੫. ਸਿਵਿਰਾਜਚਕ੍ਖੁਦਾਨਪਞ੍ਹੋ

੫. ‘‘ਭਨ੍ਤੇ ਨਾਗਸੇਨ, ਤੁਮ੍ਹੇ ਏਵਂ ਭਣਥ ‘ਸਿਵਿਰਾਜੇਨ ਯਾਚਕਸ੍ਸ ਚਕ੍ਖੂਨਿ ਦਿਨ੍ਨਾਨਿ, ਅਨ੍ਧਸ੍ਸ ਸਤੋ ਪੁਨ ਦਿਬ੍ਬਚਕ੍ਖੂਨਿ ਉਪ੍ਪਨ੍ਨਾਨੀ’ਤਿ, ਏਤਮ੍ਪਿ ਵਚਨਂ ਸਕਸਟਂ ਸਨਿਗ੍ਗਹਂ ਸਦੋਸਂ ‘ਹੇਤੁਸਮੁਗ੍ਘਾਤੇ ਅਹੇਤੁਸ੍ਮਿਂ ਅਵਤ੍ਥੁਸ੍ਮਿਂ ਨਤ੍ਥਿ ਦਿਬ੍ਬਚਕ੍ਖੁਸ੍ਸ ਉਪ੍ਪਾਦੋ’ਤਿ ਸੁਤ੍ਤੇ ਵੁਤ੍ਤਂ, ਯਦਿ, ਭਨ੍ਤੇ ਨਾਗਸੇਨ, ਸਿਵਿਰਾਜੇਨ ਯਾਚਕਸ੍ਸ ਚਕ੍ਖੂਨਿ ਦਿਨ੍ਨਾਨਿ, ਤੇਨ ਹਿ ‘ਪੁਨ ਦਿਬ੍ਬਚਕ੍ਖੂਨਿ ਉਪ੍ਪਨ੍ਨਾਨੀ’ਤਿ ਯਂ ਵਚਨਂ, ਤਂ ਮਿਚ੍ਛਾ; ਯਦਿ ਦਿਬ੍ਬਚਕ੍ਖੂਨਿ ਉਪ੍ਪਨ੍ਨਾਨਿ, ਤੇਨ ਹਿ ‘ਸਿਵਿਰਾਜੇਨ ਯਾਚਕਸ੍ਸ ਚਕ੍ਖੂਨਿ ਦਿਨ੍ਨਾਨੀ’ਤਿ ਯਂ ਵਚਨਂ, ਤਮ੍ਪਿ ਮਿਚ੍ਛਾ. ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਗਣ੍ਠਿਤੋਪਿ ਗਣ੍ਠਿਤਰੋ ਵੇਠਤੋਪਿ ਵੇਠਤਰੋ ਗਹਨਤੋਪਿ ਗਹਨਤਰੋ, ਸੋ ਤਵਾਨੁਪ੍ਪਤ੍ਤੋ, ਤਤ੍ਥ ਛਨ੍ਦਮਭਿਜਨੇਹਿ ਨਿਬ੍ਬਾਹਨਾਯ ਪਰਵਾਦਾਨਂ ਨਿਗ੍ਗਹਾਯਾ’’ਤਿ.

‘‘ਦਿਨ੍ਨਾਨਿ, ਮਹਾਰਾਜ, ਸਿਵਿਰਾਜੇਨ ਯਾਚਕਸ੍ਸ ਚਕ੍ਖੂਨਿ, ਤਤ੍ਥ ਮਾ ਵਿਮਤਿਂ ਉਪ੍ਪਾਦੇਹਿ, ਪੁਨ ਦਿਬ੍ਬਾਨਿ ਚ ਚਕ੍ਖੂਨਿ ਉਪ੍ਪਨ੍ਨਾਨਿ, ਤਤ੍ਥਾਪਿ ਮਾ ਵਿਮਤਿਂ ਜਨੇਹੀ’’ਤਿ. ‘‘ਅਪਿ ਨੁ ਖੋ, ਭਨ੍ਤੇ ਨਾਗਸੇਨ, ਹੇਤੁਸਮੁਗ੍ਘਾਤੇ ਅਹੇਤੁਸ੍ਮਿਂ ਅਵਤ੍ਥੁਸ੍ਮਿਂ ਦਿਬ੍ਬਚਕ੍ਖੁ ਉਪ੍ਪਜ੍ਜਤੀ’’ਤਿ? ‘‘ਨ ਹਿ, ਮਹਾਰਾਜਾ’’ਤਿ. ‘‘ਕਿਂ ਪਨ, ਭਨ੍ਤੇ, ਏਤ੍ਥ ਕਾਰਣਂ, ਯੇਨ ਕਾਰਣੇਨ ਹੇਤੁਸਮੁਗ੍ਘਾਤੇ ਅਹੇਤੁਸ੍ਮਿਂ ਅਵਤ੍ਥੁਸ੍ਮਿਂ ਦਿਬ੍ਬਚਕ੍ਖੁ ਉਪ੍ਪਜ੍ਜਤਿ, ਇਙ੍ਘ ਤਾਵ ਕਾਰਣੇਨ ਮਂ ਸਞ੍ਞਾਪੇਹੀ’’ਤਿ?

‘‘ਕਿਂ ਪਨ, ਮਹਾਰਾਜ, ਅਤ੍ਥਿ ਲੋਕੇ ਸਚ੍ਚਂ ਨਾਮ, ਯੇਨ ਸਚ੍ਚਵਾਦਿਨੋ ਸਚ੍ਚਕਿਰਿਯਂ ਕਰੋਨ੍ਤੀ’’ਤਿ? ‘‘ਆਮ, ਭਨ੍ਤੇ, ਅਤ੍ਥਿ ਲੋਕੇ ਸਚ੍ਚਂ ਨਾਮ, ਸਚ੍ਚੇਨ, ਭਨ੍ਤੇ ਨਾਗਸੇਨ, ਸਚ੍ਚਵਾਦਿਨੋ ਸਚ੍ਚਕਿਰਿਯਂ ਕਤ੍ਵਾ ਦੇਵਂ ਵਸ੍ਸਾਪੇਨ੍ਤਿ, ਅਗ੍ਗਿਂ ਨਿਬ੍ਬਾਪੇਨ੍ਤਿ, ਵਿਸਂ ਪਟਿਹਨਨ੍ਤਿ, ਅਞ੍ਞਮ੍ਪਿ ਵਿਵਿਧਂ ਕਤ੍ਤਬ੍ਬਂ ਕਰੋਨ੍ਤੀ’’ਤਿ. ‘‘ਤੇਨ ਹਿ, ਮਹਾਰਾਜ, ਯੁਜ੍ਜਤਿ ਸਮੇਤਿ ਸਿਵਿਰਾਜਸ੍ਸ ਸਚ੍ਚਬਲੇਨ ਦਿਬ੍ਬਚਕ੍ਖੂਨਿ ਉਪ੍ਪਨ੍ਨਾਨੀਤਿ, ਸਚ੍ਚਬਲੇਨ, ਮਹਾਰਾਜ, ਅਵਤ੍ਥੁਸ੍ਮਿਂ ਦਿਬ੍ਬਚਕ੍ਖੁ ਉਪ੍ਪਜ੍ਜਤਿ, ਸਚ੍ਚਂ ਯੇਵ ਤਤ੍ਥ ਵਤ੍ਥੁ ਭਵਤਿ ਦਿਬ੍ਬਚਕ੍ਖੁਸ੍ਸ ਉਪ੍ਪਾਦਾਯ.

‘‘ਯਥਾ, ਮਹਾਰਾਜ, ਯੇ ਕੇਚਿ ਸਤ੍ਤਾ ਸਚ੍ਚਮਨੁਗਾਯਨ੍ਤਿ ‘ਮਹਾਮੇਘੋ ਪਵਸ੍ਸਤੂ’ਤਿ, ਤੇਸਂ ਸਹ ਸਚ੍ਚਮਨੁਗੀਤੇਨ ਮਹਾਮੇਘੋ ਪਵਸ੍ਸਤਿ, ਅਪਿ ਨੁ ਖੋ, ਮਹਾਰਾਜ, ਅਤ੍ਥਿ ਆਕਾਸੇ ਵਸ੍ਸਹੇਤੁ ਸਨ੍ਨਿਚਿਤੋ ‘ਯੇਨ ਹੇਤੁਨਾ ਮਹਾਮੇਘੋ ਪਵਸ੍ਸਤੀ’’’ਤਿ? ‘‘ਨ ਹਿ, ਭਨ੍ਤੇ, ਸਚ੍ਚਂ ਯੇਵ ਤਤ੍ਥ ਹੇਤੁ ਭਵਤਿ ਮਹਤੋ ਮੇਘਸ੍ਸ ਪਵਸ੍ਸਨਾਯਾ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਨਤ੍ਥਿ ਤਸ੍ਸ ਪਕਤਿਹੇਤੁ, ਸਚ੍ਚਂ ਯੇਵੇਤ੍ਥ ਵਤ੍ਥੁ ਭਵਤਿ ਦਿਬ੍ਬਚਕ੍ਖੁਸ੍ਸ ਉਪ੍ਪਾਦਾਯਾਤਿ.

‘‘ਯਥਾ ਵਾ ਪਨ, ਮਹਾਰਾਜ, ਯੇ ਕੇਚਿ ਸਤ੍ਤਾ ਸਚ੍ਚਮਨੁਗਾਯਨ੍ਤਿ ‘ਜਲਿਤਪਜ੍ਜਲਿਤਮਹਾਅਗ੍ਗਿਕ੍ਖਨ੍ਧੋ ਪਟਿਨਿਵਤ੍ਤਤੂ’ਤਿ, ਤੇਸਂ ਸਹ ਸਚ੍ਚਮਨੁਗੀਤੇਨ ਜਲਿਤਪਜ੍ਜਲਿਤਮਹਾਅਗ੍ਗਿਕ੍ਖਨ੍ਧੋ ਖਣੇਨ ਪਟਿਨਿਵਤ੍ਤਤਿ. ਅਪਿ ਨੁ ਖੋ, ਮਹਾਰਾਜ, ਅਤ੍ਥਿ ਤਸ੍ਮਿਂ ਜਲਿਤਪਜ੍ਜਲਿਤੇ ਮਹਾਅਗ੍ਗਿਕ੍ਖਨ੍ਧੇ ਹੇਤੁ ਸਨ੍ਨਿਚਿਤੋ ‘ਯੇਨ ਹੇਤੁਨਾ ਜਲਿਤਪਜ੍ਜਲਿਤਮਹਾਅਗ੍ਗਿਕ੍ਖਨ੍ਧੋ ਖਣੇਨ ਪਟਿਨਿਵਤ੍ਤਤੀ’’ਤਿ? ‘‘ਨ ਹਿ, ਭਨ੍ਤੇ, ਸਚ੍ਚਂ ਯੇਵ ਤਤ੍ਥ ਵਤ੍ਥੁ ਹੋਤਿ ਤਸ੍ਸ ਜਲਿਤਪਜ੍ਜਲਿਤਸ੍ਸ ਮਹਾਅਗ੍ਗਿਕ੍ਖਨ੍ਧਸ੍ਸ ਖਣੇਨ ਪਟਿਨਿਵਤ੍ਤਨਾਯਾ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਨਤ੍ਥਿ ਤਸ੍ਸ ਪਕਤਿਹੇਤੁ, ਸਚ੍ਚਂ ਯੇਵੇਤ੍ਥ ਵਤ੍ਥੁ ਭਵਤਿ ਦਿਬ੍ਬਚਕ੍ਖੁਸ੍ਸ ਉਪ੍ਪਾਦਾਯਾਤਿ.

‘‘ਯਥਾ ਵਾ ਪਨ, ਮਹਾਰਾਜ, ਯੇ ਕੇਚਿ ਸਤ੍ਤਾ ਸਚ੍ਚਮਨੁਗਾਯਨ੍ਤਿ ‘ਵਿਸਂ ਹਲਾਹਲਂ ਅਗਦਂ ਭਵਤੂ’ਤਿ. ਤੇਸਂ ਸਹ ਸਚ੍ਚਮਨੁਗੀਤੇਨ ਵਿਸਂ ਹਲਾਹਲਂ ਖਣੇਨ ਅਗਦਂ ਭਵਤਿ, ਅਪਿ ਨੁ ਖੋ, ਮਹਾਰਾਜ, ਅਤ੍ਥਿ ਤਸ੍ਮਿਂ ਹਲਾਹਲਵਿਸੇ ਹੇਤੁ ਸਨ੍ਨਿਚਿਤੋ ‘ਯੇਨ ਹੇਤੁਨਾ ਵਿਸਂ ਹਲਾਹਲਂ ਖਣੇਨ ਅਗਦਂ ਭਵਤੀ’’’ਤਿ? ‘‘ਨ ਹਿ, ਭਨ੍ਤੇ, ਸਚ੍ਚਂ ਯੇਵ ਤਤ੍ਥ ਹੇਤੁ ਭਵਤਿ ਵਿਸਸ੍ਸ ਹਲਾਹਲਸ੍ਸ ਖਣੇਨ ਪਟਿਘਾਤਾਯਾ’’ਤਿ. ‘‘ਏਵਮੇਵ ਖੋ, ਮਹਾਰਾਜ, ਵਿਨਾ ਪਕਤਿਹੇਤੁਂ ਸਚ੍ਚਂ ਯੇਵੇਤ੍ਥ ਵਤ੍ਥੁ ਭਵਤਿ ਦਿਬ੍ਬਚਕ੍ਖੁਸ੍ਸ ਉਪ੍ਪਾਦਾਯਾਤਿ.

‘‘ਚਤੁਨ੍ਨਮ੍ਪਿ, ਮਹਾਰਾਜ, ਅਰਿਯਸਚ੍ਚਾਨਂ ਪਟਿਵੇਧਾਯ ਨਤ੍ਥਞ੍ਞਂ ਵਤ੍ਥੁ, ਸਚ੍ਚਂ ਵਤ੍ਥੁਂ ਕਤ੍ਵਾ ਚਤ੍ਤਾਰਿ ਅਰਿਯਸਚ੍ਚਾਨਿ ਪਟਿਵਿਜ੍ਝਨ੍ਤੀਤਿ. ਅਤ੍ਥਿ, ਮਹਾਰਾਜ, ਚੀਨਵਿਸਯੇ ਚੀਨਰਾਜਾ, ਸੋ ਮਹਾਸਮੁਦ੍ਦੇ ਕੀਲ਼ਿਤੁਕਾਮੋ [ਬਲਿਂ ਕਾਤੁਕਾਮੋ (ਸੀ. ਪੀ.)] ਚਤੁਮਾਸੇ ਚਤੁਮਾਸੇ ਸਚ੍ਚਕਿਰਿਯਂ ਕਤ੍ਵਾ ਸਹ ਰਥੇਨ ਅਨ੍ਤੋਮਹਾਸਮੁਦ੍ਦੇ ਯੋਜਨਂ ਪਵਿਸਤਿ, ਤਸ੍ਸ ਰਥਸੀਸਸ੍ਸ ਪੁਰਤੋ ਪੁਰਤੋ ਮਹਾਵਾਰਿਕ੍ਖਨ੍ਧੋ ਪਟਿਕ੍ਕਮਤਿ, ਨਿਕ੍ਖਨ੍ਤਸ੍ਸ ਪੁਨ ਓਤ੍ਥਰਤਿ, ਅਪਿ ਨੁ ਖੋ, ਮਹਾਰਾਜ, ਸੋ ਮਹਾਸਮੁਦ੍ਦੋ ਸਦੇਵਮਨੁਸ੍ਸੇਨਪਿ ਲੋਕੇਨ ਪਕਤਿਕਾਯਬਲੇਨ ਸਕ੍ਕਾ ਪਟਿਕ੍ਕਮਾਪੇਤੁ’’ਨ੍ਤਿ? ‘‘ਅਤਿਪਰਿਤ੍ਤਕੇਪਿ, ਭਨ੍ਤੇ, ਤਲ਼ਾਕੇ ਉਦਕਂ ਨ ਸਕ੍ਕਾ ਸਦੇਵਮਨੁਸ੍ਸੇਨਪਿ ਲੋਕੇਨ ਪਕਤਿਕਾਯਬਲੇਨ ਪਟਿਕ੍ਕਮਾਪੇਤੁਂ, ਕਿਂ ਪਨ ਮਹਾਸਮੁਦ੍ਦੇ ਉਦਕ’’ਨ੍ਤਿ? ‘‘ਇਮਿਨਾਪਿ, ਮਹਾਰਾਜ, ਕਾਰਣੇਨ ਸਚ੍ਚਬਲਂ ਞਾਤਬ੍ਬਂ ‘ਨਤ੍ਥਿ ਤਂ ਠਾਨਂ, ਯਂ ਸਚ੍ਚੇਨ ਨ ਪਤ੍ਤਬ੍ਬ’ਨ੍ਤਿ.

‘‘ਨਗਰੇ, ਮਹਾਰਾਜ, ਪਾਟਲਿਪੁਤ੍ਤੇ ਅਸੋਕੋ ਧਮ੍ਮਰਾਜਾ ਸਨੇਗਮਜਾਨਪਦਅਮਚ੍ਚਭਟਬਲਮਹਾਮਤ੍ਤੇਹਿ ਪਰਿਵੁਤੋ ਗਙ੍ਗਂ ਨਦਿਂ [ਗਙ੍ਗਾਨਦਿਂ (ਸੀ.)] ਨਵਸਲਿਲਸਮ੍ਪੁਣ੍ਣਂ ਸਮਤਿਤ੍ਥਿਕਂ ਸਮ੍ਭਰਿਤਂ ਪਞ੍ਚਯੋਜਨਸਤਾਯਾਮਂ ਯੋਜਨਪੁਥੁਲਂ ਸਨ੍ਦਮਾਨਂ ਦਿਸ੍ਵਾ ਅਮਚ੍ਚੇ ਏਵਮਾਹ ‘ਅਤ੍ਥਿ ਕੋਚਿ, ਭਣੇ, ਸਮਤ੍ਥੋ, ਯੋ ਇਮਂ ਮਹਾਗਙ੍ਗਂ ਪਟਿਸੋਤਂ ਸਨ੍ਦਾਪੇਤੁ’ਨ੍ਤਿ. ਅਮਚ੍ਚਾ ਆਹਂਸੁ ‘ਦੁਕ੍ਕਰਂ ਦੇਵਾ’ਤਿ.

‘‘ਤਸ੍ਮਿਂ ਯੇਵ ਗਙ੍ਗਾਕੂਲੇ ਠਿਤਾ ਬਨ੍ਧੁਮਤੀ ਨਾਮ ਗਣਿਕਾ ਅਸ੍ਸੋਸਿ ਰਞ੍ਞਾ ਕਿਰ ਏਵਂ ਵੁਤ੍ਤਂ ‘ਸਕ੍ਕਾ ਨੁ ਖੋ ਇਮਂ ਮਹਾਗਙ੍ਗਂ ਪਟਿਸੋਤਂ ਸਨ੍ਦਾਪੇਤੁ’ਨ੍ਤਿ, ਸਾ ਏਵਮਾਹ ‘ਅਹਞ੍ਹਿ ਨਗਰੇ ਪਾਟਲਿਪੁਤ੍ਤੇ ਗਣਿਕਾ ਰੂਪੂਪਜੀਵਿਨੀ ਅਨ੍ਤਿਮਜੀਵਿਕਾ, ਮਮ ਤਾਵ ਰਾਜਾ ਸਚ੍ਚਕਿਰਿਯਂ ਪਸ੍ਸਤੂ’ਤਿ. ਅਥ ਸਾ ਸਚ੍ਚਕਿਰਿਯਂ ਅਕਾਸਿ, ਸਹ ਤਸ੍ਸਾ ਸਚ੍ਚਕਿਰਿਯਾਯ ਖਣੇਨ ਸਾ ਮਹਾਗਙ੍ਗਾ ਗਲ਼ਗਲ਼ਾਯਨ੍ਤੀ ਪਟਿਸੋਤਂ ਸਨ੍ਦਿਤ੍ਥ ਮਹਤੋ ਜਨਕਾਯਸ੍ਸ ਪਸ੍ਸਤੋ.

‘‘ਅਥ ਰਾਜਾ ਗਙ੍ਗਾਯ ਆਵਟ੍ਟਊਮਿਵੇਗਜਨਿਤਂ ਹਲਾਹਲਸਦ੍ਦਂ ਸੁਤ੍ਵਾ ਵਿਮ੍ਹਿਤੋ ਅਚ੍ਛਰਿਯਬ੍ਭੁਤਜਾਤੋ ਅਮਚ੍ਚੇ ਏਵਮਾਹ ‘ਕਿਸ੍ਸਾਯਂ, ਭਣੇ, ਮਹਾਗਙ੍ਗਾ ਪਟਿਸੋਤਂ ਸਨ੍ਦਤੀ’ਤਿ? ‘ਬਨ੍ਧੁਮਤੀ, ਮਹਾਰਾਜ, ਗਣਿਕਾ ਤਵ ਵਚਨਂ ਸੁਤ੍ਵਾ ਸਚ੍ਚਕਿਰਿਯਂ ਅਕਾਸਿ, ਤਸ੍ਸਾ ਸਚ੍ਚਕਿਰਿਯਾਯ ਮਹਾਗਙ੍ਗਾ ਉਦ੍ਧਂਮੁਖਾ ਸਨ੍ਦਤੀ’ਤਿ.

‘‘ਅਥ ਸਂਵਿਗ੍ਗਹਦਯੋ ਰਾਜਾ ਤੁਰਿਤਤੁਰਿਤੋ ਸਯਂ ਗਨ੍ਤ੍ਵਾ ਤਂ ਗਣਿਕਂ ਪੁਚ੍ਛਿ ‘ਸਚ੍ਚਂ ਕਿਰ, ਜੇ, ਤਯਾ ਸਚ੍ਚਕਿਰਿਯਾਯ ਅਯਂ ਗਙ੍ਗਾ ਪਟਿਸੋਤਂ ਸਨ੍ਦਾਪਿਤਾ’ਤਿ? ‘ਆਮ ਦੇਵਾ’ਤਿ. ਰਾਜਾ ਆਹ ‘ਕਿਂ ਤੇ ਤਤ੍ਥ ਬਲਂ ਅਤ੍ਥਿ, ਕੋ ਵਾ ਤੇ ਵਚਨਂ ਆਦਿਯਤਿ ਅਨੁਮ੍ਮਤ੍ਤੋ, ਕੇਨ ਤ੍ਵਂ ਬਲੇਨ ਇਮਂ ਮਹਾਗਙ੍ਗਂ ਪਟਿਸੋਤਂ ਸਨ੍ਦਾਪੇਸੀ’ਤਿ? ਸਾ ਆਹ ‘ਸਚ੍ਚਬਲੇਨਾਹਂ, ਮਹਾਰਾਜ, ਇਮਂ ਮਹਾਗਙ੍ਗਂ ਪਟਿਸੋਤਂ ਸਨ੍ਦਾਪੇਸਿ’ਨ੍ਤਿ. ਰਾਜਾ ਆਹ ‘ਕਿਂ ਤੇ ਸਚ੍ਚਬਲਂ ਅਤ੍ਥਿ ਚੋਰਿਯਾ ਧੁਤ੍ਤਿਯਾ ਅਸਤਿਯਾ ਛਿਨ੍ਨਿਕਾਯ ਪਾਪਿਯਾ ਭਿਨ੍ਨਸੀਲਾਯ [ਪਾਪਿਕਾਯ ਭਿਨ੍ਨਸੀਮਾਯ (ਸੀ.)] ਹਿਰਿਅਤਿਕ੍ਕਨ੍ਤਿਕਾਯ ਅਨ੍ਧਜਨਪਲੋਭਿਕਾਯਾ’ਤਿ. ‘ਸਚ੍ਚਂ, ਮਹਾਰਾਜ, ਤਾਦਿਸਿਕਾ ਅਹਂ, ਤਾਦਿਸਿਕਾਯਪਿ ਮੇ, ਮਹਾਰਾਜ, ਸਚ੍ਚਕਿਰਿਯਾ ਅਤ੍ਥਿ, ਯਾਯਾਹਂ ਇਚ੍ਛਮਾਨਾ ਸਦੇਵਕਮ੍ਪਿ ਲੋਕਂ ਪਰਿਵਤ੍ਤੇਯ੍ਯ’ਨ੍ਤਿ. ਰਾਜਾ ਆਹ ‘ਕਤਮਾ ਪਨ ਸਾ ਹੋਤਿ ਸਚ੍ਚਕਿਰਿਯਾ, ਇਙ੍ਘ ਮਂ ਸਾਵੇਹੀ’ਤਿ. ‘ਯੋ ਮੇ, ਮਹਾਰਾਜ, ਧਨਂ ਦੇਤਿ ਖਤ੍ਤਿਯੋ ਵਾ ਬ੍ਰਾਹ੍ਮਣੋ ਵਾ ਵੇਸ੍ਸੋ ਵਾ ਸੁਦ੍ਦੋ ਵਾ ਅਞ੍ਞੋ ਵਾ ਕੋਚਿ, ਤੇਸਂ ਸਮਕਂ ਯੇਵ ਉਪਟ੍ਠਹਾਮਿ, ‘‘ਖਤ੍ਤਿਯੋ’’ਤਿ ਵਿਸੇਸੋ ਨਤ੍ਥਿ, ‘‘ਸੁਦ੍ਦੋ’’ਤਿ ਅਤਿਮਞ੍ਞਨਾ [ਅਤਿਮਞ੍ਞਮਾਨੋ (ਕ.)] ਨਤ੍ਥਿ, ਅਨੁਨਯਪ੍ਪਟਿਘਵਿਪ੍ਪਮੁਤ੍ਤਾ ਧਨਸ੍ਸਾਮਿਕਂ ਪਰਿਚਰਾਮਿ, ਏਸਾ ਮੇ ਦੇਵ ਸਚ੍ਚਕਿਰਿਯਾ, ਯਾਯਾਹਂ ਇਮਂ ਮਹਾਗਙ੍ਗਂ ਪਟਿਸੋਤਂ ਸਨ੍ਦਾਪੇਸਿ’ਨ੍ਤਿ.

‘‘ਇਤਿਪਿ, ਮਹਾਰਾਜ, ਸਚ੍ਚੇ ਠਿਤਾ ਨ ਕਿਞ੍ਚਿ ਅਤ੍ਥਂ ਨ ਵਿਨ੍ਦਨ੍ਤਿ. ਦਿਨ੍ਨਾਨਿ ਚ, ਮਹਾਰਾਜ, ਸਿਵਿਰਾਜੇਨ ਯਾਚਕਸ੍ਸ ਚਕ੍ਖੂਨਿ, ਦਿਬ੍ਬਚਕ੍ਖੂਨਿ ਚ ਉਪ੍ਪਨ੍ਨਾਨਿ, ਤਞ੍ਚ ਸਚ੍ਚਕਿਰਿਯਾਯ. ਯਂ ਪਨ ਸੁਤ੍ਤੇ ਵੁਤ੍ਤਂ ‘ਮਂਸਚਕ੍ਖੁਸ੍ਮਿਂ ਨਟ੍ਠੇ ਅਹੇਤੁਸ੍ਮਿਂ ਅਵਤ੍ਥੁਸ੍ਮਿਂ ਨਤ੍ਥਿ ਦਿਬ੍ਬਚਕ੍ਖੁਸ੍ਸ ਉਪ੍ਪਾਦੋ’ਤਿ. ਤਂ ਭਾਵਨਾਮਯਂ ਚਕ੍ਖੁਂ ਸਨ੍ਧਾਯ ਵੁਤ੍ਤਂ, ਏਵਮੇਤਂ, ਮਹਾਰਾਜ, ਧਾਰੇਹੀ’’ਤਿ. ‘‘ਸਾਧੁ, ਭਨ੍ਤੇ ਨਾਗਸੇਨ, ਸੁਨਿਬ੍ਬੇਠਿਤੋ ਪਞ੍ਹੋ, ਸੁਨਿਦ੍ਦਿਟ੍ਠੋ ਨਿਗ੍ਗਹੋ, ਸੁਮਦ੍ਦਿਤਾ ਪਰਵਾਦਾ, ਏਵਮੇਤਂ ਤਥਾ ਸਮ੍ਪਟਿਚ੍ਛਾਮੀ’’ਤਿ.

ਸਿਵਿਰਾਜਚਕ੍ਖੁਦਾਨਪਞ੍ਹੋ ਪਞ੍ਚਮੋ.