ.

ਬੋਧਿਸਤ੍ਤਧਮ੍ਮਤਾਪਞ੍ਹੋ ਚਤੁਤ੍ਥੋ.

੫. ਅਤ੍ਤਨਿਪਾਤਨਪਞ੍ਹੋ

੫. ‘‘ਭਨ੍ਤੇ ਨਾਗਸੇਨ, ਭਾਸਿਤਮ੍ਪੇਤਂ ਭਗਵਤਾ ‘ਨ, ਭਿਕ੍ਖਵੇ, ਅਤ੍ਤਾਨਂ ਪਾਤੇਤਬ੍ਬਂ, ਯੋ ਪਾਤੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’ਤਿ. ਪੁਨ ਚ ਤੁਮ੍ਹੇ ਭਣਥ ‘ਯਤ੍ਥ ਕਤ੍ਥਚਿ ਭਗਵਾ ਸਾਵਕਾਨਂ ਧਮ੍ਮਂ ਦੇਸਯਮਾਨੋ ਅਨੇਕਪਰਿਯਾਯੇਨ ਜਾਤਿਯਾ ਜਰਾਯ ਬ੍ਯਾਧਿਨੋ ਮਰਣਸ੍ਸ ਸਮੁਚ੍ਛੇਦਾਯ ਧਮ੍ਮਂ ਦੇਸੇਤਿ, ਯੋ ਹਿ ਕੋਚਿ ਜਾਤਿਜਰਾਬ੍ਯਾਧਿਮਰਣਂ ਸਮਤਿਕ੍ਕਮਤਿ, ਤਂ ਪਰਮਾਯ ਪਸਂਸਾਯ ਪਸਂਸਤੀ’ਤਿ. ਯਦਿ, ਭਨ੍ਤੇ ਨਾਗਸੇਨ, ਭਗਵਤਾ ਭਣਿਤਂ ‘ਨ, ਭਿਕ੍ਖਵੇ, ਅਤ੍ਤਾਨਂ ਪਾਤੇਤਬ੍ਬਂ, ਯੋ ਪਾਤੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’ਤਿ, ਤੇਨ ਹਿ ‘ਜਾਤਿਯਾ ਜਰਾਯ ਬ੍ਯਾਧਿਨੋ ਮਰਣਸ੍ਸ ਸਮੁਚ੍ਛੇਦਾਯ ਧਮ੍ਮਂ ਦੇਸੇਤੀ’ਤਿ ਯਂ ਵਚਨਂ, ਤਂ ਮਿਚ੍ਛਾ. ਯਦਿ ਜਾਤਿਯਾ ਜਰਾਯ ਬ੍ਯਾਧਿਨੋ ਮਰਣਸ੍ਸ ਸਮੁਚ੍ਛੇਦਾਯ ਧਮ੍ਮਂ ਦੇਸੇਤਿ, ਤੇਨ ਹਿ ‘ਨ, ਭਿਕ੍ਖਵੇ, ਅਤ੍ਤਾਨਂ ਪਾਤੇਤਬ੍ਬਂ, ਯੋ ਪਾਤੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ ਤਮ੍ਪਿ ਵਚਨਂ ਮਿਚ੍ਛਾ. ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਤਵਾਨੁਪ੍ਪਤ੍ਤੋ, ਸੋ ਤਯਾ ਨਿਬ੍ਬਾਹਿਤਬ੍ਬੋ’’ਤਿ.

‘‘ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ‘ਨ, ਭਿਕ੍ਖਵੇ, ਅਤ੍ਤਾਨਂ ਪਾਤੇਤਬ੍ਬਂ, ਯੋ ਪਾਤੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’ਤਿ. ਯਤ੍ਥ ਕਤ੍ਥਚਿ ਭਗਵਤਾ ਸਾਵਕਾਨਂ ਧਮ੍ਮਂ ਦੇਸਯਾਮਾਨੇਨ ਚ ਅਨੇਕਪਰਿਯਾਯੇਨ ਜਾਤਿਯਾ ਜਰਾਯ ਬ੍ਯਾਧਿਨੋ ਮਰਣਸ੍ਸ ਸਮੁਚ੍ਛੇਦਾਯ ਧਮ੍ਮੋ ਦੇਸਿਤੋ, ਤਤ੍ਥ ਪਨ ਕਾਰਣਂ ਅਤ੍ਥਿ, ਯੇਨ ਭਗਵਾ ਕਾਰਣੇਨ ਪਟਿਕ੍ਖਿਪਿ ਸਮਾਦਪੇਸਿ ਚਾ’’ਤਿ.

‘‘ਕਿਂ ਪਨੇਤ੍ਥ, ਭਨ੍ਤੇ ਨਾਗਸੇਨ, ਕਾਰਣਂ, ਯੇਨ ਭਗਵਾ ਕਾਰਣੇਨ ਪਟਿਕ੍ਖਿਪਿ ਸਮਾਦਪੇਸਿ ਚਾ’’ਤਿ? ‘‘ਸੀਲਵਾ, ਮਹਾਰਾਜ, ਸੀਲਸਮ੍ਪਨ੍ਨੋ ਅਗਦਸਮੋ ਸਤ੍ਤਾਨਂ ਕਿਲੇਸਵਿਸਵਿਨਾਸਨੇ, ਓਸਧਸਮੋ ਸਤ੍ਤਾਨਂ ਕਿਲੇਸਬ੍ਯਾਧਿਵੂਪਸਮੇ, ਉਦਕਸਮੋ ਸਤ੍ਤਾਨਂ ਕਿਲੇਸਰਜੋਜਲ੍ਲਾਪਹਰਣੇ, ਮਣਿਰਤਨਸਮੋ ਸਤ੍ਤਾਨਂ ਸਬ੍ਬਸਮ੍ਪਤ੍ਤਿਦਾਨੇ, ਨਾਵਾਸਮੋ ਸਤ੍ਤਾਨਂ ਚਤੁਰੋਘਪਾਰਗਮਨੇ, ਸਤ੍ਥਵਾਹਸਮੋ ਸਤ੍ਤਾਨਂ ਜਾਤਿਕਨ੍ਤਾਰਤਾਰਣੇ, ਵਾਤਸਮੋ ਸਤ੍ਤਾਨਂ ਤਿਵਿਧਗ੍ਗਿਸਨ੍ਤਾਪਨਿਬ੍ਬਾਪਨੇ, ਮਹਾਮੇਘਸਮੋ ਸਤ੍ਤਾਨਂ ਮਾਨਸਪਰਿਪੂਰਣੇ, ਆਚਰਿਯਸਮੋ ਸਤ੍ਤਾਨਂ ਕੁਸਲਸਿਕ੍ਖਾਪਨੇ, ਸੁਦੇਸਕਸਮੋ ਸਤ੍ਤਾਨਂ ਖੇਮਪਥਮਾਚਿਕ੍ਖਣੇ. ਏਵਰੂਪੋ, ਮਹਾਰਾਜ, ਬਹੁਗੁਣੋ ਅਨੇਕਗੁਣੋ ਅਪ੍ਪਮਾਣਗੁਣੋ ਗੁਣਰਾਸਿ ਗੁਣਪੁਞ੍ਜੋ ਸਤ੍ਤਾਨਂ ਵਡ੍ਢਿਕਰੋ ਸੀਲਵਾ ‘ਮਾ ਵਿਨਸ੍ਸੀ’ਤਿ ਸਤ੍ਤਾਨਂ ਅਨੁਕਮ੍ਪਾਯ ਭਗਵਾ ਸਿਕ੍ਖਾਪਦਂ ਪਞ੍ਞਪੇਸਿ ‘ਨ, ਭਿਕ੍ਖਵੇ, ਅਤ੍ਤਾਨਂ ਪਾਤੇਤਬ੍ਬਂ, ਯੋ ਪਾਤੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’ਤਿ. ਇਦਮੇਤ੍ਥ, ਮਹਾਰਾਜ, ਕਾਰਣਂ, ਯੇਨ ਕਾਰਣੇਨ ਭਗਵਾ ਪਟਿਕ੍ਖਿਪਿ. ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਕੁਮਾਰਕਸ੍ਸਪੇਨ ਵਿਚਿਤ੍ਰਕਥਿਕੇਨ ਪਾਯਾਸਿਰਾਜਞ੍ਞਸ੍ਸ ਪਰਲੋਕਂ ਦੀਪਯਮਾਨੇਨ ‘ਯਥਾ ਯਥਾ ਖੋ ਰਾਜਞ੍ਞ ਸਮਣਬ੍ਰਾਹ੍ਮਣਾ ਸੀਲਵਨ੍ਤੋ ਕਲ੍ਯਾਣਧਮ੍ਮਾ ਚਿਰਂ ਦੀਘਮਦ੍ਧਾਨਂ ਤਿਟ੍ਠਨ੍ਤਿ, ਤਥਾ ਤਥਾ ਬਹੁਂ ਪੁਞ੍ਞਂ ਪਸਵਨ੍ਤਿ, ਬਹੁਜਨਹਿਤਾਯ ਚ ਪਟਿਪਜ੍ਜਨ੍ਤਿ ਬਹੁਜਨਸੁਖਾਯ ਲੋਕਾਨੁਕਮ੍ਪਾਯ ਅਤ੍ਥਾਯ ਹਿਤਾਯ ਸੁਖਾਯ ਦੇਵਮਨੁਸ੍ਸਾਨ’ਨ੍ਤਿ.

‘‘ਕੇਨ ਪਨ ਕਾਰਣੇਨ ਭਗਵਾ ਸਮਾਦਪੇਸਿ? ਜਾਤਿਪਿ, ਮਹਾਰਾਜ, ਦੁਕ੍ਖਾ, ਜਰਾਪਿ ਦੁਕ੍ਖਾ, ਬ੍ਯਾਧਿਪਿ ਦੁਕ੍ਖੋ, ਮਰਣਮ੍ਪਿ ਦੁਕ੍ਖਂ, ਸੋਕੋਪਿ ਦੁਕ੍ਖੋ, ਪਰਿਦੇਵੋਪਿ ਦੁਕ੍ਖੋ, ਦੁਕ੍ਖਮ੍ਪਿ ਦੁਕ੍ਖਂ, ਦੋਮਨਸ੍ਸਮ੍ਪਿ ਦੁਕ੍ਖਂ, ਉਪਾਯਾਸੋਪਿ ਦੁਕ੍ਖੋ, ਅਪ੍ਪਿਯੇਹਿ ਸਮ੍ਪਯੋਗੋਪਿ ਦੁਕ੍ਖੋ, ਪਿਯੇਹਿ ਵਿਪ੍ਪਯੋਗੋਪਿ ਦੁਕ੍ਖੋ, ਮਾਤੁਮਰਣਮ੍ਪਿ ਦੁਕ੍ਖਂ, ਪਿਤੁਮਰਣਮ੍ਪਿ ਦੁਕ੍ਖਂ, ਭਾਤੁਮਰਣਮ੍ਪਿ ਦੁਕ੍ਖਂ, ਭਗਿਨਿਮਰਣਮ੍ਪਿ ਦੁਕ੍ਖਂ, ਪੁਤ੍ਤਮਰਣਮ੍ਪਿ ਦੁਕ੍ਖਂ, ਦਾਰਮਰਣਮ੍ਪਿ ਦੁਕ੍ਖਂ, ਦਾਸਮਰਣਮ੍ਪਿ ਦੁਕ੍ਖਂ [ਇਦਂ ਵਾਕ੍ਯਂ ਸੀ. ਪੀ. ਪੋਤ੍ਥਕੇਸੁ ਨਤ੍ਥਿ], ਞਾਤਿਮਰਣਮ੍ਪਿ ਦੁਕ੍ਖਂ, ਞਾਤਿਬ੍ਯਸਨਮ੍ਪਿ ਦੁਕ੍ਖਂ, ਰੋਗਬ੍ਯਸਨਮ੍ਪਿ ਦੁਕ੍ਖਂ, ਭੋਗਬ੍ਯਸਨਮ੍ਪਿ ਦੁਕ੍ਖਂ, ਸੀਲਬ੍ਯਸਨਮ੍ਪਿ ਦੁਕ੍ਖਂ, ਦਿਟ੍ਠਿਬ੍ਯਸਨਮ੍ਪਿ ਦੁਕ੍ਖਂ, ਰਾਜਭਯਮ੍ਪਿ ਦੁਕ੍ਖਂ, ਚੋਰਭਯਮ੍ਪਿ ਦੁਕ੍ਖਂ, ਵੇਰਿਭਯਮ੍ਪਿ ਦੁਕ੍ਖਂ, ਦੁਬ੍ਭਿਕ੍ਖਭਯਮ੍ਪਿ ਦੁਕ੍ਖਂ, ਅਗ੍ਗਿਭਯਮ੍ਪਿ ਦੁਕ੍ਖਂ, ਉਦਕਭਯਮ੍ਪਿ ਦੁਕ੍ਖਂ, ਊਮਿਭਯਮ੍ਪਿ ਦੁਕ੍ਖਂ, ਆਵਟ੍ਟਭਯਮ੍ਪਿ ਦੁਕ੍ਖਂ, ਕੁਮ੍ਭੀਲਭਯਮ੍ਪਿ ਦੁਕ੍ਖਂ, ਸੁਸੁਕਾਭਯਮ੍ਪਿ ਦੁਕ੍ਖਂ, ਅਤ੍ਤਾਨੁਵਾਦਭਯਮ੍ਪਿ ਦੁਕ੍ਖਂ, ਪਰਾਨੁਵਾਦਭਯਮ੍ਪਿ ਦੁਕ੍ਖਂ, ਦਣ੍ਡਭਯਮ੍ਪਿ ਦੁਕ੍ਖਂ, ਦੁਗ੍ਗਤਿਭਯਮ੍ਪਿ ਦੁਕ੍ਖਂ, ਪਰਿਸਾਸਾਰਜ੍ਜਭਯਮ੍ਪਿ ਦੁਕ੍ਖਂ, ਆਜੀਵਕਭਯਮ੍ਪਿ ਦੁਕ੍ਖਂ, ਮਰਣਭਯਮ੍ਪਿ ਦੁਕ੍ਖਂ, ਵੇਤ੍ਤੇਹਿ ਤਾਲ਼ਨਮ੍ਪਿ ਦੁਕ੍ਖਂ, ਕਸਾਹਿ ਤਾਲ਼ਨਮ੍ਪਿ ਦੁਕ੍ਖਂ, ਅਦ੍ਧਦਣ੍ਡਕੇਹਿ ਤਾਲ਼ਨਮ੍ਪਿ ਦੁਕ੍ਖਂ, ਹਤ੍ਥਚ੍ਛੇਦਨਮ੍ਪਿ ਦੁਕ੍ਖਂ, ਪਾਦਚ੍ਛੇਦਨਮ੍ਪਿ ਦੁਕ੍ਖਂ, ਹਤ੍ਥਪਾਦਚ੍ਛੇਦਨਮ੍ਪਿ ਦੁਕ੍ਖਂ, ਕਣ੍ਣਚ੍ਛੇਦਨਮ੍ਪਿ ਦੁਕ੍ਖਂ, ਨਾਸਚ੍ਛੇਦਨਮ੍ਪਿ ਦੁਕ੍ਖਂ, ਕਣ੍ਣਨਾਸਚ੍ਛੇਦਨਮ੍ਪਿ ਦੁਕ੍ਖਂ, ਬਿਲਙ੍ਗਥਾਲਿਕਮ੍ਪਿ ਦੁਕ੍ਖਂ, ਸਙ੍ਖਮੁਣ੍ਡਿਕਮ੍ਪਿ ਦੁਕ੍ਖਂ, ਰਾਹੁਮੁਖਮ੍ਪਿ ਦੁਕ੍ਖਂ, ਜੋਤਿਮਾਲਿਕਮ੍ਪਿ ਦੁਕ੍ਖਂ, ਹਤ੍ਥਪਜ੍ਜੋਤਿਕਮ੍ਪਿ ਦੁਕ੍ਖਂ, ਏਰਕਵਤ੍ਤਿਕਮ੍ਪਿ ਦੁਕ੍ਖਂ, ਚੀਰਕਵਾਸਿਕਮ੍ਪਿ ਦੁਕ੍ਖਂ, ਏਣੇਯ੍ਯਕਮ੍ਪਿ ਦੁਕ੍ਖਂ, ਬਲ਼ਿਸਮਂਸਿਕਮ੍ਪਿ ਦੁਕ੍ਖਂ, ਕਹਾਪਣਿਕਮ੍ਪਿ ਦੁਕ੍ਖਂ, ਖਾਰਾਪਤਚ੍ਛਿਕਮ੍ਪਿ ਦੁਕ੍ਖਂ, ਪਲਿਘਪਰਿਵਤ੍ਤਿਕਮ੍ਪਿ ਦੁਕ੍ਖਂ, ਪਲਾਲਪੀਠਕਮ੍ਪਿ ਦੁਕ੍ਖਂ, ਤਤ੍ਤੇਨ ਤੇਲੇਨ ਓਸਿਞ੍ਚਨਮ੍ਪਿ ਦੁਕ੍ਖਂ, ਸੁਨਖੇਹਿ ਖਾਦਾਪਨਮ੍ਪਿ ਦੁਕ੍ਖਂ, ਜੀਵਸੂਲਾਰੋਪਨਮ੍ਪਿ ਦੁਕ੍ਖਂ, ਅਸਿਨਾ ਸੀਸਚ੍ਛੇਦਨਮ੍ਪਿ ਦੁਕ੍ਖਂ, ਏਵਰੂਪਾਨਿ, ਮਹਾਰਾਜ, ਬਹੁਵਿਧਾਨਿ ਅਨੇਕਵਿਧਾਨਿ ਦੁਕ੍ਖਾਨਿ ਸਂਸਾਰਗਤੋ ਅਨੁਭਵਤਿ.

‘‘ਯਥਾ, ਮਹਾਰਾਜ, ਹਿਮਵਨ੍ਤਪਬ੍ਬਤੇ ਅਭਿਵੁਟ੍ਠਂ ਉਦਕਂ ਗਙ੍ਗਾਯ ਨਦਿਯਾ ਪਾਸਾਣ ਸਕ੍ਖਰ ਖਰ ਮਰੁਮ੍ਬ ਆਵਟ੍ਟ ਗਗ੍ਗਲਕ ਊਮਿਕਵਙ੍ਕਚਦਿਕ ਆਵਰਣਨੀਵਰਣਮੂਲਕਸਾਖਾਸੁ ਪਰਿਯੋਤ੍ਥਰਤਿ, ਏਵਮੇਵ ਖੋ, ਮਹਾਰਾਜ, ਏਵਰੂਪਾਨਿ ਬਹੁਵਿਧਾਨਿ ਅਨੇਕਵਿਧਾਨਿ ਦੁਕ੍ਖਾਨਿ ਸਂਸਾਰਗਤੋ ਅਨੁਭਵਤਿ. ਪਵਤ੍ਤਂ, ਮਹਾਰਾਜ, ਦੁਕ੍ਖਂ, ਅਪ੍ਪਵਤ੍ਤਂ ਸੁਖਂ. ਅਪ੍ਪਵਤ੍ਤਸ੍ਸ ਗੁਣਂ ਪਵਤ੍ਤਸ੍ਸ [ਪਵਤ੍ਤੇ (ਸੀ. ਪੀ. ਕ.)] ਚ ਭਯਂ ਦੀਪਯਮਾਨੋ, ਮਹਾਰਾਜ, ਭਗਵਾ ਅਪ੍ਪਵਤ੍ਤਸ੍ਸ ਸਚ੍ਛਿਕਿਰਿਯਾਯ ਜਾਤਿਜਰਾਬ੍ਯਾਧਿਮਰਣਸਮਤਿਕ੍ਕਮਾਯ ਸਮਾਦਪੇਸਿ, ਇਦਮੇਤ੍ਥ, ਮਹਾਰਾਜ, ਕਾਰਣਂ, ਯੇਨ ਕਾਰਣੇਨ ਭਗਵਾ ਸਮਾਦਪੇਸੀ’’ਤਿ. ‘‘ਸਾਧੁ, ਭਨ੍ਤੇ ਨਾਗਸੇਨ, ਸੁਨਿਬ੍ਬੇਠਿਤੋ ਪਞ੍ਹੋ, ਸੁਕਥਿਤਂ ਕਾਰਣਂ, ਏਵਮੇਤਂ ਤਥਾ ਸਮ੍ਪਟਿਚ੍ਛਾਮੀ’’ਤਿ.

ਅਤ੍ਤਨਿਪਾਤਨਪਞ੍ਹੋ ਪਞ੍ਚਮੋ.

੬. ਮੇਤ੍ਤਾਭਾਵਨਾਨਿਸਂਸਪਞ੍ਹੋ

੬. ‘‘ਭਨ੍ਤੇ ਨਾਗਸੇਨ, ਭਾਸਿਤਮ੍ਪੇਤਂ ਭਗਵਤਾ ‘ਮੇਤ੍ਤਾਯ, ਭਿਕ੍ਖਵੇ, ਚੇਤੋਵਿਮੁਤ੍ਤਿਯਾ ਆਸੇਵਿਤਾਯ ਭਾਵਿਤਾਯ ਬਹੁਲੀਕਤਾਯ ਯਾਨੀਕਤਾਯ ਵਤ੍ਥੁਕਤਾਯ ਅਨੁਟ੍ਠਿਤਾਯ ਪਰਿਚਿਤਾਯ ਸੁਸਮਾਰਦ੍ਧਾਯ ਏਕਾਦਸਾਨਿਸਂਸਾ ਪਾਟਿਕਙ੍ਖਾ. ਕਤਮੇ ਏਕਾਦਸ? ਸੁਖਂ ਸੁਪਤਿ, ਸੁਖਂ ਪਟਿਬੁਜ੍ਝਤਿ, ਨ ਪਾਪਕਂ ਸੁਪਿਨਂ ਪਸ੍ਸਤਿ, ਮਨੁਸ੍ਸਾਨਂ ਪਿਯੋ ਹੋਤਿ, ਅਮਨੁਸ੍ਸਾਨਂ ਪਿਯੋ ਹੋਤਿ, ਦੇਵਤਾ ਰਕ੍ਖਨ੍ਤਿ, ਨਾਸ੍ਸ ਅਗ੍ਗਿ ਵਾ ਵਿਸਂ ਵਾ ਸਤ੍ਥਂ ਵਾ ਕਮਤਿ [ਸਤ੍ਥਂ ਕਮਤਿ (ਸ੍ਯਾ.) ਅ. ਨਿ. ੧੧.੧੫ ਪਸ੍ਸਿਤਬ੍ਬਂ], ਤੁਵਟਂ ਚਿਤ੍ਤਂ ਸਮਾਧਿਯਤਿ, ਮੁਖਵਣ੍ਣੋ ਵਿਪ੍ਪਸੀਦਤਿ, ਅਸਮ੍ਮੂਲ਼੍ਹੋ ਕਾਲਂ ਕਰੋਤਿ, ਉਤ੍ਤਰਿਂ ਅਪ੍ਪਟਿਵਿਜ੍ਝਨ੍ਤੋ ਬ੍ਰਹ੍ਮਲੋਕੂਪਗੋ ਹੋਤੀ’ਤਿ. ਪੁਨ ਚ ਤੁਮ੍ਹੇ ਭਣਥ ‘ਸਾਮੋ ਕੁਮਾਰੋ ਮੇਤ੍ਤਾਵਿਹਾਰੀ ਮਿਗਸਙ੍ਘੇਨ ਪਰਿਵੁਤੋ ਪਵਨੇ ਵਿਚਰਨ੍ਤੋ ਪੀਲ਼ਿਯਕ੍ਖੇਨ ਰਞ੍ਞਾ ਵਿਦ੍ਧੋ ਵਿਸਪੀਤੇਨ ਸਲ੍ਲੇਨ ਤਤ੍ਥੇਵ ਮੁਚ੍ਛਿਤੋ ਪਤਿਤੋ’ਤਿ.

‘‘ਯਦਿ, ਭਨ੍ਤੇ ਨਾਗਸੇਨ, ਭਗਵਤਾ ਭਣਿਤਂ ‘ਮੇਤ੍ਤਾਯ ਭਿਕ੍ਖਵੇ…ਪੇ… ਬ੍ਰਹ੍ਮਲੋਕੂਪਗੋ ਹੋਤੀ’ਤਿ, ਤੇਨ ਹਿ ‘‘ਸਾਮੋ ਕੁਮਾਰੋ ਮੇਤ੍ਤਾਵਿਹਾਰੀ ਮਿਗਸਙ੍ਘੇਨ ਪਰਿਵੁਤੋ ਪਵਨੇ ਵਿਚਰਨ੍ਤੋ ਪੀਲ਼ਿਯਕ੍ਖੇਨ ਰਞ੍ਞਾ ਵਿਦ੍ਧੋ ਵਿਸਪੀਤੇਨ ਸਲ੍ਲੇਨ ਤਤ੍ਥੇਵ ਮੁਚ੍ਛਿਤੋ ਪਤਿਤੋ’ਤਿ ਯਂ ਵਚਨਂ, ਤਂ ਮਿਚ੍ਛਾ. ਯਦਿ ਸਾਮੋ ਕੁਮਾਰੋ ਮੇਤ੍ਤਾਵਿਹਾਰੀ ਮਿਗਸਙ੍ਘੇਨ ਪਰਿਵੁਤੋ ਪਵਨੇ ਵਿਚਰਨ੍ਤੋ ਪੀਲ਼ਿਯਕ੍ਖੇਨ ਰਞ੍ਞਾ ਵਿਦ੍ਧੋ ਵਿਸਪੀਤੇਨ ਸਲ੍ਲੇਨ ਤਤ੍ਥੇਵ ਮੁਚ੍ਛਿਤੋ ਪਤਿਤੋ, ਤੇਨ ਹਿ ‘ਮੇਤ੍ਤਾਯ, ਭਿਕ੍ਖਵੇ…ਪੇ… ਸਤ੍ਥਂ ਵਾ ਕਮਤੀ’ਤਿ ਤਮ੍ਪਿ ਵਚਨਂ ਮਿਚ੍ਛਾ. ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਸੁਨਿਪੁਣੋ ਪਰਿਸਣ੍ਹੋ ਸੁਖੁਮੋ ਗਮ੍ਭੀਰੋ, ਅਪਿ ਸੁਨਿਪੁਣਾਨਂ ਮਨੁਜਾਨਂ ਗਤ੍ਤੇ ਸੇਦਂ ਮੋਚੇਯ੍ਯ, ਸੋ ਤਵਾਨੁਪ੍ਪਤ੍ਤੋ, ਵਿਜਟੇਹਿ ਤਂ ਮਹਾਜਟਾਜਟਿਤਂ, ਅਨਾਗਤਾਨਂ ਜਿਨਪੁਤ੍ਤਾਨਂ ਚਕ੍ਖੁਂ ਦੇਹਿ ਨਿਬ੍ਬਾਹਨਾਯਾ’’ਤਿ.

‘‘ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ‘ਮੇਤ੍ਤਾਯ ਭਿਕ੍ਖਵੇ…ਪੇ... ਸਤ੍ਥਂ ਵਾ ਕਮਤੀ’ਤਿ. ਸਾਮੋ ਚ ਕੁਮਾਰੋ ਮੇਤ੍ਤਾਵਿਹਾਰੀ ਮਿਗਸਙ੍ਘੇਨ ਪਰਿਵੁਤੋ ਪਵਨੇ ਵਿਚਰਨ੍ਤੋ ਪੀਲ਼ਿਯਕ੍ਖੇਨ ਰਞ੍ਞਾ ਵਿਦ੍ਧੋ ਵਿਸਪੀਤੇਨ ਸਲ੍ਲੇਨ ਤਤ੍ਥੇਵ ਮੁਚ੍ਛਿਤੋ ਪਤਿਤੋ, ਤਤ੍ਥ ਪਨ, ਮਹਾਰਾਜ, ਕਾਰਣਂ ਅਤ੍ਥਿ. ਕਤਮਂ ਤਤ੍ਥ ਕਾਰਣਂ? ਨੇਤੇ, ਮਹਾਰਾਜ, ਗੁਣਾ ਪੁਗ੍ਗਲਸ੍ਸ, ਮੇਤ੍ਤਾਭਾਵਨਾਯੇਤੇ ਗੁਣਾ, ਸਾਮੋ, ਮਹਾਰਾਜ, ਕੁਮਾਰੋ ਘਟਂ ਉਕ੍ਖਿਪਨ੍ਤੋ ਤਸ੍ਮਿਂ ਖਣੇ ਮੇਤ੍ਤਾਭਾਵਨਾਯ ਪਮਤ੍ਤੋ ਅਹੋਸਿ.

‘‘ਯਸ੍ਮਿਂ, ਮਹਾਰਾਜ, ਖਣੇ ਪੁਗ੍ਗਲੋ ਮੇਤ੍ਤਂ ਸਮਾਪਨ੍ਨੋ ਹੋਤਿ, ਨ ਤਸ੍ਸ ਪੁਗ੍ਗਲਸ੍ਸ ਤਸ੍ਮਿਂ ਖਣੇ ਅਗ੍ਗਿ ਵਾ ਵਿਸਂ ਵਾ ਸਤ੍ਥਂ ਵਾ ਕਮਤਿ. ਤਸ੍ਸ ਯੇ ਕੇਚਿ ਅਹਿਤਕਾਮਾ ਉਪਗਨ੍ਤ੍ਵਾ ਤਂ ਨ ਪਸ੍ਸਨ੍ਤਿ, ਨ ਤਸ੍ਮਿਂ ਓਕਾਸਂ ਲਭਨ੍ਤਿ. ਨੇਤੇ, ਮਹਾਰਾਜ, ਗੁਣਾ ਪੁਗ੍ਗਲਸ੍ਸ, ਮੇਤ੍ਤਾਭਾਵਨਾਯੇਤੇ ਗੁਣਾ. ਇਧ, ਮਹਾਰਾਜ, ਪੁਰਿਸੋ ਸਙ੍ਗਾਮਸੂਰੋ ਅਭੇਜ੍ਜਕਵਚਜਾਲਿਕਂ ਸਨ੍ਨਯ੍ਹਿਤ੍ਵਾ ਸਙ੍ਗਾਮਂ ਓਤਰੇਯ੍ਯ, ਤਸ੍ਸ ਸਰਾ ਖਿਤ੍ਤਾ ਉਪਗਨ੍ਤ੍ਵਾ ਪਤਨ੍ਤਿ ਵਿਕਿਰਨ੍ਤਿ, ਨ ਤਸ੍ਮਿਂ ਓਕਾਸਂ ਲਭਨ੍ਤਿ, ਨੇਸੋ, ਮਹਾਰਾਜ, ਗੁਣੋ ਸਙ੍ਗਾਮਸੂਰਸ੍ਸ, ਅਭੇਜ੍ਜਕਵਚਜਾਲਿਕਾਯੇਸੋ ਗੁਣੋ, ਯਸ੍ਸ ਸਰਾ ਖਿਤ੍ਤਾ ਉਪਗਨ੍ਤ੍ਵਾ ਪਤਨ੍ਤਿ ਵਿਕਿਰਨ੍ਤਿ. ਏਵਮੇਵ ਖੋ, ਮਹਾਰਾਜ, ਨੇਤੇ ਗੁਣਾ ਪੁਗ੍ਗਲਸ੍ਸ, ਮੇਤ੍ਤਾਭਾਵਨਾਯੇਤੇ ਗੁਣਾ.

‘‘ਯਸ੍ਮਿਂ, ਮਹਾਰਾਜ, ਖਣੇ ਪੁਗ੍ਗਲੋ ਮੇਤ੍ਤਂ ਸਮਾਪਨ੍ਨੋ ਹੋਤਿ, ਨ ਤਸ੍ਸ ਪੁਗ੍ਗਲਸ੍ਸ ਤਸ੍ਮਿਂ ਖਣੇ ਅਗ੍ਗਿ ਵਾ ਵਿਸਂ ਵਾ ਸਤ੍ਥਂ ਵਾ ਕਮਤਿ. ਤਸ੍ਸ ਯੇ ਕੇਚਿ ਅਹਿਤਕਾਮਾ ਉਪਗਨ੍ਤ੍ਵਾ ਤਂ ਨ ਪਸ੍ਸਨ੍ਤਿ, ਤਸ੍ਮਿਂ ਓਕਾਸਂ ਨ ਲਭਨ੍ਤਿ, ਨੇਤੇ, ਮਹਾਰਾਜ, ਗੁਣਾ ਪੁਗ੍ਗਲਸ੍ਸ, ਮੇਤ੍ਤਾਭਾਵਨਾਯੇਤੇ ਗੁਣਾ. ਇਧ ਪਨ, ਮਹਾਰਾਜ, ਪੁਰਿਸੋ ਦਿਬ੍ਬਂ ਅਨ੍ਤਰਧਾਨਂ ਮੂਲਂ ਹਤ੍ਥੇ ਕਰੇਯ੍ਯ, ਯਾਵ ਤਂ ਮੂਲਂ ਤਸ੍ਸ ਹਤ੍ਥਗਤਂ ਹੋਤਿ, ਤਾਵ ਨ ਅਞ੍ਞੋ ਕੋਚਿ ਪਕਤਿਮਨੁਸ੍ਸੋ ਤਂ ਪੁਰਿਸਂ ਪਸ੍ਸਤਿ. ਨੇਸੋ, ਮਹਾਰਾਜ, ਗੁਣੋ ਪੁਰਿਸਸ੍ਸ, ਮੂਲਸ੍ਸੇਸੋ ਗੁਣੋ ਅਨ੍ਤਰਧਾਨਸ੍ਸ, ਯਂ ਸੋ ਪਕਤਿਮਨੁਸ੍ਸਾਨਂ ਚਕ੍ਖੁਪਥੇ ਨ ਦਿਸ੍ਸਤਿ. ਏਵਮੇਵ ਖੋ, ਮਹਾਰਾਜ, ਨੇਤੇ ਗੁਣਾ ਪੁਗ੍ਗਲਸ੍ਸ, ਮੇਤ੍ਤਾਭਾਵਨਾਯੇਤੇ ਗੁਣਾ.

‘‘ਯਸ੍ਮਿਂ, ਮਹਾਰਾਜ, ਖਣੇ ਪੁਗ੍ਗਲੋ ਮੇਤ੍ਤਂ ਸਮਾਪਨ੍ਨੋ ਹੋਤਿ, ਨ ਤਸ੍ਸ ਪੁਗ੍ਗਲਸ੍ਸ ਤਸ੍ਮਿਂ ਖਣੇ ਅਗ੍ਗਿ ਵਾ ਵਿਸਂ ਵਾ ਸਤ੍ਥਂ ਵਾ ਕਮਤਿ. ਤਸ੍ਸ ਯੇ ਕੇਚਿ ਅਹਿਤਕਾਮਾ ਉਪਗਨ੍ਤ੍ਵਾ ਤਂ ਨ ਪਸ੍ਸਨ੍ਤਿ, ਨ ਤਸ੍ਮਿਂ ਓਕਾਸਂ ਲਭਨ੍ਤਿ. ਨੇਤੇ, ਮਹਾਰਾਜ, ਗੁਣਾ ਪੁਗ੍ਗਲਸ੍ਸ, ਮੇਤ੍ਤਾਭਾਵਨਾਯੇਤੇ ਗੁਣਾ. ਯਥਾ ਵਾ ਪਨ, ਮਹਾਰਾਜ, ਪੁਰਿਸਂ ਸੁਕਤਂ ਮਹਾਲੇਣਮਨੁਪ੍ਪਵਿਟ੍ਠਂ ਮਹਤਿਮਹਾਮੇਘੋ ਅਭਿਵਸ੍ਸਨ੍ਤੋ ਨ ਸਕ੍ਕੋਤਿ ਤੇਮਯਿਤੁਂ, ਨੇਸੋ, ਮਹਾਰਾਜ, ਗੁਣੋ ਪੁਰਿਸਸ੍ਸ, ਮਹਾਲੇਣਸ੍ਸੇਸੋ ਗੁਣੋ, ਯਂ ਮਹਾਮੇਘੋ ਅਭਿਵਸ੍ਸਮਾਨੋ ਨ ਤਂ ਤੇਮੇਤਿ. ਏਵਮੇਵ ਖੋ, ਮਹਾਰਾਜ, ਨੇਤੇ ਗੁਣਾ ਪੁਗ੍ਗਲਸ੍ਸ, ਮੇਤ੍ਤਾਭਾਵਨਾਯੇਤੇ ਗੁਣਾ.

‘‘ਯਸ੍ਮਿਂ, ਮਹਾਰਾਜ, ਖਣੇ ਪੁਗ੍ਗਲੋ ਮੇਤ੍ਤਂ ਸਮਾਪਨ੍ਨੋ ਹੋਤਿ, ਨ ਤਸ੍ਸ ਪੁਗ੍ਗਲਸ੍ਸ ਤਸ੍ਮਿਂ ਖਣੇ ਅਗ੍ਗਿ ਵਾ ਵਿਸਂ ਵਾ ਸਤ੍ਥਂ ਵਾ ਕਮਤਿ. ਤਸ੍ਸ ਯੇ ਕੇਚਿ ਅਹਿਤਕਾਮਾ ਉਪਗਨ੍ਤ੍ਵਾ ਤਂ ਨ ਪਸ੍ਸਨ੍ਤਿ, ਨ ਤਸ੍ਸ ਸਕ੍ਕੋਨ੍ਤਿ ਅਹਿਤਂ ਕਾਤੁਂ ਨੇਤੇ, ਮਹਾਰਾਜ, ਗੁਣਾ ਪੁਗ੍ਗਲਸ੍ਸ, ਮੇਤ੍ਤਾਭਾਵਨਾਯੇਤੇ ਗੁਣਾ’’ਤਿ. ‘‘ਅਚ੍ਛਰਿਯਂ, ਭਨ੍ਤੇ ਨਾਗਸੇਨ, ਅਬ੍ਭੁਤਂ ਭਨ੍ਤੇ ਨਾਗਸੇਨ, ਸਬ੍ਬਪਾਪਨਿਵਾਰਣਾ ਮੇਤ੍ਤਾਭਾਵਨਾ’’ਤਿ. ‘‘ਸਬ੍ਬਕੁਸਲਗੁਣਾਵਹਾ, ਮਹਾਰਾਜ, ਮੇਤ੍ਤਾਭਾਵਨਾ ਹਿਤਾਨਮ੍ਪਿ ਅਹਿਤਾਨਮ੍ਪਿ, ਯੇ ਤੇ ਸਤ੍ਤਾ ਵਿਞ੍ਞਾਣਬਦ੍ਧਾ, ਸਬ੍ਬੇਸਂ ਮਹਾਨਿਸਂਸਾ ਮੇਤ੍ਤਾਭਾਵਨਾ ਸਂਵਿਭਜਿਤਬ੍ਬਾ’’ਤਿ.

ਮੇਤ੍ਤਾਭਾਵਨਾਨਿਸਂਸਪਞ੍ਹੋ ਛਟ੍ਠੋ.

੭. ਕੁਸਲਾਕੁਸਲਸਮਵਿਸਮਪਞ੍ਹੋ

੭. ‘‘ਭਨ੍ਤੇ ਨਾਗਸੇਨ ‘ਕੁਸਲਕਾਰਿਸ੍ਸਪਿ ਅਕੁਸਲਕਾਰਿਸ੍ਸਪਿ ਵਿਪਾਕੋ ਸਮਸਮੋ, ਉਦਾਹੁ ਕੋਚਿ ਵਿਸੇਸੋ ਅਤ੍ਥੀ’ਤਿ? ‘‘ਅਤ੍ਥਿ, ਮਹਾਰਾਜ, ਕੁਸਲਸ੍ਸ ਚ ਅਕੁਸਲਸ੍ਸ ਚ ਵਿਸੇਸੋ, ਕੁਸਲਂ, ਮਹਾਰਾਜ, ਸੁਖਵਿਪਾਕਂ ਸਗ੍ਗਸਂਵਤ੍ਤਨਿਕਂ, ਅਕੁਸਲਂ ਦੁਕ੍ਖਵਿਪਾਕਂ ਨਿਰਯਸਂਵਤ੍ਤਨਿਕ’’ਨ੍ਤਿ.

‘‘ਭਨ੍ਤੇ ਨਾਗਸੇਨ, ਤੁਮ੍ਹੇ ਭਣਥ ‘ਦੇਵਦਤ੍ਤੋ ਏਕਨ੍ਤਕਣ੍ਹੋ, ਏਕਨ੍ਤਕਣ੍ਹੇਹਿ ਧਮ੍ਮੇਹਿ ਸਮਨ੍ਨਾਗਤੋ, ਬੋਧਿਸਤ੍ਤੋ ਏਕਨ੍ਤਸੁਕ੍ਕੋ, ਏਕਨ੍ਤਸੁਕ੍ਕੇਹਿ ਧਮ੍ਮੇਹਿ ਸਮਨ੍ਨਾਗਤੋ’ਤਿ. ਪੁਨ ਚ ਦੇਵਦਤ੍ਤੋ ਭਵੇ ਭਵੇ ਯਸੇਨ ਚ ਪਕ੍ਖੇਨ ਚ ਬੋਧਿਸਤ੍ਤੇਨ ਸਮਸਮੋ ਹੋਤਿ, ਕਦਾਚਿ ਅਧਿਕਤਰੋ ਵਾ. ਯਦਾ ਦੇਵਦਤ੍ਤੋ ਨਗਰੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤਸ੍ਸ ਰਞ੍ਞੋ ਪੁਰੋਹਿਤਪੁਤ੍ਤੋ ਅਹੋਸਿ, ਤਦਾ ਬੋਧਿਸਤ੍ਤੋ ਛਵਕਚਣ੍ਡਾਲੋ ਅਹੋਸਿ ਵਿਜ੍ਜਾਧਰੋ, ਵਿਜ੍ਜਂ ਪਰਿਜਪ੍ਪਿਤ੍ਵਾ ਅਕਾਲੇ ਅਮ੍ਬਫਲਾਨਿ ਨਿਬ੍ਬਤ੍ਤੇਸਿ, ਏਤ੍ਥ ਤਾਵ ਬੋਧਿਸਤ੍ਤੋ ਦੇਵਦਤ੍ਤਤੋ ਜਾਤਿਯਾ ਨਿਹੀਨੋ ਯਸੇਨ ਚ ਨਿਹੀਨੋ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਰਾਜਾ ਅਹੋਸਿ ਮਹਾ ਮਹੀਪਤਿ ਸਬ੍ਬਕਾਮਸਮਙ੍ਗੀ, ਤਦਾ ਬੋਧਿਸਤ੍ਤੋ ਤਸ੍ਸੂਪਭੋਗੋ ਅਹੋਸਿ ਹਤ੍ਥਿਨਾਗੋ ਸਬ੍ਬਲਕ੍ਖਣਸਮ੍ਪਨ੍ਨੋ, ਤਸ੍ਸ ਚਾਰੁਗਤਿਵਿਲਾਸਂ ਅਸਹਮਾਨੋ ਰਾਜਾ ਵਧਮਿਚ੍ਛਨ੍ਤੋ ਹਤ੍ਥਾਚਰਿਯਂ ਏਵਮਵੋਚ ‘ਅਸਿਕ੍ਖਿਤੋ ਤੇ, ਆਚਰਿਯ, ਹਤ੍ਥਿਨਾਗੋ, ਤਸ੍ਸ ਆਕਾਸਗਮਨਂ ਨਾਮ ਕਾਰਣਂ ਕਰੋਹੀ’ਤਿ, ਤਤ੍ਥਪਿ ਤਾਵ ਬੋਧਿਸਤ੍ਤੋ ਦੇਵਦਤ੍ਤਤੋ ਜਾਤਿਯਾ ਨਿਹੀਨੋ ਲਾਮਕੋ ਤਿਰਚ੍ਛਾਨਗਤੋ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਮਨੁਸ੍ਸੋ ਅਹੋਸਿ ਪਵਨੇ ਨਟ੍ਠਾਯਿਕੋ, ਤਦਾ ਬੋਧਿਸਤ੍ਤੋ ਮਹਾਪਥਵੀ ਨਾਮ ਮਕ੍ਕਟੋ ਅਹੋਸਿ, ਏਤ੍ਥਪਿ ਤਾਵ ਦਿਸ੍ਸਤਿ ਵਿਸੇਸੋ ਮਨੁਸ੍ਸਸ੍ਸ ਚ ਤਿਰਚ੍ਛਾਨਗਤਸ੍ਸ ਚ, ਤਤ੍ਥਪਿ ਤਾਵ ਬੋਧਿਸਤ੍ਤੋ ਦੇਵਦਤ੍ਤਤੋ ਜਾਤਿਯਾ ਨਿਹੀਨੋ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਮਨੁਸ੍ਸੋ ਅਹੋਸਿ ਸੋਣੁਤ੍ਤਰੋ ਨਾਮ ਨੇਸਾਦੋ ਬਲਵਾ ਬਲਵਤਰੋ ਨਾਗਬਲੋ, ਤਦਾ ਬੋਧਿਸਤ੍ਤੋ ਛਦ੍ਦਨ੍ਤੋ ਨਾਮ ਨਾਗਰਾਜਾ ਅਹੋਸਿ. ਤਦਾ ਸੋ ਲੁਦ੍ਦਕੋ ਤਂ ਹਤ੍ਥਿਨਾਗਂ ਘਾਤੇਸਿ, ਤਤ੍ਥਪਿ ਤਾਵ ਦੇਵਦਤ੍ਤੋਵ ਅਧਿਕਤਰੋ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਮਨੁਸ੍ਸੋ ਅਹੋਸਿ ਵਨਚਰਕੋ ਅਨਿਕੇਤਵਾਸੀ, ਤਦਾ ਬੋਧਿਸਤ੍ਤੋ ਸਕੁਣੋ ਅਹੋਸਿ ਤਿਤ੍ਤਿਰੋ ਮਨ੍ਤਜ੍ਝਾਯੀ, ਤਦਾਪਿ ਸੋ ਵਨਚਰਕੋ ਤਂ ਸਕੁਣਂ ਘਾਤੇਸਿ, ਤਤ੍ਥਪਿ ਤਾਵ ਦੇਵਦਤ੍ਤੋਵ ਜਾਤਿਯਾ ਅਧਿਕਤਰੋ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਕਲਾਬੁ ਨਾਮ ਕਾਸਿਰਾਜਾ [ਕਾਸਿਕਰਾਜਾ (ਕ.)] ਅਹੋਸਿ, ਤਦਾ ਬੋਧਿਸਤ੍ਤੋ ਤਾਪਸੋ ਅਹੋਸਿ ਖਨ੍ਤਿਵਾਦੀ. ਤਦਾ ਸੋ ਰਾਜਾ ਤਸ੍ਸ ਤਾਪਸਸ੍ਸ ਕੁਦ੍ਧੋ ਹਤ੍ਥਪਾਦੇ ਵਂਸਕਲ਼ੀਰੇ ਵਿਯ ਛੇਦਾਪੇਸਿ, ਤਤ੍ਥਪਿ ਤਾਵ ਦੇਵਦਤ੍ਤੋ ਯੇਵ ਅਧਿਕਤਰੋ ਜਾਤਿਯਾ ਚ ਯਸੇਨ ਚ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਮਨੁਸ੍ਸੋ ਅਹੋਸਿ ਵਨਚਰੋ, ਤਦਾ ਬੋਧਿਸਤ੍ਤੋ ਨਨ੍ਦਿਯੋ ਨਾਮ ਵਾਨਰਿਨ੍ਦੋ ਅਹੋਸਿ, ਤਦਾਪਿ ਸੋ ਵਨਚਰੋ ਤਂ ਵਾਨਰਿਨ੍ਦਂ ਘਾਤੇਸਿ ਸਦ੍ਧਿਂ ਮਾਤਰਾ ਕਨਿਟ੍ਠਭਾਤਿਕੇਨ ਚ, ਤਤ੍ਥਪਿ ਤਾਵ ਦੇਵਦਤ੍ਤੋ ਯੇਵ ਅਧਿਕਤਰੋ ਜਾਤਿਯਾ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਮਨੁਸ੍ਸੋ ਅਹੋਸਿ ਅਚੇਲਕੋ ਕਾਰਮ੍ਭਿਯੋ ਨਾਮ, ਤਦਾ ਬੋਧਿਸਤ੍ਤੋ ਪਣ੍ਡਰਕੋ ਨਾਮ ਨਾਗਰਾਜਾ ਅਹੋਸਿ, ਤਤ੍ਥਪਿ ਤਾਵ ਦੇਵਦਤ੍ਤੋ ਯੇਵ ਅਧਿਕਤਰੋ ਜਾਤਿਯਾ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਮਨੁਸ੍ਸੋ ਅਹੋਸਿ ਪਵਨੇ ਜਟਿਲਕੋ, ਤਦਾ ਬੋਧਿਸਤ੍ਤੋ ਤਚ੍ਛਕੋ ਨਾਮ ਮਹਾਸੂਕਰੋ ਅਹੋਸਿ, ਤਤ੍ਥਪਿ ਤਾਵ ਦੇਵਦਤ੍ਤੋ ਯੇਵ ਜਾਤਿਯਾ ਅਧਿਕਤਰੋ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਚੇਤੀਸੁ ਸੂਰਪਰਿਚਰੋ ਨਾਮ ਰਾਜਾ ਅਹੋਸਿ ਉਪਰਿ ਪੁਰਿਸਮਤ੍ਤੇ ਗਗਨੇ ਵੇਹਾਸਙ੍ਗਮੋ, ਤਦਾ ਬੋਧਿਸਤ੍ਤੋ ਕਪਿਲੋ ਨਾਮ ਬ੍ਰਾਹ੍ਮਣੋ ਅਹੋਸਿ, ਤਤ੍ਥਪਿ ਤਾਵ ਦੇਵਦਤ੍ਤੋ ਯੇਵ ਅਧਿਕਤਰੋ ਜਾਤਿਯਾ ਚ ਯਸੇਨ ਚ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਮਨੁਸ੍ਸੋ ਅਹੋਸਿ ਸਾਮੋ ਨਾਮ, ਤਦਾ ਬੋਧਿਸਤ੍ਤੋ ਰੁਰੁ ਨਾਮ ਮਿਗਰਾਜਾ ਅਹੋਸਿ, ਤਤ੍ਥਪਿ ਤਾਵ ਦੇਵਦਤ੍ਤੋ ਯੇਵ ਜਾਤਿਯਾ ਅਧਿਕਤਰੋ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਮਨੁਸ੍ਸੋ ਅਹੋਸਿ ਲੁਦ੍ਦਕੋ ਪਵਨਚਰੋ, ਤਦਾ ਬੋਧਿਸਤ੍ਤੋ ਹਤ੍ਥਿਨਾਗੋ ਅਹੋਸਿ, ਸੋ ਲੁਦ੍ਦਕੋ ਤਸ੍ਸ ਹਤ੍ਥਿਨਾਗਸ੍ਸ ਸਤ੍ਤਕ੍ਖਤ੍ਤੁਂ ਦਨ੍ਤੇ ਛਿਨ੍ਦਿਤ੍ਵਾ ਹਰਿ, ਤਤ੍ਥਪਿ ਤਾਵ ਦੇਵਦਤ੍ਤੋ ਯੇਵ ਯੋਨਿਯਾ ਅਧਿਕਤਰੋ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਸਿਙ੍ਗਾਲੋ ਅਹੋਸਿ ਖਤ੍ਤਿਯਧਮ੍ਮੋ, ਸੋ ਯਾਵਤਾ ਜਮ੍ਬੁਦੀਪੇ ਪਦੇਸਰਾਜਾਨੋ ਤੇ ਸਬ੍ਬੇ ਅਨੁਯੁਤ੍ਤੇ ਅਕਾਸਿ, ਤਦਾ ਬੋਧਿਸਤ੍ਤੋ ਵਿਧੁਰੋ ਨਾਮ ਪਣ੍ਡਿਤੋ ਅਹੋਸਿ, ਤਤ੍ਥਪਿ ਤਾਵ ਦੇਵਦਤ੍ਤੋ ਯੇਵ ਯਸੇਨ ਅਧਿਕਤਰੋ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਹਤ੍ਥਿਨਾਗੋ ਹੁਤ੍ਵਾ ਲਟੁਕਿਕਾਯ ਸਕੁਣਿਕਾਯ ਪੁਤ੍ਤਕੇ ਘਾਤੇਸਿ, ਤਦਾ ਬੋਧਿਸਤ੍ਤੋਪਿ ਹਤ੍ਥਿਨਾਗੋ ਅਹੋਸਿ ਯੂਥਪਤਿ, ਤਤ੍ਥ ਤਾਵ ਉਭੋਪਿ ਤੇ ਸਮਸਮਾ ਅਹੇਸੁਂ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਯਕ੍ਖੋ ਅਹੋਸਿ ਅਧਮ੍ਮੋ ਨਾਮ, ਤਦਾ ਬੋਧਿਸਤ੍ਤੋਪਿ ਯਕ੍ਖੋ ਅਹੋਸਿ ਧਮ੍ਮੋ ਨਾਮ, ਤਤ੍ਥਪਿ ਤਾਵ ਉਭੋਪਿ ਸਮਸਮਾ ਅਹੇਸੁਂ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਨਾਵਿਕੋ ਅਹੋਸਿ ਪਞ੍ਚਨ੍ਨਂ ਕੁਲਸਤਾਨਂ ਇਸ੍ਸਰੋ, ਤਦਾ ਬੋਧਿਸਤ੍ਤੋਪਿ ਨਾਵਿਕੋ ਅਹੋਸਿ ਪਞ੍ਚਨ੍ਨਂ ਕੁਲਸਤਾਨਂ ਇਸ੍ਸਰੋ, ਤਤ੍ਥਪਿ ਤਾਵ ਉਭੋਪਿ ਸਮਸਮਾ ਅਹੇਸੁਂ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਸਤ੍ਥਵਾਹੋ ਅਹੋਸਿ ਪਞ੍ਚਨ੍ਨਂ ਸਕਟਸਤਾਨਂ ਇਸ੍ਸਰੋ, ਤਦਾ ਬੋਧਿਸਤ੍ਤੋਪਿ ਸਤ੍ਥਵਾਹੋ ਅਹੋਸਿ ਪਞ੍ਚਨ੍ਨਂ ਸਕਟਸਤਾਨਂ ਇਸ੍ਸਰੋ, ਤਤ੍ਥਪਿ ਤਾਵ ਉਭੋਪਿ ਸਮਸਮਾ ਅਹੇਸੁਂ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਸਾਖੋ ਨਾਮ ਮਿਗਰਾਜਾ ਅਹੋਸਿ, ਤਦਾ ਬੋਧਿਸਤ੍ਤੋਪਿ ਨਿਗ੍ਰੋਧੋ ਨਾਮ ਮਿਗਰਾਜਾ ਅਹੋਸਿ, ਤਤ੍ਥਪਿ ਤਾਵ ਉਭੋਪਿ ਸਮਸਮਾ ਅਹੇਸੁਂ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਸਾਖੋ ਨਾਮ ਸੇਨਾਪਤਿ ਅਹੋਸਿ, ਤਦਾ ਬੋਧਿਸਤ੍ਤੋਪਿ ਨਿਗ੍ਰੋਧੋ ਨਾਮ ਰਾਜਾ ਅਹੋਸਿ, ਤਤ੍ਥਪਿ ਤਾਵ ਉਭੋਪਿ ਸਮਸਮਾ ਅਹੇਸੁਂ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਖਣ੍ਡਹਾਲੋ ਨਾਮ ਬ੍ਰਾਹ੍ਮਣੋ ਅਹੋਸਿ, ਤਦਾ ਬੋਧਿਸਤ੍ਤੋ ਚਨ੍ਦੋ ਨਾਮ ਰਾਜਕੁਮਾਰੋ ਅਹੋਸਿ, ਤਦਾ ਸੋ ਖਣ੍ਡਹਾਲੋ ਯੇਵ ਅਧਿਕਤਰੋ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਬ੍ਰਹ੍ਮਦਤ੍ਤੋ ਨਾਮ ਰਾਜਾ ਅਹੋਸਿ, ਤਦਾ ਬੋਧਿਸਤ੍ਤੋ ਤਸ੍ਸ ਪੁਤ੍ਤੋ ਮਹਾਪਦੁਮੋ ਨਾਮ ਕੁਮਾਰੋ ਅਹੋਸਿ, ਤਦਾ ਸੋ ਰਾਜਾ ਸਕਪੁਤ੍ਤਂ ਚੋਰਪਪਾਤੇ ਖਿਪਾਪੇਸਿ, ਯਤੋ ਕੁਤੋਚਿ ਪਿਤਾਵ ਪੁਤ੍ਤਾਨਂ ਅਧਿਕਤਰੋ ਹੋਤਿ ਵਿਸਿਟ੍ਠੋਤਿ, ਤਤ੍ਥਪਿ ਤਾਵ ਦੇਵਦਤ੍ਤੋ ਯੇਵ ਅਧਿਕਤਰੋ.

‘‘ਪੁਨ ਚਪਰਂ ਯਦਾ ਦੇਵਦਤ੍ਤੋ ਮਹਾਪਤਾਪੋ ਨਾਮ ਰਾਜਾ ਅਹੋਸਿ, ਤਦਾ ਬੋਧਿਸਤ੍ਤੋ ਤਸ੍ਸ ਪੁਤ੍ਤੋ ਧਮ੍ਮਪਾਲੋ ਨਾਮ ਕੁਮਾਰੋ ਅਹੋਸਿ, ਤਦਾ ਸੋ ਰਾਜਾ ਸਕਪੁਤ੍ਤਸ੍ਸ ਹਤ੍ਥਪਾਦੇ ਸੀਸਞ੍ਚ ਛੇਦਾਪੇਸਿ, ਤਤ੍ਥਪਿ ਤਾਵ ਦੇਵਦਤ੍ਤੋ ਯੇਵ ਉਤ੍ਤਰੋ ਅਧਿਕਤਰੋ.

ਅਜ੍ਜੇਤਰਹਿ ਉਭੋਪਿ ਸਕ੍ਯਕੁਲੇ ਜਾਯਿਂਸੁ. ਬੋਧਿਸਤ੍ਤੋ ਬੁਦ੍ਧੋ ਅਹੋਸਿ ਸਬ੍ਬਞ੍ਞੂ ਲੋਕਨਾਯਕੋ, ਦੇਵਦਤ੍ਤੋ ਤਸ੍ਸ ਦੇਵਾਤਿਦੇਵਸ੍ਸ ਸਾਸਨੇ ਪਬ੍ਬਜਿਤ੍ਵਾ ਇਦ੍ਧਿਂ ਨਿਬ੍ਬਤ੍ਤੇਤ੍ਵਾ ਬੁਦ੍ਧਾਲਯਂ ਅਕਾਸਿ. ਕਿਂ ਨੁ ਖੋ, ਭਨ੍ਤੇ ਨਾਗਸੇਨ, ਯਂ ਮਯਾ ਭਣਿਤਂ, ਤਂ ਸਬ੍ਬਂ ਤਥਂ ਉਦਾਹੁ ਵਿਤਥ’’ਨ੍ਤਿ?

‘‘ਯਂ ਤ੍ਵਂ, ਮਹਾਰਾਜ, ਬਹੁਵਿਧਂ ਕਾਰਣਂ ਓਸਾਰੇਸਿ, ਸਬ੍ਬਂ ਤਂ ਤਥੇਵ, ਨੋ ਅਞ੍ਞਥਾ’’ਤਿ. ‘‘ਯਦਿ, ਭਨ੍ਤੇ ਨਾਗਸੇਨ, ਕਣ੍ਹੋਪਿ ਸੁਕ੍ਕੋਪਿ ਸਮਸਮਗਤਿਕਾ ਹੋਨ੍ਤਿ, ਤੇਨ ਹਿ ਕੁਸਲਮ੍ਪਿ ਅਕੁਸਲਮ੍ਪਿ ਸਮਸਮਵਿਪਾਕਂ ਹੋਤੀ’’ਤਿ? ‘‘ਨ ਹਿ, ਮਹਾਰਾਜ, ਕੁਸਲਮ੍ਪਿ ਅਕੁਸਲਮ੍ਪਿ ਸਮਸਮਵਿਪਾਕਂ ਹੋਤਿ, ਨ ਹਿ, ਮਹਾਰਾਜ, ਦੇਵਦਤ੍ਤੋ ਸਬ੍ਬਜਨੇਹਿ ਪਟਿਵਿਰੁਦ੍ਧੋ, ਬੋਧਿਸਤ੍ਤੇਨੇਵ ਪਟਿਵਿਰੁਦ੍ਧੋ. ਯੋ ਤਸ੍ਸ ਬੋਧਿਸਤ੍ਤੇਨ ਪਟਿਵਿਰੁਦ੍ਧੋ, ਸੋ ਤਸ੍ਮਿਂ ਤਸ੍ਮਿਂ ਯੇਵ ਭਵੇ ਪਚ੍ਚਤਿ ਫਲਂ ਦੇਤਿ. ਦੇਵਦਤ੍ਤੋਪਿ, ਮਹਾਰਾਜ, ਇਸ੍ਸਰਿਯੇ ਠਿਤੋ ਜਨਪਦੇਸੁ ਆਰਕ੍ਖਂ ਦੇਤਿ, ਸੇਤੁਂ ਸਭਂ ਪੁਞ੍ਞਸਾਲਂ ਕਾਰੇਤਿ, ਸਮਣਬ੍ਰਾਹ੍ਮਣਾਨਂ ਕਪਣਦ੍ਧਿਕਵਣਿਬ੍ਬਕਾਨਂ ਨਾਥਾਨਾਥਾਨਂ ਯਥਾਪਣਿਹਿਤਂ ਦਾਨਂ ਦੇਤਿ. ਤਸ੍ਸ ਸੋ ਵਿਪਾਕੇਨ ਭਵੇ ਭਵੇ ਸਮ੍ਪਤ੍ਤਿਯੋ ਪਟਿਲਭਤਿ. ਕਸ੍ਸੇਤਂ, ਮਹਾਰਾਜ, ਸਕ੍ਕਾ ਵਤ੍ਤੁਂ ਵਿਨਾ ਦਾਨੇਨ ਦਮੇਨ ਸਂਯਮੇਨ ਉਪੋਸਥਕਮ੍ਮੇਨ ਸਮ੍ਪਤ੍ਤਿਂ ਅਨੁਭਵਿਸ੍ਸਤੀਤਿ?

‘‘ਯਂ ਪਨ ਤ੍ਵਂ, ਮਹਾਰਾਜ, ਏਵਂ ਵਦੇਸਿ ‘ਦੇਵਦਤ੍ਤੋ ਚ ਬੋਧਿਸਤ੍ਤੋ ਚ ਏਕਤੋ ਅਨੁਪਰਿਵਤ੍ਤਨ੍ਤੀ’ਤਿ, ਸੋ ਨ ਜਾਤਿਸਤਸ੍ਸ ਅਚ੍ਚਯੇਨ ਸਮਾਗਮੋ ਅਹੋਸਿ, ਨ ਜਾਤਿਸਹਸ੍ਸਸ੍ਸ ਅਚ੍ਚਯੇਨ, ਨ ਜਾਤਿਸਤਸਹਸ੍ਸਸ੍ਸ ਅਚ੍ਚਯੇਨ, ਕਦਾਚਿ ਕਰਹਚਿ ਬਹੂਨਂ ਅਹੋਰਤ੍ਤਾਨਂ ਅਚ੍ਚਯੇਨ ਸਮਾਗਮੋ ਅਹੋਸਿ. ਯਂ ਪਨੇਤਂ, ਮਹਾਰਾਜ, ਭਗਵਤਾ ਕਾਣਕਚ੍ਛਪੋਪਮਂ ਉਪਦਸ੍ਸਿਤਂ ਮਨੁਸ੍ਸਤ੍ਤਪ੍ਪਟਿਲਾਭਾਯ, ਤਥੂਪਮਂ, ਮਹਾਰਾਜ, ਇਮੇਸਂ ਸਮਾਗਮਂ ਧਾਰੇਹਿ.

‘‘ਨ, ਮਹਾਰਾਜ, ਬੋਧਿਸਤ੍ਤਸ੍ਸ ਦੇਵਦਤ੍ਤੇਨੇਵ ਸਦ੍ਧਿਂ ਸਮਾਗਮੋ ਅਹੋਸਿ, ਥੇਰੋਪਿ, ਮਹਾਰਾਜ, ਸਾਰਿਪੁਤ੍ਤੋ ਅਨੇਕੇਸੁ ਜਾਤਿਸਤਸਹਸ੍ਸੇਸੁ ਬੋਧਿਸਤ੍ਤਸ੍ਸ ਪਿਤਾ ਅਹੋਸਿ, ਮਹਾਪਿਤਾ ਅਹੋਸਿ, ਚੂਲ਼ਪਿਤਾ ਅਹੋਸਿ, ਭਾਤਾ ਅਹੋਸਿ, ਪੁਤ੍ਤੋ ਅਹੋਸਿ, ਭਾਗਿਨੇਯ੍ਯੋ ਅਹੋਸਿ, ਮਿਤ੍ਤੋ ਅਹੋਸਿ.

‘‘ਬੋਧਿਸਤ੍ਤੋਪਿ, ਮਹਾਰਾਜ, ਅਨੇਕੇਸੁ ਜਾਤਿਸਤਸਹਸ੍ਸੇਸੁ ਥੇਰਸ੍ਸ ਸਾਰਿਪੁਤ੍ਤਸ੍ਸ ਪਿਤਾ ਅਹੋਸਿ, ਮਹਾਪਿਤਾ ਅਹੋਸਿ, ਚੂਲ਼ਪਿਤਾ ਅਹੋਸਿ, ਭਾਤਾ ਅਹੋਸਿ, ਪੁਤ੍ਤੋ ਅਹੋਸਿ, ਭਾਗਿਨੇਯ੍ਯੋ ਅਹੋਸਿ, ਮਿਤ੍ਤੋ ਅਹੋਸਿ, ਸਬ੍ਬੇਪਿ, ਮਹਾਰਾਜ, ਸਤ੍ਤਨਿਕਾਯਪਰਿਯਾਪਨ੍ਨਾ ਸਂਸਾਰਸੋਤਮਨੁਗਤਾ ਸਂਸਾਰਸੋਤੇਨ ਵੁਯ੍ਹਨ੍ਤਾ ਅਪ੍ਪਿਯੇਹਿਪਿ ਪਿਯੇਹਿਪਿ ਸਮਾਗਚ੍ਛਨ੍ਤਿ. ਯਥਾ, ਮਹਾਰਾਜ, ਉਦਕਂ ਸੋਤੇਨ ਵੁਯ੍ਹਮਾਨਂ ਸੁਚਿਅਸੁਚਿਕਲ੍ਯਾਣਪਾਪਕੇਨ ਸਮਾਗਚ੍ਛਤਿ, ਏਵਮੇਵ ਖੋ, ਮਹਾਰਾਜ, ਸਬ੍ਬੇਪਿ ਸਤ੍ਤਨਿਕਾਯਪਰਿਯਾਪਨ੍ਨਾ ਸਂਸਾਰਸੋਤਮਨੁਗਤਾ ਸਂਸਾਰਸੋਤੇਨ ਵੁਯ੍ਹਨ੍ਤਾ ਅਪ੍ਪਿਯੇਹਿਪਿ ਪਿਯੇਹਿਪਿ ਸਮਾਗਚ੍ਛਨ੍ਤਿ. ਦੇਵਦਤ੍ਤੋ, ਮਹਾਰਾਜ, ਯਕ੍ਖੋ ਸਮਾਨੋ ਅਤ੍ਤਨਾ ਅਧਮ੍ਮੋ ਪਰੇ ਅਧਮ੍ਮੇ ਨਿਯੋਜੇਤ੍ਵਾ ਸਤ੍ਤਪਞ੍ਞਾਸਵਸ੍ਸਕੋਟਿਯੋ ਸਟ੍ਠਿ ਚ ਵਸ੍ਸਸਤਸਹਸ੍ਸਾਨਿ ਮਹਾਨਿਰਯੇ ਪਚ੍ਚਿ, ਬੋਧਿਸਤ੍ਤੋਪਿ, ਮਹਾਰਾਜ, ਯਕ੍ਖੋ ਸਮਾਨੋ ਅਤ੍ਤਨਾ ਧਮ੍ਮੋ ਪਰੇ ਧਮ੍ਮੇ ਨਿਯੋਜੇਤ੍ਵਾ ਸਤ੍ਤਪਞ੍ਞਾਸਵਸ੍ਸਕੋਟਿਯੋ ਸਟ੍ਠਿ ਚ ਵਸ੍ਸਸਤਸਹਸ੍ਸਾਨਿ ਸਗ੍ਗੇ ਮੋਦਿ ਸਬ੍ਬਕਾਮਸਮਙ੍ਗੀ, ਅਪਿ ਚ, ਮਹਾਰਾਜ, ਦੇਵਦਤ੍ਤੋ ਇਮਸ੍ਮਿਂ ਭਵੇ ਬੁਦ੍ਧਂ ਅਨਾਸਾਦਨੀਯਮਾਸਾਦਯਿਤ੍ਵਾ ਸਮਗ੍ਗਞ੍ਚ ਸਙ੍ਘਂ ਭਿਨ੍ਦਿਤ੍ਵਾ ਪਥਵਿਂ ਪਾਵਿਸਿ, ਤਥਾਗਤੋ ਬੁਜ੍ਝਿਤ੍ਵਾ ਸਬ੍ਬਧਮ੍ਮੇ ਪਰਿਨਿਬ੍ਬੁਤੋ ਉਪਧਿਸਙ੍ਖਯੇ’’ਤਿ. ‘‘ਸਾਧੁ, ਭਨ੍ਤੇ ਨਾਗਸੇਨ, ਏਵਮੇਤਂ ਤਥਾ ਸਮ੍ਪਟਿਚ੍ਛਾਮੀ’’ਤਿ.

ਕੁਸਲਾਕੁਸਲਸਮਵਿਸਮਪਞ੍ਹੋ ਸਤ੍ਤਮੋ.

੮. ਅਮਰਾਦੇਵੀਪਞ੍ਹੋ

੮. ‘‘ਭਨ੍ਤੇ ਨਾਗਸੇਨ, ਭਾਸਿਤਮ੍ਪੇਤਂ ਭਗਵਤਾ –

‘‘‘ਸਚੇ ਲਭੇਥ ਖਣਂ ਵਾ ਰਹੋ ਵਾ, ਨਿਮਨ੍ਤਕਂ [ਨਿਵਾਤਕਂ (ਕੁਣਾਲਜਾਤਕੇ)] ਵਾਪਿ ਲਭੇਥ ਤਾਦਿਸਂ;

ਸਬ੍ਬਾਵ [ਸਬ੍ਬਾਪਿ (ਸੀ. ਪੀ.)] ਇਤ੍ਥੀ ਕਯਿਰੁਂ [ਕਰੇਯ੍ਯੁਂ (ਸੀ. ਪੀ. ਕ.)] ਨੁ ਪਾਪਂ, ਅਞ੍ਞਂ ਅਲਦ੍ਧਾ ਪੀਠਸਪ੍ਪਿਨਾ ਸਦ੍ਧਿ’ਨ੍ਤਿ.

‘‘ਪੁਨ ਚ ਕਥੀਯਤਿ ‘ਮਹੋਸਧਸ੍ਸ ਭਰਿਯਾ ਅਮਰਾ ਨਾਮ ਇਤ੍ਥੀ ਗਾਮਕੇ ਠਪਿਤਾ ਪਵੁਤ੍ਥਪਤਿਕਾ ਰਹੋ ਨਿਸਿਨ੍ਨਾ ਵਿਵਿਤ੍ਤਾ ਰਾਜਪ੍ਪਟਿਸਮਂ ਸਾਮਿਕਂ ਕਰਿਤ੍ਵਾ ਸਹਸ੍ਸੇਨ ਨਿਮਨ੍ਤੀਯਮਾਨਾ ਪਾਪਂ ਨਾਕਾਸੀ’ਤਿ. ਯਦਿ, ਭਨ੍ਤੇ ਨਾਗਸੇਨ, ਭਗਵਤਾ ਭਣਿਤਂ ‘ਸਚੇ…ਪੇ… ਸਦ੍ਧਿ’ਨ੍ਤਿ ਤੇਨ ਹਿ ‘ਮਹੋਸਧਸ੍ਸ ਭਰਿਯਾ…ਪੇ… ਨਾਕਾਸੀ’ਤਿ ਯਂ ਵਚਨਂ, ਤਂ ਮਿਚ੍ਛਾ. ਯਦਿ ਮਹੋਸਧਸ੍ਸ ਭਰਿਯਾ…ਪੇ… ਨਾਕਾਸਿ, ਤੇਨ ਹਿ ‘ਸਚੇ…ਪੇ… ਸਦ੍ਧਿ’ਨ੍ਤਿ ਤਮ੍ਪਿ ਵਚਨਂ ਮਿਚ੍ਛਾ. ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਤਵਾਨੁਪ੍ਪਤ੍ਤੋ, ਸੋ ਤਯਾ ਨਿਬ੍ਬਾਹਿਤਬ੍ਬੋ’’ਤਿ.

‘‘ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ‘ਸਚੇ…ਪੇ… ਸਦ੍ਧਿ’ਨ੍ਤਿ. ਕਥੀਯਤਿ ਚ ‘ਮਹੋਸਧਸ੍ਸ ਭਰਿਯਾ …ਪੇ… ਨਾਕਾਸੀ’ਤਿ. ਕਰੇਯ੍ਯ ਸਾ, ਮਹਾਰਾਜ, ਇਤ੍ਥੀ ਸਹਸ੍ਸਂ ਲਭਮਾਨਾ ਤਾਦਿਸੇਨ ਪੁਰਿਸੇਨ ਸਦ੍ਧਿਂ ਪਾਪਕਮ੍ਮਂ, ਨ ਸਾ ਕਰੇਯ੍ਯ ਸਚੇ ਖਣਂ ਵਾ ਰਹੋ ਵਾ ਨਿਮਨ੍ਤਕਂ ਵਾਪਿ ਤਾਦਿਸਂ ਲਭੇਯ੍ਯ, ਵਿਚਿਨਨ੍ਤੀ ਸਾ, ਮਹਾਰਾਜ, ਅਮਰਾ ਇਤ੍ਥੀ ਨ ਅਦ੍ਦਸ ਖਣਂ ਵਾ ਰਹੋ ਵਾ ਨਿਮਨ੍ਤਕਂ ਵਾਪਿ ਤਾਦਿਸਂ.

‘‘ਇਧ ਲੋਕੇ ਗਰਹਭਯਾ ਖਣਂ ਨ ਪਸ੍ਸਿ, ਪਰਲੋਕੇ ਨਿਰਯਭਯਾ ਖਣਂ ਨ ਪਸ੍ਸਿ, ਕਟੁਕਵਿਪਾਕਂ ਪਾਪਨ੍ਤਿ ਖਣਂ ਨ ਪਸ੍ਸਿ, ਪਿਯਂ ਅਮੁਞ੍ਚਿਤੁਕਾਮਾ ਖਣਂ ਨ ਪਸ੍ਸਿ, ਸਾਮਿਕਸ੍ਸ ਗਰੁਕਤਾਯ ਖਣਂ ਨ ਪਸ੍ਸਿ, ਧਮ੍ਮਂ ਅਪਚਾਯਨ੍ਤੀ ਖਣਂ ਨ ਪਸ੍ਸਿ, ਅਨਰਿਯਂ ਗਰਹਨ੍ਤੀ ਖਣਂ ਨ ਪਸ੍ਸਿ, ਕਿਰਿਯਂ ਅਭਿਨ੍ਦਿਤੁਕਾਮਾ ਖਣਂ ਨ ਪਸ੍ਸਿ. ਏਵਰੂਪੇਹਿ ਬਹੂਹਿ ਕਾਰਣੇਹਿ ਖਣਂ ਨ ਪਸ੍ਸਿ.

‘‘ਰਹੋਪਿ ਸਾ ਲੋਕੇ ਵਿਚਿਨਿਤ੍ਵਾ ਅਪਸ੍ਸਨ੍ਤੀ ਪਾਪਂ ਨਾਕਾਸਿ. ਸਚੇ ਸਾ ਮਨੁਸ੍ਸੇਹਿ ਰਹੋ ਲਭੇਯ੍ਯ, ਅਥ ਅਮਨੁਸ੍ਸੇਹਿ ਰਹੋ ਨ ਲਭੇਯ੍ਯ. ਸਚੇ ਅਮਨੁਸ੍ਸੇਹਿ ਰਹੋ ਲਭੇਯ੍ਯ, ਅਥ ਪਰਚਿਤ੍ਤਵਿਦੂਹਿ ਪਬ੍ਬਜਿਤੇਹਿ ਰਹੋ ਨ ਲਭੇਯ੍ਯ. ਸਚੇ ਪਰਚਿਤ੍ਤਵਿਦੂਹਿ ਪਬ੍ਬਜਿਤੇਹਿ ਰਹੋ ਲਭੇਯ੍ਯ, ਅਥ ਪਰਚਿਤ੍ਤਵਿਦੂਨੀਹਿ ਦੇਵਤਾਹਿ ਰਹੋ ਨ ਲਭੇਯ੍ਯ. ਸਚੇ ਪਰਚਿਤ੍ਤਵਿਦੂਨੀਹਿ ਦੇਵਤਾਹਿ ਰਹੋ ਲਭੇਯ੍ਯ, ਅਤ੍ਤਨਾਵ ਪਾਪੇਹਿ ਰਹੋ ਨ ਲਭੇਯ੍ਯ. ਸਚੇ ਅਤ੍ਤਨਾਵ ਪਾਪੇਹਿ ਰਹੋ ਲਭੇਯ੍ਯ, ਅਥ ਅਧਮ੍ਮੇਨ ਰਹੋ ਨ ਲਭੇਯ੍ਯ. ਏਵਰੂਪੇਹਿ ਬਹੁਵਿਧੇਹਿ ਕਾਰਣੇਹਿ ਰਹੋ ਅਲਭਿਤ੍ਵਾ ਪਾਪਂ ਨਾਕਾਸਿ.

‘‘ਨਿਮਨ੍ਤਕਮ੍ਪਿ ਸਾ ਲੋਕੇ ਵਿਚਿਨਿਤ੍ਵਾ ਤਾਦਿਸਂ ਅਲਭਨ੍ਤੀ ਪਾਪਂ ਨਾਕਾਸਿ. ਮਹੋਸਧੋ, ਮਹਾਰਾਜ, ਪਣ੍ਡਿਤੋ ਅਟ੍ਠਵੀਸਤਿਯਾ ਅਙ੍ਗੇਹਿ ਸਮਨ੍ਨਾਗਤੋ. ਕਤਮੇਹਿ ਅਟ੍ਠਵੀਸਤਿਯਾ ਅਙ੍ਗੇਹਿ ਸਮਨ੍ਨਾਗਤੋ? ਮਹੋਸਧੋ, ਮਹਾਰਾਜ, ਸੂਰੋ ਹਿਰਿਮਾ ਓਤ੍ਤਪ੍ਪੀ ਸਪਕ੍ਖੋ ਮਿਤ੍ਤਸਮ੍ਪਨ੍ਨੋ ਖਮੋ ਸੀਲਵਾ ਸਚ੍ਚਵਾਦੀ ਸੋਚੇਯ੍ਯਸਮ੍ਪਨ੍ਨੋ ਅਕ੍ਕੋਧਨੋ ਅਨਤਿਮਾਨੀ ਅਨੁਸੂਯਕੋ ਵੀਰਿਯਵਾ ਆਯੂਹਕੋ ਸਙ੍ਗਾਹਕੋ ਸਂਵਿਭਾਗੀ ਸਖਿਲੋ ਨਿਵਾਤਵੁਤ੍ਤਿ ਸਣ੍ਹੋ ਅਸਠੋ ਅਮਾਯਾਵੀ ਅਤਿਬੁਦ੍ਧਿਸਮ੍ਪਨ੍ਨੋ ਕਿਤ੍ਤਿਮਾ ਵਿਜ੍ਜਾਸਮ੍ਪਨ੍ਨੋ ਹਿਤੇਸੀ ਉਪਨਿਸ੍ਸਿਤਾਨਂ ਪਤ੍ਥਿਤੋ ਸਬ੍ਬਜਨਸ੍ਸ ਧਨਵਾ ਯਸਵਾ. ਮਹੋਸਧੋ, ਮਹਾਰਾਜ, ਪਣ੍ਡਿਤੋ ਇਮੇਹਿ ਅਟ੍ਠਵੀਸਤਿਯਾ ਅਙ੍ਗੇਹਿ ਸਮਨ੍ਨਾਗਤੋ. ਸਾ ਅਞ੍ਞਂ ਤਾਦਿਸਂ ਨਿਮਨ੍ਤਕਂ ਅਲਭਿਤ੍ਵਾ ਪਾਪਂ ਨਾਕਾਸੀ’’ਤਿ. ‘‘ਸਾਧੁ, ਭਨ੍ਤੇ ਨਾਗਸੇਨ, ਏਵਮੇਤਂ ਤਥਾ ਸਮ੍ਪਟਿਚ੍ਛਾਮੀ’’ਤਿ.

ਅਮਰਾਦੇਵੀਪਞ੍ਹੋ ਅਟ੍ਠਮੋ.

੯. ਅਰਹਨ੍ਤਅਭਾਯਨਪਞ੍ਹੋ

੯. ‘‘ਭਨ੍ਤੇ ਨਾਗਸੇਨ, ਭਾਸਿਤਮ੍ਪੇਤਂ ਭਗਵਤਾ ‘ਵਿਗਤਭਯਸਨ੍ਤਾਸਾ ਅਰਹਨ੍ਤੋ’ਤਿ. ਪੁਨ ਚ ਨਗਰੇ ਰਾਜਗਹੇ ਧਨਪਾਲਕਂ ਹਤ੍ਥਿਂ ਭਗਵਤਿ ਓਪਤਨ੍ਤਂ ਦਿਸ੍ਵਾ ਪਞ੍ਚ ਖੀਣਾਸਵਸਤਾਨਿ ਪਰਿਚ੍ਚਜਿਤ੍ਵਾ ਜਿਨਵਰਂ ਪਕ੍ਕਨ੍ਤਾਨਿ ਦਿਸਾਵਿਦਿਸਂ ਏਕਂ ਠਪੇਤ੍ਵਾ ਥੇਰਂ ਆਨਨ੍ਦਂ. ਕਿਂ ਨੁ ਖੋ, ਭਨ੍ਤੇ ਨਾਗਸੇਨ, ਤੇ ਅਰਹਨ੍ਤੋ ਭਯਾ ਪਕ੍ਕਨ੍ਤਾ, ਪਞ੍ਞਾਯਿਸ੍ਸਤਿ ਸਕੇਨ ਕਮ੍ਮੇਨਾਤਿ ਦਸਬਲਂ ਪਾਤੇਤੁਕਾਮਾ ਪਕ੍ਕਨ੍ਤਾ, ਉਦਾਹੁ ਤਥਾਗਤਸ੍ਸ ਅਤੁਲਂ ਵਿਪੁਲਮਸਮਂ ਪਾਟਿਹਾਰਿਯਂ ਦਟ੍ਠੁਕਾਮਾ ਪਕ੍ਕਨ੍ਤਾ? ਯਦਿ, ਭਨ੍ਤੇ ਨਾਗਸੇਨ, ਭਗਵਤਾ ਭਣਿਤਂ ‘ਵਿਗਤਭਯਸਨ੍ਤਾਸਾ ਅਰਹਨ੍ਤੋ’ਤਿ, ਤੇਨ ਹਿ ‘ਨਗਰੇ…ਪੇ… ਆਨਨ੍ਦ’ਨ੍ਤਿ ਯਂ ਵਚਨਂ ਤਂ ਮਿਚ੍ਛਾ. ਯਦਿ ਨਗਰੇ ਰਾਜਗਹੇ ਧਨਪਾਲਕਂ ਹਤ੍ਥਿਂ ਭਗਵਤਿ ਓਪਤਨ੍ਤਂ ਦਿਸ੍ਵਾ ਪਞ੍ਚ ਖੀਣਾਸਵਸਤਾਨਿ ਪਰਿਚ੍ਚਜਿਤ੍ਵਾ ਜਿਨਵਰਂ ਪਕ੍ਕਨ੍ਤਾਨਿ ਦਿਸਾਵਿਦਿਸਂ ਏਕਂ ਠਪੇਤ੍ਵਾ ਥੇਰਂ ਆਨਨ੍ਦਂ, ਤੇਨ ਹਿ ‘ਵਿਗਤਭਯਸਨ੍ਤਾਸਾ ਅਰਹਨ੍ਤੋ’ਤਿ ਤਮ੍ਪਿ ਵਚਨਂ ਮਿਚ੍ਛਾ. ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਤਵਾਨੁਪ੍ਪਤ੍ਤੋ, ਸੋ ਤਯਾ ਨਿਬ੍ਬਾਹਿਤਬ੍ਬੋ’’ਤਿ.

‘‘ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ‘ਵਿਗਤਭਯਸਨ੍ਤਾਸਾ ਅਰਹਨ੍ਤੋ’ਤਿ, ਨਗਰੇ ਰਾਜਗਹੇ ਧਨਪਾਲਕਂ ਹਤ੍ਥਿਂ ਭਗਵਤਿ ਓਪਤਨ੍ਤਂ ਦਿਸ੍ਵਾ ਪਞ੍ਚ ਖੀਣਾਸਵਸਤਾਨਿ ਪਰਿਚ੍ਚਜਿਤ੍ਵਾ ਜਿਨਵਰਂ ਪਕ੍ਕਨ੍ਤਾਨਿ ਦਿਸਾਵਿਦਿਸਂ ਏਕਂ ਠਪੇਤ੍ਵਾ ਥੇਰਂ ਆਨਨ੍ਦਂ, ਤਞ੍ਚ ਪਨ ਨ ਭਯਾ, ਨਾਪਿ ਭਗਵਨ੍ਤਂ ਪਾਤੇਤੁਕਾਮਤਾਯ.

‘‘ਯੇਨ ਪਨ, ਮਹਾਰਾਜ, ਹੇਤੁਨਾ ਅਰਹਨ੍ਤੋ ਭਾਯੇਯ੍ਯੁਂ ਵਾ ਤਾਸੇਯ੍ਯੁਂ ਵਾ, ਸੋ ਹੇਤੁ ਅਰਹਨ੍ਤਾਨਂ ਸਮੁਚ੍ਛਿਨ੍ਨੋ, ਤਸ੍ਮਾ ਵਿਗਤਭਯਸਨ੍ਤਾਸਾ ਅਰਹਨ੍ਤੋ, ਭਾਯਤਿ ਨੁ, ਮਹਾਰਾਜ, ਮਹਾਪਥਵੀ ਖਣਨ੍ਤੇਪਿ ਭਿਨ੍ਦਨ੍ਤੇਪਿ ਧਾਰੇਨ੍ਤੇਪਿ ਸਮੁਦ੍ਦਪਬ੍ਬਤਗਿਰਿਸਿਖਰੇਤਿ? ‘‘ਨ ਹਿ, ਭਨ੍ਤੇ’’ਤਿ. ‘‘ਕੇਨ ਕਾਰਣੇਨ ਮਹਾਰਾਜਾ’’ਤਿ? ‘‘ਨਤ੍ਥਿ, ਭਨ੍ਤੇ, ਮਹਾਪਥਵਿਯਾ ਸੋ ਹੇਤੁ, ਯੇਨ ਹੇਤੁਨਾ ਮਹਾਪਥਵੀ ਭਾਯੇਯ੍ਯ ਵਾ ਤਾਸੇਯ੍ਯ ਵਾ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਨਤ੍ਥਿ ਅਰਹਨ੍ਤਾਨਂ ਸੋ ਹੇਤੁ, ਯੇਨ ਹੇਤੁਨਾ ਅਰਹਨ੍ਤੋ ਭਾਯੇਯ੍ਯੁਂ ਵਾ ਤਾਸੇਯ੍ਯੁਂ ਵਾ.

‘‘ਭਾਯਤਿ ਨੁ, ਮਹਾਰਾਜ, ਗਿਰਿਸਿਖਰਂ ਛਿਨ੍ਦਨ੍ਤੇ ਵਾ ਭਿਨ੍ਦਨ੍ਤੇ ਵਾ ਪਤਨ੍ਤੇ ਵਾ ਅਗ੍ਗਿਨਾ ਦਹਨ੍ਤੇ ਵਾ’’ਤਿ? ‘‘ਨ ਹਿ, ਭਨ੍ਤੇ’’ਤਿ. ‘‘ਕੇਨ ਕਾਰਣੇਨ ਮਹਾਰਾਜਾ’’ਤਿ? ‘‘ਨਤ੍ਥਿ, ਭਨ੍ਤੇ, ਗਿਰਿਸਿਖਰਸ੍ਸ ਸੋ ਹੇਤੁ, ਯੇਨ ਹੇਤੁਨਾ ਗਿਰਿਸਿਖਰਂ ਭਾਯੇਯ੍ਯ ਵਾ ਤਾਸੇਯ੍ਯ ਵਾ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਨਤ੍ਥਿ ਅਰਹਨ੍ਤਾਨਂ ਸੋ ਹੇਤੁ, ਯੇਨ ਹੇਤੁਨਾ ਅਰਹਨ੍ਤੋ ਭਾਯੇਯ੍ਯੁਂ ਵਾ ਤਾਸੇਯ੍ਯੁਂ ਵਾ.

‘‘ਯਦਿਪਿ, ਮਹਾਰਾਜ, ਲੋਕਧਾਤੁਸਤਸਹਸ੍ਸੇਸੁ ਯੇ ਕੇਚਿ ਸਤ੍ਤਨਿਕਾਯਪਰਿਯਾਪਨ੍ਨਾ ਸਬ੍ਬੇਪਿ ਤੇ ਸਤ੍ਤਿਹਤ੍ਥਾ ਏਕਂ ਅਰਹਨ੍ਤਂ ਉਪਧਾਵਿਤ੍ਵਾ ਤਾਸੇਯ੍ਯੁਂ, ਨ ਭਵੇਯ੍ਯ ਅਰਹਤੋ ਚਿਤ੍ਤਸ੍ਸ ਕਿਞ੍ਚਿ ਅਞ੍ਞਥਤ੍ਤਂ. ਕਿਂ ਕਾਰਣਂ? ਅਟ੍ਠਾਨਮਨਵਕਾਸਤਾਯ.

‘‘ਅਪਿ ਚ, ਮਹਾਰਾਜ, ਤੇਸਂ ਖੀਣਾਸਵਾਨਂ ਏਵਂ ਚੇਤੋਪਰਿਵਿਤਕ੍ਕੋ ਅਹੋਸਿ ‘ਅਜ੍ਜ ਨਰਵਰਪਵਰੇ ਜਿਨਵਰਵਸਭੇ ਨਗਰਵਰਮਨੁਪ੍ਪਵਿਟ੍ਠੇ ਵੀਥਿਯਾ ਧਨਪਾਲਕੋ ਹਤ੍ਥੀ ਆਪਤਿਸ੍ਸਤਿ, ਅਸਂਸਯਮਤਿਦੇਵਦੇਵਂ ਉਪਟ੍ਠਾਕੋ ਨ ਪਰਿਚ੍ਚਜਿਸ੍ਸਤਿ, ਯਦਿ ਮਯਂ ਸਬ੍ਬੇਪਿ ਭਗਵਨ੍ਤਂ ਨ ਪਰਿਚ੍ਚਜਿਸ੍ਸਾਮ, ਆਨਨ੍ਦਸ੍ਸ ਗੁਣੋ ਪਾਕਟੋ ਨ ਭਵਿਸ੍ਸਤਿ, ਨ ਹੇਵ ਚ ਤਥਾਗਤਂ ਸਮੁਪਗਮਿਸ੍ਸਤਿ ਹਤ੍ਥਿਨਾਗੋ, ਹਨ੍ਦ ਮਯਂ ਅਪਗਚ੍ਛਾਮ, ਏਵਮਿਦਂ ਮਹਤੋ ਜਨਕਾਯਸ੍ਸ ਕਿਲੇਸਬਨ੍ਧਨਮੋਕ੍ਖੋ ਭਵਿਸ੍ਸਤਿ, ਆਨਨ੍ਦਸ੍ਸ ਚ ਗੁਣੋ ਪਾਕਟੋ ਭਵਿਸ੍ਸਤੀ’ਤਿ. ਏਵਂ ਤੇ ਅਰਹਨ੍ਤੋ ਆਨਿਸਂਸਂ ਦਿਸ੍ਵਾ ਦਿਸਾਵਿਦਿਸਂ ਪਕ੍ਕਨ੍ਤਾ’’ਤਿ. ‘‘ਸੁਵਿਭਤ੍ਤੋ, ਭਨ੍ਤੇ ਨਾਗਸੇਨ, ਪਞ੍ਹੋ, ਏਵਮੇਤਂ ਨਤ੍ਥਿ ਅਰਹਨ੍ਤਾਨਂ ਭਯਂ ਵਾ ਸਨ੍ਤਾਸੋ ਵਾ, ਆਨਿਸਂਸਂ ਦਿਸ੍ਵਾ ਅਰਹਨ੍ਤੋ ਪਕ੍ਕਨ੍ਤਾ ਦਿਸਾਵਿਦਿਸ’’ਨ੍ਤਿ.

ਅਰਹਨ੍ਤਅਭਾਯਨਪਞ੍ਹੋ ਨਵਮੋ.

੧੦. ਬੁਦ੍ਧਸਬ੍ਬਞ੍ਞੁਭਾਵਪਞ੍ਹੋ

੧੦. ‘‘ਭਨ੍ਤੇ ਨਾਗਸੇਨ, ਤੁਮ੍ਹੇ ਭਣਥ ‘ਤਥਾਗਤੋ ਸਬ੍ਬਞ੍ਞੂ’ਤਿ. ਪੁਨ ਚ ਭਣਥ ‘ਤਥਾਗਤੇਨ ਸਾਰਿਪੁਤ੍ਤਮੋਗ੍ਗਲ੍ਲਾਨਪ੍ਪਮੁਖੇ ਭਿਕ੍ਖੁਸਙ੍ਘੇ ਪਣਾਮਿਤੇ ਚਾਤੁਮੇਯ੍ਯਕਾ ਚ ਸਕ੍ਯਾ ਬ੍ਰਹ੍ਮਾ ਚ ਸਹਮ੍ਪਤਿ ਬੀਜੂਪਮਞ੍ਚ ਵਚ੍ਛਤਰੁਣੂਪਮਞ੍ਚ ਉਪਦਸ੍ਸੇਤ੍ਵਾ ਭਗਵਨ੍ਤਂ ਪਸਾਦੇਸੁਂ ਖਮਾਪੇਸੁਂ ਨਿਜ੍ਝਤ੍ਤਂ ਅਕਂਸੂ’ਤਿ. ਕਿਂ ਨੁ ਖੋ, ਭਨ੍ਤੇ ਨਾਗਸੇਨ, ਅਞ੍ਞਾਤਾ ਤਾ ਉਪਮਾ ਤਥਾਗਤਸ੍ਸ, ਯਾਹਿ ਤਥਾਗਤੋ ਉਪਮਾਹਿ ਓਰਤੋ ਖਮਿਤੋ ਉਪਸਨ੍ਤੋ ਨਿਜ੍ਝਤ੍ਤਂ ਗਤੋ? ਯਦਿ, ਭਨ੍ਤੇ ਨਾਗਸੇਨ, ਤਥਾਗਤਸ੍ਸ ਤਾ ਉਪਮਾ ਅਞ੍ਞਾਤਾ, ਤੇਨ ਹਿ ਬੁਦ੍ਧੋ ਅਸਬ੍ਬਞ੍ਞੂ, ਯਦਿ ਞਾਤਾ, ਤੇਨ ਹਿ ਓਕਸ੍ਸ ਪਸਯ੍ਹ ਵੀਮਂਸਾਪੇਕ੍ਖੋ ਪਣਾਮੇਸਿ, ਤੇਨ ਹਿ ਤਸ੍ਸ ਅਕਾਰੁਞ੍ਞਤਾ ਸਮ੍ਭਵਤਿ. ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਤਵਾਨੁਪ੍ਪਤ੍ਤੋ, ਸੋ ਤਯਾ ਨਿਬ੍ਬਾਹਿਤਬ੍ਬੋ’’ਤਿ.

‘‘ਸਬ੍ਬਞ੍ਞੂ, ਮਹਾਰਾਜ, ਤਥਾਗਤੋ, ਤਾਹਿ ਚ ਉਪਮਾਹਿ ਭਗਵਾ ਪਸਨ੍ਨੋ ਓਰਤੋ ਖਮਿਤੋ ਉਪਸਨ੍ਤੋ ਨਿਜ੍ਝਤ੍ਤਂ ਗਤੋ. ਧਮ੍ਮਸ੍ਸਾਮੀ, ਮਹਾਰਾਜ, ਤਥਾਗਤੋ, ਤਥਾਗਤਪ੍ਪਵੇਦਿਤੇਹੇਵ ਤੇ ਓਪਮ੍ਮੇਹਿ ਤਥਾਗਤਂ ਆਰਾਧੇਸੁਂ ਤੋਸੇਸੁਂ ਪਸਾਦੇਸੁਂ, ਤੇਸਞ੍ਚ ਤਥਾਗਤੋ ਪਸਨ੍ਨੋ ‘ਸਾਧੂ’ਤਿ ਅਬ੍ਭਾਨੁਮੋਦਿ.

‘‘ਯਥਾ, ਮਹਾਰਾਜ, ਇਤ੍ਥੀ ਸਾਮਿਕਸ੍ਸ ਸਨ੍ਤਕੇਨੇਵ ਧਨੇਨ ਸਾਮਿਕਂ ਆਰਾਧੇਤਿ ਤੋਸੇਤਿ ਪਸਾਦੇਤਿ, ਤਞ੍ਚ ਸਾਮਿਕੋ ‘ਸਾਧੂ’ਤਿ ਅਬ੍ਭਾਨੁਮੋਦਤਿ, ਏਵਮੇਵ ਖੋ, ਮਹਾਰਾਜ, ਚਾਤੁਮੇਯ੍ਯਕਾ ਚ ਸਕ੍ਯਾ ਬ੍ਰਹ੍ਮਾ ਚ ਸਹਮ੍ਪਤਿ ਤਥਾਗਤਪ੍ਪਵੇਦਿਤੇਹੇਵ ਓਪਮ੍ਮੇਹਿ ਤਥਾਗਤਂ ਆਰਾਧੇਸੁਂ ਤੋਸੇਸੁਂ ਪਸਾਦੇਸੁਂ, ਤੇਸਞ੍ਚ ਤਥਾਗਤੋ ਪਸਨ੍ਨੋ ‘ਸਾਧੂ’ਤਿ ਅਬ੍ਭਾਨੁਮੋਦਿ.

‘‘ਯਥਾ ਵਾ ਪਨ, ਮਹਾਰਾਜ, ਕਪ੍ਪਕੋ ਰਞ੍ਞੋ ਸਨ੍ਤਕੇਨੇਵ ਸੁਵਣ੍ਣਫਣਕੇਨ ਰਞ੍ਞੋ ਉਤ੍ਤਮਙ੍ਗਂ ਪਸਾਧਯਮਾਨੋ ਰਾਜਾਨਂ ਆਰਾਧੇਤਿ ਤੋਸੇਤਿ ਪਸਾਦੇਤਿ, ਤਸ੍ਸ ਚ ਰਾਜਾ ਪਸਨ੍ਨੋ ‘ਸਾਧੂ’ਤਿ ਅਬ੍ਭਾਨੁਮੋਦਤਿ, ਯਥਿਚ੍ਛਿਤਮਨੁਪ੍ਪਦੇਤਿ, ਏਵਮੇਵ ਖੋ, ਮਹਾਰਾਜ, ਚਾਤੁਮੇਯ੍ਯਕਾ ਚ ਸਕ੍ਯਾ ਬ੍ਰਹ੍ਮਾ ਚ ਸਹਮ੍ਪਤਿ ਤਥਾਗਤਪ੍ਪਵੇਦਿਤੇਹੇਵ ਓਪਮ੍ਮੇਹਿ ਤਥਾਗਤਂ ਆਰਾਧੇਸੁਂ ਤੋਸੇਸੁਂ ਪਸਾਦੇਸੁਂ, ਤੇਸਞ੍ਚ ਤਥਾਗਤੋ ਪਸਨ੍ਨੋ ‘ਸਾਧੂ’ਤਿ ਅਬ੍ਭਾਨੁਮੋਦਿ.

‘‘ਯਥਾ ਵਾ ਪਨ, ਮਹਾਰਾਜ, ਸਦ੍ਧਿਵਿਹਾਰਿਕੋ ਉਪਜ੍ਝਾਯਾਭਤਂ ਪਿਣ੍ਡਪਾਤਂ ਗਹੇਤ੍ਵਾ ਉਪਜ੍ਝਾਯਸ੍ਸ ਉਪਨਾਮੇਨ੍ਤੋ ਉਪਜ੍ਝਾਯਂ ਆਰਾਧੇਤਿ ਤੋਸੇਤਿ ਪਸਾਦੇਤਿ, ਤਞ੍ਚ ਉਪਜ੍ਝਾਯੋ ਪਸਨ੍ਨੋ ‘ਸਾਧੂ’ਤਿ ਅਬ੍ਭਾਨੁਮੋਦਤਿ, ਏਵਮੇਵ ਖੋ, ਮਹਾਰਾਜ, ਚਾਤੁਮੇਯ੍ਯਕਾ ਚ ਸਕ੍ਯਾ ਬ੍ਰਹ੍ਮਾ ਚ ਸਹਮ੍ਪਤਿ ਤਥਾਗਤਪ੍ਪਵੇਦਿਤੇਹੇਵ ਓਪਮ੍ਮੇਹਿ ਤਥਾਗਤਂ ਆਰਾਧੇਸੁਂ ਤੋਸੇਸੁਂ ਪਸਾਦੇਸੁਂ, ਤੇਸਞ੍ਚ ਤਥਾਗਤੋ ਪਸਨ੍ਨੋ ‘ਸਾਧੂ’ਤਿ ਅਬ੍ਭਾਨੁਮੋਦਿਤ੍ਵਾ ਸਬ੍ਬਦੁਕ੍ਖਪਰਿਮੁਤ੍ਤਿਯਾ ਧਮ੍ਮਂ ਦੇਸੇਸੀ’’ਤਿ. ‘‘ਸਾਧੁ, ਭਨ੍ਤੇ ਨਾਗਸੇਨ, ਏਵਮੇਤਂ ਤਥਾ ਸਮ੍ਪਟਿਚ੍ਛਾਮੀਤਿ.

ਬੁਦ੍ਧਸਬ੍ਬਞ੍ਞੁਭਾਵਪਞ੍ਹੋ ਦਸਮੋ.

ਸਬ੍ਬਞ੍ਞੁਤਞਾਣਵਗ੍ਗੋ ਚਤੁਤ੍ਥੋ.

ਇਮਸ੍ਮਿਂ ਵਗ੍ਗੇ ਦਸ ਪਞ੍ਹਾ.