੬. ਗਬ੍ਭਾਵਕ੍ਕਨ੍ਤਿਪਞ੍ਹੋ

੬. ‘‘ਭਨ੍ਤੇ ਨਾਗਸੇਨ, ਭਾਸਿਤਮ੍ਪੇਤਂ ਭਗਵਤਾ ‘ਤਿਣ੍ਣਂ ਖੋ ਪਨ, ਭਿਕ੍ਖਵੇ, ਸਨ੍ਨਿਪਾਤਾ ਗਬ੍ਭਸ੍ਸ ਅਵਕ੍ਕਨ੍ਤਿ [ਗਬ੍ਭਸ੍ਸਾਵਕ੍ਕਨ੍ਤਿ (ਮ. ਨਿ. ੧.੪੦੮)] ਹੋਤਿ, ਇਧ ਮਾਤਾਪਿਤਰੋ ਚ ਸਨ੍ਨਿਪਤਿਤਾ ਹੋਨ੍ਤਿ, ਮਾਤਾ ਚ ਉਤੁਨੀ ਹੋਤਿ, ਗਨ੍ਧਬ੍ਬੋ ਚ ਪਚ੍ਚੁਪਟ੍ਠਿਤੋ ਹੋਤਿ, ਇਮੇਸਂ ਖੋ, ਭਿਕ੍ਖਵੇ, ਤਿਣ੍ਣਂ ਸਨ੍ਨਿਪਾਤਾ ਗਬ੍ਭਸ੍ਸ ਅਵਕ੍ਕਨ੍ਤਿ ਹੋਤੀ’ਤਿ, ਅਸੇਸਵਚਨਮੇਤਂ, ਨਿਸ੍ਸੇਸਵਚਨਮੇਤਂ, ਨਿਪ੍ਪਰਿਯਾਯਵਚਨਮੇਤਂ, ਅਰਹਸ੍ਸਵਚਨਮੇਤਂ, ਸਦੇਵਮਨੁਸ੍ਸਾਨਂ ਮਜ੍ਝੇ ਨਿਸੀਦਿਤ੍ਵਾ ਭਣਿਤਂ, ਅਯਞ੍ਚ ਦ੍ਵਿਨ੍ਨਂ ਸਨ੍ਨਿਪਾਤਾ ਗਬ੍ਭਸ੍ਸ ਅਵਕ੍ਕਨ੍ਤਿ ਦਿਸ੍ਸਤਿ, ਦੁਕੂਲੇਨ ਤਾਪਸੇਨ ਪਾਰਿਕਾਯ ਤਾਪਸਿਯਾ ਉਤੁਨਿਕਾਲੇ ਦਕ੍ਖਿਣੇਨ ਹਤ੍ਥਙ੍ਗੁਟ੍ਠੇਨ ਨਾਭਿ ਪਰਾਮਟ੍ਠਾ, ਤਸ੍ਸ ਤੇਨ ਨਾਭਿਪਰਾਮਸਨੇਨ ਸਾਮਕੁਮਾਰੋ ਨਿਬ੍ਬਤ੍ਤੋ. ਮਾਤਙ੍ਗੇਨਾਪਿ ਇਸਿਨਾ ਬ੍ਰਾਹ੍ਮਣਕਞ੍ਞਾਯ ਉਤੁਨਿਕਾਲੇ ਦਕ੍ਖਿਣੇਨ ਹਤ੍ਥਙ੍ਗੁਟ੍ਠੇਨ ਨਾਭਿ ਪਰਾਮਟ੍ਠਾ, ਤਸ੍ਸ ਤੇਨ ਨਾਭਿਪਰਾਮਸਨੇਨ ਮਣ੍ਡਬ੍ਯੋ ਨਾਮ ਮਾਣਵਕੋ ਨਿਬ੍ਬਤ੍ਤੋਤਿ. ਯਦਿ, ਭਨ੍ਤੇ ਨਾਗਸੇਨ, ਭਗਵਤਾ ਭਣਿਤਂ ‘ਤਿਣ੍ਣਂ ਖੋ ਪਨ, ਭਿਕ੍ਖਵੇ, ਸਨ੍ਨਿਪਾਤਾ ਗਬ੍ਭਸ੍ਸ ਅਵਕ੍ਕਨ੍ਤਿ ਹੋਤੀ’ਤਿ. ਤੇਨ ਹਿ ਸਾਮੋ ਚ ਕੁਮਾਰੋ ਮਣ੍ਡਬ੍ਯੋ ਚ ਮਾਣਵਕੋ ਉਭੋਪਿ ਤੇ ਨਾਭਿਪਰਾਮਸਨੇਨ ਨਿਬ੍ਬਤ੍ਤਾਤਿ ਯਂ ਵਚਨਂ, ਤਂ ਮਿਚ੍ਛਾ. ਯਦਿ, ਭਨ੍ਤੇ, ਤਥਾਗਤੇਨ ਭਣਿਤਂ ‘ਸਾਮੋ ਚ ਕੁਮਾਰੋ ਮਣ੍ਡਬ੍ਯੋ ਚ ਮਾਣਵਕੋ ਨਾਭਿਪਰਾਮਸਨੇਨ ਨਿਬ੍ਬਤ੍ਤਾ’’ਤਿ, ਤੇਨ ਹਿ ‘ਤਿਣ੍ਣਂ ਖੋ ਪਨ, ਭਿਕ੍ਖਵੇ, ਸਨ੍ਨਿਪਾਤਾ ਗਬ੍ਭਸ੍ਸ ਅਵਕ੍ਕਨ੍ਤਿ ਹੋਤੀ’ਤਿ ਯਂ ਵਚਨਂ, ਤਮ੍ਪਿ ਮਿਚ੍ਛਾ. ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਸੁਗਮ੍ਭੀਰੋ ਸੁਨਿਪੁਣੋ ਵਿਸਯੋ ਬੁਦ੍ਧਿਮਨ੍ਤਾਨਂ, ਸੋ ਤਵਾਨੁਪ੍ਪਤ੍ਤੋ, ਛਿਨ੍ਦ ਵਿਮਤਿਪਥਂ, ਧਾਰੇਹਿ ਞਾਣਵਰਪ੍ਪਜ੍ਜੋਤ’’ਨ੍ਤਿ.

‘‘ਭਾਸਿਤਮ੍ਪੇਤਂ, ਮਹਾਰਾਜ, ਭਗਵਤਾ ‘ਤਿਣ੍ਣਂ ਖੋ ਪਨ, ਭਿਕ੍ਖਵੇ, ਸਨ੍ਨਿਪਾਤਾ ਗਬ੍ਭਸ੍ਸ ਅਵਕ੍ਕਨ੍ਤਿ ਹੋਤਿ, ਇਧ ਮਾਤਾਪਿਤਰੋ ਚ ਸਨ੍ਨਿਪਤਿਤਾ ਹੋਨ੍ਤਿ, ਮਾਤਾ ਚ ਉਤੁਨੀ ਹੋਤਿ, ਗਨ੍ਧਬ੍ਬੋ ਚ ਪਚ੍ਚੁਪਟ੍ਠਿਤੋ ਹੋਤਿ, ਏਵਂ ਤਿਣ੍ਣਂ ਸਨ੍ਨਿਪਾਤਾ ਗਬ੍ਭਸ੍ਸ ਅਵਕ੍ਕਨ੍ਤਿ ਹੋਤੀ’ਤਿ. ਭਣਿਤਞ੍ਚ ‘ਸਾਮੋ ਚ ਕੁਮਾਰੋ ਮਣ੍ਡਬ੍ਯੋ ਚ ਮਾਣਵਕੋ ਨਾਭਿਪਰਾਮਸਨੇਨ ਨਿਬ੍ਬਤ੍ਤਾ’’ਤਿ. ‘‘ਤੇਨ ਹਿ, ਭਨ੍ਤੇ ਨਾਗਸੇਨ, ਯੇਨ ਕਾਰਣੇਨ ਪਞ੍ਹੋ ਸੁਵਿਨਿਚ੍ਛਿਤੋ ਹੋਤਿ, ਤੇਨ ਕਾਰਣੇਨ ਮਂ ਸਞ੍ਞਾਪੇਹੀ’’ਤਿ.

‘‘ਸੁਤਪੁਬ੍ਬਂ ਪਨ ਤਯਾ, ਮਹਾਰਾਜ, ਸਂਕਿਚ੍ਚੋ ਚ ਕੁਮਾਰੋ ਇਸਿਸਿਙ੍ਗੋ ਚ ਤਾਪਸੋ ਥੇਰੋ ਚ ਕੁਮਾਰਕਸ੍ਸਪੋ ‘ਇਮਿਨਾ ਨਾਮ ਤੇ ਨਿਬ੍ਬਤ੍ਤਾ’’ਤਿ? ‘‘ਆਮ, ਭਨ੍ਤੇ, ਸੁਯ੍ਯਤਿ, ਅਬ੍ਭੁਗ੍ਗਤਾ ਤੇਸਂ ਜਾਤਿ, ਦ੍ਵੇ ਮਿਗਧੇਨੁਯੋ ਤਾਵ ਉਤੁਨਿਕਾਲੇ ਦ੍ਵਿਨ੍ਨਂ ਤਾਪਸਾਨਂ ਪਸ੍ਸਾਵਟ੍ਠਾਨਂ ਆਗਨ੍ਤ੍ਵਾ ਸਸਮ੍ਭਵਂ ਪਸ੍ਸਾਵਂ ਪਿਵਿਂਸੁ, ਤੇਨ ਪਸ੍ਸਾਵਸਮ੍ਭਵੇਨ ਸਂਕਿਚ੍ਚੋ ਚ ਕੁਮਾਰੋ ਇਸਿਸਿਙ੍ਗੋ ਚ ਤਾਪਸੋ ਨਿਬ੍ਬਤ੍ਤਾ. ਥੇਰਸ੍ਸ ਉਦਾਯਿਸ੍ਸ ਭਿਕ੍ਖੁਨੁਪਸ੍ਸਯਂ ਉਪਗਤਸ੍ਸ ਰਤ੍ਤਚਿਤ੍ਤੇਨ ਭਿਕ੍ਖੁਨਿਯਾ ਅਙ੍ਗਜਾਤਂ ਉਪਨਿਜ੍ਝਾਯਨ੍ਤਸ੍ਸ ਸਮ੍ਭਵਂ ਕਾਸਾਵੇ ਮੁਚ੍ਚਿ. ਅਥ ਖੋ ਆਯਸ੍ਮਾ ਉਦਾਯਿ ਤਂ ਭਿਕ੍ਖੁਨਿਂ ਏਤਦਵੋਚ ‘ਗਚ੍ਛ ਭਗਿਨਿ, ਉਦਕਂ ਆਹਰ ਅਨ੍ਤਰਵਾਸਕਂ ਧੋਵਿਸ੍ਸਾਮੀ’ਤਿ. ‘ਆਹਰਯ੍ਯ ਅਹਮੇਵ ਧੋਵਿਸ੍ਸਾਮੀ’ਤਿ. ਤਤੋ ਸਾ ਭਿਕ੍ਖੁਨੀ ਉਤੁਨਿਸਮਯੇ ਤਂ ਸਮ੍ਭਵਂ ਏਕਦੇਸਂ ਮੁਖੇਨ ਅਗ੍ਗਹੇਸਿ, ਏਕਦੇਸਂ ਅਙ੍ਗਜਾਤੇ ਪਕ੍ਖਿਪਿ, ਤੇਨ ਥੇਰੋ ਕੁਮਾਰਕਸ੍ਸਪੋ ਨਿਬ੍ਬਤ੍ਤੋਤਿ ਏਤਂ ਜਨੋ ਆਹਾ’’ਤਿ.

‘‘ਅਪਿ ਨੁ ਖੋ ਤ੍ਵਂ, ਮਹਾਰਾਜ, ਸਦ੍ਦਹਸਿ ਤਂ ਵਚਨ’’ਨ੍ਤਿ? ‘‘ਆਮ ਭਨ੍ਤੇ, ਬਲਵਂ ਤਤ੍ਥ ਮਯਂ ਕਾਰਣਂ ਉਪਲਭਾਮ, ਯੇਨ ਮਯਂ ਕਾਰਣੇਨ ਸਦ੍ਦਹਾਮ ‘ਇਮਿਨਾ ਕਾਰਣੇਨ ਨਿਬ੍ਬਤ੍ਤਾ’’ਤਿ. ‘‘ਕਿਂ ਪਨੇਤ੍ਥ, ਮਹਾਰਾਜ, ਕਾਰਣ’’ਨ੍ਤਿ? ‘‘ਸੁਪਰਿਕਮ੍ਮਕਤੇ, ਭਨ੍ਤੇ, ਕਲਲੇ ਬੀਜਂ ਨਿਪਤਿਤ੍ਵਾ ਖਿਪ੍ਪਂ ਸਂਵਿਰੁਹਤੀ’’ਤਿ. ‘‘ਆਮ ਮਹਾਰਾਜਾ’’ਤਿ. ‘‘ਏਵਮੇਵ ਖੋ, ਭਨ੍ਤੇ, ਸਾ ਭਿਕ੍ਖੁਨੀ ਉਤੁਨੀ ਸਮਾਨਾ ਸਣ੍ਠਿਤੇ ਕਲਲੇ ਰੁਹਿਰੇ ਪਚ੍ਛਿਨ੍ਨਵੇਗੇ ਠਿਤਾਯ ਧਾਤੁਯਾ ਤਂ ਸਮ੍ਭਵਂ ਗਹੇਤ੍ਵਾ ਤਸ੍ਮਿਂ ਕਲਲੇ ਪਕ੍ਖਿਪਿ, ਤੇਨ ਤਸ੍ਸਾ ਗਬ੍ਭੋ ਸਣ੍ਠਾਸਿ, ਏਵਂ ਤਤ੍ਥ ਕਾਰਣਂ ਪਚ੍ਚੇਮ ਤੇਸਂ ਨਿਬ੍ਬਤ੍ਤਿਯਾ’’ਤਿ. ‘‘ਏਵਮੇਤਂ, ਮਹਾਰਾਜ, ਤਥਾ ਸਮ੍ਪਟਿਚ੍ਛਾਮਿ, ਯੋਨਿਪ੍ਪਵੇਸੇਨ ਗਬ੍ਭੋ ਸਮ੍ਭਵਤੀਤਿ. ਸਮ੍ਪਟਿਚ੍ਛਸਿ ਪਨ, ਤ੍ਵਂ ਮਹਾਰਾਜ, ਥੇਰਸ੍ਸ ਕੁਮਾਰਕਸ੍ਸਪਸ੍ਸ ਗਬ੍ਭਾਵਕ੍ਕਮਨ’’ਨ੍ਤਿ? ‘‘ਆਮ ਭਨ੍ਤੇ’’ਤਿ. ‘‘ਸਾਧੁ, ਮਹਾਰਾਜ, ਪਚ੍ਚਾਗਤੋਸਿ ਮਮ ਵਿਸਯਂ, ਏਕਵਿਧੇਨਪਿ ਗਬ੍ਭਾਵਕ੍ਕਨ੍ਤਿਂ ਕਥਯਨ੍ਤੋ ਮਮਾਨੁਬਲਂ ਭਵਿਸ੍ਸਸਿ, ਅਥ ਯਾ ਪਨ ਤਾ ਦ੍ਵੇ ਮਿਗਧੇਨੁਯੋ ਪਸ੍ਸਾਵਂ ਪਿਵਿਤ੍ਵਾ ਗਬ੍ਭਂ ਪਟਿਲਭਿਂਸੁ, ਤਾਸਂ ਤ੍ਵਂ ਸਦ੍ਦਹਸਿ ਗਬ੍ਭਸ੍ਸਾਵਕ੍ਕਮਨ’’ਨ੍ਤਿ? ‘‘ਆਮ, ਭਨ੍ਤੇ, ਯਂ ਕਿਞ੍ਚਿ ਭੁਤ੍ਤਂ ਪੀਤਂ ਖਾਯਿਤਂ ਲੇਹਿਤਂ, ਸਬ੍ਬਂ ਤਂ ਕਲਲਂ ਓਸਰਤਿ, ਠਾਨਗਤਂ ਵੁਡ੍ਢਿਮਾਪਜ੍ਜਤਿ. ਯਥਾ, ਭਨ੍ਤੇ ਨਾਗਸੇਨ, ਯਾ ਕਾਚਿ ਸਰਿਤਾ ਨਾਮ, ਸਬ੍ਬਾ ਤਾ ਮਹਾਸਮੁਦ੍ਦਂ ਓਸਰਨ੍ਤਿ, ਠਾਨਗਤਾ ਵੁਡ੍ਢਿਮਾਪਜ੍ਜਨ੍ਤਿ. ਏਵਮੇਵ ਖੋ, ਭਨ੍ਤੇ ਨਾਗਸੇਨ, ਯਂ ਕਿਞ੍ਚਿ ਭੁਤ੍ਤਂ ਪੀਤਂ ਖਾਯਿਤਂ ਲੇਹਿਤਂ, ਸਬ੍ਬਂ ਤਂ ਕਲਲਂ ਓਸਰਤਿ, ਠਾਨਗਤਂ ਵੁਡ੍ਢਿਮਾਪਜ੍ਜਤਿ, ਤੇਨਾਹਂ ਕਾਰਣੇਨ ਸਦ੍ਦਹਾਮਿ ਮੁਖਗਤੇਨਪਿ ਗਬ੍ਭਸ੍ਸ ਅਵਕ੍ਕਨ੍ਤਿ ਹੋਤੀ’’ਤਿ. ‘‘ਸਾਧੁ, ਮਹਾਰਾਜ, ਗਾਲ਼੍ਹਤਰਂ ਉਪਗਤੋਸਿ ਮਮ ਵਿਸਯਂ, ਮੁਖਪਾਨੇਨਪਿ ਦ੍ਵਯਸਨ੍ਨਿਪਾਤੋ ਭਵਤਿ. ਸਂਕਿਚ੍ਚਸ੍ਸ ਚ, ਮਹਾਰਾਜ, ਕੁਮਾਰਸ੍ਸ ਇਸਿਸਿਙ੍ਗਸ੍ਸ ਚ ਤਾਪਸਸ੍ਸ ਥੇਰਸ੍ਸ ਚ ਕੁਮਾਰਕਸ੍ਸਪਸ੍ਸ ਗਬ੍ਭਾਵਕ੍ਕਮਨਂ ਸਮ੍ਪਟਿਚ੍ਛਸੀ’’ਤਿ? ‘‘ਆਮ, ਭਨ੍ਤੇ, ਸਨ੍ਨਿਪਾਤੋ ਓਸਰਤੀ’’ਤਿ.

‘‘ਸਾਮੋਪਿ, ਮਹਾਰਾਜ, ਕੁਮਾਰੋ ਮਣ੍ਡਬ੍ਯੋਪਿ ਮਾਣਵਕੋ ਤੀਸੁ ਸਨ੍ਨਿਪਾਤੇਸੁ ਅਨ੍ਤੋਗਧਾ, ਏਕਰਸਾ ਯੇਵ ਪੁਰਿਮੇਨ, ਤਤ੍ਥ ਕਾਰਣਂ ਵਕ੍ਖਾਮਿ. ਦੁਕੂਲੋ ਚ, ਮਹਾਰਾਜ, ਤਾਪਸੋ ਪਾਰਿਕਾ ਚ ਤਾਪਸੀ ਉਭੋਪਿ ਤੇ ਅਰਞ੍ਞਵਾਸਾ ਅਹੇਸੁਂ ਪਵਿਵੇਕਾਧਿਮੁਤ੍ਤਾ ਉਤ੍ਤਮਤ੍ਥਗਵੇਸਕਾ, ਤਪਤੇਜੇਨ ਯਾਵ ਬ੍ਰਹ੍ਮਲੋਕਂ ਸਨ੍ਤਾਪੇਸੁਂ. ਤੇਸਂ ਤਦਾ ਸਕ੍ਕੋ ਦੇਵਾਨਮਿਨ੍ਦੋ ਸਾਯਂ ਪਾਤਂ ਉਪਟ੍ਠਾਨਂ ਆਗਚ੍ਛਤਿ. ਸੋ ਤੇਸਂ ਗਰੁਕਤਮੇਤ੍ਤਤਾਯ ਉਪਧਾਰੇਨ੍ਤੋ ਅਦ੍ਦਸ ਅਨਾਗਤਮਦ੍ਧਾਨੇ ਦ੍ਵਿਨ੍ਨਮ੍ਪਿ ਤੇਸਂ ਚਕ੍ਖੂਨਂ ਅਨ੍ਤਰਧਾਨਂ, ਦਿਸ੍ਵਾ ਤੇ ਏਵਮਾਹ ‘ਏਕਂ ਮੇ, ਭੋਨ੍ਤੋ, ਵਚਨਂ ਕਰੋਥ, ਸਾਧੁ ਏਕਂ ਪੁਤ੍ਤਂ ਜਨੇਯ੍ਯਾਥ, ਸੋ ਤੁਮ੍ਹਾਕਂ ਉਪਟ੍ਠਾਕੋ ਭਵਿਸ੍ਸਤਿ ਆਲਮ੍ਬਨੋ ਚਾ’ਤਿ. ‘ਅਲਂ, ਕੋਸਿਯ, ਮਾ ਏਵਂ ਭਣੀ’ਤਿ. ਤੇ ਤਸ੍ਸ ਤਂ ਵਚਨਂ ਨ ਸਮ੍ਪਟਿਚ੍ਛਿਂਸੁ. ਅਨੁਕਮ੍ਪਕੋ ਅਤ੍ਥਕਾਮੋ ਸਕ੍ਕੋ ਦੇਵਾਨਮਿਨ੍ਦੋ ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਤੇ ਏਵਮਾਹ ‘ਏਕਂ ਮੇ, ਭੋਨ੍ਤੋ, ਵਚਨਂ ਕਰੋਥ, ਸਾਧੁ ਏਕਂ ਪੁਤ੍ਤਂ ਜਨੇਯ੍ਯਾਥ, ਸੋ ਤੁਮ੍ਹਾਕਂ ਉਪਟ੍ਠਾਕੋ ਭਵਿਸ੍ਸਤਿ ਆਲਮ੍ਬਨੋ ਚਾ’ਤਿ. ਤਤਿਯਮ੍ਪਿ ਤੇ ਆਹਂਸੁ ‘ਅਲਂ, ਕੋਸਿਯ, ਮਾ ਤ੍ਵਂ ਖੋ ਅਮ੍ਹੇ ਅਨਤ੍ਥੇ ਨਿਯੋਜੇਹਿ, ਕਦਾਯਂ ਕਾਯੋ ਨ ਭਿਜ੍ਜਿਸ੍ਸਤਿ, ਭਿਜ੍ਜਤੁ ਅਯਂ ਕਾਯੋ ਭੇਦਨਧਮ੍ਮੋ, ਭਿਜ੍ਜਨ੍ਤਿਯਾਪਿ ਧਰਣਿਯਾ ਪਤਨ੍ਤੇਪਿ ਸੇਲਸਿਖਰੇ ਫਲਨ੍ਤੇਪਿ ਆਕਾਸੇ ਪਤਨ੍ਤੇਪਿ ਚਨ੍ਦਿਮਸੂਰਿਯੇ ਨੇਵ ਮਯਂ ਲੋਕਧਮ੍ਮੇਹਿ ਮਿਸ੍ਸਯਿਸ੍ਸਾਮ, ਮਾ ਤ੍ਵਂ ਅਮ੍ਹਾਕਂ ਸਮ੍ਮੁਖਭਾਵਂ ਉਪਗਚ੍ਛ, ਉਪਗਤਸ੍ਸ ਤੇ ਏਸੋ ਵਿਸ੍ਸਾਸੋ, ਅਨਤ੍ਥਚਰੋ ਤ੍ਵਂ ਮਞ੍ਞੇ’ਤਿ.

ਤਤੋ ਸਕ੍ਕੋ ਦੇਵਾਨਮਿਨ੍ਦੋ ਤੇਸਂ ਮਨਂ ਅਲਭਮਾਨੋ ਗਰੁਕਤੋ ਪਞ੍ਜਲਿਕੋ ਪੁਨ ਯਾਚਿ ‘ਯਦਿ ਮੇ ਵਚਨਂ ਨ ਉਸ੍ਸਹਥ ਕਾਤੁਂ, ਯਦਾ ਤਾਪਸੀ ਉਤੁਨੀ ਹੋਤਿ ਪੁਪ੍ਫਵਤੀ, ਤਦਾ ਤ੍ਵਂ, ਭਨ੍ਤੇ, ਦਕ੍ਖਿਣੇਨ ਹਤ੍ਥਙ੍ਗੁਟ੍ਠੇਨ ਨਾਭਿਂ ਪਰਾਮਸੇਯ੍ਯਾਸਿ, ਤੇਨ ਸਾ ਗਬ੍ਭਂ ਲਚ੍ਛਤਿ, ਸਨ੍ਨਿਪਾਤੋ ਯੇਵੇਸ ਗਬ੍ਭਾਵਕ੍ਕਨ੍ਤਿਯਾ’ਤਿ. ‘ਸਕ੍ਕੋਮਹਂ, ਕੋਸਿਯ, ਤਂ ਵਚਨਂ ਕਾਤੁਂ, ਨ ਤਾਵਤਕੇਨ ਅਮ੍ਹਾਕਂ ਤਪੋ ਭਿਜ੍ਜਤਿ, ਹੋਤੂ’ਤਿ ਸਮ੍ਪਟਿਚ੍ਛਿਂਸੁ. ਤਾਯ ਚ ਪਨ ਵੇਲਾਯ ਦੇਵਭਵਨੇ ਅਤ੍ਥਿ ਦੇਵਪੁਤ੍ਤੋ ਉਸ੍ਸਨ੍ਨਕੁਸਲਮੂਲੋ ਖੀਣਾਯੁਕੋ ਆਯੁਕ੍ਖਯਪ੍ਪਤ੍ਤੋ ਯਦਿਚ੍ਛਕਂ ਸਮਤ੍ਥੋ ਓਕ੍ਕਮਿਤੁਂ ਅਪਿ ਚਕ੍ਕਵਤ੍ਤਿਕੁਲੇਪਿ. ਅਥ ਸਕ੍ਕੋ ਦੇਵਾਨਮਿਨ੍ਦੋ ਤਂ ਦੇਵਪੁਤ੍ਤਂ ਉਪਸਙ੍ਕਮਿਤ੍ਵਾ ਏਵਮਾਹ ‘ਏਹਿ ਖੋ, ਮਾਰਿਸ, ਸੁਪਭਾਤੋ ਤੇ ਦਿਵਸੋ, ਅਤ੍ਥਸਿਦ੍ਧਿ ਉਪਗਤਾ, ਯਮਹਂ ਤੇ ਉਪਟ੍ਠਾਨਮਾਗਮਿਂ, ਰਮਣੀਯੇ ਤੇ ਓਕਾਸੇ ਵਾਸੋ ਭਵਿਸ੍ਸਤਿ, ਪਤਿਰੂਪੇ ਕੁਲੇ ਪਟਿਸਨ੍ਧਿ ਭਵਿਸ੍ਸਤਿ, ਸੁਨ੍ਦਰੇਹਿ ਮਾਤਾਪਿਤੂਹਿ ਵਡ੍ਢੇਤਬ੍ਬੋ, ਏਹਿ ਮੇ ਵਚਨਂ ਕਰੋਹੀ’ਤਿ ਯਾਚਿ. ਦੁਤਿਯਮ੍ਪਿ…ਪੇ… ਤਤਿਯਮ੍ਪਿ ਯਾਚਿ ਸਿਰਸਿ ਪਞ੍ਜਲਿਕਤੋ.

ਤਤੋ ਸੋ ਦੇਵਪੁਤ੍ਤੋ ਏਵਮਾਹ ‘ਕਤਮਂ ਤਂ, ਮਾਰਿਸ, ਕੁਲਂ, ਯਂ ਤ੍ਵਂ ਅਭਿਕ੍ਖਣਂ ਕਿਤ੍ਤਯਸਿ ਪੁਨਪ੍ਪੁਨ’ਨ੍ਤਿ. ‘ਦੁਕੂਲੋ ਚ ਤਾਪਸੋ ਪਾਰਿਕਾ ਚ ਤਾਪਸੀ’ਤਿ. ਸੋ ਤਸ੍ਸ ਵਚਨਂ ਸੁਤ੍ਵਾ ਤੁਟ੍ਠੋ ਸਮ੍ਪਟਿਚ੍ਛਿ ‘ਸਾਧੁ, ਮਾਰਿਸ, ਯੋ ਤਵ ਛਨ੍ਦੋ, ਸੋ ਹੋਤੁ, ਆਕਙ੍ਖਮਾਨੋ ਅਹਂ, ਮਾਰਿਸ, ਪਤ੍ਥਿਤੇ ਕੁਲੇ ਉਪ੍ਪਜ੍ਜੇਯ੍ਯਂ, ਕਿਮ੍ਹਿ ਕੁਲੇ ਉਪ੍ਪਜ੍ਜਾਮਿ ਅਣ੍ਡਜੇ ਵਾ ਜਲਾਬੁਜੇ ਵਾ ਸਂਸੇਦਜੇ ਵਾ ਓਪਪਾਤਿਕੇ ਵਾ’ਤਿ? ‘ਜਲਾਬੁਜਾਯ, ਮਾਰਿਸ, ਯੋਨਿਯਾ ਉਪ੍ਪਜ੍ਜਾਹੀ’ਤਿ. ਅਥ ਸਕ੍ਕੋ ਦੇਵਾਨਮਿਨ੍ਦੋ ਉਪ੍ਪਤ੍ਤਿਦਿਵਸਂ ਵਿਗਣੇਤ੍ਵਾ ਦੁਕੂਲਸ੍ਸ ਤਾਪਸਸ੍ਸ ਆਰੋਚੇਸਿ ‘ਅਸੁਕਸ੍ਮਿਂ ਨਾਮ ਦਿਵਸੇ ਤਾਪਸੀ ਉਤੁਨੀ ਭਵਿਸ੍ਸਤਿ ਪੁਪ੍ਫਵਤੀ, ਤਦਾ ਤ੍ਵਂ, ਭਨ੍ਤੇ, ਦਕ੍ਖਿਣੇਨ ਹਤ੍ਥਙ੍ਗੁਟ੍ਠੇਨ ਨਾਭਿਂ ਪਰਾਮਸੇਯ੍ਯਾਸੀ’ਤਿ. ਤਸ੍ਮਿਂ, ਮਹਾਰਾਜ, ਦਿਵਸੇ ਤਾਪਸੀ ਚ ਉਤੁਨੀ ਪੁਪ੍ਫਵਤੀ ਅਹੋਸਿ, ਦੇਵਪੁਤ੍ਤੋ ਚ ਤਤ੍ਥੂਪਗੋ ਪਚ੍ਚੁਪਟ੍ਠਿਤੋ ਅਹੋਸਿ, ਤਾਪਸੋ ਚ ਦਕ੍ਖਿਣੇਨ ਹਤ੍ਥਙ੍ਗੁਟ੍ਠੇਨ ਤਾਪਸਿਯਾ ਨਾਭਿਂ ਪਰਾਮਸਿ, ਇਤਿ ਤੇ ਤਯੋ ਸਨ੍ਨਿਪਾਤਾ ਅਹੇਸੁਂ, ਨਾਭਿਪਰਾਮਸਨੇਨ ਤਾਪਸਿਯਾ ਰਾਗੋ ਉਦਪਾਦਿ, ਸੋ ਪਨਸ੍ਸਾ ਰਾਗੋ ਨਾਭਿਪਰਾਮਸਨਂ ਪਟਿਚ੍ਚ ਮਾ ਤ੍ਵਂ ਸਨ੍ਨਿਪਾਤਂ ਅਜ੍ਝਾਚਾਰਮੇਵ ਮਞ੍ਞਿ, ਊਹਸਨਮ੍ਪਿ [ਹਸਨਮ੍ਪਿ (ਕ.)] ਸਨ੍ਨਿਪਾਤੋ, ਉਲ੍ਲਪਨਮ੍ਪਿ ਸਨ੍ਨਿਪਾਤੋ, ਉਪਨਿਜ੍ਝਾਯਨਮ੍ਪਿ ਸਨ੍ਨਿਪਾਤੋ, ਪੁਬ੍ਬਭਾਗਭਾਵਤੋ ਰਾਗਸ੍ਸ ਉਪ੍ਪਾਦਾਯ ਆਮਸਨੇਨ ਸਨ੍ਨਿਪਾਤੋ ਜਾਯਤਿ, ਸਨ੍ਨਿਪਾਤਾ ਓਕ੍ਕਮਨਂ ਹੋਤੀਤਿ.

‘‘ਅਨਜ੍ਝਾਚਾਰੇਪਿ, ਮਹਾਰਾਜ, ਪਰਾਮਸਨੇਨ ਗਬ੍ਭਾਵਕ੍ਕਨ੍ਤਿ ਹੋਤਿ. ਯਥਾ, ਮਹਾਰਾਜ, ਅਗ੍ਗਿ ਜਲਮਾਨੋ ਅਪਰਾਮਸਨੋਪਿ ਉਪਗਤਸ੍ਸ ਸੀਤਂ ਬ੍ਯਪਹਨ੍ਤਿ, ਏਵਮੇਵ ਖੋ, ਮਹਾਰਾਜ, ਅਨਜ੍ਝਾਚਾਰੇਪਿ ਪਰਾਮਸਨੇਨ ਗਬ੍ਭਾਵਕ੍ਕਨ੍ਤਿ ਹੋਤਿ.

‘‘ਚਤੁਨ੍ਨਂ, ਮਹਾਰਾਜ, ਵਸੇਨ ਸਤ੍ਤਾਨਂ ਗਬ੍ਭਾਵਕ੍ਕਨ੍ਤਿ ਹੋਤਿ ਕਮ੍ਮਵਸੇਨ ਯੋਨਿਵਸੇਨ ਕੁਲਵਸੇਨ ਆਯਾਚਨਵਸੇਨ, ਅਪਿ ਚ ਸਬ੍ਬੇਪੇਤੇ ਸਤ੍ਤਾ ਕਮ੍ਮਸਮ੍ਭਵਾ ਕਮ੍ਮਸਮੁਟ੍ਠਾਨਾ.

‘‘ਕਥਂ, ਮਹਾਰਾਜ, ਕਮ੍ਮਵਸੇਨ ਸਤ੍ਤਾਨਂ ਗਬ੍ਭਾਵਕ੍ਕਨ੍ਤਿ ਹੋਤਿ? ਉਸ੍ਸਨ੍ਨਕੁਸਲਮੂਲਾ, ਮਹਾਰਾਜ, ਸਤ੍ਤਾ ਯਦਿਚ੍ਛਕਂ ਉਪ੍ਪਜ੍ਜਨ੍ਤਿ ਖਤ੍ਤਿਯਮਹਾਸਾਲਕੁਲੇ ਵਾ ਬ੍ਰਾਹ੍ਮਣਮਹਾਸਾਲਕੁਲੇ ਵਾ ਗਹਪਤਿਮਹਾਸਾਲਕੁਲੇ ਵਾ ਦੇਵੇਸੁ ਵਾ ਅਣ੍ਡਜਾਯ ਵਾ ਯੋਨਿਯਾ ਜਲਾਬੁਜਾਯ ਵਾ ਯੋਨਿਯਾ ਸਂਸੇਦਜਾਯ ਵਾ ਯੋਨਿਯਾ ਓਪਪਾਤਿਕਾਯ ਵਾ ਯੋਨਿਯਾ. ਯਥਾ, ਮਹਾਰਾਜ, ਪੁਰਿਸੋ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਪਹੂਤਜਾਤਰੂਪਰਜਤੋ ਪਹੂਤਵਿਤ੍ਤੂਪਕਰਣੋ ਪਹੂਤਧਨਧਞ੍ਞੋ ਪਹੂਤਞਾਤਿਪਕ੍ਖੋ ਦਾਸਿਂ ਵਾ ਦਾਸਂ ਵਾ ਖੇਤ੍ਤਂ ਵਾ ਵਤ੍ਥੁਂ ਵਾ ਗਾਮਂ ਵਾ ਨਿਗਮਂ ਵਾ ਜਨਪਦਂ ਵਾ ਯਂ ਕਿਞ੍ਚਿ ਮਨਸਾ ਅਭਿਪਤ੍ਥਿਤਂ, ਯਦਿਚ੍ਛਕਂ ਦ੍ਵਿਗੁਣਤਿਗੁਣਮ੍ਪਿ ਧਨਂ ਦਤ੍ਵਾ ਕਿਣਾਤਿ, ਏਵਮੇਵ ਖੋ, ਮਹਾਰਾਜ, ਉਸ੍ਸਨ੍ਨਕੁਸਲਮੂਲਾ ਸਤ੍ਤਾ ਯਦਿਚ੍ਛਕਂ ਉਪ੍ਪਜ੍ਜਨ੍ਤਿ ਖਤ੍ਤਿਯਮਹਾਸਾਲਕੁਲੇ ਵਾ ਬ੍ਰਾਹ੍ਮਣਮਹਾਸਾਲਕੁਲੇ ਵਾ ਗਹਪਤਿਮਹਾਸਾਲਕੁਲੇ ਵਾ ਦੇਵੇਸੁ ਵਾ ਅਣ੍ਡਜਾਯ ਵਾ ਯੋਨਿਯਾ ਜਲਾਬੁਜਾਯ ਵਾ ਯੋਨਿਯਾ ਸਂਸੇਦਜਯ ਵਾ ਯੋਨਿਯਾ ਓਪਪਾਤਿਕਾਯ ਵਾ ਯੋਨਿਯਾ. ਏਵਂ ਕਮ੍ਮਵਸੇਨ ਸਤ੍ਤਾਨਂ ਗਬ੍ਭਾਵਕ੍ਕਨ੍ਤਿ ਹੋਤਿ.

‘‘ਕਥਂ ਯੋਨਿਵਸੇਨ ਸਤ੍ਤਾਨਂ ਗਬ੍ਭਾਵਕ੍ਕਨ੍ਤਿ ਹੋਤਿ? ਕੁਕ੍ਕੁਟਾਨਂ, ਮਹਾਰਾਜ, ਵਾਤੇਨ ਗਬ੍ਭਾਵਕ੍ਕਨ੍ਤਿ ਹੋਤਿ. ਬਲਾਕਾਨਂ ਮੇਘਸਦ੍ਦੇਨ ਗਬ੍ਭਾਵਕ੍ਕਨ੍ਤਿ ਹੋਤਿ. ਸਬ੍ਬੇਪਿ ਦੇਵਾ ਅਗਬ੍ਭਸੇਯ੍ਯਕਾ ਸਤ੍ਤਾ ਯੇਵ, ਤੇਸਂ ਨਾਨਾਵਣ੍ਣੇਨ ਗਬ੍ਭਾਵਕ੍ਕਨ੍ਤਿ ਹੋਤਿ. ਯਥਾ, ਮਹਾਰਾਜ, ਮਨੁਸ੍ਸਾ ਨਾਨਾਵਣ੍ਣੇਨ ਮਹਿਯਾ ਚਰਨ੍ਤਿ, ਕੇਚਿ ਪੁਰਤੋ ਪਟਿਚ੍ਛਾਦੇਨ੍ਤਿ, ਕੇਚਿ ਪਚ੍ਛਤੋ ਪਟਿਚ੍ਛਾਦੇਨ੍ਤਿ, ਕੇਚਿ ਨਗ੍ਗਾ ਹੋਨ੍ਤਿ, ਕੇਚਿ ਭਣ੍ਡੂ ਹੋਨ੍ਤਿ ਸੇਤਪਟਧਰਾ, ਕੇਚਿ ਮੋਲ਼ਿਬਦ੍ਧਾ ਹੋਨ੍ਤਿ, ਕੇਚਿ ਭਣ੍ਡੂ ਕਾਸਾਵਵਸਨਾ ਹੋਨ੍ਤਿ, ਕੇਚਿ ਕਾਸਾਵਵਸਨਾ ਮੋਲ਼ਿਬਦ੍ਧਾ ਹੋਨ੍ਤਿ, ਕੇਚਿ ਜਟਿਨੋ ਵਾਕਚੀਰਧਰਾ [ਵਾਕਚੀਰਾ (ਕ.)] ਹੋਨ੍ਤਿ, ਕੇਚਿ ਚਮ੍ਮਵਸਨਾ ਹੋਨ੍ਤਿ, ਕੇਚਿ ਰਸ੍ਮਿਯੋ ਨਿਵਾਸੇਨ੍ਤਿ, ਸਬ੍ਬੇਪੇਤੇ ਮਨੁਸ੍ਸਾ ਨਾਨਾਵਣ੍ਣੇਨ ਮਹਿਯਾ ਚਰਨ੍ਤਿ, ਏਵਮੇਵ ਖੋ, ਮਹਾਰਾਜ, ਸਤ੍ਤਾ ਯੇਵ ਤੇ ਸਬ੍ਬੇ, ਤੇਸਂ ਨਾਨਾਵਣ੍ਣੇਨ ਗਬ੍ਭਾਵਕ੍ਕਨ੍ਤਿ ਹੋਤਿ. ਏਵਂ ਯੋਨਿਵਸੇਨ ਸਤ੍ਤਾਨਂ ਗਬ੍ਭਾਵਕ੍ਕਨ੍ਤਿ ਹੋਤਿ.

‘‘ਕਥਂ ਕੁਲਵਸੇਨ ਸਤ੍ਤਾਨਂ ਗਬ੍ਭਾਵਕ੍ਕਨ੍ਤਿ ਹੋਤਿ? ਕੁਲਂ ਨਾਮ, ਮਹਾਰਾਜ, ਚਤ੍ਤਾਰਿ ਕੁਲਾਨਿ ਅਣ੍ਡਜਂ ਜਲਾਬੁਜਂ ਸਂਸੇਦਜਂ ਓਪਪਾਤਿਕਂ. ਯਦਿ ਤਤ੍ਥ ਗਨ੍ਧਬ੍ਬੋ ਯਤੋ ਕੁਤੋਚਿ ਆਗਨ੍ਤ੍ਵਾ ਅਣ੍ਡਜੇ ਕੁਲੇ ਉਪ੍ਪਜ੍ਜਤਿ, ਸੋ ਤਤ੍ਥ ਅਣ੍ਡਜੋ ਹੋਤਿ…ਪੇ… ਜਲਾਬੁਜੇ ਕੁਲੇ…ਪੇ… ਸਂਸੇਦਜੇ ਕੁਲੇ…ਪੇ… ਓਪਪਾਤਿਕੇ ਕੁਲੇ ਉਪ੍ਪਜ੍ਜਤਿ, ਸੋ ਤਤ੍ਥ ਓਪਪਾਤਿਕੋ ਹੋਤਿ. ਤੇਸੁ ਤੇਸੁ ਕੁਲੇਸੁ ਤਾਦਿਸਾ ਯੇਵ ਸਤ੍ਤਾ ਸਮ੍ਭਵਨ੍ਤਿ. ਯਥਾ, ਮਹਾਰਾਜ, ਹਿਮਵਤਿ ਨੇਰੁਪਬ੍ਬਤਂ ਯੇ ਕੇਚਿ ਮਿਗਪਕ੍ਖਿਨੋ ਉਪੇਨ੍ਤਿ, ਸਬ੍ਬੇ ਤੇ ਸਕਵਣ੍ਣਂ ਵਿਜਹਿਤ੍ਵਾ ਸੁਵਣ੍ਣਵਣ੍ਣਾ ਹੋਨ੍ਤਿ, ਏਵਮੇਵ ਖੋ, ਮਹਾਰਾਜ, ਯੋ ਕੋਚਿ ਗਨ੍ਧਬ੍ਬੋ ਯਤੋ ਕੁਤੋਚਿ ਆਗਨ੍ਤ੍ਵਾ ਅਣ੍ਡਜਂ ਯੋਨਿਂ ਉਪਗਨ੍ਤ੍ਵਾ ਸਭਾਵਵਣ੍ਣਂ ਵਿਜਹਿਤ੍ਵਾ ਅਣ੍ਡਜੋ ਹੋਤਿ…ਪੇ… ਜਲਾਬੁਜਂ…ਪੇ… ਸਂਸੇਦਜਂ…ਪੇ… ਓਪਪਾਤਿਕਂ ਯੋਨਿਂ ਉਪਗਨ੍ਤ੍ਵਾ ਸਭਾਵਵਣ੍ਣਂ ਵਿਜਹਿਤ੍ਵਾ ਓਪਪਾਤਿਕੋ ਹੋਤਿ, ਏਵਂ ਕੁਲਵਸੇਨ ਸਤ੍ਤਾਨਂ ਗਬ੍ਭਾਵਕ੍ਕਨ੍ਤਿ ਹੋਤਿ.

‘‘ਕਥਂ ਆਯਾਚਨਵਸੇਨ ਸਤ੍ਤਾਨਂ ਗਬ੍ਭਾਵਕ੍ਕਨ੍ਤਿ ਹੋਤਿ? ਇਧ, ਮਹਾਰਾਜ, ਕੁਲਂ ਹੋਤਿ ਅਪੁਤ੍ਤਕਂ ਬਹੁਸਾਪਤੇਯ੍ਯਂ ਸਦ੍ਧਂ ਪਸਨ੍ਨਂ ਸੀਲਵਨ੍ਤਂ ਕਲ੍ਯਾਣਧਮ੍ਮਂ ਤਪਨਿਸ੍ਸਿਤਂ, ਦੇਵਪੁਤ੍ਤੋ ਚ ਉਸ੍ਸਨ੍ਨਕੁਸਲਮੂਲੋ ਚਵਨਧਮ੍ਮੋ ਹੋਤਿ. ਅਥ ਸਕ੍ਕੋ ਦੇਵਾਨਮਿਨ੍ਦੋ ਤਸ੍ਸ ਕੁਲਸ੍ਸ ਅਨੁਕਮ੍ਪਾਯ ਤਂ ਦੇਵਪੁਤ੍ਤਂ ਆਯਾਚਤਿ ‘ਪਣਿਧੇਹਿ, ਮਾਰਿਸ, ਅਸੁਕਸ੍ਸ ਕੁਲਸ੍ਸ ਮਹੇਸਿਯਾ ਕੁਚ੍ਛਿ’ਨ੍ਤਿ. ਸੋ ਤਸ੍ਸ ਆਯਾਚਨਹੇਤੁ ਤਂ ਕੁਲਂ ਪਣਿਧੇਤਿ. ਯਥਾ, ਮਹਾਰਾਜ, ਮਨੁਸ੍ਸਾ ਪੁਞ੍ਞਕਾਮਾ ਸਮਣਂ ਮਨੋਭਾਵਨੀਯਂ ਆਯਾਚਿਤ੍ਵਾ ਗੇਹਂ ਉਪਨੇਨ੍ਤਿ, ਅਯਂ ਉਪਗਨ੍ਤ੍ਵਾ ਸਬ੍ਬਸ੍ਸ ਕੁਲਸ੍ਸ ਸੁਖਾਵਹੋ ਭਵਿਸ੍ਸਤੀਤਿ. ਏਵਮੇਵ ਖੋ, ਮਹਾਰਾਜ, ਸਕ੍ਕੋ ਦੇਵਾਨਮਿਨ੍ਦੋ ਤਂ ਦੇਵਪੁਤ੍ਤਂ ਆਯਾਚਿਤ੍ਵਾ ਤਂ ਕੁਲਂ ਉਪਨੇਤਿ. ਏਵਂ ਆਯਾਚਨਵਸੇਨ ਸਤ੍ਤਾਨਂ ਗਬ੍ਭਾਵਕ੍ਕਨ੍ਤਿ ਹੋਤਿ.

‘‘ਸਾਮੋ, ਮਹਾਰਾਜ, ਕੁਮਾਰੋ ਸਕ੍ਕੇਨ ਦੇਵਾਨਮਿਨ੍ਦੇਨ ਆਯਾਚਿਤੋ ਪਾਰਿਕਾਯ ਤਾਪਸਿਯਾ ਕੁਚ੍ਛਿਂ ਓਕ੍ਕਨ੍ਤੋ. ਸਾਮੋ, ਮਹਾਰਾਜ, ਕੁਮਾਰੋ ਕਤਪੁਞ੍ਞੋ, ਮਾਤਾਪਿਤਰੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ, ਆਯਾਚਕੋ ਸਕ੍ਕੋ, ਤਿਣ੍ਣਂ ਚੇਤੋਪਣਿਧਿਯਾ ਸਾਮੋ ਕੁਮਾਰੋ ਨਿਬ੍ਬਤ੍ਤੋ. ਇਧ, ਮਹਾਰਾਜ, ਨਯਕੁਸਲੋ ਪੁਰਿਸੋ ਸੁਕਟ੍ਠੇ ਅਨੂਪਖੇਤ੍ਤੇ ਬੀਜਂ ਰੋਪੇਯ੍ਯ, ਅਪਿ ਨੁ ਤਸ੍ਸ ਬੀਜਸ੍ਸ ਅਨ੍ਤਰਾਯਂ ਵਿਵਜ੍ਜੇਨ੍ਤਸ੍ਸ ਵੁਡ੍ਢਿਯਾ ਕੋਚਿ ਅਨ੍ਤਰਾਯੋ ਭਵੇਯ੍ਯਾ’’ਤਿ? ‘‘ਨ ਹਿ, ਭਨ੍ਤੇ, ਨਿਰੁਪਘਾਤਂ ਬੀਜਂ ਖਿਪ੍ਪਂ ਸਂਵਿਰੁਹੇਯ੍ਯਾ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਸਾਮੋ ਕੁਮਾਰੋ ਮੁਤ੍ਤੋ ਉਪ੍ਪਨ੍ਨਨ੍ਤਰਾਯੇਹਿ ਤਿਣ੍ਣਂ ਚੇਤੋਪਣਿਧਿਯਾ ਨਿਬ੍ਬਤ੍ਤੋ.

‘‘ਅਪਿ ਨੁ ਖੋ, ਮਹਾਰਾਜ, ਸੁਤਪੁਬ੍ਬਂ ਤਯਾ ਇਸੀਨਂ ਮਨੋਪਦੋਸੇਨ ਇਦ੍ਧੋ ਫੀਤੋ ਮਹਾਜਨਪਦੋ ਸਜਨੋ ਸਮੁਚ੍ਛਿਨ੍ਨੋ’’ਤਿ? ‘‘ਆਮ, ਭਨ੍ਤੇ, ਸੁਯ੍ਯਤਿ. ਮਹਿਯਾ ਦਣ੍ਡਕਾਰਞ੍ਞਂ [ਦਣ੍ਡਕੀਰਞ੍ਞਂ (ਮ. ਨਿ. ੨.੬੫)] ਮਜ੍ਝਾਰਞ੍ਞਂ ਕਾਲਿਙ੍ਗਾਰਞ੍ਞਂ ਮਾਤਙ੍ਗਾਰਞ੍ਞਂ, ਸਬ੍ਬਂ ਤਂ ਅਰਞ੍ਞਂ ਅਰਞ੍ਞਭੂਤਂ, ਸਬ੍ਬੇਪੇਤੇ ਜਨਪਦਾ ਇਸੀਨਂ ਮਨੋਪਦੋਸੇਨ ਖਯਂ ਗਤਾ’’ਤਿ. ‘‘ਯਦਿ, ਮਹਾਰਾਜ, ਤੇਸਂ ਮਨੋਪਦੋਸੇਨ ਸੁਸਮਿਦ੍ਧਾ ਜਨਪਦਾ ਉਚ੍ਛਿਜ੍ਜਨ੍ਤਿ, ਅਪਿ ਨੁ ਖੋ ਤੇਸਂ ਮਨੋਪਸਾਦੇਨ ਕਿਞ੍ਚਿ ਨਿਬ੍ਬਤ੍ਤੇਯ੍ਯਾ’’ਤਿ? ‘‘ਆਮ ਭਨ੍ਤੇ’’ਤਿ. ‘‘ਤੇਨ ਹਿ, ਮਹਾਰਾਜ, ਸਾਮੋ ਕੁਮਾਰੋ ਤਿਣ੍ਣਂ ਬਲਵਨ੍ਤਾਨਂ ਚੇਤੋਪਸਾਦੇਨ ਨਿਬ੍ਬਤ੍ਤੋ ਇਸਿਨਿਮ੍ਮਿਤੋ ਦੇਵਨਿਮ੍ਮਿਤੋ ਪੁਞ੍ਞਨਿਮ੍ਮਿਤੋਤਿ. ਏਵਮੇਤਂ, ਮਹਾਰਾਜ, ਧਾਰੇਹਿ.

‘‘ਤਯੋਮੇ, ਮਹਾਰਾਜ, ਦੇਵਪੁਤ੍ਤਾ ਸਕ੍ਕੇਨ ਦੇਵਾਨਮਿਨ੍ਦੇਨ ਆਯਾਚਿਤਾ ਕੁਲਂ ਉਪ੍ਪਨ੍ਨਾ. ਕਤਮੇ ਤਯੋ? ਸਾਮੋ ਕੁਮਾਰੋ ਮਹਾਪਨਾਦੋ ਕੁਸਰਾਜਾ, ਤਯੋਪੇਤੇ ਬੋਧਿਸਤ੍ਤਾ’’ਤਿ. ‘‘ਸੁਨਿਦ੍ਦਿਟ੍ਠਾ, ਭਨ੍ਤੇ ਨਾਗਸੇਨ, ਗਬ੍ਭਾਵਕ੍ਕਨ੍ਤਿ, ਸੁਕਥਿਤਂ ਕਾਰਣਂ, ਅਨ੍ਧਕਾਰੋ ਆਲੋਕੋ ਕਤੋ, ਜਟਾ ਵਿਜਟਿਤਾ, ਨਿਚ੍ਛੁਦ੍ਧਾ ਪਰਵਾਦਾ, ਏਵਮੇਤਂ ਤਥਾ ਸਮ੍ਪਟਿਚ੍ਛਾਮੀ’’ਤਿ.

ਗਬ੍ਭਾਵਕ੍ਕਨ੍ਤਿਪਞ੍ਹੋ ਛਟ੍ਠੋ.