੮. ਅਕੁਸਲਚ੍ਛੇਦਨਪਞ੍ਹੋ

੮. ‘‘ਭਨ੍ਤੇ ਨਾਗਸੇਨ, ਤਥਾਗਤੋ ਸਬ੍ਬਂ ਅਕੁਸਲਂ ਝਾਪੇਤ੍ਵਾ ਸਬ੍ਬਞ੍ਞੁਤਂ ਪਤ੍ਤੋ, ਉਦਾਹੁ ਸਾਵਸੇਸੇ ਅਕੁਸਲੇ ਸਬ੍ਬਞ੍ਞੁਤਂ ਪਤ੍ਤੋ’’ਤਿ? ‘‘ਸਬ੍ਬਂ, ਮਹਾਰਾਜ, ਅਕੁਸਲਂ ਝਾਪੇਤ੍ਵਾ ਭਗਵਾ ਸਬ੍ਬਞ੍ਞੁਤਂ ਪਤ੍ਤੋ, ਨਤ੍ਥਿ ਭਗਵਤੋ ਸੇਸੇਕਂ ਅਕੁਸਲ’’ਨ੍ਤਿ.

‘‘ਕਿਂ ਪਨ, ਭਨ੍ਤੇ, ਦੁਕ੍ਖਾ ਵੇਦਨਾ ਤਥਾਗਤਸ੍ਸ ਕਾਯੇ ਉਪ੍ਪਨ੍ਨਪੁਬ੍ਬਾ’’ਤਿ? ‘‘ਆਮ, ਮਹਾਰਾਜ, ਰਾਜਗਹੇ ਭਗਵਤੋ ਪਾਦੋ ਸਕਲਿਕਾਯ [ਸਕ੍ਖਲਿਕਾਯ (ਸ੍ਯਾ. ਕ.)] ਖਤੋ, ਲੋਹਿਤਪਕ੍ਖਨ੍ਦਿਕਾਬਾਧੋ ਉਪ੍ਪਨ੍ਨੋ, ਕਾਯੇ ਅਭਿਸਨ੍ਨੇ ਜੀਵਕੇਨ ਵਿਰੇਕੋ ਕਾਰਿਤੋ, ਵਾਤਾਬਾਧੇ ਉਪ੍ਪਨ੍ਨੇ ਉਪਟ੍ਠਾਕੇਨ ਥੇਰੇਨ ਉਣ੍ਹੋਦਕਂ ਪਰਿਯਿਟ੍ਠ’’ਨ੍ਤਿ.

‘‘ਯਦਿ, ਭਨ੍ਤੇ ਨਾਗਸੇਨ, ਤਥਾਗਤੋ ਸਬ੍ਬਂ ਅਕੁਸਲਂ ਝਾਪੇਤ੍ਵਾ ਸਬ੍ਬਞ੍ਞੁਤਂ ਪਤ੍ਤੋ, ਤੇਨ ਹਿ ਭਗਵਤੋ ਪਾਦੋ ਸਕਲਿਕਾਯ ਖਤੋ, ਲੋਹਿਤਪਕ੍ਖਨ੍ਦਿਕਾ ਚ ਆਬਾਧੋ ਉਪ੍ਪਨ੍ਨੋਤਿ ਯਂ ਵਚਨਂ, ਤਂ ਮਿਚ੍ਛਾ. ਯਦਿ ਤਥਾਗਤਸ੍ਸ ਪਾਦੋ ਸਕਲਿਕਾਯ ਖਤੋ, ਲੋਹਿਤਪਕ੍ਖਨ੍ਦਿਕਾ ਚ ਆਬਾਧੋ ਉਪ੍ਪਨ੍ਨੋ, ਤੇਨ ਹਿ ਤਥਾਗਤੋ ਸਬ੍ਬਂ ਅਕੁਸਲਂ ਝਾਪੇਤ੍ਵਾ ਸਬ੍ਬਞ੍ਞੁਤਂ ਪਤ੍ਤੋਤਿ ਤਮ੍ਪਿ ਵਚਨਂ ਮਿਚ੍ਛਾ. ਨਤ੍ਥਿ, ਭਨ੍ਤੇ, ਵਿਨਾ ਕਮ੍ਮੇਨ ਵੇਦਯਿਤਂ, ਸਬ੍ਬਂ ਤਂ ਵੇਦਯਿਤਂ ਕਮ੍ਮਮੂਲਕਂ, ਤਂ ਕਮ੍ਮੇਨੇਵ ਵੇਦਯਤਿ, ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਤਵਾਨੁਪ੍ਪਤ੍ਤੋ, ਸੋ ਤਯਾ ਨਿਬ੍ਬਾਹਿਤਬ੍ਬੋ’’ਤਿ [ਨਿਬ੍ਬਾਯਿਤਬ੍ਬੋਤਿ (ਕ.)].

‘‘ਨ ਹਿ, ਮਹਾਰਾਜ, ਸਬ੍ਬਂ ਤਂ ਵੇਦਯਿਤਂ ਕਮ੍ਮਮੂਲਕਂ. ਅਟ੍ਠਹਿ, ਮਹਾਰਾਜ, ਕਾਰਣੇਹਿ ਵੇਦਯਿਤਾਨਿ ਉਪ੍ਪਜ੍ਜਨ੍ਤਿ, ਯੇਹਿ ਕਾਰਣੇਹਿ ਪੁਥੂ ਸਤ੍ਤਾ ਵੇਦਨਾ ਵੇਦਿਯਨ੍ਤਿ. ਕਤਮੇਹਿ ਅਟ੍ਠਹਿ? ਵਾਤਸਮੁਟ੍ਠਾਨਾਨਿਪਿ ਖੋ, ਮਹਾਰਾਜ, ਇਧੇਕਚ੍ਚਾਨਿ ਵੇਦਯਿਤਾਨਿ ਉਪ੍ਪਜ੍ਜਨ੍ਤਿ, ਪਿਤ੍ਤਸਮੁਟ੍ਠਾਨਾਨਿਪਿ ਖੋ, ਮਹਾਰਾਜ…ਪੇ… ਸੇਮ੍ਹਸਮੁਟ੍ਠਾਨਾਨਿਪਿ ਖੋ, ਮਹਾਰਾਜ…ਪੇ… ਸਨ੍ਨਿਪਾਤਿਕਾਨਿਪਿ ਖੋ, ਮਹਾਰਾਜ…ਪੇ… ਉਤੁਪਰਿਣਾਮਜਾਨਿਪਿ ਖੋ, ਮਹਾਰਾਜ…ਪੇ… ਵਿਸਮਪਰਿਹਾਰਜਾਨਿਪਿ ਖੋ, ਮਹਾਰਾਜ…ਪੇ… ਓਪਕ੍ਕਮਿਕਾਨਿਪਿ ਖੋ, ਮਹਾਰਾਜ…ਪੇ… ਕਮ੍ਮਵਿਪਾਕਜਾਨਿਪਿ ਖੋ, ਮਹਾਰਾਜ, ਇਧੇਕਚ੍ਚਾਨਿ ਵੇਦਯਿਤਾਨਿ ਉਪ੍ਪਜ੍ਜਨ੍ਤਿ. ਇਮੇਹਿ ਖੋ, ਮਹਾਰਾਜ, ਅਟ੍ਠਹਿ ਕਾਰਣੇਹਿ ਪੁਥੂ ਸਤ੍ਤਾ ਵੇਦਨਾ ਵੇਦਯਨ੍ਤਿ. ਤਤ੍ਥ ਯੇ ਤੇ ਪੁਗ੍ਗਲਾ ‘ਸਤ੍ਤੇ ਕਮ੍ਮਂ ਵਿਬਾਧਤੀ’ਤਿ ਵਦੇਯ੍ਯੁਂ, ਤੇ ਇਮੇ ਪੁਗ੍ਗਲਾ ਸਤ੍ਤਕਾਰਣਂ ਪਟਿਬਾਹਨ੍ਤਿ. ਤੇਸਂ ਤਂ ਵਚਨਂ ਮਿਚ੍ਛਾ’’ਤਿ. ‘‘ਭਨ੍ਤੇ ਨਾਗਸੇਨ, ਯਞ੍ਚ ਵਾਤਿਕਂ ਯਞ੍ਚ ਪਿਤ੍ਤਿਕਂ ਯਞ੍ਚ ਸੇਮ੍ਹਿਕਂ ਯਞ੍ਚ ਸਨ੍ਨਿਪਾਤਿਕਂ ਯਞ੍ਚ ਉਤੁਪਰਿਣਾਮਜਂ ਯਞ੍ਚ ਵਿਸਮਪਰਿਹਾਰਜਂ ਯਞ੍ਚ ਓਪਕ੍ਕਮਿਕਂ, ਸਬ੍ਬੇਤੇ ਕਮ੍ਮਸਮੁਟ੍ਠਾਨਾ ਯੇਵ, ਕਮ੍ਮੇਨੇਵ ਤੇ ਸਬ੍ਬੇ ਸਮ੍ਭਵਨ੍ਤੀ’’ਤਿ.

‘‘ਯਦਿ, ਮਹਾਰਾਜ, ਤੇਪਿ ਸਬ੍ਬੇ ਕਮ੍ਮਸਮੁਟ੍ਠਾਨਾਵ ਆਬਾਧਾ ਭਵੇਯ੍ਯੁਂ, ਨ ਤੇਸਂ ਕੋਟ੍ਠਾਸਤੋ ਲਕ੍ਖਣਾਨਿ ਭਵੇਯ੍ਯੁਂ. ਵਾਤੋ ਖੋ, ਮਹਾਰਾਜ, ਕੁਪ੍ਪਮਾਨੋ ਦਸਵਿਧੇਨ ਕੁਪ੍ਪਤਿ ਸੀਤੇਨ ਉਣ੍ਹੇਨ ਜਿਘਚ੍ਛਾਯ ਵਿਪਾਸਾਯ ਅਤਿਭੁਤ੍ਤੇਨ ਠਾਨੇਨ ਪਧਾਨੇਨ ਆਧਾਵਨੇਨ ਉਪਕ੍ਕਮੇਨ ਕਮ੍ਮਵਿਪਾਕੇਨ. ਤਤ੍ਰ ਯੇ ਤੇ ਨਵ ਵਿਧਾ, ਨ ਤੇ ਅਤੀਤੇ, ਨ ਅਨਾਗਤੇ, ਵਤ੍ਤਮਾਨਕੇ ਭਵੇ ਉਪ੍ਪਜ੍ਜਨ੍ਤਿ, ਤਸ੍ਮਾ ਨ ਵਤ੍ਤਬ੍ਬਾ ‘ਕਮ੍ਮਸਮ੍ਭਵਾ ਸਬ੍ਬਾ ਵੇਦਨਾ’ਤਿ. ਪਿਤ੍ਤਂ, ਮਹਾਰਾਜ, ਕੁਪ੍ਪਮਾਨਂ ਤਿਵਿਧੇਨ ਕੁਪ੍ਪਤਿ ਸੀਤੇਨ ਉਣ੍ਹੇਨ ਵਿਸਮਭੋਜਨੇਨ. ਸੇਮ੍ਹਂ, ਮਹਾਰਾਜ, ਕੁਪ੍ਪਮਾਨਂ ਤਿਵਿਧੇਨ ਕੁਪ੍ਪਤਿ ਸੀਤੇਨ ਉਣ੍ਹੇਨ ਅਨ੍ਨਪਾਨੇਨ. ਯੋ ਚ, ਮਹਾਰਾਜ, ਵਾਤੋ ਯਞ੍ਚ ਪਿਤ੍ਤਂ ਯਞ੍ਚ ਸੇਮ੍ਹਂ, ਤੇਹਿ ਤੇਹਿ ਕੋਪੇਹਿ ਕੁਪ੍ਪਿਤ੍ਵਾ ਮਿਸ੍ਸੀ ਹੁਤ੍ਵਾ ਸਕਂ ਸਕਂ ਵੇਦਨਂ ਆਕਡ੍ਢਤਿ. ਉਤੁਪਰਿਣਾਮਜਾ, ਮਹਾਰਾਜ, ਵੇਦਨਾ ਉਤੁਪਰਿਯਾਮੇਨ ਉਪ੍ਪਜ੍ਜਤਿ. ਵਿਸਮਪਰਿਹਾਰਜਾ ਵੇਦਨਾ ਵਿਸਮਪਰਿਹਾਰੇਨ ਉਪ੍ਪਜ੍ਜਤਿ. ਓਪਕ੍ਕਮਿਕਾ, ਮਹਾਰਾਜ, ਵੇਦਨਾ ਅਤ੍ਥਿ ਕਿਰਿਯਾ, ਅਤ੍ਥਿ ਕਮ੍ਮਵਿਪਾਕਾ, ਕਮ੍ਮਵਿਪਾਕਜਾ ਵੇਦਨਾ ਪੁਬ੍ਬੇ ਕਤੇਨ ਕਮ੍ਮੇਨ ਉਪ੍ਪਜ੍ਜਤਿ. ਇਤਿ ਖੋ, ਮਹਾਰਾਜ, ਅਪ੍ਪਂ ਕਮ੍ਮਵਿਪਾਕਜਂ, ਬਹੁਤਰਂ ਅਵਸੇਸਂ. ਤਤ੍ਥ ਬਾਲਾ ‘ਸਬ੍ਬਂ ਕਮ੍ਮਵਿਪਾਕਜਂ ਯੇਵਾ’ਤਿ ਅਤਿਧਾਵਨ੍ਤਿ. ਤਂ ਕਮ੍ਮਂ ਨ ਸਕ੍ਕਾ ਵਿਨਾ ਬੁਦ੍ਧਞਾਣੇਨ ਵਵਤ੍ਥਾਨਂ ਕਾਤੁਂ.

‘‘ਯਂ ਪਨ, ਮਹਾਰਾਜ, ਭਗਵਤੋ ਪਾਦੋ ਸਕਲਿਕਾਯ ਖਤੋ, ਤਂ ਵੇਦਯਿਤਂ ਨੇਵ ਵਾਤਸਮੁਟ੍ਠਾਨਂ, ਨ ਪਿਤ੍ਤਸਮੁਟ੍ਠਾਨਂ, ਨ ਸੇਮ੍ਹਸਮੁਟ੍ਠਾਨਂ, ਨ ਸਨ੍ਨਿਪਾਤਿਕਂ, ਨ ਉਤੁਪਰਿਣਾਮਜਂ, ਨ ਵਿਸਮਪਰਿਹਾਰਜਂ, ਨ ਕਮ੍ਮਵਿਪਾਕਜਂ, ਓਪਕ੍ਕਮਿਕਂ ਯੇਵ. ਦੇਵਦਤ੍ਤੋ ਹਿ, ਮਹਾਰਾਜ, ਬਹੂਨਿ ਜਾਤਿਸਤਸਹਸ੍ਸਾਨਿ ਤਥਾਗਤੇ ਆਘਾਤਂ ਬਨ੍ਧਿ, ਸੋ ਤੇਨ ਆਘਾਤੇਨ ਮਹਤਿਂ ਗਰੁਂ ਸਿਲਂ ਗਹੇਤ੍ਵਾ ‘ਮਤ੍ਥਕੇ ਪਾਤੇਸ੍ਸਾਮੀ’ਤਿ ਮੁਞ੍ਚਿ, ਅਥਞ੍ਞੇ ਦ੍ਵੇ ਸੇਲਾ ਆਗਨ੍ਤ੍ਵਾ ਤਂ ਸਿਲਂ ਤਥਾਗਤਂ ਅਸਮ੍ਪਤ੍ਤਂ ਯੇਵ ਸਮ੍ਪਟਿਚ੍ਛਿਂਸੁ, ਤਾਸਂ ਪਹਾਰੇਨ ਪਪਟਿਕਾ ਭਿਜ੍ਜਿਤ੍ਵਾ ਭਗਵਤੋ ਪਾਦੇ ਪਤਿਤ੍ਵਾ ਰੁਹਿਰਂ [ਨਿਪਤਿਤ੍ਵਾ ਰੁਧਿਰਂ (ਸ੍ਯਾ.)] ਉਪ੍ਪਾਦੇਸਿ, ਕਮ੍ਮਵਿਪਾਕਤੋ ਵਾ, ਮਹਾਰਾਜ, ਭਗਵਤੋ ਏਸਾ ਵੇਦਨਾ ਨਿਬ੍ਬਤ੍ਤਾ ਕਿਰਿਯਤੋ ਵਾ, ਤਤੁਦ੍ਧਂ ਨਤ੍ਥਞ੍ਞਾ ਵੇਦਨਾ.

‘‘ਯਥਾ, ਮਹਾਰਾਜ, ਖੇਤ੍ਤਦੁਟ੍ਠਤਾਯ ਵਾ ਬੀਜਂ ਨ ਸਮ੍ਭਵਤਿ ਬੀਜਦੁਟ੍ਠਤਾਯ ਵਾ. ਏਵਮੇਵ ਖੋ, ਮਹਾਰਾਜ, ਕਮ੍ਮਵਿਪਾਕਤੋ ਵਾ ਭਗਵਤੋ ਏਸਾ ਵੇਦਨਾ ਨਿਬ੍ਬਤ੍ਤਾ ਕਿਰਿਯਤੋ ਵਾ, ਤਤੁਦ੍ਧਂ ਨਤ੍ਥਞ੍ਞਾ ਵੇਦਨਾ.

‘‘ਯਥਾ ਵਾ ਪਨ, ਮਹਾਰਾਜ, ਕੋਟ੍ਠਦੁਟ੍ਠਤਾਯ ਵਾ ਭੋਜਨਂ ਵਿਸਮਂ ਪਰਿਣਮਤਿ ਆਹਾਰਦੁਟ੍ਠਤਾਯ ਵਾ, ਏਵਮੇਵ ਖੋ, ਮਹਾਰਾਜ, ਕਮ੍ਮਵਿਪਾਕਤੋ ਵਾ ਭਗਵਤੋ ਏਸਾ ਵੇਦਨਾ ਨਿਬ੍ਬਤ੍ਤਾ ਕਿਰਿਯਤੋ ਵਾ, ਤਤੁਦ੍ਧਂ ਨਤ੍ਥਞ੍ਞਾ ਵੇਦਨਾ. ਅਪਿ ਚ, ਮਹਾਰਾਜ, ਨਤ੍ਥਿ ਭਗਵਤੋ ਕਮ੍ਮਵਿਪਾਕਜਾ ਵੇਦਨਾ, ਨਤ੍ਥਿ ਵਿਸਮਪਰਿਹਾਰਜਾ ਵੇਦਨਾ, ਅਵਸੇਸੇਹਿ ਸਮੁਟ੍ਠਾਨੇਹਿ ਭਗਵਤੋ ਵੇਦਨਾ ਉਪ੍ਪਜ੍ਜਤਿ, ਤਾਯ ਚ ਪਨ ਵੇਦਨਾਯ ਨ ਸਕ੍ਕਾ ਭਗਵਨ੍ਤਂ ਜੀਵਿਤਾ ਵੋਰੋਪੇਤੁਂ.

‘‘ਨਿਪਤਨ੍ਤਿ, ਮਹਾਰਾਜ, ਇਮਸ੍ਮਿਂ ਚਾਤੁਮਹਾਭੂਤਿਕੇ [ਚਾਤੁਮ੍ਮਹਾਭੂਤਿਕੇ (ਸੀ.)] ਕਾਯੇ ਇਟ੍ਠਾਨਿਟ੍ਠਾ ਸੁਭਾਸੁਭਵੇਦਨਾ. ਇਧ, ਮਹਾਰਾਜ, ਆਕਾਸੇ ਖਿਤ੍ਤੋ ਲੇਡ੍ਡੁ ਮਹਾਪਥਵਿਯਾ ਨਿਪਤਤਿ, ਅਪਿ ਨੁ ਖੋ ਸੋ, ਮਹਾਰਾਜ, ਲੇਡ੍ਡੁ ਪੁਬ੍ਬੇ ਕਤੇਨ ਮਹਾਪਥਵਿਯਾ ਨਿਪਤੀ’’ਤਿ? ‘‘ਨ ਹਿ, ਭਨ੍ਤੇ, ਨਤ੍ਥਿ ਸੋ, ਭਨ੍ਤੇ, ਹੇਤੁ ਮਹਾਪਥਵਿਯਾ, ਯੇਨ ਹੇਤੁਨਾ ਮਹਾਪਥਵੀ ਕੁਸਲਾਕੁਸਲਵਿਪਾਕਂ ਪਟਿਸਂਵੇਦੇਯ੍ਯ, ਪਚ੍ਚੁਪ੍ਪਨ੍ਨੇਨ, ਭਨ੍ਤੇ, ਅਕਮ੍ਮਕੇਨ ਹੇਤੁਨਾ ਸੋ ਲੇਡ੍ਡੁ ਮਹਾਪਥਵਿਯਂ ਨਿਪਤਤਿ. ਯਥਾ, ਮਹਾਰਾਜ, ਮਹਾਪਥਵੀ, ਏਵਂ ਤਥਾਗਤੋ ਦਟ੍ਠਬ੍ਬੋ. ਯਥਾ ਲੇਡ੍ਡੁ ਪੁਬ੍ਬੇ ਅਕਤੇਨ ਮਹਾਪਥਵਿਯਂ ਨਿਪਤਤਿ, ਏਵਮੇਵ ਖੋ, ਮਹਾਰਾਜ, ਤਥਾਗਤਸ੍ਸ ਪੁਬ੍ਬੇ ਅਕਤੇਨ ਸਾ ਸਕਲਿਕਾਪਾਦੇ ਨਿਪਤਿਤਾ.

‘‘ਇਧ ਪਨ, ਮਹਾਰਾਜ, ਮਨੁਸ੍ਸਾ ਮਹਾਪਥਵਿਂ ਭਿਨ੍ਦਨ੍ਤਿ ਚ ਖਣਨ੍ਤਿ ਚ, ਅਪਿ ਨੁ ਖੋ, ਮਹਾਰਾਜ, ਤੇ ਮਨੁਸ੍ਸਾ ਪੁਬ੍ਬੇ ਕਤੇਨ ਮਹਾਪਥਵਿਂ ਭਿਨ੍ਦਨ੍ਤਿ ਚ ਖਣਨ੍ਤਿ ਚਾ’’ਤਿ? ‘‘ਨ ਹਿ ਭਨ੍ਤੇ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਯਾ ਸਾ ਸਕਲਿਕਾ ਭਗਵਤੋ ਪਾਦੇ ਨਿਪਤਿਤਾ, ਨ ਸਾ ਸਕਲਿਕਾ ਪੁਬ੍ਬੇ ਕਤੇਨ ਭਗਵਤੋ ਪਾਦੇ ਨਿਪਤਿਤਾ. ਯੋਪਿ, ਮਹਾਰਾਜ, ਭਗਵਤੋ ਲੋਹਿਤਪਕ੍ਖਨ੍ਦਿਕਾਬਾਧੋ ਉਪ੍ਪਨ੍ਨੋ, ਸੋਪਿ ਆਬਾਧੋ ਨ ਪੁਬ੍ਬੇ ਕਤੇਨ ਉਪ੍ਪਨ੍ਨੋ, ਸਨ੍ਨਿਪਾਤਿਕੇਨੇਵ ਉਪ੍ਪਨ੍ਨੋ, ਯੇ ਕੇਚਿ, ਮਹਾਰਾਜ, ਭਗਵਤੋ ਕਾਯਿਕਾ ਆਬਾਧਾ ਉਪ੍ਪਨ੍ਨਾ, ਨ ਤੇ ਕਮ੍ਮਾਭਿਨਿਬ੍ਬਤ੍ਤਾ, ਛਨ੍ਨਂ ਏਤੇਸਂ ਸਮੁਟ੍ਠਾਨਾਨਂ ਅਞ੍ਞਤਰਤੋ ਨਿਬ੍ਬਤ੍ਤਾ.

‘‘ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ਦੇਵਾਤਿਦੇਵੇਨ ਸਂਯੁਤ੍ਤਨਿਕਾਯਵਰਲਞ੍ਛਕੇ ਮੋਲ਼ਿਯਸੀਵਕੇ [ਮੋਲਿਯਸਿਵਕੇ (ਸ੍ਯਾ. ਕ.) ਸਂ. ਨਿ. ੪.੨੬੯ ਪਸ੍ਸਿਤਬ੍ਬਂ] ਵੇਯ੍ਯਾਕਰਣੇ –

‘‘‘ਪਿਤ੍ਤਸਮੁਟ੍ਠਾਨਾਨਿਪਿ ਖੋ, ਸੀਵਕ, ਇਧੇਕਚ੍ਚਾਨਿ ਵੇਦਯਿਤਾਨਿ ਉਪ੍ਪਜ੍ਜਨ੍ਤਿ. ਸਾਮਮ੍ਪਿ ਖੋ ਏਤਂ, ਸੀਵਕ, ਵੇਦਿਤਬ੍ਬਂ, ਯਥਾ ਪਿਤ੍ਤਸਮੁਟ੍ਠਾਨਾਨਿਪਿ ਇਧੇਕਚ੍ਚਾਨਿ ਵੇਦਯਿਤਾਨਿ ਉਪ੍ਪਜ੍ਜਨ੍ਤਿ. ਲੋਕਸ੍ਸਪਿ ਖੋ ਏਤਂ, ਸੀਵਕ, ਸਚ੍ਚਸਮ੍ਮਤਂ, ਯਥਾ ਪਿਤ੍ਤਸਮੁਟ੍ਠਾਨਾਨਿਪਿ ਇਧੇਕਚ੍ਚਾਨਿ ਵੇਦਯਿਤਾਨਿ ਉਪ੍ਪਜ੍ਜਨ੍ਤਿ. ਤਤ੍ਰ, ਸੀਵਕ, ਯੇ ਤੇ ਸਮਣਬ੍ਰਾਹ੍ਮਣਾ ਏਵਂਵਾਦਿਨੋ ਏਵਂਦਿਟ੍ਠਿਨੋ ‘‘ਯਂ ਕਿਞ੍ਚਾਯਂ ਪੁਰਿਸਪੁਗ੍ਗਲੋ ਪਟਿਸਂਵੇਦੇਤਿ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ, ਸਬ੍ਬਂ ਤਂ ਪੁਬ੍ਬੇ ਕਤਹੇਤੂ’’ਤਿ. ਯਞ੍ਚ ਸਾਮਂ ਞਾਤਂ, ਤਞ੍ਚ ਅਤਿਧਾਵਨ੍ਤਿ, ਯਞ੍ਚ ਲੋਕੇ ਸਚ੍ਚਸਮ੍ਮਤਂ, ਤਞ੍ਚ ਅਤਿਧਾਵਨ੍ਤਿ. ਤਸ੍ਮਾ ਤੇਸਂ ਸਮਣਬ੍ਰਾਹ੍ਮਣਾਨਂ ਮਿਚ੍ਛਾਤਿ ਵਦਾਮਿ.

‘‘‘ਸੇਮ੍ਹਸਮੁਟ੍ਠਾਨਾਨਿਪਿ ਖੋ, ਸੀਵਕ, ਇਧੇਕਚ੍ਚਾਨਿ ਵੇਦਯਿਤਾਨਿ ਉਪ੍ਪਜ੍ਜਨ੍ਤਿ. ਵਾਤਸਮੁਟ੍ਠਾਨਾਨਿਪਿ ਖੋ, ਸੀਵਕ…ਪੇ… ਸਨ੍ਨਿਪਾਤਿਕਾਨਿਪਿ ਖੋ, ਸੀਵਕ…ਪੇ… ਉਤੁਪਰਿਣਾਮਜਾਨਿਪਿ ਖੋ, ਸੀਵਕ…ਪੇ… ਵਿਸਮਪਰਿਹਾਰਜਾਨਿਪਿ ਖੋ, ਸੀਵਕ…ਪੇ… ਓਪਕ੍ਕਮਿਕਾਨਿਪਿ ਖੋ, ਸੀਵਕ…ਪੇ… ਕਮ੍ਮਵਿਪਾਕਜਾਨਿਪਿ ਖੋ, ਸੀਵਕ, ਇਧੇਕਚ੍ਚਾਨਿ ਵੇਦਯਿਤਾਨਿ ਉਪ੍ਪਜ੍ਜਨ੍ਤਿ. ਸਾਮਮ੍ਪਿ ਖੋ ਏਤਂ, ਸੀਵਕ, ਵੇਦਿਤਬ੍ਬਂ, ਯਥਾ ਕਮ੍ਮਵਿਪਾਕਜਾਨਿਪਿ ਇਧੇਕਚ੍ਚਾਨਿ ਵੇਦਯਿਤਾਨਿ ਉਪ੍ਪਜ੍ਜਨ੍ਤਿ. ਲੋਕਸ੍ਸਪਿ ਖੋ ਏਤਂ, ਸੀਵਕ, ਸਚ੍ਚਸਮ੍ਮਤਂ, ਯਥਾ ਕਮ੍ਮਵਿਪਾਕਜਾਨਿਪਿ ਇਧੇਕਚ੍ਚਾਨਿ ਵੇਦਯਿਤਾਨਿ ਉਪ੍ਪਜ੍ਜਨ੍ਤਿ. ਤਤ੍ਰ, ਸੀਵਕ, ਯੇ ਤੇ ਸਮਣਬ੍ਰਾਹ੍ਮਣਾ ਏਵਂਵਾਦਿਨੋ ਏਵਂਦਿਟ੍ਠਿਨੋ ‘‘ਯਂ ਕਿਞ੍ਚਾਯਂ ਪੁਰਿਸਪੁਗ੍ਗਲੋ ਪਟਿਸਂਵੇਦੇਤਿ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ, ਸਬ੍ਬਂ ਤਂ ਪੁਬ੍ਬੇ ਕਤਹੇਤੂ’’ਤਿ. ਯਞ੍ਚ ਸਾਮਂ ਞਾਤਂ, ਤਞ੍ਚ ਅਤਿਧਾਵਨ੍ਤਿ, ਯਞ੍ਚ ਲੋਕੇ ਸਚ੍ਚਸਮ੍ਮਤਂ, ਤਞ੍ਚ ਅਤਿਧਾਵਨ੍ਤਿ. ਤਸ੍ਮਾ ਤੇਸਂ ਸਮਣਬ੍ਰਾਹ੍ਮਣਾਨਂ ਮਿਚ੍ਛਾਤਿ ਵਦਾਮੀ’’’ਤਿ.

‘‘ਇਤਿਪਿ, ਮਹਾਰਾਜ, ਨ ਸਬ੍ਬਾ ਵੇਦਨਾ ਕਮ੍ਮਵਿਪਾਕਜਾ, ਸਬ੍ਬਂ, ਮਹਾਰਾਜ, ਅਕੁਸਲਂ ਝਾਪੇਤ੍ਵਾ ਭਗਵਾ ਸਬ੍ਬਞ੍ਞੁਤਂ ਪਤ੍ਤੋਤਿ ਏਵਮੇਤਂ ਧਾਰੇਹੀ’’ਤਿ. ‘‘ਸਾਧੁ, ਭਨ੍ਤੇ ਨਾਗਸੇਨ, ਏਵਮੇਤਂ ਤਥਾ ਸਮ੍ਪਟਿਚ੍ਛਾਮੀ’’ਤਿ.

ਅਕੁਸਲਚ੍ਛੇਦਨਪਞ੍ਹੋ ਅਟ੍ਠਮੋ.