੭. ਸਦ੍ਧਮ੍ਮਨ੍ਤਰਧਾਨਪਞ੍ਹੋ

੭. ‘‘ਭਨ੍ਤੇ ਨਾਗਸੇਨ, ਭਾਸਿਤਮ੍ਪੇਤਂ ਭਗਵਤਾ ‘ਪਞ੍ਚੇਵ ਦਾਨਿ, ਆਨਨ੍ਦ, ਵਸ੍ਸਸਤਾਨਿ [ਵਸ੍ਸਸਹਸ੍ਸਾਨਿ (ਸੀ.) ਪਸ੍ਸ ਅ. ਨਿ. ੮.੫੧] ਸਦ੍ਧਮ੍ਮੋ ਠਸ੍ਸਤੀ’ਤਿ. ਪੁਨ ਚ ਪਰਿਨਿਬ੍ਬਾਨਸਮਯੇ ਸੁਭਦ੍ਦੇਨ ਪਰਿਬ੍ਬਾਜਕੇਨ ਪਞ੍ਹਂ ਪੁਟ੍ਠੇਨ ਭਗਵਤਾ ਭਣਿਤਂ ‘ਇਮੇ ਚ, ਸੁਭਦ੍ਦ [ਦੀ. ਨਿ. ੨.੨੧੪ ਪਸ੍ਸਿਤਬ੍ਬਂ], ਭਿਕ੍ਖੂ ਸਮ੍ਮਾ ਵਿਹਰੇਯ੍ਯੁਂ, ਅਸੁਞ੍ਞੋ ਲੋਕੋ ਅਰਹਨ੍ਤੇਹਿ ਅਸ੍ਸਾ’ਤਿ, ਅਸੇਸਵਚਨਮੇਤਂ, ਨਿਸ੍ਸੇਸਵਚਨਮੇਤਂ, ਨਿਪ੍ਪਰਿਯਾਯਵਚਨਮੇਤਂ. ਯਦਿ, ਭਨ੍ਤੇ ਨਾਗਸੇਨ, ਤਥਾਗਤੇਨ ਭਣਿਤਂ ‘ਪਞ੍ਚੇਵ ਦਾਨਿ, ਆਨਨ੍ਦ, ਵਸ੍ਸਸਤਾਨਿ ਸਦ੍ਧਮ੍ਮੋ ਠਸ੍ਸਤੀ’ਤਿ, ਤੇਨ ਹਿ ‘ਅਸੁਞ੍ਞੋ ਲੋਕੋ ਅਰਹਨ੍ਤੇਹਿ ਅਸ੍ਸਾ’ਤਿ ਯਂ ਵਚਨਂ, ਤਂ ਮਿਚ੍ਛਾ. ਯਦਿ ਤਥਾਗਤੇਨ ਭਣਿਤਂ ‘ਅਸੁਞ੍ਞੋ ਲੋਕੋ ਅਰਹਨ੍ਤੇਹਿ ਅਸ੍ਸਾ’ਤਿ, ਤੇਨ ਹਿ ‘ਪਞ੍ਚੇਵ ਦਾਨਿ, ਆਨਨ੍ਦ, ਵਸ੍ਸਸਤਾਨਿ ਸਦ੍ਧਮ੍ਮੋ ਠਸ੍ਸਤੀ’ਤਿ ਤਮ੍ਪਿ ਵਚਨਂ ਮਿਚ੍ਛਾ. ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਗਹਨਤੋਪਿ ਗਹਨਤਰੋ ਬਲਵਤੋਪਿ ਬਲਵਤਰੋ ਗਣ੍ਠਿਤੋਪਿ ਗਣ੍ਠਿਤਰੋ, ਸੋ ਤਵਾਨੁਪ੍ਪਤ੍ਤੋ, ਤਤ੍ਥ ਤੇ ਞਾਣਬਲਵਿਪ੍ਫਾਰਂ ਦਸ੍ਸੇਹਿ ਮਕਰੋ ਵਿਯ ਸਾਗਰਬ੍ਭਨ੍ਤਰਗਤੋ’’ਤਿ.

‘‘ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ‘ਪਞ੍ਚੇਵ ਦਾਨਿ, ਆਨਨ੍ਦ, ਵਸ੍ਸਸਤਾਨਿ ਸਦ੍ਧਮ੍ਮੋ ਠਸ੍ਸਤੀ’ਤਿ. ਪਰਿਨਿਬ੍ਬਾਨਸਮਯੇ ਚ ਸੁਭਦ੍ਦਸ੍ਸ ਪਰਿਬ੍ਬਾਜਕਸ੍ਸ ਭਣਿਤਂ ‘ਇਮੇ ਚ, ਸੁਭਦ੍ਦ, ਭਿਕ੍ਖੂ ਸਮ੍ਮਾ ਵਿਹਰੇਯ੍ਯੁਂ, ਅਸੁਞ੍ਞੋ ਲੋਕੋ ਅਰਹਨ੍ਤੇਹਿ ਅਸ੍ਸਾ’ਤਿ. ਤਞ੍ਚ ਪਨ, ਮਹਾਰਾਜ, ਭਗਵਤੋ ਵਚਨਂ ਨਾਨਤ੍ਥਞ੍ਚੇਵ ਹੋਤਿ ਨਾਨਾਬ੍ਯਞ੍ਜਨਞ੍ਚ, ਅਯਂ ਸਾਸਨਪਰਿਚ੍ਛੇਦੋ, ਅਯਂ ਪਟਿਪਤ੍ਤਿ ਪਰਿਦੀਪਨਾਤਿ ਦੂਰਂ ਵਿਵਜ੍ਜਿਤਾ ਤੇ ਉਭੋ ਅਞ੍ਞਮਞ੍ਞਂ. ਯਥਾ, ਮਹਾਰਾਜ, ਨਭਂ ਪਥਵਿਤੋ ਦੂਰਂ ਵਿਵਜ੍ਜਿਤਂ, ਨਿਰਯਂ ਸਗ੍ਗਤੋ ਦੂਰਂ ਵਿਵਜ੍ਜਿਤਂ, ਕੁਸਲਂ ਅਕੁਸਲਤੋ ਦੂਰਂ ਵਿਵਜ੍ਜਿਤਂ, ਸੁਖਂ ਦੁਕ੍ਖਤੋ ਦੂਰਂ ਵਿਵਜ੍ਜਿਤਂ. ਏਵਮੇਵ ਖੋ, ਮਹਾਰਾਜ, ਤੇ ਉਭੋ ਅਞ੍ਞਮਞ੍ਞਂ ਦੂਰਂ ਵਿਵਜ੍ਜਿਤਾ.

‘‘ਅਪਿ ਚ, ਮਹਾਰਾਜ, ਮਾ ਤੇ ਪੁਚ੍ਛਾ ਮੋਘਾ ਅਸ੍ਸ [ਅਸ੍ਸੁ (ਸੀ. ਸ੍ਯਾ.)], ਰਸਤੋ ਤੇ ਸਂਸਨ੍ਦਿਤ੍ਵਾ ਕਥਯਿਸ੍ਸਾਮਿ ‘ਪਞ੍ਚੇਵ ਦਾਨਿ, ਆਨਨ੍ਦ, ਵਸ੍ਸਸਤਾਨਿ ਸਦ੍ਧਮ੍ਮੋ ਠਸ੍ਸਤੀ’ਤਿ ਯਂ ਭਗਵਾ ਆਹ, ਤਂ ਖਯਂ ਪਰਿਦੀਪਯਨ੍ਤੋ ਸੇਸਕਂ ਪਰਿਚ੍ਛਿਨ੍ਦਿ, ਵਸ੍ਸਸਹਸ੍ਸਂ, ਆਨਨ੍ਦ, ਸਦ੍ਧਮ੍ਮੋ ਤਿਟ੍ਠੇਯ੍ਯ, ਸਚੇ ਭਿਕ੍ਖੁਨਿਯੋ ਨ ਪਬ੍ਬਾਜੇਯ੍ਯੁਂ. ਪਞ੍ਚੇਵ ਦਾਨਿ, ਆਨਨ੍ਦ, ਵਸ੍ਸਸਤਾਨਿ ਸਦ੍ਧਮ੍ਮੋ ਠਸ੍ਸਤੀਤਿ. ਅਪਿ ਨੁ ਖੋ, ਮਹਾਰਾਜ, ਭਗਵਾ ਏਵਂ ਵਦਨ੍ਤੋ ਸਦ੍ਧਮ੍ਮਸ੍ਸ ਅਨ੍ਤਰਧਾਨਂ ਵਾ ਵਦੇਤਿ ਅਭਿਸਮਯਂ ਵਾ ਪਟਿਕ੍ਕੋਸਤੀ’’ਤਿ? ‘‘ਨ ਹਿ ਭਨ੍ਤੇ’’ਤਿ. ‘‘ਨਟ੍ਠਂ, ਮਹਾਰਾਜ, ਪਰਿਕਿਤ੍ਤਯਨ੍ਤੋ ਸੇਸਕਂ ਪਰਿਦੀਪਯਨ੍ਤੋ ਪਰਿਚ੍ਛਿਨ੍ਦਿ. ਯਥਾ, ਮਹਾਰਾਜ, ਪੁਰਿਸੋ ਨਟ੍ਠਾਯਿਕੋ ਸਬ੍ਬਸੇਸਕਂ ਗਹੇਤ੍ਵਾ ਜਨਸ੍ਸ ਪਰਿਦੀਪੇਯ੍ਯ ‘ਏਤ੍ਤਕਂ ਮੇ ਭਣ੍ਡਂ ਨਟ੍ਠਂ, ਇਦਂ ਸੇਸਕ’ਨ੍ਤਿ. ਏਵਮੇਵ ਖੋ, ਮਹਾਰਾਜ, ਭਗਵਾ ਨਟ੍ਠਂ ਪਰਿਦੀਪਯਨ੍ਤੋ ਸੇਸਕਂ ਦੇਵਮਨੁਸ੍ਸਾਨਂ ਕਥੇਸਿ ‘ਪਞ੍ਚੇਵ ਦਾਨਿ, ਆਨਨ੍ਦ, ਵਸ੍ਸਸਤਾਨਿ ਸਦ੍ਧਮ੍ਮੋ ਠਸ੍ਸਤੀ’ਤਿ. ਯਂ ਪਨ, ਮਹਾਰਾਜ, ਭਗਵਤਾ ਭਣਿਤਂ ‘ਪਞ੍ਚੇਵ ਦਾਨਿ, ਆਨਨ੍ਦ, ਵਸ੍ਸਸਤਾਨਿ ਸਦ੍ਧਮ੍ਮੋ ਠਸ੍ਸਤੀ’ਤਿ, ਸਾਸਨਪਰਿਚ੍ਛੇਦੋ ਏਸੋ.

‘‘ਯਂ ਪਨ ਪਰਿਨਿਬ੍ਬਾਨਸਮਯੇ ਸੁਭਦ੍ਦਸ੍ਸ ਪਰਿਬ੍ਬਾਜਕਸ੍ਸ ਸਮਣੇ ਪਰਿਕਿਤ੍ਤਯਨ੍ਤੋ ਆਹ ‘ਇਮੇ ਚ, ਸੁਭਦ੍ਦ, ਭਿਕ੍ਖੂ ਸਮ੍ਮਾ ਵਿਹਰੇਯ੍ਯੁਂ, ਅਸੁਞ੍ਞੋ ਲੋਕੋ ਅਰਹਨ੍ਤੇਹਿ ਅਸ੍ਸਾ’ਤਿ, ਪਟਿਪਤ੍ਤਿਪਰਿਦੀਪਨਾ ਏਸਾ, ਤ੍ਵਂ ਪਨ ਤਂ ਪਰਿਚ੍ਛੇਦਞ੍ਚ ਪਰਿਦੀਪਨਞ੍ਚ ਏਕਰਸਂ ਕਰੋਸਿ. ਯਦਿ ਪਨ ਤੇ ਛਨ੍ਦੋ, ਏਕਰਸਂ ਕਤ੍ਵਾ ਕਥਯਿਸ੍ਸਾਮਿ, ਸਾਧੁਕਂ ਸੁਣੋਹਿ ਮਨਸਿਕਰੋਹਿ ਅਵਿਕ੍ਖਿਤ੍ਤਮਾਨਸੋ [ਅਵਿਚਲਮਾਨਸੋ (ਸੀ.) ਅਵਿਮਾਨਸੋ (ਪੀ. ਕ.)].

‘‘ਇਧ, ਮਹਾਰਾਜ, ਤਲ਼ਾਕੋ ਭਵੇਯ੍ਯ ਨਵਸਲਿਲਸਮ੍ਪੁਣ੍ਣੋ ਸਮ੍ਮੁਖਮੁਤ੍ਤਰਿਯਮਾਨੋ ਪਰਿਚ੍ਛਿਨ੍ਨੋ ਪਰਿਵਟੁਮਕਤੋ, ਅਪਰਿਯਾਦਿਣ੍ਣੇ ਯੇਵ ਤਸ੍ਮਿਂ ਤਲ਼ਾਕੇ ਉਦਕੂਪਰਿ ਮਹਾਮੇਘੋ ਅਪਰਾਪਰਂ ਅਨੁਪ੍ਪਬਨ੍ਧੋ ਅਭਿਵਸ੍ਸੇਯ੍ਯ, ਅਪਿ ਨੁ ਖੋ, ਮਹਾਰਾਜ, ਤਸ੍ਮਿਂ ਤਲ਼ਾਕੇ ਉਦਕਂ ਪਰਿਕ੍ਖਯਂ ਪਰਿਯਾਦਾਨਂ ਗਚ੍ਛੇਯ੍ਯਾ’’ਤਿ? ‘‘ਨ ਹਿ ਭਨ੍ਤੇ’’ਤਿ. ‘‘ਕੇਨ ਕਾਰਣੇਨ ਮਹਾਰਾਜਾ’’ਤਿ? ‘‘ਮੇਘਸ੍ਸ, ਭਨ੍ਤੇ, ਅਨੁਪ੍ਪਬਨ੍ਧਤਾਯਾ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਜਿਨਸਾਸਨਵਰਸਦ੍ਧਮ੍ਮਤਲ਼ਾਕੋ ਆਚਾਰਸੀਲਗੁਣਵਤ੍ਤਪਟਿਪਤ੍ਤਿਵਿਮਲਨਵਸਲਿਲਸਮ੍ਪੁਣ੍ਣੋ ਉਤ੍ਤਰਿਯਮਾਨੋ ਭਵਗ੍ਗਮਭਿਭਵਿਤ੍ਵਾ ਠਿਤੋ. ਯਦਿ ਤਤ੍ਥ ਬੁਦ੍ਧਪੁਤ੍ਤਾ ਆਚਾਰਸੀਲਗੁਣਵਤ੍ਤਪਟਿਪਤ੍ਤਿਮੇਘਵਸ੍ਸਂ ਅਪਰਾਪਰਂ ਅਨੁਪ੍ਪਬਨ੍ਧਾਪੇਯ੍ਯੁਂ ਅਭਿਵਸ੍ਸਾਪੇਯ੍ਯੁਂ. ਏਵਮਿਦਂ ਜਿਨਸਾਸਨਵਰਸਦ੍ਧਮ੍ਮਤਲ਼ਾਕੋ ਚਿਰਂ ਦੀਘਮਦ੍ਧਾਨਂ ਤਿਟ੍ਠੇਯ੍ਯ, ਅਰਹਨ੍ਤੇਹਿ ਲੋਕੋ ਅਸੁਞ੍ਞੋ ਭਵੇਯ੍ਯ, ਇਮਮਤ੍ਥਂ ਭਗਵਤਾ ਸਨ੍ਧਾਯ ਭਾਸਿਤਂ ‘ਇਮੇ ਚ, ਸੁਭਦ੍ਦ, ਭਿਕ੍ਖੂ ਸਮ੍ਮਾ ਵਿਹਰੇਯ੍ਯੁਂ, ਅਸੁਞ੍ਞੋ ਲੋਕੋ ਅਰਹਨ੍ਤੇਹਿ ਅਸ੍ਸਾ’ਤਿ.

‘‘ਇਧ ਪਨ, ਮਹਾਰਾਜ, ਮਹਤਿ ਮਹਾਅਗ੍ਗਿਕ੍ਖਨ੍ਧੇ ਜਲਮਾਨੇ ਅਪਰਾਪਰਂ ਸੁਕ੍ਖਤਿਣਕਟ੍ਠਗੋਮਯਾਨਿ ਉਪਸਂਹਰੇਯ੍ਯੁਂ, ਅਪਿ ਨੁ ਖੋ ਸੋ, ਮਹਾਰਾਜ, ਅਗ੍ਗਿਕ੍ਖਨ੍ਧੋ ਨਿਬ੍ਬਾਯੇਯ੍ਯਾ’’ਤਿ? ‘‘ਨ ਹਿ, ਭਨ੍ਤੇ, ਭਿਯ੍ਯੋ ਭਿਯ੍ਯੋ ਸੋ ਅਗ੍ਗਿਕ੍ਖਨ੍ਧੋ ਜਲੇਯ੍ਯ, ਭਿਯ੍ਯੋ ਭਿਯ੍ਯੋ ਪਭਾਸੇਯ੍ਯਾ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਦਸਸਹਸ੍ਸਿਯਾ [ਦਸਸਹਸ੍ਸਿਮ੍ਹਿ (ਬਹੂਸੁ)] ਲੋਕਧਾਤੁਯਾ ਜਿਨਸਾਸਨਵਰਮ੍ਪਿ ਆਚਾਰਸੀਲਗੁਣਵਤ੍ਤਪਟਿਪਤ੍ਤਿਯਾ ਜਲਤਿ ਪਭਾਸਤਿ. ਯਦਿ ਪਨ, ਮਹਾਰਾਜ, ਤਦੁਤ੍ਤਰਿਂ ਬੁਦ੍ਧਪੁਤ੍ਤਾ ਪਞ੍ਚਹਿ ਪਧਾਨਿਯਙ੍ਗੇਹਿ ਸਮਨ੍ਨਾਗਤਾ ਸਤਤਮਪ੍ਪਮਤ੍ਤਾ ਪਦਹੇਯ੍ਯੁਂ, ਤੀਸੁ ਸਿਕ੍ਖਾਸੁ ਛਨ੍ਦਜਾਤਾ ਸਿਕ੍ਖੇਯ੍ਯੁਂ, ਚਾਰਿਤ੍ਤਞ੍ਚ ਸੀਲਂ ਸਮਤ੍ਤਂ ਪਰਿਪੂਰੇਯ੍ਯੁਂ, ਏਵਮਿਦਂ ਜਿਨਸਾਸਨਵਰਂ ਭਿਯ੍ਯੋ ਭਿਯ੍ਯੋ ਚਿਰਂ ਦੀਘਮਦ੍ਧਾਨਂ ਤਿਟ੍ਠੇਯ੍ਯ, ਅਸੁਞ੍ਞੋ ਲੋਕੋ ਅਰਹਨ੍ਤੇਹਿ ਅਸ੍ਸਾਤਿ ਇਮਮਤ੍ਥਂ ਭਗਵਤਾ ਸਨ੍ਧਾਯ ਭਾਸਿਤਂ ‘ਇਮੇ ਚ, ਸੁਭਦ੍ਦ, ਭਿਕ੍ਖੂ ਸਮ੍ਮਾ ਵਿਹਰੇਯ੍ਯੁਂ, ਅਸੁਞ੍ਞੋ ਲੋਕੋ ਅਰਹਨ੍ਤੇਹਿ ਅਸ੍ਸਾ’ਤਿ.

‘‘ਇਧ ਪਨ, ਮਹਾਰਾਜ, ਸਿਨਿਦ੍ਧਸਮਸੁਮਜ੍ਜਿਤਸਪ੍ਪਭਾਸਵਿਮਲਾਦਾਸਂ [ਸਪ੍ਪਭਂ ਸੁਵਿਮਲਾਦਾਸਂ (ਸੀ.)] ਸਣ੍ਹਸੁਖੁਮਗੇਰੁਕਚੁਣ੍ਣੇਨ ਅਪਰਾਪਰਂ ਮਜ੍ਜੇਯ੍ਯੁਂ, ਅਪਿ ਨੁ ਖੋ, ਮਹਾਰਾਜ, ਤਸ੍ਮਿਂ ਆਦਾਸੇ ਮਲਕਦ੍ਦਮਰਜੋਜਲ੍ਲਂ ਜਾਯੇਯ੍ਯਾ’’ਤਿ? ‘‘ਨ ਹਿ, ਭਨ੍ਤੇ, ਅਞ੍ਞਦਤ੍ਥੁ ਵਿਮਲਤਰਂ ਯੇਵ ਭਵੇਯ੍ਯਾ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਜਿਨਸਾਸਨਵਰਂ ਪਕਤਿਨਿਮ੍ਮਲਂ ਬ੍ਯਪਗਤਕਿਲੇਸਮਲਰਜੋਜਲ੍ਲਂ, ਯਦਿ ਤਂ ਬੁਦ੍ਧਪੁਤ੍ਤਾ ਆਚਾਰਸੀਲਗੁਣਵਤ੍ਤਪਟਿਪਤ੍ਤਿਸਲ੍ਲੇਖਧੁਤਗੁਣੇਨ ਜਿਨਸਾਸਨਵਰਂ ਸਲ੍ਲਕ੍ਖੇਯ੍ਯੁਂ [ਸਲ੍ਲਿਕ੍ਖੇਯ੍ਯੁਂ (ਸੀ. ਪੀ.)], ਏਵਮਿਦਂ ਜਿਨਸਾਸਨਵਰਂ ਚਿਰਂ ਦੀਘਮਦ੍ਧਾਨਂ ਤਿਟ੍ਠੇਯ੍ਯ, ਅਸੁਞ੍ਞੋ ਚ ਲੋਕੋ ਅਰਹਨ੍ਤੇਹਿ ਅਸ੍ਸਾਤਿ ਇਮਮਤ੍ਥਂ ਭਗਵਤਾ ਸਨ੍ਧਾਯ ਭਾਸਿਤਂ ‘ਇਮੇ ਚ, ਸੁਭਦ੍ਦ, ਭਿਕ੍ਖੂ ਸਮ੍ਮਾ ਵਿਹਰੇਯ੍ਯੁਂ, ਅਸੁਞ੍ਞੋ ਲੋਕੋ ਅਰਹਨ੍ਤੇਹਿ ਅਸ੍ਸਾ’ਤਿ. ਪਟਿਪਤ੍ਤਿਮੂਲਕਂ, ਮਹਾਰਾਜ, ਸਤ੍ਥੁਸਾਸਨਂ ਪਟਿਪਤ੍ਤਿਕਾਰਣਂ ਪਟਿਪਤ੍ਤਿਯਾ ਅਨਨ੍ਤਰਹਿਤਾਯ ਤਿਟ੍ਠਤੀ’’ਤਿ.

‘‘ਭਨ੍ਤੇ ਨਾਗਸੇਨ, ‘ਸਦ੍ਧਮ੍ਮਨ੍ਤਰਧਾਨ’ਨ੍ਤਿ ਯਂ ਵਦੇਸਿ, ਕਤਮਂ ਤਂ ਸਦ੍ਧਮ੍ਮਨ੍ਤਰਧਾਨ’’ਨ੍ਤਿ? ‘‘ਤੀਣਿਮਾਨਿ, ਮਹਾਰਾਜ, ਸਾਸਨਨ੍ਤਰਧਾਨਾਨਿ. ਕਤਮਾਨਿ ਤੀਣਿ? ਅਧਿਗਮਨ੍ਤਰਧਾਨਂ ਪਟਿਪਤ੍ਤਨ੍ਤਰਧਾਨਂ ਲਿਙ੍ਗਨ੍ਤਰਧਾਨਂ, ਅਧਿਗਮੇ, ਮਹਾਰਾਜ, ਅਨ੍ਤਰਹਿਤੇ ਸੁਪ੍ਪਟਿਪਨ੍ਨਸ੍ਸਾਪਿ ਧਮ੍ਮਾਭਿਸਮਯੋ ਨ ਹੋਤਿ, ਪਟਿਪਤ੍ਤਿਯਾ ਅਨ੍ਤਰਹਿਤਾਯ ਸਿਕ੍ਖਾਪਦਪਞ੍ਞਤ੍ਤਿ ਅਨ੍ਤਰਧਾਯਤਿ, ਲਿਙ੍ਗਂਯੇਵ ਤਿਟ੍ਠਤਿ, ਲਿਙ੍ਗੇ ਅਨ੍ਤਰਹਿਤੇ ਪਵੇਣੁਪਚ੍ਛੇਦੋ ਹੋਤਿ, ਇਮਾਨਿ ਖੋ, ਮਹਾਰਾਜ, ਤੀਣਿ ਅਨ੍ਤਰਧਾਨਾਨੀ’’ਤਿ.

‘‘ਸੁਵਿਞ੍ਞਾਪਿਤੋ, ਭਨ੍ਤੇ ਨਾਗਸੇਨ, ਪਞ੍ਹੋ, ਗਮ੍ਭੀਰੋ ਉਤ੍ਤਾਨੀਕਤੋ, ਗਣ੍ਠਿ ਭਿਨ੍ਨੋ, ਨਟ੍ਠਾ ਪਰਵਾਦਾ ਭਗ੍ਗਾ ਨਿਪ੍ਪਭਾ ਕਤਾ, ਤ੍ਵਂ ਗਣਿਵਰਵਸਭਮਾਸਜ੍ਜਾਤਿ.

ਸਦ੍ਧਮ੍ਮਨ੍ਤਰਧਾਨਪਞ੍ਹੋ ਸਤ੍ਤਮੋ.